غزل

وہ مدتوں کے بعد سرِ راہ مل گیا
ایسا لگا کہ جیسے کوئی زخم چھل گیا

اس کے تو جیسے پاؤں زمیں نے پکڑ لیے
اور میں کسی شجر کی طرح جڑ سے ہل گیا

اس کے بھی لفظ جیسے مقفل سے ہوگئے
میرے بھی لب پہ جیسے کوئی حرف سل گیا

اس کے بھی دل کے رنگ نگاہوں تک آگئے
مجھ میں بھی قافلہ سا چلا ، تا بہ دل گیا

لمحے کہ جیسے وقت میں گرہیں سی پڑ گئیں
منظر کہ جیسے آنکھ کے پردے پہ سل گیا

وہ جس پہ اندمال کی مدت گزر چکی
اندر کہیں وہ زخم رگ ِ جاں سے مل گیا

پھولوں نے جیسے جھانک لیا تھا مرا وجود
دل کا ہر ایک رنگ درختوں پہ کھِل گیا

دھندلی سی کچھ وداع کی تصویر ہے سعود
منظر کشی کے وقت کوئی عکس ہل گیا

دیکھ لے، آج تری بزم میں بھی تنہا ہوں
میں جو گزرے ہوئے ہنگاموں کا خمیازا ہوں

جانے کیا ٹھان کے اُٹھتا ہوں نکلنے کے لیے
جانے کیا سوچ کے دروازے سے لوٹ آتا ہوں

میرے ہر جزو کا ہے مجھ سے الگ ایک وجود
تم مجھے جتنا بگاڑو گے میں بن سکتا ہوں

مجھ میں رَقصاں کوئی آسیب ہے آوازوں کا
میں کسی اُجڑے ہوئے شہر کا سنّاٹا ہوں

اپنا ہی چہرہ اُنہیں مجھ میں دِکھائی دے گا
لوگ تصویر سمجھتے ہیں میں آئینہ ہوں

لمحۂ شوق ہوں، میری کوئی قیمت ہی نہیں
میں میسر تجھے آجاؤں تو مہنگا کیا ہوں

میں جھپٹنے کے لیے ڈُھونڈھ رہا ہوں موقع
اور وہ شوخ سمجھتا ہے کہ شرماتا ہوں

سخن میں صبح کو ڈھالا تو شب بھرم سے گری

سیاہ صفحے پہ کچھ روشنی قلم سے گری

گِرا دیے تھے اناؤں کے بت اگر ہم نے

تو پھر یہ ہجر کی دیوار کیوں نہ ہم سے گری

میں روشنی سے بھی آگے نکلنے والا تھا

پھر ایک دن مری رفتار ایک دم سے گری

وہ چاندنی جو ستاروں میں بھوک بانٹتی ہے

اک اہتمام سے کل رات کے شکم سے گری

وہ نیستی تھی کہ ہستی خبر نہیں ہے پہ وہ

کبھی وجود سے ٹپکی کبھی عدم سے گری

ستارے ملبے میں سانسوں کو ہار جائیں گے

زمیں فلک پہ کسی دن اگر دھڑم سے گری

میں دل میں سینت کے رکھتا ہوں اس لیے آزر

کہ مجھ کو علم ہے یہ خاک کس قدم سے گری

میانِ عرصۂ موت و حیات رقص میں ہے
اکیلا میں نہیں، کل کائنات رقص میں ہے

ہر ایک ذرہ، ہر اک پارۂ زمین و زمان
کسی کے حکم پہ، دن ہو کہ رات، رقص میں ہے

اُتاق ِکُنگرۂ عرش کے چراغ کی لو
کسی گلی کے فقیروں کے ساتھ رقص میں ہے

سنائیؔ ہوں کہ وہ عطّارؔ ہوں کہ رومی ؔہوں
ہر اک مقام پہ اِک خوش صفات رقص میں ہے

یہ جذب و شوق، یہ وارفتگی، یہ وجد ووفُور
میں رقص میں ہوں کہ کُل کائنات رقص میں ہے

کسے مجال کہ جنبش کرے رضا کے بغیر
جو رقص میں ہے، اجازت کے ساتھ رقص میں ہے

میں اپنے شمسؔ کی آمد کا منتظر تھا ،سو اب
مرے وجود میں رومیؔ کی ذات رقص میں ہے

وہ قونیہ ہو کہ بغداد ہوکہ سیہون ہو
