دہلی یونیورسٹی میں ’ہندوستان میں عربی صحافت‘ کے موضوع پر دوروزہ قومی سمینار کاانعقاد

نئی دہلی:ہند-عرب تعلقات بہت قدیم ہیں، دونوں ممالک کے تعلقات کے استحکام میں عربی صحافت نے اہم رول ادا کیاہے۔ کوئی بھی عربی زبان و ادب اور صحافت کا مورخ ہندوستانی کی عربی صحافت کو نظر انداز نہیں کر سکتا۔ ہندوستانی علما وادبا نے نہ صرف رسمی طور پر عربی اخبار ورسائل جاری کیے بلکہ اپنے اسلوب بیان اور طرز تحریر کا عربوں سے بھی اعتراف کروایا۔ان خیالات کا اظہار انڈیا عرب کلچرل سینٹر کے اعزازی ڈائریکٹر پروفیسر محمد ایوب تاج الدین ندوی نے کیا، وہ شعبہئ عربی دہلی یونیورسٹی کے زیر اہتمام قومی کونسل برائے فروغ اردو زبان کے مالی تعاون سے شعبہئ عربی ڈی یو میں منعقدہ دوروزہ قومی سمینار کی افتتاحی تقریب میں کلیدی خطبہ پیش کررہے تھے۔انھوں نے ہندوستان میں عربی صحافت کی سلسلہ وار تاریخ بیان کرتے ہوئے یہاں سے شائع ہونے والے عربی رسائل وجرائد کا احاطہ کیا۔قابل ذکر ہے کہ موصوف ہندوستان میں عربی صحافت پر ایکسپرٹ کی حیثیت رکھتے ہیں،حال ہی میں ہندوستان میں عربی صحافت پر ان کی ضخیم کتاب ریاض سعودی عرب سے شائع ہوئی ہے۔پروفیسر ندوی نے کہاکہ آج بھی ہندوستان کے مختلف مقامات سے عربی رسائل و جرائد شائع ہو رہے ہیں۔ جس سے ہندوستان میں عربی زبان میں صحافت اور اس ملک کے لوگوں کی عربی زبان سے دلچسپی کا اندازہ کیا جا سکتا ہے۔اس تقریب کی صدارت پروفیسر شفیق احمد خان ندوی، سابق صدر شعبہئ عربی جامعہ ملیہ اسلامیہ نے کی، نظامت شعبہئ عربی ڈی یو کے استاذاور سمینار کے کنوینر ڈاکٹر مجیب اختر نے کی۔موضوع کا تعارف پروفیسر محمد نعمان خان صدر شعبہئ عربی ڈی یونے کرایا، کلمات تشکر شعبہ کے استاذ ڈاکٹر اصغر محمود نے ادا کیے۔دریں اثنا پروفیسر خورشید فارق میموریل لکچر سیریز کامجموعہ جسے پروفیسر محمد نعمان خان نے ترتیب دی ہے،اس کی رسم اجرا بھی انجام پائی۔اس موقع پر شعبہئ عربی جامعہ ملیہ اسلامیہ کے اساتذہ ڈاکٹر فوزان احمد، ڈاکٹر آفتاب احمد، جے این یو سے پروفیسر رضوان الرحمن، پروفیسر مجیب الرحمن، ڈاکٹر محمد اجمل قاسمی، ذاکر حسین دہلی کالج کے اساتذہ ڈاکٹر محمود فیاض ہاشمی، ڈاکٹر ظفیرالدین، ڈاکٹر عبد الملک، پروفیسر خورشید احمد فارق مرحوم کی صاحبزادی ڈاکٹر فرند فارق، لکھنؤ یونیورسٹی کے ڈاکٹر محمد سبحان خان، ڈاکٹر محمد طارق، دیوان عبد الغنی کالج بنگال کے ڈاکٹر منیر الاسلام، افلو حیدرآباد کے پروفیسر محمد اقبال حسین، الٰہ آباد یونیورسٹی کے ڈاکٹر محمود حافظ عبد الرب مرزاکے علاوہ شعبہ کے اساتذہ پرفیسرولی اختر، ڈاکٹر سید حسنین اختر، ڈاکٹر محمد اکرم، ڈاکٹر جسیم الدین، آصف اقبال کے علاوہ شعبہ کے ریسرچ اسکالرس،طلبہ وطالبات موجود تھے۔افتتاحی تقریب کے بعد پہلی اکادمی نشست میں پروفیسر مجیب الرحمن،جے این یو، پروفیسر محمداقبال حسین ندوی، ڈاکٹر محمد سلیم، ڈاکٹر محمد آفتاب، ڈاکٹر محمود عبد الرب مرزا او رڈاکٹر محمد طارق نے مقالات پیش کیے۔