حمد

(ترجمہ سورة الفاتحة)

مولانا عبد الوحید ثاقب نعمانی رحمہ اللہ

(والد محترم الخطاط مولانا طارق بن ثاقب )

خدا ہی کیلئے مخصوص ہر حمد و ستائش ہے

اسی کی قبضہ قدرت میں روزی کی کشائش ہے

وہ پالن ہارہے، سارے جہاں کا رب اعلیٰ ہے

نہایت مہرباں ہے، اور بےحد رحم والاہے

وہی انصاف کے دن کا ہے مالک عادل وحاکم

اسی کی حکمرانی ہے ازل سے تا ابد قائم

تری ہم بندگی کرتے ہیں تو معبود ہے مطلق

تجھی سے طالب نصرت ہیں تو ہے حامی برحق

چلا تو ہم کو سیدھی راہ پر اے ہادی و مولا

انہی کی راہ، جن پر تو نے اپنا فضل فرمایا

نہ ان کی راہ جو مغضوب ہیں معتوب ہیں تیرے

بھٹکتے ہیں لیے دل میں جو رسوائی کے اندھیرے

دعائے ثاقب افسردہ دل مقبول ہو جائے

کلی امید کی میری شگفتہ پھول ہوجائے