نظم

 

اے رشکِ خُتَن، خاکِ غزہ، غازۂ غازی
اے آلِ غزہ شارحِ ابوابِ مَغازی
صہیون کا سر درد تری رَزم طرازی
مجھ کو سبق آموز ترا عزمِ حجازی
تو جبر کی راتوں میں شہادت کی شفَق ہے
تو ملتِ مرحوم کی سانسوں کی رمَق ہے

اک ہیبتِ صاروخ ہے طاغوت کی صف میں
اک عبرتِ تاریخ ہے تابوت کی صف میں
داؤدؑ کی اولاد ہے جالوت کی صف میں
تم وارثِ داؤدؑ ہو ملکوت کی صف میں
حرّیّتِ انسان کا پیمان بنو گے
تم فلسفۂ جنگ کا عنوان بنو گے

معصوموں پہ بمباری میں سفاک ہے دشمن
قسّام مقابل ہو تو پھر خاک ہے دشمن
میدان میں پسپائی سے غمناک ہے دشمن
پسپائے زمیں وحشیِ افلاک ہے دشمن
یہ فوج یہ ہتھیار نہتّوں کے لیے ہیں
کم ظرف کے سب وار نہتوّں کے لیے ہیں

بارود سے آلودہ فضا اور غزہ ہے
ہیں امن کے کچھ جھوٹے خدا اور غزہ ہے
اک حشر ہے ہر سمت بپا اور غزہ ہے
اک قوم ہے راضی برضا اور غزہ ہے
یاسرؓ کی ہیں تصویر سمیہؓ کا نشاں ہیں
یہ لوگ مِری عظمتِ رفتہ کا نشاں ہیں

اے رشتۂ معبود و بشر جوڑنے والو
اے خندہ بہ لب جان و جہاں چھوڑنے والو
اے قوّتِ انساں کا نشہ توڑنے والو
اے ظلم کے سیلاب کا رخ موڑنے والو
شکوے سے کوئی قوم ہے خالی تو وہ تم ہو
رکھتا ہے کوئی صبرِِ بلالیؓ تو وہ تم ہو

 

بھاگ کر اندھیروں سے
روشنی کی خواہش میں
جانے کیسے رستوں پر
پاؤں خود نکل آئے
تھے جہاں اندھیرے بس
روشنی کے درپردہ
تیرگی کے سائے تھے
پھر بھی ایک حیرت میں
نیلگوں اندھیرے میں
سانس کی بس آہٹ پر
پاؤں بڑھتے جاتے تھے
دور اس اندھیرے میں
ایک جھیل خوابوں کی
تشنہ روح تشنہ لب
بیکراں و بے پایاں
جو تھی میری
اس کے پاس میں جس دم
آگئی تو کیا دیکھا
میری روح کی ٹھنڈک
جھیل میں نمایاں تھی
میری خواہشوں کا عکس
چاندنی میں گھل مل کر
ارضِ جاں پہ آ اترا
میں نے یک بیک یونہی
ہاتھ جو بڑھایا تو
صرف ایک سایہ تھا
چاندنی کے پیکر میں
خواب جھیل پانی میں
چاند بن کر آیا تھا
وہ تو صرف سایہ تھا

نہ گھر مانگتا ہوں نہ در مانگتا ہوں

الٰہی ! میں تجھ سے ہنر مانگتا ہوں

وہ ہیں اور جو کر و فر مانگتے ہیں

الہی! میں درد جگر مانگتا ہوں

کرے وا دریچے مرے ذہن کے جو

الہی وہ فکر و نظر مانگتا ہوں

شعور مطالب جو مل جائے یارب

وہی قلب اور وہ جگر مانگتا ہوں

سکوں سے مری زیست گزرے خدایا

میں تجھ سے وہی بال و پر مانگتا ہوں

عَلم  کے قَلَم کو سدا رکھ سلامت

دعا بس یہی رات بھر مانگتا ہوں

زمیں ہمارے خلاف ساری
فلک بھی ہم سے گریز پا ہے
ہم ایسی بستی کے والی وارث
خدا بھی جس سے بچھڑ گیا ہے

نہ کوئی آئے نہ حال پوچھے
نہ زخم دیکھے ،سوال پوچھے
سفید یا پھر سیہ لبادے
لہو کی رنگت سے میل کھاتے

یہ کاشت کرتا ہے صرف قبریں
یہ شہر مردوں کو سینچتا ہے

یہ کس سے لفظوں کے پھاہے مانگیں
یہ کس سے بولیں تسلیوں کا
یہ خود پڑھائیں جنازے اپنے
یہ خود بلائیں فلاح کی جانب
یہ لوگ قبروں پہ ساتھ دینے
دعا اٹھائے چلے ہوئے ہیں
یہ جن کی خاطر نگاہیں نم ہیں
وہ سوختہ بخت جل بجھے ہیں

ہمیں بھی کوئی دلاسے لوگو
ہماری آنکھیں بھی مرگئی ہیں
وہ کیوں نہ سینوں کو پیٹیں اپنے
کہ جن کی گودیں اجڑگئی ہیں

وہ جس کلائی میں پھول گجرے
سہاگ پن کی نشانیاں تھے
انہی میں ٹوٹی ہیں چوڑیاں اب
بدن میں چبھتی ہیں کرچیاں اب

وہ اونچے محلوں میں قہقہہ زن
ہمارے اشکوں کی کترنوں میں
ہنسی کے بھالے اتارتے ہیں
ہمیں مٹاتے ہیں ایسے گھر سے
کہ جیسے جالے اتارتے ہیں

نمک کی خندق بھی بھر گئی ہے
خوشی کی فصلیں اجڑ گئی ہیں

کہ چھینا جھپٹی میں زندگی کی
ہمیں خبر ہی نہیں ہوا کیا
ہماری بستی میں لکڑیوں سے
سوائے تابوت کے بنا کیا

