نقدوتبصرہ

اس میں کوئی شبہ نہیں کہ ہر آنے والی نسل اپنے ماقبل سے زیادہ ذہین اور باشعور ہوتی ہے۔تاہم اس پر نہ تو کلیت کا حکم لگایا جا سکتا ہے، نہ تمام شعبوں میں اس کی اکثریت کا دعویٰ درست ہوگا۔ علم و ادب کاشعبہ بھی اس سے مستثنیٰ نہیں ہے۔

ادھر چند دہائیوں سے مذہبی اور عصری علوم کے چشموں سے فیض یافتہ ایک ایسی نسل تیار ہورہی ہے جنھیں قدیم و جدید تعلیم کا حسین امتزاج،یا دینی مدارس اور عصری دانش گاہوں سے حصول تربیت کاخوبصورت سنگم کہا جاسکتا ہے۔ ایسے اشخاص زندگی کے مختلف شعبوں: مثلاًذاتی، سرکاری، نیم سرکاری اور بین الاقوامی اداروں سے منسلک ہیں۔ اداروں سے باہر بھی اس نسل کی ایک خاصی تعداد ایسی ہے جسے موقع فراہم ہو تو عمدہ، اہم اور مفید کام انجام دے سکتی ہے۔ دین و دنیا کے علوم سے بہرہ مند ایسے افرادکی ایک مختصر سی جماعت اردو زبان و ادب کی خدمت میں بھی مصروف ہے۔ اسے علامہ شبلی نعمانی ، مولانا مناظر احسن گیلانی اور علامہ نیاز فتح پوری کی روایت کا امین کہیے تو بے جا نہ ہوگا۔حقانی القاسمی، ڈاکٹر احمد سجاد ساجدؔ،نایاب حسن اور ڈاکٹر عبدالباری وغیرہ سے قریبی واقفیت ہے ۔ان کی تحریریں پڑھتا اور استفادہ کرتا رہتاہوں۔

چند مہینوں پہلے عزیزی ڈاکٹر عبدالباری نے اپنی کتاب ’اردو تنقید : نقوش و نشانات‘ کا مسودہ لاکر دیا اور خواہش ظاہر کی کہ اس کتاب سے متعلق کچھ لکھ دوں۔ بعض شاگروں کی خواہش ٹالنی آسان نہیں ہوتی، سو کتاب پڑھنی شروع کی اور حیرت، دلچسپی اور خوشی کی کیفیتوں سے گزرتا رہا۔ تنقید اور تنقیدی دبستانوں سے متعلق اساتذہ اور دوسرے اصحاب نے متعدد کتابیں لکھی ہیں، لیکن مذکورہ کتاب نہ صرف یہ کہ اس موضوع پر ماقبل کتابوں سے منفرد ہے بلکہ کسی حد تک ممتاز ،منضبط اور قدرے زیادہ مفید بھی ہے ۔

اس مکمل کتاب کی تبویب سے بھی مصنف کی سلیقہ مندی اور ادبی شعور کا اظہار ہوتا ہے۔ محنت سے کی گئی تحقیق اور تنقیدی اظہار ان کی معتدل مزاجی کا ثبوت ہیں جو کسی بھی مصنف کی نمایاں خصوصیات میں شامل ہونی چاہئیں۔ مشرقی اور مغربی تنقید پر الگ الگ کتابیں موجود ہیں،دوتین کتابوں میں دونوں کو یکجا بھی کیا گیا ہے لیکن عبدالباری نے مشرقی اور مغربی تنقید کی تلاش وبیان میں اضافے کیے ہیں :مثلاً جاپانی ،چینی تنقید اور زمانۂ جاہلیت اور اسلامی دور میں تنقید کی روایت اور طریقۂ کار وغیرہ۔ علاوہ ازیں بعض تنقیدی دبستانوں کے ابتدائی نقوش و نشانات بھی دریافت کیے ہیں ، یا دریافت شدہ آثار کو منضبط کیا ہے۔کتاب کی اہمیت اس طور بھی ہے کہ یہ یونانی، سنسکرت،چینی، جاپانی، انگریزی، عربی ، فارسی اور اردو تنقید کے مشمولات کی بنا پر تنقید کا ایک مکمل شناخت نامہ بن جاتی ہے یا یوں جانیے کہ مختلف زبانوں، اصناف، ادوار اور رجحانات کے تنقیدی نقوش و نشانات کے حوالے سے دستاویزی حیثیت اختیار کرلیتی ہے۔

فی زمانہ اس قدر جانفشانی اور سلیقے سے کام کرنے کی توقع کم کی جاتی ہے کہ قدیم تحریروں کی قرأت،موضوع کے وسیع مطالعے اورمتن کی چھان پھٹک کے طریقۂ کار کا رواج تقریباً ختم ہوتا جارہا ہے۔پھر یہ کہ لکھنے پڑھنے کامقابلہ چلن میں نہیں رہا، دنیائے علم و ادب کے موجودہ عہد میں کوئی تحریک یا رجحان زندگی نہیں جی رہا ہے جس سے تحقیق، تنقید، تخلیق اور تحریر ی کاوشوں کی جانب طبیعت مائل ہو، دل میںرغبت اور امنگ پیدا ہو۔ قاری نے بھی کتابوں سے کافی اور رسائل و جرائد سے کسی حد تک فاصلہ بڑھا لیا ہے اور جنھوں نے کتب و جرائد سے رشتہ استوار رکھا ہے ان میں سے بیشتر نے سچی ستائش، واقعی تنقید اور بیباکیِ اظہار کے دروازوں پر مصلحت کے قفل ڈال لیے ہیں۔ سو، خدشے اور خوشی سے عاری ایسی صورت حال میں اگرکوئی مصنف ژرف بینی،سنجیدگی اور سلیقے سے کام کرتا ہے تو وہ لائق قدر اور قابل مبارکباد ہے۔ عزیزی ڈاکٹر عبدالباری ایسے ہی نوجوان مصنف ہیں جن کے کام کو بہ نظر تحسین دیکھا جانا چاہیے اور ان کی تلاش و جستجوکی توصیف کی جانی چاہیے۔

مصنف:علامہ محمد اقبال

شارح:حمیرا جمیل

صفحات:750

قیمت:1200

ناشر:دعا پبلی کیشنز ،لاہور

علامہ محمد اقبال ایک عہد شناس، عہد ساز اور عہد آفریں شاعر ہیں، انہوں نے اپنی شاعری میں ایک پورے عہد اور ایک پوری تاریخ کا ذکر کیا ہے،اقبال جس زمانے میں اقبال بنے وہ مشرقی قوموں کے لیے سیاسی بدحالی اور سماجی ابتری کا زمانہ تھا اور یہی درد ان کی شاعری میں جابجا دکھائی دیتا ہے، ان کی شاعری میں فکر، تاریخ اور علمی حقائق پر تبصرے بھی ہیں. اقبال کی فکر اور فلسفے سے مفکرین اور ناقدین نے اختلاف بھی کیا ہے مگر اس کے سب مداح بھی ہیں، اقبال کی شاعری میں شعریت کے محاسن اور مقصد کے ساتھ سوز، حسن، سرور، نغمگی اور آہنگ کے ساتھ تخلیق کا اعلیٰ معیار موجود ہے اور یہ معیار انہوں نے فارسی اور اردو کلام دونوں میں قائم رکھا ہے، انہوں نے شعری خیالات کو مشرق و مغرب کے سیاسی، تہذیبی، معاشرتی اور روحانی حالات کا گہرا مشاہدہ کرنے کے بعد حاصل کیا تھا اور محسوس کیا تھا کہ اعلیٰ انسانی قدروں کا جو زوال دونوں جگہ مختلف انداز میں انسانیت کو جکڑے ہوئے ہے اس کا حل ضروری ہے، خصوصی طور پرمشرق کی بدحالی ان کو پریشان رکھتی تھی اور وہ اس کے اسباب سے بھی بخوبی واقف تھے اس لیے انہوں نے انسانی زندگی کو سدھارنے اور اُسے ترقی کی راہ پر ڈالنے کے لیے اپنی شاعری کو ذریعہ بنایا۔ ڈاکٹر سید عابد حسین کچھ یوں لکھتے ہیں کہ:

"اقبال کی شاعری آبِ حیات کا خزانہ ہے. جس سے زندگی اور زندہ دلی کے چشمے اُبلتے ہیں”

اسی ضمن میں مولانا عبد السلام ندوی کہتے ہیں کہ:

"اقبال ایک شاعر تھا اور شاعری اس کے لیے جزو پیغمبری تھی….. جو لوگ اقبال کے کلام اور زندگی کو بحیثیت ایک شاعر کے سمجھنے کی کوشش کریں گئے، وہ اُسے صحیح سمجھیں گئے لیکن جو لوگ اُسے بحیثیت ایک فلسفی یا سیاستدان کے سمجھنے کی کوشش کریں گئے، ان کے لیے اقبال کا کلام اور اس سے زیادہ اس کی زندگی، ایک عقدہ لاینحل ہو کر رک جائے گئی۔اقبال از اول تا آخر ایک شاعر تھا۔”

اقبال نے اپنے خیالات کے اظہار کے لیے اردو اور فارسی دونوں زبانوں کا سہارا لیا،شاعری کی ابتداء اگرچہ اردو زبان سے ہوئی مگر جیسے جیسے افکار و خیالات میں پختگی آتی گئی وہ اردو کے بجائے فارسی کی طرف مائل ہوگئے،حکمت، فلسفہ، سیاست، مذہب اور روحانیت سے متعلق صدہا اشارے،پیام مشرق، زبور عجم، جاوید نامہ بلکہ اور دوسری کتابوں میں موجود ہیں، اقبال کا ہمہ گیر اور آفاقی فلسفہ ہی ان کے اردو اور خصوصاً فارسی کلام کی شرحوں کا محرک بنا ہے، اقبال کے باقاعدہ شارحین کی فہرست میں بہت سے نام آتے ہیں. ان میں پروفیسر یوسف سلیم چشتی، مولانا غلام رسول مہر، ڈاکٹر عارف بٹالوی، نشتر جالندھری، آقائے رازی، ڈاکٹر محمد باقر، نریش کمار شاد، عبدالرشید فاضل، غلام احمد پرویز، فیض محمد فیض لدھیانوی، الہی بخش اعوان، شیریں تاج، سید اصغر علی شاہ جعفری، آقا بیدار بخت، ڈاکٹر شفیق احمد، اسرار زیدی، ڈاکٹر اے ڈی نسیم اور ڈاکٹر خواجہ محمد زکریا شامل ہیں۔ یہ تمام شارحین اپنی اپنی جگہ قابلِ قدر ہیں لیکن میں یہاں تفہیماتِ کلیاتِ اقبال فارسی (مطالب و شرح) کا تبصرہ پیش کروں گی تفہیماتِ کلیاتِ اقبال فارسی (مطالب و شرح) کی شارح حمیرا جمیل ہیں،جن کا نام ادبی دنیا میں تعارف کا محتاج نہیں ہے، حال ہی میں اُن کی شرح تفہیماتِ کلیاتِ اقبال اردو اور فارسی چھپ کر سامنے آئی ہیں ، وہ پاکستان میں کلام اقبال اردو اور فارسی کی شرح لکھنے والی پہلی کم عمر خاتون شارح ہیں۔ ان کی نمایاں حیثیت ایک شرح نویس کی ہے۔ حمیرا جمیل کو علامہ اقبال کی شخصیت سے دلی وابستگی ہے، انہوں نے کلام اقبال کی شرحیں اتنی توضیح اور تفصیل کے ساتھ لکھی ہیں کہ پڑھنے والے کو مطالب پڑھنے میں دشواری محسوس نہیں ہوتی، حمیرا جمیل کے سامنے طلبا اور عوام کی ضرورت تھی جو کلامِ اقبال کو آسان زبان اور مختصر وقت میں سمجھنا چاہتے تھے، شرح نویسی میں اختصار ہی حمیرا کی انفرادیت ہے، تفہیماتِ کلیاتِ اقبال (فارسی) کی خوبی یہ ہے کہ اشعار کی تشریح ترتیب وار شعر بہ شعر کی ہے۔ مجموعی رجحان اختصار کی طرف ہے تاہم بعض اشعار کی نہایت عمدگی سے وضاحت کی ہے ۔تاہم شرح کرتے وقت کچھ جگہوں پر سابق شارحین کی شرحوں سے استفادہ کیا گیا ہے۔ حمیرا جمیل کی شرح سے اقبال کے فارسی کلام کو بخوبی سمجھا جاسکتا ہے. شرح کا بنیادی مقصد یہی ہوتا ہے کہ شعر کی تفہیم کے عمل کو آسان و سہل بنایا جائے، اس حوالے سے یہ ایک کامیاب شرح ہے.قاضی احمد میاں اختر جونا گڑھی لکھتے ہیں :

"تصریح و توضیح کے خیال سے بعض حضرات نے اقبال کے کلام کی شرحیں لکھی ہیں جو زیادہ تر درسی اور عمومی قسم کی ہیں. اقبال کا مطالعہ ان کے خیالات اور افکار کے پس منظر اور اصول موضوعہ سے گہری واقفیت چاہتا ہے”

علامہ اقبال نے فارسی شاعری میں اپنے سات شعری مجموعے اسراری خودی، رموز بےخودی،پیام مشرق، زبور عجم، جاوید نامہ، مثنوی پس چہ باید کرد اے اقوام شرق مع مسافر اور ارمغان حجاز (فارسی) اپنی یادگار چھوڑا ہے۔ "اسرار خودی” علامہ اقبال کی مشہور و معروف مثنوی ہے. یہ مثنوی 1915میں شائع ہوئی، اس مثنوی میں علامہ نے انفرادی زندگی کے حقائق بیان کیے ہیں، اسرار خودی میں خودی کی حقیقت و ماہیت اور قوت و صلاحیت کا بیان ہے اور اس کی پرورش و استحکام کے لیے مکمل لائحہ عمل تجویز کیا گیا ہے، اس مثنوی میں اقبال کی شاعری اور تصوف کے باہمی رشتے کا بڑا نازک مقام ہمارے سامنے آتا ہے۔ 1930میں اسرارخودی کے انگریزی ترجمے کے ساتھ ہی علامہ کی شہرت دور دور تک پھیل گئی۔ "مثنوی رموز بے خودی” 1918میں شائع ہوئی یہ شاعر مشرق کی فارسی کتاب”اسرار خودی” کے تسلسل کی دوسری کتاب ہے۔ اقبال کی فارسی مثنوی "اسرار خودی” میں انسان کی انفرادی شخصیت کے نشووارتقاء کے اصول و ضوابط پر گفتگو کی گئی ہے اور "رموز بے خودی” میں حیات اجتماعی کے اصول بتائے گئے ہیں، درحقیقت اقبال اپنی شاعری کے ذریعے پورے عالم انسان پر خودی کے اسرارورموز اور بے خودی کے اسرار کا بھید کھولنا چاہتے ہیں۔” پیام مشرق” علامہ اقبال کا تیسرا فارسی مجموعہ کلام ہے، یہ پہلی بار 1923میں شائع ہوا اس میں علامہ کا تحریر کردہ مفصل اردو دیباچہ بھی شامل ہے۔ پیام مشرق کے دیباچے میں علامہ اقبال نے بڑی تفصیل سے اس کا سبب تالیف بیان کیا ہے۔ "زبور عجم”علامہ اقبال کے فارسی کلام کا چوتھا مجموعہ ہے یہ کتاب 1927میں شائع ہوئی۔ زبور عجم غزلیات کا مجموعہ ہے، البتہ اس کے آخری حصے میں "گلشن راز جدید” اور "بندگی نامہ” کے نام سے دو مختصر مثنویاں شامل ہیں اس کتاب میں علامہ کی وہ مخصوص شاعری ہے جس کا پرچار وہ ساری زندگی کرتے رہے ہیں، زبور عجم فارسی میں الہامی کلام،(چونکہ شاعر کا وہ کلام بھی عطیہ الہی اور ایک طرح کا الہام ہوتا ہے جو محادومعارف الہی پر مشتمل ہو، غالباً اس بنا پر علامہ اقبال نے اس کتاب کا یہ نام رکھا)۔ "جاوید نامہ” علامہ اقبال کی فارسی زبان میں ایک شاہکار کتاب ہے یہ کتاب پہلی بار 1932میں شائع ہوئی اس کتاب کا شمار علامہ اقبال کی بہترین کتب میں ہوتا ہے اور وہ اُسے اپنی زندگی کا حاصل سمجھتے تھے یہ کتاب دراصل علامہ اقبال کا خیالی سفرنامہ ہے جس میں ان کے راہبر مولانا رومی انہیں مختلف سیاروں اور افلاک کی دوسری جانب(آں سوئے افلاک) کی سیر کرواتے ہیں اقبال نے اس کتاب میں خود کو زندہ رود کے نام سے متعارف کروایا ہے مثنوی پس چہ باید کرد اے اقوام شرق فارسی (پس کیا کیا جائے اے اقوام شرق) علامہ صاحب کے فارسی کلام میں حجم کے لحاظ سے سب سے چھوٹی کتاب ہے اس میں علامہ نے اقوام مشرق کو مخاطب کرتے ہوئے کہا ہے کہ آج کے حالات میں جو امت مسلمہ کو مسائل ہیں ان کا حل کیا ہوسکتا ہے؟ اس مثنوی کے دو حصے ہیں. "مسافر” اور "پس چہ باید کرد اے اقوام مشرق”، مسافر افغانستان کے دوران قیام کی یادگار ہے. مثنوی پس چی باید کرد اے اقوام شرق 1936میں شائع ہوئی. "ارمغان حجاز” (فارسی) شاعر مشرق کا آخری مجموعہ کلام ہے. جس کی پہلی اشاعت علامہ کی وفات کے چند ماہ بعد1938میں ہوئی یہ فارسی اور اردو زبانوں پر مشتمل ہے فارسی کلام رباعیات اور اردو چند نظموں کی صورت میں ہے۔

مختصر یہ کہ حمیرا جمیل نے تفہیماتِ کلیاتِ اقبال (فارسی) کی شرح بہت ہی عرق ریزی سے لکھی ہے، حمیرا کی شرح کے مطالعے سے محسوس ہوتا ہے کہ انہوں نے اقبال کے فارسی کلام کو بہتر انداز میں سمجھانے کی بھرپور کوشش کی ہے اور حمیرا کی شرحیں اپنی اہمیت و افادیت کے لحاظ سے ایک خاص مرتبے کی حامل ہیں، انہوں نے اقبال کے فارسی کلام کی مکمل شرح لکھ کر اقبالیاتی ادب میں خاص مقام حاصل کرلیا ہے، یہ شرح یقیناً ہمارے ادبی سرمائے میں اہم اضافہ ہے اور اقبال سے محبت کرنے والوں کے لیے انمول تحفہ ہے، مجھے یقین ہے کہ حمیرا جمیل کی اس کاوش کو ادبی حلقوں میں قدر کی نگاہ سے دیکھا جائے گا۔

ذاتی ترقی اور ہندومت پر۴۰سے زیادہ کتابوں کے مصنف پریم پی بھلہ ،تصویر کشی اور سفر سے لطف اندوز ہوتے ہیں،انہوں نے ہندوستان اور بیرون ملک بڑے پیمانے پر سفر کیا ہے۔کھیتی باڑی ،کاروبار اور انسانی زندگی کو چھونے والے مختلف پہلوؤںپر خود کو بہتر بنانے والی کتابیں لکھنے کے علاوہ وہ کئی سماجی بہبود اور تعلیمی اداروں سے وابستہ ہیں۔
مثبت سوچ ’’مثبت‘‘ کا مطلب ہے اثباتی ،قطعی ،مستقل اور ایجابی۔مثبت عمل سے مراد ہر وہ کام ہے جس سے ترقی ہو ،بلندی کی جانب پیش قدمی ہو ،منزل کا حصول ہو ، بہتری ہو ،فلاح و بہبود ہو اور تعمیر ہو۔مثبت سوچ کی متضاد منفی سوچ ہے جو شکست ،ناکامی ،غصہ ،بد مزاجی اور دوسروں کو ذلیل کرنے کی خواہش وغیرہ کا نتیجہ ہے۔ایک منفی سوچ کا حامل شخص منفی عمل کو جنم دیتا ہے جبکہ مثبت سوچ کا حامل شخص تعمیری فعل انجام دیتا ہے۔ہماری زندگی پر سوچ اور خیالات مستقل طور پر اثر انداز ہوتے ہیں۔شیکسپئیر نے کہا تھا ’’ہم وہ نہیں ہوتے جو کرتے ہیں بلکہ ہم وہ ہوتے ہیں جو سوچتے ہیں۔‘‘مثبت سوچ زیادہ تر لوگوں کی زندگیوں میں کامیابی اور ناکامی کے درمیان وسیع فرق کو ختم کرسکتی ہے۔ایک مثبت رویہ انسان کی شخصیت اور کردار کی تشکیل میں اہم کردار ادا کرتا ہے۔بہت کم لوگ ایسے ہوتے ہیں جو زندگی گزارنے کے ایسے طریقے تلاش کرتے ہیںجوکامیاب ،بامقصداور کسی مثبت انجام کومنتج ہوں ۔دیگر یہ سمجھنے میں ناکام رہتے ہیں کہ کامیابی کا راز منفی سے مثبت سوچ کی سادہ تبدیلی میں مضمر ہے۔
سوچ کی اہمیت کو شریعت کی رُو سے بیان کیا جائے تو عمل کے مقبول ہونے میں سوچ کا اہم کردار ہے۔سوچ پاک ہے تو یقیناً عمل بھی پاک ہوگا ۔مثال کے طور پر اگر بندہ حج کی نیت سے خانہ کعبہ جانے کا ارادہ کرتا ہے اور خانہ کعبہ پہنچ کر بھی ، قبلہ رُو ہو کر بھی وہ اپنی سوچ کو اپنے اہل و عیال ، اپنے کاروباری معاملات ،دنیاوی محبتوں سے پاک نہیں کرپاتا تو پھر سوچ کی اہمیت کو شریعت کی رُو سے بیان کیا جائے تو عمل کے مقبول ہونے میں سوچ کا اہم کردار ہے۔سوچ پاک ہے تو یقیناً عمل بھی پاک ہوگا ۔مثال کے طور پر اگر بندہ حج کی نیت سے خانہ کعبہ جانے کا ارادہ کرتا ہے اور خانہ کعبہ پہنچ کر بھی ، قبلہ رُو ہو کر بھی وہ اپنی سوچ کو اپنے اہل و عیال ، اپنے کاروباری معاملات ،دنیاوی محبتوں سے پاک نہیں کرپاتا تو پھر وہ کس طرح اللہ کی پارگاہ میں مخلص ہونے کا دعویٰ کرسکتا ہے؟سوچ کے متعلق حضرت علی رضی اللہ تعالیٰ عنہ فرماتے ہیں:
’’انسان کو اعلیٰ اور اچھی سوچ پر وہ انعام ملتا ہے جو اسے
اچھے اعمال پر نہیں ملتا کیوں کہ سوچ میں دکھاوا نہیں ہوتا‘‘
راہ فقر راہ باطن ہے اور باطن کا تعلق ہماری سوچ اور فکر کے ساتھ ہے ۔سلطان العاشقین حضرت سخی سلطان محمد نجیب الرحمٰن مد ظلہ الاقدس اس ضمن میں فرماتے ہیں:
’’انسان کے پاس اصل طاقت سوچ ہے۔انسان کے
پاس سوچ کے سوا کچھ نہیں۔’’سوچ ‘‘ہی انسان کی اصل
ہے۔سوچ کو مثبت بنا لینا ہی فقر میں کمال ہے۔‘‘
انسانی زندگی میں سوچ کو مرکزی حیثیت حاصل ہے اور اس کی اہمیت سے انکار نہیں کیا جاسکتا ۔ اس میں کوئی شک نہیں کہ اگر ہم نے اپنی سوچ کو بدلنے کا فن سیکھ لیا تو گو یا ہم نے زندگی بدلنے کا ہنر سیکھ لیا ۔ماہرین نفسیات کا کہنا ہے کہ مثبت سوچ کامیابی کی ضمانت ہوتی ہے۔سقراط کے پاس ایک شخص آیا اور کہنے لگا ’’بتائیں میرا مستقبل کیسا ہوگا؟سقراط نے ایک کاغذ منگوایا اور کہا اس پر اپنے خیالات لکھو ۔اس نے جو سوچا تھا سب لکھ دیا ۔سقراط نے بتایا دیا کہ جیسے تمہارے خیالات ہیں ، اس کے مطابق تمہارا مستقبل ایسا ہوگا ۔معروف مصنف نپولین کے مطابق ’’دنیا میں اتنا خزانہ زمین میں سے نہیں نکالا گیا ، جتنا انسان نے اپنے ذہن ، خیالات ،تصورات اور سوچ کے سمندر سے حاصل کیا۔‘‘اچھی سوچ ایک ایسا خزانہ ہے جس سے مٹی کو بھی سونا بنایا جاسکتا ہے۔
مثبت سوچ کے ۱۰۱طریقے خیالات کا ایک آسان مجموعہ ہے جو ایک شخص کو روزمرہ کی زندگی میں مثبت سوچ اپنانے میں مدد دے سکتاہے۔یہ حقائق اور حالات کی حقیقت کو سامنے لاتا ہے جو اس بات کی وضاحت کرتا ہے کہ ذہن کس طرح روزمرہ کی سوچ کو متاثر کرنے کے لیے کام کرتا ہے۔سادہ خیالات کی پیروی کرتے ہوئے ،ایک شخص بتدریج زندگی گو اس وسیع امکانات کے مثبت استعمال کے ذریعے بدل سکتا ہے جو اس کے اندر موجود نہیں ہے۔
اس کتاب میں ایسے نکات پیش کیے گئے ہیںجن میںمثبت سوچ ،رجائیت اور مایوسی ،سوچنے کا عمل ،خیال ،خیالات کا اثر ،خیالات کا فلسفہ ،اجتماعی خیالات ،دماغ اور جسم ،رویہ ،یقین ،خوداعتمادی ،دعااور مراقبہ شامل ہیں۔یہ کتاب ترجمے سے دلچسپی رکھنے والوں کے لیے خصوصی طور پر بہترین کتاب ہے۔ڈاکٹر رشید امجد لکھتے ہیں، ترجمہ نگاری ایسا دریچہ ہے جس سے دوسری قوموں کے احوال ہم پر کھلتے ہیں۔ترجمہ کرنا یقیناًایک مشکل کام ہے،اس میں مترجم ،مصنف کی شخصیت فکر و اسلوب سے بندھا ہوتا ہے ،ایک طرف اس زبان کا کلچر جس کا ترجمہ کیا جارہا ہے ،اسے اپنی طرف کھینچتا ہےاور دوسری طرف اس زبان کا کلچر جس میں ترجمہ کیا جارہا ہے ،یہ دوئی مترجم کی شخصیت کو توڑ دیتی ہے۔
اُم حبیبہ نے پریم پی بھلہ کی کتاب کا انگریزی سے اردو ترجمہ کیا ہے ۔اُم حبیبہ کی یہ کاوش قابل تحسین و تعریف ہے۔اردو ادب کو اس نوجوان ترجمہ نگار سے بہت ساری امیدیں وابستہ ہیں۔مجھے اس کتاب کے اردو ترجمے کی نظر ثانی اور پروف ریڈ نگ کے دوران کئی دشواریاں آئیں ۔ بہرحال یہ ان کا پہلا کام ہے سو بہتری کی گنجائش بھی موجود رہے گئی ۔میری دعا ہے کہ اللہ اُم حبیبہ کو مزید عزت و شہرت اور علم و حکمت عطا فرمائے۔ آئن سٹائن نے کہا ،جس سوچ اور ذہنی سانچے میں مسائل جنم لیتے ہیں ،اسی سوچ سے اس کا حل نکالا جاسکتا ہے،یہ کتاب ہر قاری کی زندگی کی راہ متعین کرسکتی ہے۔

سر زمین علی گڑھ علمی و ادبی اعتبار سے ہر دور میں نمایاں رہی ہے۔بڑے بڑے ادیب،نقاد،نثر نگار،اور شعراء کا تخلیقی رجحان اور ذوق و شوق اس خطے کی وادیوں میںاس طرح پروان چڑھا کے وہ دنیا میں جہاں بھی رہے اپنے صلاحیتوں کے دم پر ہر جگہ ممتاز نظر آئے۔
صدام حسین مضمرؔ جو ایک نوجوان تخلیق کار ہیں ان کا شعری رجحان بھی اس ماحول کا پروردہ ہے۔دراصل وہ اس گلستان کے وہ تازہ ترین پھول ہیںجس کی مہک نے بہت سے اذہان کو متاثر کیا ہے۔ان کا شعری مجموعہ ’’قیامت کے باوجود‘‘ابھی حال ہی میں منظر عام آیا ہے۔جسے ادبی حلقوں میں بہت سراہا جارہا ہے۔اس کا سبب یہ ہے کہ صدام حسین مضمرؔ کا یہ شعری مجموعہ پرانی فرسودہ روایتوں کو توڑتا ہوا نئے دور کی آواز میں آواز ملاتا ہوا نظر آتا۔
صدام حسین مضمرؔ اکیسویں صدی کے سائنسی دور میں جی رہے ہیں اس لئے ان کی شاعری میں اسی دور کی ترجمانی دیکھنے کو ملتی ہے۔مختلف سائنسی مضامین اور معنی و مفاہیم کے رنگ یہ اپنی شاعری کے دامن میں سمیٹے ہوئے ہیں۔لیکن ایسا بالکل نہیں ہے کہ صدام حسین مضمرؔ نے اپنے کلاسیکی شعری سرمائے سے کوئی فیض حاصل نہیں کیا ہے۔انھوں نے روایتی چیزوں کو بھی بڑی ہنر مندی سے اپنی شاعری کے پیرہن میں ڈھال کر پیش کیا ہے مگر اس کے معنی و مطالب عصری دور کے عین مطابق ہیں۔مثلاً وہ اپنی شاعری میںمحبوب اور عاشق کا ذکر ضرور کرتے ہیں۔لیکن ان کا محبوب اور عاشق روایتی دور سے مختلف ہے ۔وہ عصری دور کی آب و ہوا میںسانس لیتا نظر آتا ہے جس کے احساس و جذبات کافی مختلف ہیں۔
صدام حسین مضمرؔ نے اپنی شاعری کونئی نئی تراکیبوں،شعری صنعتوں اور محاوراتی انداز سے بھی مزین کیا ہے۔اس کے علاوہ انھیںعلامتوں اور استعاروں کا استعمال کرنا بھی خوب آتا ہے۔پیکر تراشی اورمنظر نگاری کے جیتے جاگتے نمونے بھی ان کی شاعری میںاپنا جلوہ بکھیرتے ہوئے نظر آتے ہیں۔ان کا خطابیہ لہجہ بھی ان کی شاعری کاحسن دوبالا کر دتیا ہے۔وہ طنز کے تیر بھی چلاتے ہیں لیکن اس کی شدت اتنی نہیں ہوتی جس سے کسی کادل چھلنی ہوجائے۔اس کا مقصد صرف اتنا ہوتا ہے کہ ہلکی سی ضرب لگا کر سوئے ہوئے ضمیر کو بیدار کیا جاسکے۔صدام حسین مضمر ؔ کا شعری مجموعہ ’’قیامت کے باوجود‘‘ ان کے عمیق مطالعہ کا ترجمان ہے۔وہ ایک حساس دل رکھتے ہیں۔ اور اپنے گردو پیش میں ہونے والے مسائل پر ہر لمحہ غور و فکر کرتے رہتے ہیں۔وہ جس موضوع پر قلم اٹھاتے ہیں اس کے ساتھ پورا انصاف کرنے کی کوشش کرتے ہیں۔
جیسا کہ یہ بات ظاہر ہے کہ شاعر خون جگر صرف کر کے اشعار قلم بند کرتا ہے۔کبھی وہ خیالات کی حسین و جمیل وادیوں پر سفر کرتا ہے۔تو کبھی اسے قیامت خیزحادثات و مسائل کی منظر نگاری کرنی پڑتی ہے۔شاعر اپنے آس پاس جن چیزوں کو دیکھتا ،سمجھتا یا محسوس کرتا ہے وہ ان تمام حرکات و سکنات،احساس و جذبات کی عکاسی اپنے کلام میں کرتا ہے۔صدام حسین مضمر ؔبھی اسی مزاج سے ہم آہنگ ہیں۔انھوں نے جن چیزوں کو شدت سے محسوس کیا ۔یا یوں کہیں جو چیزیں اور حالات ان پر قیامت کی صورت میں گزرے ۔ان سب تجربات کی ترجمانی موصوف نے ہو بہواپنے کلام میںکی ہے۔
اس میں کوئی دو رائے نہیں کہ مضمرؔ نے زندگی کے مختلف پہلوؤں کو اپنی شاعری کے ذریعے پیش کرنے کی اچھی سعی کی ہے۔اور جس دور اور ماحول میں صدام حسین مضمرؔ کی شاعری پروان چڑھی وہ بھی بڑا قیامت خیزاور پر آشوب ہے۔یہی سبب ہے کہ انھوں نے اپنے شعری مجموعے کا نام ’’ قیامت کے باوجود‘‘ رکھا ہے۔موصوف جب اس شعری مجموعے کو تخلیق کر رہے تھے وہ وقت کافی بحران کا تھا۔کورونا وائرس کی عالمی وبا نے پوری دنیا کو اپنی گرفت میں لے رکھا تھا۔جس کے سبب سارے نظام درہم برہم ہو کر رہ گئے تھے۔لوگ اپنے گھروں میں قید تھے۔بڑے پیمانے پردنیا بھر میں بیماری میں مبتلا ہو کر انسان اپنی جان سے ہاتھ دھو رہے تھے۔جب اپنی اطراف میں قدم قدم پر نئے مسائل درپیش ہوں،تو ایسے حالات میں ایک حساس شاعر ان قیامت خیز مناظر کی ترجمانی اپنی شاعری میںکیسے نہ کرتا۔اسی دور میں مضمرؔ نے زندگی کی قیامت خیزی اور اس کے مسائل کو قریب سے دیکھا اور محسوس کیا اوران کو اپنے شاعری کے پیرہن میں ڈھال کرشعری مجموعے کی صورت میںقارئین کے روبرو پیش کیا۔
مضمرؔ کے شعری مجموعے کا جائزہ لینے کے بعد یہ بات پورے وثوق کے ساتھ کہی جاسکتی ہے کہ قیامت ان کی شاعری میں مختلف کیفیات کے طور پر ابھرتی ہے۔یہ وہ کیفیات ہیں جن سے موصوف بخوبی آشنا ہیں۔اپنے شعری مجموعے میں اس بات کا اعتراف کرتے ہوئے مضمرؔ لکھتے ہیں:
’’ ہم جس عہد میں زندگی جی رہے ہیں وہ بے تحاشہ خلفشار و انتشار کا عہد ہے۔ پچھلے گذشتہ چند برسوں سے دنیا بھر کی طاقتور وقتی حکومتوں نے جبر و تشدد ظلم د بربریت اور تانا شاہی کی جو تصاویر پیش کی ہیں انھوں نے حساس قسم کی طبیعت رکھنے والے لوگوں کو اندر سے کھوکھلا کر کے رکھ دیا ہے۔ حالت یہ ہے کہ ہم اندر ہی اندر کڑھتے اور اپنی بے بسی کا رونا روتے رہتے ہیں۔ نہ تو ہم زبانی اپنے اوپر ہونے والے مظالم پر کسی طرح کے رد عمل کی طاقت رکھتے ہیں اور نہ ہی کسی سے کسی طرح کی شکایت کا جذبہ۔ بلکہ یہ کہنا بے جانہ ہو گا کہ نہ ہم خود اپنی آواز ہیں اور نہ ہی کوئی اور ہماری آواز۔ ایک طرف لوگوں پر خوف و دہشت کا عالم طاری ہے تو دوسری طرف مفاد پرستی اور بے حسی کا بول بالا۔ ایسے عالم میں زندگی جس ناہمواری کا شکار ہوئی ہے وہ نا قابل برداشت بھی ہے اور نا قابل بیان بھی۔ ہم صرف جی رہے ہیں اس لیے کہ ہمیں جینا ہی ہے، مراس لیے نہیں سکتے کہ مرنے کے لیے بھی ہم پوری طرح آزاد نہیں۔ اس مجموعے کا بیشتر کلام اسی انتشار و خلفشار اور گہما گہمی کا نتیجہ ہے۔ یعنی میں نے جو کچھ محسوس کیا یا جن مسائل و میلانات نے مجھے متاثر کیا یا میں خود جن تجربات سے دوچار ہوا ان تمام مسائل و میلانات، تجربات اور جذبات و احساسات کو شعری پیکر میں ڈھال کر مجموعی طور پر قارئین تک پہنچانے کی جسارت کر رہا ہوں۔‘‘
مذکورہ اقتباس کی روشنی میں یہ بات کافی حد تک واضح ہو جاتی ہے کہ موصوف عصر حاضرکی تباہ کاریوں کے سبب پیدا ہونے والے مسائل کو لے کر کافی فکر مند ہیں۔یہی وجہ ہے کہ صدام حسین مضمرؔ سائنس اور ٹیکنالوجی کے بے تحاشہ اور بے جا استعمال کے سبب پیدا ہونے والے مسائل پر اپنی شاعری میں کھل کر طنز کرتے ہوئے نظر آتے ہیں۔اور ان کی شاعری زلف یارکے کوچے سے نکل کر عالمی پیچ و تاب کے کرب میں ڈھلتی نظر آتی ہے۔جس کو اپنی ذات کے پیکر سے وابستہ کر لیتے ہیںـ:
غزلوں میں ڈھونڈیے نہ مری زلف یار کو
خود مجھ میں دیکھیے کہ بہت پیچ و تاب ہے
یا پھر وہ کہتے ہیں:
اس دور قیامت میں جینے کے لئے ہم کو
کچھ درد تو پینا ہے کچھ زخم تو کھانے ہیں
دراصل موصوف اپنے مذکورہ شعر میں عصر حاضر کو’ قیامت‘ سے تشبیہ دے رہے ہیں۔کیوں کہ عصر حاضر میںسائنس اور ٹیکنالوجی کے بے جا استعمال کے سبب قیامت کی تمام علامتیں پوری ہوتی ہوئی نظر آرہی ہیں۔مثلاً قیامت جب واقع ہو گی تو نفسا نفسی کا عالم ہوگا،انسانی رشتے اور جذبات و احساسات بے معنی ہو جائیں گے۔آج سوشل میڈیا کے عروج اور مشینوں کے استعمال نے ان تمام چیزوں کو حقیقت کا جامہ پہنا دیا ہے۔جس کے سبب انسان آج خود کو یک و تنہا محسوس کر رہا ہے زندگی کا درد پینے اور زخم کھانے پر مجبور ہے۔ اگر یہ کہا جائے کہ عصر حاضر میں جو بھی قیامت انسان پر نازل ہوئی ہے وہ سائنسی اور ٹیکنالوجی کی دین ہے تو بے جا نہ ہوگا۔
آج کا سماج جس کرب اور بیچینی میں مبتلا ہے اس کے نتیجہ میںانسان نفسیاتی مریض ہوتا جا رہا ہے۔عالی شان دکھاوے کی زندگی نے حقیقی معنوں میں اس کی زندگی کا اصل مقصد چھین لیا ہے۔اس بات پر طنز کرتے ہوئے مضمرؔ کہتے ہیں:
ہمیں افسوس مضمرؔ ہے نہیں اب
کہ تنہا جی رہے ہیں ہم خوشی سے
مذکورہ شعر اس بات کا عکاس ہے کہ سائنسی اور ٹیکنالوجی کی بدولت انسان کے تعلقات کا دائرہ وسیع توضرور ہوا لیکن افسوس کا مقام یہ ہے کہ وہ اپنے عزیز و اقارب سے دور ہوتا چلا گیا۔اور آج وہ ایک خیالی دنیا میںجھوٹی خوشیوں کے ساتھ حقیقت میں تنہا زندگی گزارنے پر مجبور ہے۔تنہائی کا یہ کرب مضمرؔ کے کلام میں جگہ جگہ دیکھنے کو ملتا ہے۔وہ خود بھی تنہائی میںکائنات کے مسائل کے بارے میں غور و فکر کرتے ہوئے نظر آتے ہیں۔شعر ملاحظ کریں:
لمحہ لمحہ ہے مری جان کو خطرا پیارے
میں ہی مرتا ہوں ترے نام پہ تنہا پیارے
مذکورہ شعر مضمرؔ کی اس غزل سے وابستہ ہے جس کو انھوں نے کورونا کے دوران لاک ڈائون میں تحریر کیا تھا۔ظاہر ہے اپنے اس شعر میں موصوف کورونا کے دوران پھیل رہی عالمی وباء کو لے کر فکر مند نظر آتے ہیں۔اور ایک ایسے انسان کا نقشہ کھینچ رہے ہیں جو نفسیاتی طور پر بھی بیمار ہے اور دھیرے دھیرے تنہائی میں گھٹ گھٹ کرمرنے پر مجبور ہے۔اسی غزل کے دوسرے شعر میں بھی مضمر ؔ اپنے مخصوص خطابیہ انداز میں بہت کچھ غور و فکر کرنے کی دعوت بھی دیتے ہوئے نظر آتے ہیں۔کہتے ہیں:
تیرا چہرا تو کبھی زلف سنواری تیری
تجھ کو دے کر یہ لہو خوب نکھارا پیارے
مذکورہ شعر میں موصوف نے’’چہرا،زلف،لہو‘‘ کی لفظیات کو بڑی خوب صورتی سے برتا ہے۔چہرے سے مراد اس زمین کی صورت حال سے لی جاسکتی ہے۔گویا موصوف کہہ رہے ہیں کہ یہ انسان ہی تھا جس نے اس دنیا کو رہنے کے لائق بنایا۔یعنی اس کی زلف سنواری اور اپنا لہو دے کر اس زمین کو سر سبز شاداب کیا۔یہاں موصوف کا یہ شعر گایا تھیوری (Gaia Theory) سے بھی منسلک نظر آتاہے۔یہ مفروضہ سب سے پہلے برطانوی سائنسدان جیمز لیولاک نے 1972 ء میں اپنے مقالے ‘Gaia As Seen Through the Atmosphere’ میں پیش کیا تھا۔اس مفروضے کا نام یونانی دیوی ’’گایا‘‘ کے نام پر رکھا گیا ہے جو زمین کی نمائندگی کرتی ہے۔یہ تھیوری بتاتی ہے کہ وہ زندگی ہی تھی جس نے اپنی محنت سے اس زمین کو رہنے لائق بنایا۔یعنی آج ہم جوزمین پر جینے کے مناسب حالات دیکھتے ہیں یہ سب ہماری کوشش کا ہی نتیجہ ہے۔اگر انسان کا وجود اس کائنات میں نہ ہوتا تو یہ بھی ممکن ہے کہ یہ کائنات اس شکل و صورت میں نہ ہوتی۔شعر میں آئی لفظیات ’’چہرا،زلف،لہو‘‘ اسی مفہوم کی ترجمانی کرتے ہوئے نظر آتے ہیں۔
غزل کے اگلے شعر میں قیامت خیز منظر ہونے کے باوجود بھی مضمرؔ زندگی سے متعلق پر اعتماد ی کا اظہار کرتے ہوئے کہتے ہیں۔یہ تو غیر ممکن ہے کہ انسان اس قیامت خیز دور میںزمین کو بربادی کی راہ پر چھوڑ کر خلائوں میں نئی بستی آباد کر لے۔کیوں کہ پوری وسیع و عریض کائنات میں ابھی تک کوئی ایسا دوسرا سیارہ دریافت نہیں ہوا ہے جہاں پر اس طرح کا قدرتی ماحول اور آب و ہوا دیکھنے کو ملتی ہو۔یہ صرف ہماری اس حسین و جمیل زمین پر ہی ممکن ہے جس سے انسان کی سانس کا دھاگا الجھا ہے:
یہ تو ممکن ہی نہیں چھوڑ کے تجھ کو جائوں
تجھ سے الجھا ہے مری سانس کا دھاگا پیارے
سائنسی دور میں رونما ہونے والی قیامت خیزیوں میں ایک بڑا مسئلہ ہماری زمین اور اس کے اطراف میں موجود قدرتی ماحول کے تباہ و برباد ہونے کا بھی ہے جو سائنس اور ٹیکنالوجی کے ضرورت سے زیادہ استعمال کے نتیجے میںپیدا ہوا ہے۔ماحولیات کی بربادی کے اس قیامت خیز منظر کو مضمرؔ نے بڑے ہی منفرد انداز میں پیش کیا ہے۔موصوف کے کلام میں عصر حاضر کے ان تمام ماحولیاتی مسائل کی جھلک دیکھنے کو مل جاتی ہے جس پر آج پوری دنیاکے ممالک فکر مند ہیں۔مثلاً قدرتی آفات،آب و ہوا کی آلودگی،زمین کی درجہ حرارت کا بڑھنا،موسم کی تبدیلی وغیرہ ۔ بڑھتی ہوئی آبادی کی ضروریات اور نئے شہر بسانے کے لئے انسان نے جنگلات اوردرختوں کی اندھا دھن کٹائی کی۔جس کے سبب موسم کا نظام بھی درہم برہم ہوا۔ہرے بھرے علاقے ریگستانوں میں تبدیل ہوئے، دھول بھری تیز رفتار آندھیوں کا چلنا عام ہوا۔ اوروہ خوشگوار ہو ا ئیںجو پیڑ پودوں، ہرے بھرے ماحول کے توسط سے چلتی تھی جو انسان کی صحت و تندرستی کی ضامن تھی اس کی جگہ خوف ناک آندھیوں نے لے لی ہے۔اس سے متعلق شعر دیکھیں:
یہ آندھی آج کیسی چل رہی تھی
ہوا بھی ہاتھ اپنے مل رہی تھی
مذکورہ شعرمیں مضمر ؔ نے جو استفہامیہ انداز اختیار کیا ہے وہ ماحولیات میں رونما ہونے تبدیلیوں پر بہت کچھ سوچنے اور غور و فکر کرنے کی دعوت دیتا ہے۔
ایک دوسرے شعر میں سائنس اور ٹیکنالوجی کو انسانیت کے لئے تحفہ قرار دینے والوں اور انسانیت سے محبت کا جھوٹا تقاضا کرنے والوں کو طنز کا نشانہ بناتے ہوئے کہتے ہیں:
محبت کا تقاضا ہو رہا تھا
زمیں لیکن ہماری جل رہی تھی
موصوف اپنے اس شعر کے ذریعے آنے والی ایک نئی قیامت کی طرف بھی ذہن کو مرکوز کرنا چاہتے ہیںجو سائنس اور ٹیکنالوجی کی ہی دین ہے۔فیکٹریوں،گاڑیوں سے نکلنے والی آلودہ گیسوں نے نہ صرف ہمارے اطراف کی پاک اور شفاف ہوا کو زہریلا بنا یا ہے بلکہ یہ زمین کی درجہ حرارت کو بڑھانے کی بھی موجب بنی ہیں۔کرۂِ ارض مسلسل گرم ہوتا جا رہا ہے۔ماحول کی آلودگی کے سبب کاربن ڈائی آکسائیڈ اور دوسری خطرناک گیسیں سورج کی کرنوں سے پیدا ہونے والی گرمی کو کرۂِ ارض تک لانے کا سبب بنی ہیں اور وہ اس گرمی کو واپس Atmosphere میں جانے سے روک لیتی ہیں۔جس کے نتیجہ میںزمین کا درجۂ حرارت بڑھنے لگتا ہے۔اس عمل کو Global warming کہتے ہیں۔اس کے ساتھ ساتھ ــــ’’ال نینو‘‘کے اثرات بھی ظاہر ہوئے ہیں۔ـ’’ال نینو‘‘ کے اثرات سمندر کے درجۂ حرارت میں اضافہ ہونے سے پیدا ہوئے ہیں۔جس کے نتیجے کے طور پر بارش ہونے کے نظام میںبڑی تبدیلی کے ساتھ ساتھ قحط سالی بھی ایک بڑے مسئلہ کے طور پر دیکھنے کو ملی ہے۔اس قیامت خیز منظر کی ترجمانی میں موصوف کے چند شعر ملاحظہ کریں:
عجب سی اک وبا پھیلی ہوئی ہے
زمانہ مر رہا ہے تشنگی سے

پھر وہ منظر بدل گیا مضمرؔ
پھر وہ دلکش لہر نہیں آئی
مندرجہ بالا اشعار میں موصوف ’گلوبل وارمنگ‘ اور’ ال نینو‘ کے سبب ظاہرہونے والی قیامت خیز علامتوں کی منظر کشی بڑے منفرد انداز میں کرتے ہوئے نظر آ رہے ہیں۔ اسی فکر سے مہمیز چند اشعار اور ملاحظہ کریں جس میں مضمرؔ زمین کے بڑھتے ہوئے درجۂ حرارت کے سبب پھولوں کے کمھلانے،اورانسانوں کے مرنے کا ذکر کرتے ہوئے نظر آتے ہیں۔ساتھ ہی اس بات پر بھی غور و فکرکی دعوت دے رہے ہیں کہ زمین کی درجہ حرارت بڑھنے کی ایک وجہ سائے دار درختوں اور جنگلات کے ختم ہونے کا نتیجہ ہے۔ہمیں ان مسائل کے بارے میں سوچنا ہوگا کیوں کہ ہمارے سامنے ایک محشر برپا ہونے جا رہا ہے:
پھول کمھلا جائیں گے پر تتلیاں رہ جائیں گی
یعنی انساں مر رہیں گے ہستیاں رہ جائیں گی

سوچو! یہی امید ہے اب بھی بندھی ہوئی
سر پر پڑے جو دھوپ تو سایا شجر کرے

اگر چہ حشر کا سا سامنا ہے
مگر برپا ابھی محشر نہیں ہے
مضمرؔ ماحولیات کی بربادی کے لئے انسان اور اس کی کارکردگی کو ذمے دار مانتے ہیں۔اس لئے اپنے شعری مجموعے میں جگہ جگہ طنز کرتے ہوئے نظر آتے ہیں:
جائے گی کسی روز مری ہاتھ سے جان
ہر روز نکلتی ہے اسی بات سے جان
ہم کسی کے کہاں بھلا مضمرؔ
ہم تو اپنے نہیں زمانے سے

بہت کچھ ہے ہمارے ذہن و دل میں
مگر دیکھو کسی کا گھر نہیں ہے

میرے اندر کتنے مقتل برپا ہیں
ہر دن کوئی مجھ میں مرتا رہتا ہے

عجب ہیں ہم عجب چہرا ہمارا
کہیں پر خوش کہیں گریا ہمارا

یارو ہمارے دور کا عالم نہ پوچھنا
ہر دن ہمارے دور کا یوم الحساب ہے

الغرض صدام حسین مضمرؔ کے کلام میں عصر حاضر کے جن قیامت خیز مناظر کی ترجمانی دیکھنے کو ملتی ہے اس کے پس پردہ سائنس اور ٹیکنالوجی کا بے جا استعمال ہی ہے۔جس سائنس و ٹیکنالوجی کا کام انسانی زندگی کو سہل اور آسان بنانا تھا۔آج اسی کے توسط سے انسانی زندگی کے لئے نئے نئے مسائل اور پریشانیاں پیدا ہوئی ہیں۔ ہم کو ان مسائل پر غور و فکر کرنے کے ساتھ مل جل کران پریشانیوں کا حل تلاش کرنا ہوگا۔اس کے ساتھ ہی ہمیں سائنس اور ٹیکنالوجی کا استعمال بھی بڑی احتیاط کے ساتھ کرنا ہے۔تاکہ ہم اپنی قدرتی ماحول کا تحفظ کر سکیں۔
شاعر و ادیب اس سے متعلق بیداری لانے میں اہم کردار ادا کر سکتے ہیں کیوں کہ ان کے قلم میں وہ طاقت ہوتی ہے جس کے زور پر وہ سماج میں ایک نیاانقلاب پیدا کر سکتے ہیں۔صدام حسین مضمرؔ کا شعری مجموعہ نہ صرف عصر حاضر کی قیامت خیزیوں کا ترجمان ہے بلکہ قیامت کے گزر جانے کے بعد جینے کا حوصلہ بھی دیتا ہوا نظر آتا ہے۔اس لئے انھوں نے اپنے شعری مجموعے کا نام ’’قیامت کے باوجود‘‘ رکھا ہے تاکہ انسان قیامت گزر جانے کے بعد ہمت نہ ہارے اور پر اعتماد رہے۔اور تمام مسائل کا حل دریافت کرے جن کے سبب قیامت رونما ہوئی ہے۔

اشعر نجمی کی ادارت میں شائع ہونے والے ادبی مجلے ’ اثبات ‘ کے بارے میں مَیں نے کبھی لکھا تھا کہ ’ اس کا عام شمارہ بھی خاص شمارہ ہوتا ہے ‘، اگر میری اس بات کو آزمانا ہے تو اس کا نیا شمارہ ( نمبر44) دیکھ لیں ، جو ہے تو عام شمارہ ، مگر اپنے کروفر میں کسی خاص شمارے جیسا ہی ہے ۔ اپنے متنوع مواد کے سبب اس شمارے کو دھنک سے تشبیہ دی جا سکتی ہے ، جس کا ہر رنگ خوشنما ہوتا ہے ۔ یوں تو اس شمارے کے ہر حصے یا باب پر بات کرنا ممکن ہے ، لیکن مَیں بس چند ہی حصوں پر بات کروں گا ، تاکہ اُن کا بھرپور تعارف ہو سکے ۔

