غزل

زیرِ محراب ، نہ بالاے مکاں بولتی ہے

خامشی آکے سرِ خلوتِ جاں بولتی ہے

یہ مرا وہم ہے یا مجھ کو بلاتے ہیں وہ لوگ

کان بجتے ہیں کہ موجِ گزراں بولتی ہے

لو، سوالِ دہنِ بستہ کا آتا ہے جواب

تیر سرگوشیاں کرتے ہیں ، کماں بولتی ہے

ایک میں ہوں کہ اس آشوبِ نوا میں چپ ہوں

ورنہ دُنیا مرے زخموں کی زباں بولتی ہے

ہوُ کا عالم ہے گرفتاروں کی آبادی میں

ہم تو سنتے تھے کہ زنجیرِ گراں بولتی ہے

درد کے باب میں تمثال گری ہے خاموش

بن بھی جاتی ہے تو تصویر کہاں بولتی ہے

لوگ ہیں سب حیران، کریں کیا

گم صم ہے بھگوان، کریں کیا

چاروں اور لڑائی جاری

پڑا ہے پھر گھمسان کریں کیا

روشنی کو اب کیسے روکیں

کھلا ہے روشن دان کریں کیا

جس میں کتابِ حق رکھا تھا

گم ہے وہ جزدان کریں کیا

ہجرت کر گئے سارے کھلاڑی

خالی ہے میدان کر یں کیا

بیچ آنگن دیوار نہ اُٹھے

کہئیے! بھائی جان کریں کیا

جونہی اُن سے قرضہ مانگا

بن گئے وہ انجان کریں کیا

پھینک رہے ہیں لمبی لمبی

ہائےیہ جھوٹی شان کریں کیا

تحفہ اب کیا لے کر جائیں

بند ہیں سب دوکان کریں کیا

ہانڈی خالی جیب بھی خالی

آئے ہیں مہمان کریں کیا

پوچھتے ہیں وہ خنجر تانے

مشکل کو آسان کریں کیا

اُن کو جب آنا ہی نہیں ہے

سجوا کر دالان کریں کیا

دے بیٹھے دل، جان لٹا دی

ان پرا ب قربان کریں کیا

خوش ہیں اُن سے دھوکے کھا کر

ایسے ہم نادان، کریں کیا

نفرت کی آندھی کیا آئی

بستی ہوئی ویران کریں کیا

زرد ہیں سب کے چہرے مُہرے

پھیلا ہے یرقان کریں کیا

سُننا پڑتا ہے مجبوراً

حاکم کا فرمان کریں کیا

کس کے بھروسے چین سے سوئیں

سارق ہیں دربان کریں کیا

کس کو سنائیں دُکھڑا اپنا

منصف ہیں شیطان کریں کیا

اچھے دن آنے والے ہیں

ہوا ہے پھر اعلان ، کریں کیا

حیوانوں کا راج ہے ہر سو

ایسے میں انسان کریں کیا

جو منسوب تھا اُن سے رفیقیؔ

کھو گیا وہ دیوان کریں کیا

ترے نزدیک آکر سوچتا ہوں

میں زندہ تھا کہ اب زندہ ہوا ہوں

