دہلی الیکشن:ایگزٹ پول کے بعدبی جے پی میں کھلبلی،امت شاہ کی نینداڑی

نئی دہلی: دہلی الیکشن کے متوقع نتائج پربی جے پی کے تعلق سے بڑی خبرآئی ہے۔ انتخابی نتائج سے پہلے بی جے پی میں کل دیر رات ایک بڑی میٹنگ چلی ہے۔یہ میٹنگ صبح تین بجے تک چلتی رہی۔اس میں بی جے پی صدر جے پی نڈا، وزیرداخلہ امت شاہ، دہلی بی جے پی کے صدر منوج تیواری شامل تھے۔ میٹنگ میں دہلی کی ایک ایک سیٹ کا جائزہ لیاگیاہے۔بتادیں کہ دہلی میں انتخابات ختم ہونے کے بعد تقریباََتمام ایگزٹ پول نے عام آدمی پارٹی کی حکومت بننے کا دعویٰ کیاہے۔ ایگزٹ پول سامنے آنے کے بعد عام آدمی پارٹی مکمل طور پرپر اعتماد نظر آرہی ہے تو بی جے پی ایگزٹ پولز کے برعکس نتائج آنے کی بات کر رہی ہے۔بی جے پی کو اتنا اعتماد ہے کہ دہلی میں ووٹنگ ختم ہونے کے بعد ایگزٹ پول کے اعداد و شمار کو غلط بتا رہی ہے۔بی جے پی کو تو یہ بھی لگتا ہے کہ11 فروری کو دہلی میں انہی کی حکومت بنے گی۔لیکن اگرایگزٹ پول کے اعداد و شمار پر نظر ڈالیں تو دہلی میں بی جے پی کے ارمان پورے ہوتے نہیں دِکھ رہے ہیں۔ووٹنگ ختم ہونے کے بعد سب کو نتائج کا انتظار ہے۔ ایگزٹ پول صاف اشارہ کر رہے ہیں کہ دہلی میں تیسری بار عام آدمی پارٹی اقتدارپرقابض ہوگی، لیکن بی جے پی کی جانب سے مسلسل اس سے انکار کیا جا رہاہے۔ دہلی بی جے پی کے صدر منوج تیواری نے بھی بی جے پی کی جیت کا دعویٰ کیاہے۔