اشعر نجمی کا ’ اداریہ ‘ ہر شمارے کی جان ہوتا ہے ، کیونکہ اُس میں ادب پر ، اور کبھی کبھی ادب سے باہر کے کسی موضوع پر ، جم کر خامہ فرسائی کی جاتی ہے ، بعض اوقات کچھ لوگوں پر شدید تنقید بھی کی جاتی ہے ۔ اس بار اشعر نجمی نے یہ دونوں کام ایک ساتھ کیے ہیں ۔ ان کے ’ اداریے ‘ کا عنوان ہے ’ فی الحال رسید حاضر ہے ‘، اور موضوع ہے ادبی رسالوں میں شائع ہونے والے خطوط ۔ اس ’ اداریہ ‘ میں اشعر نجمی نے آج کے اکثر ادبی رسالوں کے مدیران کرام کی دُکھتی رگ پر انگلی رکھی ہے ، کیسے؟ ملاحظہ کریں : ’’ اُس وقت ( ماضی میں ) سستے سے سستے رسالے میں قارئین کے خطوط چھپتے تھے جس میں صرف مدیر محترم کی مدح سرائی ہی نہیں ہوتی تھی بلکہ کچھ مشمولات پر ہلکی پھلکی تنقید بھی اُن میں شامل ہوتی تھی ۔ بعد میں اِن تبصرہ نما خطوط کی سب سے بہترین شکل مجھے ’ شب خون ‘ میں نظر آئی جس میں قارئین کھل کر مشمولات پر اپنی رائے دیتے تھے اور بوقت ضرورت مدیر / مرتب بھی بعض خطوط کے تعلق سے اپنا موقف واضح کردیا کرتا تھا ۔ یہ ایک اچھا سلسلہ تھا جو قاری ، مدیر اور قلمکار کو ایک ہی لڑی میں پرو دیتا تھا ۔ اگرچہ اب بھی بعض رسائل میں خطوط چھپتے ہیں لیکن ان میں سے 99 فیصد ایسے ہوتے ہیں جو صرف مدیر محترم کے نفس کو مزید موٹا کرنے کے لیے لکھے جاتے ہیں تاکہ خطوط نویسوں تک اعزازی کاپیاں پہنچتی رہیں اور اپنی تخلیقات کی اشاعت کے لیے راہ ہموار کی جاتی رہے ۔‘‘ آگے وہ لکھتے ہیں : ’’ مراسلوں کی جگہ اب سوشل میڈیا نے لے لی ہے ، بطور خاص فیس بک نے لے لی ہے ۔‘‘ اور پھر اشعر نجمی نے رشید ودود پر سخت تنقید کی ہے ۔ ہوا یہ تھا کہ رشید ودود نے اس شمارے کی اشاعت سے قبل ، فیس بک پر اس کی فہرست کے ایک عنوان ’ اردو روز بروز مزید اسلامی ہوتی جا رہی ہے ‘ کو بنیاد بناکر ، انجمن ترقی اردو ( ہند ) کے جنرل سیکرٹری ، اطہر فاروقی پر شدید نکتہ چینی کی تھی ۔ مَیں نے فیس بک پر ساری روداد اور جھڑپ دیکھی اور لطف بھی اٹھایا ، اور مجھے لگتا ہے کہ اس طرح کی جھڑپیں یا معرکے ادبی دنیا پر طاری جمود کو توڑنے کے لیے ضروری ہیں ، فریقین کو چاہیے کہ ایسی بحثوں کو آن بان اور شان کا مسئلہ نہ بنائیں ۔ چونکہ ’ اداریہ ‘ کی بنیاد میں ، اطہر فاروقی کے انٹرویو کا ایک جملہ ، اور اس پر کیا جانے والا اعتراض ، گارے کی حیثیت رکھتا ہے ، اس لیے ’ گوشۂ اطہر فاروقی ‘ پر بات کرنا ضروری ہو گیا ہے ، حالانکہ میں چاہتا تھا کہ پہلے اشعر نجمی کے ، اس شمارے میں شامل ، تین ’ خاکوں ‘ کا ذکر کر لوں ۔ اطہر فاروقی کی تحریریں مجھے پسند آتی ہیں ، اس کی ایک بڑی وجہ اُردو زبان کے تئیں ان کی حقیقت پسندانہ سوچ ہے ۔ اس گوشہ میں شامل انٹرویو کی بنیاد پر مَیں بلا تردد کہہ سکتا ہوں کہ اطہر فاروقی کا اُردو زبان کے احیاء کا جو نظریہ ہے ، اگر اس پر عمل کیا جانے لگے تو اِس زبان کو صحت مند ہونے سے روکا نہیں جا سکتا ۔ انٹرویو اور اسی شمارے میں شامل ان کی یادوں یا خودنوشت ’ لذیذ بود حکایت دراز تر گفتم ‘ کا مطالعہ کرتے ہوئے مجھے یہ شدید احساس ہوا کہ اطہر فاروقی جو سچ اور حق سمجھتے ہیں اُسے چھپاتے نہیں ، بول دیتے ہیں ، لیکن اکثر اُن کے لہجے اور قلم میں سختی یا کہہ لیں کہ تلخی آجاتی ہے ، کچھ لوگ اسے اسے درشتی بھی کہہ سکتے ہیں ۔ انٹرویو کے چند سوالوں کے جواب سے کچھ سطریں ملاحظہ کریں : ’’ ایک تحریک ( اُردو کے لیے ) تو یہ ہو سکتی ہے کہ اُردو والے اپنے بچوں کو اُردو اس لیے پڑھائیں تاکہ وہ بچہ اُردو کا عظیم ادب پڑھ کر بہتر انسان بن سکے ۔ اور یہ کام کسی جماعتی تحریک کے ذریعے نہیں بلکہ ضمیر کی آواز پر ہوگا ۔‘‘ ( مجھے جملے میں ’ اُردو کا عظیم ادب ‘ پڑھ کر اچھا لگا کیونکہ اُردو کے اکثر ادباء اُردو کے ادب کو معمولی قرار دیتے ہیں ) ۔ مزید ملاحظہ کریں : ’’ اُردو والوں کو اپنے سیاسی رہنماؤں کا انتخاب بہت سوچ سمجھ کر کرنا چاہیے ۔ اُردو کے لیے جب بھی کوئی جلسہ کیا جائے تو جن لوگوں کو تقریر کرنے بلایا جائے ، اُن کے بارے میں یہ طے ہو کہ اُنہوں نے اپنے بچوں کو اُردو پڑھائی ہے ۔‘‘ مزید : ’’ مفت میں اُردو رسالے اور کتابیں خاص طور پر یونیورسٹیوں میں اُردو کے اساتذہ اور متوسط طبقے کے وہ لوگ پڑھنا چاہتے ہیں جو سیکڑوں روپیے مہینہ انگریزی اور ہندی اخباروں پر خرچ کرتے ہیں مگر اُردو کے اخبارات اور کتابیں اُنہیں صرف مفت میں ہی چاہئیں ۔‘‘ مزید : ’’ جہاں تک اُردو اداروں کا معاملہ ہے تو اب یہ تقریباً مسلمانوں کے ادارے بن چکے ہیں ۔ اُردو کے سرکاری اداروں کو خود سرکاریں بھی مسلمانوں کے ادارے سمجھتی ہیں ۔ مسلم اداروں میں ہر طرح کی بدانتظامی عام ہے ۔ مسلمان چھوٹے سے چھوٹے اداروں تک کو اپنے ذاتی حشمت سے جوڑ کر دیکھتے ہیں اور ان کے لیے لڑتے ہیں ۔‘‘ اُردو پڑھانے کا ایک آسان طریقہ بھی انہوں نے بتایا ہے : ’’ وہ بس اپنے بچوں کو اُردو پڑھانا شروع کر دیں ۔ اگر اسکول میں اُردو نہیں ہے تو گھر پر اس کا انتظام کریں ۔‘‘ طویل انٹرویو ہے جس میں انجمن کے مالی معاملات سے لے کر اُردو ہندی کے رشتوں اور رسم الخط تک بہت ساری باتوں پر اطہر فاروقی کی سوچ سامنے آتی ہے ، اس میں وہ سوال بھی ہے جس کے جواب سے اس انٹرویو کی سرخی لگائی گئی ہے ، سرخی جس نے فیس بک پر بحث کو جنم دیا تھا ۔ سوال تھا : ’’ ’ اردو ختم ہو رہی ہے ‘ ، پرانا مگر طاقتور سیاسی نعرہ ہے ، اس پر آپ کیا کہیں گے؟ ‘‘ جواب دیا گیا : ’’ زبانیں شاید ہی کبھی ختم ہوتی ہوں مگر وہ اپنی شکل ضرور تبدیل کر لیتی ہیں ۔ اُردو کی شکل میں ایک بڑی تبدیلی یہ آئی ہے کہ یہ روز بہ روز مزید اسلامی ہوتی جا رہی ہے ۔‘‘ پورا انٹرویو پڑھ کر اندازہ ہوتا ہے کہ اطہر فاروقی کی مذکورہ بات ’ اردو کے سیکولر کردار ‘ کے زوال کے تناظر میں ہے ، انہیں مسلمانوں سے گِلہ ہے کہ ’’ انہوں نے پوری طرح اُردو کی حفاظت کی ذمہ داری حکومت پر ڈال دی اور خود کو صرف اسلام کی حفاظت کے لیے وقف کر لیا ۔ ہندوؤں نے بھی اُردو کو صرف مسلمانوں کی زبان سمجھ کر پڑھنا بند کر دیا ۔ حکومتیں ایک حد کے بعد کسی زبان کو نہیں بچا سکتیں ۔ اُردو والے چونکہ خود اُردو کے لیے کچھ کرنے کے بجائے حکومت پر بھروسہ کر رہے تھے ، اس لیے وہ کسی اور زبان کے ساتھ مل کر اُردو کی لڑائی نہ لڑ سکے ۔‘‘ یہاں میں یہ کہنا چاہوں گا کہ قصور اُن کا ہے جنہوں نے اُردو کے سیکولر کردار کو ختم کیا ہے ، اور وہ مذہبی اسکالر نہیں ہیں ، کیونکہ مذہبی کتابیں پہلے بھی شائع ہوتی رہی اور فروخت ہوتی رہی ہیں ، اور اب بھی وہی صورتحال ہے ۔ عائشہ نجیب کو بہت بہت مبارک ہو کہ اُنہوں نے اطہر فاروقی سے ایسے سوالات کیے کہ وہ کُھلنے پر راضی ہو گیے ۔

اطہر فاروقی کی خودنوشت آنکھیں کھولنے والی ہے ۔ اُنہوں نے سکندر آباد میں تعلیم سے لے کر جماعت اسلامی و مولانا مودودی کے اثرات کو قبول کرکے کمیونسٹ حلقہ میں رسائی حاصل کرنے اور جے این یو کی تعلیم تک کئی بڑے چہروں کو جس طرح بے نقاب کیا ہے ، اور تعلیمی اور ثقافتی شعبوں کی چپقلشوں اور بے ایمانیوں پر بات کی ہے ، اور ان تمام حوالوں سے اپنے جسمانی اور ذہنی سفر کی دلچسپ مگر تلخ روداد پیش کی ہے ، اس کے لیے وہ دل کی گہرائیوں سے مبارک باد کے حقدار ہیں ۔ اِس گوشہ میں اطہر فاروقی پر مرحوم مجتبٰی حسین اور معروف صحافی معصوم مرادآبادی کے دو خاکے بھی شامل ہیں ، جنہیں پڑھ کر یہ پتا چلتا ہے کہ دوسرے افراد اطہر فاروقی کو کس طرح سے دیکھتے ہیں ۔ دونوں ہی خاکے عمدہ ہیں ۔ دونوں خاکوں سے چند سطریں : ’’ اُردو میں یا یوں کہیے کہ اُردو جاننے والے اطہر فاروقی وہ واحد شخص ہیں جنہیں کسی طرح کے اقتدار ، کسی ادارے کی رکنیت ، کسی انعام سے کوئی دلچسپی نہیں ۔ اطہر فاروقی کو خریدا نہیں جا سکتا ، یہ بات اُردو میں لوگوں کو بڑی مشکل سے سمجھ میں آتی ہے ۔‘‘ ( اطہر فاروقی : خوبصورت تضادوں کا آدمی ۔ مجتبٰی حسین )

’’ اُردو کے لیے اطہر فاروقی کا دل ہر وقت دھڑکتا ہے ۔ ان کے رفیق بتاتے ہیں کہ اب اُن کی زندگی کا واحد مرکز انجمن ترقی اُردو ( ہند ) کی ترقی ہے جس کے پاس کسی قسم کی سرکاری مدد نہیں ہے ۔ ‘‘ اس گوشہ میں اطہر فاروقی کے تحریر کردہ دو مضامین اور سید شہاب الدین مرحوم سے ان کا لیا ہوا ایک انٹرویو بھی شامل ہے ۔ ایک مضمون اسلامک بینکنگ پر ہے ، جو اسلامک بینکنگ کے نام پر کیے جانے والے فراڈ کو اجاگر کرتا ہے ، لیکن اسے ’ اسلامی غلبے کا نیا ہتھیار ‘ نہیں کہا جا سکتا ، ہاں فاسٹ مَنی کمانے کا ہتھیار کہا جا سکتا ہے ۔ اشعر نجمی نے بھرپور گوشہ شائع کیا ہے ، انہیں اس کے لیے مبارک ۔ انہوں نے تعارف میں اس گوشے کا جواز دیتے ہوئے جو بات لکھی ہے اس سے مجھے پورا اتفاق ہے : ’’ اس وقت اطہر فاروقی کا دم قدم صرف اُردو کے لسانی معاشرے کے لیے ہی نہیں بلکہ ہندوستان میں ہچکیاں لیتی ’ قومی دانشوری ‘ کے لیے بھی ’ نعمت غیر مترقبہ ‘ سمجھا جانا چاہیے ۔ اسی ’ تحدیث نعمت ‘ کے لیے یہ گوشہ مخصوص کیا گیا ہے ۔‘‘

اس شمارہ کی خاص پیشکش فرحت احساس کی ، جنہیں اشعر نجمی ’ خالص ‘ ہندوستانی شاعر مانتے ہیں ، 11 غزلیں ہیں ۔ ایک شعر ملاحظہ کریں ؎

میں ترے پانی سے ابھروں تو مری مٹی میں ڈوبے

میں ترا مٹی ہوں آج اور آج تو پانی ہے مری

عتیق اللہ اس شمارے میں ، اپنی نظموں اور چار غیر ملکی نظموں کے تراجم کے ساتھ موجود ہیں ۔ اس شمارہ کے تمام مضامین ، چاہے وہ سید محمد اشرف کا ہو یا خالد جاوید ، ادین واجپئی ، محسن حامد ، محمد عاطف یا جاوید رسول کا ، وقیع ہیں ۔ رضوان الدین فاروقی نے ادین واجپئی اور محسن حامد کی تحریروں کا خوبصورت ترجمہ کیا ہے ۔ سید محمد اشرف نے بڑی خوبصورتی سے فاروقی صاحب کے ساتھ اپنی کھٹی میٹھی یادوں کو تحریری شکل دی ہے ۔ بات غزلوں کی بھی ہونی چاہیے کہ اس شمارے میں 14 شعراء کی 50 غزلیں شامل ہیں ، لیکن اتنی غزلوں پر اظہار خیال کے لیے اخبار کی تنگ دامنی مانع ہے ۔ احمد جہانگیر اور سہرام سرمدی کے ایک ایک شعر پیش ہیں؎

مولا اس نم ناک زمیں پر کوئی سویرا ایسا ہو

ہر اک چکی گیہوں پیسے ہر چولہے میں آگ جلے

( احمد جہانگیر)

خلق خدا یہ کہتی ہے تیرا فراق تھا سبب

واقعہ یہ کہ تیری یاد آئی تھی اور جاں گئی

اس شمارے میں تین افسانے ہیں ، ناصر عباس نیر ، شاعر امیر حمزہ ثاقب اور نورین عل حق کے ، تینوں لاجواب ہیں ۔ امیر حمزہ ثاقب کو اس پہلے مطبوعہ افسانہ کی مبارک ہو ۔ اس باب میں اشعر نجمی کے زیرِتحریر ناول ’ وسرجن ‘ کے دو زبردست باب شامل ہیں ، مَیں اس ناول پر اپنی حتمی رائے مکمل ناول پڑھنے کے بعد دوں گا ۔ نظموں کا باب کافی طویل ہے ، سات شعراء کی 27 نظمیں ! سلیم شہزاد میرے پسندیدہ نظم نگار ہیں اور ہمیشہ کی طرح اُن کی نظموں نے ذہن کو تھکایا ، لیکن جب معنیٰ کچھ کچھ کھلے تو ذہن کو سکون دیا ۔ باقی شعراء کی نظمیں بھی اچھی ہیں ، افسوس کہ ان پر جگہ کی تنگی کے سبب بات ممکن نہیں ہے ۔ اب اشعر نجمی کے ’ خاکوں ‘ کا ذکر چھڑنے کو ہے ۔ اُن کے تین ’ خاکوں ‘ میں سے مجھے ، سب سے زیادہ پسند وہ آیا ، جو تیسرے نمبر پر ہے ، ’ ارمغان سگان فاروقی ‘ ۔ اس ’ خاکہ ‘ میں کچھ ایسا طنز ملیح ہے ، کہ اس کی کاٹ نے واقعی اُنہیں ، جو نشانہ بنے ہیں ، کاٹ دیا ہوگا ۔ ہے تو یہ فاروقی صاحب کے دو کتّوں کا خاکہ لیکن اس میں لفظ ’ کتّا ‘ کثیر معنیٰ اختیار کر گیا ہے ۔ ایک مختصر سا اقتباس ملاحظہ کریں : ’’ پُرتکلف ظہرانے کے وقت فاروقی صاحب نے میرا مذاق اڑایا کہ کتّوں سے اتنا کیوں ڈرتے ہو ؟ میں نے برجستہ کہا کہ آپ کو تو زیادہ ڈرنا چاہیے چونکہ آپ کے تجربات مجھ سے زیادہ وسیع ہیں ۔ فاروقی صاحب کھاتے کھاتے اتنا ہنسے کہ انہیں اچھو لگ گیا ۔ پانی پینے کے بعد اُنہوں نے بتایا کہ نارنگ بھی جب الہ آباد آتے ہیں تو اسی کمرے میں ٹھہرتے ہیں ، ان کی ان کتّوں کی دوستی ہو گئی ہے ۔ میں نے برجستہ کہا کہ بلاشبہ آپ کے کتّوں سے دوستی گانٹھنے میں ان کا کوئی ثانی نہیں ۔ ایک بار پھر فاروقی صاحب کھاتے کھاتے ہنسنے لگے لیکن خیر ہوئی کہ اس بار انہیں اچھو نہیں لگا ، شاید سابقہ تجربے کی بنا پر وہ محتاط تھے ۔‘‘ دوسرے نمبر پر مجھے خالد جاوید پر لکھا خاکہ ’ نئے فکشن کا پرانا آدمی ‘ پسند آیا ۔ یہ خالد جاوید سے اشعر نجمی کی ’ محبت ‘ کی کہانی ہے ، اس میں کھٹی میٹھی باتیں ہیں ، گِلہ اور شکوہ ہے اور خالد جاوید کی کمزوریوں اور خوبیوں کا بیان ہے ۔ سید محمد اشرف پر لکھے ’ خاکے ‘ میں اشرف صاحب اپنے پورے تہذیبی رکھ رکھاؤ کے ساتھ نظر آتے تو ہیں لیکن مجھے یہ ’ خاکہ ‘ سفرنامہ ، رپورتاژ اور روداد زیادہ لگتا ہے ۔ اشعر نجمی کو ایک نئی صنف میں لکھنے کے لیے شبھ کامنائیں ۔ شہرام سرمدی کے تبصرے غضب کے ہیں ، ان تبصروں میں ایک الگ رنگ ہے ، ایک الگ تیج ہے ۔ یہ تبصرے بہتوں ( مصنفوں ، شاعروں ) کو شاید نہ بھائیں ، لیکن پڑھنے والوں کو یقیناً پسند آئیں گے ۔ یہ شمارہ 512 صفحات پر مشتمل ہے اور قیمت 800 روپیہ ہے ۔ اسے فون نمبر 9372247833 اور 9910482906 پر رابطہ کرکے حاصل کیا جا سکتا ہے ۔

مصنف: عبد الباری القاسمی

اشاعتِ اول : 2024

صفحات : 224

قیمت : 300 روپے

مطبع : مرکزی پبلی کیشنز ، جامعہ نگر ، نئی دہلی

زیرِ تبصرہ کتاب ’’اردو تنقید: نقوش و نشانات‘‘ ڈاکٹر عبد الباری قاسمی کے زور قلم کا تیسرا تخلیقی و تحقیقی مظہر ہے ۔اس سے قبل ’’تفہیم و تعبیر (تنقیدی مضامین) ‘‘ اور ’’ذکرِ سعید (سرگزشت مولانا سعید احمد اکبر آبادی )‘‘ نامی کتابیں منصۂ شہود پر نمودار ہو چکی ہیں ۔اس کتاب میں بنیادی طور پر اردو تنقید کے ابتدائی نقوش اور اس کے ماخذ کو بالاستیعاب موضوع بحث بنایا گیا ہے جبکہ مغربی، عربی و فارسی اور سنسکرت تنقید کا تعارف ضمناً پیش کیا گیا ہ۔ کتاب شمیم طارق کے تمہیدی کلمات، ابوبکر عباد کے تنقیدی شناخت نامہ، حقانی القاسمی کے مقدمہ، مصنف کی تعارفی گفتگو اور حسب ذیل چار بنیادی ابواب تنقید کی تعریف و آغاز، عربی نقد و انتقاد کا جائزہ، فارسی تنقید کی روایت اور اردو تنقید کے عربی و فارسی ماخذ پر مشتمل ہے ۔ مصنف نے پہلے باب میں تنقید کی تعریف اور آغاز و ارتقاء کے ضمن میں مغربی تنقید کے اولین و نمایاں نقوش، مشرق کی مختلف تنقیدی روایت مثلاً چینی، جاپانی، سنسکرت اور اردو تنقید کا جائزہ پیش کیا ہے۔ دوسرا بات عربی نقد و انتقاد کے متنوع ادوار جیسے زمانہ جاہلیت، اسلامی، اموی اور عباسی دور اصول نقد اور ناقدین کے تنقیدی نظریات پر مشتمل ہے۔ فارسی زبان و ادب کی تنقیدی روایت اور اس کے ابتدائی اور نمایاں نقوش کو تیسرے باب میں زیرِ بحث لایا گیا ہے۔ آخری باب اردو تنقید کے عربی و فارسی مآخذ اور مصادر کی تفصیلی بحث پر مشتمل ہے۔

کتاب عبد الباری قاسمی کی ایک جامع اور تحقیقی تصنیف ہے جس میں انہوں نے اردو تنقید کے تمام اہم پہلوؤں کو یکجا کر دیا ہے۔ اس کتاب میں اردو تنقید کے آغاز و ارتقا اور مختلف تنقیدی مصادر اور مآخذ سے استفادہ اور ان کے اردو ادب پر اثرات کو ایک مربوط انداز میں بیان کیا گیا ہے۔ مصنف نے اردو تنقید کو مختلف زبان و ادب کی تنقیدی روایت کے پس منظر میں واضح کرنے کی عمدہ کوشش کی ہے۔

کتاب کے ابتدائی حصوں میں تنقید کی ابتدا اور ارتقا پر روشنی ڈالی گئی ہے۔ اس میں تنقید کی مشرقی و مغربی روایت نقد کو اجاگر کرنے کی کوشش کی گئی ہے۔ مغربی اور مشرقی تنقید کے مباحث کے ضمن میں یہ بتایا گیا ہے کہ مغربی دنیا میں تنقید کس طرح مختلف نشیب و فراز سے گزری۔ اس کے ابتدائی نقوش اور اس کی اہم خصوصیات کیا تھے۔ مصنف نے مغربی تنقید کے ابتدائی و واضح نقوش اور ان کے اثرات کو سمجھنے کے بعد مشرقی تنقید کی اہمیت کو بھی اجاگر کیا ہے۔ اس میں چینی، جاپانی اور سنسکرت کی تنقید کا بھی تذکرہ کیا گیا ہے جو اردو تنقید کی بنیادوں کو سمجھنے میں مددگار ہے۔

کتاب میں اس بات کو اجاگر کیا گیا ہے کہ اردو تنقید اور ناقدین نے تنقیدی اصول اور معیار وضع کرنے میں عربی اور فارسی اصول نقد سے بڑی حد تک استفادہ کیا ہے اور اپنے تذکروں میں ان حوالوں کا بخوبی استعمال کیا ہے۔ کتاب میں اردو تنقید کی ابتدا کے حوالے سے مذکور عربی اور فارسی کے اصول نقد اور مصادر و مآخذ سے یہ واضح ہوتا ہے کہ اردو تنقید کے اکثر اصول و نظریات ان دونوں زبانوں کے تنقیدی روایتوں سے متاثر ہوئے ہیں۔

کتاب میں تذکرہ نگاری کے حوالے سے بھی تفصیل سے بحث کی گئی ہے۔ مصنف نے تذکرہ نگاری کی ابتدا اور اس کی اہمیت کو سمجھاتے ہوئے مختلف اردو تذکروں کا ذکر کیا ہے اور ان میں تنقید کے عناصر کو اجاگر کیا ہے جن سے اردو تنقید کے آغاز و ارتقا اور اس کے اصولوں کے بنیادی مصادر کو بآسانی سمجھا جا سکتا ہے۔

کتاب میں اردو تنقید کے مشہور ناقدین اور ان کے نظریات کو بھی زیرِ بحث لایا گیا ہے۔ ان ناقدین میں محمد حسین آزاد، الطاف حسین حالی، علامہ شبلی نعمانی، امداد امام اثر، مولوی عبد الرحمن، وحید الدین سلیم، اور مولوی عبدالحق جیسے اہم نام شامل ہیں جنہوں نے اردو ادب میں تنقیدی روایت کو ترقی دینے میں اہم کردار ادا کیا ہے۔ یہ حصہ نہ صرف ان ناقدین کے نظریات کی وضاحت کرتا ہے بلکہ ان کے دور کی ادبی اور ثقافتی صورتحال کو بھی اجاگر کرتا ہے جس سے یہ پتہ چلتا ہے کہ ان ناقدین کی تنقید کس طرح اپنے زمانے کی فکری فضا سے متاثر ہوئی ہے۔ علاوہ ازیں مصنف نے ان ناقدین کے نظریات کی تفہیم و تعبیر اور ان کے متعلق مختلف ارباب نقد کی رائے کے تجزیہ کے بعد اپنی رائے کا اظہار بھی کیا ہے۔ چنانچہ مصنف محمد حسین آزاد کے متعلق کلیم الدین کی رائے پر بحث کرتے ہوئے لکھتے ہیں کہ ’’آزاد سے کچھ تسامح ضرور ہوا ہے اور حالی کی طرح مرتب اور مبسوط بحث آزاد نے نہیں کی ہے مگر اس حقیقت سے انکار نہیں کیا جا سکتا کہ محمد حسین آزاد نے اردو تنقید کو تذکروں سے کافی آگے پہنچایا اور ان کے بکھرے ہوئے تنقیدی نظریات ہی مقدمہ شعر و شاعری کی شکل میں باضابطہ پہلی تنقیدی کتاب کے وجود میں آنے کا سبب بنے۔ ‘‘ اسی طرح مصنف نے حالی، شبلی اور امداد امام اثر وغیرہ کے تنقیدی نظریات پر اپنی رائے کا اظہار کیا ہے۔

کتاب کا ایک اہم حصہ عربی اور فارسی تنقید کی تاریخ پر مشتمل ہے جس میں مصنف نے عربی تنقید کے مختلف ادوار، ان کی روایات، اصول نقد اور ناقدین پر سیر حاصل گفتگو کی ہے۔ اسلامی، اموی اور عباسی دور کی تنقیدی روایت اور ناقدین کے نظریات کو تجزیاتی سیاق و سباق میں ذکر کیا ہے ۔ مصنف نے فارسی تنقید کے ابتدائی نقوش، اس کی ارتقائی منازل اور فارسی شعرا کے تذکروں کا بھی تفصیل سے جائزہ لیا ہے۔ یہ حصہ اردو تنقید پر عربی و فارسی تنقید کے اثرات کو سمجھنے میں بہت اہم ہے۔

مصنف نے کتاب کے اختتامی صفحات میں اردو تنقید کے عربی و فارسی مصادر کے ضمن میں محمد حسین آزاد، حالی، شبلی امداد امام اثر، مولوی عبد الرحمن، وحید الدین سلیم، عبد السلام ندوی اور مسعود حسن رضوی ادیب وغیرہ کے تنقیدی مصادر اور مراجع کا اجمالی پیش کیا ہے۔ اس حصے میں یہ بھی بتایا گیا ہے کہ کس طرح اردو ناقدین نے تنقید کی مختلف روایات مثلاً عربی، فارسی اور مغربی سے کسب فیض کیا ہے اور ان کی روشنی میں اپنے نظریات کو منور کیا ہے ۔

کتاب کی اہم ترین خوبی یہ ہے کہ یہ اردو تنقید کے جملہ شعبوں کو جامع اور تنقیدی نقطہ نظر سے پیش کرتی ہے۔ اس میں مختلف زبانوں میں تنقید کی ابتدا و ارتقا، اصول نقد، ناقدین کے نظریات اور مختلف تنقیدی روایات کو ایک مربوط اور مبسوط انداز میں پیش کیا گیا ہے۔ مصنف کی تنقیدی نظر کا بنیادی نقطہ یہ ہے کہ اردو تنقید کا ارتقا محض اردو ادب تک محدود نہیں تھا بلکہ اس میں دیگر زبانوں جیسے عربی، فارسی اور مغربی ادب کے اثرات کا گہرا عمل دخل رہا ہے۔ انہوں نے ان زبانوں کی تنقیدی روایات کو اردو ادب میں منتقل ہونے کے عمل کو بخوبی اجاگر کیا ہے اور اردو تنقید کے ابتدائی نقوش کو عربی، فارسی اور سنسکرت کی تنقید سے جوڑا گیا ہے جس سے اردو تنقید کی بنیادی مباحث اور اس کے مختلف ابعاد واضح ہوتے ہیں۔

یہ کتاب اردو ادب کے طلبہ، ریسرچ اسکالرز اور ناقدین کے لیے کسی آب حیات سے کم نہیں ہے۔ مصنف نے اپنی عرق ریزی اور فکر رسا سے تنقید کے مختلف پہلوؤں کو نہ صرف سپرد قلم کیا ہے بلکہ ان کی تہہ میں جا کر تنقیدی ابعاد، تاریخی تناظر اور فنی انسلاکات کو بھی واضح کیا ہے۔

کیا آپ جانتے ہیں کہ راحت ابرار کو علی گڑھ مسلم یونیورسٹی ( اے ایم یو ) کی تاریخ کا انسائیکلوپیڈیا کہا جاتا ہے؟ یہ لقب انہیں یونہی نہیں مل گیا ہے ، اس کی بنیاد میں اے ایم یو اور اس کے بانی سرسید احمد خاں سے وہ بے پناہ محبت ہے ، جو کسی علیگ ہی کو ہو سکتی ہے ۔ مگر علیگ تو بہت ہیں لیکن ہر علیگ راحت ابرار نہیں ہے ۔ راحت ابرار بننے کے لیے اے ایم یو اور سرسید سے محبت کے علاوہ تحقیق اور سچ کو جھوٹ سے الگ کرنے کا جذبہ بھی درکار ہے ، جو راحت صاحب میں بدرجۂ اتم پایا جاتا ہے ۔ اے ایم یو اور سرسید پر موصوف کی کئی تحقیقی کتابیں ہیں – اردو اور انگریزی دونوں ہی زبانوں میں – اِن دنوں وہ ، بزبان انگریزی ، ایک کتاب تصنیف کر رہے ہیں ، جس کا موضوع یہ سوال ہے ، کہ کیا اے ایم یو واقعی ایک اقلیتی یونیورسٹی ہے؟ تمہید قدرے طویل ہوگئی ، لیکن یہ بتانا ضروری تھا کہ جس کتاب ’ سرسید کا قیام مرادآباد ‘ کا تعارف کرانا ہے ، اس کے مصنف کی ، اپنے موضوع پر ، مکمل گرفت ہے ۔ یہ کتاب سرسید اکیڈمی ، علی گڑھ مسلم یونیورسٹی کے ڈائرکٹر ، پروفیسر شافع قدوائی کے اس منصوبے کی ایک کڑی ہے ، جِس کے تحت وہ ، سرسید کے قیام والے شہروں پر ، سرسید کے تعلق کی ممکنہ تمام جہات کا احاطہ کرنے کے لیے ، مونو گراف لکھوا رہے ہیں ۔ ’ حرفے چند ‘ کے عنوان سے پروفیسر شافع قدوائی راحت ابرار اور اس مونو گراف کے بارے میں لکھتے ہیں

: ’’ علی گڑھ کی تاریخ کے رمز شناس اور مصنف ڈاکٹر راحت ابرار سے سرسید کے قیام مرادآباد پر مونو گراف لکھنے کی درخواست کی گئی اور سرسید اکادمی ان کی ممنون ہے کہ انہوں نے درخواست قبول کر لی ۔ سرسید اور مرادآباد کے موضوع پر کم لکھا گیا ہے اور جو کچھ لکھا بھی گیا ہے ، اس میں تحقیقی دقت نظری اور دستاویزات سے براہِ راست استنباط کا لحاظ شاذ ہی لکھا گیا ہے ۔ ڈاکٹر راحت ابرار نے اس موضوع سے متعلق تمام معلومات کو تحقیقی نقطہ سے مرتب کیا اور ماہرین سرسید کے تسامحات کو دستاویزی شواہد کے ساتھ نشان زد کیا ۔‘‘

راحت ابرار نے ’ پیش گفتار ‘ میں اِس مونو گراف کے حوالے سے سرسید اکادمی کے قیام کے مقاصد کا ذکر کرتے ہوئے لکھا ہے : ’’ سرسید اور علی گڑھ تحریک پر سنجیدہ طریقہ سے تحقیق و تصنیف کے کاموں سے وابستہ اہلِ دانش کا خیال ہے کہ سرسید پر منصوبہ بند طریقے سے تحقیق نہیں کی گئی ۔ یہی سبب ہے کہ ان کی سوانح ، شخصیت اور خدمات کے ایسے متعدد گوشے ہیں جو آج بھی تشنۂ تحقیق ہیں ۔‘‘ وہ پروفیسر شافع قدوائی کے پراجیکٹ کا ذکر کرتے ہوئے لکھتے ہیں : ’’ سرسید اور علی گڑھ تحریک پر تحقیق و تالیف سے وابستہ افراد سرسید اکادمی کے موجودہ ڈائرکٹر پروفیسر شافع قدوائی کے اس فیصلے کا خیر مقدم کریں گے کہ پچاس سال بعد پروفیسر خلیق احمد نظامی کے خوابوں اور منصوبوں کو عملی جامہ پہنانے اور تحقیقی نوعیت کے کام کرنے کے لیے منصوبہ بند کوششوں کا آغاز ہوا ہے ۔‘‘ مراد آباد میں سرسید کا قیام ساڑھے تین سال رہا ، یہ سال ، بقول راحت ابرار : ’’ سرسید کی آئندہ زندگی کے لیے بہت ہی انقلابی ثابت ہوئے ، جہاں اُن کے مذہبی ، تعلیمی اور فلاحی اقدامات میں پہلی بار اہم موڑ آیا اور پہلی بار اُنہوں نے مجتہدانہ افکار و اعمال کی تخم ریزی شروع کی اور اسی شہر سے وہ اپنے ہم وطنوں کے لیے ایک نئی منزل کا نشان بھی بنے ۔ علی گڑھ تحریک کے ابتدائی نقوش مرادآباد میں اور ان کے قائم کردہ فارسی پنچائیتی مدرسہ میں ملتے ہیں ۔ یہیں ۱۸۶۱ء میں ان کی رفیقۂ حیات نے ان کو ہمیشہ کے لیے الوداع کہا اور اپنی چوالیس برس کی عمر سے تجرد کی زندگی گزاری ۔ یہی وہ شہر ہے جہاں انہوں نے اپنی پبلک لائف کا آغاز کیا اور پندرہ ہزار سے زائد افراد کو خطاب فرمایا اور اپنی تصنیفی سرگرمیوں سے مسلمانوں کے خلاف پائے جانے والی غلط فہمیوں کو دور کیا اور حکمراں طبقہ میں مسلمانوں کے تئیں رائے عامہ کو ہموار کیا ۔‘‘ اُنہوں نے سرسید اکادمی کو دو اہم مشورے بھی دیے ہیں : ’’ میری ناقص رائے میں سرسید اکادمی کی یہ خصوصی ذمہ داری ہونی چاہیے کہ وہ علی گڑھ تحریک کو نئے زمانے اور اُس کے تقاضوں کے مطابق پیش کرے اور خود طلبائے علی گڑھ میں علی گڑھ تحریک سے ’ احساسِ شراکت اور احساسِ وابستگی ‘ کے جذبے کو فروغ دے ۔‘‘

مونو گراف کو تین ابواب میں تقسیم کیا گیا ہے ، پہلے باب کا ؑعنوان ہے ’ سرسید اور ۱۸۵۷ء کے اثرات مرادآباد میں ‘۔ اس باب کو ، تمہید کے بعد ، دو حصوں میں بانٹا گیا ہے ، حصہ ’ الف ‘ کا عنوان ہے ’ مسجد شاہ بلاقی خاں میں ملکۂ وکٹوریہ کے لیے دعا ‘ ۔ راحت ابرار لکھتے ہیں : ’’

غدر میں مرادآباد کے سولہ ہزار آدمیوں نے دہلی کے آخری تاجدار بہادر شاہ ظفر کو جان و مال قربان کرنے کا محضر نامہ بھیجا تھا ۔ پھر یہ محض زبانی جمع خرچ نہیں تھا ، ہزاروں بندگان خدا واقعتاً اس راہ میں شہید ہو گیے ۔ شہر کے دو محلّوں کے نام ان کی مستقل یادگار ہیں ۔ گل شہید ( جہاں پھانسی دے کر مارا گیا ) کٹار شہید ( جہاں تلوار سے قتل کیا گیا ) سرسید جن دنوں مرادآباد میں تھے تبھی ایسٹ انڈیا کمپنی کی عمل داری ختم ہوگئی اور ہندوستان ملکۂ برطانیہ کے قبضہ میں آگیا جس پر سب سے زیادہ خوشی کا اظہار سرسید نے کیا ۔ مراد آباد کے مسلمان بھی ایسٹ انڈیا کمپنی کے جبر اور مسلم دشمنی سے پریشان تھے ۔ لہٰذا ملکۂ وکٹوریہ کی حکومت میں اُنہیں کچھ بہتر آثار نظر آئے ۔ یہی وجہ ہے کہ حضرت شاہ بلاقی میں ۲۸ جولائی ۱۸۵۹ء ( بروز جمعرات) کو قریب پندرہ ہزار مسلمانوں کے وہاں جمع ہوئے ، غریبوں اور مسکینوں کو عمدہ کھانا تقسیم کیا گیا ۔ عصر کے وقت سب لوگوں نے شاہ بلاقی کی مسجد میں نماز پڑھی ۔ نمازیوں کی اس قدر کثرت تھی کہ مسجد کے باہر میدان تک جماعتیں کھڑی ہوئی تھیں ۔ نماز کے بعد سرسید نے صحنِ مسجد میں ایک اونچی جگہ کھڑے ہو کر اردو زبان میں ایک مناجات پڑھی جس میں شاندار الفاظ ہیں ، نہ رنگینی ہے ، نہ تصنع ہے ، محض سیدھے سادے الفاظ اور بے ساختہ ہیں ۔ مگر اس کے ہر جملے اور ہر فقرے سے معلوم ہوتا ہے کہ مسلمانوں کی تباہی اور بربادی نے اس شخص کے دل میں ایک عجیب بے چینی پیدا کر رکھی تھی ، جو کسی طرح کم نہ ہوتی تھی بلکہ روز بروز زیادہ ہوتی جاتی تھی اور گویا اس بات کی خبر دیتی تھی کہ وہ سرسید کو اخیر دم تک اس چیٹک سے خالی نہ رہنے دے گی ۔‘‘ یہ خطاب ملکۂ وکٹوریہ کے اعلانِ معافی کی شکر گزاری میں تھا ۔ سرسید نہیں چاہتے تھے کہ مسلمان مزید تباہ و برباد ہوں ۔ اس باب کے حصہ ’ ب ‘ میں سرسید کی چھ تصانیف ’ تاریخ سرکشیٔ ضلع بجنور ‘ ، ’ اسباب سرکشٔی ہندوستان کا جواب مضمون ‘ ، ’ رسالہ خیر خواہان مسلمانان ‘ ، ’ شکریہ مرادآباد کے مسلمانوں کا ‘ ، ’ تاریخ فیروز شاہی کی تصیح ‘ اور ’ تحقیق لفظ نصاریٰ ‘ کا تعارف کرایا گیا ہے ۔

باب دوم ’ علی گڑھ تحریک کی خشتِ اوّل ‘ کے عنوان سے ہے ۔ اس باب میں ’ مرادآباد کا تحصیلی مدرسہ ‘ کے عنوان سے اس مدرسے کا تعارف کرایا گیا ہے ، جس کے بارے میں راحت ابرار لکھتے ہیں : ’’ دراصل یہ مدرسہ سرسید کی قومی و ملی زندگی کی ابتداء ہے اور تحریک سرسید کا نقطہ آغاز ہے ۔‘‘ اس باب میں کئی اہم باتیں آ گئی ہیں ، جیسے کہ مدرسہ کے خازن ایک ہندو چوبے گردھاری لال تھے ، اور بعد میں سرسید نے علی گڑھ کے کالج کا خازن بھی ایک ہندو شیام بہاری لال ماتھر کو بنایا تھا اور سرسید کے نانا خواجہ فرید الدین نے بھی اپنی جائیداد کا خزانچی ایک ہندو لالہ ملوک چند کو بنایا تھا ۔ اس مدرسہ کو ماہرینِ سرسید نے علی گڑھ تحریک کا خشتِ اول اور رفاہِ عام کے کاموں میں سرسید کی اولین کوشش قرار دیا ہے ۔ اس باب میں فارسی مدرسہ کے نصاب تعلیم پر سرسید کی فارسی زبان کی کتاب ’ کتابِ فقرات ‘ کا تعارف بھی کرایا گیا ہے ۔ اس مونوگراف میں یتیم خانے کے قیام ، ضبط شدہ جائیداد کے لیے اسپیشل کمیشن کی رکنیت ، بیٹی امینہ کی پیدائش اور موت ، اہلیہ کے انتقال ، پرنٹنگ پریس کی خریداری ، گھر کی تلاشی اور علی گڑھ تحریک کی سرگرمیوں کے علاوہ مرزا غالبؔ کے سرسید کے مکان میں آنے کا بھی ذکر کیا گیا ہے ۔ مصنف کے مطابق غالبؔ اور سرسید میں خاندانی روابط تھے ۔ ایک اقتباس ملاحظہ کریں : ’’ جب مرزا سرائے سے سرسید کے مکان پر پہنچے اور پالکی سے اترے تو ایک بوتل ان کے ساتھ تھی ، انہوں نے اس کو مکان میں لاکر ایسے موقع پر رکھ دیا جہاں پر ہر ایک آتے جاتے کی نگاہ پڑتی تھی ۔ سرسید نے کسی وقت اس کو وہاں سے اٹھا کر اسباب کی کوٹھری میں رکھ دیا ۔ مرزا نے جب بوتل کو وہاں نہ پایا تو ہہت گھبرائے ۔ سرسید نے کہا : آپ خاطر جمع رکھیے ، میں نے اس کو بہت احتیاط سے رکھ دیا ہے ۔ مرزا غالبؔ نے اپنی تسکین کے لیے بوتل دیکھنے کی خواہش ظاہر کی ۔ سرسید نے انہیں کوٹھری میں لے جا کر بوتل دکھا دی ۔ مرزا صاحب بوتل کو اٹھا کر مسکرانے لگے اور بولے اس میں خیانت ہوئی ہے سچ بتاؤ کس نے پی ہے ۔‘‘

مونوگراف کے آخری باب میں مرادآباد کے، علی گڑھ کالج کے عطیہ دہندگان کا اور بانیٔ درس گاہ کے دور کے ممتاز اولڈ بوائز کا ذکر ہے ۔ کتاب میں کئی نایاب تصویریں بھی شامل کی گئی ہیں ۔ مونوگراف کا انتساب ’ مادر علمی کے درد مند طلبہ ‘ کے نام ہے ۔ مونوگراف 130 صفحات پر مشتمل ہے اور قیمت 300 روپیے ہے ۔ اسے یونیورسٹی کے ای میل [email protected] پر رابطہ کر کے حاصل کیا جا سکتا ہے ۔

سرسید اکیڈمی ، علی گڑھ مسلم یونیورسٹی کے ڈائرکٹر ، پروفیسر شافع قدوائی نے ، مختلف شہروں میں سرسید احمد خاں کے قیام کے بارے میں مونوگرافوں کی اشاعت کے جِس منصوبے پر کام شروع کیا ہے ، ’ سرسید کا قیام میرٹھ ‘ اس کے تحت شائع ہونے والی دوسری کتاب ہے ، جسے معروف صحافی معصوم مرادآبادی نے انتہائی تحقیق کے ساتھ تصنیف کیا ہے ۔ اس کتاب سے پہلے نوجوان محقق اسعد فیصل فاروقی کے مونوگراف ’ سرسید کا قیام بنارس ‘ کا ہم جائزہ لے چکے ہیں ۔ دونوں ہی کتابوں کے مواد اور لکھنے کے انداز میں بڑا فرق ہے ، جو بے سبب نہیں ہے ۔ بنارس کے قیام کے دوران سرسید کو میرٹھ جیسی تکالیف اور مصائب کا سامنا نہیں کرنا پڑا تھا ، پھر وہاں قیام کا دورانیہ بھی کئی سالوں پر محیط تھا اور بہت کچھ علمی ، سماجی ، ثقافتی و رفاہی کام کرنے کے مواقع بھی خوب تھے ۔ میرٹھ میں قیام صرف پانچ مہینے کا تھا ، اور یہ سال 1857ء کا تھا ؛ بغاوت ، غدر ، انقلاب یا کہہ لیں آزادی کے لیے پہلی جنگ کا سال ! سرسید کے لیے حالات کس قدر مخدوش اور خوفناک تھے اس کا اندازہ مونوگراف کے ’ پیش لفظ ‘ کے اِس اقتباس سے لگایا جا سکتا ہے : ’’ جِس وقت انقلاب شروع ہوا تو سرسید بجنور میں صدر و الصدور کے طور پر خدمات انجام دے رہے تھے ۔ اُن کے لیے یہ بڑی کشمکش کا دور تھا ۔ ایک طرف انگریزوں کی وفاداری اور دوسری طرف اپنی قوم کو شدید مشکلات اور تباہی سے بچانا ۔ یہ تلوار کی دھار پر چلنے جیسا کام تھا ۔ اِس دوران بعض انگریزوں کی جان بچانے کی وجہ سے مقامی لوگوں میں اُن کے خلاف غم و غصہ پھوٹ پڑا اور وہ اُن کی جان کے درپہ تھے ۔ شدید خطرہ کے دوران وہ بڑی مشکل سے بجنور سے ہلدور ، چاند پور ، مچولہ اور بچھراؤں ہوتے ہوئے کسی طرح میرٹھ پہنچے ۔ اِسی دوران اُنہیں معلوم ہوا کہ دہلی میں ان کے کئی قریبی رشتے داروں کا قتل ہو چکا ہے اور اُن کی والدہ بڑی ناگفتہ بہ حالت میں گھر کے اندر قید ہیں ۔ وہ کسی طرح دہلی پہنچے اور اپنی بیمار والدہ کو میرٹھ لے آئے ۔ چند روز بعد یہیں ان کا انتقال ہوا اور میرٹھ میں ہی تدفین عمل میں ائی ۔‘‘ اندازہ لگایا جا سکتا ہے کہ سرسید کے لیے یہ دور کس قدر مصائب اور الم سے بھرا ہوا تھا ۔
معصوم نے مونوگراف کے پہلے باب ’ میرٹھ کا تاریخی پس منظر ‘ میں ؛ 9 ، مئی 1857ء کے دن انقلاب کے آغاز اور اس کے نتائج کا تفصیلی ذکر کیا ہے نیز یہ بھی بتایا ہے کہ انقلاب کے بعد میرٹھ مختلف تحریکوں کا مرکز بنا ۔ یہاں نامور مذہبی ، قومی اور سیاسی شخصیات کے علاوہ علم و ادب کی سربر آوردہ شخصیات نے قدم رنجہ فرمایا ۔ سرسید سے پہلے میرؔ اور غالبؔ تک یہاں آ چکے تھے ۔ کتاب کا دوسرا باب ’ سرسید اور میرٹھ ‘ کے عنوان سے ہے ۔ اس باب کے ابتدائی صفحات میں سرسید کی حیات کا مختصراً بیان ہے ، جس کی ذیل کی سطروں سے پتا چلتا ہے کہ سرسید کی زندگی میں والدہ کی کتنی اہمیت تھی : ’’ سرسید اپنی والدہ کا کتنا احترام کرتے تھے اس کا اندازہ اس بات سے لگایا جا سکتا ہے کہ جب تک وہ دہلی میں منصف کے عہدے پر رہے تو اپنی پوری تنخواہ اپنی والدہ کو دے دیا کرتے تھے ۔ وہ پانچ روپیہ مہینہ انہیں جیب خرچ کے لیے دیتی تھیں ۔ سرسید کی باقی ضروریات والدہ کے ذمہ تھیں ۔‘‘ یہی پیاری والدہ میرٹھ میں آسودۂ خاک ہیں ۔ سرسید کا میرٹھ آنا اُن کی زندگی کے رخ کو بدلنے والا ثابت ہوا ۔ معصوم مرادآبادی لکھتے ہیں : ’’ انگریز سرکار کی ملازمت میں سرسید کی زندگی اپنے فرائض کی ادائیگی ، فرض شناسی ، لگن اور ادبی سرگرمیوں تک محدود تھی ، لیکن اِس کی کوئی سمت متعین نہیں تھی ۔ یہ 1857ء کی جنگ ہی تھی جس نے اُن کی زندگی میں سب سے بڑی تبدیلی کو جنم دیا اور یہ تبدیلی تھی مقصد کا تعین ۔ یہی وہ دور تھا جب اُن کی شخصیت ایک طرح سے مکمل ہوئی ۔‘‘ مونوگراف کا تیسرا باب اسی موضوع پر ہے ، ’ سرسید اور 1857ء ‘۔ انقلاب شروع ہونے کے بعد سرسید کو یہ پیشکش کی گئی کہ وہ باغیوں کا ساتھ دیں ، سرسید نے انکار کر دیا ، نتیجتاً ان کا سامان لُوٹ کر اُن کے گھر پر قبضہ کر لیا گیا ۔ میرٹھ کے راستے میں دو ہزار باغی انہیں گھیرنے کی تاک میں تھے ، مگر ناکام رہے ۔ جب سرسید میرٹھ پہنچے تو اُن کے جسم پر ایک پھٹا ہوا کرتا اور جیب میں چھ پیسے تھے ۔ میرٹھ والوں نے سرسید کو بڑا سہارا دیا ، اس کا اعتراف انہوں نے یوں کیا ہے : ’’ یہی میرٹھ تھا جِس نے ہم کو اور ہمارے کنبہ کو پناہ دی ۔ جِس قدر بزرگ یہاں کے خاندانی ہیں انہوں نے ہر طرح کی مدارات کرنے سے مجھ پر احسان کیا ۔ یہاں کے تمام بزرگوں نے اُس وقت ہمارے ساتھ برادارانہ محبت برتی ۔ پس آپ صاحبوں نے کل اور آج جو کچھ مہربانی میرے ساتھ کی وہ کوئی نئی بات نہیں ہے ۔ میرٹھ سے مجھے بالخصوص ایک اور بھی تعلق ہے کہ میری پیاری ماں اسی میرٹھ میں مدفون ہے ، جس کی یاد کبھی میرے دِل سے نہیں جاتی ۔‘‘
تیسرے باب میں اس حقیقت پر روشنی ڈالی گئی ہے کہ سرسید نے غدر کے دوران نہایت جواں مردی کے ساتھ حالات کا مقابلہ کیا ۔ اور انقلاب کی تحریک سرسید کے خیالات میں ایک ’ انقلابِ عظیم ‘ پیدا کرنے والا واقعہ بن گیا ۔ سرسید نے انگریزوں کی جانیں بچائیں ، جِس پر اُنہیں ’ حریف ‘ تک کہا گیا ۔ لیکن سرسید نے اپنی قوم کو تنہا چھوڑا نہیں ۔ مراد آباد میں انہوں نے ایک عالمِ دین رئیس مراد آباد مولانا عالم علی کو موت کے منھ سے بچایا ، اُن پر انگریز عورتوں اور بچوں کے قتل کا الزام تھا ، اس کے خوش گوار اثرات مرتب ہوئے ۔ سرسید اپنی قوم کی بربادی اور زبوں حالی سے کافی فکر مند تھے ، اور قوم کے حالات کی بہتری کے لیے متعدد اقدامات کیے ، اُن میں ’ تعلیمی تحریک ‘ بھی شامل ہے ۔ میرٹھ سے بہت سے لوگ اس تحریک میں دامے درمے قدمے سخنے شامل رہے ، اور علی گڑھ کالج کے قیام کو ایک صورت دینے میں سرسید کا ساتھ دیا ۔ چوتھے باب کا عنوان ہے ، ’ میرٹھ میں شناسانِ سرسید ‘ ۔ اس باب میں سرسید کے رفقاء کا تعارف اور ان کی خدمات کا مختصراً مگر جامع ذکر کیا گیا ہے ۔ مونوگراف میں چار ضمیمے بھی شامل ہیں ، جِن میں سے دو میرٹھ میں سرسید کے دیے گیے لیکچر ہیں ، ایک آل انڈیا محمڈن ایجوکیشنل کانفرنس کی روداد ہے ، اور ایک طلباء کے لیے وضائف کی تجویز کی حمایت میں سرسید کی تقریر ہے ۔ کتابیات اور حواشی بھی مونوگراف کا حصہ ہیں اور علی گڑھ مسلم یونیورسٹی ، علی گڑھ کی وائس چانسلر پروفیسر نعیمہ خاتون کا ’ پیغام ‘ بھی شامل ہے ۔ پروفیسر شافع قدوائی مونو گراف میں ’ حرفے چند ‘ کے عنوان سے لکھتے ہیں : ’’ زیرِ نظر کتاب سرسید کے میرٹھ میں قیام سے متعلق تفصیلات کا بخوبی احاطہ کرتی ہے اور مطالعات سرسید کو ثروت مند بناتی ہے جس کے لیے معصوم مرادآبادی ہدیۂ تبریک کے مستحق ہیں ۔‘‘ یہ کتاب 116 صفحات پر مشتمل ہے اور قیمت 300 روپیے ہے ۔ اسے ای میل ( [email protected]) پر رابطہ کر کے حاصل کیا جا سکتا ہے ۔

مدرس دارالعلوم دیوبند

مؤلف: جناب مفتی شکیل منصور القاسمی

صفحات: 270

اشاعت: 2024

ناشر: مرکز البحوث الاسلامیہ العالمی، پوکھریا ، بیگو سرائے بہار

احکامِ اسلام تین دلیلوں سے ثابت ہوتے ہیں ، یعنی قرانِ پاک، سنتِ رسول اور اجماعِ امت سے ، چوتھی دلیل قیاس ہے یعنی قرآن و سنت اور اجماع امت میں غور و فکر کرنے کا ذریعہ قیاس ہے ۔ یہ مستقل دلیل نہیں ہے ۔ اصولِ فقہ میں چاروں دلیلوں سے بحث ہوتی ہے اور ان سے استنباطِ مسائل کے اصول اور مناہج بتائے جاتے ہیں ۔ حضرت نبی کریم صلی اللہ علیہ وسلم نے ارشاد فرمایا:

ان الله لا يجمع امتي او قال امۃ محمد صلى الله عليه وسلم على ضلالۃ ويد الله على الجماعۃ من من شَذشُذ الى النار (ترمزي ص:2167 ) .

یعنی اللہ تعالیٰ میری امت کو یعنی امت محمد صلی اللہ علیہ وسلم کو گمراہی پر اکٹھا نہیں کریں گے اور اللہ کی مدد جماعت کے ساتھ رہتی ہے ، جو آدمی (اجماعِ امت سے) الگ ہو جائے وہ الگ ہو کر جہنم میں چلا جائے گا . اجماع امت کی دلیل قران پاک میں ہے حدیث شریف میں ہے اورصحابۂ کرام کے بہت سے فیصلے اجماع سے حل ہوئے ، خیر القرون میں اس کی بہت سی مثالیں موجود ہیں ۔ اہل السنت والجماعت کے نزدیک اجماع تیسری دلیل کے طور پر مسلم ہے ، البتہ گزشتہ زمانے میں معتزلہ نے اس کا انکار کیا اور خوارج نے بھی ، موجودہ دور میں غیر مقلدین اجماع کا انکار کرتے ہیں یا یوں کہیے کہ وہ ایسے اجماع کے قائل ہیں جس کا وجود عنقا کی طرح نایاب ہے اور روشن خیال دانشوران بھی اجماع کا انکار کرتے ہیں ، اس لیے ضرورت تھی کہ اردو زبان میں اجماعِ امت کو تجزیہ کے ساتھ مدلل کیا جائے ۔ جناب مفتی شکیل منصور القاسمی مدظلہ نے اس کا بیڑا اٹھایا اور اس پر خامہ فرسائی کی ، پیشِ نظرکتاب پانچ ابواب پر منقسم ہے ، پہلے باب میں "اجتہاد "کا تعارف کرایا گیا ہے ،رسول اللہ صلی اللہ علیہ وسلم کے اجتہاد کے ساتھ صحابۂ کرام کے انفرادی اور اجتماعی اجتہاد کے شواہد پیش کیے ہیں، اس کے بعد دوسرے باب میں "اجماع "کا تعارف کرایا ہے ،اس کی بنیاد ذکر کی ہے، اجماع کی اہلیت کے شرطوں کو ذکر کیا ہے ، اجماع کی حجیت بیان کی ہے ، اجماعِ صریحی ، اجماعِ سکوتی ، اجماعِ عام ، اجماعِ خاص ، اجماعِ قطعی اور اجماعِ ظنی ساری قسموں کو بیان کیا ہے پھر اس کے سلسلے میں مذاہب اربعہ کو بھی بیان کیا ہے ، "اجماع اور اتفاق” میں فرق ہونے اور نہ ہونے کی بحث بھی کی ہے ، تیسرے باب میں اجماع کی تعبیر کے لیے جو الفاظ استعمال ہوتے ہیں ، اس پر گفتگو کی ہے ، مثالیں دی ہیں ، چوتھے باب میں مسائل کے حل کرنے کے لیے اجتماعی غور و فکر پر روشنی ڈالی ہے ۔ پانچویں باب میں بارہ فقہی اکیڈمیوں کا تعارف کرایا ہے اور اس بات کی بھی وضاحت کی ہے کہ اکیڈمیوں کی تجاویز جو اجتماعی طور پر پاس ہوتی ہیں ، انھیں اجماعِ امت کا مصداق نہیں کہا جا سکتا ، البتہ اجتماعی کاوش، مسئلے کے اجتماعی حل کے لیے روشن راستہ کہا جا سکتا ہے ، تاکہ دارالافتاء کے مفتیانِ کرام اس کو سامنے رکھ کر مسائل کے حل کو سوچ سکیں پھر اسی باب میں صفحہ 177 سے 268 تک یعنی تقریبا 90 صفحہ صفحات میں ان شخصیات کا تعارف کرایا گیا ہے ، جن کا ذکر کتاب میں موجود ہے ، یہ تعارفی صفحات موضوعِ بحث سے خارج ہیں ، لیکن وہ کتاب کا حصہ ہیں ۔

کتاب کی خوبی یہ ہے کہ جو بات بھی لکھی گئی ہے دلیل سے لکھی گئی ہے اور اعتدال کی کی لگام کو ہاتھ سے نہیں چھوڑا گیا ہے ۔

راقمِ حروف کو کتاب پسند آئی متعدد اکابر دیوبند نے بحث پر اطمینان کا اظہار کیا ہے ۔ قارئین خود بھی اسے پڑھ کر اس موضوع کے لیے استفادہ کر سکتے ہیں ۔

مصنف کتاب دارالعلوم دیوبند کے مایہ ناز فاضل ہیں اردو اور عربی دونوں زبانوں پر انہیں قدرت حاصل ہے ، اب تک دس کتابیں شائع ہو کر قارئین کے ہاتھوں میں پہنچ چکی ہیں ، انہوں نے دار العلوم دیوبند سے فراغت کے بعد پہلے دارالعلوم سبیل السلام حیدراباد میں سات سال تدریسی خدمت انجام دی پھر دو سال کیرالہ میں رہے ۔ اب 2010  سے امریکہ کے ایک ادارے میں "استادِ حدیث اور صدر مفتی” کی حیثیت سے دینی خدمات انجام دے رہے ہیں . موصوف کو اللہ تعالی نے لکھنے کا اچھا سلیقہ عطا فرمایا ہے ، قارئین ی اس تصنيف میں بھی اپنی نگاہوں سے ملاحظہ فرمائیں گے۔ اللہ تعالی موصوف کو زیادہ سے زیادہ دین کی خدمت کی توفیق بخشیں اور قبولیت عطا فرمائیں !