جن آنکھوں سے مجھے تم دیکھتے ہو

میں ان آنکھوں سے دنیا دیکھتا ہوں

خدا جانے مری گٹھری میں کیا ہے

نہ جانے کیوں اٹھائے پھر رہا ہوں

یہ کوئی اور ہے اے عکس دریا

میں اپنے عکس کو پہچانتا ہوں

مجھے اس بھیڑ میں لگتا ہے ایسا

کہ میں خود سے بچھڑ کے رہ گیا ہوں

جسے سمجھا نہیں شاید کسی نے

میں اپنے عہد کا وہ سانحہ ہوں

نہ جانے کیوں یہ سانسیں چل رہی ہیں

میں اپنی زندگی تو جی چکا ہوں

جہاں موج حوادث چاہے لے جائے

خدا ہوں میں نہ کوئی ناخدا ہوں

غم اندیشہ ہائے زندگی کیا

تپش سے آگہی کی جل رہا ہوں

ابھی یہ بھی کہاں جانا کہ مرزؔا

میں کیا ہوں کون ہوں کیا کر رہا ہوں

سو بار چمن مہکا سو بار بہار آئی

دنیا کی وہی رونق، دل کی وہی تنہائی

اس عالم ویراں میں کیا انجمن آرائی

دو روز کی محفل ہے، اک عمر کی تنہائی

ہر دردِ محبت سے الجھا ہے غمِ ہستی

کیاکیا ہمیں یاد آیا جب یاد تری آئی

چرکے وہ دیے دل کو محرومیِ قسمت نے

اب ہجر بھی تنہائی اور وصل بھی تنہائی

جلووں کے تمنائی جلووں کو ترستے ہیں

تسکین کو روئیں گے جلووں کے تمنائی

دیکھے ہیں بہت ہم نے ہنگامے محبت کے

آغاز بھی رسوائی، انجام بھی رسوائی

اوروں کی محبت کے دہرائے ہیں افسانے

بات اپنی محبت کی ہونٹوں پہ نہیں آئی

یہ بزمِ محبت ہے، اس بزمِ محبت میں

دیوانے بھی شیدائی، فرزانے بھی شیدائی

خیال اس بات کا دل سے مرے اکثر نہیں جاتا

میں گھر جانے کی جلدی میں عموماً گھر نہیں جاتا

 

مجھے اک مسئلہ درپیش ہے کہ ہاتھ تو میرے

ترے پاؤں تلک جاتے ہیں لیکن سر نہیں جاتا

 

کسی کی بددعا ہے یا مرے پاؤں نہیں میرے

جہاں جانا ضروری ہو وہاں اکثر نہیں جاتا

 

وہ میرے ساتھ چلتا ہے کہ میں تنہا نہ ہو جاؤں

مگر اک فاصلہ رکھ کر جہاں پتھر نہیں جاتا

 

سُنا ہے آسمانوں سے ابابیلیں اترتی ہیں

مقابل ابرہہہ کے جب کوئی لشکر نہیں جاتا

 

غلط فہمی میں مت رہنا تعلق ٹوٹ جائے تو

تعلق مار دیتا ہے تعلق مر نہیں جاتا

 