زمین اپنے ستاروں کے ساتھ رقص میں ہے

شہروں کے چہرہ گر جنہیں مرنا تھا مر گئے
پیڑوں کو کاٹنے کی وبا عام کر گئے

اونچی مسہریوں کے دھلے بستروں پہ لوگ
خوابوں کے انتظار میں تھے اور مر گئے

کیا پوچھتے ہو یار کہ سیدھی سی بات ہے
جو لوگ راستوں میں نہیں ہیں وہ گھر گئے

دریا تھے اور ان کی گزرگاہ تھی مگر
اک دن سجے سجائے گھروں سے گزر گئے

ہم اپنی فصل کاٹ رہے تھے تو کھیت میں
اک تازہ فصل کے نئے امکاں ابھر گئے

یاد کیا آئیں گے وہ لوگ جو آئے نہ گئے
کیا پذیرائی ہو اُن کی جو بُلائے نہ گئے

اب وہ نیندوں کا اُجڑنا تو نہیں دیکھیں گے
وہی اچھّے تھے جنھیں خواب دکھائے نہ گئے

رات بھر میں نے کھُلی آنکھوں سے سپنا دیکھا
رنگ وہ پھیلے کہ نیندوں سے چُرائے نہ گئے

بارشیں رقص میں تھیں اور زمیں ساکت تھی
عام تھا فیض مگر رنگ کمائے نہ گئے

پَر سمیٹے ہوئے شاخوں میں پرندے آ کر
ایسے سوئے کہ ہوا سے بھی جگائے نہ گئے

تیز بارش ہو ، گھنا پیڑ ہو ، اِک لڑکی ہو
ایسے منظر کبھی شہروں میں تو پائے نہ گئے

روشنی آنکھ نے پی اور سرِ مژگانِ خیال
چاند وہ چمکے کہ سُورج سے بجھائے نہ گئے

راہی کو راہ دیتا ہوا آگے بڑھ گیا
ہر موڑ پہ چراغ رکھا آگے بڑھ گیا

دو ٹوک سچّی بات کہی سب کے سامنے
اپنے خلاف سب کو کیا آگے بڑھ گیا

یہ تشنگیِ شوق کسی طور نہ بجھی
آنسو ، شراب، زہر پیا آگے بڑھ گیا

آب و ہوا میں اسی کی مرا جی نہیں لگا
کچھ روز میں بدن میں رہا آگے بڑھ گیا

گھر سے چلا تو راہ میں دنیا ملی مجھے
کچھ دیر اس پہ غور کیا آگے بڑھ گیا

ہمارا عشق سلامت ہے یعنی ہم ابھی ہیں

وہی شدید اذیت ہے یعنی ہم ابھی ہیں

اسی پرانی کہانی میں سانس لیتے ہیں

وہی پرانی محبت ہے یعنی ہم ابھی ہیں

نہ جانے کب سے در داستاں پہ بیٹھے ہیں

اور انتظار کی ہمت ہے یعنی ہم ابھی ہیں

طلب کے کرب میں اک مرگ کے دعا گو تھے

طلب میں ویسی ہی شدت ہے یعنی ہم ابھی ہیں

کسی کے نام پہ ہم دوستی نبھاتے تھے

اور اب بھی ویسی ہی شہرت ہے یعنی ہم ابھی ہیں

طلب بڑھاتی چلی جا رہی ہے اپنی ہوس

سو قدرے خام قناعت ہے یعنی ہم ابھی ہیں

کلام میرؔ کے صدقے میں شعر ہوتے ہیں

جو بیت ہے سو قیامت ہے یعنی ہم ابھی ہیں

عجب یہ شعر ہیں اپنے کہ جن میں ہم بھی نہیں

بس ایک غم کی شرارت ہے یعنی ہم ابھی ہیں

یہ عشق پیشگی دار و رسن کے ہنگامے

یہ رنگ زندہ سلامت ہے یعنی ہم ابھی ہیں

امیر شہر ہے بے چین شیخ خوف زدہ

ابھی تلک یہ عداوت ہے یعنی ہم ابھی ہیں

نہ پوری ہے نہ ادھوری یہ داستان الم

کوئی سنی سی حکایت ہے یعنی ہم ابھی ہیں

ترے تن کے بہت رنگ ہیں جانِ من اور نہاں دل کے نیرنگ خانوں میں ہیں
لامسہ، شامہ ، ذائقہ، سامعہ، باصرہ، سب مِرے رازدانوں میں ہیں