صفدر امام قادری کی شخصیت اردو کے علمی وادبی حلقوں میں نمایاں حیثیت رکھتی ہے۔ایک ماہر استاد کے طور پر بھی وہ اپنی منفردشناخت رکھتے ہیں۔نئی نسل کے ذہنی اور فکری ارتقا میں ان کی مساعی جمیلہ کا اعتراف ضروری ہے۔ تنقیدی وتبصراتی مضامین، کالم،سفرنامے، خاکے اور شخصی تاثرات پر مشتمل اب تک اُن کی تین درجن سے زائد کتابیں منظر عام پر آچکی ہیں۔

ظفر کمالی اردو کے مشہور شاعر، ادیب، نقاد اور محقق ہیں، ادب اطفال کے حوالے سے بھی ان کو جانا پہچانا جاتا ہے۔2022ء میں ادب اطفال کے لئے انہیں ساہتیہ اکادمی ایوارڈ سے نوازا گیا۔ ظفر کمالی کی تازہ کتاب’’صفدر امام قادری: شخصی نقوش‘‘،صفدر صاحب کی شخصیت، علمی وادبی خدمات اور ان کی زندگی کے نشیب وفراز کا احاطہ کرنے کی ایک کامیاب کوشش ہے۔صفدر امام قادری سے ظفر کمالی کی والہانہ محبت کا اظہار فلیپ پر موجود اُن رباعیوں سے بھی ہوتا ہے جو صفدر امام قادری کے لیے انھو ںنے لکھی ہیں۔

608؍ صفحات پر مشتمل اس کتاب سے قبل ظفر کمالی نے صفدامام قادری کی تنقیدی و تدریسی خدمات پر 125؍رباعیات کہیں اور انھیں ’’سوغات‘‘ کے نام سے کتابی شکل میں شائع کیاتھا۔ ’سوغات‘محض 72؍صفحات پر مشتمل کتاب ہے، بلکہ اسے ’صفدر نامہ‘ کہنا زیادہ مناسب ہوگا۔ ’سوغات‘ سے دو رباعیاں پیش خدمت ہیں:

صفدرؔ کا مکاں ہے کہ ہے کاشانۂ علم

لوگ اُس کو سمجھتے ہیں مے خانۂ علم

ہر وقت وہاں رہتی ہے پیاسوں کی بھیڑ

دن رات چھلکتا ہے پیمانۂ علم

٭

دیکھی ہیں ظفرؔ اُس نے غضب کی جنگیں

جھیلی ہیں حَسَب اور نَسَب کی جنگیں

اُن جنگوں سے اس نے یہ سلیقہ سیکھا

لڑتا ہے خموشی سے ادب کی جنگیں

ظفر کمالی نے ’سوغات‘ میں صفدر امام قادری کی شخصیت کے نمایاں پہلوؤں پر رباعیاں پیش کی ہیں۔

پیش نظر کتاب ’’صفدر امام قادری: شخصی نقوش‘‘کی ابتداء میں عرض مرتب تحریر کرنے کے بعد ظفر کمالی نے’’کچھ بیاں اپنا‘‘ کے عنوان کے تحت صفدر امام قادری کے دو سوانحی نوعیت کے مضامین کتاب میں شامل کئے ہیں،جن کے مطالعہ سے ان کی تعلیمی، تدریسی، ادبی اور تصنیفی زندگی کے بارے میں پتا چلتا ہے، مزید صفدر امام قادری کی شخصیت پر تحریر کئے گئے چار خاکے بھی کتاب میں شامل ہیں۔ ظفر کمالی نے اس کتاب میں متعدد شہ سرخی کے ذیل میں صفدر امام قادری کی شخصیت اور فن کے حوالے سے اردو کے اہم ادیبوں، نقادوں اور ان کے شاگردوں کے کم وبیش چالیس مضامین شامل کئے ہیں نیز صفدر امام قادری کے دو انٹرویو اور ظفر کمالی کے نام صفدر امام قادری کے 54؍ خطوط بھی کتاب کا حصہ ہیں، جن سے قاری پر صفدر امام قادری کی شخصیت اور زندگی سے متعلق نئے انکشافات سامنے آتے ہیں۔ کتاب میں عبدالوہاب قاسمی کا صفدر امام قادری کی تصنیفات وتالیفات سے متعلق ایک تفصیلی تعارف بھی شامل ہے جو ان کے ادبی اور علمی کاموں سے قاری کو متعارف کراتا ہے۔ آخر میں نوشاد احمد کریمی اور امان ذخیری نے صفدرصاحب کو منظوم خراج تحسین بھی پیش کیا ہے۔

صفدر امام قادری کے علمی وادبی سرمایہ اور تنقیدی وتحقیقی کاوشوں سے متعلق بھی ظفر کمالی نے اہم کام کیا ہے۔’’ صفدر امام قادری فکری وفنی زوایے‘‘ کے عنوان سے ظفر کمالی کی تازہ تصنیف گزشتہ برس 2024ء میں منظر عام پر آئی ہے، جس میں صفدر امام قادری کی علمی، ادبی تنقیدی اور تحقیقی خدمات کا مکمل احاطہ کیا گیا ہے۔ 640؍ صفحات پر مشتمل اس کتاب میں ظفر کمالی نے عرض مرتب کے عنوان سے صفدر امام قدری کی کتابوں پر اجمالی گفتگواور ان کے تحریری اسلوب وانداز بیان پر کلام کرتے ہوئے ایک بھرپور مقدمہ کے ساتھ صفدر امام قادری کی تمام تصنیفات پر متعدد اہل علم وادب کے تبصروں اور مضامین کو نہایت جستجو کے بعد جمع کیا ہے، کتاب کا انتساب صفدر امام قادری کے والد محترم کے نام ان الفاظ میں ہے:

’’صفدر امام قادری کے والد بزرگوار، ادیب اور شاعر مجھے سے بے پناہ شفقت رکھنے والے بزرگ مرحوم اشرف قادری کے نام۔‘‘

عرض مرتب کے بعد اولاً غضنفر کا ایک مقالہ’’صفدر امام قادری: یہی اک شہر میں ایسا بچا ہے‘‘ کے عنوان سے شامل ہے جس میں غضنفر نے صفدر امام قادری کی تنقیدی نظر اور تنقید نگاری پر مفصل روشنی ڈالی ہے۔ پیش نظر کتاب میں اردو کے نئے اور پرانے لکھنے والوں کے مضامین شامل ہیں۔ صفدر امام قادری کی کتاب’’صلاح الدین پرویز کا آئڈینٹٹی کارڈ‘‘ پر یوسف ناظم، فاروق احمد صدیقی، عطا عابدی، نسیم احمد نسیم کی چارتحریریں شامل ہیں، ’’اردو زبان وادب کی مختصر تاریخ‘‘، ’’سید محمد حسن‘‘،’’مشاہدات‘‘،’’روشن ہے ریگزار‘‘،’’یہ زمین کچھ کم ہے،’’سرپٹ گھوڑا‘‘ اور’’ظفر کمالی: شخصیت اور فنی جہتیں‘‘ پر ایک ایک تحریر کو جگہ دی ہے۔ ’’نئی پرانی کتابیں‘‘ صفدر امام قادری کی وہ پہلی تصنیف ہے جس سے انہیں قبول عام حاصل ہوا۔الفیہ نوری نے اسے مرتب کیا ہے۔کتاب میں 22؍تبصرے شامل ہیں۔ فن نقد وتبصرہ پر صفدر امام قادری کو مکمل عبور حاصل ہے۔ ان تبصروں میں ان کی تنقیدی ذہانت جھلکتی ہے۔ مذکورہ کتاب پر مختلف اہم شخصیات کے ایک درجن تبصرے مرتب نے شامل کئے ہیں۔ اسی طرح’’ذوق مطالعہ‘‘ پر تین مضامین، ’’محمد حسین آزاد کا تنقیدی شعور اور دیگر مضامین‘‘ پر پانچ تحریریں، ’’عہد سرسید کے ادبی وعلمی نقوش‘‘ پر دو تبصرے، ’’عرض داشت‘‘ پر آٹھ تحریریں شامل ہیں۔’’جانے پہچانے لوگ‘‘سے متعلق بارہ تحریریں ہیں جس میں انیس الرحمان، غضنفر، اقبال حسن آزاد، سلمان عبد الصمد وغیرہ کے تبصرے شامل ہیں۔’’بنگلہ دیش کو میں نے دیکھا‘‘ پر جاوید دانش، علی احمد فاطمی، محمد ذاکر حسین کے علاوہ چھ تبصرے شامل کتاب ہیں۔ ’’میرے والدین‘‘ پر مفتی ثناء الہدی قاسمی اور افشاں بانو کے تبصرے، ’’صحافت: دو صدی کا احتساب‘‘سے متعلق تسلیم عارف، محمد ولی اللہ قادری کی دو تحریریں نیز صفدر امام قادری کی کتاب ’’کچھ اور مضامین‘‘ پر غزال ضیغم، شہاب اعظمی اور مقصود دانش کی تحریروں کے علاوہ تین مزید تبصرے پڑھنے کو ملتے ہیں۔

پیش نظر دونوں کتابوں کی اشاعت سے صفدر امام قادری کے علمی، ادبی اور تنقیدی سرمایہ کی ایک مکمل تصویر ابھر کر قاری کے سامنے آجاتی ہے، صفدر امام قادری کی شخصیت، فکر وفن کے حوالے سے ظفر کمالی کی یہ دونوں کتابیں امید ہے اردو کے ادبی حلقوں میں قدر کی نگاہ سے دیکھی جائے گی۔

پروفیسر عتیق اللہ کی اصل شناخت بین العلومی نقاد کے طور پر ہوتی ہے، لیکن وہ اعلیٰ محقق، عمدہ شاعر ، اچھے ڈراما نگار، عمدہ خاکہ نگار اور بہترین مترجم کی حیثیت سے بھی پہچانے جاتے ہیں۔ بین العلومی نقاد کے لیے فہم و بصیرت، نئی نئی چیزوں کی دریافت و جستجو،کثرتِ مطالعہ کے ساتھ کثیر المضامین (Several Subject) اور کثیراللسانیت (Multy Language) جیسی صفات سے متصف ہونا ناگزیر ہے۔ عتیق اللہ صاحب کے یہاں یہ ساری خوبیاں موجود ہیں۔ ان کی تقریباً دو درجن کتابیں شائع ہوچکی ہیں۔ تنقیدی کتابوں میں قدر شناسی (1978)، تنقید کا نیا محاورہ (1984)، ادبی اصطلاحات کی وضاحتی فرہنگ (تنقید و تحقیق) ، ترجیحات (2002)، تعصبات(2005)، محمد حسین آزاد ،بیانات (2011)، اسالیب (2015)،مغرب میں تنقید کی روایت (2017)، بین العلومی مطالعات (2018)، بین العلومی تنقید (2019)، شاد عظیم آبادی (2021) ، اردو میں تنقید کی روایت (2024) قابل ذکر ہیں۔ ایک سو غزلیں (1972)، بین کرتا ہوا شہر 1991، عبارت (2011)، تکلم (2016) ان کے شعری مجموعے ہیں۔ ڈارمے پر ایک کتاب پیچھے کوئی ہے (2001) میں شائع ہوچکی ہے۔ پروفیسر عتیق اللہ نے کئی کتابیں ترتیب بھی دی ہیں جن میں دہلی میں اردو نظم آزادی کے بعد (1990) بیسویں صدی میں خواتین اردو ادب 2002، 2008، عہد ناتمام کی شاعرہ: پروین شیر (2011)، تنقید کی جمالیات (10 جلدیں، 2013,2014) شامل ہیں۔
’بیانیہ شناسی کا ایک سبق‘ پروفیسر عتیق اللہ کے مضامین کا مجموعہ ہے۔ اس میں 38 مضامین شامل ہیں۔ اس کتاب کے تقریباً تمام مضامین میں فکشن کی شعریات اور مبادیات کا جو علمی اور معروضی مطالعہ پروفیسر عتیق اللہ نے پیش کیا ہے وہ ان کا وصف خاص ہے۔ عتیق اللہ صاحب تنقید لکھتے وقت تنقید کے جو بھی شرائط ہیں ان کا پاس و لحاظ رکھتے ہیں۔ جس پر بھی وہ تنقید لکھتے ہیں اس کے نقص اور خوبیوں کا مدلل انداز میں بیان کرتے ہیں۔ عتیق اللہ کی تنقیدی خوبیوں کی وضاحت کرتے ہوئے عصر حاضر کے مشہور فکشن نگارخالد جاوید لکھتے ہیں:
’’عتیق اللہ ہمارے عہد کے سب سے اہم نقاد ہیں۔ جدید اور کلاسیکل دونوں ادب کے نئے گوشے ان کی ناقدانہ تحریرو ںکے ذریعے لگاتار اجاگر ہوتے رہے ہیں۔ عتیق اللہ کو اپنے آپ میں ایک تنقیدی دبستان کا نام دیا جاسکتا ہے۔ فکشن پر انھوں نے جو تنقید کی ہے اس کا کوئی رول ماڈل ہمارے پاس پہلے سے موجود نہیں تھا۔ عتیق اللہ کیونکہ خود بھی ایک اعلیٰ پائے کے تخلیق کار ہیں، اس لیے ان کی تحریریں تنقید اور تخلیق دونوں کے درمیان کی خلیج کو پاٹتی ہوئی نظر آتی ہیں یعنی جہاں فکشن پر ان کی تنقید فن پارے کی ادبی تفہم کا فریضہ ادا کرتی ہے، وہیں یہ تنقید فکشن لکھنے کے نئے نئے راستے بھی پیدا کرتی ہے۔ مابعد جدیدیت کے حوالے سے ادبی تھیوری کو جس طرح اردو میں انھوں نے مروج کیا ہے، وہ کوئی اور نہیں کرسکا اور تھیوری کا اطلاق جس ذہانت اور بصیرت کے ساتھ فکشن پر ان کی تحریرو ںکے ذریعے ہوتا ہے آیا ہے، اس کی بھی مثال اردو تنقید میں ان سے پہلے نہیں ملتی۔‘‘ (بیانیہ شناسی کا ایک سبق، بیک کور)
’بیانیہ شناسی کا ایک سبق‘ پروفیسرعتیق اللہ کی پہلی کتاب ہے جس میں تمام مضامین فکشن کے حوالے سے شامل ہیں۔ بعض قارئین یہ کتاب دیکھ کر حیرت زدہ ہوسکتے ہیں کہ عتیق اللہ صاحب کا ذوق تو شعر و شاعری کی طرف تھا،مگر انھوں نے ایک الگ راستہ اختیار کرکے فکشن کو اپنے ذوق کی تسکین کا وسیلہ بنایا۔ اس بارے میں عتیق اللہ صاحب خود ہی لکھتے ہیں:
’’ایک مرتبہ میرے عزیز دوست ابن کنول مرحوم نے مجھ سے یہ سوال کیا تھا کہ ایک شاعر ہونے کے باوصف فکشن سے آپ کی دلچسپی کیسے ہوگئی۔ میرے لیے یہ سوال چونکانے والا تھا کیونکہ میں نے کبھی یہ سوچا نہیں تھا کہ یہ شعرفہمی کا جو مادہ مجھ میں ہے اور مجھے بھی شدبد ہے کہ شعر کہاں جادو کی طرح حواس پر تن جاتا ہے اور ایک ایسا جہان ہمارے سامنے خلق کردیتا ہے جہاں ہر شے اجنبی اور انوکھی محسوس ہوتی ہے۔ حیرت خیزی کا جو چشمہ شاعری میں پھوٹتا ہ وہ ہمیں شارے این و آں سے منقطع کردیتا ہے۔ اس کا مطلب قطعی یہ نہیں ہے کہ فکشن میں ہم ایسے جہانوں سے نہیں گزرتے، دراصل فکشن میں جب اس طرح کی شعری قوت مضمر ہوتی ہے تو شاعری اور فکشن میں کوئی تفریق نہیں ہوتی۔‘‘ (بیانیہ شناسی کا ایک سبق، ص 13)
عموماً کوئی بھی تنقید نگار خود کو کسی دائرے میں محصور نہیں رکھنا چاہتا ہے۔ سارے اصناف اس کے لیے یکساں ہیں، یہ اور بات کہ کوئی نہ کوئی صنف اس کے لیے محبوب ہوتی ہے۔ ہر صنف کے اپنے اپنے تقاضے ہوتے ہیں۔شاعری کا کمال یہ ہے کہ وہ قاری کے ذہن و دل پر جادو کی طرح اثر کرتی ہے ، اور ایک ایسی لامتناہی دنیا خلق کرتی ہے جہاں ہر شے اجنبی سی محسوس ہوتی ہے۔ ایسا نہیں ہے کہ فکشن میں جادو اور کشش نہیں ہے۔ فکشن کی بھی بہت ساری خوبیاں ہیں۔ شاعری کی طرح فکشن بھی قاری کو کوئی مثبت علم فراہم نہیں کرتامگر معلومات میں اضافہ ضرور کرتا ہے۔ بیشتر کا ماننا ہے کہ زندگی کی حیرت خیزیوں کو پیش کرنے کی جو عمدہ صلاحیت ناول میں ہے وہ دیگر کسی اور صنف میں نہیں ہے۔
’بیانیہ شناسی کا ایک سبق‘ کا پہلا مضمون ’بیانیہ شناسی کا ایک سبق: بیانات‘ بہت اہم مضمون ہے۔ اس مضمون کے ذریعے عتیق اللہ صاحب نے لفظ ’بیانیہ‘ کو بہت واضح اور مدلل اندازمیں پیش کیا ہے۔ بیانیہ کے معانی و مفاہیم اور اس کی اہمیت و افادیت کے حوالے سے مغربی مفکرین کے آرا کا بھی بالتفصیل ذکر ہے۔ دراصل بیانیہ یا بیانات، ساختیات کی ایک شاخ ہے۔ زمانۂ حال میں اس کا دائرہ مزید وسیع ہوچکا ہے۔ بیانات کی وضاحت کرتے ہوئے عتیق اللہ صاحب لکھتے ہیں: ’’بیانات سے متعلق متنوع تھیوریز ہیں اور یہ ضروری نہیں کہ وہ ایک دوسرے کی توثیق کرتی ہوں۔ اختلاف کے بہت سے پہلوؤں کے باوجود بیانیہ فہمی اور بیانیہ شناسی اور ساختیاتی بیانات سے متعلق دائرے کو کسی نہ کسی پہلو سے جن مفکرین نے وسیع کیا ان میں زیوتن تودورف، رولاں بارتھ، ولادیمیر پراپ اور ژرارژینے کی خاص اہمیت ہے۔‘‘
بیانیہ نے ساختیات کے علاوہ لسانی تھیوری سے بہت سی اصطلاحیں اخذ کی ہیں۔ بیانیے میں ایک یا اس سے زائد حقیقی یا افسانوی یا فرضی واقعات کو کبھی اجمال تو کبھی تفصیل کے ساتھ بیان کیا جاتا ہے۔ پرانے صحیفوں جیسے اساطیری، انجیلی قصص اور لوک رزمیوں، رومان پاروں، اطالوی Novellas، جدید ناول اور مختصر افسانوں کا شمار بھی بیانیوں میں ہوتا ہے۔ کبھی کبھار کسی بیانیہ میں مصنف بغیر اپنی شناخت ظاہر کیے خود اپنی آواز میں بولتا ہے تو کبھی کبھار یہ رول کسی فرضی کردار کے ذریعے ادا کرایا جاتا ہے۔بیانیہ میں واقعہ یا واقعات کی پیش کش لازمی ہے ورنہ وہ محض تصویر کشی، لفظی منظرکشی یا روئداد ہوکر رہ جائے گی۔
اسی مضمون میں ’بیانیہ‘ اور ’راوی‘ کے مفاہیم اور ان کے مابین فرق کو انھو ںنے بہت واضح اور مدلل انداز میں بیان کیا ہے۔ مثلاً ’راوی‘ کا کردار ڈرامے میں کچھ اور ہوگا اور فکشن میں کچھ ۔ ’کہانی‘ اور ’پلاٹ‘ کے بارے میں بھی قارئین کو مدلل طریقے سے سمجھانے کی عمدہ کوشش کی گئی ہے۔ ’پس باز کشی‘ (Analepsis) او رپیش باز کشی (Prolepsis) سے بھی قارئین کو روشناس کرایا گیا ہے۔ فکشن نگار کے لیے ’حذف و محذوف‘ (Ellipsis)جیسی اصطلاح سے بھی واقف ہونا ضروری ہے۔ اسی طرح ’نقطۂ نظر‘ (Point of View)، ’ماسکہ سازی/ نقۂ ارتکاز سازی‘ (Focalization)، ’مہابیانیہ/ بیانیہ اندر بیانیہ‘ (Metanarative/Grand Narrative)، جیسی اصطلاحات پر بھی عمدہ گفتگو کی گئی ہے۔ آج کے بیشتر فکشن نگار فکشن کے ضروری لوازمات سے نابلد ہوتے ہیں اس لیے ان سے کبھی کبھار فاش غلطیاں سرزد ہوجاتی ہیں۔ اس مضمون میں عتیق اللہ صاحب نے فکشن لکھنے والوں کے جن ضروری اصطلاحات کا ذکر کیا ہے، اس کا علم فکشن نگار کے لیے واقعی بہت اہم ہے۔
دوسرا مضمون ’بیانیہ میں مفروضہ آواز‘ ہے۔ اس مضمون میں اظہار عمل میں لہجہ یا صوتی زیر و بم کے مفاہیم کو بیان کیا گیا ہے۔ بالعموم شاعری اوربالخصوص بیانیہ میں مصنف اپنی آواز کے لیے سوا کسی اور مفروضے کا استعمال کرتا ہے، اس کی عمدہ مثال ’ناٹک‘ ہے جس میں مکھوٹے کا استعمال کیا جاتا ہے۔ اس مضمون میں یہ بھی بیان کیا گیا ہے کہ بیانیہ میں راوی صیغہ واحد میں ہونے کے باوجود لازمی نہیں کہ وہ مصنف ہی ہو۔ہاں خود نوشت اور ذاتی بیاض اس سے مستثنیٰ ہیں۔ اس بابت عتیق اللہ نے کچھ ناول اور ناول نگاروں کا بھی ذکر کیا ہے۔ مثال کے طور پر ’امراؤ جان ادا‘ میں ’رسوا ‘ یعنی بیان کنندہ نے اپنا نام صحیح بتایا ہے اور کسی میں وہ فرضی ہوتا ہے مثلاً انیس اشفاق کے ناول ’خواب سراب‘۔ بہرحال یہ مضمون بھی فکشن کے تعلق سے بہت عمدہ مضمون ہے۔
تیسرا مضمون ’ناول کا فن‘ ہے۔ یہ ایک طویل مضمون ہے جس میں پروفیسر عتیق اللہ نے ناول کے فن اور اس کے جملہ مبادیات کے حوالے سے قرائن و شواہد کے ساتھ گفتگو کی ہے۔ چوتھا مضمون ’اردو ناول: تکنیک اور ہیئت کے تجربے‘ ہے۔ ناول نگاروں کے لیے ’تکنیک‘ اور ’ہیئت ‘ کیوں اور کس حد تک ضروری ہے، اس پر مدلل گفتگو کی گئی ہے۔ ’ناول‘ ، ’طویل افسانے‘ اور ’ناولٹ‘ کے فرق کو بھی واضح انداز میں بیان کیا گیا ہے۔ اس ضمن میں کچھ ناول نگاروں کے نام اور ان کے ناولوں کا ذکر کیا گیا ہے۔ ’پانچواں مضمون ’کہانی کا قصہ‘ ہے۔ اس میں قصہ اور کہانی کی ابتدا کے سلسلے میں بات کی گئی ہے۔ اس بابت مورخین کے مابین اختلافات بھی ہیں۔عتیق اللہ صاحب نے قصہ اور کہانی کے درمیان جو فرق و امتیاز ہے اسے مع دلائل و شواہد بہت عمدہ انداز میں پیشکیا ہے۔ ساتھ ہی قصہ، کہانی اور سامع کے آپسی رشتے کو بھی اجاگر کیا گیا ہے۔ ان کے علاوہ ’کردار: تشخص اور تشکیل‘، ’داستان میں بیانیہ کے تشکیلی مضمرات‘، ’اردو افسانے میں میجک ریلزم اور اس کے آثار کا پس منظر‘ بہت اعلیٰ اور معیاری مضامین ہیں۔ اردو سے دلچسپی رکھنے والے کو اس طرح کے مضامین کا ضرور مطالعہ کرنا چاہیے۔
’پریم چند: اردو فکشن کا ایک مستقل حوالہ‘ میں عتیق اللہ صاحب نے پریم چند کو اپنے انداز میں سمجھنے اور سمجھانے کی کوشش کی ہے۔ انھوں نے لکھا ہے کہ ’’پریم چند کے افسانوں اور ناولوں کے انبوہِ کثیر کو دیکھتے ہوئے ان کی طرف سنجیدگی اور تمام تعصبات سے بلند ہوکر غور و فکر کرنے کی ضرورت ہمیشہ باقی رہے گی۔ پریم چند اردو فکشن کے اہم ترین ستون ہیں۔‘‘ مضمون ’احمد علی اور ان کا افسانہ: موت سے پہلے‘ میں افسانے کے تجزیے کے ساتھ افسانے کو بھی کتاب کا حصہ بنایا گیا ہے۔
’بیانیہ شناسی کا ایک سبق‘ میں سعادت حسن منٹو پر چھ مضامین شامل ہیں، جن میں سیاہ حاشیے جو سرخی مائل زیادہ ہیں، منٹو کو کیوں نہ اس طرح دیکھا جائے، مظفر علی سید کا منٹو، مادھو- منٹو کا ایک کردار، متشدد مشابہت ساز منٹو، منٹو شناسی کا باب کھلا ہے کے نام لیے جاسکتے ہیں۔ فکشن کے باب میں سعادت حسن منٹو کے مقام و مرتبے سے شاید ہی کوئی منکر ہو۔ بڑا ادیب محترم اور محبوب ہونے کے ساتھ نزاع انگیزبھی ہوتا ہے، آئے دن کوئی نہ کوئی متنازعہ مسئلہ درپیش رہتا ہے۔ اس کی عمدہ مثال منٹو تھے۔ ان پر فحش نگاری کا الزام لگا، مقدمات درج کرائے گئے، یہاں تک انھیں جیل بھی جانا پڑا، کیونکہ انھوں نے اپنے افسانوں میں سماج کے ان پوشیدہ حقائق کو بھی بیان کیا، جس سے بہت سے سفید پوش بے نقاب ہوگئے۔ ایک بار تو جج نے بھی یہ فیصلہ سنا دیا کہ ’’منٹو کو اپنی کہانیوں میں سماج کی اصل حقیقت کو پیش کرنے سے گریز کرنا چاہیے۔‘‘ یہی وجہ ہے کہ کچھ سرپھرے ان پر لعن طعن کرنے سے بھی پیچھے نہیں رہے۔ مگر منٹو کے بیانیے کا انداز اس قدر عمدہ ہے کہ قاری ان کے افسانوں کو پڑھ کر عش عش کرنے کے ساتھ غور و فکر کرنے پر بھی مجبور ہوجاتا ہے۔
’سیاہ حاشیے جو سرخی مائل زیادہ ہیں‘ منٹو کے حوالے سے اس کتاب کا پہلا مضمون ہے ۔ ’سیاہ حاشیے‘ منٹو کے افسانچوں کا مجموعہ ہے جو پہلی بار 1948 میں شائع ہوا۔ سعادت حسن منٹو کے اس مجموعے کا انتساب ایک بے نام قاتل کے نام ہے، جس سے اچانک ایک دن ملاقات ہوجاتی ہے، دوران گفتگو وہ کہتا ہے ’’جب میں نے ایک بڑھیا کو مارا تو مجھے ایسا لگا مجھ سے قتل ہوگیا ہے۔‘‘ یہاں خیالی واقعے کوبروئے کار لایا گیا ہے۔ حقیقی صداقت بھی ایک بھرم ہی ہے۔ اسی لیے فکشن نگار نے صیغۂ ماضی میں اس واقعے کو بیانیہ پیرائے میں کہانی کا روپ دیا ہے۔ اس مجموعے کی زیادہ تر کہانیوں میں منٹو کے فن کا آرٹ نمایاں ہے۔ کئی کہانیاں ایسی ہیں جنھیں ایک بار نہیں کئی کئی بار پڑھنے پر بھی مسئلہ صاف نہیں ہوپاتا۔ منٹو کے افسانوں میں جو ابہام پیدا ہوتا ہے وہ محض اس بنا پر کہ قاری زمان و مکاں کا تعین نہیں کرپاتا۔ اسی لیے منٹو کی کہانیوں کو سمجھنے کے لیے قاری کا حساس ہونا ضروری ہے۔ اس مضمون میں پروفیسر عتیق اللہ منٹو کے کچھ ایسے ناقدین پر نے سوالات کھڑے کیے ہیں جنھوں نے ان کے فن کی گہرائیوں تک پہنچے بغیر اچھے یا برے کا فیصلہ کرلیا۔ جلدبازی میں کوئی فیصلہ کسی بھی فنکار اور ان کی تخلیقات کے لیے بہت مضر ثابت ہوتا ہے۔
دوسرا مضمون ہے ’منٹو کو کیوں نہ اس طرح دیکھا جائے‘ یہ بہت اہم مضمون ہے۔ پروفیسر عتیق اللہ نے منٹو کو اپنے انداز سے سمجھنے اور سمجھانے کی کوشش کی ہے۔ اس مضمون میں منٹو کے معاصرین اور کچھ ان سے پہلے یا بعد کے افسانہ نگاروں کا آپسی تقابل کو بھی پیش کیا ہے اور کچھ منٹو کے ناقدین پر اپنی ناراضگی کا اظہار بھی کیا ہے کہ انھوں نے بغیر منٹو کو پڑھے اور سمجھے ہی ان پر اپنی رائے پیش کردی۔ یہ سچ ہے کہ اچھے ناقدین سبھوں کو نصیب نہیں ہوتے ہیں۔ بعض کو تو ان کی زندگی میں ہی اچھے ناقدین مل جاتے ہیں مگر بعض کو ان کی موت کے کئی برسوں بعد تک نہیں مل پاتے۔ شاید منٹو کے ساتھ بھی یہی معاملہ ہے۔ بہرحال پروفیسر عتیق اللہ نے اس مضمون میںمنٹو کی کہانیوں کے مرکزی خیال، واقعات، پلاٹ، کردار، تکنیک وغیرہ کے بارے میں تفصیل کے ساتھ قلمبند کیا ہے۔ انھوں نے منٹو کے افسانوں کے کئی کرداروں کو بہت اچھے انداز میں قاری کے سامنے پیش کرنے کی کوشش کی ہے۔ پروفیسر عتیق اللہ نے منٹو کے بیانیہ اور کرداروں کے تعلق سے لکھا ہے کہ:
’’منٹو کے بیانیہ کی ایک بڑی خوبی یہ بھی ہے کہ مقبول عام فنی اوضاع یا فنی تدابیر کو فنی تدابیر کے طور پر وہ کہیں نہیں آزماتا اور نہ ان سے وہ کہیں پیش روی کاکام لیتا ہے۔ زندگی خود اس کے یہاں ایک مستقل آئرنی، ایک مستقل استبعادی حقیقت Paradoxical reality کا تاثر فراہم کرتی ہے جس کا سارا پیش و پس تضادات و تناقضات سے معمور ہے (موذیل، ممدبھائی، باپو گوپی ناتھ، فرشتہ، ٹیٹوال کا کتا، ٹوٹو) کوئی ایک تاثر، کوئی ایک واقعہ، کوئی ایک کیفیت، کوئی ایک صدمہ، کوئی ایک واردات اس کے افسانے کے مرکز میں ہوتی ہے اور جو ہمیں افسانے کے نفسیاتی تجزیے کے لیے بھی اکساتی ہے۔ (باسط، ہتک، نعرہ، خالی بوتلیں خالی ڈبّے، بلاؤز، دھواں، میرا نام رادھا ہے، مسٹر معین الرحمن، کتے کی دعا) اکثر واقعہ اور کردار میں سے یہ طے کرنا مشکل ہوتا ہے کہ کہانی کی بساط میں بیان کنندہ کا قصد کسے ایک خاص شناخت یا مرکزی جو ہر طور پر نمایاں کرنا تھا (موذیل، بو، دوداپہلوان، ٹوبہ ٹیک سنگھ، دس روپے، خوشیا،)۔ واقعے یا واقعے کو اس بساط میں رونما کرنے کی وہ شکل جو نعرہ یا ’ہتک‘ یا ’کالی شلوار‘ میں نظر آتی ہے۔ بابو گوپی ناتھ، نیا قانون، ٹیٹوال کا کتا یا ٹوبہ ٹیک سنگھ میں نوعیت کے اعتبار سے بالکل مختلف ہے۔ حتیٰ کہ ’کھول دو‘ میں بھی افسانے کا بیش تر حصہ فضابندی کا تاثر فراہم کرتا ہے۔ منٹو واقعے کے بیان ہی کو اہمیت نہیں دیتا۔ اس کا موقف اسے ہوتے ہوئے دکھانا بھی ہوتا ہے۔ ‘‘(بیانیہ شناسی کا ایک سبق، ص 193)
آگے مزید لکھتے ہیں:
’’منٹو کی بہترین کہانیوں کی ایک سطح وہ ہے جو کسی ایک خاص Reader communityکے لیے نہیں ہے۔ وہ سب کے لیے ہے۔ دوسری سطح وہ ہے جو گہری سوجھ بوجھ کا تقاضہ کرتی ہے اور ہمارے ذہنوں کو ان سیاسی، اقتصادی، اخلاقی، نفسیاتی اور سیاسی اجبار اور محرکات کی طرف متوجہ کرتی ہے جنھیں منٹو نے ’ان کہا‘ Unsaid چھوڑ دیا تھا۔ فرشتہ، خالی بوتلیں خالی ڈبّے، ننگی آوازیں، سرکنڈوں کے پیچھے، جانکی، بو، دھواں، ہتک، نعرہ، بابو گوپی ناتھ کے علاوہ ایسی کئی کہانیاں ہیں جنھیں جتنی بار پڑھا جائے ہر بار کسی ایک نئے معنی کی گرہ ہم پر کھُلتی ہے۔‘‘ (ایضاً، ص 200)
تیسرا مضمون ہے ’مظفر علی سید کا منٹو‘۔ جیسا کہ نام سے ہی ظاہر ہے کہ اس مضمون میں منٹو کو سمجھنے کا تقابلی مطالعہ پیش کیا ہے۔ اکثر ناقدین نے منٹو کے افسانوں میںابہام کی جو بات کہی ہے، اس سے ممتاز شیریں اختلاف کرتے ہوئی کہتی ہیں:
’’منٹو کے افسانوں میں کوئی ابہام نہیں، نہ کوئی پوشیدہ اشارے ہیں۔ نہ کوئی پوشیدہ گتھیاں ہیں کہ ان کے سلجھانے میں دقت محسوس ہو۔ وقت کے ساتھ ساتھ نئی تشریحیں اور تفسیر یں ہوں، تہہ در تہہ معانی نکالے جائیں۔ یہ صاف کھلی سیدھی اور براہِ راست نوعیت کی تحریریں ہیں ، جن کا پیغام واضح ہے۔‘‘ (ایضاً، ص 204)
مگر مظفر علی سید ممتاز شیریں سے اختلاف کرتے ہوئے نظرا ٓتے ہیں۔ اس بابت وہ لکھتے ہیں:
’’منٹو اتنا واضح اور اتنا دو ٹوک نہیں ہے کہ آن کی آن میں اپنے آپ کو دوسروں پر عیاں کر کے طمانیت کے نشے میں سرشار ہو جائے۔ منٹو تو مستقل ڈسڑب کرنے کا نام ہے…منٹو نے نام نہاد مہذب و مقطع حضرات سے لے کر یونی ورسٹیوں کے اساتذہ اور عدلیہ کے اربابِ حل و عقد کو جس طور پر ڈسڑب کیا ، اس کی نوعیت اور فکشن کے قاری میں Disturbanceکی نوعیت میں بڑا فرق ہے۔ ‘‘ (ایضاً، ص 205)
پروفیسر عتیق اللہ نے اس مضمون میں لکھا ہے کہ آج وقت ہے منٹو کو صحیح طور پر سمجھنے اور سمجھانے کی۔ حیرت کی بات تو یہ ہے کہ کئی ایسی یونیورسٹیاں بھی ہیں جہاں منٹو کے چند افسانوں کو چھوڑ کر نصاب میں بھی شامل کرنے سے گریز کیا جاتا ہے، محض اس بنا پر کہ ان کی فحش نگاری عام ہے۔ اس ضمن میں عتیق اللہ لکھتے ہیں:
’’… یہ ضرور ہے کہ ہمارے اکثر فکشن کے سیمیناروں میں منٹو کا نام بڑے افتخار سے لیا جاتا ہے بلکہ اردو معاشرے کے لیے وہ ایک Status symbol کا حکم رکھتا ہے۔ بالخصوص ہندوستان میں تواب یہ خیال جڑ پکڑتا جا رہا ہے کہ ہماری کوئی بھی زبان نہ تو غالب جیسا شاعر پید ا کر سکی ہے اور نہ منٹو جیسا کہانی کا ر۔ لیکن آئرنی (Irony) یہ کہ یہ آوازیں جامعات کے اس تعلیمی ماحول میں بھی بلند ہوتی ہیں جہاں منٹو کا داخلہ ممنوع ہے۔ اگر کسی دباؤ کے تحت اسے شامل کر بھی لیا جاتا ہے تو بات نیا قانون اور ٹوبہ ٹیک سنگھ سے آگے نہیں بڑھتی۔ ‘‘ (ایضاً، ص 205-206)
چوتھا مضمون ہے ’مادھو— منٹو کا ایک کردار‘۔ منٹو کے افسانوں کے کرداروں میں مادھو اور سوگندھی کا نمایاں طور پر نام لیا جاتا ہے۔ سماج میں ’سوگندھی ‘ ایک طوائف ہوتے ہوئے بھی اپنے اصول و نظریات، ایمانداری اور ایثار و قربانی کے لیے مشہور ہے۔ اس کے برعکس مادھو پولس محکمے میں ملازم ہوتے ہوئے بھی اپنی ریاکاری، عیاری، مکاری، جھوٹ، فریب وغیرہ کی وجہ سے جانا پہچانا جاتا ہے۔ مصنف اس حوالے سے لکھتے ہیں:
’’مادھو نے اپنی حوالداری میں بڑے داؤ بیچ سیکھ رکھے تھے۔ اس نے اپنے ماحول میں جھوٹ اور سچ کے مابین محض باریک سے فصل کو محسوس کیا تھا۔ آن کی آن میں سچ کو جھوٹ اور جھوٹ کو سچ بنانے کے رنگ ڈھنگ دیکھے تھے۔ وہ بھی جانتا تھا کہ ان مہذب غاصبوں اور جرائم منٹو کے کردار محض کردار نہیں ایسے افراد ہیں جو اپنی فطرت کے اسیر ہیں۔ وہ انسان ہیں اور حقیقی انسان ہیں۔ ماحول کا دباؤ ان پر شدید ہے لیکن ان سب سے جدا وہ زندگی کو دیکھنے اور سمجھنے کا ایک مختلف اندازِ نظر بھی رکھتے ہیں۔ ‘‘ (ایضاً، ص 218-219)
بہرحال پروفیسر عتیق اللہ نے اس مضمون میں جس طرح سے ان دونوں کرداروں کو مختلف اوقات و حالات میں ان کی خوبیوں اور خامیوں کو اجاگر کیا ہے وہ قابل ستائش ہے۔
آخری مضمون ہے ’متشدد مشابہت ساز منٹو‘۔ اس مضمون میں عتیق اللہ صاحب نے منٹو کے افسانوں کی خوبیوں کو بیان کرتے ہوئے لکھا ہے کہ منٹو سے زیادہ متشدد تشبیہات کسی اور کے یہاں نہیں ملتیں۔ منٹو نے تقریباً ہر افسانے میں نئی نئی تشبیہات ایجاد کی ہیں جس کی وجہ سے ان کے افسانے کا کوئی بھی منظر حقیقت سے زیادہ قریب ہوتا ہے۔ کبھی کبھی منٹو سماج کی پوشیدہ حقیقتوں کے اظہار کے لیے تلخیِ زبان سے بھی گریز نہیں کرتے۔ ایک جگہ منٹو لکھتے ہیں:
’’ایک دن اسی کی سہیلی آئی— پاکستان میل موٹر نمبر 9612 پی ایل۔ بڑی گرمی تھی۔ ڈیڈی پہاڑ پر تھے۔ ممی سیر کرنے گئی ہوئی تھیں— پسینے چھوٹ رہے تھے۔ اس نے کمرے میں داخل ہوتے ہی اپنا بلاؤز اتارا اور پنکھے کے نیچے کھڑی ہوگئی…‘‘ (افسانہ پھندے، ص 225-226)
مجھے امید ہے کہ جیسے جیسے وقت گزرتا جائے گا، منٹو کے افسانوں کی تفہیم کا سلسلہ مزید آگے بڑھے گا اور اس سے منٹو اور اس کے افسانوں کو سمجھنے کے نئے نئے راستے وا ہوں گے۔
ان مضامین کے علاوہ عتیق اللہ صاحب نے راجندر سنگھ بیدی کے افسانوں میں نامانوس علاحدگیوں اور رفاقتوں کا تناؤ، ستیارتھی کی یادوں سے ایک مکالمہ، قرۃ العین حیدر کے افسانوں کی دنیائے حیرت خیز، جوگندرپال، کے ناول ’خواب رو‘ میں آئرنی کی نوعیت، ’نادید‘ ایک علامتی رزمیہ، نیر مسعود،کی افسانوی واہمہ سازی، انور سجاد کا ’خوشیوں کا باغ‘، ’موجِ ہوا پیچاں‘ ناول یا ناول کا محض امکان، فکشن کی تنقید اور ’کئی چاند تھے سرآسماں‘، آخری سواریاں: جس کی اپنی سریت اپنی مابعدالطبیعیات ہے، چینی کوٹھی اور ا سکی مخاطباتی منصوبہ بندی، ’دھمک‘ طاقت کے جبر کا اعلامیہ، موت یا زندگی کی کتاب، خواب، سراب، خواب، ایک پاگل تخلیقی فنکار کا پاگل بنانے والا ناول ’اس نے کہا تھا‘، شیموئل احمد کا گزرگاہ ’گرداب’، اللہ میاں کا کارحانہ ساخت اندر ساخت مطالعہ، ناول میں مضمناتی ساخت کے تقاضے اور ’چاند ہم سے باتیں کرتا ہے‘، خالد جاوید جو بار بار مرتا ہے بار بار پیدا ہوتا ہے ،اشعر نجمی آخر کیا چیز ہے، فلسفی، شاعر یا ناول نگار، ہیمنگ وے کا افسانہ بارش اور بلی، کہانی نامہ: بعد از آزادی بھی بہت اہم مضامین ہیں جنھیں قارئین کو اپنے مطالعے کا حصہ ضرور بنانا چاہیے۔
مشہور ناقد، محقق، شاعر، مترجمہ اور ناول نگار شمس الرحمن فاروقی کے ناول’فکشن کی تنقید اور کئی چاند تھے سر آسماں‘ پر گفتگو اس لیے بھی ضروری ہے کہ اس کا بیانیہ مروجہ ناول سے الگ ہے۔ یہاں تک کہ ناول کی زبان، تکنیک اور پلاٹ میں بھی مروجہ اصولوں سے انحراف کیا گیا ہے۔ البتہ اس ناول کے کردار اور واقعات قاری کو ’آگ کا دریا‘ کی دوسری کڑی ماننے پر مجبور کردیتے ہیں۔ اس ناول کے مطالعے کے دوران قاضی عبدالستار کے ناولوں کے کردار بھی سامنے آنے لگتے ہیں۔ فاروقی صاحب ایک جینوئن تخلیق کار ہیں۔ اس ناول میں انھوں نے اپنے کمال ہنر کا خوبصورت نمونہ پیش کیا ہے۔ بعض ناقدین اسے ناول کے بجائے داستان اور تاریخی واقعہ کا نام دیتے ہیں۔ ایسے ناقدین شاید ناول کی قرأت کے بجائے فاروقی صاحب کے اس جملے پر ہی عمل کرنے لگ جاتے ہیں کہ ’’یہ تاریخی ناول‘ نہیں ہے۔ اسے اٹھارویں، انیسویں صدی کی ہند اسلامی تہذیب اور انسانی اور تہذیبی سروکاروں کا مرقع سمجھ کر پڑھا جائے تو بہتر ہوگا۔‘‘
شاید فاروقی صاحب قاری یا تنقید نگار کو اس جانب توجہ دلانا چاہتے ہیں، کہ قرأت کے دوران ہوش مند رہنا بہت ضروری ہے، بغیر اس کے وہ تنقید لکھتے وقت گمراہ ہوسکتا ہے۔ بعض کتابوں کے متن میں اتنی گہرائی اور گیرائی ہوتی ہے کہ ایک یا دو بار کے مطالعے سے سمجھ میں نہیں آتیں، بار بار مطالعے کا تقاضا کرتی ہیں۔ عتیق اللہ صاحب کی رائے بھی اس ناول کے بارے میں یہی ہے۔ وہ لکھتے ہیں کہ:
’’کئی چاند تھے سر آسماں‘ کو میں نے قریب دو برس پہلے پڑھا تھا اور ایک بک لیٹ میں نوٹس لے لیے تھے۔ ناول میں بھی پینسل سے جگہ جگہ نشاندہی کی تھی اور تھوڑی بہت حاشیہ آرائی بھی۔ لیکن اب یہ تمام چیزیں کتابوں کے انبار میں اس طرح دبی ہوئی ہیں کہ تلاش کرنے میں کافی وقت ضائع ہوگیا۔ عزیزی سرورالہدیٰ کا ممنون ہوں کہ انھوں نے اسے فوراً فراہم کردیا اور میری مشکل آسان کردی۔ مجھے تو یہ بھی یاد نہیں تھا کہ پہلی قرأت کا تجربہ کیا تھا۔ بس اتنا یاد رہا کہ پڑھنے سے پہلے (کہ یہ فاروقی کا ناول ہے) پڑھنے کے دوران (کہ ناول مجھے چھوڑ نہیں رہا تھا) اورپڑھنے کے بعد میں گہرے استغراق میں چلا گیا تھا۔ پورے دس دنوں میں ناول پورا ہوا… اس دوران میں انجانی اور انہونی کیفیتوں سے باہر نہیں نکل سکا… اب جبکہ دوسری بار اسے پڑھنے کی ضرورت پیش آئی تو چیزیں آہستہ آہستہ دوبارہ منکشف ہونے لگیں۔ اس ناول کے قاری کو اسے محض فکشن کے طور پر پڑھنا چاہیے۔ وہ اگر فکشن کا باقاعدہ قاری نہیں ہے اور ناول نگار کی تنقید کی مرعوبیت کا نقش اس پر گہرا ہے تو دوچار صفحات پڑھنے کے بعد ہی یہ فیصلہ کرکے پرے ہٹ جائے گا کہ یہ فکشن کہاں، سچے واقعات اور کرداروں کی بنیاد پر گڑھا ہوا پلاٹ ہے… ‘‘
(ایضاً، ص 318-319)
فکشن میں سچے یا جھوٹے واقعے کو ازسرِ نو خلق کرنے میں ہی فکشن نگار کا کمال سمجھا جاتا ہے۔ اچھے فکشن نگار اپنے تخلیقی جوہر کا عمدہ ثبوت پیش کرتے ہوئے قاری کو قرأت کے لیے مجبور کرتے ہیں۔ ’کئی چاند تھے سرآسماں‘ بھی ایک عمدہ ناول ہے، جس میں ناول کے تقریباً تمام اصولوں کو ملحوظ خاطر رکھا گیا ہے۔ بس ضرورت ہے قاری کو ہوش و خرد سے مطالعہ کرنے کی۔ وہ ناقدین جنھوں نے اس ناول کو ’آگ کا دریا‘ کے مماثل یا قریب سمجھا ہے شاید انھوں نے اس ناول کا ایک نہیں کئی کئی بار مطالعہ کیا ہوگا۔ اس ناول کے بعض کردار تو ایسے ہیں جو قاری کے ذہن و دماغ میں طویل عرصے تک رہیں گے۔ بھلا ’وزیر خانم‘ کا نام کون بھول سکتا ہے۔ عتیق اللہ صاحب اس کردار کے ضمن لکھتے ہیں:
’’وزیرخانم یا من موہنی واقعتاً جیسی تھیں فاروقی کے ماہرانہ لفظی شبیہ سازی کے ہنر سے انھیں ازسر نو خلق کیا ہے بلکہ گڑھا ہے، اسی معنی میں ’کئی چاند تھے سرآسماں‘ کو بھی گڑھا گیا ہے۔ اسی لیے کہا جاتا ہے کہ Novelsare made اور فاروقی کا ناول بلاشبہ اپنے طرز و تکنیک کے اعتبار سے ایک منفرد ترین گڑھا ہوا اور ایک عہد ساز مہابیانیہ meta narrative ہے، جو چھوٹے چھوٹے بیانیوں کے درمیان اپنی ایک الگ ہی ڈھب دکھا رہا ہے۔‘‘ (ایضاً، ص 349)
کسی ناول کی محبوبیت اور مقبولیت کے مختلف زاویے ہوتے ہیں۔اس لیے بہتر ہوگا کہ کسی ناول کے مطالعے کے وقت دوسرے ناول سے موازنہ نہ کیا جائے۔ ہر ناول نگار کا اپنا طرز و اسلوب ہوتا ہے، جسے وہ اپنے انداز سے برتنے کی کوشش کرتا ہے۔
کتاب میں شامل تمام مضامین پر بحث نا ممکن نہیں ہے۔ عتیق اللہ صاحب نے ان مضامین میں تنقید کا جو معیاری اور عمدہ نمونہ پیش کیا ہے، ان پر الگ سے ایک ایک مضمون لکھا جاسکتا ہے۔ میں نے شروعات کے کچھ مضامین، ایک آدھ درمیان سے اور منٹو پر شامل سبھی مضامین کے تعلق سے تعارف پیش کیا ہے تاکہ قارئین کو اس کتاب میں شامل مضامین کی اہمیت و افادیت کے ساتھ انفرادیت کا بھی اندازہ ہوسکے۔ منٹو کے تعلق سے مضامین پر لکھنے کا خیال اس کتاب کے مرتب مشہور فکشن نگار، ڈراما نگار اور منٹو شناس محمد اسلم پرویز کی وجہ سے آیا۔ منٹو کے اہم نقادوں میں ان کا نام بہت احترام سے لیا جاتا ہے۔ منٹو کے ڈراموں کو اسلم صاحب نے اسٹیج پر پیش کیا ہے۔ سعادت حسن منٹو پر ان کی سعادت حسن منٹو- منٹو کے خطوط،سیاہ حاشیے اور حاشیہ آرائیاں جیسی کتابیں بھی منظرعام پر آچکی ہیں۔
محمد اسلم پرویز مبارک باد کے مستحق ہیں کہ انھوں نے اس اہم کتاب کو قاری سے روبرو کرانے کی پہل کی۔ اس کتاب کی افادیت کے پیش نظر محمد اسلم پرویز صاحب رقمطراز ہیں:
’’عتیق اللہ نے فکشن کی تنقید میں کارنامے انجام دیے ہیں، یہ مضامین کیفیتی اور کمیتی اعتبار سے ان کی انفرایت کو ٹھوس صورت میں قائم کرتے ہیں۔ مجھے یقین ہے آنے والے ایام میںاردو افسانے پر تنقیدی و تحقیقی کام کرنے والو ںکے لیے ’بیانیہ کا ایک سبق: بیانات‘ یہ کتاب مشعل راہ ثابت ہوگی۔‘‘(ایضاً، ص 12)
’بیانیہ شناسی کا ایک سبق‘ میں عتیق اللہ صاحب نے تنقید کا ایسا عمدہ اور اعلیٰ نمونہ پیش کیا ہے جو نئے لکھنے والوں کے لیے مشعل راہ ہے۔ کتاب کا مطالعہ سرسری کے بجائے گہرائی سے کرنا زیادہ کارآمد ہوگا۔ مجھے امید ہے کہ فکشن کی تنقید سے دلچسپی رکھنے والے طلبا/طالبات کے علاوہ دیگر قارئین بھی اس سے بھرپور مستفید ہوں گے۔

شعروادب کے میدان میں جوقلم کارنہایت سنجیدگی سے سر گرم عمل ہیں ان میں ایک اہم نام ڈاکٹر عمیر منظر کابھی ہے ۔انھوں نے گذشتہ ایک دہائی کا عرصہ علم و تحقیق کے تئیںجس والہانہ شغف کے ساتھ گزاراہے اس سے ان کی ایک منفرد پہچان بنتی جارہی ہے ۔ وہ ایک فعال اور سرگرم ادبی شخصیت کے طور پر اردو کے ادبی منظر نامہ کا حصہ بن چکے ہیں اورمولانا آزاد نیشنل اردو یونی ورسٹی (لکھنؤ کیمپس )کے تعارف کاایک معتبرذریعہ بنتے جارہے ہیں ۔ سرگرم ادبی کردار خون جگر صرف کیے بغیر ناممکن ہے ۔خوش آیند بات یہ ہے کہ یہ راز انھوں نے پالیا ہے ۔محقق اور شاعر کے طورپر تو وہ جانے ہی جاتے ہیں مگر ان کی تازہ ترین کتاب’’کیسے انھیں بھلائیں ‘‘سے وہ ایک خاکہ نگار کے طورپر سامنے آتے ہیں ۔

چند روز قبل ہی عمیر منظر کے خاکوں کا مجموعہ’کیسے انھیں بھلائیں‘ شائع ہوکر منظر عام پر آیا ہے۔ مجھے شدت سے اس کتاب کا انتظار تھا ۔خیر! کفر ٹوٹا خداخدا کرکے، انتظار کی گھڑیاں ختم ہوئیں اور کتاب ہم تک پہنچ گئی۔ فہرست پرنظر ڈالی تو اندازہ ہوا کہ بیشتر خاکے میرے مطالعے میں رہے ہیں، لیکن آج کتابی شکل میں انھیں دوبارہ پڑھ کر مزید خوش گواری کا احساس ہوا۔

عمیر منظر وسیع المطالعہ ہیں۔ان کی شخصیت اور فن کو نکھارنے میں اس کا اہم کردار ہے۔ان کی تحریروں میںزبان و بیان کی سادگی ، برجستگی، تلخ و شیریں تجربات ، عمیق مشاہدات اور نازک احساسات روزمرّہ کی گفتگو کی طرح درآتے ہیں۔کتاب میں شامل خاکوں کے مطالعہ سے یہ محسوس ہوتا ہے کہ انھوں نے اپنے بڑوں سے فکری طور پر کسبِ فیض کیا ہے اور ان کے نثری فن پاروںکی روشنی میں اپنی تحریروں کو نکھارا ہے۔

عمیر منظر نے جن مختلف شخصیات اور افراد کے خاکے تحریر کیے ہیںان سے کسی نہ کسی طرح سے ان کا تعلق رہا ہے ۔ ایک اچھے خاکہ نگار کی طرح انھوں نے زیر تحریر شخصیت کے خدوخال کو نہ صرف واضح کیا ہے بلکہ بعض خاکوں میں ہم انھیں چلتا پھرتا دیکھ سکتے ہیں ۔ ان سب کے درمیان انھوں نے خود کونمایاں نہیں ہونے دیا ہے۔کتاب میں کل 20؍خاکے شامل ہیں۔ابتدائی چودہ خاکے ان لوگوں پر ہیں جو اب اس دنیا میں نہیں رہے ۔بقیہ خاکے زندوں کے ہیں ۔ایک طرف جہاں انھوں نے مشاہیر علم وادب مولانا ابو اللیث ندوی ،قرۃ العین حیدر،شمس الرحمن فاروقی ، شمیم حنفی،حفیظ نعمانی ،مجتبیٰ حسین ، ضیا فاوقی ،پروفیسر اشتیاق احمد ظلی پر قلم اٹھایا ہے تو وہیں بدھو بھیا، معظم بلال ،سریش چندر شکل اور محمد علم اللہ سے ادبی دنیا کو متعارف کرایا ہے ۔