وہ میرا دائرہ ہے اور میں اس میں مقید ہوں

میں چاہوں بھی نصیر اس سے کبھی باہر نہیں جاتا

جب ترے آس پاس ہیں ہم لوگ

کس لئے پھر اداس ہیں ہم لوگ

صرف سجتا ہے ہم پہ اجلا کفن

اس قدر خوش لباس ہیں ہم لوگ

غم سے بھر پور ہے ہماری کتھا

درد کا اقتباس ہیں ہم لوگ

جو نہ پہنچی قبولیت کو کبھی

ایسی اک التماس ہیں ہم لوگ

اچھے چہروں سے دھوکے کھاتے ہیں

کیا قیافہ شناس ہیں ہم لوگ

وائے حیرت کہ وہ بھی پوچھتے ہیں

کس لئے بد حواس ہیں ہم لوگ

جس سے باقی ہے آبرو اس کی

عشق کی وہ اساس ہیں ہم لوگ

ہر کوئی ہم سے بغض رکھتا ہے

جانے کس پر قیاس ہیں ہم لوگ

 بحر اک چاہئے بجھانے کو

اتنے برسوں کی پیاس ہیں ہم لوگ

کوئی بتلاؤ کیا بتائیں ہم

کیوں رفیقیؔ نراس ہیں ہم لوگ

جگہ جگہ تو وضاحت نہیں کریں گے ہم
جہاں ضروری لگے گی وہیں کریں گے ہم

نہ جانے آپ کو کس نے یقیں دلایا ہے
کہ آپ جو بھی کہیں گے یقیں کریں گے ہم

یہاں سنیں گے توجہ سے اَن کہی تیری
روایت اس کو پھر آگے کہیں کریں گے ہم

ہوا کے جشن میں شامل ہوئے تو یوں سمجھو
دیئے کو اور بھی اندوہ گیں کریں گے ہم

اب ان کے ہاتھ تو دیکھو ذرا جو کہتے تھے
ردائے وقت پہ کارِ نگیں کریں گے ہم

یہ کچھ نہ کرنا تو کافی نہیں ہے کرنے کو
کچھ اور بھی تو علاوہ ازیں کریں گے ہم

گئے ہوؤں کو رصد گاہِ دل سے دیکھیں گے
جو دور ہیں انھیں اپنے قریں کریں گے ہم

ہمارے سامنے مطلع ہے آسمانوں کا
اسی کو تازہ غزل کی زمیں کریں گے ہم

خدا کا سبزہ کہیں اور کیوں اگائیں گے
زمینِ دل کو ہی خلدِ بریں کریں گے ہم

نشہ شراب میں، جھونکا فضا میں دیکھ سکے
کچھ اتنا آنکھ کو باریک بیں کریں گے ہم

برابری کا تعلّق تو سب سے رکھیں گے
مگر غلامی کسی کی نہیں کریں گے ہم

دلوں کو بھر لیا ہم نے یہاں کے رازوں سے
دلوں کو خالی بھی شاہد یہیں کریں گے ہم

دن بدلتے نہیں اور سال بدل جاتا ہے

یہ گزشتہ مرا آئندہ نگل جاتا ہے

ٹھوکروں کی رہا ہوں زد میں مسلسل ورنہ

ایک ٹھوکر سے تو ہر شخص سنبھل جاتا ہے

کوئی امکاں نہیں پابند کسی زنداں کا

 عکس آئینے کے اندر سے نکل جاتا ہے

رائیگاں جاتا ہوا اور دھواں ہوتا ہوا

جیون اک شخص کے ہونے سے بہل جاتا ہے

ذائقے سے یہاں محروم ہیں خود باشندے

کن دیاروں میں مرے دیس کا پھل جاتا ہے

بار بار آگ بھڑک اٹھتی ہے گھر میں اپنے

اور محنت سے بنایا ہوا جل جاتا ہے

سارا کا سارا گماں کھوٹ ہے ورنہ شاہد

تھوڑا سا کھوٹ تو سونے میں بھی ڈھل جاتا ہے

بنا رہا ہُوں تری آنکھ کے اشارے پر

اسی کنارے کی تصویر اُس کنارے پر

اُداس شام سے اک نام میں نے سیکھا تھا

سو، لکھ رہا ہوں وہی صبح کے ستارے پر

انہی کے کھوج میں موسم بھی، شاخ و شبنم بھی

گُلاب کس نے کھلائے ہیں بہتے دھارے پر

سب اپنی اپنی خریداریوں کی فکر میں ہیں

نظر کسی کی نہیں ہے مرے خسارے پر

اسی لیے تو زمیں پر وہ اجنبی نہ لگے

مَیں اُن سے پہلے ملا تھا کسی ستارے پر

ہَوائیں آج بھی پیغامِ امن لائی ہیں

کہ اس نے کاٹ دیے فاختہ کے سارے پر

سرخ سنہری پیلی کی ایجاد ہوئی

تجھ کو دیکھ کے چھتری کی ایجاد ہوئی

تجھ کو دریا پار سے دیکھا کرتے تھے