اور کچھ دامنِ دل کشادہ کرو، دوستو شُکرِ نعمت زیادہ کرو
پیڑ، دریا، ہَوا، روشنی، عورتیں، خوشبوئیں، سب خُدا کے خزانوں میں ہیں

ناقہٴ حُسن کی ہم رکابی کہاں، خیمہٴ ناز میں باریابی کہاں
ہم تو اے بانوئے کشورِ دِلبری پاس داروں میں ہیں، ساربانوں میں ہیں

میرے اندر بھی ہے ایک شہرِ دِگر، میرے مہتاب، اک رات اِدھر سے گُزر
کیسے کیسے چراغ ان دریچوں میں ہیں، کیسے کیسے قمر اِن مکانوں میں ہیں

اِک سِتارہ ادا نے یہ کیا کر دیا، میری مٹّی سے مجھ کو جُدا کر دیا
اِن دنوں پاؤں میرے زمیں پر نہیں، اب مِری منزلیں آسمانوں میں ہیں

تم ہمیں ایک دن دشت میں چھوڑ کر چل دیے تھے تمھیں کیا خبر یا اخی
کتنے موسم لگے ہیں ہمارے بدن پر نکلنے میں یہ بال و پر یا اخی

شب گزیدہ دیاروں کے ناقہ سواروں میں مہتاب چہرہ تمہارا نہ تھا
خاک میں مل گئے راہ تکتے ہوئے سب خمیدہ کمر بام و در یا اخی

جنگ کا فیصلہ ہو چکا ہے تو پھر میرے دل کی کمیں گاہ میں کون ہے
اک شقی کاٹتا ہے طنابیں مرے خیمۂ خواب کی رات بھر یا اخی

یہ بھی اچھا ہوا تم اس آشوب سے اپنے سرسبز بازو بچا لے گئے
یوں بھی کوئے زیاں میں لگانا ہی تھا ہم کو اپنے لہو کا شجر یا اخی

نہر اس شہر کی بھی بہت مہرباں ہے مگر اپنا رہوار مت روکنا
ہجرتوں کے مقدر میں باقی نہیں اب کوئی قریۂ معتبر یا اخی

زرد پتوں کے ٹھنڈے بدن اپنے ہاتھوں پہ لے کر ہوا نے شجر سے کہا
اگلے موسم میں تجھ پر نئے برگ و بار آئیں گے تب تلک صبر کر یا اخی