کہتے ہیں کہ خاکے کی شخصیت ایک تراشے ہوئے مجمسے کی طرح ہوجاتی ہے جس کے ناک نقشے میں خاکہ نگار کوئی رد و بدل نہیں کرسکتا ،اسے تو بس اس مجسمہ کو اٹھاکر طاق پر سجا دینا ہوتا ہے۔ بہ ظاہریہ سادہ اور آسان نظر آنے والا کام ہے لیکن یہ کام اس قدر دشوار اور پیچیدہ ہوتا ہے کہ کوئی خاکہ نگار اسے اس وقت تک انجام دے ہی نہیں سکتا جب تک کہ وہ اپنے موضوع کے خارج اور داخل سے بخوبی واقف نہ ہو ،گویا خاکہ نگار کا یہ فرض ہے کہ وہ صاحبانِ خاکہ کے اندر جھانکے اور پھر جو دیکھے اسے اس طرح بیان کرے کہ پڑھنے والا اس شخصیت کو تہہ در تہہ دیکھ سکے۔ اس تناظر میں کتاب کے بہت سے خاکے بطور مثال پیش کیے جاسکتے ہیں۔بہ حیثیت استاد اور ادیب کے پروفیسر شمیم حنفی کا خاکہ پڑھنے سے تعلق رکھتا ہے ۔استاد وشاگردکی مثالی قدریں آنکھوں کے سامنے روشن ہوجاتی ہیں۔یہ کہنا زیادہ بہتر قرار پائے گا کہ وہ لوگ جنھوں نے پروفیسر شمیم حنفی کو نہیں دیکھا ہے وہ اس خاکے کی مدد سے ان کی شخصیت اور مزاج کو نہ صرف سمجھ سکیں گے بلکہ قاری کو ایسا محسوس ہوگا کہ جیسے وہ اپنی کھلی آنکھوں سے ان کی ادبی سرگرمیوں کو دیکھ اور سن رہا ہے ۔

یہ کتاب ڈاکٹر امان اللہ فہد فلاحی کو معنون ہے جو فاضل مصنف کے حلقہ احباب میں شامل تھے ۔ نام کی رعایت سے ’’فہداللہ کی امان میں ‘‘خاکہ کی یہ سرخی بہت خوب ہے ۔اس خاکہ کو دوستی کی مثالی قدروں کے بیان سے تعبیر کیا جاسکتا ہے نیز خاکہ نگار نے غم واندوہ کے لمحات کو بھی کاغذ پراس طرح منتقل کیاہے کہ قاری کی آنکھیں نم ہوجاتی ہیں ۔

سرگرم صحافتی زندگی کی ایک روشن مثال حفیظ نعمانی کے خاکے میں دیکھی جاسکتی ہے ۔چند برس کی ملاقاتیں اور ان کے کالموں کو پڑھ کر ایک لاجواب خاکہ تحریر کیا گیا ہے، جس میں حفیظ نعمانی کی کئی جہتیں سامنے آتی ہیں۔ان کی شخصیت ،مزاج ،پسند وناپسند ہی نہیں بلکہ علم وادب کی بیشمار باتیں کم لفظوں میںبیان کردی گئی ہیں ۔

بدھو بھیا ایک معمولی انسان کاغیر معمولی خاکہ ہے جسے پڑھ کر’’نام دیو مالی‘‘ اور اس نوع کے بعض دوسرے اردو کے مشہور خاکے ذہن میںآتے ہیں ۔

عمیر منظرکواپنی طالب علمی کے زمانے سے ہی جن شخصیات کی شفقتیں اور محبتیں حاصل ہوئیں وہ سب قلم کے لیے مایہ نازتھے اوریہ جس پایہ کے لوگ تھے وہ ان کے نام اور کام سے ظاہر ہے۔ عمیر منظرنے ان سب کی صحبتوں سے خوب فائدہ اُٹھایا۔کتاب کے پیش لفظ کا پورا تانا بانا پروفیسر صغریٰ مہدی کی شفقتوں ، محبتوں اور نوازشات کے ارد گرد گھومتا نظر آتا ہے۔خود لکھتے ہیں:

ریسرچ تک پہنچتے پہنچتے پروفیسر صغرا مہدی صاحبہ کی عنایتیں اور شفقتیں راقم الحروف پر مزید بڑھتی چلی گئیں ۔غالباً 2007کی بات ہے کہ ایک روز انھوں نے کہا کہ تم کچھ دنوں کے لیے قرۃ العین حیدر صاحبہ کے یہاں جاؤ۔کچھ پڑھنے لکھنے کا کام ہوگا۔ اس سے تمھیں بہت فائدہ پہنچے گا۔اردو کی ایک ممتاز شخصیت کو قریب سے دیکھنے اور انھیں جاننے کا بھی موقع ملے گا ۔۔۔چند روز بعد میں عینی آپا کے یہاں جانے لگا ۔قرۃ العین حیدر کے انتقال پر صغرا صاحبہ نے مجھ سے ایک مضمون لکھنے کو کہا۔انھوں نے کہا کہ اگر ممکن ہوتو اپنے چند ماہ کے ان تجربات کو لکھو جو ان کے یہاں آنے جانے کے دوران میں تم کو ہوئے ہیں ۔میں نے حامی بھر لی ۔مجھے نہیں معلوم تھا کہ میں کیا لکھ رہا ہوں مگر تین چار ماہ کے اپنے تجربات کو میں نے تحریری شکل دینے کی کوشش کی ۔صغرا صاحبہ نہ صرف خوش ہوئیں بلکہ انھوں نے دعاؤں سے نوازا ۔زیر نظرکتاب میں شامل یہ خاکہ پہلے پہل شاہد علی خاں کے زیر ادارت نکلنے والے رسالہ ’نئی کتاب‘( شمارہ 3)میں شائع ہوا تھا ۔اسے میری خاکہ نگاری کی ابتدا کہا جا سکتا ہے ۔۔۔میں نے کبھی یہ نہیں سوچا تھا کہ میں کسی کاخاکہ بھی لکھ سکوںگا ۔۔۔۔دراصل یہ پورا سلسلہ پروفیسر صغری مہدی کی تحریک کا نتیجہ ہے ۔ بزرگوں کی تربیت کے مختلف انداز ہوتے ہیں۔میں سمجھتا ہوں کہ یہ بھی ان کا ایک انداز ہی رہا ہوگا ۔ مجھ پران کی بے پناہ عنایتیں رہیں ۔‘‘

2012میں جب انہیں آب ودانہ اٹھا کرلکھنؤ لے آیا تو یہاں انھیں پروفیسر شاہ عبدالسلام ، ڈاکٹر ملک زادہ منظور احمد، پروفیسر شارب ردولوی،حفیظ نعمانی، چودھری شرف الدین اور خواجہ یونس جیسی ملی ،سماجی، علمی و ادبی شخصیات کو قریب سے دیکھنے کا موقع ملا۔ پروفیسر اشتیاق احمد ظلی اور مشتاق اعظمی جیسے صاحبان علم و ادب سے بھی انھوں نے خوب استفادہ کیا۔لہٰذاگذشتہ 20-25 برس کی ایسی بہت سی یادیں اور باتیںجو ان کے سینے میں محفوظ تھیں،اب خاکوں کی شکل میں ادب کا حصہ بن گئی ہیں۔

’’کیسے انھیں بھلائیں ‘‘کے خاکوں کا ایک حسن زبان وبیان کی دلکشی بھی ہے ۔عمیر منظر نے ان خاکوں میںعام فہم زبان استعمال کی ہے۔بات سے بات نکالنے کا انداز بھی معنیٰ خیز ہے۔اردو ادب میں اس نوع کے لکھنے والے بہت کم ہیں۔زیر تحریر خاکہ کے گردو ونواح معلومات اور مشاہدات کو بہت سلیقے سے مرتب کیا گیا ہے ۔ادھراُدھر کی باتیں بہت کم ہیں ۔کتاب کے مطالعے سے یہ بات بھی سامنے آتی ہے کہ فاضل خاکہ نگار نے خود کو بہت سمیٹ کر لکھاہے شاید یہی وجہ ہے کہ کتاب کا مطالعہ قاری کے لیے دلچسپی اور دلکشی کا ایک انوکھا تجربہ بن جاتا ہے ۔اور یہ تمام لوگ اُس کے لیے جانے پہچانے بن جاتے ہیں ،جنھیںبھلانا شاید اب اس کے لیے بھی آ سان نہ ہو۔

عمیر منظر کا میدان شاعری ، تنقید اور تحقیق ہے ۔کلاسیکی شاعری، قدیم ادب اور کتابیں ان کی دلچسپی کے موضوعات ہیں ۔وہ شاعر بھی ہیں لیکن اس بارے میں کوئی دعوی نہیں کرتے۔ ہندستان کے اہم اور تاریخی مشاعروں میں بطور شاعر اور ناظم مشاعرہ کے وہ شریک ہوچکے ہیں ۔

نئے موضوعات کی تلاش و جستجو اور پھر کسی اہم نکتے تک رسائی ڈاکٹرعمیر منظرکا اہم کارنامہ کہاجاسکتاہے اس تناظر میں ’’ شبلی، مکاتیب شبلی اور ندوۃ العلماء ‘‘ اور ’’خان محبوب طرزی: لکھنؤ کا ایک مقبول ناول نگار‘‘جیسی کتابوں کو بطور مثال پیش کیا جاسکتا ہے ۔اس کے علاوہ انھوں نے منچندا بانی اور رشیدحسن خاں پرمونوگراف لکھا ہے ۔ان تالیفات و تصنیف کی فہرست میں اب ایک نئی تصنیف خاکوں کا مجموعہ ’’کیسے انھیں بھلائیں‘‘کا اضافہ ہوا ہے۔مجھے امید ہے علمی و ادبی حلقوں میںکتاب کی خاطر خواہ پذیرائی ہوگی اور یقین کامل ہے کہ ڈاکٹر عمیر منظر ادب کی خدمت ہمیشہ اسی جذبے کے ساتھ کرتے رہیں گے اور کامیابی ان کے قدم چومتی رہے گی۔کتاب حاصل کرنے کے لیے مصنف ڈاکٹر عمیر منظر سے 9818191340پر رابطہ قائم کریں۔

’صلیبیں مرے دریچے میں‘ ممتاز شاعر فیض احمد فیض کے ان خطوط کا مجموعہ ہے،جو انھوں نے جون1951سے اپریل 1955 کی اسیری کے دوران اپنی بیگم ایلس فیض کو لکھے تھے۔یہ خطوط اصلاً انگریزی زبان میں تھے اور ان کے اردو میں منتقل ہونے کی دلچسپ روداد ہے،جسے ان کے مرتب مرزاظفرالحسن(بانی ادارۂ یادگارِ غالب کراچی) نے مجموعے کے شروع میں ’کتاب اور صاحبِ کتاب کی کہانی‘ کے زیر عنوان بیان کیا ہے۔پوری روداد تو وہیں پڑھنی چاہیے،البتہ اس کا لبِ لباب یہ ہے کہ جب مرتب موصوف نے 1971میں فیض سے اصرار کیا کہ اپنی خود نوشت سوانح لکھیں یا اس کی کچھ تدبیر کریں،تو انھوں نے اپنی بیگم کے پاس محفوظ یہ خطوط ان کے حوالے کیے اور کہا کہ ان سےتمھارا کام ہوسکتا ہے،مگر ایلس فیض ان خطوط کی اشاعت پر مصر ہوگئیں،فیض ان کے ترجمے کی ذمے داری مرزا صاحب کو دینا چاہتے تھے،مگر انھوں نے کسی طرح حیلہ و تدبیر کرکے خود فیض کو ان کے ترجمے پر آمادہ کیا؛چنانچہ وہ ایک ایک کرکے ان خطوں کو پڑھتے اور ان کا ترجمہ املا کرواتے جاتے،اس طرح فروری1971سے جون1971 کے دوران یہ کام پایۂ تکمیل کو پہنچا اور یہ مجموعۂ خطوط اردو زبان میں منظرِ عام پر آیا،جس کا نام’صلیبیں مرے دریچے میں‘ طے پایا۔

1980میں فیض افروایشین کانفرنس میں شرکت کی تقریب سے کلکتہ (کولکاتہ) آئے،تو مغربی بنگال اردو اکیڈمی نے انھیں ایک شایانِ شان استقبالیہ دیا اور اسی موقعے پر اکیڈمی والوں نے فیض سے اس مجموعے کی اشاعت کا حق عطا کرنے کی درخواست کی؛چنانچہ فیض نے تحریری طورپر اجازت نامہ مرحمت فرمایا اور اکیڈمی نے1982میں اس مجموعے کو پہلی بار شائع کیا۔پتا نہیں اس کے بعد انھیں اس خوب صورت مجموعے کو بارِدگر شائع کرنے کا خیال کیوں نہیں آیا؟بہرکیف طویل وقفے کے بعد 2022میں مغربی بنگال اردو اکیڈمی نے دوبارہ اسے شائع کیا ہے اور بہت اچھا شائع کیا ہے۔

کتاب کے کل صفحات 224 ہیں۔ ان خطوط کی بہت سی خوبیاں ہیں،جو عموماً بڑے لوگوں، ادیبوں، شاعروں،عالموں اور دانشوروں کے خطوط میں ہوتی ہیں۔مگر کچھ خصوصیتیں صرف انھی سے مخصوص ہے،پہلی خصوصیت تو ان خطوط کی یہ ہے کہ یہ بالکل بھی ترجمہ معلوم نہیں ہوتے اور یہ بلاشبہ فیض کی اردو کے ساتھ انگریزی زبان اور دونوں زبانوں کے ذخیرۂ الفاظ پر دسترس کا نتیجہ ہے،ویسے زبان پر دسترس بھی بہتوں کو ہوتی ہے،مگر ترجمے میں اسے نبھانا ایک مشکل عمل ہے اور خود فیض نے بھی ایک خط میں اعتراف کیا ہے کہ بسا اوقات ترجمہ ،تخلیق سے زیادہ مشکل ہوتا ہے۔مگر فیض نے ان خطوط کے ترجمے میں کمال ہنرمندی کا مظاہرہ کیا ہے،جس کی طرف مرتب نے بھی مثالوں کے ذریعے اشارے کیے ہیں۔

ایک خاص بات یہ ہے کہ ان کے سطور اور بین السطور سے فیض کی شخصیت کے وہ خصائص چھن کر باہر آتے ہیں،جو صرف ان کی شاعری کے مطالعے سےآشکار نہیں ہوتے۔فیض کی درویشی و قلندری اور سادگی وغیرہ پر ان کے معاصرین نے ادھر ادھر لکھا ہے ،مگر ان خطوط کے مطالعے سے فیض کی حقیقی انسان دوستی،علم پسندی اور کتب بینی،قناعت اور استغنا،مشکل اور جگرخراش حالات کو غیر معمولی ہمت و استقلال کے ساتھ قبول کرنے اور درد کو دوا بنالینے کے ان کے فن،ان کی اندرونی بشاشت اورہنگامہ ہاے رستاخیز کے دوران بھی پہاڑ کی طرح پرسکون رہنے کی خو،مختلف زبانوں سے ان کی دلچسپی اور دورانِ اسیری اردو کے علاوہ عربی،فارسی،انگریزی زبانوں کی مختلف الموضوعات کتابوں کا مسلسل مطالعہ،فرنچ اور ہسپانوی زبانیں سیکھنے کا شوق اور ان میں یک گونہ دستگاہ پیدا کرلینے جیسے اہم حقائق کا علم ہوتا ہے۔یہ بھی معلوم ہوتا ہے کہ فیض کے ساتھ ان کے جیل کے ساتھی عقیدت کیش مریدوں کی طرح پیش آتے تھے اور یہ بھی کہ وہ جیل کے کپتان کو قرآن پڑھایا کرتے تھے۔ جیل کے مشاعروں،تہواروں کے موقعوں پر ہونے والی دعوتوں ،فیض سے ملاقات کو آنے والے مختلف مرد و خواتین،اس عرصے میں خود ان کی اہلیہ کی علمی و عملی سرگرمیوں ،ان کی بیٹیوں کی پرورش کا احوال اور ان کے خاندان میں رونما ہونے والے واقعات و سانحات سے بھی آگاہی ملتی ہے۔فیض بیشتر خطوط میں اپنی بیگم سے ملاقات پر اردو،عربی،فارسی یا انگریزی کی کوئی نہ کوئی کتاب لانے کو لکھتے ہیں،ساتھ ہی جو کتاب ان کے زیر مطالعہ ہوتی ہے،اس پر اپنی راے اور تاثر بھی تحریر کرتے ہیں،اس طرح ان خطوط میں ہماری ملاقات ایک ناقد فیض سے بھی ہوتی ہے ۔

فیض کا شعری مجموعہ’دستِ صبا‘ایامِ حبس و اسیری کے دوران ہی شائع ہوا،اس کے علاوہ ان کی دوسری کتابوں کے نئے ایڈیشنز بھی انھی دنوں منظر عام پر آئے۔اپنے خطوں کے ساتھ فیض بیگم کو اپنی نئی نظمیں بھی بھیجتے تھے اور بسااوقات ان کی تخلیق کا پس منظر بھی بتاتے تھے،حواشی میں ان نظموں کے عناوین دے دیے گئے ہیں،جن سے ان نظموں کے دلچسپ اولین حوالوں سے واقفیت ہوتی ہے۔ان خطوط کی خاص بات یہ بھی ہے کہ گرچہ یہ میاں کی جانب سے بیوی کو لکھے گئے ہیں،مگر فیض کی نابغہ شخصیت اور دنیا و انقلاباتِ دنیا کو برتنے کے ان کے منفرد انداز اور ان کے تئیں ان کے رویے نہایت دلچسپ اور سبق آموز ہیں،ہم آپ جیسے لوگوں کے بھی کام کے ہیں؛چنانچہ ذیل میں ان خطوط کے کچھ نہایت فکرانگیز، معنی خیز،خردافروز اور بصیرت زا اقتباسات پیش ہیں:

’میں نے یہ اچھی طرح محسوس کرلیا ہے کہ آدمی کے لیے مناسب یہی ہے کہ جو کچھ ہے،اس پر قناعت کرے اور جو کچھ وہ نہیں ہے،وہ بننے کی کوشش میں وقت ضائع نہ کرے،اس طرح کی کوشش سے حماقت اور خود فریبی کے علاوہ کچھ حاصل نہ ہوگا‘۔(ص24)

’تنہائی اور زباں بندی کے عالم میں بہت دن گزارنے کے بعد آدمی اپنے بارے میں بہت زیادہ باتونی ہوجاتا ہے‘۔(ص25)

’مجھے اب سے پہلے کبھی ایسا سکونِ قلب میسر نہیں ہوا،کم ازکم اس طرح کا سکون جو اس وقت ہے۔اب تو یوں لگتا ہے کہ جیسے دنیا میں کسی سے کوئی شکایت ہی نہیں رہی؛بلکہ مجھے تو ڈرلگ رہا ہے کہ یہ جیل خانہ ختم کرنے سے پہلے کہیں ہم ولی اللہ نہ بن جائیں؛اس لیے کہ اب کوئی بات ،کوئی چیز بری نہیں لگتی،سارے جھوٹ،سارے فریب،وہ ساری تہمتیں جن پر پہلے دل کڑھتا تھا؛اب یاد کرو تو صرف ہنسی آتی ہے اور ایک طرح سے دل خوش ہوتا ہے‘۔(ص28)

’جیل خانے میں ایک خوبی یہ ہے کہ وہ تحیر اور نزاکتِ احساس،جو پختہ عمر میں آدمی کھوبیٹھتا ہے،دوبارہ لوٹ آتی ہے‘۔(ص50)

’ امید افزا افواہوں پر بھروسہ کرنا فضول ہے؛لیکن ان سے یہ تو پتا چلتا ہے کہ ہوا کا رخ کدھر ہے اور لوگ کیا چاہتے ہیں؟اپنے ضمیر کے علاوہ نیکی اور برائی کی کوئی عدالتِ عالیہ ہے،تو یہی راے عامہ ہی تو ہے‘۔(ص59)

’بے خیالی،تعصب یا کسی اور وجہ سے کسی کا دل دکھانا بہت آسان ہے؛لیکن اپنے دل میں اتنی جامع شفقت پیدا کرنا بہت مشکل ہے کہ انسان اپنے دکھوں کے ساتھ باقی ہر کسی کے دکھ کا احاطہ کر سکے‘۔(ص65)

’مصائب کے سیاہ بادلوں میں ایک سفید دھاری یہ بھی ہوتی ہے کہ اس سے لوگ خوابِ غفلت سے جاگتے ہیں؛لیکن اس احساس سے فائدہ جبھی ہوتا ہے کہ اس سے مثبت عمل پیدا ہو،ورنہ یہ احساس بیکار رونے پیٹنے میں تحلیل ہوجاتا ہے‘۔(ص66)

’مشکل سے مشکل اور تلخ سے تلخ زندگی میں بھی لطف و انبساط کا کچھ نہ کچھ سامان بہم رہتا ہے،جس سے محرومی کسی طرح برداست نہیں کرنی چاہیے۔جب کاروبارِ کائنات بہت ہی نامنصفانہ اور غیر معتدل ہو تو کچھ نہ کچھ تلخی تو ضرور محسوس ہوگی؛لیکن اس تلخی کو اس سرورِ تحیر پر غالب نہیں آنے دینا چاہیے،جو نعمتِ زندگی کی عطا ہیں اور جن کی وساطت سے حسنِ کائنات کے مخفی خزینے بے نقاب ہوتے رہتے ہیں‘۔(ص95)

’دکھ اور ناخوشی دو مختلف چیزیں ہیں اور بالکل ممکن ہے کہ آدمی دکھ بھی سہتا رہے اور خوش بھی رہے۔دکھ درد خارجی چیزیں ہیں،جو بیماری یا حادثے کی طرح باہر سے وارد ہوتے ہیں جیسے ہماری موجودہ جدائی؛لیکن ناخوشی جو اس درد سے پیدا ہوتی ہے،ہمارے اندر کی چیز ہے۔یہ اپنے اندر بھی بڑھتی پنپتی رہتی ہے اور اگر آدمی احتیاط نہ کرے تو پوری شخصیت پر قابو پا لیتی ہے۔دکھ درد سے کوئی مفر نہیں؛لیکن ناخوشی پر غلبہ حاصل کیا جاسکتا ہے،بشرطیکہ آدمی کسی ایسی چیز سے لو لگالے،جس کی خاطر زندہ رہنا اچھا لگے‘۔(109)

’جب تک زندگی باقی ہےکسی مصیبت کے سامنے سرنگوں نہیں ہونا چاہیے؛اس لیے کہ کسی نہ کسی طرح سب نقصانات پورے ہوجاتے ہیں اور سب دکھ درد کی تلافی ہوجاتی ہے ‘۔(ص116)

’ جو کوئی جیسا بھی ہے اسے ویسا ہی قبول کرنا چاہیے،اس سے قطعِ نظر کہ تمھارے خیال میں اسے کیسا ہونا چاہیے تھا اور کسی سے بھی زیادہ توقع وابستہ نہیں کرنا چاہیے‘۔(ص117)

’آیندہ کے بارے میں انسان کا علم بہت محدود ہوتا ہے اور تکلیف دہ حادثات کے امکانات ہمیشہ موجود؛اس لیے ہر کسی کو اس حد تک فلسفی ضرور ہونا چاہیے کہ جو بھی صورت پیش آئے اسے زیادہ ششدر یا سراسیمہ ہوئے بغیر قبول کرلے‘‘۔(ص118)

’ہم دوسروں کو رنج و خوشی برداشت کرنے میں جبھی امداد دے سکتے ہیں،جب ہم اپنی ناخوشی قابو میں رکھیں۔کسی دوسرے کو خوش کرنے کا طریقہ یہی ہے کہ آدمی خود خوش نظر آئے،یہ بعض اوقات مشکل تو ہوتا ہے؛لیکن کرنا ہی چاہیے‘۔(ص120)

’بات یہ ہے کہ اگر تن میں جان ہے اور آدمی اپنی دیانت اور خلوصِ باطن کے بھروسے پر سر اٹھاکر چل سکتا ہے،تو زندگی میں جو بھی پیش آئے؛رنج ہو یا راحت،ہرچیز اپنی اپنی جگہ اچھی ہے اور اس کا کسی اور چیز کا بدل ہونا ضروری نہیں‘۔(ص123)

’آج ایک ہسپانوی کہاوت سنی:کیسا بھلا لگتا ہے کہ آدمی کچھ نہ کرے اور اس کے بعد سستانے بیٹھ جائے‘۔(ص126)

’سب آزمایشوں کے باوجود زندگی اتنی خوش آیند معلوم ہوتی ہے کہ صبح اٹھتا ہوں،تو بے وجہ گانے کو جی چاہتا ہے‘۔(ص136)

’آج ایک اچھا جملہ پڑھا:کوئی ماں آسانی سے اپنا بچہ کسی کے حوالے نہیں کرتی اور ہم میں سے ہر کوئی ایک بچہ اپنے دل میں لیے پھرتا ہے،یہ بچہ مستقبل ہے،صرف اپنا ہی نہیں،ساری دنیا کا مستقبل‘۔(ص146)

’ حسن سے صحیح راحت جبھی بہم پہنچتی ہے،جب وہ خلاق ہو،یعنی جب وہ اپنے وجود سے دیکھنے والے کے جذبے یا خیال یا عمل میں مزید حسن کا اضافہ کرے‘۔(ص185)

’پوری صحت سے ترجمہ کرنا بہت ہی عرق ریزی کا کام ہے،جس میں تخلیقی کام سے بھی زیادہ محنت کرنی پڑتی ہے‘۔(ص201)

کولکاتا سے شائع ہونے والے مشہور ادبی مجلے ’ مژگاں ‘ کا نیا شمارہ اپنی نوعیت میں ’ ٹو اِن ون ‘ ہے ۔ اِس شمارے کا ایک حصہ معمول کے مواد پر مشتمل ہے اور ایک حصہ اُس شاعر کو خراجِ عقیدت پیش کرنے پر ، ایک دنیا جسے منوّر رانا کے نام سے جانتی اور پہچانتی ہے ۔ دونوں ہی حصوں کی ضخامت تقریباً یکساں ہے ۔ یہ کہا جا سکتا ہے کہ ایک شمارہ میں دو شمارے سَمو دیے گیے ہیں ۔ بات پہلے حصے کی بھی کریں گے ، جو معمول کے مواد پر مشتمل ہے ، لیکن تفصیلی بات گوشۂ منوّر رانا پر ہوگی ۔ اپنے اداریے میں ، جو ’ مضراب ‘ کے مستقل عنوان سے شائع ہوتا ہے ، مدیر نوشاد مومن لکھتے ہیں : ’’ ’ مژگاں ‘ کا یہ شمارہ منوّر رانا کے تئیں خراجِ عقیدت کے طور پر پیش کیا جا رہا ہے ۔ امیدِ کامل ہے کہ قارئین کو پسند آئے گا ۔‘‘ یہ دو جملے ہیں جن میں سے پہلا جملہ ہے کہ یہ شمارہ منوّر رانا کو خراجِ عقیدت ہے ۔ نوشاد مومن نے منوّر رانا کو خراجِ عقیدت پیش کرنا کیوں ضروری سمجھا ؟ یہ سوال اس لیے ہے کہ عام طور پر اُنہیں عوامی اور مشاعروں کا شاعر سمجھا جاتا رہا ہے ، ادب کے اجارہ داراُنہیں ایک طویل عرصہ تک کوئی مقام دینے کو تیار نہیں تھے ۔ نوشاد مومن ول مین اور ڈلمور شوارز اِن دو دانشوروں کے حوالے سے لکھتے ہیں : ’’ منوّر رانا کے سامعین نرے جاہل نہیں ہوتے بلکہ پڑھے لکھے اور دانشور ہوتے ہیں ۔ دوسری طرف منوّر رانا کا اسلوبِ نگارش اتنا سہل اور روزمرہ کے قریب ہے اس لیے سامعین ان کی طرف کھِنچے جاتے ہیں اور ان کے پڑھنے اور سننے والوں کی تعداد کم ہونے کی بجائے بڑھتی ہی جاتی ہے ۔ یہ منوّر رانا اور اُن کی شاعری کا وہ جوہر ہے جو زمانے کے سرد و گرم سے نبرد آزما ہونے کے بعد ہی آتا ہے ۔ منوّر رانا کی شاعری دشمنوں سے بھی داد و تحسین وصول کر لیتی ہے ۔ یہ وہ جادو ہے جو سر چڑھ کر بولتا ہے ۔ یہ ہم نہیں کہتے بلکہ زمانہ اس بات کا معترف ہے ۔‘‘ وہ لکھتے ہیں : ’’ آج جب منوّر رانا ہمارے درمیان نہیں ہیں تو اُن کی یادوں کے دیپ دلوں میں روشن ہیں ۔ اُن کا شعری اسلوب ہمارے کانوں میں رس گھولتا ہے ، اُن کا دبنگ لہجہ اور مردانہ آہنگ ہمارے جذبوں کی آنچ تیز کرتا ہے اور ہم اُنہیں فراموش نہیں کر پا رہے ہیں ۔‘‘ یقیناً منوّر رانا کو فراموش نہ کر پانا اُن بنیادی وجوہ میں سے ایک ہے جسں نے نوشاد مومن کے لیے یہ شمارہ پیش کرنا ضروری بنا دیا ۔ نوشاد مومن کا یہ ماننا ہے کہ ’’ منوّر رانا خوش نصیب ہیں کہ معاصرین نے اُن کی ادبی خدمات کا قدرے تاخیر سے ہی سہی لیکن بھرپور اعتراف کیا ۔ یہ اُن کی خوش نصیبی نہیں تو اور کیا ہے کہ جہاں اُن کے بزرگوں اور ہم عصروں نے اُن کی حیات اور ادبی جہات پر بڑی تعداد میں مضامین قلم بند کیے ہیں ، وہیں بعد کی نسل کے ادیبوں ، شاعروں اور نقادوں نے بھی اُن کی شخصیت اور فن پر اپنے قلم کی جولانیاں دکھائی ہیں ۔‘‘ اس شمارے میں ایسے کئی ادیبوں ، شاعروں اور نقادوں کے اہم مضامین شامل ہیں ۔

گوشۂ منوّر رانا کی شروعات اُن کے انتخابِ کلام سے ہوتی ہے ۔ انتخاب سے ایک شعر پیش ہے ؎

ٹوٹ کر یہ بھی بکھر جاتی ہیں اک لمحے میں

کچھ امیدیں بھی گھروندوں کی طرح ہوتی ہیں

اس کے بعد منوّر رانا سے گلزار جاوید کی طویل گفتگو ہے ، جس میں ادب کے ساتھ دیگر موضوعات پر بھی بات کی گئی ہے ۔ ایک سوال ایوارڈ واپسی کے تعلق سے تھا ، اس کا جواب ملاحظہ کریں : ’’ ایوارڈ واپس کرنے کی وجہ تو دنیا کو معلوم ہے ۔ شاید آپ بھی اس سے باخبر ہوں گے ۔ میری خواہش تھی کہ ایوارڈ واپس کرنے والوں کی کمزور ہوتی ہوئی اِن آوازوں کو ایک کھنک دار آواز مِل جائے ۔ میں اللہ کا شکرگزار ہوں کہ پچھلے ساٹھ ستّر برس میں برصغیر کے لوگوں نے دیکھا کہ ایک معمولی سا اردو شاعر جو کمزور اور اقلیت سے تعلق رکھتا ہے ، اُس کی آواز سُن کر اپنے طور پر زندگی گزارنے والے وزیراعظم نے ۲۴ گھنٹے میں اُس سے ملنے کی خواہش ظاہر کی اور میں نے اپنے اجداد کی روش پر چلتے ہوئے اُن سے ملاقات کرنے سے یہ کہتے ہوئے انکار کر دیا ؎

ہیں اہلِ وفا جتنے سب دار کے قابل ہیں

اعزاز نہ دے ہم کو توہین نہ کر سب کی

میں نے ملاقات کے لیے یہ گزارش کی کہ مجھ سے پہلے جن لوگوں نے ایوارڈ واپس کیے ہیں اُن کی عمر بھی ہم سے زیادہ ہے اور علمی لیاقت بھی کہیں زیادہ ہے ، لہذا اُن میں سے کچھ نمائندہ قلم کاروں کو پی ایم او میں بلایا جائے اور اگر آپ چاہیں تو اس فہرست کے آخر میں میرا نام لکھ دیں ۔‘‘

انٹرویو کے بعد ’ آپ آسان سمجھتے ہیں منوّر ہونا ‘ کے عنوان سے مرحوم شاعر کے فن اور حیات پر 23 مضامین ہیں ۔ سب مضامین پر اظہارِ خیال ممکن نہیں ہے ، چند پر ایک نظر ڈالتے ہیں ۔ انور سدید کا مضمون بعنوان ’ جدید غزل کی آبرو ‘ ہے ۔ وہ لکھتے ہیں : ’’ مجھے کچھ یوں محسوس ہوتا ہے کہ قافیہ اور ردیف کی غلامی کرنے والے مشاعرہ باز شاعروں کی طرح وہ مصرع ثانی سے مصرع اولا کی طرف سفر نہیں کرتے بلکہ شاید ان پر پورا شعر اترتا ہے ۔ یہی وجہ ہے کہ پہلا مصرع پڑھنے کے بعد وہ دوسرے مصرعے کو اس طرح کروٹ دیتے ہیں کہ پورے شعر کی تازگی اور توانائی اور تجدد کو تسلیم کرنا پڑتا ہے ۔‘‘ وہ مزید لکھتے ہیں : ’’ ان کی غزل چونکہ جدید زمانے کی غزل ہے اس لیے اس میں پرانے رموز و علائم نہیں آتے لیکن عصر حاضر کے مظاہر و مسائل ازخود غزل کی بنت میں شامل ہوتے چلے گیے ہیں ۔‘‘ انور سدید کا ماننا ہے کہ منوّر رانا جدید غزل کی آبرو ہیں ۔ ایک اور مضمون ’ منوّر رانا : مشرقی اقدار کا علمبردار مابعد جدید شاعر ‘ پر نظر ڈال لیتے ہیں ، اسے سہیل ارشد نے تحریر کیا ہے ۔ وہ لکھتے ہیں : ’’ جدیدیت کے دور میں صرف اقدار کی شکست کا نوحہ لکھا گیا لیکن منوّر رانا نے اردو شاعری میں مشرقی اقدار کا احیاء کیا ۔ انہوں نے اپنی شاعری کی مدد سے عوام کی ذہنی و فکری سطح کو بلند کرنے کی کامیاب کوشش کی ۔‘‘ تمام مضامین وقیع ہیں اور مرحوم شاعر کے حیات اور فن کے مختلف گوشوں کو منوّر کرتے ہیں ۔ لکھنے والوں میں علامہ اعجاز فرخ ، فاروق ارگلی ، شعیب رضا فاطمی ، ڈاکٹر رؤف خیر ، پروفیسر اسلم جمشید پوری کے علاوہ دیگر بڑے ادیب شامل ہیں ۔ ’ چل دیے ہم تو میسر نہیں ہونے والے ‘ عنوان کے تحت منوّر رانا کی یادیں اور باتیں پیش کی گئی ہیں ۔ اس حصے میں 13 مضامین اور دو قطعات تاریخِ وفات ہیں ۔ مضامین لکھنے والوں میں مرحوم مشرف عالم ذوقی کا نام بھی ہے ۔ ان کے مضمون کا عنوان سب کچھ کہہ دیتا ہے ، ’ منوّر رانا : زمین کی خوشبو اور جڑوں سے نیا لہجہ دریافت کرنے والا مہاجر ‘ ۔ وہ لکھتے ہیں : ’’ غزل سے انہوں نے وہی کام لیا ہے جو ان سے پیشتر انقلابی شاعر نظموں سے لیا کرتے تھے ۔‘‘ اس حصے میں سے دو مضامین کا مزید ذکر کروں گا ، ایک معروف صحافی معصوم مرادآبادی کا مضمون ہے بعنوان ’ منوّر رانا : مٹی کا بدن کر دیا مٹی کے حوالے ‘، اور دوسرا مضمون ڈاکٹر سیّد احمد قادری کا بعنوان ’ منوّر رانا : اردو شاعری کی ہم عصر مقبولیت کا استعارہ ‘ ۔ دونوں مضامین سے دو یا تین سطریں پیش ہیں ۔ معصوم مرادآبادی لکھتے ہیں : ’’ منوّر رانا جب مشاعرے میں ماں کے موضوع پر شعر سناتے تھے تو سامعین کی آنکھوں میں نمی ہوتی تھی ۔ یہی ان کی شاعری کا کمال تھا ۔ ادھر کچھ عرصے سے بعض تنازعات نے انہیں گھیر رکھا تھا ۔ ان میں کچھ خاندانی تنازعات تھے اور کچھ سیاسی ۔ اس کے ساتھ صحت کے مسائل بھی تھے جو دن بدن سنگین ہوتے چلے جا رہے تھے ۔ مگر وہ دیوانہ وار ان سب کا مقابلہ کرتے رہے ۔ اُنہوں نے حالات کی ستم گری سے شاکی ہو کر 2015 میں اپنا ساہتیہ اکیڈمی ایوارڈ واپس کرتے ہوئے کہا تھا کہ وہ اب زندگی میں کوئی ایوارڈ نہیں لیں گے ۔ انہوں نے ایسا کیا بھی ۔ حکومت نے اُن پر شکنجہ کسنے کی بھی کوشش کی ، لیکن وہ میدان میں ڈٹے رہے اور صحت و سیاست دونوں کے مسائل سے جوجھتے رہے ۔‘‘

ڈاکٹر سیّد احمد قادری اپنے مضمون میں لکھتے ہیں : ’’ منوّر رانا بلاشبہ ایک بڑے اور معتبر شاعر ہونے کے ساتھ ساتھ ایک اچھے انسان تھے ۔ جن کا دل غریبوں ، مزدوروں ، بے کسوں کے لیے تڑپتا اور دھڑکتا تھا ۔ اس کی وجہ یہ بھی تھی کہ منوّر رانا نے غربت کو بہت قریب سے دیکھا اور جھیلا تھا ۔ اس لیے اُن کی پوری شاعری کے محور یہی موضوعات ہوا کرتے تھے ۔ جن میں سچائی کا عنصر نمایاں تھا ۔ ایک سچا فنکار وہی ہے جو اپنے اردگرد کے تجربات کو فکر و احساس کی بلندی عطا کرے ۔‘‘ اس حصے کے تمام ہی مضامین مرحوم شاعر کی یادوں اور باتوں سے بھرے ہوئے ہیں ۔ لکھنے والوں میں عبدالسلام عاصم ، صفدر امام قادری ، کلیم حاذق ، فخرالدین عارفی ، وسیم ملک ، غوث سیوانی ، ندیم ہاشمی ، ابن نثار اور شاہینہ پروین شامل ہیں ۔ قطعات تنویر پھولؔ اور غیاث انور شہودی کے ہیں ۔ یہ بھرپور گوشہ منوّر رانا کو شاندار خراجِ عقیدت ہے ۔ یقیناً یہ قارئین کو پسند آئے گا ۔

اس شمارے میں معمول کا مواد بھی شامل ہے ۔ میں اس پر زیادہ بات نہ کرتے ہوئے چند ادیبوں کے نام لکھ دیتا ہوں ، خود اندازہ ہو جائے گا کہ معمول کا حصہ بھی کچھ خاص ہے ۔ لکھنے والوں میں سعادت سعید ، پروفیسر ناصر عباس نیر ، سیّد محمد اشرف ( ناول کے دو باب) ، محمد حمید شاہد ، پروفیسر سراج اجملی اور ڈاکٹر عمیر منظر جیسے بڑے نام شامل ہیں ۔ یہ شمارہ 504 صفحات پر مشتمل ہے لیکن قیمت صرف 300 روپیے ہے ۔ اسے حاصل کرنے کے لیے رابطہ نمبر 9830126311 ہے ۔

’ خندۂ زیرِ لب ‘ کا مطالعہ کچھ پہلے ہی مکمل کیا ہے ، جو آج کے ایک بڑے طنز و مزاح نگار ( انہیں چھوڑ کر اب دو تین اور ہوں گے ) فیاض احمد فیضی کے گدگداتے اور غور و فکر پر مائل کراتے انشائیوں ، خاکوں اور سفر ناموں کا چوتھا مجموعہ ہے ۔ یہ بتاتا چلوں کہ فیضی صاحب سے تقریباً ہر صبح – واٹس ایپ کے توسط سے – علیک سلیک ہوجاتی ہے ، اور اکثر فیس بک پر ان کی پوسٹیں نظر آ جاتی ہیں ۔ چونکہ میں نہ انسٹاگرام کا صارف ہوں اور نہ ہی سابق ٹوئٹر موجودہ x کا ، اس لیے وہاں ان کی سرگرمیوں کا کوئی اندازہ نہیں ، لیکن اتنا پتا ہے کہ سوشل میڈیا کے مفسدات گنوانے کے باوجود وہ سوشل میڈیا پر ، محدود پیمانے پر ہی سہی ، سرگرم ہیں ، بلکہ اس میڈیا کی معلومات بھی خوب رکھتے ہیں ، یقین نہ ہو تو ان کے انشائیے ’ دیوانے کا خواب ‘ کے یہ اقتباسات خود پڑھ لیں : ’’ ان کے ( بیگم کے ) جاتے ہی مجھے سوشل میڈیا کی ایک ممنوعہ ایپ (App) ٹک ٹاک (Tiktok) کی یاد آگئی ۔ یہ سائٹ نوجوانوں اور طفلانہ بزرگوں کے لیے بنائی گئی تھی جو اپنے گانوں ، رقص اور لطیفوں کو مختصر ویڈیوز میں پیش کرتے تھے ۔ یہ بچکانہ سائٹ اتنی مقبول تھی کہ صرف ہمارے ملک میں ہر ماہ اس کو استعمال کرنے والوں کی تعداد 22 کروڑ سے تجاوز کرگئی تھی ۔ اس سائٹ پر اپنی پیدائشی صلاحیتوں کا مظاہرہ کرنے والے کچھ فنکار تو اتنے مشہور ہو گیے تھے کہ اُنھیں دیکھنے والوں کی تعداد دو کروڑ سے زائد اور ان کی ماہانہ آمدنی تیس تا چالیس ہزار روپے ہوگئی تھی ۔ ہمارے حکم ران نے اس APP کی مقبولیت سے ناراض اور خوف زدہ ہو کر اس پر پابندی لگائی تو ہونہار نوجوانوں نے اب انسٹا گرام پر اپنی صلاحیتوں کا غلط استعمال کرنا یا انھیں برباد کرنا شروع کر دیا اور شہرت اور دولت کے لالچ میں پڑھائی لکھائی ، نوکری ، گھر بار سب چھوڑ کر انسٹا گرام فنکار کہلانے لگے ۔‘‘ مزید ملاحظہ کریں : ’’ انسٹا گرام پر مختصر ویڈیوز بنانے میں اب بوڑھے بھی نوجوانوں سے پیچھے نہیں رہے ۔ رقص کرتے ، گانا گاتے ، فلمی گانوں پر اداکاری کرتے ، حقہ پیتے ہوئے ، اپنی پوتیوں ، نواسیوں کے ساتھ چہلیں کرتے اور اپنی بیویوں کا رونا روتے ہوئے معمر افراد اپنی محرومیوں کا غبار نکالتے ہوئے کبھی احمق تو کبھی قابلِ رحم دکھائی دیتے ہیں ۔‘‘ ٹوئٹر کے بارے میں ان کی معلومات دیکھیں : ’’ اس سائٹ پر تعلیم یافتہ دانش وروں اور جاہل سیاست دانوں اور ان کے بھکتوں کا قبضہ ہے ۔‘‘

اپنے ایک دودسرے طنزیہ و مزاحیہ مضمون ’ ڈاکٹر واٹس ایپ ‘ میں بھی وہ سوشل میڈیا کا کچا چٹھا کھولتے ہیں ، کچھ یوں : ’’ پسندیدگی (Like) اور تبصرے (Comments) کی اس دوڑ میں اکثر لوگ بیماری اور موت کی خبر پڑھ کر بھی Like کا بٹن دبا دیتے ہیں ۔ اس کی وجہ کچھ تو ان کی عجلت پسندی اور کچھ علم کی کمی اور عمل کی زیادتی ہوتی ہے۔ بیماری کی خبر کے جواب میں ریڈی میڈ دعائیں اور وفات کے موقع پر نت نئی ڈیزائن اور رنگوں والے اناللہ وانا الیہ راجعون کے طغرے اب سوشل میڈیا پر بآسانی دستیاب ہیں جو بیماروں اور عیادت گزاروں اور متوفیان اور تعزیت گزاروں کے درمیان پُل کا کام کرتے ہیں ۔ ان سے زیاد تخلیقی ذہن کے لوگ مرنے والے کے حق میں جنت کے اعلیٰ مقام کے الاٹمنٹ کی سفارش اور لواحقین کو صبر کی تلقین اور تاکید پرمشتمل جملے نقل کر کے ثواب دارین کے امیدواروں کی قطار میں لگ جاتے ہیں ۔ بیماری کی خبروں کے نیچے ’ شفائے کاملہ و عاجلہ ‘ کی دعاؤں کا مجمع لگ جاتا ہے اور علالت کی خبر کو پسند (Like) کرنے والوں اور عیادت (Comments) کرنے والوں کی روزانہ بڑھنے والی تعداد کو دیکھ کر بیمار اور اس کے رشتہ داروں کے چہرے پر رونق آجاتی ہے ۔‘‘ اسی مضمون کی ایک کمال کی سطر دیکھیں : ’’ پچھلے جنرل الیکشن میں اپوزیشن کی فتح کی وجوہات صرف تین تھیں ، کانگریس کی سیاہ کاریاں ، ای وی ایم کی چاند ماریاں اور سوشل میڈیا کی کارگزاریاں ۔‘‘

فیاض احمد فیضی بات سے بات نکالنے کا ہنر خوب جانتے ہیں ، لیکن یہ ہنر یوں ہی نہیں آ جاتا ، اس کے لیے الفاظ کا ذخیرہ مطلوب ہوتا ہے ۔ اور یہ ذخیرہ ان کے پاس ہے ۔ یہ کتاب دو حصوں میں تقسیم ہے ، پہلا حصہ گیارہ طنزیہ و مزاحیہ مضامین اور پیش لفظ بعنوان ’ آخری کتاب سے پہلے ‘ نیز پروفیسر خالد محمود کے مضمون ’ ڈاکٹر فیاض احمد فیضی کی طنز و ظرافت شعاری ‘ پر مشتمل ہے ۔ اس حصے کے مزید چند مضامین کا تعارف کراؤں گا ، مگر اس سے پہلے پروفیسر خالد محمود کے مضمون پر بات کر لی جائے ۔ پروفیسر موصوف کا ماننا ہے کہ ’’ آج کے زندہ ہندوستانی طنز و مزاح نگاروں میں فیاض احمد فیضی سے بہتر کوئی اور نہیں ۔‘‘ اور پروفیسر صاحب کی اس بات سے اکثر کو اتفاق ہے ۔ پروفیسر صاحب نے مضامینِ فیضی کی تین خوبیوں کا ذکر کیا ہے ، ایک خوبی ’’ زبان کا تخلیقی استعمال ہے ‘‘ ، جس میں بقول پروفیسر صاحب ’’ وہ منجھ چکے ہیں ۔‘‘ دوسری خوبی اردو شعر و ادب اور اردو زبان کی تاریخ اور عصری مسائل سے واقفیت ہے ۔ اور تیسری خوبی بلکہ ’’ سب سے بڑی خوبی فیضی کی مزاح نگاری میں یہ ہے کہ وہ اپنے نت نئے موضوعات کا انتخاب بہت احتیاط سے کرتے ہیں ۔‘‘

سوشل میڈیا کے تعلق سے ان کے اقتباسات پڑھ کر ، زبان کے تخلیقی استعمال کا اندازہ بخوبی ہو جاتا ہے ۔ اور جب ہم آگے بڑھتے ہیں تو ہمیں ’ اکبرؔ الہ آبادی کا خط ‘، ’ جدید شرح کلام غالبؔ ‘ اور ’ کج کلاہ اردو طنز و مزاح ‘ جیسے مضامین مل جاتے ہیں ، جنہیں پڑھ کر پتا چلتا ہے کہ فیاض احمد فیضی اردو زبان و ادب کی تاریخ سے کتنی واقفیت رکھتے ہیں ! اور اشعار کا استعمال کس خوبی سے کرتے ہیں ! دو مثالیں پیش ہیں ۔ اکبرؔ الہ آبادی سے متعلق اپنے مضمون میں وہ لکھتے ہیں : ’’ میری ( اکبرؔ الہ آبادی کی ) پبلک لائف یعنی شاعری کی عمر 55 برس ہے جس میں ابتدائی دس برسوں کی روایتی شاعری کا عرصہ منہا کر دیں تو میری ظریفانہ شاعری کا عرصہ 45 برسوں پر محیط ہے ۔ 1877 میں ’ اودھ پنچ ‘ کے صفحات پر میری طنز نگاری کا آغاز سرسید کو نشانہ بنا کر ہوا تھا ۔ بہت جلد شہرت نے میرے قدم چوم لیے ۔ میرے مشہور ہو جانے پر ایک صاحب نے خود کو میرا استاد مشہور کر دیا ۔ مجھے جب یہ اطلاع ملی کہ حیدر آباد میں میرے ایک استاد کا ظہور ہوا ہے تو میں نے کہا : ہاں مولوی صاحب کا ارشاد سچ ہے ۔ مجھے یاد پڑتا ہے میرے بچپن میں ایک مولوی صاحب الہ آباد میں تھے ۔ وہ مجھے علم سکھاتے تھے اور میں انھیں عقل مگر دونوں ناکام رہے ۔ نہ مولوی صاحب کو عقل آئی اور نہ مجھ کو علم ۔“ غالبؔ کی شرح سے متعلق مضمون میں فیضی صاحب نے عبدالرحمن بجنوری سے لے کر سہاؔ مجددی تک کئی شارحین کی شرحوں کی گدگداتے انداز میں چٹکیاں لی ہیں ، اور ایک نئی طرز کی ’ سائنسی شرح ‘ کی بنیاد رکھی ہے ! اس کا صرف ایک مختصر اقتباس پیش ہے ، ویسے مشورہ ہے کہ یہ پورا مضمون ، کتاب ڈھونڈ ڈھانڈ کر لوگ پڑھیں ، لطف آئے گا ۔ اقتباس میں ابتدا میں غالبؔ کا شعر ہے ؎

ہر ایک بات پہ کہتے ہو تم کہ تو کیا ہے تمھیں کہو کہ یہ انداز گفتگو کیا ہے؟

اس شعر کی تشریح ملاحظہ کریں : ’’ ایسا معلوم ہوتا ہے کہ محبوب نہ صرف مغرور ہے بلکہ خبط الحواس بھی ہے جو ہر بات کے جواب میں ’ تو کیا ہے؟‘ کی تکرار کر رہا ہے ۔ شاعر کے پاس تو اظہارِ عشق کے سوا کوئی اور کام نہیں ہے ، مگر یہاں محبوب بھی بالکل بے کار اور فارغ معلوم ہوتا ہے ، جو شاعر سے بے معنی سلسلۂ کلام جاری رکھے ہوئے ہے ۔ ایسا معلوم ہوتا ہے کہ وہ شاعر کے متمول اور جوان رقیب کا منتظر ہے اور وقت گزاری کی خاطر شاعر سے دل لگی کر رہا ہے ۔ ہمارا شاعر کو مخلصانہ مشورہ ہے کہ وہ رقیب کی آمد سے پہلے ہی وہاں سے رخصت ہو جائے ورنہ اس کی دنیا اور عاقبت دونوں کے خراب ہونے کا اندیشہ ہے ۔‘‘

یہ لاجواب طنزیہ و مزاحیہ مضامین ہیں ۔ جیسا کہ پروفیسر خالد محمود نے کہا ہے ان کے موضوعات متنوع ہوتے ہیں ، اور بہت احتیاط سے موضوع منتخب کرتے ہیں ۔ مثال سفر نامۂ کشمیر ’ فردوسِ گمشدہ ‘ کی لے لیں ۔ اس سفر نامہ میں جہاں ٹراول ایجنسیوں کی چالاکیوں اور فریب کا پردہ چاک کیا گیا ہے ، وہیں حساس افراد کو بے چین کرنے والے اُن گوشوں پر روشنی ڈالی گئی ہے ، جو لوگ دیکھ نہیں پاتے ۔ ملاحظہ کریں : ’’ میں سوچنے لگا اگر امیر خسرو یا جہا نگیر نے کشمیر کے پہاڑوں ، مرغزاروں ، سبزہ زاروں اور باغوں کو دیکھنے کے ساتھ شملہ ، مسوری ، دارجلنگ اور نینی تال کے قدرتی حسن کا نظارہ کر لیا ہوتا ، ڈل جھیل کی خوب صورتی اور صفائی کا موازنہ نینی تال جھیل سے کرنے کا موقع انھیں میسر آجاتا ، لال چوک کا بازار دیکھنے کے بعد انھوں نے شملہ کے مال روڈ کی سیر کرلی ہوتی ، آج سنگینوں اور رائفلوں کے سائے میں زندگی گزارتے کشمیریوں کے چہروں سے عیاں خوف اور مایوسی کو اگر وہ دیکھ پاتے اور اسے دیکھنے کے بعد ہماچل پردیش کے مرد و زن کے لباس اور حلیے سے ٹپکتی خوشی اور خوشحالی بھی انھیں نظر آجاتی اور نینی تال اور شملہ کے مکانات اور دکانوں کی شان اور دکان داروں کے ایمان کا بھی انھیں تجربہ ہو جاتا تو کیا وہ کشمیر کے لیے ہمین است و همین است و همین است کی تکرار اپنے شعر میں کر سکتے تھے ! ‘‘

اس حصے میں خاکے بھی ہیں ، جن میں ایک خاکہ ساجد رشید مرحوم پر ہے ، جنہیں مجھ سمیت اکثر لوگ ساجد بھائی کہا کرتے تھے ۔ خاکے کا عنوان ہے ’ مخالف سمت کا آدمی ‘ ۔ اس خاکہ میں ساجد رشید مرحوم کی شخصیت مکمل طور پر عیاں ہوکر آ گئی ہے ، ملاحظہ فرمائیں : ’’ ساجد رشید سود و زیاں کے معاملے میں سود کے دشمن اور زیاں کے عاشق ثابت ہوئے ہیں اور کم از کم اس طرح انھوں نے اپنے مسلمان ہونے کا ثبوت پیش کیا ہے ۔ غالباً یہی وجہ ہے کہ کام یاب صحافی کہلائے جانے کے باوجود وہ نا کام صحافیوں کی سی زندگی گزار رہے ہیں یعنی ان کے پاس نہ اپنا مکان ہے اور نہ کسی ہندستانی بینک میں بینک بیلنس ۔ لے دے کے ایک موٹر سائیکل ہے جس کی قسطیں وہ آج تک ادا کر رہے ہیں ورنہ دوسروں کی طرح انھوں نے بھی خلیجی ممالک کے سفارت خانوں کے پاسبانوں کی بلا ناغہ قدم بوسی کی ہوتی تو ان کی بھی توند نکل آئی ہوتی ۔‘‘

اس حصے میں پرویز ید اللہ مہدی کا بھی ایک شاندار خاکہ ہے ۔ مہدی ایک اچھے طنز و مزاح نگار تھے ، حیدرآباد کے تھے ، مگر کرم بھومی پہلے ممبئی کو پھر امریکا کو بنایا اور امریکا ہی میں انتقال کر گیے ۔ فیضی صاحب کا پیش لفظ ’ آخری کتاب سے پہلے ‘ بھی خوب ہے ، جس میں انہوں نے اپنا احتساب بھی کیا ہے ۔ انتساب کی سطریں ملاحظہ کریں : ’ اندرون خانہ خندۂ زیر لب کے نام ؎ یہ ایک تبسم بھی کسے ملتا ہے ‘ ۔ طباعت ’ نایاب بکس ، نئی دہلی ‘ نے کی ہے ، اور عمدہ کی ہے ۔ صفحات 224 اور قیمت 300 روپیہ ہے ۔ موبائل نمبر 9323043113 پر رابطہ کر کے کتاب حاصل کی جا سکتی ہے ۔