فروری کا مہینہ بھی ختم چکا ہے
عام طور پر مجھے ان دنوں کچھ ایسا محسوس نہیں ہوتا
پر جانے کیوں آج کل مجھے ہر طرف اداسی دکھائی دیتی ہے
پھول،چاند، سورج، ستارے، سب مجھے اداس لگتے ہیں
کہتے ہیں دل کا موسم جیسا ہو باہر کا بھی ویسا ہی لگتا ہے
میرا دل اداس رہتا ہے
تبھی مجھے ہر طرف اداسی محسوس ہوتی ہے
نا جانے میرے دل کو کیا ہو گیا ہے
نا ہی یہ کچھ بولتا ہے نا سنتا ہے
میں خوش رہتی ہوں
لوگوں کے سامنے میں کبھی اداس نہیں رہی
کبھی کبھی تو میں اتنا ہنستی ہوں کہ
مجھے لگتا ہے کوئی دیکھے گا
تو مجھے پاگل سمجھے گا
پر مجھے ایسا لگتا ہے کہ
اگر کوئی مجھ سے کچھ پوچھ بیٹھا
تو میں بغیر کچھ بتائے بس رو پڑوں گی
کبھی کبھی میرا دل چاہتا ہے کہ
میں زندگی کے نام ایک خط لکھوں
اور اس میں یہ تحریر کروں کہ
میں جینا چاہتی ہوں
پر میرے جینے سے کچھ لوگوں کو تکلیف ہوتی ہے
اور وہ کچھ لوگ وہ ہیں جو میرا سب کچھ ہیں
میں اپنی وجہ سے ان کو تکلیف میں نہیں دیکھ سکتی
شاید اس لیے مجھے اپنی زندگی سے ہاتھ دھونا پڑیں گے
لیکن اس چیز کےلیے مجھے بہت بڑا دل چاہیے
لیکن میں اب تھک گئی ہوں
بہت تھک گئی ہوں
پلیز تم ہر گلہ شکوہ ختم کر کے ایک بار میری زندگی میں پھر سے آجاؤ نا
میں تمہیں بھلانے کی بہت کوشش کرتی ہوں
پر بھلا ہی نہیں پاتی
تم میرے دل و دماغ پر قابض ہو
تمہیں دیکھے ہوئے ایک عرصہ ہو گیا ہے
ایک بار آ جاؤ نا
مجھے تمہارے کندھے پر سر رکھ کر بہت سا رونا ہے
مجھے تم سے کوئی گلہ نہیں ہے کیونکہ
میں نے جب پیار کیا تھا
تو کبھی بھی یہ شرط نہیں رکھی تھی کہ
تم بھی مجھ سے اتنا ہی پیار کرو گے
جتنا میں تم سے کرتی ہوں
کیونکہ مجھے معلوم ہے
پیار شرطوں پر قائم نہیں ہوتا
ضروری تو نہیں نا
کہ سب کہانیوں میں دو لوگ شامل ہوں
بعض اوقات ایک کہانی میں
بس ایک ہی کردار ہوتا ہے
جیسے ہم دونوں کی کہانی میں
بس صرف میرا کردار ہے
تمہارا کوئی نہیں
یہ کہانی صرف میری ہے
اور ہر کہانی کا انجام خوشگوار تو نہیں ہوتا نا
میں نے بعض اوقات لوگوں سے سنا ہے کہ
میں بےحس ہوں
پتھر دل ہوں
یہ کہنا کتنا آسان ہے نا
پر کاش یہ لوگ جان پائیں کہ
انسان بےحس اور پتھر دل کب اور کیسے بنتا ہے
بےحس اور پتھر دل بننا بالکل آسان نہیں ہے
ہم بہت کچھ سہتے ہیں
کئی رویے کئی تعلق ہمیں ہماری اوقات دکھاتے ہیں
تب جا کر ہم ہر شے سے بے نیاز ہو جاتے ہیں
ہم اپنی زندگی کے اس مقام پر آجاتے ہیں
جہاں ہمیں کسی کے بھی روکھے
لہجوں اور رویوں سے رتی برابر بھی فرق نہیں پڑتا
ہم بالکل بےحس ہو جاتے ہیں
میں بھی اب بےحس اور پتھر دل ہو گئی ہوں
پر شاید یہی میرے لیے بہتر ہے

جشنِ حماقت
اک شور ہر طرف ہے نیا سال آ گیا
لیکن نئے پرانے کی منطق نہیں پتہ
سانسیں نئی ہیں یا کہ مری دھڑکنیں نئی
چہرہ نیا ہے یا کوئی آئینہ ہے نیا
میری نظر نئی ہے کہ منظر ہوئے نئے
یہ آسمان یا مہ و اختر ہوئے نئے
خشکی بدل گئی ہے کہ دریا بدل گیا
جنگل بدل گیا ہے کہ صحرا بدل گیا
تبدیل کیا ہوا ہے کہیں کچھ نہیں ہوا
صبحیں وہی ہیں، شام وہی اور شب وہی
دانہ کہ دام، صید کہ صیاد سب وہی
میں بھی وہی پرانا، تمھارا بھی ڈھب وہی
وحدت کی ایک سیلِ بلا خیز ہے یہ وقت
سو یہ نئے پرانے کی تقسیم سب غلط
یہ سالِ نو کا جشن حماقت کا جشن ہے

اک نجم سحرنماہوا خاموش
سکتے میں ہیں خادمِ جلال الدین

وہ فرض نبھارہے تھے اپنا خوب

ہوئی مرگ مزاحم جلال الدین

ہرخویش اسیر حلقئہ اخلاق

تھا غیر ملازم جلال‌ الدین

شرمندہ ہوا جہاں ہراک طوفان

وہ شے تھے عزائم جلال الدین

کچھ اپنے پرائے کی نہ تھی تفریق

سب سے تھے مراسم جلال الدین

فردوس میں ہو آشیاں تعمیر

عرضی ہے اے راحم جلاالدین!