ادائے حسن نہیں سادگی کی بات کرو
جو بھا رہا ہے مجھے بس اسی کی بات کرو

پڑا ہے جسم مرا سلوٹوں کے دامن میں
ہوس کا راگ سنو راگنی کی بات کرو

وصالِ یار کی خوشبو ہمیں ستاتی ہے
سکھی کرو تو ہمارے ہی پی کی بات کرو

یہ خواہشوں کا سمندر ہمیں ڈبو دے گا
ہر اک امید پہ آتی نمی کی بات کرو

یہ چاہتا ہے چمکتا ہوا ترا چہرا
نئے زمانے میں بھی آرسی کی بات کرو

سخن سرائے میں امکان ڈھونڈنا ہے ہمیں
ہے تنگ قافیہ حرفِ روی کی بات کرو

جو کامیاب ہے سب اس کو پوجتے ہیں عبیر
کبھی تو ہارے ہوئے آدمی کی بات کرو

آج پھر ان کی یاد آئی ہے
تحفةً اشک ساتھ لائی ہے

کوئی خوبی نہیں یہ خوبی ہے
بس وہی بوئے بے وفائی ہے

کیوں نہ قربان تجھ پہ ہوجاؤں
ہر ادا تیری دل رُبائی ہے

خود کی ہوتی تو درد بھی ہوتا
چھوڑیے! باپ کی کمائی ہے

دامنِ دل تو ہے گنہ آلود
اور ہمیں زعمِ پارسائی ہے

اپنے ایماں کی فکر کر پیارے!
ہر طرف سیلِ بے حیائی ہے

جتنےچہرے تھےاجنبی کل تک
آج ان سے ہی آشنائی ہے

غم غلط کررہاہوں میں شائؔق
ظاہراً یہ غزل سرائی ہے

مریضِ عشق کا کیا ہے جیا جیا، نہ جیا
ہے ایک سانس کا جھگڑا لیا، لیا، نہ لیا
بدن ہی آج، اگر تار تار ہے میرا
تو ایک چاکِ گریباں سیا سیا، نہ سیا
یہ اور بات کہ، تُو ہر راہِ خیال میں ہے
کہ تیرا نام زباں سے لیا لیا، نہ لیا
میرے ہی نام پہ، آیا ہے جام محفل میں
یہ اور بات کہ، میں نے پیا پیا، نہ پیا
یہ حالِ دل ہے صفی، میں تو سوچتا ہی نہیں
کہ کیوں کسی نے سہارا دیا دیا، نہ دیا؟

اب نہ کیجے خواہشِ برگ وثمر کی جستجو
چھوڑیے کشتی بنانے کے ہنر کی جستجو

عمر رفتہ جا کسی دیوار کے سائے میں بیٹھ
بے سبب کی خواہشیں ہیں اور گھر کی جستجو

بے گھری کے دَورِ پُر آشوب میں بھی جانے کیوں
ہے سبھی کے دل میں بس دیوار ودر کی جستجو

قربتوں کے ساتھ جینے کا ہنر آیا نہ پھر
اب کہاں مجھ کوکسی بھی ہم سفر کی جستجو

ایک لمحہ کو بھی حاصل ہے سکون دل کہاں
پھر بھی دل کو ہے مرے شاخ شجر کی جستجو

اب شکستہ خواب پلکوں پر نہیں آتے مری
مجھکوبھی رضواں نہیں اب چشم ترکی جستجو

حوالہ وہ محبت کا ہوا ہے

کہ جس نے بھی تجھے دیکھا ہوا ہے

یہ کشتی کیوں کنارے پر لگی ہے

ابھی دریا میں یہ جھگڑا ہوا ہے

گھڑی پر وقت کیا پوچھا تھا اُس نے

وہیں پر وقت یہ ٹہرا ہوا ہے

اُڑا دو دل سے خواہش کے پرندے

یہ پنجرا یوں بھی اب ٹوٹا ہوا ہے

تمہیں دیکھا ہے پہلی بار لیکن

تمہیں اک خواب میں دیکھا ہوا ہے

دل نہیں ہے تو کوئی احساس بھی زندہ نہیں ہے
اب ہماری ذات میں اخلاص بھی زندہ نہیں ہے

راستے میں اتنے لوگوں سے ملاقاتیں ہوئی ہیں
اب بھٹکنے کا کوئی آبھاس بھی زندہ نہیں ہے

اب تو لگتا ہے یہ دنیا گھومتی ہے الٹی جانب
کچھ نیا ہونے کی اب اک آس بھی زندہ نہیں ہے

اس زمانے نے محبت کو دیے ہیں زخم اتنے
اس کے اندر گرمیِ انفاس بھی زندہ نہیں ہے

اپنے لہجے میں ذرا ٹھہراؤ کو ترجیح دیجے
آدمیت کی یہاں بوباس بھی زندہ نہیں ہے

عشق کے سپنے سنجونے والے میرے پیارے جوگی
آج کل سنیاسی کا بن واس بھی زندہ نہیں ہے

اپنی زلفوں کو بھگوئے بیٹھی ہے گھر میں اداسی
اس سے کہہ دو اب ترا عکاس بھی زندہ نہیں ہے

حصارِ گل میں نہایت اداس دیکھا گیا
دنوں کے بعد وہ انجم شناس دیکھا گیا

جو عکس ِ تازہ کے بارے کہوں تو بات ہے یوں
وہ میرے ساتھ نہ تھا ۔۔گرچہ پاس دیکھا گیا