ابھی ہمارے مطالعہ کی میز پر محب گرامی جناب مولانا بدرالاسلام قاسمی کی طرف سے ارسال کردہ کتابوں کا ایک سیٹ موجود ہے، اس میں سے پہلی کتاب ہے "کیا شخص زمانے سے اٹھا.
اس کتاب میں شیخ الادب حضرت مولانا مفتی محمد اسلام قاسمی رحمۃ اللہ علیہ سابق استاذ حدیث و ادب دارالعلوم دیوبند وقف کی جدوجہد اور عزم و حوصلہ سے لبریز زندگی، آپ کی تدریسی، ادبی وصحافتی خدمات اور خانگی و ذاتی احوال کا جس خوبصورتی کے ساتھ تذکرہ کیا گیا ہے اس کے لیے اس کتاب کے مؤلف، فاضل گرامی مولانا بدرالاسلام قاسمی صاحب استاد جامعہ امام محمد انور شاہ دیوبند ہمارے شکریہ کے مستحق ہیں .
میں اس عظیم پیشکش پر ان کی خدمت میں مبارکبادی کے سوغات پیش کرتا ہوں. یقینا مولانا اسلام قاسمی اپنی خدمات خاص طور پر اپنی علمیت و ادبیت، صحافت وانشاء پردازی اور تدریسِ حدیث وادب میں ایک امتیازی صفت کے مالک تھے اور اکابر کی نگرانی خاص طور پر حکیم الاسلام حضرت قاری محمد طیب صاحب رحمۃ اللہ علیہ کی آپ کو دعائیں بھی ملیں، شفقتیں بھی ملیں اور ان کی نگرانی میں آپ نے صحافتی خدمات اور تدریسی خدمات بھی انجام دیں. آپ کی یہ خدمات دارالعلوم دیوبند اور دارالعلوم وقف دیوبند کی تاریخ کا ایک روشن باب ہے. لیکن مولانا اسلام قاسمی کی زندگی کا یہ روشن باب تحریری شکل میں منصہ شہود پہ جلوہ گر نہیں ہوتا؛ اگر آپ کے صاحبزادے اس امانت کو خوبصورت انداز میں علمی دنیا کے سامنے پیش نہیں کرتے اور رفتہ رفتہ آپ کے ذکر کی تابانی کم سے کم تر ہوجاتی َجیسا کہ دیگر شخصیات کے ساتھ ہوتا رہا ہے کہ ان کی خدمات پہ مرور زمانے کے ساتھ گرد و غبار کی دبیز تہہ جم جاتی ہے اور شاگردوں کے اٹھنے کے ساتھ لوگوں کو یہ بھی پتہ نہیں رہتا کہ اس نام کی کوئی عظیم شخصیت گزری تھی.
جانشین اگر لائق و فائق ہو تو نہ صرف یہ کہ اپنے مورث کے؛ اپنے اساتذہ ومشائخ کے نام کو روشن کرتا ہے بلکہ اپنے نام کو بھی اکابر کے نام کے ساتھ زندہ جاوید بنا دیتا ہے. جس طرح امام محمد نے امام اعظم ابو حنیفہ کے ابن القیم نے علامہ ابن تیمیہ کے، علامہ سخاوی نے ابن حجر عسقلانی کے اور اخیر کے زمانے میں علامہ یوسف بنوری نے اورعلامہ بدر عالم میرٹھی نے علامہ انور شاہ کشمیری کے علوم ومعارف کو اس بھر پور انداز میں دنیا کے سامنے پیش کیا کہ استاذ کے ساتھ شاگرد کا نام بھی تاریخ کی صفات میں روشن اور لازوال ہوگیا.
ایسے ہی کچھ جلوہ گری ہمیں مولانا بدرالاسلام قاسمی میں بھی نظر آر ہی ہے کہ وفات کے فورا بعد وہ اپنے استاذ اور والد کی سوانح کی ترتیب میں لگ گئے. اتنا ہی نہیں بلکہ والد گرامی کی جو کتابیں طبع نہیں ہوئی تھیں؛ سوانح کے ساتھ ان کتابوں کی بھی اشاعت کا انہوں نے اہتمام کیا
یقیناً وہ "پدر نہ کرد پسر تمام کرد” کے مصداق ہیں کہ والد کے چھوڑے ہوئے کام کی تکمیل کی سعادت مندانہ سعی ان کے حصہ میں آئی .
مولانا بدرالاسلام قاسمی کی طرف سے ارسال کردہ کتابوں مکمل سیٹ میں” کیا شخص زمانے سے اٹھا” کے علاوہ” نگارشات اسلام” _ تصنیف مولانا مفتی اسلام قاسمی _”دارالعلوم دیوبند کی ایک صدی کا علمی سفر نامہ”_ تالیف مفتی محمد اسلام قاسمی_” شیخ الادب مولانا اسلام قاسمی کے زندگی کے کچھ پہلو”_ ترتیب مولانا بدرالاسلام قاسمی _”مقالات حکیم الاسلام” ترتیب مولانا مفتی اسلام قاسمی_” چند مقتدر شخصیات” رشحات قلم مولانا اسلام قاسمی، شامل ہیں.
ان تمام کتابوں کی بھی انہوں نے خوبصورت گیٹ اپ جاذب نظر ٹائٹل کے ساتھ اشاعت کا اہتمام کیا اور نہ صرف اہتمام بلکہ اشاعت کے بعد قارئین اور اہل علم تک پہنچانے کی انہوں نے بھرپور کوششیں بھی کیں. نہایت آب و تاب کے ساتھ اس کی رسم اجراء کی تقریب بھی منعقد ہوئی؛ جس میں ملک کے ممتاز اہل علم کی شرکت نے اس تقریب کو چار چاند لگا دیا.
یوں تو کتابوں کے اس سیٹ میں تمام ہی کتابیں اہم ہیں؛ لیکن خاص طور پر "کیا شخص زمانے سے اٹھا” نامی کتاب سوانحی ادب کی بہترین مثال ہے.
کتاب کے مؤلف جناب مولانا بدرالاسلام قاسمی جنہیں ہم بجا طور پر اپنے والد کا لائق جانشین کہہ سکتے ہیں انہوں نے اپنے والد گرامی کی میراث کی حفاظت کے سلسلہ میں جس حوصلہ مندی کا ثبوت دیا ہے یقینا وہ مثال ہے.
” کیا شخص زمانے سے اٹھا” یہ کتاب دو جلدوں پر مشتمل ہے جلد اول میں آپ کے سوانحی خاکے ہیں اس میں کئی ابواب ہیں جن میں سوانحی نقوش مثلاً آپ کی ابتدائی پرورش، تعلیمی اسفار، مدارس میں تعلیمی مراحل اور جامعہ مظاہر علوم اور دارالعلوم دیوبند میں تحصیل علم، دیگر اکابر سے خصوصی استفادہ، شعبہ خطاطی کے اساتذہ سے استفادہ، وغیرہ کا تذکرہ ہے. اس کے علاوہ جب دارالعلوم کی تقسیم کا قضیہ نامرضیہ پیش آیا تو پھر آپ نے اپنے لیے حکیم الاسلام قاری محمد طیب صاحب کے کارواں کو منتخب کیا اور تا حیات قاری محمد طیب صاحب رحمۃ اللہ علیہ اور ان کے خلف الرشید حضرت مولانا محمد سالم صاحب حضرت مولانا محمد اسلم صاحب اور خانوادۂ کشمیری کے چشم و چراغ رئیس المحدثین علامہ انظر شاہ کشمیری اور حضرت مولانا احمد خضر شاہ کشمیری کے رفیق کارواں رہے اور ان کے قائم کیے ہوئے مشن کے فروغ کو اپنا نصب العین بنا لیا. اس کے علاوہ اس جلد میں دارالعلوم وقف دیوبند میں آپ کی خدمات کا بھرپور تذکرہ بھی ہے اور بخارا وسمرقند کے سفر کی روداد بھی ہے؛ اہم تلامذہ اور ملی تنظیموں مثلا امارت شرعیہ پٹنہ، مسلم پرسنل لا بورڈ، اسلامک فقہ اکیڈمی سے وابستگی کا بھی تذکرہ ہے.
آپ کی گھریلو زندگی کیسی تھی؟ بیماری کے پانچ سال کس صبر وثبات کے ساتھ گزارے. اس کے احوال بھی درج ہیں.
تصنیفات و تراجم کا بھی تذکرہ ہے؛ نثر کے نمونے بھی دیے گئے ہیں. آپ کی سرپرستی میں جو ادارے قائم ہیں؛ ان کی تفصیل بھی دی گئی ہے اور آپ کے اوصاف حمیدہ پر بھی روشنی ڈالی گئی ہے. جس میں خاص طور پہ آپ کی وسیع المشربی، کشادہ چشمی، مسلکی تصلب کے باوجود عوام میں مسلکی گفتگو سے احتراز، غم خواری، کشادہ دستی اور تعاون و ایثار، اختلاف میں آداب کو ملحوظ رکھنا، بلند حوصلگی، خرد نوازی، حوصلہ افزائی، بے تکلفی جیسی صفات کو خاص طور پہ اہمیت دی گئی ہے اور اخیر میں کچھ یادگار دستاویزات کو ذکر کیا گیا ہے.
جبکہ جلد دوم مقالات کا مجموعہ ہے، یہ وہ مقالات ہیں جو حضرت کی وفات کے فورا بعد اکابر اہل علم کی طرف سے لکھے گئے تھے. انہیں خوبصورتی کے ساتھ مرتب انداز میں جمع کیا گیا ہے. دوسری جلد کی خوبی پہلی جلد سے بالکل الگ ہے. دوسری جلد میں آپ کو رنگا رنگ قلم اور زبان و ادب کے رنگا رنگ شہپارے ملیں گے. ہر شخصیت کے اپنے تاثرات ہیں اور اپنا رنگ وترنگ ہے. ان تاثرات کو پڑھ کر زندگی کے نقوش روشن ہوں گے. بہت کچھ سیکھنے کو ملے گا اس دوسری جلد میں باب اول احباب و معاصرین سے متعلق تحریروں پر مشتمل ہے. باب دوم تلامذہ کی تحریریں ہیں. تیسرے باب میں محبین و متعلقین کی تحریریں ہیں اور آخری باب میں منظوم خراج عقیدت کو جگہ دی گئی ہے. کل ملا کر یہ کتاب قابل تعریف اور لائق مطالعہ ہے. سوانحی ادب اور اکابر کے علوم فنون سے دلچسپی رکھنے والے ہر صاحب علم کے مطالعے میں یہ کتاب رہنی چاہیے اس کے علاوہ چند مقتدر شخصیات پہ حضرت مولانا اسلام قاسمی صاحب نے جو تحریریں لکھی تھیں انہیں اس کتاب میں جمع کر دیا گیا ہے. یہ کتاب کل 203 صفحات پر مشتمل ہے. اس میں محاسن سجاد، حضرت مولا نا منت اللہ رحمانی، حکیم الاسلام قاری طیب صاحب ، مفتی عتیق الرحمن عثمانی، قاضی مجاہد الاسلام قاسمی ،مفتی ظفیر الدین مفتاحی، مسیح الامت حضرت مولانا مسیح اللہ خان، حضرت مولانا انظر شاہ کشمیری، حضرت مولانا نعیم صاحب دیوبندی، حضرت مولاناشیخ یونس صاحب مظاہری جونپوری، حضرت مولانا اسلم صاحب، شیخ اکرام علی بہاگلپوری، حضرت مولانا عبدالحنان بالاساتھ، حضرت مفتی فضیل الرحمن عثمانی، حضرت مولانا محمد قاسم مظفرپوری مولانا اسرار الحق قاسمی، مولانا غلام نبی کشمیری، مفتی انوار الحق قاسمی، مولانا حسن باندوی و دیگر بعض شخصیات کا تذکرہ ہے. حضرت مولانا اسلام صاحب کے قلم سے نکلنے والی یہ تحریریں ایک الگ قسم کا مزہ دیتی ہیں اور سوانحی ادب کا شاہکار ہمارے سامنے آتا ہے. اس کے علاوہ مقالات حکیم الاسلام نامی کتاب حکیم الاسلام حضرت مولانا قاری محمد طیب صاحب مہتمم دارالعلوم دیوبند کے حکمت ریز منتخب مضامین کا مجموعہ ہے، جنہیں مولانا اسلام قاسمی صاحب نے جمع کیا ہے اور مرتب کیا ہے. جس میں حضرت حکیم الاسلام کی حکمت اور آپ کی خداداد صلاحیت اور مختلف احکام کی روح اور ان کی حکمتوں تک پہنچنے کی خاص صفت کی جلوہ گری ہے. "دار العلوم دیوبند کی ایک صدی کا علمی سفرنامہ” یہ وہ کتاب ہے جو اجلاس سالہ کے موقع پر مرتب کی گئی تھی؛ اس میں دارالعلوم دیوبند کے حوالے سے تمام اہم اور ضروری باتیں جمع کر دی گئی ہیں. "نگارشات اسلام” کے نام سے جو کتاب مولانا بدرالاسلام نے مرتب کی ہے، ماشاءاللہ اس میں حضرت مولانا اسلام قاسمی صاحب نے قرآنیات، حدیث، سیرت رسول اسی طرح دارالعلوم دیوبند و متعلقات، ملی مسائل، سیاسی مسائل، ذاتی زندگی، اسفار وغیرہ سے متعلق جو کچھ بھی الگ الگ اوقات میں تحریریں لکھی تھی انہیں یکجا کر دیا ہے . یہ کتاب بھی خاصے کی چیز ہے.
الحاصل اس پورے سیٹ کی ہر کتاب اپنی جگہ جداگانہ شناخت اور ممتاز حیثیت رکھتی ہے.
ہر گل را رنگ وبوئے دیگر است.
دعاء ہے کہ اللہ تعالی ان کے علمی کاوشوں کو قبول فرمائے اور ان کے ذریعے ان کے والد گرامی کی چھوڑی ہوئی وراثت کو پوری امت تک پہنچائے. یہ خدمات ان کے اور ان کے مرحوم والد کے لیے ذخیرہ آخرت بنیں اور اللہ کا فضل و کرم ہر حال ان کی دستگیری فرمائے۔ آمین

انگریزی زبان کا ایک لفظ ہے Myth جس کے کئی معنوں میں ایک معنی بھرم بھی ہے ۔ بھرم لفظ کے معنی ہیں کسی جھوٹ کو سچ مان لینا ، بلکہ ایسا سچ مان لینا کہ جھوٹ ، جو سچ مانا گیا ہے ، ہمیشہ کے لیے مٹ جائے ۔ ایسا ہی ایک بھرم یہ کہنا یا ماننا ہے کہ ’ اردو مسلمانوں کی زبان ہے ہندوؤں کی نہیں ۔‘ معروف صحافی سہیل انجم نے اپنی تازہ ترین کتاب ’ اردو صحافت کے فروغ میں غیر مسلم صحافیوں کی خدمات ‘ کے ذریعے اس متھ یا بھرم کو توڑنے یا مٹانے کی قابل قدر کوشش کی ہے ۔ میں سہیل انجم کی کئی کتابوں پر تبصرہ کر چکا ہوں ، اور اُن کی کتابوں کو پڑھ کر میری یہ رائے بنی ہے کہ وہ اردو صحافت کے ایک مورخ ہیں ۔ اس کتاب نے میری رائے کو مزید پختہ کیا ہے ۔ لوگ خوب جانتے ہیں کہ آج ملک پر ، ایسے عناصر قابض ہیں ، جو مسلمانوں اور ہندوؤں کے درمیان نفرت کی ایک ایسی دیوار کھڑی کرنا چاہتے ہیں ، جسے کبھی گرایا نہ جا سکے ، اور دونوں ہی قوموں کے درمیان اتحاد اور یکجہتی کی ، بھائی چارے اور دوستی کی مشترکہ بنیادیں ہمیشہ کے لیے تباہ و برباد ہو جائیں ۔ اردو زبان ان مشترکہ بنیادوں میں سے ایک ہے ۔ اب اردو کو صرف مسلمانوں کی زبان کا درجہ دے دیا گیا ہے ، اور ہندی بلکہ سنسکرت آمیز ہندی ہندوؤں کی زبان قرار پائی ہے ۔ ایک تلخ حقیقت یہ بھی ہے کہ فرقہ پرست عناصر کو – جو دونوں ہی جانب موجود ہیں – اپنی اپنی قوم کے کچھ ناسمجھوں کی حرکتوں سے اِس دراڑ کو ، جِسے بہت سے لوگ پاٹنے کی کوشش اب بھی کر رہے ہیں ، وسیع کرنے کا اور اُردو زبان کو مسلمانوں کی زبان قرار دینے کا موقع ملا ہے ، نتیجتاً زبان کو بہت نقصان پہنچا اور رہی سہی کَسر آج کے حکمراں پوری کر رہے ہیں ۔ لیکن اُردو کو صرف مسلمانوں کی زبان قرار دینا اور ہندوؤں کو اس زبان سے خارج کر دینا ایک متھ ایک بھرم ہے ، جسے اس کتاب کے توسط سے رد کیا جا سکتا ہے ۔
کتاب میں 55 غیر مسلم صحافیوں کا تذکرہ ہے ، جن میں اخبار ’ جامِ جہاں نما ‘ کے دو صحافیوں ہری ہردت اور سدا سکھ لعل کے نام بھی شامل ہیں ، بلکہ یہ نام سر فہرست ہیں اور سہیل انجم نے کتاب کا انتساب بھی انہی دو کے نام کیا ہے ۔ اس لیے کہ یہ دونوں ہندوستان کے اولین صحافی بھی ہیں اور اردو صحافت کے بنیاد گزار بھی ۔ صاحبِ کتاب اپنے ’ پیش لفظ ‘ میں لکھتے ہیں : ’’ اب تقریباً یہ بات تسلیم کر لی گئی ہے کہ ’ جامِ جہاں نما ‘ ہی اردو کا پہلا اخبار تھا … اردو کا دوسرا اخبار پندرہ سال بعد مولوی محمد باقر نے دہلی سے 1837 میں نکالا جس کا نام ’ دہلی اردو اخبار ‘ تھا ۔ اس دوران اردو کے کئی اخبار نکلے ۔‘‘ یاد رہے ’ جامِ جہاں نما ‘ کے ایڈیٹر سدا سکھ لعل اور اس کے مالک ہری ہر دت تھے ، جو خود ایک صحافی تھے ۔ سہیل انجم مزید لکھتے ہیں : ’’ 1822 سے لے کر 1900 تک بے شمار غیر مسلموں نے اردو اخبارات نکالے جِن میں سے کئی بے حد معیاری اور مقبول تھے ۔ متعدد ہندو صحافیوں نے بھی مسلم صحافیوں کے مانند جنگِ آزادی میں شرکت کی اور اپنے اخبارات کے توسط سے برٹش حکومت کے خلاف جنگ لڑی ۔ یہاں اس حقیقت کی یاددہانی ضروری ہے کہ اردو صحافت کی بنیاد غیر مسلموں نے رکھی اور انہوں نے مسلم صحافیوں کے ساتھ اس بنیاد پر شاندار محل کی تعمیر کی ۔ اگر یہ کہا جائے کہ اردو صحافت کے فروغ میں غیر مسلموں کی زبردست خدمات ہیں تو بیجا نہیں ہوگا ۔‘‘ ’ پیش لفظ ‘ میں اس بات پر بھی روشنی ڈالی گئی ہے کہ اس کتاب کی ضرورت کیوں پیش آئی ؟ ’’ وائے افسوس کہ اس موضوع پر تادمِ تحریر کوئی باضابطہ اور کتابی کام نہیں کیا گیا ۔ کچھ مصنفوں اور قلم کاروں نے الگ الگ مضامین میں ان کی ( غیر مسلم صحافیوں کی ) خدمات کو سراہا اور خراجِ عقیدت پیش کیا ہے ، لیکن جتنے بھرپور انداز میں یہ کام ہونا چاہیے تھا ، نہیں ہوا … میری ایک عرصے سے اس موضوع پر کام کرنے کی خواہش رہی ہے ، اس کے لیے میں مواد اکٹھا کرتا رہا … ابتدا میں یہ خیال تھا کہ سوا سو یا ڈیڑھ سو صفحات پر مشتمل کتاب تیار ہو جائے گی ۔ لیکن جب میں نے کام شروع کیا تو وہ پھیلتا گیا ۔ حالانکہ میں اس کام سے مطمئن نہیں ہوں ۔ یہ ایک نامکمل اور ادھورا کام ہے ۔ اگر مزید تحقیق کی جائے اور غیر مسلم صحافیوں کی سوانح اور ان کے اخبارات کی تفصیلات پیش کی جائیں تو کم از کم ایک ہزار صفحات کی کتاب تیار ہو سکتی ہے ۔ میری خواہش ہے کہ میں اس نامکمل کام کو مکمل کروں ۔‘‘ اللہ اس خواہش کو پورا کروائے ، آمین ۔ کسی ادارے کو سامنے آکر اس اہم کام میں سہیل انجم کی مدد کرنا چاہیے ۔
کتاب میں 55 غیر مسلم صحافیوں کے تذکرہ کے علاوہ مصنف کے 13 مضامین بھی شامل ہیں ۔ مضامین اور غیر مسلم صحافیوں کے تذکرہ پر بات ہوگی ، مگر اس سے پہلے علی گڑھ کے نوجوان محقق اسعد فیصل فاروقی کے ’ مقدمہ ‘ کا ذکر ہوجائے ۔ فاروقی نے ابتدا ہی میں یہ واضح کر دیا ہے کہ آج اردو زبان کو مسلمانوں کی زبان سمجھا جاتا ہے اور یہ بات ذہن میں بیٹھی ہوئی ہے کہ یہ زبان باہر سے آئی ہے ، لیکن سچ یہ ہے کہ زبان کا مذہب سے کوئی تعلق نہیں ہوتا ، تمل ناڈو ، مغربی بنگال ، آسام ، کیرالہ وغیرہ کے مسلمانوں کی مادری زبان نہ ہندی ہے اور نہ اردو ، لیکن اردو تمام ہندوستان اور ہندوستانیوں کے درمیان ایک رابطہ کی زبان رہی ہے ۔ اور اردو کی مقبولیت میں اردو صحافت کا مثبت کردار رہا ہے ۔ وہ لکھتے ہیں : ’’ یہاں یہ واضح کرتے چلیں کہ اردو صحافت کی یہ ترقی صرف مسلمانوں کی مرہون منت نہیں رہی بلکہ اس کی ترقی میں غیر مسلم صحافیوں کا بھی کلیدی کردار رہا ہے ۔‘‘ اپنی تحریر میں فاروقی نے اردو صحافت کی مختصر تاریخ اور اس پر کیے گیے متعدد تحقیقی کاموں کا ذکر کیا ہے ۔ ان کا کہنا ہے کہ سہیل انجم کی کتاب اسی تحقیقی سلسلے کی ایک اہم کڑی ہے ۔ وہ لکھتے ہیں : ’’ ایک ایسے وقت میں جب فرقہ پرستوں کی جانب سے ہندوستان میں اردو زبان کو بار بار تعصب کا شکار بنایا جاتا رہا ہے اور اس کو مسلمانوں کی زبان کے طور پر پیش کیا جا رہا ہے سہیل انجم نے غیر مسلموں کی اردو صحافتی خدمات پر جو قلم اٹھایا ہے وہ قابلِ تحسین ہے اور اس موضوع پر ایک بڑا کام ہے ۔‘‘
سہیل انجم کے جو مضامین ہیں اُن میں سے ایک کا عنوان ہے ’ اردو صحافت کی دو سو سالہ تاریخ : ایک مختصر جائزہ ‘ ، اس میں مصنف نے کوزہ میں سمندر کے مصداق اردو صحافت کی پوری تاریخ چند صفحات میں سمو دی ہے ۔ دوسرا مضمون ’ اردو کا پہلا اخبار جامِ جہاں نما ‘ ہے ، اس میں اردو کے اس پہلے اخبار کی تاریخ تفصیل کے ساتھ پیش کر دی گئی ہے ۔ سہیل انجم نے مختلف حوالوں سے یہ نتیجہ نکالا ہے کہ جامِ جہاں نما اردو کا پہلا اخبار ہے ، وہ لکھتے ہیں : ’’ اردو کے پہلے اخبار کا مسٗلہ ہمیشہ ہمیشہ کے لیے حل ہو گیا ہے ۔‘‘ تیسرا مضمون ’ اردو صحافت کی خصوصیات ‘ پر ، چوتھا مضمون ’ غیر مسلم صحافیوں کی کہکشاں ‘ اور پانچواں مضمون ’ اخبار سوراجیہ کی قربانیاں ‘ کے عنوان سے ہے ۔ یہ مضمون اخبار سوراجیہ کی جنگِ آزادی میں خدمات کو اجاگر کرتا ہے ۔ اس اخبار میں ’ بغاوت ‘ کی خبریں شائع ہوتی تھیں ، اس کے چار ایڈیٹروں کو قید و بند کی صعوبتوں سے گزرنا پڑا تھا ۔ یہ اخبار الہ آباد سے ، لوکمانیہ تلک کے آشیرواد سے نکلا تھا ۔ اس مضمون کے بعد 55 غیر مسلم صحافیوں کے تذکرے ہیں ، جِن میں کئی نام ہم سب کے لیے شناسا ہیں ، جیسے منشی نول کشور ، منشی دیا نرائن نگم ، لالہ لاجپت رائے ، سردار دیوان سنگھ مفتون ، فکر تونسوی ، کلدیپ نیر ، جی ڈی چندن ، گوپال متل ، موہن چراغی ، مخمور جالندھری ، سوم آنند ، بلراج مین را وغیرہ ۔ ایک نام پی پی مسیح کا ہے ، جو ان دنوں روزنامہ ’ تیج ‘ کے ایڈیٹر ہیں ۔ سہیل انجم نے ’ ہندو مذہب کے اخبارات ‘ ، ‘ سکھ مذہب کے اخبارات ‘ اور ’ عیسائی مشنریوں کے اخبارات ‘ کے عنوان سے ان کی تفصیلات دی ہیں ۔ ’ ہند سماچار کی کہانی ‘ ہے ، سنتوش بھاٹیہ پر ایک مضمون ہے ، اردو کے ایک امریکی مجاہد ڈاکٹر برائن کیو سلور پر ایک مضمون ہے ۔ ڈاکٹر برائن ’ وائس آف امریکہ ‘ کی اردو سروس کے سربراہ تھے ۔ ایک مضمون کا عنوان ’ اردو اخبارات کی ڈائرکٹریز ‘ ہے ، اور ایک مضمون ’ اردو صحافیوں کی خدمت میں ‘ کے عنوان سے ہے ، جِس میں وہ لکھتے ہیں : ’’ اردو صحافیوں کی جو آخری نسل ہے وہ تو اپنا کام کر چکی ہے ۔ دوسری نسل بھی اپنا کام مکمل کرنے کے راستے پر گامزن ہے ۔ البتہ جو تیسری نسل ہے اس کو ابھی اس راستے پر بہت دور تک جانا ہے ۔ اس لیے ضرورت اس بات کی ہے کہ وہ صحافت کے رموز و نکات سے واقف ہو ۔ خبر سازی کیا ہوتی ہے ۔ جملے کیسے لکھے جاتے ہیں ۔۔۔‘‘ اس گزارش پر غور بلکہ عمل ضروری ہے ، تاکہ اردو صحافت کا وجود باقی رہے ۔ کتاب کے آخر میں ’ ماخذ ‘ اور مصنف کے سوانحی کوائف ہیں ۔ یہ ایک شاندار کتاب ہے ، اس کے لیے سہیل انجم مبار کباد کے مستحق ہیں ، اور ’ نعمانی کئیر فاؤنڈیشن ، لکھنئو ‘ بھی جس نے بڑی خوب صورتی سے یہ کتاب شائع کی ہے ۔ کتاب 368 صفحات پر مشتمل ہے ، قیمت 500 روپیے ہے ۔ اسے حاصل کرنے کے لیے 9818195929 پر رابطہ کیا جا سکتا ہے ۔

کوثر مظہری کی شناخت کے کئی حوالے ہیں۔ درس و تدریس کے فرائض کی ادائیگی کے ساتھ وہ ادبی دنیا میں بھی فعال اور سرگرم ہیں۔ ادب میں ان کی شناخت ناقد، محقق، شاعر، ناول نگار اور مترجم کے طور پر ہے۔ مرتب کی حیثیت سے بھی کوثرمظہری کا نام نمایاں ہے۔ اس ضمن میں جواز و انتخاب ، انتخاب کلام جمیل مظہری، مظہرجمیل، ’نئی نظم نیا سفر (1960 کے بعد)‘ ’ بنواس‘ اور نئی نظم نیا سفر (1960کی بعد) قابل ذکر ہیں۔
پہلی کتاب ’جواز و انتخاب‘ (80 اور بعد کی غزلیں) ہے۔ اس کی اشاعت 2001میں ہوئی ہے۔ اس کتاب کی خاص بات کوثر مظہری کا طویل مقدمہ ہے۔ اسے انھوں نے دو چہروں میں منقسم کیا ہے۔ پہلا چہرہ: جدیدیت وجودیت کا چہرہ اور دوسرا : مابعد جدیدیت جھوٹا سچ ہے۔ دونوں چہروں کے حوالے سے بیباکانہ انداز میں مفصل اور مبسوط گفتگو کی گئی ہے۔ پہلے حصے میں انھوں نے جدیدیت، وجودیت کے معانی و مفاہیم پر بات کی ہے۔ جدیدیت کیا ہے اور جدیدیت کے وجود میں آنے کا پس منظر کیا ہے۔ اس بارے میں ہندوستانی اور مغربی مفکرین کی کیا سوچ ہے ان تمام پر اچھی گفتگو کی گئی ہے۔ انھوں نے مغرب اور مشرق کی بیداری اور بالیدہ سوچ کے حوالے سے بھی گفتگو کی ہے۔ نہ جانے کیوں ہم ہندوستانی ہر میدان میں مغرب سے بہت پیچھے رہتے ہیں۔ چاہے وہ سائنس وٹیکنالوجی اور جدیدترقیات کا معاملہ ہو یا پھر ادب کا ، ہم نصف صدی سے بھی پیچھے رہتے ہیں۔نظریہ جدیدیت کا بھی یہی معاملہ ہے۔ مغرب میں اس نظریے کی شروعات 1890 میں ہی ہوگئی جب کہ ہمارے اس نظریے کے ختم ہونے کے کئی برسوں بعد میں شروعات ہوتی ہے۔ مانا جاتا ہے کہ ہندوستان میں جدیدیت کی بنیاد 1960 کے آس پاس پڑی تھی۔ کوثر صاحب بعد میں وجودیت اور داخلیت پر بھی بحث کی ہے کہ وجودیت کب اپنے معانی و مفاہیم سے نکل کر داخلیت کی شکل اختیار کرلیتی ہے۔ اس تعلق سے کوثر مظہری نے پروفیسر لطف الرحمن کا حوالہ دیا ہے۔ وہ اپنی کتاب ’جدیدیت کی جمالیات‘ میں لکھتے ہیں:
’’ایک سائنس داں کے لیے ایک ڈوبتا ہوا بچہ محض ایک گوشت پوست اور خلیوں کا مجموعہ ہوتا ہے۔ یہاں اس کے جذبات ساکت ہوتے ہیں، مگ رجونہیاسے معلوم ہوتا ہے کہ ڈوبنے والا بچہ اسی کا اپنا بیٹا ہے تو صورت حال یک لخت بدل جاتی ہے اور وہ فوراً بچے کی جان بچانا چاہتا ہے۔ یہی ہے داخلیت۔‘‘
(جواز وانتخاب، ص 14 بحوالہ جدیدیت کی جمالیات، ص 84)
دوسرا چہرہ ’مابعد جدیدیت: جھوٹا سچ‘ ہے۔ یہ نظریہ بھی کافی پیچیدہ ہے۔ مانا یہ جاتا ہے کہ ادب میں اس کی بنیاد جدیدیت کے رد عمل کے طور پر پڑی ہے۔ ادب میں جب بھی کسی نئے نظریے یا تحریک کا آغاز ہوتا ہے ، تو بہت بڑے بڑے دعوے کیے جاتے ہیں۔ ایسا لگتا ہے کہ اب ایک انقلاب برپا ہوجائے گا۔ مگر جیسے جیسے اس نئے نظریے یا تحریک سے لوگ روشناس ہوتے جاتے ہیں، ویسے ویسے اس کی قلعی کھلتی جاتی ہے۔ تقریباً یہی حال مابعد جدیدیت کا بھی ہے۔ اس نظریے کے آغاز سے پہلے جدیدیت کی جس طرح سے چوطرفہ مذمت کی گئی، ایسی صورت حال کبھی نہیں دیکھی گئی۔ یہ بھی سچ ہے کہ ادب میں تبدیلیاں ناگزیر ہیں، ہر عہد کے اپنے اپنے تقاضے ہوتے ہیں، انھیں ملحوظ خاطر رکھ کر ہی ادب لکھا جاتا ہے۔ بہرحال مابعد جدیدیت میں جتنے بھی دعوے کیے گئے وہ بعد میں کھوکھلے ثابت ہوئے۔
اگر جدیدیت نے ادب خاص طور پر شاعری کو نقصان پہنچایا ہے تو ’مابعد جدیدیت‘ بھی کچھ اس سے پیچھے نہیں ہے۔ مابعد جدیدیوں کی سب سے بڑی غلطی یہ تھی کہ انھوں نے پرانی تمام تعریفوں کو مسترد کردیا۔ جس کا اثر انسانی شناخت پر بھی پڑا۔ میری ناقص رائے میں مابعد جدیدیت نے ’آزادی‘ کے نام پر سب سے بڑا دھوکہ ادب کے ساتھ یہ کیا کہ ہر ایرے غیرے کو شاعر بنا دیا۔ شاعری کو قواعد کے تمام بندھنوں سے آزاد کردیا، بس یہ ضروری ہوگیا کہ بات سمجھ آجائے کہ شاعر کیا کہنا چاہتا ہے، ساتھ ہی انھوں نے شعری اصناف پر بھی بہت زور دیا۔ دوسری بڑی خرابی یہ کہ ان کا دعوا تھا کہ گھٹن بھرے ماحول سے نکال کر صاف اور شفاف فضا میسر آئے گی، یہ دعویٰ بھی جھوٹا ہی ثابت ہوا۔ میرے خیال میں آج ہمارے سماج میں پہلے سے کہیں زیادہ خوف و حراس اور ڈر کا ماحول ہے، پہلے سے زیادہ گھٹن بھری زندگی آج لوگ جی رہے ہیں۔ جب سماج کی یہ حالت ہے تو بھلا ادب اس سے کیسے بچ سکتا ہے۔ اس طرف کوثر مظہری نے اشارہ کیا ہے۔ وہ لکھتے ہیں:
’’آج کا آدمی بھی تنہائی کا شکار ہے آج بھی خوف وہراس ہے ۔رشتوں کی شکست و ریخت جیسے موضوعات آج بھی ہیں۔ البتہ ہماری شاعری میں ،ہمارے ادب میں اہمال و ابہام کی پرتیں اتنی دبیز نہیں رہ گئی ہیں…‘‘(جواز و انتخاب، ص 35)
مابعد جدیدیوں نے اہمال و ابہام کو شاعری کے لیے سم قاتل سمجھا ہے۔ شاید اس میں مبالغہ آرائی ہے۔ شاعری میں ابہام کو بہت سے مفکرین نے ضروری امر قرار دیا ہے۔ ہاں اس کے کچھ حدود بھی متعین کیے گئے ہیں، مفکرین کا ماننا ہے کہ شاعری میں ابہام اس تک ضروری ہے کہ وہ علامت نہ بن جائے۔ میرا جی، ن م راشد، اختر الایمان، مجید امجد وغیرہ جیسے عظیم شاعروں کے یہاں ابہام کی کثرت ہے۔ اردو کے علاوہ انگریزی میں ایذرا پاؤنڈ اور ٹی ایس ایلیٹ کی شاعری میں بھی ابہام کثرت سے پایا جاتا ہے۔ ابہام کے معتقدین کا ماننا ہے کہ اگر شاعر کو پڑھتے ہی اس کی تمام پرتیں آسانی سے کھل جائیں تو پھر وہ شاعری کہاں رہ گئی ہے۔ تھوڑا سسپنس تھوڑا ابہام بہت ضروری ہے۔
اگر کوئی نظریہ یا تحریک کسی نظریے کے رد کے طور پر وجود میں آتی ہے تو اس کا ایک واضح منشور بھی ہونا چاہیے۔ جیسے ’جدیدیت‘ کا کوئی واضح منشور نہیں تھا تقریباً یہی صورت حال ’مابعد جدیدیت‘ کے ساتھ بھی ہے۔ مغرب میں اس کی جو واضح اور جامع تعریف کی گئی ہے وہ ہے ’صورت حال‘۔ ’مابعد جدیدیت‘ کا اطلاق تہذیب و ثقافت یعنی کلچر سے ہوتا ہے۔ اگر مغرب تہذیب و ثقافت اور تمدن کے اعتبار سے اعلی و ارفع ہے تو یہ اس اصطلاح صرف وہیں تک محدود ہے۔ اس ضمن میں بعد جدیدیت کے حوالے سے لیوتار کی کتاب The Postmodern condition قابل ذکر ہے۔ کوثر صاحب مابعد جدیدیت کی تعریف لفظ ’صورت حال‘ پر مثالوں کے ذریعے مدلل روشنی ڈالی ہے۔ ’مابعد‘ کی اصطلاح کے مفہوم میں خود پروفیسر گوپی چند نارنگ بھی تذبذب کا شکار ہیں۔ وہ لکھتے ہیں:
’’مابعد جدیدیت کا تصور ابھی زیادہ واضح نہیں ہے اور اس میں اور پس ساختیات میں جو رشتہ ہے ، اس کے بارے میں بھی معلومات عام نہیں… لہٰذا پس ساختیات کا زیادہ تعلق تھیوری سے ہے اور مابعد جدیدیت کا معاشرے کے مزاج اور کلچر کی صورت حال سے ہے، تاہم ایسا نہیں ہے کہ مابعدجدیدیت کو تھیوری دینے یا نظریانے کی کوشش نہ کی گئی ہو۔ ایسی کچھ کوششیں ہوئی ہیں اور یہ سلسلہ جاری ہے۔‘‘
(ایضاً، ص 26 بحوالہ اردو مابعد جدید ایک مکالمہ، ص 19)
اس اقتباس سے یہ سوال ضرور قائم ہوتا ہے کہ جب نارنگ صاحب اس اصطلاح کے بارے میں خود ہی انتشار و تذبذب کے شکار تھے تو پھر ’جدیدیت‘ کے حشر کو دیکھتے ہوئے انھیں کیا پڑی تھی کہ ’مابعدجدیدیت‘ کی اصطلاح کو ادب میں مروج کیا جائے۔ مستقبل میں اردو ادب کو ’مابعد جدیدیت‘ سے فائدہ ہوگا یا نقصان، اس تعلق سے کوثر صاحب لکھتے ہیں:
’’…دیکھاجائے تو ’مابعدجدیدیت‘ اردو والوں میں آکر بری طرح پھنس گئی ہے۔ جدیدیت بھی پھنس گئی تھی مگر خیر، وہ بخیر و خوبی بیس پچیس برسوں میں واپس چلی گئی مگر اس ’بتِ ہزار شیوہ‘ (مابعد جدیدیت) کا کیا ہوگا؟ کیا اس کی عشوہ طرازیوں سے اردو کا کچھ بھلا ہوسکے گا؟ اردو شعر و ادب کے ماتھے کا ستارہ مزید درخشاں ہوسکے گا؟ جس طرح جدیدیت کے لیے وجودیت اساس بنی اسی طرح اس ’مابعد جدیدیت‘ کے لیے مکالمے یعنی Discourse کو بنیاد تصور کیا گیا ہے۔ یہ لفظ مکالمے کے لیے استعمال ہوتا ہے۔ کیا یہ مکالمہ وہی ہے جو Dialogue ہے، شاید نہیں…‘‘(ایضاً، ص 26)
’جواز و انتخاب‘ میں صاحب مرتب نے مقدمے کے علاوہ 39 غزل گو شعراکو اس کتاب کا حصہ بنایا ہے۔ ان شعرا میں عبدالاحد ساز، سجاد سید، ابراہم اشک، شہباز ندیم ضیائی، فرحت احساس، شمیم طارق، اظفر جمیل، راشد جمال فاروقی، مہتاب حیدر نقوی، شہپر رسول، اسعد بدایونی، ارشد عبدالحمید، رئیس الدین رئیس، عقیل نعمانی، راشد طراز، خورشید اکبر، عالم خورشید، فاروق انجینئر، ملک زادہ جاوید، شکیل جمالی، شمس رمزی، عمران عظیم، جمال اویسی، سلیم انصاری، عطا عابدی، ریاض لطیف، نعمان شوق، احمد محفوظ، سراج اجملی، رسول ساقی، نوشاد احمد کریمی، مشتاق صدف، طارق متین، ظہیر رحمتی، خالد عبادی، شکیل اعظمی،راشد انور راشد، سرورالہدیٰ، عادل حیات شامل ہیں۔ واضح رہے کہ کتاب میں صرف مرد غزل گو شعرا شامل ہیں۔ ہر شاعر کی تاریخ پیدائش کے لحاظ سے فہرست سازی کی گئی ہے۔ تمام شعرا کے سوانحی کوائف کے ساتھ آٹھ آٹھ غزلیں شامل کی گئی ہیں۔ ہر شاعر پر کسی نہ کسی کا مضمون بھی شامل ہے۔ ان مضامین میں شاعر کے غزلیہ پہلوکوہی گفتگو کا حصہ بنایا گیا ہے۔ 10 شعرا ایسے ہیں جن پر کوثر صاحب نے خود مضمون تحریر کیے ہیں۔ ’جواز و انتخاب‘ کی بھی ادبی حلقوں میں کافی پذیرائی ہوئی ہے۔
دوسری کتاب ’انتخاب کلام جمیل مظہری‘ ہے۔ اس کی اشاعت ساہتیہ اکادمی کے زیراہتمام2011 میں ہوئی ہے۔ یہ کتاب مجموعی طور پر 312 صفحا ت پر محیط ہے۔ کتاب کی شروعات کوثر صاحب کے مقدمے سے ہوتی ہے۔ اسے کتاب کا پہلا حصہ بھی سمجھا جاسکتا ہے۔ 74 صفحات پر مشتمل اس مقدمے میں سب سے پہلے ’رنگ حیات‘ کے تحت جمیل مظہری کی پیدائش، بچپن، تعلیم و تربیت اور ان کی شخصیت کے مختلف پہلوؤں پر روشنی ڈالی گئی ہے۔ اس کے بعد ان کی نظم نگاری، غزل گوئی، مرثیہ نگاری اور مثنوی نگاری کے حوالے سے بہت جامع اور مفصل گفتگو کی گئی ہے۔ دوسرا حصہ شاعری کے انتخاب کا ہے جس میں جمیل مظہری کی مشہور نظمیں، غزلیں، مرثیے، قصیدہ، مثنوی، رباعیات شامل ہیں۔ اس انتخاب کے تعلق سے کوثر صاحب مقدمے کے آخر میں لکھتے ہیں:
’’جمیل مظہری کے تخلیقی وجدان اور فکری اجتہاد پر میں نے جو بھی روشنی ڈالی ہے وہ قارئین کی خدمت میں پُرخلوص جذبے کے ساتھ پیش کرنے کی سعادت حاصل کرتا ہوں۔ اندازہ یہ ہوا کہ جمیل مظہری کا تخلیقی تناظر مزید مطالعے اور تجزیے کامتقاضی ہے۔‘‘ (انتخاب کلام جمیل مظہری، ص 72)
ایسا نہیں ہے کہ کوثر صاحب کے اس انتخاب کے بعد جمیل مظہری کے کلام پر مزید کسی انتخاب کی گنجائش نہیں ہے۔ یہ بھی ضروری نہیں ہے کہ کوثر صاحب نے جن نظموں، غزلوں اور مرثیے کو اپنے انتخاب کا حصہ بنایا ہے، دوسرا مرتب بھی انہی کو اپنے انتخاب کا حصہ بنائے۔ اصل میں ترتیب کے بھی کئی طریقے ہوتے ہیں۔ زیادہ تر مرتبین کے انتخاب کا مقصد یہی ہوتا ہے کہ جس کے کلام کا انتخاب تیار کیا جارہا ہے اس کے مشہور کلام اس کا حصہ بن جائیں۔ مگر بعض مرتبین کی سوچ اس سے ہٹ کر ہوتی ہے۔ وہ اس شخص کے ان کلام پر بحث کو بامعنی بتاتے ہیں جن پر لوگوں نے کم لکھا ہے یا بیکار سمجھ کر اسے نظر انداز کردیا ہے یا ادب میں ایسے کلام پربحث کو تضیع اوقات میں شمار کرتے ہیں۔ بہرحال یہ بھی ایک موضوع ہے جس پر طویل بحث ہوسکتی ہے۔ جمیل مظہری کی ادبی خدمات کے وسیع دائرے کو دیکھتے ہوئے اس انتخاب کی اشد ضرورت تھی۔ اس لحاظ سے کوثر صاحب کی یہ کاوش لائق ستائش بھی ہے اور لائق تقلید بھی۔
تیسری کتاب ’مظہرجمیل‘ ہے۔ 504 صفحات پر مشتمل اس کتاب کی اشاعت 2013میں ہوئی ہے۔اس کا بہت جلد دوسرا ایڈیشن بھی شائع ہوا۔ 2014 میں عرشیہ پبلی کیشنز کے زیراہتمام اس کتاب کا دوسرا ایڈیشن منظرعام پر آیا۔ اس میں مقدمے اور سمینار کی رپورٹ کے علاوہ کل 37مضامین شامل ہیں۔ ’ابتدائیہ‘ کے تحت 3 مضامین، ’نظم نگاری‘ 7، ’غزل گوئی‘ 4، ’مرثیہ نگاری‘ 3، ’مثنوی‘ 2، ’رباعی نگاری‘ 1، ’قصیدہ نگاری‘ 1، ’ظریفانہ شاعری‘ 1، ’فکشن نگاری‘ 2، ’فکاہات‘ 2، ’تنقید نگاری‘ 3، ’تجزیے‘ 4، ’دیگریات‘ 3، ’انٹرویو‘1، شامل کتاب ہیں۔ آخر میں ’سمینار کی رپورٹ‘ کے تحت ’علامہ جمیل مظہری دہلی‘ میں ابوظہیر ربانی نے اچھی رپورٹنگ کی ہے۔ جمیل مظہری کی ادبی خدمات کا دائرہ بہت وسیع ہے۔ اسے کسی ایک کتاب میں یا سمینار میں سمیٹنا بہت مشکل کام ہے۔ ایسی شخصیت پر گفتگو کا سلسلہ جتنا دراز ہوگا ، اتنی ہی پرتیںکھلتی جائیں گی۔ ان کے حوالے سے کوثر صاحب کے سمینار اور پھر کتاب کا مقصد شاید ان کی شخصیت اور خدمات کے دائرے کو وسیع سے وسیع تر کرنا تھا۔ اس حوالے سے کوثر صاحب ’مظہرجمیل‘ کے مقدمے میں لکھتے ہیں:
’’مجھے یہ کہنے میں ذرا بھی تامل نہیں کہ جمیل مظہری کی ادبی حیثیت ایسی ہے کہ ان پر وقتاً فوقتاً گفتگو ہوتی رہنی چاہیے۔ ان کی ادبی نگارشات کی اتنی جہتیں ہیں کہ اگر ان کا احاطہ ایمانداری سے کیا جائے تو کم ازکم پچاس مقالے درکار ہوں گے اور میں یہ بات بلامبالغہ کہہ رہا ہوں اور ذمّہ داری کے ساتھ کہہ رہا ہوں۔‘‘
(مظہرجمیل، ص 9)
جمیل مظہری کی شخصیت اور ادبی خدمات پر یہ بہت مفصل اور جامع کتاب ہے۔ کوثر صاحب کی برسوں سے یہ خواہش تھی کہ اس حوالے سے ایک ضخیم کتاب تیار کی جائے، سویہ خواہش پوری ہوگئی۔ اس کتاب کا خاکہ ان کے ذہن میں بہت پہلے سے موجود تھا جسے جلا بخشنے میں سمینار نے کلیدی رول ادا کیا۔ یہ دو روزہ سمینار27-28 اپریل 2012 کو منعقد کیا گیا تھا۔ سمینار میں پڑھے گئے مقالوں اور کچھ دیگر مضامین کو کتابی صورت میں ’مظہرِجمیل‘ کے نام سے شائع کرایا گیا۔ حسب عادت کوثر صاحب نے اس کتاب کے لیے بھی طویل مقدمہ تحریر کیا ہے۔ کتاب میں شامل سبھی مضامین کا کوثر صاحب نے بھرپور نچوڑ پیش کیا ہے۔ اگر کسی کے پاس اتنا وقت نہیں ہے کہ پوری کتاب کا مطالعہ کرسکے، تو اسے اس مقدمے کا مطالعہ ضرور کرنا چاہیے۔
چوتھی کتاب ’نیا ناول نیا تناظر‘ ہے۔مظہر فاؤنڈیشن انڈیا (رجسٹرڈ)، دہلی کے زیراہتمام یہ کتاب 2021 میں قومی اردو کونسل، نئی دہلی کے مالی تعاون سےمنظرعام پر آئی۔ 536 صفحات پر مشتمل اس کتاب کی قیمت محض 308روپے ہے۔ کوثرمظہری کے علاوہ اس کتاب کے مرتبین میں امتیاز علیمی کا نام بھی درج ہے۔ ’اردو ناول اکیسویں صدی میں ( کوثر مظہری)، ’ناول اور ہم‘ (خالد جاوید)، ’اکیسویں صدی میں اردوناول ‘ (مولا بخش)، ’اکیسویں صدی میں ناول کی اہمیت، انکشافات اور امکانات‘ (ابوبکرعباد)، ’مکالمہ اکیسویں صدی کے ناولوں پر‘ (امتیاز احمد علیمی) کے علاوہ 35 ناولوں پر تجزیے شامل کیے گئے ہیں۔ ان میں کئی چاند تھے سرآسماں:شمس الرحمن فاروقی (تجزیہ نگار: رشید اشرف)، بنارس والی گلی: فیاض رفعت(شہزاد انجم)، اگر تم لوٹ آتے: آچاریہ شوکت خلیل (واحد نظیر)، بُلّہا کیہ جاناں میں کون: ذکیہ مشہدی (شہناز رحمن)، چمرا سُر:شموئل احمد (ابوبکرعباد)، اماوس میں خواب: حسین الحق (شہاب ظفر اعظمی)، تِلک الایّام:نورالحسنین (خان حسنین عاقب)، خواب سراب: انیس اشفاق (سفینہ بیگم)، مرز بوم: صدیق عالم (عبدالسمیع)، اجالوں کی سیاہی:عبدالصمد (ناظمہ جبیں)، عزازیل: یعقوب یاور (خان محمد رضوان)، مانجھی:غضنفر(امیرحمزہ)، پلیتہ:پیغام آفاقی (حقانی القاسمی)، راجدیو کی امرائی: صادقہ نواب سحر (راحت افزا)، آخری سواریاں:سید محمد اشرف (نورین علی حق)، میرے ہونے میں کیا برائی ہے:رینو بہل (نوشاد منظر)، فائرنگ رینج کشمیر1990: شفق سوپوری (محمد غالب نشتر)، اندھیرا پگ: ثروت خان (محمد شاہ نواز قمر)، نعمت خانہ: خالد جاوید (معید الرحمن)، برف آشنا پرندے: ترنم ریاض(سلمان فیصل)، اللہ میاں کا کارخانہ:محسن خان (محمد حنیف خان)، مرگ انبوہ: مشرف عالم ذوقی (امتیاز احمد علیمی)، ہجور آما: شبیر احمد (مقصود دانش)، صدائے عندلیب بر شاخ شب:شائستہ فاخری (نورالحسنین)، آسماں سے آگے:احمد صغیر(ابوظہیر ربانی)، آنکھ جو سوچتی ہے:کوثر مظہری (خالد جاوید)، لیمی نیٹیڈ گرل: اختر آزاد (محمد کاظم)، زباں بریدہ: آصف زہری (تفسیر حسین)، تخم خوں: صغیر رحمانی (ہمایوں اشرف)، میرے نالوں کی گمشدہ آواز: محمد علیم (محمد ریحان)، روحزن: رحمن عباس (عادل حیات)، اوڑھنی:نصرت شمسی (اسلم جمشیدپوری)، تعاقب:ممتاز عالم رضوی (علی احمد فاطمی)، خلش: سفینہ بیگم (محمد فرقان عالم)، لفظوں کا لہو: سلمان عبدالصمد (شمیم قاسمی) قابل ذکر ہیں۔
کتاب میں شامل پینتیس(35)مضامین میں سے بیس مضامین ایسے ہیں جو28,29 فروری 2020کو ’اکیسویں صدی میں اردو ناول:بدلتا منظر نامہ‘ کے عنوان سے مظہر فائونڈیشن انڈیا کے زیر اہتمام منعقدہ دو روزہ قومی سمینار میں پیش کیے گیے تھے۔جس کی صدارت صاحب اسلوب فکشن نگار پروفیسر خالد جاوید نے کی اور کلیدی خطبہ پروفیسر مولا بخش (مرحوم) نے پیش کیا تھا۔فائونڈیشن کے صدر پروفیسر کوثر مظہری نے تعارفی کلمات اور استقبالیہ پیش کیا تھا۔ یہ کتاب اسی سمینار کی روداد ہے۔ کوثرمظہری ناول کی محبوبیت، ضرورت، افادیت اور مقصدیت پیش نظر لکھتے ہیں:
’’مجھے اردو فکشن میں ناول زیادہ پسند ہے۔ اس کے کئی اسباب ہیں۔ ان میں سے جو چیز مجھے سب سے زیادہ پسند آتی ہے وہ ہے اس کے متنوع کردار اور متنوع اسالیب۔ ایک ایسی چلتی پھرتی زندگی اور اس زندگی کے متعلقات و مشتملات سے ہمارا واسطہ پڑتا ہے کہ ہم اپنے آپ کو اس میں شریک کرلیتے ہیں۔ کہیں کہیں خود اپنی ہی شبیہ نظر آتی ہے تو کہیں اپنے پڑوسی کی اور کہیں اپنے رشتہ دارو ںکی۔ انسانی معاشرے کی نیکیاں اور بدقماشیاں پوری آب و تاب کے ساتھ جلوہ گر ہوتی ہیں۔ شعورِ ذات اور شعور فن کی ہم آہنگی سے زندگی کے متفرقات میں یکجائی نظر آنے لگتی ہے۔ پرت در پرت انسانی سرشت کا انعکاس ہوتا نظر آتا ہے۔ ایک سے بڑھ کر ایک نیکیوں میں شرابور و سرشار کردار سامنے آتے ہیں۔ ایک سے بڑھ کر ایک لُچّے، لفنگے، حرامی اور کمینگیوں میں ڈوبے ہوئے افراد دکھائی دینے لگتے ہیں۔ یہ وسعت افسانے میں نہیں، شاعری میں نہیں۔ آپ کہیں گے داستان میں ایسے کردار ہوتے ہیں، مثنویوں میں بھی یہ چہرے ہوتے ہیں۔ لیکن غور کرنے کی بات یہ ہے کہ ناول جیسی پرتیں نہیں ہوتیں …ــ ‘‘ (نیا ناول نیا تناظر، ص 7)
مذکورہ وجوہات کی بنا پر ہی ناول آج سب سے زیادہ لکھے جارہے ہیں۔ بہت سے لوگ یہ مانتے ہیں کہ یہ دور فکشن کا ہے، واقعی اس میں سچائی ہے۔ ناول سماج اور زندگی کے حقائق کی ہو بہو تصویر ہے، ناول ہی ہے جس میں منفی اور مثبت دونوں کردار پیش کیے جاتے ہیں۔ واقعی ناول ’سچ‘ کا واضح چہرہ ہے۔ یہ اور بات کی سچ کی تفہیم ذرا مشکل ہوتی ہے۔ خالد جاوید’ناول اور ہم‘ میں اس تعلق سے لکھتے ہیں:
’’ناول ہی یہ بات واـضح طو رپر ہمیں بتاتا ہے کہ کوئی بھی ’سچ‘ مطلق نہیں ہوتا اور یہ بھی کہ دنیا کو پورا پورا کبھی نہیں سمجھا جاسکتا۔ دنیا ایک مبہم شے ہے۔ لہٰذا ناول میں ہمیشہ ’سچ‘ کی تلاش اور تفتیش کا عمل جاری رہتا ہے۔ سچ کی تلاش اور تفتیش کا یہ عمل ہمیں پہلی بار سروینٹس کے ’ڈان کیہوتے‘ میں نظر آتا ہے اس لیے ڈان کیہوتے کو آج دنیا کا پہلا ناول تسلیم کیا جاتا ہے۔
ناول کی روح میں کبھی سہل پسندی نہیں شامل ہوتی اور نہ ہی اس میں چیزیں اتنی سادہ ہوسکتی ہیں جن کی توقع اکثر ناول سے کی جاتی ہے…ــــ‘‘ (ایضاً، ص 17)
کتاب کے دوسرے مرتب ڈاکٹر امتیاز احمد علیمی ہیں جنھوں نے ’مکالمہ اکیسویں صدی کے ناولوں پر‘ تحریرکیا ہے۔ انھوں نے ناول کے بدلتے ہیئت و موضوعات پر تفصیلی گفتگو کی ہے۔ ساتھ ہی کتاب میں شامل ناولوں پر مختصراً گفتگو بھی کی ہے۔ ناول کی خصوصیات اور اس کے افادی پہلو کے تعلق سے ڈاکٹر امتیاز احمد علیمی لکھتے ہیں:
’’ناول اپنے اندر زندگی کے رزمیہ اور بزمیہ دونوں پہلو رکھتا ہے۔اس میں المیہ اور طربیہ دونوں نوع کے عناصر کی گنجائش ہوتی ہے۔ اب یہ ناول نگار کے عمیق مطالعے، مشاہدے، اور تجربے پر منحصر ہے کہ اس کی نوعیت کیسی ہے۔جیسا مشاہدہ اور تجربہ ہوگا اور جتنا زیادہ حقیقی زندگی سے قریب ہوگاوہ اتنا ہی زیادہ کامیاب ناول نگار ہوگا۔اگر ناول کی بنیا د صرف تخیلات، تصورات اور غیرحقیقی عوامل پر ہوگی تو وہ ناول زیادہ کامیاب نہیں ہوسکتا۔کیونکہ قاری بہت زیادہ دیر تک حقیقت سے کوسوں دور صرف تخیلاتی دنیا میںایک خاص لمحے تک تو پرواز کر سکتا ہے مگر وہ زیادہ دیر تک اس پر ثابت قدم نہیں رہ سکتا۔جب پرواز میں کوتاہی ہوگی تو قاری کا رشتہ ناول اور ناول نگار دونوں سے ختم ہوجائے گا …ــــ‘‘ (ایضاً، ص 81)
اردو ناول بالخصوص اکیسویں صدی میں تحریر کیے گئے ناولو ںپر ’نیا ناول نیا تناظر‘ دستاویزی حیثیت کی حامل ہے۔ ناول پر کام کرنے والے خاص طور پر طلبا؍طالبات کے لیے یہ کتاب بہت معلوماتی اور کارآمد ہے۔
چوتھی کتاب ’شکیل اعظمی کا بنواس : معاصرین کی نظر میں‘ ہے۔ یہ کتاب عرشیہ پبلی کیشنز کے زیراہتمام 2024میں منظرعام پر آئی ہے۔ شکیل اعظمی ایک عمدہ شاعر اور فلمی دنیا میں اچھے نغمہ نگار کے اردو ادب میں بھی وہ معروف مشہور ہیں۔ ان کی کتاب ’بنواس‘ نے تو انھیں شہرت کی بلندیوں پر پہنچا دیا ہے۔
شکیل اعظمی کے ’بنواس‘ پر بھی گفتگو یوں بھی ضروری ہے کہ آخر انھوں نے اس کتاب کا نام بنواس کیوں رکھا ہے۔ ان کے لاچار و مجبور بچپن، ان کی شخصیت اور ان کی شاعری سے جو لوگ واقف ہیں، انھیں تو کوئی حیرانی نہیں ہے، لیکن ایسے لوگ ضرور حیران ہوں گے جنھیں صرف شکیل اعظمی کی شاعری سے تو انسیت ہے، مگر ان کے درکھ بھرے بچپن اور ان کی شخصیت میں آئے اتار چڑھاؤ کا ادراک نہیں۔ شکیل اعظمی نے جہاں اپنی شاعری میں بہت سارے موضوعات کو برتا ہے، وہیں اپنے لاچاراور مجبور بچپن کو بھی نہیں بھولے ہیں:
کبھی بچپن میں میرے ساتھ کنچے کھیلا کرتی تھی
میں اب تک ہوں وہی بچہ، سیانی ہوگئی دنیا
شکیل اعظمی ابھی چھوٹے ہی تھے کہ ان کی ماں اس دار فانی سے کوچ کرگئیں۔ ایسے میں سوائے باپ کے کوئی دوسرا سہارا نہیں تھا مگر باپ نے بھی دوسری اور تیسری شادی کے بعد شکیل اعظمی کو بھلا دیا۔ شکیل اعظمی کا واحد سہارا ننیہال تھا جہاں ان کا معصوم بچپن گزرا۔ ایسے میں وہ اپنے دکھ بھرے بچپن کو رام جی کے بچپن کے مشابہ سمجھتے ہیں۔ اس بات کی تائید جمال اویسی کے مضمون ’زندگی کے بنواس کا شاعر: شکیل اعظمی‘ سے بھی ہوجاتی ہے۔ وہ لکھتے ہیں:
’’مجھے کیوں ایسا احساس ہوتا ہے کہ ’بنواس‘ کے بیانیے کے ذریعہ خود شکیل اعظمی کی ذاتی زندگی کے ارتعاشات منعکس ہوگئے ہیں (اور یہ بات وہی قاری محسوس کرسکتا ہے جس نے شکیل اعظمی کی پوری زندگی ان کی نظموں اور غزلوں کی گاتھا کے ذریعہ سمجھی اور محسوس کی ہوگی)‘‘ (ایضاً، ص 59)
رام جی کا بچپن بھی آزمائشوں سے بھرپور تھا۔ شکیل اعظمی رام جی کے سنگھرش بھرے جیون اور تپسیا سے بہت متاثر نظر آتے ہیں۔ اسی لیے انھوں نے رامائن کے کرداروں کو شاعری کے ذریعے سمجھنے اور سمجھانے کی کوشش کی ہے۔ شکیل اعظمی کی رامائن میں رامائن کے علاوہ جنگل بھی ہے، جہاں انھوں نے رامائن کے زیادہ تر کرداروں پر نظمیں لکھیں وہیں انھوں نے جنگل اور جنگل کی خوبیوں اور وہاں کے مختلف اقسام کے پیڑ پودوں پر نظمیں لکھیں۔
شکیل اعظمی کا مجموعہ ’بنواس‘ ادبی حلقوں میں اس لیے بھی بہت مقبول ہوا کہ انھوں نے اردو میں پہلی بار ہندو دیومالائی قصے کو شعری پیکر میں ڈھالا۔ ان کی اس شعری کاوش کا اعتراف ادیبوں اور شاعروں نے اپنے طریقے سے کیا ہے۔ بعض لوگوں نے مضمون کے ذریعے تو بعض نے اپنے قیمتی آرا کے ذریعے۔ ’بنواس‘ پر اب تک جن ادیبوں نے مضامین تحریر کیے تھے، ان تمام مضامین کو اکٹھا کرکے کوثرمظہری نے ’ شکیل اعظمی کا بنواس: معاصرین کی نظر میں‘ کے نام سے یہ کتاب مرتب کی ہے۔ شکیل اعظمی کی ادبی خدمات کے حوالے سے کوثر مظہری لکھتے ہیں:
’’اردو کے منظرنامے پر شکیل اعظمی کا نام اب دور سے پہچانا جاتا ہے۔ ان کی تخلیقی اپج کے کئی حوالے ہیں، بالخصوص غزلوں اور نظموں میں تقریباً برابر ہی دسترس رکھتے ہیں۔پھر یہ کہ فلمی نغمہ نگاری بھی ہے، جو ان کے لیے ذریعہ معاش ہے، لیکن ان کی تخلیقی جودت اور جدت دونوں اوصاف ہمیںاس بات پر آمادہ کرتے ہیں کہ انھیں فلمی نغمہ نگاری سے ذرا الگ رکھ کر بھی دیکھا جائے۔ دھوپ دریا سے لے کر، ایش ٹرے، خزاں کا موسم رکا ہوا ہے، مٹی میں آسمان، راستہ بلاتا ہے، پوکھر میں سنگھاڑے اور ’بنواس‘ تک ایک تخلیقی آنچ ہے ،تخلیقی وفور ہے، تخلیقی صلابت ہے۔ آپ ان کی تخلیقی جہتوں کو سمجھنا چاہتے ہیں تو ان مذکورہ مجموعوں سے گزرنا پڑے گا تاکہ ان کے شعری و فکری آفاق کو دیکھ سکیں اور ان میں جو اسرارِ حیات ہیںان تک رسائی حاصل کرسکیں۔‘‘ (ایضاً، ص 9)
مضامین کے اس مجموعے کو ترتیب دے کر کوثر صاحب نے نہ صرف شکیل اعظمی کی ادبی خدمات کا اعتراف کیا بلکہ سچی دوستی کا بھی حق ادا کیا ہے۔ اس کتاب نے شکیل اعظمی کی شخصیت اور شاعری کو سمجھنے میں کافی آسانیاں فراہم کردی ہیں۔ مجھے امید ہے کہ آئندہ بھی شکیل اعظمی کی ادبی خدمات کا خاطرخواہ اعتراف کیا جائے گا۔
’نئی نظم (1960 کے بعد)‘ یہ کوثرمظہری کی بہت اہم کتاب ہے۔ 712 صفحات پر مشتمل یہ کتاب عرشیہ پبلی کیشنز کے زیر اہتمام شائع ہوئی ہے۔ اس انتخاب میں 155 شعرا کی 1182 نظمیں شامل ہیں۔ ان نظموں کے انتخاب میں کوثر صاحب کی کئی برسوں کی محنت، مشقت اور ریاضت تو شامل ہے ہی۔ اس کے لیے انھیں کئی شہروں کی مشہور لائبریریوں کی خاک بھی چھاننی پڑی ہے۔ کئی ویب سائٹس اور ٹیکنالوجیزکا سہارا بھی لینا پڑا ہے۔ کئی ادیبوں اور شاعروں سے اس سلسلے میں صلاح و مشورے بھی کیے گئے، ضرورت پڑنے پر ان سے رجوع بھی کیا گیا ہے۔ کوثر صاحب کے کچھ شاگرد بھی ہیں جنھوں نے نظموں کی تلاش اور سوانحی کوائف کے سلسلے میں سرگرداں نظر آئے۔ کوثر صاحب کے لیے سب سے مشکل اور پریشان کن شعرا کے کوائف کی حصولیابی کا تھا جسے انھوں نے بہ آسانی سر کرلیا۔ عہد حاضر کے مشہور ناقد، محقق، شاعر پروفیسر عتیق اللہ، کوثر مظہری کی اس کاوش کی ستائش کرتے ہوئے لکھتے ہیں:
’’’نئی نظم نیا سفر‘ ایک ایسے تنقید نگار کا کارنامہ ہے جس نے ان نظموں کے انتخاب میں کئی برسوں کا ذہنی سفر طے کیا ہے۔ کوثرمظہری شعرا کے تعارف کے لیے اگر مواد کی فراہمی کی مشقت سے بچنا چاہتے تو محض ہر شاعر کی نظموں کے محض انتخاب پر اکتفا کرسکتے تھے۔ ابھی تک ہند و پاک میں جتنے بھی انتخابات شائع ہوئے ہیں کسی نے اتنی زحمت نہیں اٹھائی کہ شاعر کے بارے میں بھی کچھ بنیادی معلومات مہیا کرسکیں۔ کوثرمظہری نے مختصر تعارف کا جو خاکہ بنایا تھا، اس کے مطابق انھوں نے یکسانیت کا بڑی یکسوئی سے خیال رکھا ہے۔ ‘‘
(نئی نظم: 1960کے بعد، بیک ٹائٹل)
اس انتخاب میں پاکستان اور ہندوستان کے شعرا کی تعداد کے حساب سے نمائندگی اور ان کے مرتبے کے حساب سے صفحات متعین کیے گئے ہیں۔ مقدمے میں کوثر صاحب نے جہاں دیگر انتخاب اور ان کے مرتبین کی خوبیوں اور خامیوں کا ذکر کیا ہے، وہیں انھوں نے اپنے انتخاب کی کچھ کمیوں تو بہت ساری خوبیوں کا بھی ذکر کیا ہے۔ اس مقدمے سے کچھ سطریں، جو مختلف جگہوں سے لی گئی ہیں، یہاں پیش کرنا ضروری سمجھتا ہوں تاکہ کوثر صاحب کے منہج کا قارئین کو اندازہ ہوسکے:
’’میرا ذاتی طور پر ماننا ہے کہ کسی بھی انتخاب پر خط تنسیخ نہیں کھینچا جاسکتا کہ ہر ایک کا اپنا زاویۂ انتخاب بھی ہوتا ہے اور اس انتخاب کا جواز بھی۔ کبھی تو جواز کھلے طور پر یا اعلانیہ سامنے آتا ہے اور کبھی بہ صورتِ خفا۔ چاہے جیسے بھی ہو اور جیسا بھی ہو، جواز سے کوئی بھی انتخاب خالی نہیں ہوتا۔‘‘
…’’’یہ انتخاب، معلوم نہیں کون سی کمی پوری کرے گا، البتہ یہ کہا جاسکتا ہے کہ 1960 کے بعد کی نظموں کے جتنے انتخاب شائع ہوئے ہیں، ان میں در آئی کمیوں اور خامیوں کی کچھ حد تک اس سے تلافی ہوسکے گی۔ ‘‘(ص 12)
’’جو نظمیہ متون اس انتخاب میں شامل کیے گئے ہیں ان سے ہر ایک شخص (شاعر، نقاد) مطمئن ہوگا، مشکل ہے۔ ہونا بھی نہیں چاہیے۔ ناتکمیلیت سے ہی آگے کا سفر جاری رہتا ہے۔ منزل آگئی تو گویا سفر تمام ہوا اور ہم جانتے ہیں کہ ادب میں کسی کام کے حوالے سے ’مکمل‘ کا لفظ استعمال نہیں ہوسکتا۔‘‘(ایضاً، ص 20)
کوثر صاحب کے لفظ’ مکمل‘ پر بہت سنجیدگی سے غور کرنے کی ضرورت ہے۔ کسی بھی میدان خاص کر ادب میں بارہا یہ باتیں لکھی اور سنی جاتی ہیں کہ اب اس صنف یا اس موضوع پر مزید کسی کام کی گنجائش نہیں ہے، فلاں کے ریسرچ، فلاں کے لیکچر، فلاں کی کتاب نے مستقبل میں آنے والی تمام گنجائشوں کے باب مسدود کردیے ہیں۔ یہ سراسر غلط ہے، یوں بھی کہ ہر زمانے اور ہر عہد کے اپنے الگ تقاضے ہوتے ہیں، ادب بھی ان سے عاری نہیں ہے۔ رد و قبول اور افہام و تفہیم کا سلسلہ ہمیشہ جاری رہتا ہے۔
پروفیسر کوثر مظہری کا ادبی سفر ابھی جاری ہے۔کئی پروجیکٹ ان کے ذہن میں ہیں، جنھیں ابھی پایۂ تکمیل تک پہنچانا ہے۔ کچھ پر کام عنقریب پورا ہونے کو ہے، کچھ پروجیکٹ نصف مراحل میں ہیں، تو کچھ پروجیکٹ کا صرف خاکہ ہی ابھی ذہن میں ہے۔ مجھے امید ہے کہ مستقبل میں کوثر صاحب کی ادبی خدمات کا دائرہ وسیع سے وسیع تر ہوگا۔