ہو سال وفات گر تمہیں مطلوب

*ملحوظ مکارم جلال الدین*
(١٤٤٤)

 

 

وہ ایک لڑکی جو ٹکرا گئی تھی راہوں میں
وہ گھومتی ہے ابھی تک مری نگاہوں میں

بھلی سے شکل تھی اچھا سا نام تھا اس کا
نسیم سحر سا نازک خرام تھا اس کا

ہر اک قدم پہ وہ شوخی، وہ بانکپن اس کا
بہار اس کی، اسی کے سَمَن، چمن اس کا

چلے تو جیسے ہواؤں کی اُف نکل جائے
رکے تو جیسے نظاروں کو رکنا کھَل جائے

وہ جس کا صرف اشارہ ہی فتنہ قامت ہو
وہ ہاتھ اٹھا کے جو انگڑائی لے، قیامت ہو

وہ سانس لیتی تو جوبن پہ دریا چڑھتے تھے
وہ بولتی تھی تو ہونٹوں سے پھول جھڑتے تھے

وہ خوش جمال کہ دام اجل کا اک پرتو
شہید ہوتے تھے اک اک نگاہ میں سو سو

ردھم وہ سانسوں کا موسیقی کو حیات ملے
بس اک جھلک بھی ملے اس کی، کائنات ملے

وہ کھلکھلائے یوں، دُھن کوئی آبشاروں میں
ہنسے تو جیسے لگے موتی ہیں قطاروں میں

قبا میں برق ہو یا برق کی قبا پہنے
وہ اس کے ناز، وہ انداز ہائے کیا کہنے

کہ جیسے پڑ گئی ہو جان حسین مورت میں
کہ جیسے حور ہو کوئی بشر کی صورت میں

پکارتی ہوئی آتی ہے میرے خوابوں میں
مرے خیالوں، تمناؤں کے سرابوں میں

حیا سے، جذبۂ بے اختیار کس دیتی
لجاتی، شرم سے پھر مسکرا کے ہنس دیتی

حیا سے جھکتی نظر گر کبھی جو مِل جاتی
تو مارے شرم کے وہ دہری ہو کے ہِل جاتی

تھکی تھکی سی نگاہیں، رکے رکے منظر
اداس اداس سی آنکھیں، بجھی بجھی سی نظر

وہ آنکھ اک نئی ان دیکھی دنیا کا دَرپَن
وہ آنکھ، پلتے ہوئے خوابوں کا کوئی مسکن

ہزار کشمکشوں کی منتشر بہار اس میں
کئی ہزار برس کا تھا انتظار اس میں

وہ ہر حواس پہ کچھ ایسے نقش سے چھائے
کوئی جو بھولنا چاہے بھی بھول نہ پائے

دل اپنا کوئی کہاں تک کہو بچا پاتا
وہ جیسے دیکھ رہی تھی، کوئی بھی لُٹ جاتا

میں تھک کے جو ابھی دریا کے پار بیٹھا ہوں
یہ سوچتا ہوں کہ دل اس پہ ہار بیٹھا ہوں

وہ گھومتی ہے ابھی تک مری نگاہوں میں
وہ ایک لڑکی جو ٹکرا گئی تھی راہوں میں

خواب کی سہیلیاں
لڑکیاں پہیلیاں

کانچ کی پیالیاں
درد کی جیالیاں

سرخ رنگ چوڑیاں
دوستی میں گوڑھیاں

تیریاں نہ میریاں
ان کی اپنی مرضیاں

پیر توڑ دیں گی یہ
سیڑھیاں نہ جوتیاں

مہرباں کسان کی
لہلہاتی کھیتیاں

اس قدر سیانیاں
ڈھانپ لیں کہانیاں

چپ لگیں تو غور کر
ان کی اپنی بولیاں

تیز دل کی دھڑکنیں
بھیگتی ہتھیلیاں

بولنے پہ آئیں تو
مندروں کی گھنٹیاں

آنگنوں کی رونقیں
پھررہی ہیں بجلیاں

بھررہی قلانچ ہوں
جس طرح سے ہرنیاں

چھوڑتی ہیں مستیاں
بیٹھتی ہیں ڈولیاں

چاند کی چکور ہیں
اور سرو کی قمریاں

دل کے تار چھیڑدیں
گیت ہیں یا ٹھمریاں

جھوم جھوم پڑھ انہیں
شاہ جی کی کافیاں

 

تاریخ وفات : 28 مارچ 2022

ہے شفیع الرحمں کی رحلت نہایت دلفگار
ان کے غم میں آج دنیائے ادب ہے سوگوار
ان سے تھا ہر وقت میرا اک خصوصی رابطہ
یہ خبر سن کر مری آنکھیں ہیں پیہم اشکبار
جنت الفردوس میں درجات ہوں ان کے بلند
ان پہ نازل ہو ہمیشہ رحمت پروردگار
فرط رنج و غم سے ان کے اہل خانہ ہیں نڈھال
آتے آتے آئے گا اس بیقراری کو قرار
کرتے تھے آیات قرآں کا وہ اردو ترجمہ
ان کی تاریخ ادب میں ہے جو زریں یادگار
اپنے حسن خلق سے تھے وہ دلوں پر پر حکمراں
مرجع اہل نظر ہیں ان کے ادبی شاہکار
ان کے ہیں اشعار عصری حسیت کے ترجماں
ان کی غزلوں سے عیاں ہے سرد وگرم روزگار
تھی منور ان سے پٹنہ کی ہر ادبی انجمن
ان کے ادبی ذوق کی برقی ہے جو آئینہ دار

میں اکثر سوچتی ہوں

ہمارے بعد کی نسلیں

خدا جانے اداسی بے بسی کی کیسی رُت دیکھیں گی

 