دمک رہا تھا تمنا کی سست لو میں کہیں
دل اک دیا۔۔۔جو ستاروں میں خاص دیکھا گیا

وہ میرِ خلعتِ صد رنگ و مردِ خوش پوشاک
بھرم کھلا تو بہت بے لباس دیکھا گیا

جو تو نے ان پہ گزارا وہ سانحہ تھا یا کیا
کہ روئے خلق پہ خوف و ہراس دیکھا گیا

اک آبِ حسن ۔۔پرانی شراب جیسا تھا
سو دستِ ذوق میں بھر بھر گلاس دیکھا گیا

کچھ ایسے قلندر جو کہا کچھ نہیں کرتے
اپنی پہ جو آ جائیں تو کیا کچھ نہیں کرتے

کچھ لوگوں کے صدقے میں ہے آباد یہ دنیا
کچھ لوگ محبت کے سوا کچھ نہیں کرتے

اکثر انہیں ہو جاتا ہے کچھ عشق وغیرہ
اکثر مرے ہم عمر نیا کچھ نہیں کرتے

جب خون کسی خطۂ مشرق میں بہا ہو
تب امن کے کچھ جھوٹے خدا کچھ نہیں کرتے

جب شعلۂ نفرت میں جھلس جاتے ہیں چھپر
محلوں میں پڑے شعلہ نوا کچھ نہیں کرتے

فرزانہ! جو تو سوچ رہی ہے یہ بہت لوگ
بس سوچتے رہتے ہیں لکھا کچھ نہیں کرتے

تم اصل ہو یا خواب ہو تم کون ہو
تم مہر ہو مہتاب ہو تم کون ہو

جو آنکھ بھی دیکھے تمہیں سرسبز ہو
تم اس قدر شاداب ہو تم کون ہو

تم لب بہ لب ،تم دل بہ دل ،تم جاں بہ جاں
اک نشہ ہو اک خواب ہو تم کون ہو

جو دست رحمت نے مرے دل پر لکھا
تم عشق کا وہ باب ہو تم کون ہو

میں ہر گھڑی اک پیاس کا صحرا نیا
تم تازہ تر اک آب ہو تم کون ہو

میں کون ہوں وہ جس سے ملنے کے لیے
تم اس قدر بے تاب ہو تم کون ہو

میں تو ابھی برسا نہیں دو بوند بھی
تم روح تک سیراب ہو تم کون ہو

یہ موسم کمیابی گُل کل بھی تھا
تم آج بھی نایاب ہو تم کون ہو

چھوتے ہو دل کچھ اس طرح جیسے صدا
اک ساز پر مضراب ہو تم کون ہو

دل کی خبر دنیا کو ہے تم کو نہیں
کیسے مرے احباب ہو تم کون ہو

وہ گھر ہوں میں جس کے نہیں دیوار و در
اس گھر کا تم اسباب ہو تم کون ہو

اے چاہنے والے مجھے اس عہد میں
میرا بہت آداب ہو تم کون ہو

یہ محبت ہے تو اس کی تو مقدار بڑھا

دیکھ ڈھلوان پہ رکنا نہیں، رفتار بڑھا

چار جانب سے مجھے اپنی طرف آنے دے

تین سمتوں سے نہ دوری کی یہ دیوار بڑھا

اپنے حصے کی محبت ابھی پھولوں کو نہ سونپ

ہے جو رخسار تو آگے یہی رخسار بڑھا

ٹانک کھونٹی پہ سبھی شال دوشالے اپنے

اے گلِ تازہ مرے کمرے کی مہکار بڑھا

میں محبت کے کسی آخری درجے پہ نہیں

میں ہوں قابیل مری سمت یہ تلوار بڑھا

اب دیکھ رہے ہو نہ پذیرائی ہماری
صد شکر زمانے کو سمجھ آئی ہماری

تم کو نہ بدلنا پڑے تالاب کا پانی
تم کو نہ بسر کرنی پڑے کائی ہماری

افلاک کے اس پار نظر آتا تھا ہمکو
تو تھا تو بہت تیز تھی بینائی ہماری

تم بھیج نہیں سکتے ہو گلزار کی نظمیں ؟
تم بانٹ نہیں سکتے ہو تنہائی ہماری ؟

پرکھو کسی میزان پہ معیار ۔بصیرت
ماپو کسی پیمانے سے گہرائی ہماری

آدمی خوار بھی ہوتا ہے نہیں بھی ہوتا