( ایڈیٹر ، ممبئی اردو نیوز )

چونکہ موضوع ، خدائے سخن میر تقی میرؔ کے فارسی لطائف کا ، اردو ترجمہ ہے ، لہذا پہلے ایک لطیفہ پڑھ لیں ، میرا نہیں ، میرؔ کا فارسی لطیفہ اردو میں : ’’ ایک شخص مرزا مظہر جانِ جاناں کے پاس آیا اور کہا : ’ ایک ہوا مجھے یہاں لآئی ہے ‘ ۔ وہاں ایک ظریف بیٹھا تھا ، اس نے پوچھا ’ کہاں سے؟‘ مرزا صاحب نے کہا ’ وہیں سے جہاں سے خارج ہوتی ہے ‘ ۔‘‘

مزید ایک لطیفہ : ’’ ایک روز حکیم شیخ حسین شہرت جو بہت معروف تھے ، ایک شاہی خواجہ سرا کے گھر گیے ۔ وہاں ایک شخص موجود تھا جس کو مقعد کی ایک بیماری تھی ۔ اس نے علاج کے لیے حکیم صاحب سے رجوع کیا ۔ انہوں نے کہا کہ اس کا علاج تو آسان ہے لیکن اس گھر میں کسی کے خصیے محفوظ نہیں ۔‘‘

یہ دو لطیفے ، میرؔ کے مزید لطائف کے مقابلے ، پڑھنے میں عام سے لگتے ہیں ، لیکن یہ سچ ہے کہ میرؔ کے باقی کے لطائف میں سے اکثر فحش ہیں ، ایسے لطائف جنہیں عام طور پر ’ نان ویج ‘ کہا جاتا ہے ۔ یہ لطائف میرؔ کی فارسی خود نوشت ’ ذکرِ میرؔ ‘ میں شامل تھے ، لیکن جب مولوی عبدالحق نے نثار احمد فاروقی سے ’ ذکرِ میر ‘ کا اردو ترجمہ کروایا تو ان تمام لطائف کو حذف کر دیا ۔ آسان زبان میں کہا جاسکتا ہے کہ ’ ذکرِ میرؔ ‘ کو سنسر کر دیا ۔ ’ ذکرِ میرؔ ‘ انجمن ترقی اردو ( ہند ) نے شائع کی تھی ۔ ’ ذکرِ میرؔ ‘ کے فارسی ایڈیشن میں بھی ، جِسے قومی کونسل برائے فروغ اردو زبان نے شائع کیا تھا ، یہ لطائف نہیں تھے ۔ لیکن اس بار ’ ذکرِ میرؔ ‘ کا جو ایڈیشن شائع ہوا ، اس میں میرؔ کے فارسی لطائف کے اردو ترجمے شامل ہیں ۔ انجمن کے جنرل سکریٹری اطہر فاروقی نے خصوصی طور پر ان لطیفوں کو صدف فاطمہ سے ترجمہ کروایا ، جو ’ انجمن ‘ کے مجلّے ’ اردو ادب ‘ کی معاون مدیر ہیں ۔ ترجمہ شائع ہونے کے بعد ایک سوال یہ اُٹھا کہ مولوی عبدالحق نے ’ ذکرِ میرؔ ‘ کے اردو ایڈیشن کو کیوں سنسر کیا تھا ؟ کیوں انہوں نے لطائفِ میرؔ کتاب میں شامل نہیں کیے تھے ؟ اس کا جواب یہ دیا جا رہا ہے کہ ’ اس لیے کہ لطائف فحش تھے ‘ ۔ اس پر یہ سوال اٹھا ہے کہ ’ پھر اوریجنل فارسی کے ’ ذکرِ میرؔ ‘ میں یہ لطیفے کیسے شامل تھے ، اور پڑھنے والوں کو یہ لطیفے کیوں فحش نہیں لگے ؟ ایک سوال یہ بھی ہے ، کہ کیا ادب میں ایسی سنسر شپ کو درست مانا جا سکتا ہے ؟ انجمن کے جنرل سکریٹری اطہر فاروقی کا ماننا ہے کہ ’’ انجمن کے جنرل سکریٹری کے طور پر مگر انہیں ’ ( مولوی عبدالحق کو ) یہ حق بالکل نہیں تھا کہ وہ اردو کے سب سے بڑے شاعر کی خود نوشت سوانح کے آخری حصے کو حذف کر دیں ۔‘‘ بہت سے دانشوروں کا یہی خیال ہے ۔ میں ان سوالوں میں نہیں پڑوں گا ، لیکن اتنا ضرور کہوں گا کہ کسی ادب پارے پر ، پسند نہ آنے پر تنقید تو کی جا سکتی ہے لیکن اسے سنسر کرنا نامناسب ہے، اور مولوی عبدالحق کو یہ نہیں کرنا چاہیے تھا ۔ سچ تو یہ ہے کہ جن لطائف کی بات ہو رہی ہے ان سے کہیں زیادہ فحش میرؔ کا کلام ہے ( کُل کلام کی بات نہیں ہو رہی ہے) لیکن ہمارے دانشوروں نے ، نقادوں نے اور ادب سے دلچسپی رکھنے والے علماء نے ( جن کی ایک بڑی تعداد ہے) کبھی نہیں کہا کہ میرؔ کے کلام کو سنسر کیا جائے ۔ میرؔ نے کیوں یہ لطائف شامل کیے اس پر اور انجمن سے شائع ’ ذکرِ میرؔ ‘ کے نئے ایڈیشن میں شامل میرؔ کے لطائف کے ترجمہ پر کوئی بات کرنے سے پہلے ’ اردو ادب ‘ کے میر تقی میرؔ نمبر میں شائع انگریزی کے شاعر رنجیت ہوسکوٹے کی ، جنہوں نے میرؔ کے ۱۵۰ منتخب اشعار کا انگریزی ترجمہ کیا ہے ، ایک تقریر کے اردو ترجمہ کی چند سطریں پیش کروں گا : ’’ ان لطائف میں بعض فحش لطائف ناشائستہ قصوں پر مشتمل ہیں ، مگر یہ سوچ کر ہی حیرانی ہوتی ہے کہ جس حسّیت نے ایک سلطنت کے زوال کا ماتم کیا وہی اس قسم کے درست مذاق سے مسرور بھی ہو سکتی تھی ، یہ زاویہ ہمیں اس معاشرے کے بارے میں نئے سرے سے غور کرنے کی دعوت دیتا ہے ۔‘‘

مذکورہ سطریں پڑھنے کے بعد میرے ذہن میں یہ سوال کلبلانے لگا ، کہ بھلا میرؔ نے ان لطائف کو اپنی خود نوشت سوانح میں جگہ کیوں دی تھی ؟ میں اس نتیجہ پر پہنچا ہوں کہ ’ ذکرِ میرؔ ‘ کے لطائف میرؔ کے دور کی ثقافت ، معاشرت اور تہذیب اور خود میر اور ان کی شاعری کو سمجھنے کی کلید ہیں ۔ ان لطائف سے یہ پتا چلتا ہے کہ میرؔ کا دور ، آج کے دور کے مقابلہ میں کس قدر ’ اوپن ‘ یا یوں کہہ لیں کہ زیادہ کھلا ڈھلا تھا ۔ اور اس کھلے ڈھلے معاشرے میں ہر چھوٹا بڑا فرد مصائب اور آفات کو فراموش کرنے کے لیے اس طرح کے لطائف سے محظوظ ہوتا تھا ۔ جنہوں نے یہ لطائف پڑھے ہیں انہیں پتا ہے کہ ان لطائف میں میرؔ نے اپنے زمانے کے روساء ، امراء ، قابلِ تعظیم سمجھی جانے والی شخصیات ( جن کے نام لطائف میں آئے ہیں ) کے نام لیے ہیں ، جبکہ ان لطائف میں لوطیوں اور اغلام بازوں کا بھی ذکر ہے ! شاید اس طرح میرؔ یہ بتانا چاہتے تھے کہ ، ادب میں وہ کسی بھی طرح کی سنسر شپ کے قائل نہیں ہیں ، اور جو کچھ انہوں نے دیکھا اور سنا ہے وہ سب ان کے قلم سے نکلے گا ۔ ایک وجہ یہ بھی ہو سکتی ہے کہ میرؔ ایک زوال پذیر تہذیب کو اس کی انتہائی شکل میں ، ان لطائف کے ذریعے بھی اور اپنے کلام کے ذریعے بھی ، لوگوں کے سامنے پیش کرنا چاہتے تھے ۔ ماہرینِ میرؔ کو اس پر غور کرنا چاہیے ۔

صدف فاطمہ نے اِن لطائف کا بہت خوب صورت ترجمہ کیا ہے ۔ وہ اِن لطائف کے بارے میں خود کیا سوچتی ہیں ، اس سوال کا انہوں نے جواب ’ عرضِ مترجم ‘ میں دیا ہے ۔ وہ لکھتی ہیں : ’’ جِس معاشرے میں اردو کا سب سے بڑا شاعر ایسے لطائف لکھتا ہے ، اور اعتراض نہیں ہوتا ، اس معاشرے کے ذہن کو سمجھنے اور ان سماجی اور سیاسی محرکات کا جائزہ لینے کی ضرورت ہے جہاں ایسے لطائف قابلِ قبول تھے ۔‘‘ وہ مزید لکھتی ہیں : ’’ یہ لطائف محض پھکڑبازی یا ہزل گوئی نہیں بلکہ اس دور کی حقیقی زندگی کا مزاحیہ بیانیہ ہیں جہاں ہر کردار ، ہر واقعہ کسی تاریخی شخصیت اور تاریخی واقعے کی جانب اشارہ کرتا ہے ۔ زندگی صرف حزن و غم سے عبارت نہیں ۔ یاس و نا امیدی کے پہلو بہ پہلو روزمرہ کی کثیف زندگی میں کچھ واقعے یا جملے یوں بھی ادا ہو جاتے ہیں کہ ان سے دیر تک محظوظ ہوا جا سکتا ہے ۔‘‘

صدف فاطمہ نے اِن لطائف کے ترجمہ پر بھی بات کی ہے ۔ وہ لکھتی ہیں : ’’ میں نے ترجمے میں بعض لطائف کے ذیل میں یہ کوشش البتہ کی ہے – اور یہ جانتے ہوئے کی ہے کہ ایسا کرنا اچھی بات نہیں – کہ زبان کو ایسا رکھا ہے کہ قاری لطائف سے وہ لطف نہ لے سکے گا جو میرؔ کا مقصد تھا ۔‘‘ لیکن انہوں نے ان لطائف پر نظر ثانی کی ، اور انہیں ایسی صورت دی کہ قاری ان لطائف سے وہی لطف لے سکے جو میرؔ کا مقصد تھا ۔ لطائف نظر ثانی کے بعد ’ اردو ادب ‘ کے میر تقی میرؔ نمبر میں شامل کیے گیے ہیں ۔ میں نے لطائف کے وہ ترجمے بھی پڑھے ہیں جو ’ ذکرِ میرؔ ‘ میں شامل ہیں ، اور وہ بھی جو میرؔ نمبر میں ہیں ، دونوں کا لطف الگ الگ ہے ، یہ کہا جا سکتا ہے کہ صدف فاطمہ کا پہلے والا ترجمہ ایک طرح کا ’ ٹریلر ‘ تھا ، اور نظر ثانی کے بعد یہ پوری ’ فلم ‘ ہے ۔ ترجمہ لاجواب ہے ، اس قدر کہ بعض لطائف اپنی فحاشی کے باوجود قلب پر گراں نہیں گزرتے ۔ اردو ترجمہ کے ساتھ فارسی کے لطائف بھی دیے گیے ہیں تاکہ پڑھنے والوں میں جنہیں فارسی آتی ہے وہ ترجمہ کے معیار کو پرکھ سکیں ۔ حواشی بڑی محنت سے لکھے گیے ہیں جو لطائف کے حوالے سے میرؔ کے دور کو سمجھنے میں مدد دیتے ہیں ۔ صدف فاطمہ کو اس ترجمہ کے لیے بہت بہت مبارک ہو ۔ اور اطہر فاروقی کو بھی مبارک ہو کہ انہوں نے لطائف کا ترجمہ کرایا ، اور شائع بھی کیا ، یہ ہمت کا کام تھا ۔ اردو کے بعد صدف فاطمہ نے لطائف کا ترجمہ انگریزی زبان میں بھی کیا ہے ، جو جلد شائع ہوگا ۔ انگریزی پر یاد آیا کہ سی ایم نعیم صاحب نے ’ ذکرِ میرؔ ‘ کا انگریزی ترجمہ کیا ہے جس میں یہ لطائف شامل ہیں ، ان کا ترجمہ لاجواب ہے ، لیکن اردو والوں کو لطف اردو ترجمہ پڑھنے میں ہی آئے گا ۔

تعارف و تبصرہ : شکیل رشید

خواجہ عزیز الحسن مجذوبؔ کی چند غزلیں ، کبھی کہیں پڑھی تھیں ، جو کچھ اس قدر پسند آئیں ، کہ کلامِ مجذوبؔ کی تلاش شروع کر دی ۔ پتا چلا کہ مجذوبؔ کا کلام شائع تو ہوا ہے ، لیکن اب اس کا ملنا مشکل ہے ۔ یقیناً مایوسی ہوئی تھی ، اسی لیے جب ندیم احمد انصاری کی مرتب کردہ ’ قطعاتِ مجذوبؔ ‘ نظر سے گزری ، تو دوچند مسرت کا احساس ہوا ۔ یہ کس قدر حیرت کی بات ہے کہ مجذوبؔ کو ایک شاعر کے طور پر اردو دنیا نے پوری طرح سے نظر انداز کیا ہے ! اردو شعراء کے اکثر انتخابات میں بھی ان کا نام ڈھونڈے سے نہیں ملتا ! اپنے ایک بڑے شاعر کے تئیں اردو دنیا کی یہ بے حسی قابلِ افسوس ہے ۔ مجذوبؔ کتنے بڑے شاعر تھے اس کا اندازہ حضرت مولانا سید سلیمان ندوی کے ایک تاثراتی مضمون کی ، جس کا اقتباس کتاب کے ’ مقدمہ ‘ میں دیا گیا ہے ، کی اس سطر سے لگایا جا سکتا ہے : ’’ ان کی شاعری اپنے زمانے کی شاعری کا بے مثال نمونہ تھی ۔‘‘ اور مجذوبؔ کا زمانہ بڑے شاعروں کا زمانہ تھا ، اقبالؔ تھے ، جوشؔ تھے ، جگرؔ تھے ، فراق ؔتھے ، اصغرؔ تھے ، اور نہ جانے کتنے بڑے بڑے شاعر تھے ۔ مجذوبؔ حضرت مولانا اشرف علی تھانویؒ کے خلیفہ و مجازِ بیعت تھے ، اور یہ خلیفہ و شیخ والا رشتہ کچھ ایسا گہرا تھا ، کہ مرض الوفات میں بھی حضرت تھانویؒ کی زبان پر ان کا یہ شعر تھا؎

ہر تمنا دل سے رخصت ہو گئی

اب تو آجا اب تو خلوت ہو گئی

کہتے ہیں کہ اس شعرکے بارے میں حضرت تھانویؒ فرمایا کرتے تھے کہ مجھے جب یہ شعر یاد آتا ہے تو میں تو کم از کم اسے تین دفعہ ضرور دہراتا ہوں ، اس شعر کو وہی سمجھ سکتا ہے ، جس نے اپنا سب کچھ اللہ کے لیے قربان کردیا ہو ۔ حضرت تھانویؒ کی نظرمیں مجذوب ؔ کا کلام حال ہی حال ہے ، قال کا نام و نشان نہیں ، کیونکہ قال میں یہ اثر ہونا ناممکن ہے ۔

جذب و عرفان کے شاعر کے کلام کی بعنوان ’ قطعاتِ مجذوبؔ ‘ اشاعت ادبی دنیا کا ایک اہم واقعہ ہے ، اور اس کے لیے ندیم احمد انصاری بلاشبہ مبارک باد کے مستحق ہیں ۔ مرتب خواجہ مجذوبؔ پر پی ایچ ڈی کر رہے ہیں ، انہوں نے اس کتاب کا ایک نہایت وقیع تحقیقی ’ مقدمہ ‘ تحریر کیا ہے ، جسے چار حصوں میں تقسیم کیا ہے ۔ پہلے حصے میں ’ خواجہ عزیز الحسن مجذوبؔ : شخصیت و شاعری ‘ پر بات کی گئی ہے ۔ وہ لکھتے ہیں : ’’ شاعرِ جذب و عرفاں خواجہ عزیز الحسن مجذوبؔ غوری نہایت پرگو اور زودگو شاعر تھے ، لیکن انہوں نے اپنے کلام کو کبھی محفوظ کرنے یا طبع کرانے کا اہتمام نہیں کیا ، گو آخر عمر میں اُنہیں اس کی فکر دامن گیر رہنے لگی تھی ۔ سب سے اول ایک انتخاب مفتی محمد رضا انصاری فرنگی محلی نے ’ مجذوبؔ اور ان کا کلام ‘ کے نام سے شائع کیا ۔ پھر مولانا ظہورالحسن کسولوی نے ’ کشکولِ مجذوبؔ ‘ کے نام سے ایک کتاب شائع کی ۔ خواجہ صاحب کی وفات کے بعد ان کے صاحب زادے خواجہ ولی الحسن غوری کے ایما پر ڈاکٹر سوزؔ شاہ جہاں پوری نے تصحیح و نظر ثانی کے ساتھ ’ گفتۂ مجذوبؔ ‘ کے نام سے ایک کتاب مرتب کی ۔ اس کے آخری صفحے پر لکھا ہوا ہے : ’ حضرت مجذوبؔ کی نظموں کا مجموعہ ان شا اللہ عن قریب زیورِ طباعت سے آراستہ ہوکر منظرِ عام پر آئے گا ‘ لیکن شاید یہ خواب شرمندۂ تعبیر نہ ہو سکا ۔ یہ ہے خواجہ صاحب کا دستیاب شعری سرمایہ ۔‘‘ آگے مجذوبؔ کی شخصیت کا تفصیلی تعارف ہے ۔ وہ ڈپٹی کلکٹر تھے ، مگر اپنا تبادلہ کم تنخواہ پر محکمۂ تعلیم میں کرا لیا تھا اور انسپکٹر آف اسکولس ( اتر پردیش ) کے عہدے تک پہنچے ۔ حضرت تھانویؒ سے نسبت کی بنا پر اُنہیں ’ محبوب کا محبوب ‘ سمجھا جاتا تھا ۔ مجذوبؔ تخؒلص بھی حضرت تھانویؒ کابخشا ہوا تھا ۔ سید سلیمان ندوی کے اقتباس میں لکھا ہے : ’’ خواجہ صاحب پورے شاعر تھے ، جب وہ اپنا شعر سُنانے پر آتے تھے تو ایک غزل دو غزل بلکہ بیسیوں غزل سُنا ڈالتے تھے ، اس کی اُن کو کچھ پروا نہیں ہوتی تھی کہ کون اِس کو سُن رہا ہے اور کون داد دے رہا ہے ، وہ اپنے اشعار سے آپ لطف اندوز ہوتے تھے اور جھومتے تھے ۔‘‘ مجذوبؔ تخلص کی وجہ شاید اُن کا جذب تھا ۔

’ مقدمہ ‘ کا دوسرا حصہ ’ مجذوبؔ کی قطعہ نگاری ‘ کے عنوان سے ہے ۔ ندیم احمد انصاری لکھتے ہیں : ’’ خواجہ صاحب کے قطعات میں دنیا کی بے ثباتی ، انقلابِ دنیا ، شانِ جلال و جمال ، حالتِ جذب ، حسن و عشق ، دیوانگی ، رعنائی ، حقیقتِ حسن ، جوش و ہوش ، شورش ، تفویض ، تقدیر ، رضا بر قضا ، توکل ، غفلت ، ذکر و فکر ، صبر و شکر ، جدوجہد ، سُستی کا علاج ، اختیاری و غیر اختیاری کی بحث ، ماضی و مستقبل کی فکر ، استغنا ، کیفیتِ قبض و بسط ، قبول و وصول ، کیدِ نفس و شیاطین اور فنا و بقا وغیرہ موضوعات زیرِ بحث آئے ہیں ۔‘‘ تیسرا حصہ ’ صنفِ قطعہ نگاری ‘ ، اور چوتھا حصہ ’ اردو میں قطعہ نگاری : ایک جائزہ ‘ کے عنوان سے ہیں ۔ اس مجموعہ میں مجذوب کے ۱۸۷ قطعات دیے گیے ہیں ، جن میں سے چار فارسی میں ہیں ۔ دو قطعات ملاحظہ کریں ؎

غمِ عشق جا کر بھی غم کم نہ ہو گا

کہ پھر غم نہ ہونے کا کیا غم نہ ہوگا

نہ کر غم کے جانے کی ہرگز تمنا

گیا غم تو یہ دل کا عالم نہ ہوگا

کہاں تیری مجذوبؔ ژولیدہ حالی

کہاں باریابیٔ درگاہِ عالی

مگر ہو نہ مایوس پھر بھی کرم سے

یہ حسرت بھی تیری نہ جائے گی خالی

جذب سے بھرے قطعات کا یہ مجموعہ ’ الفلاح انٹرنیشنل فاؤنڈیشن ‘ نے شائع کیا ہے ۔ صفحات 108 اور قیمت 150 روپیہ ہے ۔ موبائل نمبر 9022278319 پر رابطہ کرکے اس مجموعہ کو حاصل کیا جا سکتا ہے ۔

سید خورشید مصطفی رضوی (متوفی31/جولائی2002)علمی وادبی دنیا کی ایک نابغہ روزگار شخصیت تھے۔ انھوں نے پوری زندگی علم وادب کی خدمت میں گزاری، مگر اپنے کارناموں کی کوئی نمائش نہیں لگائی۔ ان کی پیدائش امروہہ میں ہوئی، جو باکمال لوگوں کی ایک قدیم بستی ہے۔ یہاں علم وفضل کے دریا بہتے ہیں۔اسی مردم خیز اور دل آویز سرزمین میں سید خورشید مصطفی رضوی ایک علمی خانوادے میں 1930 میں پیدا ہوئے۔خاندانی شرافت اور عاجزی وانکساری جیسی صفات انھیں ورثے میں ملی تھیں۔
انھوں نے رامپور، میرٹھ اور علی گڑھ سے تعلیم حاصل کرکے1960میں دہلی یونیورسٹی کی لائبریری سے عملی زندگی کا آغاز کیا اور یہاں سے 1997میں ریٹائرہوئے۔میری خوش قسمتی یہ ہے کہ مجھے ان سے کسب فیض کا موقع ملا۔بظاہر دھان پان سی نظر آنے والی اس شخصیت نے بے مثال تحقیقی اور علمی کارنامے انجام دئیے۔ وہ ایک روشن خیال محقق ومصنف تھے، جس کا سب سے بڑا ثبوت پہلی جنگ آزادی پر ا ن کی معرکۃ الآراء تصنیف ”جنگ آزادی 1857″ ہے۔ اس کتاب کا پیش لفظ نامور مورخ ڈاکٹر تاراچند نے لکھا تھا۔ وہ لکھتے ہیں ”اس مضمون پر یہ اردو کی پہلی تصنیف ہے جس میں بلاتعصب مذہب وملت اس انقلاب کی صحیح کہانی بتلائی گئی ہے۔ ان کی معلومات وسیع اور نظر گہری ہے۔“
800صفحات پر مشتمل یہ کتاب سیدخورشید مصطفی رضوی کے گہرے تاریخی شعور کی مظہر ہے۔ اس میں شامل بیشتر معلومات انھوں نے 1857کے ریکارڈ اور مآخذ سے براہ راست حاصل کی ہیں۔ ارد و میں چند کتابیں سامنے رکھ کر ایک کتاب تیار کرنے کا رواج عام ہے، لیکن سید خورشید مصطفی رضوی نے تن آسانی کی بجائے جفاکشی کی راہ اختیار کی اور1857پر تحقیق کرنے والوں کے لیے جامع مواد جمع کردیا۔ وہ خود ان شہروں کے مال خانوں میں گئے جہاں 1857 کے ریکارڈ بنڈلوں میں بندھے ہوئے خاک پھانک رہے ہیں اور کسی نے انھیں دیکھنے اور پرکھنے کی زحمت نہیں کی تھی۔ انھوں نے اس تمام ریکارڈ کو کھنگالا اور اس میں سے تحقیق کے موتی رولے۔اس معرکۃ الآراء کتاب کے علاوہ ان کی دیگر اہم تصنیفات میں ’حیات ذاکر حسین‘(1969)’تذکرہ بدرچشت‘(1975)’شیرہندوستان ٹیپو سلطان‘(1998)’بابر‘(2002)’تاریح جنگ آزادی ہند1857‘(2000)قابل ذکر ہیں۔ مختلف علمی اور تاریخی موضوعات پر ان کی کتابوں کی مجموعی تعداد دس ہے۔یہ تمام تصنیفات اور تالیفات اپنے موضوع اور مواد کے اعتبار سے اردو ادب وتاریخ ہند میں ایک اہم مقام ومرتبہ کی حامل ہیں۔ ان قیمتی کتابوں کے علاوہ میدان علم وادب کے اس شہسوار کی نگارشات میں سیکڑوں نادرونایاب مضامین اور مقالات بھی شامل ہیں، جن کی تاریخی اور ادبی حیثیت مسلّم ہے۔
علم وادب کی اسی نابغہ روزگار شخصیت پر ایک تحقیقی کتاب کی صورت گری سرزمین امروہہ کے ایک اور لائق فرزند ڈاکٹر مصباح احمد صدیقی نے کی ہے اور حق تو یہ ہے کہ ان کی زندگی کے تمام پہلوؤں پر تحقیق کا حق ادا کردیا ہے۔ ڈاکٹر مصباح احمد صدیقی از خود ایک محقق اور مترجم ہیں۔ انھیں اردو، عربی اور فارسی تینوں زبانوں پر عبور حاصل ہے۔وہ بھی سیدخورشید مصطفی رضوی کی طرح علی گڑھ کے فیض یا فتہ ہیں، جہاں سے انھوں نے فارسی میں ایم اے اور پی ایچ ڈی کی ڈگری حاصل کی ہے۔ان کی اب تک 31 کتابیں اور تراجم شائع ہوچکے ہیں، جن میں کمال واسطی کی کتاب ’اسرار کشف صوفیہ‘ کا فارسی سے ہندی اور اردو ترجمہ شامل ہے۔ ڈاکٹر مصباح احمد صدیقی کی علمی تربیت پروفیسر نثار احمد فاروقی جیسے جید عالم کی سرپرستی میں ہوئی ہے۔زیرتبصرہ کتاب میں ان کا روحانی پیش لفظ بھی شامل ہے، جس میں وہ لکھتے ہیں کہ ”کل محترم خورشید مصطفی رضوی اپنے پورے کنبے (حوروغلماں)کے ساتھ تشریف لائے تھے، مختلف موضوعات پر گفتگو کے دوران انھوں نے یہ خوشخبری بھی دی کہ تم نے ان کی سوانح اور ادبی خدمات پر ایک مبسوط کتاب لکھی ہے، سن کر بہت زیادہ مسرت ہوئی۔“
ڈاکٹر مصباح احمد صدیقی نے اس کتاب کو آٹھ ابواب میں تقسیم کیا ہے۔ پروفیسر نثار احمد فاروقی کے روحانی پیش لفظ سے پہلے مصنف نے ’اعتراف حقیقت‘ کے عنوان سے اپنے مقدمہ میں اس کتاب کے ظہور کی روئیداد بیان کی ہے۔ ابواب کی تقسیم اس طرح کی گئی ہے۔باب اوّل (سرزمین امروہہ کی مختصر علمی وادبی تاریخ)باب دوم (’سید خورشید مصطفی رضوی کا خاندانی تعارف‘)باب سوم (’سید خورشید مصطفی رضوی کی پیدائش، تعلیم وتربیت اور ملازمت وقلمی خاکہ‘)باب چہارم (’سید خورشید مصطفی رضوی کے اخلاق وعادات، وفات حسرت آیات‘)باب پنجم (’سید خورشید مصطفی رضوی کی تصانیف وتالیفات کا جامع تعارف‘)باب ششم (’سید خورشید مصطفی رضوی کی مدیرانہ صلاحیتیں ’درمقصود‘ کے حوالے سے‘)باب ہفتم (‘سید خورشید مصطفی رضوی کی اولاد کا تعارف و کتابیات‘)باب ہشتم (’سید خورشید مصطفی رضوی کی چند یادگار تصاویر‘)
ان تمام ابواب میں مصنف ڈاکٹر مصباح احمد صدیقی نے بڑی محنت اور لگن کے ساتھ جو مواد جمع کیا ہے، وہ خورشید مصطفی رضوی کی زندگی کے تمام گوشوں کا احاطہ کرتا ہے۔کتاب کے مصنف سے خورشید مصطفی رضوی کو جو مخلصانہ اور مشفقانہ تعلق تھا،وہ کتاب کے ہرلفظ سے جھلکتا ہے۔کتاب کا اسلوب عام تحقیقی کتابوں کی طرح خشک نہیں ہے بلکہ اس میں زبان وبیان کی چاشنی بھی موجود ہے۔ سید خورشید مصطفی رضوی سے میری پہلی ملاقات اب سے کوئی چالیس برس پہلے اس وقت ہوئی تھی، جب وہ دھولاکنواں کی لائبریری میں تعینات تھے۔ انھوں نے پہلی ہی ملاقات میں متاثر کیا اور میں ان کا گرویدہ ہوگیا۔ وہ بقول مصنف یقینا ”عجز وانکساری، مروت ورواداری، صبر وتحمل بردباری، خاکساری اور مسکینی کی چلتی پھرتی تصویر تھے۔ بڑے تو بڑے خورشید رضوی چھوٹوں کا ایسا ادب کرتے تھے کہ وہ خواہ مخواہ ہی اپنے آپ کو بڑا سمجھنے لگتا تھا۔“(ص 77)
میں اس بیان کی تصدیق یوں کرسکتا ہوں کہ جب 2000میں ان کی معرکۃ الآراء کتاب ’تاریخ جنگ آزادی ہند 1857‘ کا اضافہ شدہ ایڈیشن شائع ہوا تووہ اس کا ایک نسخہ لے کر میرے غریب خانے پر تشریف لائے اور اپنے دستخط کے ساتھ مجھے پیش کیا، جو میری ذاتی لائبریری میں محفوظ ہے۔وہ میرے لیے حددرجہ محترم اور مشفق انسان تھے اور میں نے ان سے بہت کچھ سیکھا۔ خدا ان کی قبر کو نور سے بھردے۔ ان پر ایک وقیع کتاب کی صورت گری کرکے ڈاکٹر مصباح احمد صدیقی نے اہل امروہہ کا قرض اور فرض ادا دونوں اداکیا ہے۔نہایت عمدہ طباعت کے ساتھ شائع ہونے والی اس کتاب کو حاصل کرنے کے لیے اس نمبر پر رابطہ قائم کیا جاسکتا ہے۔ 9810780563

استاذ جامعہ امام محمد انور شاہ دیوبند

خوش نصیب ہیں وہ ادارے اور درس گاہیں جنھیں علوم و فنون کی ماہر شخصیات کی خدمات میسر آئیں، خلوص و للہیت سے پُر جن کی حیات مستعار کا ہر ہر گوشہ نسل نو کے لیے مشعل راہ بنے، وفا شعاری اور فنائیت جن کی پہچان ہو اور مشکل سے مشکل حالات میں صبر و قناعت اور زباں پر کلمات شکر جن کا امتیاز ہو. بلاشبہ اللہ تعالیٰ نے دارالعلوم وقف دیوبند کو ایسے ماہرین، جہاں دیدہ، تجربہ کار اور اعلی ترین نسبتوں کے حامل افراد کی ایک کہکشاں 22 مارچ 1982ء کی اُس صبح سے ہی عطا فرمائی جو جملہ وابستگانِ دیوبند کے لیے نہایت کرب انگیز اور افسوسناک تھی.

کاروانِ حکیم الاسلام کے یہ 85 افراد ہی در اصل دارالعلوم وقف کی بنیاد تھے، جس قافلے کا ہر ہر فرد اس کی بنا میں شریک رہا، جس نے اپنی اپنی صلاحیتوں کو ایسے ادارے کے لیے وقف کر دیا جس کا مستقبل اس وقت موہوم، حالات سخت ترین، بدگمانی اور الزام تراشی کا دور دورہ، نہ عمارت، نہ چھت، نہ چٹائیاں اور نہ تپائیاں، لیکن انھوں نے وفا شعاری اور اخلاص و للہیت کی وہ مثال قائم کی جسے ماضی قریب میں چشم فلک نے نہ دیکھا تھا. ان کا سارا سرمایہ توکل علی اللہ اور قاسمی، شاہی و عثمانی خانوادے کی عظیم نسبی و علمی نسبتیں تھیں.

دیوبند کی مرکزی جامع مسجد میں کئی سالوں تک حالات کا شکار رہے اس ادارے کے حالات قدرے بہتر ہونے کو ہوئے تو ایک قیامت اور ٹوٹی کہ جامع مسجد سے انخلاء، پھر چند ماہ اس بے سر و سامانی میں بھی گزرے کہ خطیب الاسلام حضرت مولانا محمد سالم قاسمی، فخر المحدثین حضرت مولانا سید محمد انظر شاہ کشمیری، استاذ الاساتذہ حضرت مولانا خورشید عالم دیوبندی، شیخ الحدیث حضرت مولانا محمد نعیم دیوبندی، شارح ہدایہ حضرت مولانا جمیل احمد سکروڈوی، درویش صفت حضرت علامہ حسن باندوی، والد گرامی شیخ الادب حضرت مولانا مفتی محمد اسلام قاسمی علیہم الرحمہ جیسے جبال علم نے صبر و استقامت اور عزم و حوصلے کی وہ مثال قائم کہ کچھ درسگاہیں ظہیر منزل میں، کچھ طیب منزل میں، بعض کا نظم آدینی مسجد میں تو کوئی جماعت عثمانی مسجد کے صحن میں.

تاریخ دیوبند میں 24 جون 1994ء کا دن بھی ہمیشہ یاد رکھا جانا چاہیے جب یہ بے سہارا قافلہ بارہ سالوں تک ادھر ادھر بھٹکتے ہوئے اور ابتلاء و آزمائش کے موقع پر عزم و حوصلے کی داستان رقم کرتے ہوئے بالآخر ایک وسیع و عریض زمین پر فروکش ہوا اور یہاں علماء، صلحاء، دانشوران قوم و ملت اور جاں نثارانِ حکیم الاسلام نے مفتی اعظم حضرت مولانا مفتی محمود حسن گنگوہی کو دارالحدیث کا سنگ بنیاد رکھتے ہوئے دیکھا.

اپنی زمین پر ہونے کے بعد مسائل کا سلسلہ ختم نہیں ہوا تھا، بس آزمائش کی نوعیتیں تبدیل ہو گئی تھیں، دارالعلوم وقف کو "مکتب” کا طعنہ دینے والوں کی زبان پر اب "جنگل، وادئ غیر ذی زرع، ریلوے پلیٹ فارم، بریکٹ والا مدرسہ” وغیرہ جیسے الفاظ جاری تھے، اسباب و وسائل کی قلت اور بشری تقاضوں کے تحت ہونے والی ذرا ذرا سی بد نظمی یا خطاؤں کو ملی و سماجی گناہ بنا کر پیش کیا جاتا. لیکن سلام ہے ان جبالِ استقامت پر کہ انھوں نے سب کچھ جھیلا، مصائب و آلام کو جیا، طعنے برداشت کیے اور بفضل الہی سال بہ سال یہ مسائل رفتہ رفتہ کم ہوتے گئے. طلبۂ عزیز کے لیے مسائل دوسری نوعیت کے ہوتے، رہائش گاہ کی کمی اور امدادی داخلے محدود، جہاں ضروریات کی تکمیل نہ ہو وہاں سہولیات کا کیا گزر!!! ایسے مشکل ترین حالات میں ان کا سرمایہ اللہ تعالیٰ کے فضل و کرم اور توکل و قناعت کے بعد فقط اپنے عظیم ترین اساتذۂ کرام اور مشائخ حدیث کی اعلی ترین نسبتیں، ان کی ارفع و عالی اسناد تھیں جن کے حصول کے لیے انھیں ہر سرد و گرم نشیب و فراز برداشت تھا.

مجھے یاد پڑتا ہے، غالباً 2006/2007 میں راقم کا عربی ششم کا سال تھا، ادارے کے قدیم رکن حاجی اسعد صدیقی لائبریری کی ترتیب و تکمیل اور انتقالِ کتب میں شبانہ روز مصروف تھے، پھر آئندہ تعلیمی سال کے آغاز پر فخر المحدثین حضرت مولانا سید محمد انظر شاہ کشمیری علیہ الرحمہ کی وہ آخری اجتماعی گفتگو سننے کو ملی جو اسی لائبریری "المکتبۃ القاسمیہ” کے افتتاح کے موقع پر ہوئی تھی، جس میں بیماری کے آثار ان کے جسم اور خطاب میں نمایاں ہو رہے تھے. بہر حال لائبریری کا نظام شروع ہو گیا، کچھ ماہ بعد ہمیں حاجی اسعد صاحب کے معاون کے طور پر ایک نئے فاضل مولوی انعام الحق لائبریری میں نظر آئے، جن کا وطنی تعلق راقم کے آبائی صوبے جھارکھنڈ سے تھا، خاموش صفت، مفوضہ ذمہ داریوں کی انجام دہی میں منہمک، انھوں نے ادارے میں اپنی ایک الگ شناخت بنائی اور رفتہ رفتہ طلبہ و اساتذہ انھیں "صوفی انعام” کہنے لگے.

والد مرحوم شیخ الادب حضرت مولانا مفتی محمد اسلام قاسمی علیہ الرحمہ کی سوانح "کیا شخص زمانے سے اٹھا” کی دوسری جلد میں شائع مضمون میں مولانا انعام الحق صاحب نے لکھا ہے کہ جب وہ دارالعلوم وقف میں تقرری کے بعد ان سے ملاقات کے لئے حاضر ہوئے تو والد مرحوم نے انھیں نصیحت کی تھی :

"کتب خانہ کتابوں کے درمیان علمی مشغلہ جاری رکھنے کی بہترین جگہ ہے. ”

شاید اسی نصیحت نے ان کے پڑھنے لکھنے کے ذوق کو مہمیز کیا اور وہ ہزاروں کتابوں کے درمیان استفادے اور حاصل مطالعہ یا حاصل گفتگو کی جمع و ترتیب وغیرہ میں مصروف ہو گئے۔

کچھ سالوں پہلے حاجی اسعد صاحب ادارے سے علاحدہ ہوئے تو لائبریری کی مکمل ذمہ داریاں مولانا انعام پر ہی آ گئی،

انھوں نے کتابوں کی ترتیب، تنظیم، فن کے اعتبار سے جملہ کتابوں کی فہرست سازی وغیرہ کو بہت ہی سلیقے سے انجام دیا، مستفیدین کی سہولت کے لیے نظام کو اپڈیٹ یعنی کمپیوٹرائزڈ کرنے کا وقت آیا تو خود کمپیوٹر سیکھا، اور ہزارہا کتب کا اندراج کر ڈالا، انتظامیہ نے قدیم ترین مخطوطات اور نایاب کتب کو محفوظ کرنے کا ارادہ کیا تو عمدہ انداز میں صفحہ بہ صفحہ کتابوں کو اسکین کر کے محفوظ بھی کیا، اس دوران مستقل مہمانوں کا ورود ہوتا تو خندہ پیشانی سے سب سے ملاقاتیں، مزاج پرسی اور اگر دارالعلوم وقف کے فیض یافتہ ہوں تو سن فراغت اور دورہ حدیث کے اساتذہ کی تفصیلات بھی معلوم کر کے اپنے ریکارڈ میں محفوظ کرتے. چناں چہ رفتہ رفتہ انھوں نے محافظ خانے، دفتر تعلیمات کے تمام تر ریکارڈ اور سینکڑوں فضلاء سے رابطہ کر کر کے مشائخ دارالعلوم وقف پر اچھا خاصا مواد محفوظ کر لیا جو آج ہمارے سامنے "تذکرہ و اسناد حدیث مشائخ دارالعلوم وقف دیوبند” کے نام سے موجود ہے۔

320 صفحات پر مشتمل اس کتاب میں قیام دارالعلوم وقف دیوبند سے تا حال اساتذۂ دورۂ حدیث کا مختصر تعارف اور ان کی جملہ متداول کتبِ حدیث کی اسناد کو مسند الہند حضرت شاہ ولی اللہ محدث دہلوی علیہ الرحمہ تک بیان کیا گیا ہے۔

سرورق کی پیشانی پر عبد اللہ ابن المبارک کا یہ قول "الإسناد من الدین و لو لا الإسناد لقال من شاء ما شاء” اور کتاب میں مصنف کا 17 صفحات پر مشتمل تفصیلی مقدمہ دین میں سند حدیث کی اہمیت کو شاندار انداز میں بیاں کرتا ہے.

کتاب پر حضرت مولانا محمد سفیان قاسمی، حضرت مولانا سید احمد خضر شاہ مسعودی اور برادر محترم جناب مولانا ڈاکٹر محمد شکیب قاسمی کی تائیدات اسے اعتبار بخشتی ہیں.

کتاب تین ابواب پر مشتمل ہے، پہلے باب میں دارالعلوم وقف کے ان 14 مشائخ حدیث کا تذکرہ اور سندیں ہیں جو جوار رحمت میں منتقل ہو چکے ہیں. ان کے اسماء گرامی یہ ہیں :

حکیم الاسلام حضرت مولانا قاری محمد طیب قاسمی، خطیب الاسلام حضرت مولانا محمد سالم قاسمی، فخر المحدثین حضرت مولانا سید محمد انظر شاہ کشمیری، استاذ الاساتذہ حضرت مولانا خورشید عالم دیوبندی، حضرت مولانا محمد نعیم دیوبندی، حضرت مولانا مفتی سید احمد علی سعید بجنوری، حضرت مولانا محمد اسلم قاسمی، حضرت علامہ رفیق احمد بھیسانوی، حضرت مولانا مفتی محمد واصف صاحب دیوبندی، حضرت علامہ سید حسن باندوی، والد گرامی شیخ الادب حضرت مولانا مفتی محمد اسلام قاسمی، حضرت مولانا محمد حنیف صاحب مظفرنگری، امام الفرائض حضرت مولانا مفتی انوار الحق صاحب دربھنگوی اور بحر العلوم حضرت مولانا غلام نبی کشمیری علیھم الرحمہ

دوسرے باب میں موجودہ 12 اساتذۂ کرام کا تذکرہ ہیں جو دورہ حدیث وغیرہ میں احادیث کی متداول کتب کا درس دے رہے ہیں.