جنھیں ورثے میں وہ دنیا ملے گی

جس کو بانٹا جا چکا ہے

پہلی دنیا

دوسری اور تیسری دنیا

کے خانوں میں

جسے اجداد کے قصوں میں

رنگ و نسل و مذہب کے لیے

لڑ مر کے سب برباد کر دینے کے افسانے ملیں گے

جسے تاریخ کے صفحات پر

جنگیں، وبائیں، زلزلے

دہشت زدہ کرتے رہیں گے

جنھیں پگھلے ہوئے پربت

اُبلتے آبشاروں کی طرح

تڑپائیں گے

دھرتی جنھیں اپنی تپش سے راکھ کر دے گی

 

میں اکثر سوچتی ہوں

ہمارے بعد کی نسلیں

خدا جانے اداسی بے بسی کی کیسی رُت دیکھیں گی

 

مگر پھر کوئی بچہ مسکراتا

کھلکھلاتا

شور کرتا

خیالوں میں مُخِل ہو کر

زبانِ حال سے گویا یکایک مجھ سے کہتا ہے

 

بہت ممکن ہے اے لڑکی!

ہمارے عہد میں شاید تباہی کا یہ اندھا سانپ

آگاہی کے سب ہیرے نگل کر پھر اُسی جنگل میں جا بیٹھا ہو

جس سے تم نے اُس کو بے گھر کر دیا تھا

 

ہمیں شاید خدا واپس اُنھی غاروں میں پہنچا دے

جہاں دنیا بہت چھوٹی سی ہو

اتنی کہ جو خانوں میں بٹ سکتی نہ ہو

جہاں اجداد کے قصے رقم کرنے کو کاغذ ہی نہ ہوتا ہو

جہاں فردِ بشر سورج کی گرمی پر تصرف تو کجا

اُس سے فقط سر ہی چھپا کر چین پاتا ہو

 

وہاں شاید مشقت بے نہایت ہو

مگر

اداسی بے بسی کی یہ جو رُت تم دیکھتی ہو

یہ شاید ہم نہ دیکھیں

 

ترجمہ : سعدیہ ہاشمی

میں پڑھوں گی میں لکھوں گی
مجھے کیا کچھ پہننا ہے
یہ خود میں طے کروں گی

تمہاری ہڑدنگ اور ہنگاموں پر
شور شرابوں اور لعنت و ملامت پر
میں چنار بن کر کھڑی رہوں گی
کیوں کہ درس گاہوں کی گھنٹیاں مجھے بلاتی ہیں

تم جب جب نفرت بانٹو گے
میں طاقت بن کر ابھروں گی
تم مجھ پر دروازے بند کرلو یا سارے حقوق غصب کرلو

تم شاید یہ بھول گئے پیارے !
میں وہی شمع ہوں جو
اپنے اشکوں سے انقلاب کی لو تیز کرتی ہے

مجھے ققنس بھی نہ سمجھو، جو مرکر خود اپنی راکھ سے ابھرتی ہے
میں ماضی بھی، مستقبل بھی ، موجود بھی ہوں اور جاری بھی
میں وہ جنگ ہوں جسے تم کبھی جیت نہیں سکتے

میرا نام ذہن نشیں کرلو
میں سراپا محبت اور وہی لڑکی حجابی
جسے کہتے ہیں سب باغی و انقلابی !

وہ اکیلی تھی
وہ ایک عورت تھی
وہ حجاب میں تھی
اس کے گرد درجنوں بھوکے بھیڑیے
پاگلوں کی طرح غرا رہے تھے
زرد جھنڈے لہرا رہے تھے
وہ کئی تھے
وہ تنہا تھی
وہ چاہتی تو وہی کرتی
جو ہم سب کرتے ہیں
ڈر جاتی، سہم جاتی، رونے لگتی
مگر اس سے تاریخ نہ بنتی
ہاں دلدوز خبروں میں
ایک خبر اور بڑھ جاتی
وہ ڈری نہیں، وہ رکی نہیں
وہ چلتی رہی
اور اس کی چال میں بھی
بلا کا وقار تھا
وہ جانتی تھی کہ وہ کس حال میں ہے
اسے یہ بھی پتہ تھا
کہ وہ اور اس کا حجاب
آج کس قوم کی نمائندگی کر رہے ہیں
آخر وہ سارہ کی بیٹی تھی
کہ جس کی عفت کے آگے
دست درازوں کے ہاتھ شل ہو گئے
آخر وہ بنت ہاجر تھی
کہ جس کے ایمان ویقین کی طاقت سے
بے آب و گیاہ سرزمین میں
زمزم کا چشمہ پھوٹ پڑا
وہ صدیقۂ کائنات کی بیٹی تھی
کہ جن کی عفت پہ بھونکنے والے
بزبان قرآن منافق قرار پائے
اس باحجاب بیٹی نے
حجاب کی عظمت کو قائم رکھا
اس نے کفر کی آوازوں کے درمیان
نعرۂ تکبیر بلند کیا
واللہ! اس کی تکبیر کی یہ صدا
ہماری ہزاروں تقریروں اور چیخ و پکار سے بہتر تھی
کہ وہ زبان سے نکلی صرف ایک آواز نہ تھی
وہ ایک مومنہ کے سچے جذبات تھے
وہ ایک ایمانی غیرت سے سرشار بیٹی کا درد و کرب تھا
جس نے اس نازک موڑ پر
اپنے رب کی تکبیر کی آواز بلند کی
اس نے ہزاروں لاکھوں مرعوب و مبہوت لوگوں کو
فرمان رب یاد دلایا
وَلَا تَهِنُوا۟ وَلَا تَحۡزَنُوا۟
وَأَنتُمُ ٱلۡأَعۡلَوۡنَ إِن كُنتُم مُّؤۡمِنِینَ
اہل ایمان ہو تو ڈرتے کیوں ہو؟
اہل اسلام ہو تو روتے کیوں ہو