پھر بستی میں کشتی کی ایجاد ہوئی

میں نے تیرے ہاتھ پہ اپنا نام لکھا

اور دنیا میں تختی کی ایجاد ہوئی

ہم نے پہلا گھر سنسار بسایا تھا

تالے کی اور چابی کی ایجاد ہوئی

صحن میں اور کمرے میں کتنی دوری تھی

دروازے اور کھڑکی کی ایجاد ہوئی

تیرا جسم زمیں پر میلا ہوتا تھا

تخت بنا اور کرسی کی ایجاد ہوئی

تیرے وصل سے گرمی کو آغاز ملا

تیرے ہجر سے سردی کی ایجاد ہوئی

اک دن مجھ کو اپنے آپ سے عشق ہوا

اور پسلی سے لڑکی کی ایجاد ہوئی

تجھ سے پہلے سب کچھ سب کا ہوتا تھا

تو آئی خودغرضی کی ایجاد ہوئی

آپ جیسوں کے لیے اِس میں رکھا کچھ بھی نہیں

لیکن ایسا تو نہ کہیے کہ وفا کچھ بھی نہیں

آپ کہیے تو نبھاتے چلے جائیں گے مگر

اِس تعلق میں اذیّت کے سِوا کچھ بھی نہیں

میں کسی طرح بھی سمجھوتہ نہیں کر سکتا

یا تو سب کچھ ہی مجھے چاہیے یا کچھ بھی نہیں

کیسے جانا ہے کہاں جانا ہے کیوں جانا ہے

ہم کہ چلتے چلے جاتے ہیں پتہ کچھ بھی نہیں

ہائے اِس شہر کی رونق کے میں صدقے جاؤں

ایسی بھرپور ہے جیسے کہ ہُوا کچھ بھی نہیں

پھر کوئی تازہ الم دل میں جگہ کرتا ہے

جب بھی لگتا ہے کہ لکھنے کو بچا کچھ بھی نہیں

اب میں کیا اپنی محبت کا بھرم بھی نہ رکھوں ؟

مان لیتا ہوں کہ اُس شخص میں تھا کچھ بھی نہیں

میں نے دُنیا سے الگ رہ کے بھی دیکھا جوّاد

ایسی منہ زور اداسی کی دوا کچھ بھی نہیں

مجھ کو لایا ہے بہت سوچ کے لانے والا

میں ترے شہر سے یوں ہی نہیں جانے والا

میں جو کہتا ہوں، فقط بول نہ سمجھو اُس کو

فن بھی آتا ہے مجھے کر کے دکھانے والا

کوئی کہتا ہے مرے شعر میں انگارے ہیں

کوئی لکھتا ہے مجھے آگ بُجھانے والا

یاسیت ہی تمھیں ہاتھ آئے گی مجھ سے مل کر

مجھ کو آتا نہیں انداز لُبھانے والا

واعظوں کے تو بڑے پہرے لگے تھے اُس پر

آگیا شہر میں کیوں کر یہ ہنسانے والا

کیوں مجھے بھول گیا، اس پہ مجھے حیرت ہے

چاند تاروں سے مری دنیا سجانے والا

مجھ کو کیا کیا نہ رہیں اُس سے امیدیں، لیکن

خالی ہاتھ آیا ترے شہر سے آنے والا

کس قدر بھول بُھلّیاں ہیں ترے رستے میں

کھو گیا راہ میں خود راہ بتانے والا

خواب دیکھو نہ رفیقی کہ یہاں بستی میں

کوئی یوسف نہیں تعبیر بتانے والا

نہ ساقی کی نگہ سے اور نہ پیمانے سے ملتی ہے

شرابِ معرفت خلوت کے میخانے سے ملتی ہے

اگر بیگانگی ملتی ہے اپنوں سے تو کیا غم ہے

ہمیں اپنائیت جنگل سے، ویرانے سے ملتی ہے

فقیروں کے لیے غم اور خوشی بالکل برابر ہیں

مگر یہ آگہی بھی رنج کے آنے سے ملتی ہے

جھلک بھی دیکھنا ممکن نہیں ہے غیر کو اس کی

ضیا جو ذہن کے خود ہی جِلا پانے سے ملتی ہے

یہ دنیا اک فریبِ آرزو کا کارخانہ ہے

یہاں جو چیز ملتی ہے وہ ٹھکرانے سے ملتی ہے

ہمیں کیا راس آئے وہ خوشی جو اور لوگوں کو

وفورِ شوق میں چپ چاپ بہہ جانے سے ملتی ہے

حضورِ شمع پھرتے ہیں ذرا سا فاصلہ رکھ کر

ہماری وسعتِ پرواز پروانے سے ملتی ہے

بڑھا اصرار جو حد سے تو اس نے یہ کہا ہنس کر

تری ہر بات میرے ایک دیوانے سے ملتی ہے

یہ کیا کہ خاک ہوئے ہم جہاں وہیں کے نہیں
جو ہم یہاں کے نہیں ہیں تو پِھر کہیں کے نہیں