تیسرے باب میں سال رواں (1445-1446ھ) کے اساتذہ کی متعلقہ کتب کی سند بیان کی گئی ہے، سب سے اخیر میں مہتمم ادارہ حضرت مولانا محمد سفیان قاسمی کی سند مسلسلات بھی ذکر کی گئی ہے.

صفحہ نمبر 20 پر مصنف کتاب رقم طراز ہیں :

"میں اس کتاب کو حرف آخر نہیں مانتا، یہ تو نقش اول ہے اور نقش اول میں بہت ساری کمیاں رہتی ہیں، سو اس میں بھی ہوں گی، مجھ امید ہے کہ آئندہ کوئی صاحب قلم جب اس موضوع پر کام کرنا چاہے گا تو اسے چیونٹی کے منہ سے دانہ دانہ جمع کرنے کے مراحل سے نہیں گزرنا ہوگا.”

سرسری طور پر کتاب کو دیکھنے کے بعد دو تسامحات میرے سامنے بھی آئے، ایک تو شارح ہدایہ حضرت مولانا جمیل احمد سکروڈوی کا تذکرہ شامل کتاب نہیں ہے، ممکن ہے کہ ان کی عمر کے اخیر حصے کا اعتبار کیا گیا ہو کہ سن 2000ء سے تا وفات وہ دارالعلوم دیوبند سے وابستہ ہو گئے تھے، لیکن اس پر علمی اشکال باقی رہتا ہے کہ اگر اعتبار اخیر کا ہی کیا گیا ہے تو پھر حضرت مولانا محمد حنیف صاحب مظفرنگری کا ذکر بھی کتاب میں نہیں ہونا چاہیے تھا جنھوں نے حکیم الاسلام علیہ الرحمہ کے سانحہ ارتحال کے بعد دیگر مدارس میں خدمت تدریس انجام دی.

دوسرا نام میرے استاذ گرامی حضرت مولانا جعفر صاحب کا ہے، ان سے متعلق بھی دورہ حدیث کا سبق رہا ہے، ممکن ہے کہ ان کا نام اس لیے شامل نہ کیا گیا ہو کہ وہ غالباً مستقل استاذ نہ تھے بلکہ معین مدرس کے طور پر خدمات انجام دے رہے تھے.

بہرحال! چونکہ یہ ایک ایسی کتاب ہے جو آگے چل کر دارالعلوم وقف کے ہر قدیم و جدید فاضل کے لیے ایک اہم مرجع ہوگی اس لیے ہر اس شخص کا ذکر اور اسناد ضروری معلوم ہوتے ہیں جنھوں نے کبھی بھی دورۂ حدیث کا درس دیا ہو. مجھے امید ہے کہ یہ کمیاں آئندہ ایڈیشن میں درست کر لی جائیں گی، مشمولات کی اہمیت، اسناد کی صحت وغیرہ تسلیم، لیکن اگر اگلے ایڈیشن سے قبل کتاب کی زبان و انداز بیان پر بھی گہری نظر کرا لی جائے تو یقیناً اس کی افادیت اور مقبولیت میں اضافہ ہوگا. ان شاء اللہ. وما ذلک علی اللہ بعزيز

بلاشبہ مصنف کتاب سالہا سال کی عرق ریزی کے بعد منظر عام پر آنے والی اس کتاب کے لیے مبارکباد کے مستحق ہیں، اللہ تعالیٰ ان کو صحت و عافیت کے ساتھ طویل عمر عطا فرمائے تاکہ وہ کتابوں کے درمیان رہ کر نسل نو کے لیے اس طرح کے مختلف الانواع علمی گلدستے تیار کر سکیں جن کی خوشبو سالہا سال بلکہ نسلاً بعد نسلٍ باقی رہنے والی ہے. و ذلک فضل اللہ یؤتیہ من یشاء

کتاب حاصل کرنے کے لیے رابطہ کریں. مولانا انعام الحق قاسمی، ناظم کتب خانہ دارالعلوم وقف دیوبند

9997711132

انجمن ترقی اردو ( ہند ) کے سہ ماہی مجلے ’ اردو ادب ‘ کا تازہ شمارہ ( شمارہ نمبر 272۔271 ) خدائے سخن میر تقی میرؔ پر ایک خاص شمارہ ہے ، واقعی میں خاص شمارہ ! عام طور پر اب قدیم شعراء اور ادباء پر جو خاص شمارے شائع ہوتے ہیں ، وہ بس نام کے ہی خاص ہوتے ہیں ، بیشتر کا حال چبائے ہوئے نوالوں کو پھر سے چبانے کے مصداق ہوتا ہے ، یعنی وہی پرانا مال جو بار بار بازار میں لایا گیا ہے ، پھر سے سجا کر پیش کر دیا جاتا ہے ۔ ’ اردو ادب ‘ کا یہ خاص نمبر ، چبائے یا اُگلے ہوئے نوالوں کو دوبارہ چبانے کی بجائے ، اپنے دامن میں کچھ ایسی نئی چیزیں بھر کر لایا ہے ، جِن پر آنے والے دنوں میں میر شناسی کی نئی بنیادیں استوار کی جائیں گی ۔ یقیناً اِس کا سہرا ’ اردو ادب ‘ کے مدیر و انجمن کے جنرل سیکرٹری اطہر فاروقی کے سر ، آج تو بندھے گا ہی ، آنے والے دنوں میں بھی بندھے گا ، کیونکہ اس نمبر کو خاص بنانے میں ، ایک مدیر کے طور پر ، ان کی لیاقت کا کردار سب سے اہم ہے ۔ یوں کہہ لیں کہ اس نمبر کا منصوبہ بناتے ہوئے انہوں نے جدید زمانے کے مدیر کے ذہن سے سوچا ، پیچھے کی طرف گھوم کر دیکھنا ، یا پُرانے طرز پر اپنے منصوبے کی بنیاد رکھنا ، پسند نہیں کیا ۔ بُزرگ دانشور ادیب اور ’ اردو ادب ‘ کے مدیرِ اعلا صدیق الرحمن قدوائی نے اِس نمبر کے ’ اداریہ ‘ میں اس کا ذکر کیا ہے ، وہ لکھتے ہیں : ’’ اِس شمارے کا منصوبہ تیار کرتے وقت یہ طے کیا گیا تھا کہ اِس میں کسی بے انتہا اہم مضمون کے کسی دوسری زبان سے ترجمے کے علاوہ کوئی اور مطبوعہ تحریر شائع نہیں کی جائے گی ۔ اِس فیصلے پر عمل کرنے میں بہت سی مشکلات کا سامنا کرنا پڑا مگر آخرش اِس میں کامیابی حاصل ہو گئی … اِس شمارے میں شامل مضامین کے سیاق و سباق میں دوسری کوشش یہ کی گئی ہے کہ وہ محض چند کتابوں کے خیالات کی تکرار نہ ہوں ۔ اب یہ رویہ عام ہو گیا ہے کہ میرؔ پر ہونے والے سمیناروں اور اُن پر لکھی جانے والی دیگر تحریروں میں مقالہ نگار چند ایک پُرانی کتابوں سے ہی کچھ مباحث اٹھا کر اپنے مقالات تحریر کرتے ہیں ۔ اِس وجہ سے میرؔ پر غور و فکر کے سوتے اب تقریباً خشک ہو چکے ہیں ۔‘‘ وہ ’ اداریہ ‘ میں اطہر فاروقی کی مدیرانہ صلاحیت کا ذکر کرتے ہوئے لکھتے ہیں : ’’ ’ اردو ادب ‘ اطہر فاروقی صاحب کی ادارت میں اور ان کی کوششوں کے سبب اِس وقت دنیا بھر میں اردو کا سب سے معیاری مجلّہ تسلیم کیا جاتا ہے ۔‘‘ صدیق الرحمن قدوائی نے جو باتیں کہی ہیں یہ نمبر اُن پر پورا اُترتا ہے ۔ اِس کے تمام ہی مضامین میرؔ شناسی کی مروجہ روایت سے ’ ہٹ کر ہیں ‘ ۔ بات عالمی سطح پر انگریزی کے معروف شاعر رنجیت ہوسکوٹے کے خطاب ’ میر کی راہ پر ‘ سے شروع کرتے ہیں ۔ رنجیت ہوسکوٹے ایک بڑے شاعر ، مترجم ، ثقافتی دانشور اور فنونِ لطیفہ کے نقاد ہیں ، اُن کے کئی شعری مجموعے شائع ہو چکے اور وہ ملک و بیرون ملک کئی ایوارڈ حاصل کر چکے ہیں ۔ رنجیت ہوسکوٹے نے میرؔ کے 150 منتخب اشعار کا انگریزی زبان میں ترجمہ کیا ہے ، جِسے پینگوئن کلاسک سیریز کے تحت شائع کیا گیا ہے ۔ یہ مضمون دراصل انجمن کے تحت ، میرؔ کے تین سو سالہ جشن کی ایک تقریب میں ، اُن کی کتاب کے اجراء پر کی گئی اُن کی انگریزی تقریر کا اردو ترجمہ ہے ۔ یہ مضمون یا تقریر میرؔ شناسی کی کچھ ایسی راہیں دکھاتا ہے ، جِن پر اب تک یا تو اردو والوں نے توجہ نہیں دی ہے یا اِن پر اچٹتی سی نظر ہی ڈالی ہے ۔

رنجیت ہوسکوٹے اپنی تقریر میں ترجمے کے عمل کو مریدی اور پیری کا رشتہ قرار دیتے ہیں ، وہ کہتے ہیں : ’’ میری رائے میں ترجمہ محض ماہرانہ عمل نہیں ہے ۔ میرا خیال ہے کہ ترجمہ کچھ سیکھنے کا ، مشق کرنے کا عمل زیادہ ہوتا ہے ۔ مترجم کی حیثیت ہمیشہ ایک مرید کی ہوتی ہے اور مرید ہونے کے ناتے آپ خود کو اس متن کے حوالے کر دیتے ہیں ، آپ جس کا ترجمہ کر رہے ہیں یعنی اُس متن کا خالق آپ کا پیر بن جاتا ہے ۔‘‘ وہ پیر و مرشد کے لا شعوری مگر لازمی رشتے کی بات کرتے ہوئے ترجمہ کے عمل میں خودسپردگی کے جذبے کی بات کرتے ہیں اور بتاتے ہیں کہ اس رشتے اور خود سپردگی کے عمل سے انہوں نے پایا کہ ’’ میرؔ کی زبان میں زندگی ہے ۔ اس میں راحت کا ایک پہلو یہ ہے کہ میرؔ کی شاعری میں اضافت کا استعمال بہت زیادہ نہیں ہے ، بلکہ بعض اشعار میں تو اُنہوں نے فارسی کا مذاق بھی اڑایا ہے … یہاں ہمیں ایک ایسا شخص نظر آتا ہے جو بہت آسانی سے برج ، اودھی اور کھڑی بولی کے رنگ میں رنگا ہوا ہے ۔ دریائے گنگا کے آس پاس کی زبانیں اُن کی تصانیف میں اس طرح نمایاں ہیں گویا وہ ان زبانوں کو ایک شکل دے رہے ہوں ۔ دنیا کے متعلق ان کا رخ ہمیشہ اداسی کا یا درد و غم پر محمول نہیں ہے ۔ وہ خود کا مذاق اڑاتے ہیں ، خود پر ترس کھاتے ہیں ، کبھی اُداس تو کبھی سنجیدہ نظر آتے ہیں ، وہ مسرور و شادمان بھی ہیں اور کبھی کبھی فحاشی کا مظاہرہ بھی کرتے ہیں ۔‘‘ وہ ترجمہ کو ایک سیاسی عمل بھی بتاتے ہیں اور کہتے ہیں : ’’ ظلمت پرست قوتوں کا ایک بڑا گروہ یہ اصرار کر رہا ہے کہ اردو کو ایک مخصوص مذہب سے جوڑا جائے ۔ اس سے بھی زیادہ مہمل دعوے یہ کہہ کر کیے جا رہے ہیں کہ یہ ایک غیر ملکی زبان ہے ، لہذا بغاوت کے بعد 1858 میں ایک طرف سازشی طریقے سے سنسکرت آمیز کھڑی بولی پر مشتمل جدید ہندی نے اپنا راستہ الگ کر لیا ، کہ اس قدیم رسمِ خط کو جس میں اب اردو لکھی جاتی ہے ، ترک کر کے ناگری کو اپنے لیے نئے رسمِ خط کے طور پر مُسلّط کر لیا ۔ آج کی سرکاری ہندی یہی جدید ہندی ہے اور دوسری جانب اتنی ہی خود آگہی کے ساتھ اردو نے خود کو فارسی کے رنگ میں ڈھال لیا ۔ میری نظر اس دور پر رہی ہے جب میرؔ جیسا شاعر ان تمام لسانی وسائل پر یکساں طور پر قادر تھا ۔ میرؔ کے سیاق و سباق میں مرکزی سوال یہ ہے کہ میرؔ کی وہ حسّیت کیا تھی جس کے سبب انھوں نے تمام زبانوں کا اثر قبول کیا ، اُن علاقائی زبانوں کی تحریکوں کو سر آنکھوں پر بٹھایا جو لسانی طور پر ان کی شعری حسّیت سے ہم آہنگ ہو سکتی تھیں ۔‘‘ وہ کہتے ہیں : ’’ میں میرؔ کو اس منظر نامے پر موجود تاریخ کے ایک اہم گواہ کے طور پر دیکھتا ہوں ۔‘‘ میرؔ سے کیا سیکھا ؟ اس سوال کا جواب وہ یوں دیتے ہیں : ’’ اپنی شاعری کی زبان کو میں نے تونگر کیا ہے ۔‘‘ میرؔ شناسی پر یہ ایک لاجواب تقریر کا شاندار ترجمہ ( نریش ندیم نے اردو ترجمہ کیا ہے ) ہے ۔ مُجلّہ میں رنجیت ہوسکوٹے سے محترم سلمان خورشید کا لیا ہوا ، ایک انٹرویو بھی شامل ہے اور انگریزی کتاب کے اجراء کی رپورٹ بھی ۔

کتاب کے باقی کے مشمولات بھی میرؔ شناسی کے گھسے پِٹے ڈھرے سے ہٹ کر ہیں ۔ فارسی زبان کے بزرگ پروفیسر ، شریف حسین قاسمی کا مضمون بعنوان ’ میرتقی میرؔ کی دہلی منظوم و منثور فارسی آثار کی روشنی میں ‘ ہے ۔ اس مضمون میں میرؔ نے اپنے فارسی دیوان اور اپنی تصانیف نکات الشعرا ، فیضِ میرؔ اور ذکرِ میرؔ میں ، دہلی کے بارے میں جو تاریخی اور فارسی نوعیت کے واقعات بیان کیے ہیں ، اُن میں سے چند کا ذکر کیا گیا ہے ۔ یہ مضمون پڑھ کر رنجیت ہوسکوٹے کا یہ جملہ کہ ’’ میں میرؔ کو اس منظر نامے پر موجود تاریخ کے ایک اہم گواہ کے طور پر دیکھتا ہوں ‘‘ ، ذہن میں گونج جاتا ہے ۔ میرؔ واقعی اپنے دور کی تاریخ کے گواہ ہیں ۔ اسکالر بیدار بخت نے ، اپنی ذاتی لائبریری کی ایک بوسیدہ کتاب ’ اشعارِ محاورہ ‘ سے ، کچھ اشعار منتخب کرکے ، ایک وقیع مضمون بعنوان ’ میرؔ کے چند محاوراتی اشعار ‘ تحریر کیا ہے جو اس نمبر کا حصہ ہے ۔ اس نمبر میں دو مضامین میں ’ سرقے اور فریب ‘ کا ذکر کیا گیا ہے ؛ ارجمند آراء کا مضمون ہے ’ کلاسکی غزل پڑھنے سے پہلے ( نئے قاری کے لیے چند نکات )‘‘ ، مضمون لاجواب ہے ، لیکن اس میں ایک صاحؓب وپن گرگ کی ، جو میرؔ کا ہندی انتخاب ترتیب دے رہے تھے ، ارجمند آراء کی کاوش اور محنت کو اپنی محنت کے طور پر پیش کرنے کا افسوس ناک ذکر ہے ۔ محمود احمد کاوش نے پروفیسر معین الدین عقیل کی ’ تحقیق ‘ میرؔ کا غیر مطبوعہ دیوانِ ہفتم ( جس کی اشاعت انجمن سے ہوئی ہے ) کو دلائل کے ساتھ ’ جعل سازی ‘ قرار دیا ہے ۔ یہ دونوں ہی حرکتیں افسوس ناک ہیں ۔ اطہر فاروقی نے یہ دونوں تحریریں شائع کیں اس کے لیے وہ مبارک باد کے حقدار ہیں ۔ ضروری ہے کہ ان دونوں ’ معاملات ‘ پر بات کی جائے ۔ مزید مضامین معین الدین عقیل ، اخلاق آہن ، سرور الہدیٰ اور خالد ندیم کے ہیں ۔ اطہر فاروقی کا مضمون ’ میرؔ کی دلّی ، گنگا جمنی تہذیب اور علم و ادب کا گہوارہ ‘ لاجواب مضمون ہے ، یہ جہاں شہر دہلی سے مضمون نگار کی محبت کا ثبوت ہے ، وہیں یہ دلّی کو اُس کی گنگا جمنی تہذیب کے حوالے سے سمجھنے ، اور علم و ادب کے گہوارے کے طور پر اس کی عظمت پر روشنی ڈالنے کی ایک کامیاب کوشش بھی ہے ۔ ’ اردو ادب ‘ کی معاون مدیر صدف فاطمہ کے ’ ذکرِ میرؔ ‘ کے فارسی سے اردو ترجمہ میں شامل وہ لطائف بھی اس نمبر میں شامل ہیں جنہیں مولوی عبدالحق نے ’ فحش ‘ کہہ کر سنسر کر دیا تھا ۔ ’ ذکرِ میرؔ ‘ کے ترجمہ کے ساتھ انہوں نے لطائف کا بھی ترجمہ کیا تھا ، جِن پر انہوں نے نظرِ ثانی کی ہے ، اور نظر ثانی کیے گیے لطائف اس نمبر میں شامل کیے ہیں ۔صدف فاطمہ نے حواشی پر جتنی محنت کی ہے اس کی داد نہ دینا ذیادتی ہے۔ حواشی کے بغیر ان لطائف سے اس لیے لطف نہیں لیا جا سکتا تھا کہ ان لطائف کے سیاسی اور تہذیبی پس منظر کے بغیر یہ قطعی بے معنی تھے ۔ اس نمبر کے لیے اطہر فاروقی مبارک باد کے مستحق ہیں ۔ یہ خاص نمبر 500 روپے میں انجمن سے حاصل کیا جا سکتا ہے ۔

نام رسالہ : سہ ماہی ’اردوادب‘ (میر تقی میرؔ نمبر)

مدیران : صدیق الرحمٰن قدوائی، اطہر فاروقی، صدف فاطمہ

اشاعت : جلد:-69 68، شمارہ: 274-271 (جولائی2024 تا جون2025 )

صفحات : 320

قیمت : 500 روپے

ناشر : انجمن ترقی اردو (ہند)، اردو گھر،212، راؤز ایونیو، نئی دہلی۔ (موبائل: 9968236208)

اردو کے ہر قسم کے رسائل و جرائد کا زوال ہرچندکہ یہاں موضوع نہیں مگر یہ سوال اہم ضرور ہے کہ جب خصوصاً اردو کے ادبی پرچے تیزی سے بند ہورہے ہیں تو آخر سہ ماہی ’اردو ادب‘ اپنی اشاعت کے 103 سال بعد بھی اتنی ہی آب و تاب سے کس طرح شائع ہورہا ہے۔ مشہور صحافی خشونت سنگھ نے Illustrated Weekly of India کا مدیر بننے کے بعد اس کی تعدادِ اشاعت کو لاکھوں میں پہنچا دیا تھا، انھوں نے کامیاب پرچے کا جو نسخہ اپنی خودنوشت سوانح Truth, love & a little malice an autobiography میں بتایا ہے، اس پر اردو کا کوئی جریدہ پورا نہیں اترتا۔ یعنی : Inform, Amuze and Irritate (ص 253)۔ اردو کے ادبی پرچوں میں بعد کی دونوں خصوصیات مفقود رہیں۔ یہی وجہ ہے کہ ایک طرف جہاں انگریزی کے بعض علمی پرچوں میں مضمون اشاعت کے لیے منظور ہونے کے بعد پانچ برس تک انتظار کرنا پڑتا ہے، وہیں اردو میں نوکری اور ترقی کی مجبوری کا فائدہ اٹھانے والے اردو کے نام نہاد Peer Reviewed Journals کی تعداد اشاعت سو بھی نہیں ہے۔

اردو ادب کے مدیر ہمیشہ بڑے اور نہایت قابلِ احترام لوگ رہے ہیں۔ اس فہرست میں باباے اردو مولوی عبدالحق اور پروفیسر آلِ احمد سرور کے اسماے گرامی خاص طور پر قابلِ ذکر ہیں، مگر ڈاکٹر اطہر فاروقی صاحب کی ادارت میں اردو ادب نے اپنی منفرد شناخت قائم کی ہے۔ مضامین کے موضوعات کا تنوع، بغیر کسی مصلحت کے تحریروں کا انتخاب اور پورے پرچے کی ایسی معیاری زبان جو تحریروں کے عدم توازن کو دور کردے، اردو کے علمی جریدے میں اب نظر نہیں آتی۔ اردو میں تو اصل میں ایڈیٹنگ کا انگریزی جیسا تصور ہی نہیں ہے۔ ایڈیٹنگ کا اصول یہ ہے کہ اگر مدیر ایک مضمون قاضی عبدالودود کا شائع کررہا ہے تو باقی مضامین کی زبان کو بھی وہ ایڈیٹنگ سے تقریباً قاضی صاحب کی زبان کی سطح پر لے تو آئے مگر دونوں کے درمیان امتیازبھی قائم رہے ۔

میر تقی میرؔ (1810-1723) اردو شاعری کے ان بلند پایہ شعرا میں شمار ہوتے ہیں جنھیں بجا طور پر خداے سخن کا لقب دیا گیا ہے۔ ان کے کلام میں انسانی جذبات، درد، عشق، اور فلسفۂ حیات کا جو امتزاج ملتا ہے، وہ اردو ادب میں ایک منفرد مقام کا حامل ہے۔ میر کی ولادت کے تین سو سالہ جشن کے موقعے پر انجمن ترقی اردو (ہند) نے پورے برس تقریبات منعقد کیں۔ پہلی تقریب 22 جنوری 2024 کو انڈیا ہیبی ٹیٹ سنٹر کے اشتراک سے اور دوسرا چار روزہ جشنِ میر 15 سے 18 فروری 2024 کو انڈیا انٹرنیشنل سنٹر، نئی دہلی کے اشتراک سے منعقد ہوا اور آخری تقریب 29 ستمبر کو میر تقی میرؔ کے 150 اشعار پر مبنی انگریزی کے مشہور شاعر رنجیت ہوسکوٹے کی کتاب The Homeland’s an Ocean پر انڈیا ہیبی ٹیٹ سنٹر ہی میں منعقد کی گئی۔ ان تینوں ہی تقریبات میں اردو کی اصطلاحی دنیا سے باہر میر کے شائقین کی بڑی تعداد نے شرکت کی۔ کسی بڑے شاعر کے جشن کی اکثر تقریبات رسمی یا خانہ پری کی حد تک محدود رہتی ہیں، لیکن انجمن نے اس روایت سے ہٹ کر میر کے تعلق سے جو کام انجام دیا، وہ میر کے مطالعات کے فکری اور تحقیقی میدان میں نمایاں اہمیت کا حامل ہے۔ جشن میر کا اختتام سہ ماہی مجلے ’اردو ادب‘ کے خاص شمارے میر تقی میرؔ نمبر، جلد 68-69، شمارہ نمبر 270-74 پر کیا گیا ہے، جو میر کے ادبی مقام کو روشن کرنے کی نہایت کامیاب کوشش ہے۔ یہ شمارہ میر کی شخصیت اور فن کے مختلف پہلوؤں کو پیش کرنے کی ایک عہدساز کوشش ان معنوں میں ہے کہ میر پر لکھی جانے والی تحریروں میں اب جو یکسانیت اور اوبا دینے والے چند ہی نکات کی تکرار ہوتی ہے، یہ شمارہ اس سے برات کی کوشش ہے۔ اس شمارے کا ہر مضمون میر کی زندگی اور کلام کے مختلف گوشوں پر روشنی ڈالتا ہے۔

اردو ادب کے میر تقی میرؔ نمبر میں نہ صرف میر کے فکر و فن پر سنجیدہ اور گہرائی پر مبنی تحقیق پیش کی گئی ہے بلکہ اس کے ذریعے میرؔ کو عالمی تناظر میں متعارف کرانے کی کامیاب کوشش بھی اس شمارے کا خاصہ ہے۔ جریدے کے مدیر ڈاکٹر اطہر فاروقی کا اس خصوصی شمارے کو انفرادی اور تحقیقی مواد سے مزین کرنے میں فیصلہ کن کردار جا بجا نظر آتاہے۔ اس شمارے میں شامل مضامین، تراجم، اور مباحث میر کے تخلیقی، فکری، اور تہذیبی پہلوؤں کو نمایاں کرتے ہیں۔ یہ شمارہ اس بات کا بھی مظہر ہے کہ کس طرح ایک مدیر اپنی بصیرت، محنت، اور علمی ذوق سے ایک ادبی مجلے کو اتنے اعلا معیار پر پہنچا سکتا ہے اور وہ بھی ایسے وقت میں،جب اردو کے علمی جریدے تیزی کے ساتھ بند ہورہے ہیں، اور جو جاری ہیں، ان کی تعداد بہت کم ہے جب کہ ’اردو ادب‘ علمی و ادبی مجلہ ہوتے ہوئے بھی بڑی تعداد میں فروخت ہوتا ہے۔جسے اب امیزون کے ذریعے بھی خریدا جاسکتا ہے۔ سرکیولیشن کی اس ا ٓسانی کو شاید ہی کسی دوسرے اردو رسالے نے اپنایا ہو۔

اطہر فاروقی صاحب نے اس شمارے کی وساطت سے نہ صرف میر کے علمی اور ادبی پہلوؤں کو ایک نئے اور معروضی انداز میں پیش کیا ہے بلکہ میر کی شاعری کی عصری معنویت اور بین الاقوامی اہمیت پر بھی روشنی ڈالی ہے۔ شمارے میں شامل مختلف النوع موضوعات نہ صرف میر کے کلام کو مختلف زاویوں سے سمجھنے میں معاون ہوں گے بلکہ ادب کے طلبا اور محققین کے لیے یہ شمارہ نئے امکانات کو بھی روشن کرتا ہوا نظر آتا ہے۔

اس خصوصی شمارے کا اداریہ انجمن کے صدر پروفیسر صدیق الرحمن قدوائی نے تحریر کیاہے، جس میں انھوں نے میر پر سنجیدہ اور معیاری کام کی ضرورت پر زور دیاہے۔ ان کے خیالات اس بات کا واضح اشارہ دیتے ہیں کہ اب میر کی شاعری اور ان کی شخصیت کے مطالعے میں گہرائی اور وسعت دونوں کا مکمل فقدان ہے۔ اپنے اداریے میں انھوں نے میر کی شاعری کو ان کے عہد کے تناظر میں دیکھنے کی ضرورت پر زور دیا ہے اور اس بات کی طرف بھی اشارہ کیا ہے کہ میر کی شخصیت اور کلام کے حوالے سے تحقیق کے نئے دروازے کھولنے کی ضرورت ہے۔ اداریے میں اس بات پر بھی زور دیا گیا ہے کہ میر کا مطالعہ ان کے فارسی کلام کے بغیر نامکمل ہے۔ اس بات کو شمارے میں شامل مضامین کی ترتیب اور تنوع سے بخوبی تقویت ملتی ہے۔ قدوائی صاحب کا یہ اداریہ ’اردو ادب‘ کے اس خصوصی شمارے کی علمی سمت کو بھی متعین کرتا ہے۔ انھوں نے نہایت بصیرت افروز انداز میں میر پر سنجیدہ تحقیقی کام کی ضرورت پر زور دیا ہے۔ ان کے مطابق، میر کا مطالعہ صرف ان کے کلام تک محدود نہیں ہونا چاہیے بلکہ ان کی شاعری کے ذریعے ان کے عہد، ثقافت، اور انسانی جذبات کی تفہیم بھی ضروری ہے۔

میر کے عالمی تناظر میں تعارف کے لیے انگریزی کے بین الاقوامی شہرت یافتہ شاعر رنجیت ہوسکوٹے کے قلم سے کیے گئے میر کے 150 اشعار کا ترجمہ Homeland’s an Ocean قابلِ ذکر ہے۔ شمارے میں شامل ’گوشہ ہوسکوٹے‘ کے تحت ان کی تقریر بعنوان ’میر کی راہ پر‘ اور سلمان خورشید صاحب کے ساتھ گفتگو میر کے تخلیقی عمل اور ان کے تہذیبی و ثقافتی اثرات کی تفہیم کے نئے امکانات سے پُر ہے۔ یہ گوشہ میر کی شاعری کی بین الاقوامی اہمیت کو نمایاں کرتے ہوئے یہ بتاتا ہے کہ میر کا کلام نہ صرف اردو دنیا میں بلکہ دیگر زبانوں اور ثقافتوں پر بھی گہرا اثر رکھتا ہے۔ ڈاکٹر اطہر فاروقی کی ذاتی دلچسپی کی وجہ سے رنجیت ہوسکوٹے جیسا انگریزی کا بین الاقوامی شہرت یافتہ شاعر انجمن ترقی اردو (ہند) کی دعوت پر میر پر گفتگو کے لیے دلّی آیا۔ یہ دونوں تحریریں انگریزی سے اردو میں نریش ندیم صاحب نے ترجمہ کی ہیں اور ان کی مہارت کے ساتھ ایڈیٹنگ ڈاکٹر صدف فاطمہ نے کی ہے۔

شمارے میں شامل مضامین کی فہرست اور ان کے موضوعات میر کی زندگی اور شاعری کے تمام ضروری پہلوؤں کا احاطہ کرتے ہیں۔ ہمارے زمانے میں فارسی کے سب سے محترم اسکولر پروفیسر شریف حسین قاسمی کا مضمون میر تقی میر کی دہلی (منظوم و منثور فارسی آثار کی روشنی میں) میر کی دہلی اور شاہ جہان آباد کے ادبی منظرنامے کو میر کی فارسی شاعری کے تناظر میں پیش کرتا ہے جو اس دور کی گنگا جمنی تہذیب کو سمجھنے میں ایک ایسے وقت میں مددگار ہوگا جب اس گنگاجمنی تصور کے گردہی خطرات منڈلا رہے ہیں۔

’میر کے چند محاوراتی اشعار‘ میں ڈاکٹر بیدار بخت نے میر کے محاوراتی اشعار کا تنقیدی جائزہ لے کر ان کے اسلوب کے اثر، نزاکت اور معنوی گہرائی کو روشن کیا ہے۔ اس مضمون سے میر کے اشعار کی فلسفیانہ اور ادبی اہمیت بھی واضح ہوتی ہے۔ ’میر تقی میر: تازہ تحقیقات و انکشافات‘ میں پروفیسر معین الدین عقیل نے میر پر ہونے والی جدید تحقیقات کو پیش کرتے ہوئے اہم انکشافات کیے ہیں۔ ان کی تحریر تحقیقی نوعیت کی ہے اور نئے قاری کے لیے میر کے مطالعے کو دلچسپ بناتی ہے۔

’میر کی فارسی شاعری (اختصاص و امتیاز)‘ میں پروفیسر اخلاق آہن نے میر کی فارسی شاعری کے اختصاص اور امتیاز کو بیان کیاہے۔ ان کا مضمون اس بات کو ثابت کرتا ہے کہ میر صرف اردو ہی کے شاعر نہیں تھے بلکہ فارسی ادب میں بھی بلند مقام رکھتے ہیں۔ ’آب حیات اور میر‘ میں ڈاکٹر سرور الہدیٰ نے ’آب حیات‘ میں میر کی تصویر کشی پر تنقید تو کی ہے مگر اس کتاب کو سنجیدگی کے ساتھ پڑھنے پر زور دیاہے۔ خالد ندیم کا مضمون ’تلمیحات میر: انبیاے کرام کے حوالے سے‘ میں میر کی شاعری میں مذہبی حوالہ جات اور تلمیحات کے استعمال کو گہرائی سے بیان کرتا ہے۔ یہ مضمون میر کی فکری وسعت اور ان کے ادبی ورثے کی اہمیت کو مزید نمایاں کرتا ہے۔

’قندِ مکرر‘ کے عنوان کے تحت پروفیسر ارجمند آرا کا ترجمہ کردہ رالف رسل کا مضمون ’میر: ایک شخص اور اس کا عہد‘ اور علی سردار جعفری کے ’کلیات میر کا دیباچہ‘ ایک بار پھر شائع کرنا شمارے کی اہمیت میں قابلِ قدر اضافہ کرتا ہے۔ یہ تحریریں میر کی شخصیت اور ان کے عہد کو بہتر سمجھنے میں معاون ہیں۔

پروفیسر ارجمند آرا کا ہی مضمون ’کلاسیکی غزل پڑھنے سے پہلے‘ نئے قارئین کے لیے نہایت اہم ہے۔ میر کے اشعار کو سمجھنے کے لیے دیے گئے نکات نہایت مفید ہیں اور ان کی شاعری کے پس منظر کو واضح کرتے ہیں۔ اس مضمون سے قبل ڈاکٹر اطہر فاروقی کی وضاحتی نوٹ بعنوان ’دیوانِ میر ناگری میں : کہانی ایک نہایت شاطرانہ سرقے کی‘ نے دیوان میر کی تدوین اور اشاعت کے مسائل کے اس سلگتے ہوئے سوال کو اٹھایا ہے جو اردو شاعری کی ناگری میں اشاعت کے متعلق ہے۔ اردو سے ہندی ترجمے کو لوگ دنیا کا سب سے آسان کام نہ صرف سمجھتے ہیں بلکہ اسے مشینی انداز میں کرتے بھی ہیں، جو اردو ادب کے لیے نیک فال قطعی نہیں ہے۔ پروفیسر ارجمند آرا اپنے ایسے ہی ایک شاگردـ ’وپن گرگ‘ کی بدنیتی کا شکار ہوگئیں۔ ان کے اس شاگرد کا خیال تھا کہ ایک اردو اور ناگری جاننے والے ٹائپسٹ کے ذریعے میر کی شاعری کو اردو سے ناگری لپی میں منتقل کرنا نہایت آسان کام ہے۔ ارجمند آرا صاحبہ نے اس متن کو ناگری میں ازسرِنو مرتب کیا مگر ان کے شاگرد نے اس کتاب کو ’چلو ٹک میر کو سننے‘ کے عنوان سے راج کمل پرکاشن سے صرف اپنے نام سے شائع کرالیا۔

محمود احمد کاوش کا مضمون ’میر تقی میرؔ کا غیر مطبوعہ دیوانِ ہفتم‘ میں میر کے متنازع غیر مطبوعہ ’دیوان ہفتم‘ کے حوالے سے کی گئی تنقیدمضمون نگار کی علمی گہرائی اور باریک بینی کا مظہر ہے۔ پروفیسر معین الدین عقیل صاحب کے مطبوعہ متن میں سیکڑوں غلطیوں کی نشاندہی اور مدون کے دعووں کی تردید نے اسے ایک غیرمعمولی مضمون بنادیا ہے۔ خاص طور پر دو غزلوں، چند اشعار، اور ایک مصرع کی بنیاد پر نئے دیوان کا دعویٰ، جسے محمود احمد کاوش نے ’فریب‘ یا ’لاعلمی کا شاہکار‘ قرار دیا، اردو تحقیق کے معیارات پر سوال اٹھاتا ہے۔ مدیر نے یہ مضمون شائع کرکے علمی اختلاف کا دروازہ ایک بار پھر کھولاہے۔ ان کا یہ قدم نہایت جرأت مندانہ ہے اور سہ ماہی ’اردو ادب‘ کی علمی دیانت داری پر بھی ایسے وقت میں دلالت کرتا ہے جب اردو کے علمی پرچے ستائشِ باہمی کا کلب بن کر رہ گئے ہیں اور ان میں چوں کہ کوئی اختلافی بات مصلحتاً شائع نہیں کی جاتی، اس لیے، قاری کی ان میں کوئی دل چسپی نہیں ہوتی۔

’ارمغان انجمن ترقی اردو (ہند)‘کے عنوان کے تحت ڈاکٹر صدف فاطمہ کے ترجمہ کردہ ’میر کے فارسی لطائف‘ کو شامل کرنا انجمن کا ایک اور جرات مندانہ قدم ہے۔ یہ ترجمہ میر کی شخصیت اور فن کے ان گوشوں کو سامنے لاتا ہے جو اب تک نظر انداز کیے گئے تھے۔ یہ ترجمہ ایک قابل تحسین کاوش ہے۔ اس نے میر کے تخلیقی پہلو کے ایک اہم گوشے کو اردو قارئین کے سامنے پیش کیا ہے۔ اس ترجمے کو شائع کر کے انجمن نے اپنی اس 98 سالہ غلطی کی عملی تلافی کی ہے جو مولوی عبدالحق نے اپنے نام نہاد مذہبی جوش میں کی تھی۔ ہمارے علماء نے کبھی میر کی شاعری پر اس لیے اعتراض نہیں کیا کہ اس میں موجود فحاشی کا بیان بیمار ذہن کی پیداوار نہیں بلکہ ایک زوال آمادہ معاشرہ کا آئینہ ہے جسے تاریخ کے تناظر میں دیکھنے کی ضرورت ہے۔ یہ ترجمہ نہ صرف نہایت سلیس ہے بلکہ اس پر ڈاکٹر صدف فاطمہ نے جو علمی حواشی لکھے ہیں، وہ بھی بے مثال ہیں۔ اس حصے کو پڑھنے کے بعد ہی میر اور بے خود دہلوی کے ان رشتوں کا پتا بھی چلتا ہے جن پر ابھی تک میر کے کسی نقاد نے لکھا ہی نہیں ہے۔ صدیق الرحمان قدوائی صاحب نے اپنے اداریے میں یہ مژدہ بھی سنایا ہے کہ ڈاکٹر صدف فاطمہ نے ذکرِمیر کے اس آخری حصے کا انگریزی ترجمہ بھی کرلیا ہے جو اس لیے بھی خوش آئند ہے کہ اس طرح اردو کو ایک ایسا مترجم مل گیا ہے جو اردو سے انگریزی اور فارسی سے اردو اور انگریزی میں نہایت عمدہ ترجمہ کرسکتا ہے۔

’میر کی دلی: شاہ جہان آباد، ایک شہر ممکنات‘ کے عنوان کے تحت فروری 2024 میں منعقدہ انجمن کی تقریب میں میر کے تخلیقی ورثے کو دہلی کی ثقافت کے ساتھ جوڑنے کی کوشش کی تھی۔ اس تقریب کے ساتھ دو اور تقریبات جن کا ذکر ابتدائی صفحات میں کیا گیا، کی تفصیلی رپورٹس بھی اس شمارے میں شامل ہیں، جو ان تقریبات کو ریکارڈ کا حصہ بنانے کی ایک عمدہ مثال ہونے کے ساتھ قارئین کو ان لمحات کا مشاہدہ کرنے کا موقع بھی فراہم کراتی ہیں۔

ایک بار پھر یہ بات کہنے کی ضرورت ہے کہ سہ ماہی اردو ادب کا مذکورہ ’میر تقی میر نمبر‘ انجمن ترقی اردو (ہند) کا ایک تاریخی علمی کارنامہ ہے۔ یہ شمارہ میر کی زندگی، شاعری، اور ان کے عہد کو نئے زاویوں سے پیش کرتے ہوئے اردو ادب میں تحقیق و تنقید کی نئی راہیں ہموار کرتا ہے۔ شمارے میں شامل مضامین اور تراجم میر کے ادبی مقام کو مزید مستحکم اور ان کی شخصیت کے مختلف پہلوؤں کو روشن کرتے ہیں۔ انجمن نے اس شمارے کے ذریعے میر کے تین سو سالہ جشن کو محض رسم کی ادائیگی تک محدود نہیں رکھا بلکہ پورے ایک برس ہر ممکن طریقے سے علم و ادب کی خدمت کا عملی مظاہرہ بھی کیا ہے۔ڈاکٹر اطہر فاروقی کی ادارت نے اس شمارے کو علمی، تحقیقی، اور ادبی شاہکار میں تبدیل کر دیا ہے۔ یہ شمارہ نہ صرف میر کے کلام کی عظمت کو روشن کرتا ہے بلکہ اردو ادب کی تحقیق اور تنقید میں نئے رجحانات کو بھی فروغ دیتا ہے جو ادب کے قارئین اور محققین کے لیے یقیناََ ایک بیش قیمتی تحفہ ہے۔

اردو میں فرسودہ فرامین و فرمودات ہی تنقیدی بحث و مباحثہ کا موضوع بنتے رہتے ہیں۔ اکثر سمیناروں کے موضوعات میں بھی کہنگی ہوتی ہے، ان میں بھی صرف مخصوص چہروں اور ناموں کی نمائش ہوتی ہے اور زیادہ تر سمیناروں میں کنوینر پروفیسر کی ذریت کا ہی تسلط رہتا ہے۔ اسی لیے یہ تصور عام ہوتا جارہا ہے کہ اردو کی موضوعاتی زمین تنگ سے تنگ تر ہوگئی ہے۔ اردو کی تنگ دامانی کا گلہ پہلے غیروں کو تھا مگر اب اپنے بھی شکوہ بداماں ہیں کہ اردو زبان وادب میں نئی جہات اور زاویوں کے امکانات بھی معدوم ہوئے جا رہے ہیں۔ تحقیق و تنقید کی سطح پر جمود کی سی کیفیت ہے مگر اس منجمد اور مضمحل ماحول میں کچھ ایسے متحرک اذہان بھی ہیں جو نئے موضوعاتی جزیرے کی تلاش میں کامیاب ہیں اور نئی موضوعاتی قندیل سے ذہن و نظر کو نئی روشنی عطا کررہے ہیں۔ ڈاکٹر عابد معز کا شمار ایسے شہیدان جستجو میں کیا جاسکتا ہے جو تحقیق و تنقید میں نئی رہگزر تلاش کرلیتے ہیں اور نئی برق تجلی سے حیرت زدہ بھی کرتے رہتے ہیں۔
اردو کے ڈاکٹر قلمکار بھی ایک نیا موضوعی منطقہ ہے جس کی سیاحت کرتے ہوئے ڈاکٹر عابد معز نے ایسے نجوم و جواہر اور گوہر تابدار تلاش کر لیے ہیں جن کا اردو سے پیشہ ورانہ رشتہ تو نہیں مگر اس زبان سے ذہنی اور جذباتی لگاؤ ضرور ہے۔ اس لیے اردو سے باضابطہ وابستہ نہ ہونے کے باوجود ایسے افراد نے اردو زبان کی فنی و فکری ثروت میں نہ صرف اضافہ کیا بلکہ یہ بھی احساس دلایا کہ اردو نہ فسانہ بادہ و ساغر ہے اور نہ ہی گل و بلبل کی حکایت سے عبارت ہے بلکہ یہ علمی اور سائنسی زبان بھی ہے۔ تراجم کے ذریعہ ہی سہی مگر اردو نے اپنے دامن میں بیشتر عصری علوم و فنون کو سمیٹ لیا ہے۔ اس ذیل میں شمس الامراء اور دار الترجمہ عثمانیہ کا ذکر ضروری ہے کہ ان کی بدولت اردو سائنسی اور سماجی علوم سے آشنا ہوتی گئی اور جدید سائنسی تکنیکی ایجادات اور تحقیقات بھی اردو زبان کا حصہ بنتے گئے۔ امیر کبیر نواب محمد فخرالدین خاں شمس الامرا حیدرآبادی نے علم پرور اور ادب دوستی کا ثبوت دیتے ہوئے اردو زبان کو سائنسی سرمایے سے مالال کیا۔ فلکیات، ریاضیات، ہیئت اور دیگر علوم کی کتابوں کے علاوہ میڈیسن سے متعلق بھی کئی اہم کتابوں کے ترجمے کرائے اور طب سے متعلق کتابیں شائع کروائیں۔ ان میں نافع الامراض، خلاصۃ الادویہ، کفایۃ العلاج اور بھوگ بل قابل ذکر ہیں۔ اس کی مزید تفصیل خواجہ حمیدالدین ایم اے عثمانیہ کی کتاب ’شمس الامرا کے سائنسی کارنامے‘ میں دیکھی جاسکتی ہے۔
اسی طرح سلطان العلوم میر عثمان علی خان کا قائم کردہ ادارہ جامعہ عثمانیہ کی خدمات بھی آبِ زر سے لکھے جانے کے لائق ہے۔ اس ادارے کا امتیازی اختصاص یہ رہا ہے کہ یہاں ابتدا تا انتہا ذریعۂ تعلیم اردو تھا۔ جملہ سائنسی اور سماجی علوم کی تعلیم اردومیں دی جاتی تھی۔ شاید اسی مقصد کے تحت دارالترجمہ (سرشت تالیف و ترجمہ کا قیام عمل میں آیا) اور ایک مجلس وضع اصطلاحات بھی قائم کی گئی جس سے ملک کے اعیان و اکابر وابستہ تھے۔ یہاں سے بھی میڈیسین کی کئی اہم کتابوں کے تراجم بھی شائع کیے گئے۔ امراض چشم اور پراکٹیکل فارمیسی جیسی کتابوں کی اشاعت عمل میں آئی۔ ہیلی برٹن کی کتاب کا ترجمہ ’مبادیِ جنسیات‘ کے نام سے ڈاکٹر حیدر علی نے کیا تھا۔ اس طرح کے اور بھی مترجمہ کتابیں شائع کی گئیں۔
یہ فیض ہے ان شخصیات کا بھی جن کا اردو سے پیشہ ورانہ تعلق نہیں ہے بلکہ وہ دوسرے شعبوں اور زبانوں کے فیض یافتہ ہیں یا انھوں نے اسناد حاصل کی ہیں۔ میں نے اپنے مضمون ’اردو سے غیرپیشہ ورانہ افراد کی اردو خدمات‘ موشوعہ ماہنامہ ’یوجنا‘ نئی دہلی، فروری 2021میں ایسے معتبر و مستند ادیبوں اور شاعروں کے حوالے سے لکھا ہے جو معاشیات، کامرس، جغرافیہ، ریاضیات، لاء، انجینئرنگ، نباتات یا تاریخ کے سند یافتہ تھے یا انگریزی ادبیات اور نفسیات سے تعلق رکھتے تھے مگر اردو زبان و ادب کو نئے زاویوں اور امکانات سے روشناس کرایا ہے اور اس زبان کو جمود و تحرک سے باہر نکالا ہے۔ ناوابستگانِ اردو کی اس فہرست میں ادبی مورخین اور تذکرہ نویسوں نے تاریخ ادب اردو، انگریزی کے مصنف رام بابو سکسینہ ایم اے انگریزی اور ضخیم تذکرہ ’خمخان جاوید‘ لکھنے والے لالہ سری رام (ایم اے انگریزی) کے نام بہت ہیں۔ اسی طرح ارد وکے مستند و معتبر محققین میں مالک رام، مختارالدین احمد، کالی داس گپتا رضا، قاضی عبدالودود ، نثار احمد فاروقی، پروفیسر نذیر احمد اوررشید حسن خان ہیں جو اردو کے نہیں بلکہ دوسری زبانوں یا علوم کے سند یافتہ ہیں۔ اردو نقادو ںمیں الطاف حسین حالی، امداد امام اثر، شبلی نعمانی، کلیم الدین احمد، اسلوب احمد انصاری، فضیل جعفری، دیویندر اسر، کرامت علی کرامت وغیرہ کا بھی اردو زبان و ادب سے براہِ راست نصابی یا تدریسی رشتہ نہیں ہے۔ شعری منظرنامے میں بھی زیادہ تر معتبر نام انہی کے ہیں جن کا اردو سے پیشہ ورانہ یا تدریسی تعلیمی تعلق نہیں ہے۔ ایسی شخصیات میں علامہ اقبال، فیض احمد فیض، میراجی، ن م راشد، مجروح سلطانپوری، ساحر لدھیانوی جیسی بڑے نام شامل ہیں۔ اس کے علاوہ فکشن میں بھی رشید جہاں، مصطفی کریم، انور سجاد، حسن منظر، آصف فرخی، خالد سہیل، بلند اقبال وغیرہ کے نام لیے جاسکتے ہیں۔ دیگر اصنافِ ادب ڈراما، طنز و مزاح، مثنوی اور قصائد کابھی یہی معاملہ ہے حتی کہ اصطلاحات سازی اور فرہنگ نویسی بھی اردو کے آؤٹ سائڈرز کی دین ہیں۔ اس تعلق سے مولوی وحیدالدین سلیم کا ذکر ضروری ہے کہ اصطلاحات سازی کے سلسلے میں ان کی کتاب ’وضع اصطلاحات‘ بنیادی حیثیت اور اہمیت کی حامل ہے۔ اسی طرح اردو میں سائنسی اور تکنیکی ادب تحریر کرنے والوں کی تعداد بھی کافی ہے۔ ان میں بیشتر وہی نام ہیں جن کا اردو ادبیات سے کوئی رشتہ نہیں ہے بلکہ یہ سب سائنس بیک گراؤنڈ کے ہیں۔ طبیعیات، نباتات اور دیگر سائنسی موضوعات کے ڈگری یافتگان ہیں۔ حقیقت یہ ہے کہ غالبیات اور اقبالیات میں بھی بیشتر وقیع کام انہی لوگوں کا ہے جن کا دوسرے شعبوں سے تعلق رہا ہے اور جنھوں نے اقبال شناسی کو ایک نئی جہت عطا کی ہے۔ ان میں فزکس کے سند یافتہ وہاب قیصر کا نام نہایت ضروری ہے۔ انھوں نے تفہیم غالب کو ایک نیا زاویہ دیا اور کلامِ غالب کی سائنسی تعبیر و تفہیم کے ذریعے غالب شناسی کی ایک نئی راہ پیدا کی۔ ان کی کتاب ’سائنس اور غالب‘ اس تعلق سے بہت معروف ہے۔ اس کے علاوہ ’غالب کادل‘ کے عنوان سے انھوں نے اپنے ایک مضمون میں ’دل‘ سے متعلق غالب کے اشعار نقل کرنے کے بعد سائنسی زاویے سے ان کی تفہیم و تجزیے کی کوشش کی ہے۔ ایک اہم بات یہ بھی ہے کہ غالب کے تعلق سے ادبی دنیا میں ایک فقرہ بہت مشہور ہے کہ ہندوستان میں دو مقدس کتابیں ہیں۔ ایک ’وید مقدس‘ اور دوسرا ’دیوانِ غالب‘۔ یہ فقرہ لکھنے والے ’محاسنِ کلام غالب‘ کے مصنف عبدالرحمن بجنوری ایل ایل بی اور باریٹ لا تھے۔ انھو ںنے جرمنی سے پی ایچ ڈی کی تھی۔ خلیفہ عبدالحکیم نے بھی اقبال کو ایک نئے زاویے سے سمجھا اور پرکھا۔ وہ بھی اردو کے نہیں انگریزی کے اسکالر تھے۔
جہاں تک میڈیکل سائنس سے وابستہ افراد کی بات ہے تو انھوں نے اردو زبان کو وسیع تر جولان گاہ عطا کی ہے اور نئی لفظیات واصطلاحات دی ہیں اور علاج تنگی داماں بھی کیا ہے۔ ان ڈاکٹروں نے صرف جسمانی امراض کی تشخیص نہیں کی بلکہ ادبیات عالیہ کی تشکیل و تجمیل میں بھی اہم کردار ادا کیا ہے۔ ذہنی اور نفسیاتی امراض کے اسباب وعلل پر ہی نگاہ نہیں رکھی بلکہ ادب کے گیسوئے برہم کو سنوارا بھی ہے، مگر اردو زبان وادب کے باب میں اہم کردار ادا کرنے کے باوجود انھیں اردو کا آوٹ سائڈر قرار دیا گیا اور عمدا اغماض برتا گیا ۔ اردو سے پیشہ ورانہ رشتہ رکھنے والوں نے اس ذہنی اور جذباتی محبت کی قدر نہیں کی اور ارباب اردو کے جذبہ تکاثر و تفاضل کی وجہ سے اردو کا ایک زریں باب نگاہوں سے اوجھل رہا اور ان یاران اردو نے اس زبان اردو کو میر و غالب اور آتش و اقبال میں ہی الجھائے رکھا، اس سے آگے سوچنے کی جسارت نہیں کی۔ ڈاکٹر عابد معز نے بہت اچھا کیا کہ انھوں نے اس تنگ موضوعی حصار کو توڑا اور اردو کو ایک نیا موضوعاتی کینوس عطا کیا اور یہ بتایا کہ اردو میں بھی میڈیکل لٹریچر ہے ۔طبی ادب سے اردو والوں کے کان تو آشنا تھے مگر اردو میں جدید میڈیکل سائنس سے واقفیت ذرا کم تھی اور یہ بھی کم لوگوں کو معلوم ہے کہ ایک زمانے میں میڈیکل سائنس کی تعلیم اردو زبان میں بھی دی جاتی رہی ہے اور سینکڑوں افراد نے اردو میڈیم سے ایم بی بی ایس کا کورس کیا ہے اور اس کا وسیلہ بنا جامعہ عثمانیہ حیدر آباد کا میڈیکل کالج جہاں سے ہزاروں طلبا نے اردہ میں ایم بی بی ایس کی ڈکری لی اور کامیاب معالج بنے، مگر صرف طبی تحقیقات و ا انکشافات سے سروکار نہیں رکھا بلکہ مختلف النوع تخلیقات کے ذریعہ زبان و ادب کی ثروت میں بھی اضافہ کیا ۔ عالمی ادبیات میں بہت سے ایسے فزیشین رائٹر ہیں جنھوں نے ادبیات کو نئے زاویوں اور امکانات گی نئی دنیا سے روشناس کرایا اور بنی نوع انسان کو صحت بخش ذہنی و فکری غذا بھی مہیا کی۔ اسمال پاکس ٹیکے کے موجد ایڈورڈ جینز بہت عمدہ نظمیں لکھتے تھے، ملیریا کا جرثومہ دریافت کرنے والے سر رونالڈ راس ناول نگار تھے ۔ انسانی قلب کی پیوند کاری کے لیے مشہور کرسچن برناڈ کالم نگار تھے، انھوں نے آپ بیتی بھی لکھی ۔ امراض قلب کے ماہر گیان چترویدی ہندی کے طنر و مزاح نگار تھے۔ کینسر کے ماہر (oncologist) سدھارتھ مکھرجی بہترین ناول نگار تھے ۔ ڈاکٹر عابد معز نے وہ جنھیں ڈاکٹر قلم کار کہا جاتا ہے عنوان کے تحت اسی نوع کی بیش قیمت معلومات فراہم کی ہیں۔ انھوں نے اسی کے ذیل میں ماہر اعصابیات و نفسیات سگمنڈ فرائڈ اور انٹون چیخوف کا بھی ذکر کیا ہے جنھوں نے کہا تھا کہ طب میری منکوحہ ہے اور ادب میری محبوبہ ان لوگوں نے واقعی محبوبہ کے ناز نخرے اٹھانے اور انھیں سجانے و سنوارنے میں کوئی کسر نہیں چھوڑی اور منکوحہ سے بھی وفاداری برقرار رکھی۔
ڈاکٹر عابد معز کا موضوعی ارتکاز جامعہ عثمانیہ کے اردو قلمکار ڈاکٹر پر ہے، اس لیے اردو زبان کے ذریعہ ڈاکٹری تعلیم پر بالتفصیل روشنی ڈالی ہے اور حیدرآباد میڈیکل اسکول کا ذکر کیا ہے کہ اردو میں میڈیکل کی تعلیم کا آغاز یہیں سے ہوا اور یہ سلسلہ جامعہ عثمانیہ میڈیکل کالج تک پہنچا جہاں مدتوں اردو میڈیم کے ذریعہ میڈیکل کی تعلیم و تدریس جاری رہی۔ شاید اردو میں میڈیکل تعلیم و تدریس کا ہی فیض ہے کہ اردو میں میڈیکل ڈکشنریاں وجود میںآئیں جن میں میڈیکل کی انگریزی اصطلاحات کو اردو پیراہن عطا کیا گیا، ان میں مخزن الجواہر، انگریزی اردو ڈاکٹری لغات (ڈاکٹر غلام جیلانی خان)، لغات طب (حکیم غلام نبی ، ایم اے)، وصی میڈیکل ڈکشنری (مولانا حکیم عزیز الرحمن اعظمی فاضل دیوبند) قابل ذکر ہیں۔ بعد میں حالات اور دیگر تقاضوں کے مدنظر 1950 میں انگریزی میڈیم کر دیا گیا۔ انھوں نے کتاب کے تیسرے باب کو جامعہ عثمانیہ کے اردو ڈاکٹر قلمکار سے مختص کیا ہے اور اس ذیل میں جتنے عثمانیین ڈاکٹر کی جستجو ممکن ہوپائی ان سب کے سوانحی کوائف اور تحقیقی اور تخلیقی آثار سے رو شناس کرانے کی بہت عمدہ کوشش کی ہے۔ ان میں سے بعض تو ایسے ہیں جن کی ڈاکٹری /طبی پہچان پر ادبی شناخت حاوی ہوگئی ہے، ان میں راج بہادر گوڑ، تقی عابدی ، عابد معز کے نام لیے جاسکتے ہیں۔
عابد معز نے میڈیسین کے کچھ ایسے ماہرین و متخصصین کا بھی تذکرہ قلمبند کیا ہے جنھوں نے اپنی طبی تحقیقات انیقہ کے ساتھ اردو کی ادبیات عالیہ کو توانائی اور تابندگی بخشی ہے۔ ان میں فلوروسس flurosis پر تحقیق کرنے والے ابو الحسن صدیقی، تغذیہ کے ماہر ڈاکٹر عابد معز کے نام اہم ہیں۔ ان ڈاکٹروں میں کچھ شعرا،کچھ مزاح نگار، کچھ کالم نگار ، کچھ محقق اور تنقید نگار ہیں۔ ڈاکٹر شعرا میں مشہور رباعی گو رباعیات الہام، الہامِ ثانی و الہام ثالث کے مصنف رگھو نندن راج سکسینہ ، ماہر امراض قلب اور انگریزی و اردو کے نظم نگار ڈاکٹر ماجد قاضی، ڈاکٹر محمد فصیح الدین خاں ، معروف غزل گو رنگاراؤ رنگین، اینستھیا لوجسٹ اور نظم کے شاعرسعید نواز بہت اہم نام ہیں۔ اردو اخبارات میں کالم نگاری کرنے والوں میں ڈاکٹر مجید خان، سکندر حسن، محمد قطب الدین کے نام آتے ہیں جنھوں نے صحت عامہ سے متعلق کالم لکھ کر بہت اہم معاشرتی فریضہ انجام دیا۔ تحقیق و تنقید میں دو نام تو ایسے ہیں جنھیں کبھی فراموش نہی کیا جاسکتا۔ راج بہادر گوڑ اور تقی عابدی۔
ڈاکٹر راج بہار گوڑ اپنی گراں تنقیدی نگارشات’ادبی مطالعے‘، ’ادبی جائزے‘ اور ’ادبی تناظر‘ کی وجہ سے ادبی حلقے میں مضبوط اور مستحکم شناخت رکھتے ہیں۔ انھوں نے ایک اہم کام یہ بھی کیا کہ اردو ادب سے متعلق انگریزی میں مضامین تحریر کیے جو کتابی شکل میں Randsom Writing کے عنوان سے شائع ہوئے۔ ڈاکٹر تقی عابدی علم وادب کی نہایت معتبر شخصیت ہیں۔ ان کی تحقیقی و تنقیدی کتابوں کی فہرست بہت طویل ہے۔ ان میں باقیات و ناظرات فیض، فیض فہمی، فیض شناسی، چوں مرگ آید، امجد فہمی، ابواب المصائب او رکائنات نجم بہت اہم ہیں۔
تصنیف و تالیف کے باب میں بھی بہت سے اہم نام ہیں، ان میں سے ابو الحسن صدیقی (انسانی امراض و طب جدید )، ڈاکٹر مجید خان (جدید نفسیات، فکر انگیز نفسیات، شخصیت کی پہچان )، سکندر حسن (عجائبات زندگی، مہد سے لحد تک )، محمد فصیح الدین خان (ارتقا ئے تمدن میں اسلام کاحصہ )، محمد یوسف احمد (مملکت آصفیہ میں اردو زبان کی ترقی و ترویج)، سید اختر احمد (خالق کائنات، اسرار کائنات )، محمد سالک (ڈاکٹر بطور مسیحا )، سید عبدالجلیل (رہنماے صحت )، مصطفی علی زیدی (خلق اعظم، خلق معظم ، پیام امن )، آر طاہر قریشی (ذرا مسکرا دو) وغیرہ ہیں جنھوں نے مقصدی اور مفید موضوعات پر کتابیں لکھیں اور خلق خدا کو فیض و فائدہ پہنچایا۔
ڈاکٹر عابد معز صاحب تصانیف کثیرہ ہیں۔ ان کی مطبوعہ کتابوں میں بات سے بات، موٹاپا ہماری صحت کا دشمن، چکنائی اور ہماری صحت، کولیسٹرال کم کیجیے، نمک کا استعمال کم کریں، ذیابیطس کے ساتھ ساتھ فارغ البال، اردو ہے جس کا نام ہے ،عرض کیا ہے بہت اہم کتابیں ہیں۔ اس کے علاوہ ’حیدرآباد میں اردو زبان کے ذریعے جدید طب‘ ان کی تازہ اہم ترین کتاب ہے جس میں انھوں نے حیدرآباد میں جدید طبی تعلیم کے آغاز اور آصف جاہی حکمرانوں کی سرپرستی کے حوالے سے تفصیل سے لکھا ہے۔ ان کے بقول حیدرآباد میں جدید طبی تعلیم کا آذاز بذریعہ اردو 1846 میں ہوا اور یہاں اردو زبان سے بے پناہ لگاؤ اور دلچسپ کی وجہ سے جارج اسمتھ کی ادارت میں جدید طب کا جنرل ’طبابت‘ کی اشاعت کا آغاز ہوا۔ مظفر شہ میری نے اس کتاب پر اپنے تاثرات کا اظہار کرتے ہوئے بڑی معنی خیز اور فکرانگیز بات لکھی ہے کہ ’’ڈاکٹر عابد معز صاحب دراصل دو بنیادی کام کررہے ہیں، ایک ’تحفظ تاریخ‘ اور دوسرا ’تحفظ فن‘۔‘‘ جامعہ عثمانیہ اور اردو زبان ادب کے حوالے سے ان کی جتنی بھی نگارشات ہیں ان کے پیچھے یہی دو مقاصد کارفرما ہیں۔ یہ کتاب ’جامعہ عثمانیہ کے اردو قلمکار‘ کو بھی اسی سلسلے سے جوڑ کر دیکھا جانا چاہیے۔ اس کتاب کی تصنیف کے محرکات کے حوالے سے ڈاکٹر صاحب نے لکھا ہے کہ:
’’اس کی دو وجوہات ہیں۔ اول تویہ کہ میں جامعہ عثمانیہ کا ایم بی بی ایس ڈگری یافتہ میڈیکل ڈاکٹر ہوں اور دوئم یہ کہ جامعہ عثمانیہ کی انفرادیت اردو زبان تھی۔ عثمانیہ یونیورسٹی برصغیر کی پہلی یونیورسٹی ہے جس میں کسی ہندوستانی زبان (اردو) کے ذریعے اعلیٰ تعلیم بشمول طبِّ جدید اور انجینئرنگ پڑھائی جاتی تھی۔‘‘
اس نوع کی کتابیں محنت شاقہ اور عرق ریزی کے بعد ہی وجود میں آسکتی ہیں۔ عابد معز نے نہایت مشکل معرکہ بآسانی سر کر لیا اس کے لیے انھیں صمیم قلب سے مبارکباد۔ مجھے ان کی مسیحا صفت شخصیت سے امید ہے کہ میرے ان مریضانہ الفاظ کو ضرور شرف قبولیت بخشیں گے۔