سلام تیری جرات پر اے مسکان!
کہ تو آج پوری ملت اسلامیہ ہند کے سر کا تاج بن گئی
تو اس دور ادبار میں ہمارے اقبال کا ایک نشان بن گئی
تیری ہمت و جرات نے اک تاریخ رقم کر دی
تو نے رب کریم کا وہ فرمان یاد دلایا
کہ حجاب کوئی ذلت نہیں
یہ مومنہ کی شان ہے
یہ اسی لیے ہے
کہ خاتون اسلام کی عصمت و عزت پر
دست درازی کرنے والے
ہزار بار سوچیں
مسکان! تو نے حجاب کی عظمت کا لوہا
پوری دنیا سے منوا دیا
تو نے بے حجاب گھومنے والی
اپنی ہی قوم کی بیٹیوں کو
یہ درس بھی دے دیا
کہ حجاب ہماری کمزوری نہیں
ہماری طاقت ہے
یہ ہماری پسماندگی کی علامت نہیں
ہمارا نقطۂ عروج ہے

صفحۂ وقت پہ لکھے ہیں فسانے کیا کیا
کتنی آوازوں کا مسکن ہے یہ ماضی کا دیار
بھاگتے لمحوں میں گم ہوگئے چہرے کتنے
انھیں چہروں میں نمایاں ہے لتا کا چہرہ
انھیں آوازوں میں روشن ہے لتا کی آواز
وہی آواز جو رقصاں ہے سروں کی لے پر
وہی آواز کہ سرشار ہے جس سے دنیا
کون کہتا ہے لتا چھوڑ گئی دنیا کو
وہ تو آواز ہے آواز نہیں مر سکتی
وہ تو گونجے گی فضاؤں میں ابد تک یوں ہی
جسم تو خاک ہے پھر خاک میں مل جائے گا
اور آواز ہے ناہید و ثریا اس کی
جب تلک بام فلک پر ہیں ستارے روشن
اس کی آواز نہیں مر سکتی
اس کی آواز نہیں مر سکتی

 

تیزگام وقت کی دسترس سے
کوئی لمحہ پھسل جائے
اور انگلیوں کی پوروں پرٹھہرجائے
بے یقینی کے خاردار جنگل میں
ایقان کا کوئی گلاب کھِلے
منافقت کی دنیا سے پرے
بے ریا کوئی جزیرہ ہو
خلوص کا کوئی گاؤں، انس کا کوئی گوشہ
کشمکش کے صحرامیں تسکین کا کوئی چشمہ
کڑی دھوپ کے سفر میں کوئی گھناسایہ
سکون کا کوئی وقفہ
مزاج آشنا کوئی ساعت
دل نواز کوئی پل
روح شناس کوئی گھڑی
خالص کوئی جذبہ
بے لوث کوئی تعلق
بے نام کوئی احساس
سچاکوئی خواب
گونگی، حیران آنکھوں کی وسعتوں میں
پڑاؤڈالے، مدام ٹھہرے!

جو فیضؔ سے شرفِ استفادہ رکھتے ہیں
کچھ اہلِ درد سے نِسبت زیادہ رکھتے ہیں
رُمُوزِ مُملکتِ حرف جاننے والے
دِلوں کو صُورتِ معنی کشادہ رکھتے ہیں
شبِ ملال بھی، ہم رہْروانِ منزلِ عِشْق
وصالِ صُبح ِسفر کا اِرادہ رکھتے ہیں
جمالِ چہرۂ فردا سےسُرخ رُو ہے جو خواب
اُس ایک خواب کو جادہ بہ جادہ رکھتے ہیں
مُقامِ شُکر کہ اِس شہرِ کج ادا میں بھی لوگ
لحاظِ حرفِ دل آویز و سادہ رکھتے ہیں
بنامِ فیضؔ، بجانِ اسدؔ فقیر کے پاس
جو آئے آئے کہ ہم دِل کشادہ رکھتے ہیں

وہ ایک ایسا شخص
جس کے لیے
بس ایک رائے سب کی تھی
پیارا بُہت پیارا ہے وہ
سپنے سُہانے پیار کے
بانٹے جو گاؤں گاؤں میں
ایک ایسا بنجارہ ہے وہ
ساری زمیں جس کا وطن
سارا جہاں جس کا مکاں
سب لوگ جس کے ہم سُخن
سب لوگ جس کے ہم زباں
جس نے تراشیں منزلیں
جس نے بنائے کارواں
چل کر دِلوں کی راہ سے
چھو لی ہے جس نے کہکشاں
وہ روشنی کی کھوج میں
چلتا رہا چلتا رہا
چہرے پہ وہ گردِ سفر
ملتا رہا ملتا رہا
وہ آندھیوں کے درمیاں
جلتا رہا جلتا رہا
وہ زندگی کے حُسن میں
ڈھلتا رہا ڈھلتا رہا
وہ نغمہ خواں تھا پیار کا
وہ عشق کا ہم رقص تھا
وہ تنگدل واعظ نہ تھا
اُس میں یہی اِک نُقص تھا
کہتے رہے اُس کو بُرا دیر و حرم
لیکن یہ رائے سب کی تھی اُس کے لیے
پیارا بُہت پیارا ہے وہ
سپنوں کا بنجارہ ہے وہ

میں بچہ ہوں
اداکاری تو کرتا ہوں
ریاکاری نہیں کرتا
عداوت کس کو کہتے ہیں
سیاست کس کو کہتے ہیں
نہیں معلوم کچھ مجھ کو
خدا کے نام پر دیر و حرم کی تفرقہ بازی
گھریلو رنجشوں
رشتوں کی دیواروں سے میں انجان ہوں اب تک
مگر امی بتاتی ہیں
مرے ابو بھی کہتے ہیں
کہ میں بھی ایک دن آخر بڑا ہو جاؤں گا اور پھر
محبت میں مری داخل
کبھی ہوگی ریاکاری
کبھی مکاریاں ہوں گی
کبھی عیاریاں ہوں گی
ذرا سے فائدے کو میں
خدا کے نام پر بیچوں گا اپنے دین و ایماں کو
کبھی ذاتی انا کے نام پر رشتوں کی دیواریں
مری نفرت کی برچھی سے
گرائی جائیں گی
کبھی جھوٹے خداؤں کی پرستش کے لیے مری جبیں
دہلیز پر ان کی
پئے تعظیم جھک کر ان کو چومیں گی
بڑا ہو کر بالآخر میں
برا ہو جاؤں گا اک دن
خدا ہو جاؤں گا اک دن
سنا یہ جب سے ہے میں نے
بڑا ہونے سے ڈرتا ہوں
خدا ہونے سے ڈرتا ہوں