وفا سرشت میں ہوتی تو سامنے آتی
وہ کیا فلک سے نبھائیں گے جو زمیں کے نہیں

ہوا کی گرم خرامی سے پڑ رہے ہیں بھنور
یہ پیچ و تاب کسی موجِ تِہ نشیں کے نہیں

سُنا گیا ہے کہ اکثر قیام و ذکر و سجُود
ہیں جس کے نام اُسی جانِ آفریں کے نہیں

تمام عمر پِھرے دربدر، کہ گھر ہو جائے
گھروں میں رہنا بھی تقدیر میں اُنہیں کے نہیں

بِکھر رہے ہیں جو آنسُو بغیر منّتِ دوست
وہ دامنوں کی امانت ہیں آستیں کے نہیں

بدن میں کون اجالا لکیر کھینچتا ہے
کہ جیسے خاک پہ دریا لکیر کھینچتا ہے

کسی کسی کو ہے تربیتِ سخن سازی
کوئی کوئی ہے جو تازہ لکیر کھینچتا ہے

جب اور کوئی مدَد کے لیے نہیں آتا
تو عشق دشت میں تنہا لکیر کھینچتا ہے

مَیں دائرے کے تسلُط سے جب نِکلتا ہُوں
وہ اِسم پڑھ کے دوبارہ لکیر کھینچتا ہے

عجَب نہیں ہے کہ ہم خاک پر جُدا ہُو جائیں
غضَب نہیں ہے کہ لمحہ لکیر کھینچتا ہے

وہ اپنے بخت کا لکّھا بھی کاٹ سکتا تھا
جو اپنے ہاتھ پہ تازہ لکیر کھینچتا ہے

قبولیت کی گھڑی ہے دعا کریں آزَر
فلک پہ سُرخ ستارہ لکیر کھینچتا ہے

یہ بے گھری کے مصائب تو ہم پہ آنے ہیں

تمہارا کیا ہے تمہارے تو سو ٹھکانے ہیں

خوشی کے پیڑ بھلا کس جگہ اُگانے ہیں

زمین پر تو اداسی کے کارخانے ہیں

مرے دماغ میں ہر روز وصل کی تجویز

تری زبان پہ ہر دن نئے بہانے ہیں

ذرا سی بات تو ہجرت کی بات ہے لیکن

ذرا سی بات پہ وہ گال بھیگ جانے ہیں

یہ سیدھے سادھے مسافر کہاں قیام کریں

جگہ جگہ پہ تمہارے فریب خانے ہیں

وہ خوش ہے اپنی اسی چار دن کی شہرت پر

میں مطمئن ہوں کہ میرے لیے زمانے ہیں

ہمارے دم سے ہے راہِ سخن میں ہریالی

ہمارے بعد یہ پتے بھی سوکھ جانے ہیں

کون مٹی ہے کون پانی ہے
ایک دریا کی سب روانی ہے

کس نے دیکھی ہے وقت کی صورت
حاصلِ دید  رائگانی ہے

دُور تک کچھ نظر نہیں آتا
بے کرانی سی بے کرانی ہے

اور کچھ دیر زندگی ہے یہاں
پھر زمانوں کی لا زمانی ہے

یہ تماشا بھی دیدنی ہو گا
اِس تماشے میں ناگہانی ہے

جسم میرا جدید ہے لیکن
روح میری بڑی پرانی ہے

میں کسی خواب کی اوڈیسی ہوں
میری تعبیر داستانی ہے

دکھ کا پودا دلوں میں اگتا ہے
دکھ زمینی نہ آسمانی ہے

یہ ذرا سی جو رات روشن ہے
اک ستارے کی ضوفشانی ہے

یہ جو تھوڑی بہت طراوت ہے
چند پیڑوں کی مہربانی ہے

صبح جیسی ہے خوبصورت ہے
شام جیسی بھی ہے سہانی ہے

آ ہی جائے گا اب مجھے اُڑنا
ایک تتلی کی بات مانی ہے

 

موسموں کے تغیر کو بھانپا نہیں چھتریاں کھول دیں
زخم بھرنے سے پہلے کسی نے مری پٹیاں کھول دیں

ہم مچھیروں سے پوچھو سمندر نہیں ہے یہ عفریت ہے
تم نے کیا سوچ کر ساحلوں سے بندھی کشتیاں کھول دیں

اس نے وعدوں کے پربت سے لٹکے ہوؤں کو سہارا دیا
اس کی آواز پر کوہ پیماؤں نے رسیاں کھول دیں