عشق آزار بھی ہوتا ہے نہیں بھی ہوتا

یہ جو کچھ لوگ خیالوں میں رہا کرتے ہیں

ان کا گھر بار بھی ہوتا ہے نہیں بھی ہوتا

زندگی سہل پسندی میں بسر کر لینا

کار دشوار بھی ہوتا ہے نہیں بھی ہوتا

کار دنیا ہی کچھ ایسا ہے کہ دل سے ترا درد

سلسلہ وار بھی ہوتا ہے نہیں بھی ہوتا

شادی و مرگ نے یہ نکتہ بتایا ہے کہ وقت

تیز رفتار بھی ہوتا ہے نہیں بھی ہوتا

افضلؔ اور قیس نے قانون بنایا ہے کہ عشق

دوسری بار بھی ہوتا ہے نہیں بھی ہوتا

زمیں سے پھول فلک سے ستارہ غائب ہے

نمو پزیر ہیں نظریں نظارہ غائب ہے

بنا رہا ہے خدا جانے کوزہ گر کیا چیز

گُھما رہا ہے فقط چاک گارا غائب ہے

بھٹک رہے ہیں مسافر گھنے سمندر میں

چٹک رہے ہیں بدن اور کنارہ غائب ہے

ہمیں ملا نہیں ناظر کوئی ٹھکانے کا

ہمیں کہا گیا حاضر تمھارا غائب ہے

ہمارے اشک کہیں رایگاں نہ ہو گئے ہوں

کتابِ غم سے حوالا ہمارا غائب ہے

کہیں کہیں کوئی موجودگی ہے منظر میں

کبھی کبھی تو یہ لگتا ہے سارا غائب ہے

سخن میں گُم ہیں زمانے کی ساری تشبیہات

علامتوں میں کہیں استعارہ غائب ہے

دلوں پہ اُس کا اثر ہو بھی کس طرح آزر

وہ شعر جس سے محبت کی دھارا غائب ہے

تیز لہکتی بارش ہے ، رسی پر کپڑے بھیگتے ہیں
آؤ ہم بھی ایسے بھیگیں جیسے بچے بھیگتے ہیں
سرخ سنہری بیلڑیوں پر نقرئی کلیاں کھل اٹھیں
ایک گلابی سرمستی میں پھول اور پتے بھیگتے ہیں
دیکھو یوں بھیگا جاتا ہے شام کے سنگِ مرمر پر
دھوپ اور بارش ساتھ ہیں دونوں اور اکٹھے بھیگتے ہیں
کھڑکی کے باہر کا منظر بالکل کمرے جیسا ہے
رخساروں پر بہتی بوندیں جیسے شیشے بھیگتے ہیں
جانے آنسو ہیں یا بارش ‘ کون اب اس پر دھیان کرے
ہم تو بس بھیگے موسم میں آنکھیں میچے بھیگتے ہیں

حسن ہمہ تن گوش ہے عشق سلام کرے
سائیں سکھائے بولنا سائیں کلام کرے

عشق شریعت ساز ہے عشق طریقت سوز
حکم چلائے آپ پر آپ غلام کرے

پانچ محل ہیں پریم کے پانچوں میں ہے نور
سجدہ راہی پریم کا کس کس گام کرے

سائیں آگے کر دیا اپنے آپ کو ڈھیر
چاہے تو اب خاص ہیں چاہے عام کرے

دل میں اک دل دار ہے جس سے اُس کا پریم
وہی حرم میں آ بسے اور احرام کرے

ایسا نوکر چاہئے جو تنخواہ نہ لے
شب بھر روئے زار زار دن بھر کام کرے

کیسے کیسے خواب دیکھے، دربدر کیسے ہوئے​
کیا بتائیں روز و شب اپنے بسر کیسے ہوئے​
​
نیند کب آنکھوں میں آئی، کب ہوا ایسی چلی​
سائباں کیسے اُڑے، ویراں نگر کیسے ہوئے​
​
کیا کہیں وہ زُلفِ سرکش کس طرح ہم پر کھلی​
ہم طرف دار ہوائے راہگُزر کیسے ہوئے​
​
حادثے ہوتے ہی رہتے ہیں مگر یہ حادثے​
اک ذرا سی زندگی میں، اس قدر کیسے ہوئے​
​
ایک تھی منزل ہماری، ایک تھی راہِ سفر​
چلتے چلتے تم اُدھر، اور ہم اِدھر کیسے ہوئے​
​