اے مری اردو زباں اے نازش ہندوستاں
ناز کرتے ہیں حلاوت پر تری اہل جہاں
تو بہار گلستاں ہے، تو ہے زیب انجمن
ہند میں پیدا ہوئی، ہندوستاں تیراوطن
تو ہے خسرو کی چہیتی، دختر ہندوستاں
صوفیان ہند کی تو ہی رہی ہے ترجماں
غنچۂ نورس ترا سب رس عجب ہے شاہ کار
میر امن کے قلم نے کردیا باغ و بہار
ہر ادیب و ناقد و اہل قلم تجھ پر فدا
تجھ پہ شیدا واعظ شیریں بیاں کی ہر ادا
اے زمرد اے عقیق بیش قیمت اے گہر
شاعروں کے دل کی دھڑکن ان کی منظور نظر
تو مراثی کی نظافت، مثنوی کی تو زباں
تو غزل کی آبرو ہے عاشقوں کی ترجماں
تو رباعی کی نفاست تو قصیدے کا جمال
حسن پر تیرے فدا ہیں شاعران با کمال
تیرے عاشق میر و غالب مومن شیریں نوا
اور خواجہ درد جیسا صاحب صدق و صفا
تجھ پہ شیدا ڈوق و سودا آتش و ناسخ ہوئے
شاد جیسے اہل فن یا حضرت راسخ ہوئے
وہ انیس مرثیہ گو، عام لوگوں کا نظیر
یا دبیر خوش نوا، سب تیری زلفوں کے اسیر
حالی مرحوم کا دل، داغ صاحب کی زباں
نغمۂ چکبست تجھ سے شوخی موہن رواں
جان جاناں کی اداے خاص کا مظہر ہے تو
گلشن اقبال ہے، گنجینۂ اکبر ہے تو
اصغر و فانی فراق و امجد و حضرت جگر
سب ترے عاشق رہے ہیں اے زبان معتبر
فیض ہوں یا جوش و اختر جعفری ہوں یا مجاز
سب ترے دیوانے تھے سب سے ترا راز و نیاز
تھے کلیم خوش نوا نازاں تمہارے ناز سے
برق نے گیسو سنوارے ہیں عجب انداز سے
حضرت ناوک تری پاکیزگی کے ہیں امیں
تیرے عاشق ہیں عطاے عابدی روشن جبیں
تجھ پہ اے شیریں زباں اے دل نشیں اے دل ربا
حضرت وارث حسن وارث ریاضی ہیں فدا
تو خزانہ علم و حکمت کا ادب کی کہکشاں
تو ہے اخلاق و محبت کی امیر کارواں
بزم فن دانش کدے میں ہیں تمہارے غلغلے
تم سے قائم ہیں ادیبوں، شاعروں کے مشغلے
کیا روانی کیا چمک آخر ترے سکے میں ہے
تیرے سکے گا چلن دنیا کے ہر خطے میں ہے
اے زبان صاف و شستہ اے زبان مقتدر
دن بہ دن ہوتا گیا گوہر ترا پاکیزہ تر
تجھ میں دریا کی روانی تو ہے مثل آبشار
تجھ میں شبنم کی لطافت تو ہے در شاہوار
تجھ میں موجوں کا ترنم تجھ میں ہے پھولوں کی باش
اے شمیم جاں فزا تجھ میں پسندیدہ مٹھاس
برگ گل جیسی نزاکت شاخ گل جیسی لچک
تو ہے سورج کی کرن، تو چاند تاروں کی دمک
بادلوں کی گھن گرج ہے تو ہے شبنم کی پھوار
بجلیوں جیسی چمک ہے تو ہے گوہر آب دار
چاندنی، موج صبا، قوس قزح خوشبو ہے تو
خوب صورت، دل ربا، شیریں زباں اردو ہے تو
ساجد شوریدہ ہے خدمت میں تیری شادماں
اے مری اردو زباں، اردو زباں، اردو زباں

سوچیے کچھ سوچیے جمہوریت خطرے میں ہے
آج ہندستاں کی ہندستانیت خطرے میں ہے

دھرم اور ایمان کی باتیں تو کرتے ہیں سبھی
گیان اور وگیان کی باتیں تو کرتے ہیں سبھی
نیکی اور انسان کی باتیں تو کرتے ہیں سبھی
سچ تو یہ ہے اب یہاں انسانیت خطرے میں ہے
سوچیے کچھ سوچیے جمہوریت خطرے میں ہے
مفت راشن پاکے بدتر ہورہی ہے زندگی
مفت میں گھر لے کے بے گھر ہورہی ہے زندگی
اک بھکاری کا مقدر ہورہی ہے زندگی
زندگی کی شان اور محبوبیت خطرے میں ہے
سوچیے کچھ سوچیے جمہوریت خطرے میں ہے
اُف! یہ محنت کے مقابل مفت خوری کا چلن
چھین کر حق لینے کے بدلے ہے چوری کا چلن
بھیڑ میں، بازار میں یہ زورہ زوری کا چلن
بڑھ رہی ہیں دوریاں اپنائیت خطرے میں ہے
سوچیے کچھ سوچیے جمہوریت خطرے میں ہے