دشت ِ غربت میں ، میں اور میرا یار ِ شب زاد باہم ملے
یار کے پاس جو کچھ بھی تھا یار نے گٹھڑیاں کھول دیں

کچھ برس تو تری یاد کی ریل دل سے گزرتی رہی
اور پھر میں نے تھک ہار کے ایک دن پٹریاں کھول دیں

اس نے صحراؤں کی سیر کرتے ہوئے اک شجر کے تلے
اپنی آنکھوں سے عینک اتاری کہ دو ہرنیاں کھول دیں

آج ہم کر چکے عہدِ ترکِ سخن پر رقم دستخط
آج ہم نے نئے شاعروں کے لیے بھرتیاں کھول دیں

سبھی اچھی بری آنکھوں کی مری
اس نے ہنس کر سنی آنکھوں کی مری

میری پلکوں سے کوئی خواب گرا
روشنی جل بجھی آنکھوں کی مری

ہائے وہ لب کہ جو تشنہ ہی نہیں
کیوں چکھیں ںےنمی آنکھوں کی مری

دور اک گھر میں چراغاں کا سماں
ماند ہے چاندنی آنکھوں کی مری

نغمہء رنج پہ رقصاں مرے دوست!
راگنی سن کبھی آنکھوں کی مری

ابھی چوکھٹ پہ بس آہٹ ہوئی تھی
اور چمک بڑھ گئی آنکھوں کی مری

فیصلہ دل کا مرے حتمی ہے
بات ہے آخری آنکھوں کی مری

آج جس رنگ میں بھیگی ہوئی ہیں
خیر ہو سرمئی آنکھوں کی مری

اس نے ہنستے ہوئے ہونٹوں سے کہی
داستاں نم بھری آنکھوں کی مری

شاید اس دل میں کہیں باقی ہو
یاد بسری ہوئی آنکھوں کی مری

فطرتاً آئے یا پھر شوق کی مد میں آئے
ہم سے خوشحال بھی حالات کی زد میں آئے

کتنی منہ پھٹ ہوئی جاتی ہے تری خاموشی
اس کو سمجھا کہ یہ آداب کی حد میں آئے

لیکھ میں جو نہ ملا میں نے دعا میں مانگا
تم ازل میں نہیں آتے تھے ابد میں آئے

جشن ایسا تھا کہ آنا تھا ضروری سب کا
جو خوشی سے نہیں آئے وہ حسد میں آئے

تیرے دیوانے بھی ہیں پاس ہے دانائی بھی
خبط کے بھوت بھی اس بار خرد میں آئے

اک تعلق تھا تری ذات سے جو مر بھی چکا
پر تری یاد کے مردے نہ لحد میں آئے

گم گشتہ آسمانوں کے بارے میں پھر کبھی

بھولی ہوئی اڑانوں کے بارے میں پھر کبھی

ہاں ! ہم سمندروں کی تہوں تک گئے تو تھے

کھوئے ہوئے خزانوں کے بارے میں پھر کبھی

کیا کیا نہ اپنے ہاتھ میں آکر پھسل گیا

قسمت کے اُن بہانوں کے بارے میں پھر کبھی

دیوار پر ہمارے شکاروں کے سر نہ ڈھونڈ

چوکے ہوئے نشانوں کے بارے میں پھر کبھی

جن مسکراہٹوں کے ہوئے ہیں شکار ہم

یاروں کی اُن مچانوں کے بارے میں پھر کبھی

اَن دیکھا جن کو دیکھ کے کرنا پڑا ہمیں

خطرے کے اُن نشانوں کے بارے میں پھر کبھی

اس پہلی کامیابی پہ خوش ہونے دیجیے

اب تک کے امتحانوں کے بارے میں پھر کبھی

وقت آفاق کے جنگل کا جواں چیتا ہے
میری دنیا کے غزالوں کا لہو پیتا ہے

عشق نے مر کے سوئمبر میں اسے جیتا ہے
دل سری رام ہے ، دلبر کی رضا سیتا ہے

اب بھی گھنشیام ہے اس دشت کا بوٹا بوٹا
