الیکٹرانک میڈیاکی نفرت انگیزمہم پرعدالت کوحکم جاری کرناچاہیے،سپریم کورٹ میں عرضی داخل

نئی دہلی:سدرشن ٹی وی کیس میں ڈاکٹر کوٹا نیلیما نے الیکٹرانک میڈیامیں نفرت انگیزپروگراموں کے خلاف سپریم کورٹ میں درخواست دائر کی ہے۔کانگریسی لیڈر کی اہلیہ سنگیتا تیاگی نے بھی ان کے ساتھ ایک عرضی داخل کی ہے۔ انہوں نے کہاہے کہ وہ اس معاملے پر عدالت کی مددکرناچاہتی ہیں۔درخواست گزاروں کاکہنا ہے کہ ان دنوں ایک مستحکم اور تقریباََناقابل تردید رجحان واضح طور پر نظر آرہا ہے ، جس میں ٹی وی اینکرز اور ٹی وی مباحثوں میں نفرت انگیز بیانات واضح طور پر دکھائی دیتے ہیں۔یہ وہ وقت ہے جب عدالت عظمیٰ کو ان ٹی وی اینکرز اور مباحثوں کے دوران آزادی اظہار رائے کے تحت ان کی نفرت انگیز تقریر پر توجہ دینی چاہیے۔ عدالت کواس لعنت سے نمٹنے کے لیے ایک حکم پاس کرنا چاہیے۔ درخواست گزاروں نے یہ بھی کہاہے کہ عدالت ٹی وی اینکروں کے لیے طریقہ کارتیارکرنے اوربحث کے لیے درجہ بندی کے لیے ایک پینل مقرر کرے۔اس پینل کوچینل کولائسنس معطل یامنسوخ کرنے کااختیار ہوناچاہیے۔