بڑھ رہی پھر دیش میں سرمایہ داری دیکھیے
بھوک، بیماری، الم، بے روزگاری دیکھیے
ایک جھوٹے آدمی کی غم گساری دیکھیے
باپ، چاچا، تاؤ کی یکسانیت خطرے میں ہے
سوچیے کچھ سوچیے جمہوریت خطرے میں ہے

تھا بھروسہ جن پہ وہ اہلِ نظر بکنے لگے
خون سے سینچے گئے سارے شجر بکنے لگے
رہروں کی چھوڑئیے اب راہبر بکنے لگے
اب سیاست میں بچی شفّافیت خطرے میں ہے
سوچیے کچھ سوچیے جمہوریت خطرے میں ہے

ہر گھڑی آمادۂ پیکار تھا جو آدمی
ہاتھ میں رکھّے ہوئے تلوار تھا جو آدمی
علم و وحدت کے لیے بیدار تھا جو آدمی
اب اس آدم زاد کی وحدانیت خطرے میں ہے
سوچیے کچھ سوچیے جمہوریت خطرے میں ہے

اب نہیں سوچا تو پھر معدوم ہوجائیں گے ہم
فکر کے اظہار سے محروم ہوجائیں گے ہم
زندگی ہوگی مگر مرحوم ہوجائیں گے ہم
سوچ لو اور جان لو اب قومیت خطرے میں ہے
سوچیے کچھ سوچیے جمہوریت خطرے میں ہے

امن و آزادی کی خاطر اہلِ حق کا ساتھ دیں
جھوٹ کا چہرہ ہو ظاہر اہلِ حق کا ساتھ دیں
شان سے جینا ہے تو پھر اہلِ حق کا ساتھ دیں
ورنہ ماں بہنوں کی اب معصومیت خطرے میں ہے
سوچیے کچھ سوچیے جمہوریت خطرے میں ہے
آج ہندستاں کی ہندوسانیت خطرے میں ہے

چائے خانہ میں
ہم روز ملتے ہیں
اگلے دن پھر ملنے
اور جدا ہونے کے لیے

چائے خانہ میں
آملیٹی رغبت
ہماری لمسائی ہوئی زبانوں میں گدگدگی کرتی ہے
اور ہمارے چکنے دہن
انواع و اقسام کے
خاگینوں اور پراٹھوں کی لذت سے
کھچا کھچ بھر جاتے ہیں

چائے خانہ میں
ہمارے ہاتھ سفید مٹی کی پیالیوں کو چھوتے ہوئے
ایک دوسرے کو محسوس کرتے ہیں
اور ہمارے ہونٹوں پر
مسکراہٹ کی براؤن شوگر پھیل جاتی ہے

چائے خانہ میں
باہر سے گزرنے والوں کو
ہم خاموش فلموں کی طرح دکھائی دیتے ہیں
اور کسی کو سنائی دیئے بغیر
بولتے رہتے ہیں
اور چھت میں لگے خفیہ کیمرے
ہماری حرکات و سکنات پہ نظر رکھتے ہیں

چائے خانہ میں
دنیا کے عظیم ترین مصنف
شاعر اور فلسفی
اور قدیم وقتوں کے گوتم اور پیغمبر
ہمارے پاس آ کر بیٹھ جاتے ہیں
لیکن وہ ہمارے علاوہ
کسی کو نظر نہیں آتے
اور ارد گرد کی میزوں پہ بیٹھے لوگ
ان سے اور ہم سے لاتعلق
مَنی مارکیٹ کے اتار چڑھاؤ کے ساتھ
ڈوبتے ابھرتے رہتے ہیں

چائے خانہ میں
ہماری مختصر شاموں کی
آدرشی محبت پروان چڑھتی ہے
اور طویل راتوں کی چسکوری تنہائی
چٹخارے لیتی ہے
اور آس پاس بیٹھے محبتی جوڑے
ہماری طرف دیکھے بغیر
سیلفیاں بناتے رہتے ہیں

چائے خانہ میں
ہم روز انقلاب لاتے ہیں
اور دنیا کو بدل کر رکھ دیتے ہیں
اور اٹھنے سے پہلے
بوجھل دل کے ساتھ
بھاری بل معہ سیلز ٹیکس ادا کرتے ہوئے
ویٹر کو ٹپ دینا نہیں بھولتے

 

9167679924

 

نظر کو روشنی دل کو اجالا کون دیتا ہے

اندھیری رات کو جگنو سا شیدا کون دیتا ہے

 

 

ہماری سانس کو چلنے کی طاقت کس نے بخشی ہے

ہماری روہ کو پاکیزہ رشتہ کون دیتا ہے

 

 

بدلتے موسموں کو آج بھی ہم غور سے دیکھیں

تو پائیں گے انہیں رحمت کا سایہ کون دیتا ہے

 

 

ہماری کھیت کو فصلوں کی نعمت کس نے بخشی ہے

ہر اک کو رزق کا، قسمت کا دانہ کون دیتا ہے

 

 

ہر ایک ماں کے شکم میں پرورش بچوں کی کرتا ہے

کسی پتھر میں کیڑے کو نوالہ کون دیتا ہے

 

 

اسی کے ہاتھ میں سب ہے، اسے مختار کل جانو

سوا اس کے کسی کو ایک تنکا کون دیتا ہے

 

 

خدا کی حمد لکھوں نعت لکھوں یا غزل لکھوں

قمر دل میں تیرے یہ نیک جزبہ کون دیتا ہے

 