برگِ نے آج بھی انساں کے لیے گیتا ہے

جگمگاتی رہی اشکوں سے شبِ تارِ حیات
دیپ مالا کی طرح دورِ الم بیتا ہے

کوئی لہکا جو سرِ دار تو یزداں نے کہا
ابنِ آدم نے مہ و سال کا رن جیتا ہے

تجھے سجدوں کے عوض مل نہ سکی روحِ بشر
ہم نے سر دے کے خدائی کا بھرم جیتا ہے

حسیں تو ہے ، مگر حسنِ وفاداری نہیں ہے
وہ لڑکی لاکھ اچھی ہو ،مگر پیاری نہیں ہے

ہے اس کا کام لوگوں کے لیے تالے بنانا
کہ جس کی اپنی کوئی چار دیواری نہیں ہے

مرا لہجہ ترے لہجے سے اب کڑوا رہے گا
تری چاہت مرے اعصاب پر طاری نہیں ہے

وہ اپنے ہاتھ سے منہ نوچ کر جو رو رہی ہے
ستم پرور ہے صاحب کوئی بیچاری نہیں ہے

اسی باعث تو ہم ٹھکرائے جاتے ہیں مسلسل
ہمارے پاس تو فن ہے اداکاری نہیں ہے

اسے جب چاہو اپنالو اسے جب چاہو توڑو
یہ میرا دل ہے کوئی چیز بازاری نہیں ہے

یہ جو آ کر کے اب میت پہ میری رو رہے ہیں
اداکاری ہے یارو یہ عزاداری نہیں ہے

جنابِ شوق کو سن کر یہ اندازہ ہوا کہ
بغاوت کا یہ سر ہے راگ درباری نہیں ہے

گھول جا دن بھر کا حاصل اس دل بے تاب میں
ڈوب جا اے ڈوبتے سورج! مِرے اعصاب میں

آنکھ میں ہر لحظہ تصویریں رواں رہنے لگیں
جم گیا ہے خواب سا اک دیدۂ بے خواب میں

دل ہمارا شاخساروں سے، گلوں سے کم نہیں
اے صبا کی موجِ لرزاں، کچھ ہمارے باب میں

ہاں اسی تدبیر سے شاید بنے تصویرِ دل
رنگ ہم نے آج کچھ گھولے تو ہیں سیماب میں

دھیان بھی تیرا، تِری موجودگی سے کم نہ تھا
کنجِ خلوت میں بھی ہم جکڑے رہے آداب میں

دسترس ہے موج کی ساحل سے ساحل تک فقط
تہ کو جا پہنچے، اگر اترے کوئی گرداب میں

پیشِ دل کچھ اور ہے، پیشِ نظر کچھ اور ہے
ہم کھلی آنکھوں سے کیا کیا دیکھتے ہیں خواب میں

مری جستجو بھی کیا تھی، میں یہی نہ ڈھونڈ پائی
"نہ سراغ فہم روشن، نہ چراغ آشنائی”
یہی وصل کی حقیقت، وہی ہجر کی حکایت
یہی چار دن کی سنگت، وہی دائمی جدائی
مجھے کیا غرض چمن سے کہ میں دشت کی مسافر
مگر ایک تیری آہٹ کہ یہاں بھی کھینچ لائی
جہاں شہسوار ڈر کے سر راہ لوٹ آئے
مجھے لے گئی وہاں بھی یہ مری برہنہ پائی
مری چشم پر حزیں سے سر شام اس نے پوچھا
غم دہر کی حقیقت تجھے کس نے لا دکھائی
یہ کشاکش ازل تھی پئے مہر و ماہ و انجم
اسے کیا ہوا نجانے، مرے جی میں آ سمائی
وہ تبسم فروزاں کہ ہو جس سے دل منور
مگر آنکھ بھر کے دیکھا تو نظر بھی لوٹ آئی
مری ایک بزم خلوت کہ بجھی نہ ہجرتوں میں
وہی شمع کر کے روشن وہی انجمن سجائی
ترا حسن ناز یکتا کہ جب آنکھ بھر کے دیکھا
نہ خیال رفتگاں تھا نہ حساب دلربائی