شہادت کی بدولت وہ کئی معنوں میں زندہ ہے
زمیں پر سرخرو ہو کرفلک والوں میں زندہ ہے
مری آنکھوں میں وہ رنگوں کی صورت جھلملاتا ہے
مرے ماضی کا یہ قصہ مرے خوابوں میں زندہ ہے
قضا تو آنی ہے سب کو فنا ہوتے ہیں سب لیکن
محبت درد کی صورت سب انسانوں میں زندہ ہے
اسی کا یاد پر غلبہ ،اسی کا روح پر قبضہ
جدا مجھ سے ہوا ہے وہ مگر سانسوں میں زندہ ہے
مرے شامل نہیں ہے وہ یہ کیسے مان لوں آخر
وہ میرے گھر میں رہتا ہے مرے اپنوں میں زندہ ہے
گلستاں سے مرے جس گل کو کل گلچیں نے توڑاتھا
وہ خوشبو بن کے اب ہر سوچمن زاروں میں زندہ ہے
مجھے رستہ دکھاتا ہے مرے شب ہائے غم میں وہ
مجھے محسوس ہوتا ہے کہ وہ تاروں میں زندہ ہے
میں اس سے بات کرتا ہوںمیں اس کی بات سنتا ہوں
عجب احساس کی دنیا مری یادوں میں زندہ ہے
یوں غم ہائے انیقہؔ و شکیبؔ اترے مظفرؔ پر
لگا ماضی کا زخم اب حال کے لمحوں میں زندہ ہے
مجھے دنیا کی رونق یونہی بے معنی نہیں لگتی
عطاؔ اک شہر خاموشاں مری آنکھوں میں زندہ ہے

 

لکھ سکتے ہو پڑھ سکتے ہو

اونچے زینے چڑھ سکتے ہو

تم چاہو تو بڑھ سکتے ہو

جان ابھی تم میں باقی ہے

 

عشق ابھی تم کر سکتے ہو

لڑ سکتے ہو مر سکتے ہو

تم جو چاہو کر سکتے ہو

جان ابھی تم میں باقی ہے

 

دل کی باتیں کَہ سکتے ہو

ظلم ابھی تم سہہ سکتے ہو

جیل میں کچھ دن رہ سکتے ہو

جان ابھی تم میں باقی ہے

 

نیتا سنگھاسن کے پجاری

پنڈت مُلا سب بیوپاری

سمجھو اپنی ذمہ داری

جان ابھی تم میں باقی ہے

 

سورج، چندا، دھنک، ستارے

دَیر، حرم، گرجا، گرودوارے

سب مل کر اک ساتھ پکارے

"جان ابھی تم میں باقی ہے”

عبدِ خالق سنبھلی بھی رب کی جانب چل بسے
علم و فن میں دوسروں پر تھے جو غالب چل بسے

رب تعالیٰ نے انہیں اوصاف بخشے تھے بھلے
لے کے آئے تھے جو رب سے حسنِ قالب چل بسے

راہگیروں کو دکھاتے تھے وہ سیدھا راستہ
علم کی دنیا میں جو تھے ذی مراتب چل بسے

کیا حسیں انداز تھا، حسنِ تکلم خوب تھا
جن کے چہرے پر چمکتے تھے کواکب چل بسے

دل نشیں تقریر تھی اور طرزِ انشا دل پذیر
زندگی کے ہم کو سمجھاکر مطالب چل بسے

کیا ہی شانِ مخلصی تھی آپ کی ہر بات میں
تَشنگانِ علمِ نبوی کے مخاطِب چل بسے

یا خدا جنت عطا کر حضرتِ مرحوم کو
جنت الفردوس کے وہ ہوکے طالب چل بسے

کیوں نہ ہو ماتم کناں ہر ذرۂ دارالعلوم
طالبانِ حق کے اظہر اک مصاحب چل بسے

ہزاروں راستے، گلیاں، محلے، کھڑکیاں، اسباب
ہزاروں رنجشیں، الجھاؤ، رشتے، قربتیں، احباب
کئی محبوب چہرے، باغ، کونجیں، تتلیاں، جگنو
جھیل، ساحل، مہرباں خوشبو
جو ہم شوقِ مسافت میں
کئی برسوں کی اڑتی گرد میں سب بھول بیٹھے ہوں
عجب سی بات ہوتی ہے
کوئی مانوس سی خوشبو
کوئی برتا ہوا لہجہ
کوئی محبوب سا چہرہ
اچانک سامنے آئے
تو برسوں پر محیط اس دھند کا شیشہ
چھنا چھن ٹوٹ جاتا ہے
تمنا کے دیاروں کا جہاں آباد ہوتا ہے
ہمیں سب یاد ہوتا ہے

نظم مجھ سے روٹھ رہی تھی
قافیہ مجھ سے دور بھاگنے لگا تھا
اور شعر نے مجھ سے اپنا رابطہ منقطع کر رکھا تھا

کھوجنے پر علم ہوا کہ میرے دل کو صبر آ چکا ہے
آنکھوں میں نم باقی ہے نہ خواب
راتیں نیند سے بھر چکی ہیں اور دن مصروفیت سے پُر
زخم بےحسی کے کھرنڈ تلے دب چکا ہے
اور شوق عافیت کے سائے میں اپنی نیند پوری کر رہا ہے

اس ادراک نے مجھ میں ڈر بھر دیا ہے
مجھ میں حوصلہ نہیں کہ اپنے دل میں ایک اور قبر کھودوں
میرا دل اب اتنا زرخیز نہیں رہا کہ دفن ہوئے لوگوں اور شعروں سے نئے احساس کی کونپلوں کو نمو دے

میں جانتی ہوں کہ یہ سچی نہیں
لیکن تمہاری باتیں اچھی ہیں،
آج کل میں دل کو اداکاری سکھا رہی ہوں
( یا شاید ریاکاری)
سو اب توجہ کو عشق اور مسکراہٹ کو ہنسی کا نام دیا جائے گا
سماعت وہ باتیں بھی سنے گی، جو تم کبھی نہیں کہو گے
دن میں کہانیاں بُن کر آنکھوں میں دھر دی جائیں گی، کہ اپنی مرضی کے خواب دیکھے جا سکیں
اور ان جھوٹے خوابوں سے نشاط کی بارش اور ملال کا نم کشید کیا جائے گا

تاکہ میرا مصرعہ تر رہے
اور میری نظم کا دائرہ مکمل ہوتا رہے.