خزاں کی رُت میں لمحۂ جمال کیسے آگیا

یہ آج پھر سنگھار کا خیال کیسے آگیا

ہنسی کو اپنی سُن کے ایک بار میں چونک اُٹھی

یہ مجھ میں دُکھ چھپانے کا کمال کیسے آگیا

وہ رسمِ چارہ سازی جنوں تو ختم ہو چُکی

یہ دل کے نام حرفِ اندمال کیسے آگیا

ابھی تو دھوپ روزنِ قفس سے کوسوں دُور تھی

ابھی سے آفتاب کو زوال کیسے آگیا

جدائیوں کے زخم تو سُنا کے بھر چلے تھے پھر

بدن کے ہاتھ ناخنِ وصال کیسے آگیا

تمام کائنات ازل سے آئینوں کی زد پہ تھی

ہجومِ عکس میں یہ بے مثال کیسے آگیا

ہنستے گاتے روتے پھول
جی میں ہیں کیسے کیسے پھول

اور بہت کیا کرنے ہیں
کافی ہیں یہ تھوڑے پھول

وقت کی پھلواری میں نہیں
دامن میں ہیں ایسے پھول

اس دھرتی کی رونق ہیں
میرے کانٹے تیرے پھول

کیسے اندھے ہیں وہ ہاتھ
جن ہاتھوں نے توڑے پھول

اُن پیاسوں پر میرا سلام
جن کی خاک سے نکلے پھول

ایک ہری کونپل کے لیے
میں نےچھوڑے کتنے پھول

اونچے اونچے لمبے پیڑ
سادے پتے پیلے پھول

مٹی ہی سے نکلے تھے
مٹی ہو گئے سارے پھول

مٹی کی خوشبو لینے
نیل گگن سے اترے پھول

چادر اوڑھ کے شبنم کی
نکلے آنکھوں ملتے پھول

شام ہوئی اب گلیوں میں
دیکھو چلتے پھرتے پھول

سونا جسم سفید قمیص
گورے ہاتھ سنہرے پھول

کچی عمریں کچے رنگ
ہنس مکھ بھولے بھالے پھول

آنکھ آنکھ میں بھیگی نیند
ہونٹ ہونٹ سے جھڑتے پھول

جیسا بدن ویسا ہی لباس
جیسی مٹی ویسے پھول

مہک اٹھی پھر دل کی کتاب
یاد آئے یہ کب کے پھول

شام کے تارے تو ہی بتا
آج کدھر سے گزرے پھول

کانٹے چھوڑ گئی آندھی
لے گئی اچھے اچھے پھول

دھیان میں پھرتے ہیں ناصر
اچھی آنکھوں والے پھول

جاؤ! مجھے ڈراؤ نہ کارِ ملال سے
یہ کام کر رہا ہوں میں بتیس سال سے

پہلے تو ناخنوں سے تراشے کئی پہاڑ
پھر اس کے بعد زخم کریدے کدال سے

کُھلتی تھی اک مکان کی کھڑکی، جنوبی سمت
سورج طلوع ہوتا تھا میرا شمال سے

ایسا نہیں کہ ہجر ہوا مجھ میں صرف جذب
ظاہر بھی ہو رہا ہے مرے خدوخال سے

یہ زخم اُس کا آخری تحفہ ہے، کچھ کرو!
کچھ بھی کرو! بچاؤ اِسے اندمال سے

اک ہجرِ ممکنہ مرے کافی قریب ہے
دیمک ذرا سی دور ہے لکڑی کے ٹال سے

قبل از سفر، درونِ سفر، بعد از سفر
کہتا تھا کوئی کان میں :” نجمی! خیال سے!”

خوشیوں میں بھی سو رنج کے پہلو نکل آئے
اتنا میں ہنسا، آنکھ سے آنسو نکل آئے

گلیاں ہیں کہ خوش رنگ دریچے ہیں چمن کے
بازار ہیں یا دشت میں آہو نکل آئے

انصاف کو پھر کون سی میزان میں رکھیں
ہر شخص کا جب اپنا ترازو نکل آئے

وہ پھول ہے تو جس کے نکلنے سے بھی پہلے
ہر تارِ رگِ شاخ سے خُوشبو نکل آئے

کل رات میں تنہائی میں دل کھول کے رویا
پھر یوں ہوا دیوار سے بازو نکل آئے