بیوروکریٹ سجن سنگھ یادو ، جنہوں نے لندن کے عالمی شہرت یافتہ تعلیمی مرکز ’ لندن اسکول آف ہائجین اینڈ ٹراپیکل میڈیسن ‘ سے ’ پبلک ہیلتھ ‘ میں ڈاکٹریٹ کی ہے ، کی لاجواب انگریزی کتاب کا اردو میں ’ ہندوستانی ویکسین کی ارتقائی داستان ‘ کے عنوان سے ترجمہ کرنے کے لیے ڈاکٹر خالد اختر علیگ کو ، میں تعارف و تبصرے کی ابتدائی سطروں میں ہی خراجِ تحسین پیش کر رہا ہوں ، کیونکہ ایک بہت ہی مشکل کتاب کو ، اُنہوں نے اِس خوبی سے رواں دواں زبان میں ڈھالا ہے ، کہ اسے پڑھنے والا ، دقیق طبّی اصطلاحات کے بوجھ تلے دبے بغیر ، کتاب سے محظوظ بھی ہوتا ہے ، اپنے علم میں اضافہ بھی کرتا ہے ، اور اپنے دوستوں اور جاننے والوں کو ترغیب بھی دیتا ہے ، کہ وہ اِس کتاب کا مطالعہ ضرور کریں ۔ میں یہ کہوں تو مبالغہ نہیں ہوگا کہ بڑے دنوں بعد انگریزی زبان سے میڈیکل کی کسی کتاب کا اردو زبان میں ایک بہترین ترجمہ ہوا ہے ۔ کیا ہے اس کتاب میں؟ اس سوال کا جواب تو کتاب کے نام ہی سے مل جاتا ہے ، لیکن تفصیلی جواب کے لیے ہم کتاب کے ابواب پر نظر ڈالیں گے ، مگر اس سے پہلے ڈاکٹر خالد اختر علیگ کا ایک مختصر تعارف ۔ میری اُن سے فیس بک کی ملاقات ہے ، جس پر میں اُن کے مضامین پڑھتا رہا ہوں ۔ طبّی ، ادبی اور سیاسی نیز دیگر موضوعات پر ، اُن کے کالم ملک بھر کے اخباروں میں شائع ہوتے رہتے ہیں ۔ لکھنئو میں ڈاکٹری کرتے ہیں ، اور ڈاکٹری کی ڈگری اے ایم یو کے ’ حکیم اجمل خاں طبیہ کالج ‘ سے حاصل کی ہے ۔ اُنہیں زیر تعارف و تبصرہ کتاب کا ترجمہ کرنے کی ذمہ داری ’ قومی کونسل برائے فروغ اردو زبان ، نئی دہلی ‘ کے ڈائریکٹر شعیب اقبال نے سونپی تھی ، جِسے اُنہوں نے ایمانداری سے پوری کیا ۔ ’ عرضِ مترجم ‘ میں ڈاکٹر خالد اختر علیگ لکھتے ہیں : ’’ بہت خوشی اور ذمہ داری کے گہرے احساس کے ساتھ قارئین کی خدمت میں ڈاکٹر سجن سنگھ یادو کی بیسٹ سیلر انگریزی کتاب India’s Vaccine Growth Story کا اردو ترجمہ پیش کر رہا ہوں ۔ موجودہ عالمی تناظر میں یہ انتہائی اہمیت کی حامل کتاب ہے ، کیونکہ ویکسین متعدی بیماریوں سے پیدا ہونے والے چیلنجوں کا مقابلہ کرنے کے لیے ایک اہم ہتھیار ثابت ہوئی ہے اور اس نے بے شمار جانوں کو بچا کر صحت عامہ میں ایک انقلاب برپا کر دیا ہے ۔‘‘

کتاب کی اہمیت کا مزید اندازہ ڈاکٹر ونود کے پال ( رکن نیشنل انسٹیٹیوٹ فار ٹرانسفارمنگ انڈیا NITI ) کے ’ حرفِ آغاز ‘ سے بھی ہوتا ہے ، وہ لکھتے ہیں : ’’ یہ کتاب اپنے قارئین کو ویکسین کے اتار چڑھاؤ والے دلچسپ سفر پر لے جاتی ہے ۔ اس میں ویکسین کے مواد کے لیے دوسرے ممالک پر انحصار سے لے کر عالمی ویکسین کے سپر پاور کے بطور ابھرنے تک ہندستان کی حیران کن داستان کا بیان ہے ۔ یہ کتاب قارئین کو اس بارے میں بھی آگاہ کرتی ہے کہ کس طرح 2-SARS-CoV کا ظہور ہوا ، اور کووڈ ۔ 19 ویکسین کی بے مثال اور تیز رفتار ترقی کا باعث بنا ۔ مصنف نے مستقبل میں ویکسینولوجی کے سامنے آنے والے چیلنجوں اور ہندستان کی ویکسین صنعت کی نشوونما میں نئے امکانات پر بھی بے لاگ انداز میں گفتگو کی ہے ۔‘‘

مذکورہ اقتباس پڑھ کر قارئین شاید یہ سوچنے لگیں کہ یہ کتاب تکنیکی اور میڈیکل و صنعتی اصطلاحات اور بیانیے سے بوجھل ہوگی ، لیکن ایسا قطعی نہیں ہے ، بیانیہ کسی کہانی جیسا سادہ ہے ، مثال مصنف کے ’ دیباچہ ‘ کی لے لیں ، جس کا عنوان ہے ’ چاندی کی گولی ( سلور بلٹ) ‘ اس کی ابتدائی سطریں لوگوں میں تجسس پیدا کرنے کا کام کرتی ہیں : ’’ میرے اور شاید دنیا بھر کے ایک ارب لوگوں کے نقطۂ نظر سے ، سال 2021 کی تعریف صرف ایک لفظ ’ ویکسین ‘ سے کی جا سکتی ہے ۔ یہ تعریف متفقہ طور پر تمام لغات اور سرچ انجنوں میں موجود ہے ۔‘‘ پھر ’ صدی کی سب سے بڑی آفت ‘ یعنی ’ کووڈ ۔ 19 ‘ کا ذکر ہے ۔ ’ دیباچہ ‘ میں متعدی بیماریوں اور ان پر قابو پانے کے لیے ’ ویکسین کی سائنس ‘ پر بات کی گئی ہے ۔ کتاب کے کُل نو ابواب ہیں ۔ پہلے باب کا عنوان ہے ’ کاؤ پاکس سے کووڈ ۔ 19 تک ‘ ، اس باب میں بہت ہی دلچسپ پیرائے میں مختلف متعدی بیماریوں پر قابو پانے کے لیے ’ ویکسین ‘ کی تیاری کی ایک مختصر مگر جامع تاریخ بیان کی گئی ہے ۔ اس باب سے پتا چلتا ہے کہ لفظ ’ ویکسین ‘ ایک لاطینی لفظ ’ ویکا ‘ سے نکلا ہے ، جس کا مطلب ’ گائے ‘ ہوتا ہے ۔ دراصل 1796 میں پہلی ’ ویکسین ‘ گائے کے اُن آبلوں کے ذریعے بنائی گئی تھی جنہیں ’ کاؤ پاکس ‘ کہا جاتا تھا ۔ جن افراد کو ’ کاؤ پاکس ‘ ہوجاتا تھا ، اُنہیں عام طور پر چیچک کی بیماری نہیں ہوتی تھی ، یہ وہ دلچسپ نقطہ تھا جسے ذہن میں رکھ کر تحقیق کی گئی اور چیچک کی ’ ویکسین ‘ کا جنم ہوا ۔ اُس وقت ’ ٹیکہ ‘ لگتا تھا ، جس نے دنیا کو چیچک کی خوفناک بیماری سے چھٹکارہ دلانے کا کام کیا ۔ ’ ٹیکہ ‘ لگانے کے عمل میں ہندوستان کے کردار پر بھی مصنف نے تفصیلی روشنی ڈالی ہے ۔ کتاب کا دوسرا باب ’ ویکسین کی تیاری ‘ کے عنوان سے ہے ، اس باب میں لوئس پاسچر کے ’ ریبیز ‘ کے ’ ٹیکے ‘ کی اور جان ہافکن کی ہیٖضہ اور طاعون کے ’ ویکسین کی تیاریوں کی کہانی بیان کی گئی ہے ۔ جان ہافکن کی طاعون کی ویکسین ہندوستان میں تیار کی گئی پہلی ویکسین تھی ، سال 1896 تھا ۔ اس باب میں جان ہافکن کی المناک کہانی بھی ہے ، کہ کیسے اتنے بڑے محقق کے ساتھ ناانصافی کی گئی اور کچھ لوگوں کی موت کے لیے ’ لاپروائی ‘ کا الزام لگا کر اُسے برطرف کرکے رخصت پر بھیج دیا گیا ! حالانکہ بعد میں ایک تحقیقاتی کمیشن نے ہافکن کو تمام الزاامات سے بری کر دیا تھا ، لیکن اُسے مزید تجربات کرنے سے روک دیا گیا تھا ۔ ہافکن دلبرداشتہ ہوکر ہندوستان چھوڑ کر برطانیہ چلا گیا تھا ۔ ممبئی کے پریل علاقہ میں آج بھی ’ ہافکن انسٹی ٹیوٹ ‘ ہے جہاں ویکسین تیار کی جاتی ہیں ۔ اس باب میں ٹائیفائیڈ اور ٹی بی ویکسین کی تیاری کی بھی مختصر تاریخ بیان کی گئی ہے ۔ یہ ایک دلچسپ باب ہے ۔ کتاب کے باب نمبر تین ’ ہندوستانی ویکسین کی ارتقائی داستان : دنیا کی ویکسین فارمیسی ‘ میں اس صنعت میں ہندوستانی کمپنیوں اور اداروں کے اتار چڑھاؤ کی داستان بیان کی گئی ہے ۔ کووڈ – 19 کی ویکسین بنانے والی کمپنی ’ سیرم انسٹیٹیوٹ آف انڈیا ‘ کے آغاز کی کہانی حیرت میں ڈالنے والی ہے ، اس انسٹیٹیوٹ کی بنیاد میں ایک گھوڑے کی موت نے اہم کردار ادا کیا ہے ! کیسے ، یہ جاننے کے لیے کتاب کے اس باب کا مطالعہ ضروری ہے ۔ باب نمبر چار میں ’ ویکسین کی معیشت ‘ کا ذکر ہے ۔ سجن سنگھ یادو لکھتے ہیں : ’’ ہندوستان عالمی ادارۂ صحت کی جانب سے پہلے سے منظور شدہ ویکسین تیار کرنے والا سب سے بڑا ملک ہے ۔ یہ ملک خود ہی ان ویکسین کا ایک بڑا خریدار بھی ہے ۔‘‘ اس باب میں ایک اقتباس کافی اہم ہے : ’’ عالمی ادارۂ صحت کی جانب سے شائع کردہ اعداد و شمار اور گرافکس کے مطابق ، چار دہائیوں سے زیادہ پُرانے حفاظتی ٹیکوں کے قومی پروگرام کے حامل ہندوستان میں ، صرف 65 فیصد بچے ہی وقت پر ویکسین حاصل کر پاتے ہیں ۔ ملک میں اب بھی تقریباً دس لاکھ بچے ہر سال ویکسین سے بچاؤ والی بیماریوں سے مر جاتے ہیں ، عالمی سطح پر خسرہ کے 44 فیصد ، خناق کے 60 فیصد ، جاپانی انسیفلائٹس کے 44 فیصد ، کزاز کے 40 فیصد اور کالی کھانسی کے 18 فیصد معاملات میں پانچ سال سے کم عمر بچوں کی ہونے والی اموات میں ہندوستان کا 44 فیصد حصہ ہے ۔‘‘ یہ اعداد و شمار تشویش ناک ہیں ، لیکن اہم بات یہ ہے کہ سجن سنگھ یادو نے انہیں کتاب میں شامل کیا ہے ! کتاب میں سابقہ حکومتوں پر تنقید ہے اور مودی حکومت کی ویکسینولوجی کے میدان میں خدمات کو سراہا گیا ہے ، لیکن مصنف نے حقائق کو مسخ نہیں کیا ہے ۔ آگے کے دو ابواب ’ ویکسین کی سرعت سے تیاری ‘ اور ’ دنیا کی سب سے بڑی ویکسین کی مہم ‘ میں کووڈ – 19 سے بچاؤ کے لیے حکومت اور کمپنیوں کے ذریعے کی گئی جلد از جلد ویکسین کی تیاری ، اور ہندوستان بھر کے لوگوں میں انہیں لگانے کی مہم کا بھرپور جائزہ لیا گیا ہے ۔ باب نمبر سات میں لوگوں کی ویکسین سے ہچکچاہٹ پر بات کی گئی ہے ، اور باب نمبر اٹھٓ میں ہندوستان کی ویکسین سفارت کاری پر روشنی ڈالی گئی ہے ، اُسی کو ’ ویکسین میتری ‘ کا نام دیا گیا ہے ۔ آخری باب میں ویکسین کے فروغ میں مختلف قیادتوں کے کردار کا جائزہ لیا گیا ہے ، مصنف کا کہنا ہے : ’’ انسانیت کے لیے بہت سی خطرناک متعدی بیماریوں کی شکست ویکسین کی وجہ سے ہی ممکن ہو پائی ہے ۔ مگر ، خطرناک بیماریوں پر فتح حاصل کرنے کے لیے ویکسین کی دریافت کے علاوہ ، اجتماعی ویکسی نیشن ( Mass vaccination ) کو فعال کرنے کے لیے مضبوط قیادت کی ضرورت ہوتی ہے ۔‘‘ آختتامیہ ’ نئے ہتھیار ، نئے چیلنجیز ‘ کے عنوان سے ہے ، جس میں ویکسین کی صنعت کے فروغ کے لیے کچھ مؤثر مشورے دیے گیے ہیں ۔ کتاب کے آٹھ صفحات میں ’ مخففات ‘ دیے گیے ہیں ، فرہنگ ہے اور مصنف اور مترجم کے تعارف ۔ کتاب 331 صفحات پر مشتمل ہے ، قیمت 215 روپیے ہے ۔ یہ شاندار کتاب ’ قومی کونسل برائے فروغ اردو زبان ، وزارت تعلیم ، حکومت ہند ، نئی دہلی ‘ سے حاصل کی جا سکتی ہے ۔

انور آفاقی اردو شعر و ادب کے اس قبیل کی نمائندگی کرتے ہیں جہاں پرورشِ لوح و قلم عبادت سے کم نہیں، سو انہوں نے شاعری کو اس طور پر اپنایا کہ دل کی صدا کا اظہاریہ بنا ڈالا ۔ انہوں نے گذشتہ صدی کی آٹھویں دہائی میں شاعری کی شروعات کی ۔ پہلا شعری مجموعہ” لمسوں کی خوشبو "2011 میں شائع ہوا ۔ اس کا دوسرا ایڈیشن بھی منظر عام پر آیا۔ اس کے علاوہ "دیرینہ خواب کی تعبیر ” (سفرنامہ کشمیر) "پروفیسر مناظر عاشق ہرگانوی سے گفتگو ” (انٹرویو) "نئی راہ نئی روشنی”( افسانوی مجموعہ)دوبدو”(ادبی مکالمہ ) ،”میزانِ فکر و فن” ( مضامین) تصنیفات و تالیفات کے ذریعے انہوں نے اپنی ادبی کاوشوں کو پیش کیا ہے۔ ان کے اولین شعری مجموعہ "لمسوں کی خوشبو "کا ترجمہ جناب سید محمود احمد کریمی نے Fragrance of Palpability نام سے کیا ۔ انگریزی میں

” Anwar Afaqi: A Versatile genius”

کے نام سے سید محمود احمد کریمی کی کتاب سے انگریزی داں حضرات کو انور آفاقی کے بارے میں معلومات ہوتی ہیں ۔” انور آفاقی: آئینہ در آئینہ” کے نام سے ڈاکٹر عفاف امام نوری کی ایک کتاب منظر عام پر آئی ہے جس سے ان کی شخصیت اور ادبی فتوحات کا کم و بیش مکمل احاطہ ہوتا ہے ۔ مذکورہ گفتگو سے انور آفاقی بحیثیت ادیب ان کے مراتب کا اندازہ کیاجا سکتا ہے۔

"اداس موسم” ان کا دوسرا شعری مجموعہ ہے ۔اس میں 60 سے زیادہ غزلیں، بارہ نظمیں ، قطعات اور منتخب اشعار شامل ہیں۔ مشمولات کو دیکھ کر یہ کہا جا سکتا ہے کہ شاعر کو غزلیہ شاعری سے زیادہ دلچسپی ہے ۔ شاعر کی اس بانگی سے اندازہ کیا جا سکتا ہے کہ شاعری ان کی طبیعت کا حصہ ہے۔ وہ اپنی بات میں لکھتے ہیں کہ ” زندگی کے دوسرے حادثات و واقعات کا تجربہ کیا کچھ کر سکا ہوں اس کا مجھے پتہ نہیں مگر مجھے لگتا ہے کہ میرا یہ مجموعہ کلام "اداس موسم "پہلے مجموعہ کلام” لمسوں کی خوشبو” سے قارئین کو مختلف ضرور نظر ائے گا ۔ میں یہ بھی سمجھتا ہوں کہ اگر کسی شاعر کا کوئی بھی شعر کسی بھی قاری کے ذہن میں محفوظ ہو جاتا ہے تو اسے شاعری سے بنواس نہیں لینا چاہیے۔ لہذا اس نئے شعری مجموعہ کے ساتھ حاضر ہوں ۔ ایک بات گوش گزار کرتا چلوں کہ اس مجموعہ کلام پر میں نے دانستہ طور پر کسی بھی شخص استاد یا شاعر سے کوئی اصلاح نہیں لی ہے ۔ کسی استاد سے اصلاح کے نام پر غزلیں لکھوا لینا اور پھر مجموعہ کلام چھپوا لینا نہ تو میری فطرت ہے اور نہ ہی میری طبیعت اسے گوارا کرتی ہے”۔

ان کی شاعری کے مرکز میں محبت کا حسن موجود ہے۔ رنگِ تغزل کمال کا ہے۔ واردات قلبی کا اظہار سکون دیتا ہے ۔ دل سے نکلی محبت کی صدا محسوس کیجئے ۔ یہ اشعار میری پسند کے ہیں۔

سلگتی رات کی تنہائی مار ڈالے گی

چلے بھی آؤ کہ جینے کی آرزو ہے ابھی

یہ کس مقام پر دل نے مجھے ہے پہنچایا

جدھر بھی دیکھوں فقط تو ہی روبرو ہے ابھی

بس آسمان سے تکتا ہے رات بھر مجھ کو

وہ چاند چھت پہ بھی اترے یہ آرزو ہے ابھی

وہ میری نظم و کہانی میں سانس لیتا ہے

بچھڑ گیا ہے مگر دل سے وہ گیا بھی نہیں

آنکھیں بھی قتل عام کرتی ہیں

نام بد نام ہے قیامت کا۔

انور آفاقی الفاظ کے انتخاب میں کافی چوکس رہتے ہیں ۔ شاعری یوں بھی فنون لطیفہ میں اپنی نزاکت اور حسن خیال سے پہچانی جاتی ہے۔ ان اشعار کو گنگنانے کو جی چاہتا ہے۔ کئی دفعہ چھوٹی بحروں کے اشعار خوب متاثر کرتے ہیں۔

تتلیوں کے حسین جھرمٹ میں

پھول کو اشکبار ہونا تھا

رکھ لیا تم نے ہے بھرم ورنہ

زندگی بھر شرمسار ہونا تھا

وہ کلی بعد ایک مدت کے

دیکھ کر مجھ کو کھل گئی ہوگی۔

ان کی شاعری کے مطالعہ میں ایک خوشگوار جذبے کا احساس ہوا۔ وہ ہے اپنے گاؤں کی مٹی سے محبت، وہاں کی فضا، ہریالی وغیرہ جو ان کے ذہن و دل میں رچا بسا ہے ۔ اردو شاعری میں یہ جذبے قابل قدر ہیں ۔ اس قبیل کے چند اشعار ملاحظہ کیجئے :

ہمارے گاؤں میں پیپل کی چھاؤں کافی ہے

تمہارے شہر میں ہوٹل ستارہ ہے تو ہے

تمہارے شہر میں جینا ہے مشکل

دھواں ہے شور ہے تنہائیاں ہیں

ہمارے گاؤں میں آکر تو دیکھو

ہوا ہے کھیت ہے ہریالیاں ہیں

دوران مطالعہ کئی اشعار نے دامنِ دل تھام لیا اور دیر تک محظوظ ہونے کو مجبور کیا ۔ یہ اشعار شاید آپ کو بھی پسند آئیں :

میں نے پلکیں جھکا لیا قصدا

زندگی اس کو مل گئی ہو گی

اس کے ہاتھوں میں دیکھا ہے پتھر

پھول میں جس کو پیش کرتا ہوں

عشق تو نام ہے عبادت کا

عشق میں فلسفہ نہیں ہوتا

زباں سے سخت تھا دل سے وہ پھول جیسا تھا

چلا گیا ہے تو ہر شخص یاد کرتا ہے۔

اس مجموعے میں ایک توشیحی نظم” مناظر عاشق ہرگانوی” اور” سید محمود احمد کریمی کی نذر” کے بعد "کرونا”، ” بہت گہرا اندھیرا چھا گیا ہے” ،” جلتی ہوائیں” ، ” خدشہ ” ، "غلیل کی زد پہ ” ، ” انتظار”( ایک منظوم افسانہ) "ذکر تیرا بعد تیرے” مع انگریزی ترجمہ، "بد نصیب لوگ” ، ” کربِ تنہائی” ، اور” الوداع الودع اے جانِ پدر” نظمیں پرتاثیر ہیں۔ ” انتظار ” تو لاجواب تخلیق ہے۔ غزلوں کی پیشکش میں جدت دکھائی دیتی ہے کہ شاعر نے غزل کے کسی ایک مصرع کو شرخی بنایا ہے ۔ یہ نیا تو ہے پر اچھا ہے۔ مجموعہ میں "اداس موسم” نام کو چھوڑ کر کچھ بھی اداس نہیں ہے بلکہ فرحت و تازگی ہر سو بکھری ہوئی ہے۔ مجموعے کے اندرونی فلیپ پہ کامران غنی صؔبا اور احمد اشفاق کی مختصر تحریر میں شاعر کی کارکردگی کو سراہا گیا ہے جبکہ بیک کور پر جناب حقانی القاسمی کی نپی تلی رائے شاعر کے اعتراف و اقرار کی راہ ہموار کرتی ہے۔ یقین ہے کہ شائقین ادب اس مجموعے کو پسند کریں گے۔

کوثرمظہری کی شناخت ناقد، شاعر اور ناول نگار کے علاوہ ایک مترجم کے طور پر بھی ہے۔ ترجمہ نگاری ایک اہم اور مشکل فن ہے۔ اس فن کی روایت بہت قدیم ہے۔ اس کا رشتہ انسان کی سماجی زندگی سے جوڑا جاتا ہے۔ ہندوستان میں بھی یہ روایت بہت پرانی ہے، چونکہ ہندوستان میں دوسرے ممالک سے آئے ہوئے لوگوں نے حکمرانی کی، اس لیے انھیں تراجم کی اشد ضرورت محسوس ہوئی۔ انگریزوں نے تو خاص طور پر فورٹ ولیم کالج کو اسی مقصد کے تحت قائم کیا تھا۔ ترجمے کے ذریعے ہی ہم دوسری زبانوں کے ادبیات کو سمجھتے ہیں۔ اگر ترجمہ نہ ہوتا تو شاید ادب کا ذخیرہ اتنا ثروت مند بھی نہ ہوتا۔ عموماً ترجمے کے فن کو علمی ترجمہ، ادبی ترجمہ اور صحافتی ترجمے میں منقسم کیا جاتا ہے۔ ترجمہ نگاری کے بہت سے اصول و ضوابط بھی ہیں، مترجمین کے لیے ان اصولوں کی پاسداری بہت ضروری ہوتی ہے۔ ترجمے کے اصول و ضوابط کے ساتھ جس زبان سے ترجمہ کیا جارہا ہے، اُس کے تہذیبی اور ثقافتی پس منظر کی جانکاری بھی ہونی چاہیے۔ اگر ادبی ترجمہ کیا جارہا ہے تو اس کے لیے سب سے اہم ہے کہ ترجمہ بامحاورہ کیا جائے اور روزمرہ، تشبیہات، ضرب الامثال، استعارات و کنایات اور رموز و علائم کا خیال رکھا جائے۔ اگر ادبی ترجمے کی بات کی جائے تو اس میں نثر کا ترجمہ قدرے آسان ہے، مگر جب نظم کی بات آتی ہے تو ذرا یہ مشکل ہوجاتا ہے اور جب غزل پر آکر بات رک جائے تو یہ اور بھی مشکل کام ہوتا۔ڈاکٹر خلیق انجم اپنے مضمون ‘شاعری کا ترجمہ‘ میں لکھتے ہیں:
’’سب سے زیادہ مشکل اور بعض اوقات تو ناممکن کی حد تک مشکل کام نظم کا ترجمہ ہے۔ شاید اسی لیے ڈاکٹر جانسن نے بہت سیدھے سادے اور مختصر الفاظ میں کہا تھا ’نظم کا ترجمہ تو جناب ہو ہی نہیں سکتا‘ اور وکٹر ہیوگو نے فیصلہ سنایا تھا ’نظم کے ترجمے کا خیال ہی بے معنی اور ناممکن ہے۔‘‘
(فن ترجمہ نگاری، مرتبہ: خلیق انجم، اشاعت اوّل، 1995، ص 135)
ادبی ترجمے کے تعلق سے پروفیسر کوثر مظہری نے اپنے ایک مضمون ’شعر غالب کے انگریزی تراجم‘ میں کچھ اہم سوالات کھڑے کیے ہیں اور ان کے جوابات بھی بہتر انداز میں دیے ہیں۔ ترجمے کی مشکل پسندی کے حوالے سے وہ لکھتے ہیں:
’’دنیا کی تمام زبانیں اپنا تہذیبی سیاق بھی رکھتی ہیں۔ انگریزی اپنا تہذیبی پس منظر رکھتی ہے اور فرنچ اپنا۔ اسی طرح عربی زبان اپنے تہذیبی نشانات سے پہچانی جاتی ہے اور سنسکرت اپنے تہذیبی مزاج سے۔ اسی طرح اردو بھی اپنا خاص تہذیبی مزاج رکھتی ہے۔ گفتگو اور نشست و برخاست کے آداب بھی ادب میں کہیں واضح طور پر تو کہیں قدرے مخفی انداز میں دیکھے اور محسوس کیے جاسکتے ہیں۔
فن ترجمہ نگاری میں ادبی ترجمہ نگاری ذرا مشکل کام ہے۔ اس میں بھی شاعری کا ترجمہ تو مزید مشکل ہے اور ذرا آگے بڑھ کے جب ہم اردو غزل کی بات کرتے ہیں اور پھر اس کے انگریزی ترجمے پر غور کرتے ہیں تو پسینے چھوٹ جاتے ہیں۔ لیکن پسینہ چھوٹنے کے اس عمل کے پیچھے ایک پُرخلوص جذبہ کار فرما ہوتا ہے اور وہ ہے تہذیبی، ثقافتی اور علمی و ادبی لین دین کا جذبہ۔‘‘(قرأت اور مکالمہ، ص 388)
ترجمے کے باب میں کوثرمظہری کا سب سے پہلا اور وقیع کام ہے خلیل جبران (جبران خلیل جبران) کے مشہور ناول The Broken Wings کا اردوترجمہ، جسے انھوں نے ’شکستہ پر‘ کے نام سے شائع کرایا ہے۔ یہ کتاب بہار اردو اکادمی کے مالی تعاون سے 1996 میں شائع ہوئی ہے۔ خلیل جبران بہت مشہور اور معروف ناول نگار تھے۔ ان کی پیدائش لبنان میں ہوئی۔ بعد میں خلیل جبران نے امریکہ میں سکونت اختیار کرلی۔ مذہب کے اعتبار سے عیسائی تھے۔ ان کا گھرانہ افلاس و تنگدستی کا شکار تھا۔ ان کے والد چاہتے تھے کہ یہ بکریاں وغیرہ چرا کر گزر بسر کرے مگر والدہ کی کوششوں سے وہ اس مقام تک پہنچے۔ چونکہ جبران کی مادری زبان عربی تھی اس لیے انھوں نے سب سے پہلے یہ ناول عربی زبان میں ’الأَجْنِحَۃُ المُتکسِّرہ‘ کے نام سے تحریر کیا تھا، اس کی اشاعت نیویارک سے 1912 میں ہوئی تھی۔ بعد میں Anthony R. Ferris نے اسے عربی سے انگلش میں ‘The Broken Wings’ کے نام سے منتقل کیا۔کوثر صاحب نے انگلش سے اردو میں ترجمہ کیا ہے۔ ان سے پہلے حبیب اشرف دہلوی ’ٹوٹے ہوئے پر‘ کے نام سے اردو زبان میں یہ ناول منتقل کرچکے تھے۔ اس کتاب میں دو محبت کرنے والے دلوں کی دلچسپ مگر غم انگیز کہانی ہے۔ ساتھ ہی سماج کے بااثر لوگوں بالخصوص پادریوں اور مذہبی پیشواؤں پر تیکھا طنز ہے جو معصوم عوام کو گمراہ کرنے میں کوئی کسر نہیں چھوڑتے ۔ اس ناول کو جبران خلیل جبران، پیش لفظ غم بے صدا، دست تقدیر، صنم کدے میں، سفید شعلہ، طوفان، دریائے آتشیں، موت کی بارگاہ میں، محبت کی دیوی، ایثار، نجات دہندہ، جیسے کئی عناوین کے تحت تقسیم کیا گیا ہے۔ ترجمے میں کوثر صاحب نے جو اسلوب اختیار کیا ہے وہ بہت سہل اور عمدہ ہے۔ نمونے کے طور پر کچھ اقتباسات ملاحظہ کریں:
’’اے میرے عہد شباب کے ساتھیو! تمھیں ان دوشیزاؤں کا واسطہ جنھیں تمھارے دلوں نے پیار کیا ہے، میں اپنی محبوبہ کے اجڑے ہوئے مزار پر پھولوں کا ایک گلدستہ پیش کرنے کی تم سے گزارش کرتا ہوں۔ سلمیٰ کے مزار پر تمھارا پھولوں کا چڑھانا، مرجھاتے ہوئے گلاب کی پتیوں پر چشم سحر سے ٹپکے ہوئے شبنمی قطروں کے مترادف ہوگا۔‘‘ (شکستہ پر،ص 12)
’’کتنی ہی بار میں کھیتوں کی طرف گیا اور اسباب مایوسی جانے بغیر واپس آگیا۔ ہر لمحہ میں نے سوئے فلک دیکھا اور دل میں گھٹن اور تنگی محسوس کی۔ جب بھی میں نے چڑیوں کے گیت اور جھرنوں کی سرگوشی سنی، وجوہات جانے بغیر ان پر حیران ہوگیا۔ کہا جاتا ہے کہ علاحدگی انسان کو سبکساری عطا کرتی ہے اور یہی سبکساری اسے فکردوعالم سے آزاد کردیتی ہے۔ ‘‘ (ایضاً، ص 16)
’’ایک گھنٹہ گزر گیا جس کا ہر ایک منٹ محبت کا ایک سال تھا۔ رات چاندنی، پھولوں اور درختوں کی خاموشی نے محبت کے علاوہ تمام حقیقتیں بھلا دیں۔ اسی لمحہ ہم نے گھوڑوں کی ٹاپ اور پہیوں کی کھڑکھڑاہٹ سنی۔ ہم اپنی خوش گوار مدہوشی سے بیدار ہوئے اور خوابوں کی دنیا سے اچانک حیرت اور مصیبت کی دنیا میںآگئے۔ بوڑھا شخص اپنے مشن سے واپس آچکا تھا۔ ہم ان سے ملنے کو اٹھ کھڑے ہوئے۔‘‘ (ایضاً، ص 40)
ترجمے میں کوثرمظہری کے اسلوب کو سمجھنے کے لیے یہ اقتباسات کافی ہیں۔ ان اقتباسات کو پڑھتے ہوئے ایسا محسوس ہوتا ہے کہ جیسے یہ ترجمہ نہیں بلکہ اصل تخلیق ہے۔ اس ترجمے کے بارے میں میری ذاتی رائے یہ ہے کہ کوثر صاحب نے ترجمے کے تمام ضروری اصول و ضوابط کی پاسداری بھی کی ہے۔ حتی الامکان انھوں نے کوشش کی ہے کہ یہ طبع زاد سے کم تر دکھائی نہ دے۔ کوثر صاحب ’شکستہ پر‘ کے ترجمے کے تعلق سے لکھتے ہیں:
’’اس کتاب میں میری یہ کوشش رہی ہے کہ اسلوب کی پرکاری اور اثرانگیزی کو برقرار رکھ سکوں۔ ترجمے تو بہت ہوئے ہیں۔ میری کاوش بھی آپ کے پیش نظر ہے۔ اگر کسی حد تک پسند آجائے تو میں سمجھوں کہ میری محنت رائیگاں نہ گئی۔‘‘ (شکستہ پر، ص 10)
یہ مختصر مگر عمدہ ناول ہے۔ ترجمے کی زبان، اس کی سلاست و روانی نے اس ناول کو مزید دلچسپ بنا دیا ہے۔
ناول کے علاوہ کوثر مظہری نے ایک مضمون اور ایک کہانی کا بھی ترجمہ کیا ہے۔ مقتدرہ قومی زبان، پاکستان سے ایک کتاب ’ترجمہ: روایت اور فن‘ کے نام سے 1985 میں شائع ہوئی ہے جس کی ترتیب نثار احمد قریشی نے اور نظرثانی محمد شریف کُنجاہی نے کی ہے۔ اس کتاب میں بڑے اہم لوگوں کے مضامین شامل ہیں، جیسے جیلانی کامران، حسن عسکری، ظ انصاری، جمیل جالبی، آل احمد سرور وغیرہ۔ کوثر صاحب نے ہندی کے رسالہ انوواد کے لیے اسی کتاب سے ایک طویل کا ترجمہ ہندی میں کیا تھا۔ اس رسالے کی مدیرہ دہلی یونیورسٹی کی استاد ڈاکٹر گارگی گپتا تھیں۔ دوسرا ترجمہ مشہور ڈراما نگار اور کہانی کار اصغر وجاہت کی کہانی ’زخم‘ کا ہے جسے انھوں نے ہندی سے اردو میں منتقل کیا ہے۔ یہ کہانی سہ ماہی رسالہ ’پیش رو‘ میں شائع ہوئی تھی۔ اس رسالے کے مدیران میں انور پاشا، مشرف عالم ذوقی، توحید خان اور ابرار رحمانی کے نام لیے جاسکتے ہیں۔
ترجمے کے حوالے سے کوثرمظہری کا مضمون’شعر غالب کے انگریزی تراجم‘ بہت مشہور ہے۔ یہ مضمون کسی زبان کا ترجمہ تونہیں ہے مگر غالب کے اشعار کو جن مترجمین نے ترجمے کے قالب میں ڈھالا ہے، ان کی خدمات کا اعتراف کرتے ہوئے ان کے ترجمے کے کچھ نمونے پیش کیے ہیں، ساتھ ہی ترجمے کے محاسن و معائب کی نشاندہی بھی کی ہے۔ باہم موازنے کی صورت بھی پیدا کی گئی ہے کہ ایک شعر کو مختلف ترجمہ نگاروں نے کن کن معانی میں استعمال کیا ہے ، بعض جگہ کچھ متبادل الفاظ پیش کیے گئے ہیں کہ اگر مترجمین فلاں لفظ کا ترجمہ اس طرح کرتے ہیں تو شاید زیادہ بہتر اور معیاری ہوتا ہے۔ ترجمے کی باریکیوں سے واقفیت کے لیے یہاں کچھ نمونے پیش کررہا ہوں کہ ایک ہی شعر کو الگ الگ ترجمہ نگاروں نے کس کس طرح سے برتا ہے۔غالب کے مترجمین میں ایک نام ڈاکٹر سرفراز نیازی کا ہے جنھوں نے غالب کے پورے دیوان کا ترجمہ اور اس کی تشریح انگریزی میں کی ہے۔ اس کتاب کا تعارف ڈاکٹر فرمان فتح پوری نے قلمبند کیاہے۔ غالب کا بہت مشہور شعر ہے:
دل ناداں تجھے ہوا کیا ہے
آخر اس درد کی دوا کیا ہے
اس کا ترجمہ اس کتاب میں اس طرح کیا ہے:
What is ailing thee, my simpleton heart?
What is the remedy for your pain, eventually?
اس شعر کے ترجمے کا جائزہ لیتے ہوئے کوثر صاحب لکھتے ہیں:
’’یہاں ترجمہ نگار نے ’آخر‘ کے لیے Eventually لکھ کر تقریباً ’آخر‘ میں چھپی ہوئی بیزاری کو کسی قدر منتقل کردیا ہے۔ لیکن یہاں بھی اس درد کے لیے Your Pain لکھا گیا ہے، جو غلط ہے۔ ایک ترجمہ David Mathews کا ہے۔ جس میں ’اس درد‘ کے لیے This Pain لکھا ہے جب کہ مذکورہ بالا ترجمہ نگار نے ’اس درد‘ کے لیے Your Pain لکھا ہے جو غلط صیغہ ہے۔ میتھیوز کو سنیے:
My foolish heart! What has become of you?
No cure for this pain? What can I do?
)Urdu verse in English: 1995, p-45(
یہاں بیزاری اور اکتاہٹ کو What can I do جیسے عام بول چال کے فقرے سے پیش کرنے کی کامیاب کوشش کی گئی ہے۔ پھر یہ کہ ’دل ناداں‘ کے لیے Simple heart کے بجائے Foolish heart زیادہ موزوں اور برمحل معلوم ہوتا ہے۔ بلکہ اس سے بھی موزوں Silly heart ہے جس کا استعمال O.P.Kejriwal نے کیا ہے۔ملاحظہ لیجیے:
What ails you
You silly heart?
What could ease
This disease?
And oh! this pain
What could be its medicine?
)Ghalib in Translation: O.P.Kejriwal, p-159(
اس ترجمے میں اوپر کی صرف چار لائنیں کام کی ہیں۔ بقیہ دو لائنیں بھرتی کی اور زبردستی کی ہیں، یعنی ایجاز کے بجائے طوالت سے کام لیا گیا ہے۔‘‘(قرأت اور مکالمہ، ص 391-92)
غالب کا ایک اور مشہور شعر ہے:
سب کہاں کچھ لالہ و گل میں نمایاں ہوگئیں
خاک میں کیا صورتیں ہوں گی کہ پنہاں ہوگئیں
اس شعر کا ترجمہ پروفیسر نورالحسن نقوی اور عبداللہ انوار بیگ نے اپنے اپنے انداز سے کیا ہے۔ ان مترجمین کے ترجمے کی خوبیوں اور خامیوں کے ساتھ دونوں ترجموں کا موازنہ کرتے ہوئے لکھتے ہیں:
’’پروفیسر نورالحسن نقوی نے اس کا ترجمہ اس طرح کیا ہے:
Not all the forms of beauty
in the lovely flowers appear
O, hidden in the dust what a number
of beauteous forms may be there
(Ghalib Reveals himself: 1970, p-67)
یہاں ’خاک میں کیا صورتیں ہوں گی کہ پنہاں ہوگئیں‘ کے لیے کہا گیا ہے:
What a number of beauteous forms may be there.
یہاں ’کیا صورتیں ہوں گی‘ سے مراد ہے کیسے کیسے اچھے اور خوبصورت چہرے جب کہ یہاں ترجمے میں حسن کی رفعت کے بجائے اُسےCountable noun بناکر پیش کیا گیا ہے۔ دراصل پہلے مصرعے میں Not all the forms of beauty کہہ کر ترجمے کی ٹیڑھی اینٹ رکھ دی گئی ہے جس کے سبب حسن بھی Countableہوگیا ہے۔ اسی شعر کا ترجمہ عبداللہ انوار بیگ نے قدرے کامیابی کے ساتھ سبک انداز میں کرنے کی کوشش کی ہے:
Not all, but some have appeared as tulips and roses,
Much beauty must there be concealed in the earth!
خدا کا شکر ہے کہ یہاں حسن کو Numericals میں پیش نہیں کیا گیا ہے۔ ساتھ ہی لالہ و گل کے لیے نقوی صاحب کے Lovely flowers کے بجائے یہاں Tulipاور Rosesآئے ہیں جو چہروں اور صورتوں کے لحاظ سے زیادہ مناسب ہیں۔ صرف Lovely flowers سے صورتوں کو تشبیہ نہیں دی جاسکتی۔‘‘ (ایضاً، ص 392-93)
غالب کا ایک مشہور شعر ہے :
عشرت قطرہ ہے دریا میں فنا ہوجانا
درد کا حد سے گزرنا ہے دوا ہوجانا
اس شعر میں بھی کوثر صاحب نے موازنے کی صورت نکالی ہے۔ مترجمین کے ترجمے کے ساتھ کوثر صاحب نے کچھ الفاظ کے متبادل بھی پیش کیے ہیں۔ جس سے ترجمے کی معنویت و اہمیت میں مزید اضافہ ہوجاتا ہے۔ اس شعر کی بابت کوثر صاحب پون کمار ورما اور اعجاز احمد کے ترجمے کا موازنہ کرتے ہوئے لکھتے ہیں:
’’پون کمار ورما نے اس کا ترجمہ یوں کیا ہے:
Glory it is for the drop
To merge with the ocean;
Pain ceases to be
Once beyond redemption
(Ghalib : the man the times, 1989, p-123)
پون کمار کا ترجمہ رواں اور دل چسپ ہے۔ درد کے حد سے گزرنے کے لیےBeyond redemptionلکھا گیا ہے اور دوا ہوجانے کا مفہوم یہ پیش کیا گیا ہے کہ درد ختم ہوجاتا ہے جس کے لیے انگریزی میں Pain Ceases to be استعمال ہوا ہے۔ یہاں غور طلب امر یہ ہے کہ فنا ہوجانے کے لیے صرف Merge لفظ کافی نہیں۔ یہ عشق کے اس تصور کو پیش کرنے سے قاصر ہے جس کی طرف غالب نے اشارہ کیا ہے، یعنی ’فنا فی اللہ‘ ہونے کا تصور۔
اعجاز احمد والی کتاب میں Thomas Fitzsimmons نے دس اشعار والی اس غزل کے پانچ شعروں کے ترجمے پیش کیے ہیں۔ مذکورہ بالا شعر کا ترجمہ دیکھیے:
Waterbead ecstasy : dying in a stream;
Too strong a pain brings its own balm
(Ghazals of Ghalib, Ed. by Aijaz Ali. Oxford University, Press, 1994, p-25)
مجھے یہاں لفظ Balm کھٹک گیا تھا لیکن مترجم نے منظوم ترجمہ سے پہلے Literal Translation کیا ہے جس میں Medicine لکھا ہے جو لفظ دوا کا لغوی ترجمہ ہے۔ یہاں لفظ Remedy بھی آسکتا تھا۔ اسی لغوی ترجمے میں قطرہ کے لیے Drop لکھا ہے جب کہ منظوم ترجمے میں اسی لفظ کے لیے Waterbead استعمال کیا گیا ہے۔ دونوں اپنی جگہ درست ہیں۔ البتہ Waterbead میں ایک طرح کی ندرت پائی جاتی ہے۔ اس ترجمے میں یہ بات کھٹکتی ہے کہ دریا کے لیے Stream لفظ استعمال ہوا ہے۔ دریا کے لیے بیشتر ترجمہ نگاروں نے Ocean یا Sea یا River استعمال کیا ہے، جو زیادہ مناسب ہے…‘‘ (ایضاً، ص 394-95)
نثر کے مقابلے شاعری کا ترجمہ واقعی بہت مشکل ہے۔ جب کلاسیکی شعرا کی بات آجائے تو یہ مزید مشکل ہوجاتا ہے۔ اسی لیے مترجمین کو ذولسان ہونے کے ساتھ ساتھ ترجمے کے تمام اصول و ضوابط پر نظر رکھنا ازحد ضروری ہے۔ بغیر اس کے عمدہ اور معیاری ترجمہ ممکن نہیں ہے۔ کوثر مظہری صاحب کے اس مضمون کا مطالعہ آج کے مترجمین کے لیے نہایت ضروری ہے۔ اشعار کے ترجمے کی باریکیوں کو جس اندازمیں کوثرصاحب نے پیش کیا ہے وہ مترجمین کے لیے بہت ہی مفید اور کارآمد ہے۔
موجودہ دور سائنس کی نت نئی ایجادات کا ہے۔ نئے نئے ایپ مثلاً گوگل ٹرانسلیٹ اور ڈیپ ایل (DeepL) وغیرہ ہمارے سامنے ہیں، ترجمے میں مترجمین ان ایپ سے بھرپور استفادہ بھی کررہے ہیں، خاص کر مصنوعی ذہانت (AI) تو اس سمت بہت مثبت اور اہم ادا کررہا ہے۔ AI کے ذریعے ایک زبان کو دوسری زبان میں منتقل کرنا ایک آسان عمل بن گیا ہے۔ مصنوعی ذہانت یعنی AIنے آج کی مصروف ترین زندگی کو بھی آسان سے آسان تر بنا دیا ہے۔ اس مشینی ترجمے کے دور میں انسانی ترجمے کی افادیت کواگر برقراررکھنا ہے تو مترجمین کو کئی زبانوں پر مہارت کے ساتھ ترجمے کے اصول و ضوابط اور باریکیوں پر نظر رکھنا بہت ضروری ہے، وگرنہ ایک وقت ایسا بھی آئے گا جب مشینی ترجمہ انسانی ترجمے سے بہت آگے نکل جائے گا اور ہم لاچار و مجبورخود مشینوں کے محتاج ہوجائیں گے۔ ایسے میں کوثرمظہری کی جتنی ستائش کی جائے کم ہے کہ وہ اس مشینی دور میں بھی انسانی ترجمے کی اہمیت و معنویت کو سمجھتے ہوئے محتاط مگر مثبت قدم اٹھاتے ہیں کیونکہ وہ ذی علم ہیں، ترجمے کی باریکیوں سے واقف ہیں۔ باوجودیکہ انھوں نے تنقید اور شاعری کے مقابلے ترجمے پر ذرا کم وقت صرف کیا ہے۔ پھر بھی ترجمے پر ان کے جو بھی کام ہیں وہ نہ صرف ادب کی ثروت میں گراں قدر اضافہ ہیں بلکہ مستقبل میں ترجمہ نگاروں کے لیے مشعل راہ بھی ہیں۔

میں نے تصوف بہت کم پڑھا ہے اور یوں بھی تصوف پڑھنے سے سمجھ میں نہیں آسکتا کہ تصوف تصور اور نظریہ سے عبارت نہیں ہے بلکہ یہ حرکت و عمل کا نام ہے۔ شاید اسی وجہ سے مرزا اسداللہ خاں غالب نے کہا تھا کہ :

یہ مسائل تصوف یہ تیرا بیان غالب
تجھے ہم ولی سمجھتے گربادہ خوار نہ ہوتا
اگر تصوف محض ایک تصور یا نظریہ ہوتا ہے تو شاید ہزاروں نظریات اور تصورات کی طرح یہ بھی اب تک معدوم ہو چکا ہوتا۔ مگر اس کا تعلق اطلاق و عمل سے ہے۔ اس لیے تصوف عالمی معاشرے میں زندہ اور تابندہ ہے۔
تصوف انسانی وجود کی داخلی روشنی کا نام ہے۔ یہ وہ اندرونی چمک ہے جو انسانی پیکر کو منور اور معطر رکھتی ہے۔ یہ وہ خوشبو ہے جو معاشرے کے پورے وجود کو مہکائے رکھتی ہے۔بہت سے لوگ جو تصوف کے اسرار و رموز اور اصطلاحات، مثلاً تنزلات، شطحیات، تلوین، تمکین، طریقت، معرفت وغیرہ سے قطعی ناواقف ہوتے ہیں وہ بھی تصوف کا مجسم پیکر ہوتے ہیں۔ ساغر صدیقی نے اسی لیے کہا تھا :
یہ جو دیوانے سے دوچار نظر آتے ہیں
ان میں کچھ صاحب اسرار نظر آتے ہیں
ہر انسان کے وجود میں ایک داخلی اور باطنی روشنی ہوتی ہے radiance inner کا نام تصوف ہے۔ یہ داخلی طلعت جب غائب ہو جاتی ہے تو پھر انسان ایک مادی او ر میکانکی مشین بن کر رہ جاتا ہے اور اس کا منشور صرف مادیت اور منفعت تک محدود رہتا ہے اور اسی وجہ سے وہ ہر طرح کے انتشار کا شکار ہو جاتا ہے۔ جب کہ تصوف وہ اضطراب و التہاب ہے جس میں سکون ہی سکون ہے یعنی تصوف وہ درد ہے جو حقیقت میں دوا ہے۔ یہ درد لا دوانہیں ۔یہ ایک غیر مشروط محبت سے عبارت ہے۔ تصوف میں انسانیت اور عشق کو مرکزیت حاصل ہے اور اس کا منشور احترام آدمیت اور تکریم انسانیت ہے۔ محبت کی مثبت قوت کا نام تصوف ہے۔
جس موضوع کا انتخاب کیا گیا ہے اس کے دو شق ہیں۔ ایک سماج اور دوسرا ادب اور دونوں کا تصوف سے گہرا رشتہ ہے۔ دوسری شق کی بات کی جائے تو اردو زبان و ادب کی رگوں میں تصوف کا لہو دوڑ تا رہا ہے اسی لیے اس زبان میں جان باقی ہے۔ جب بھی اس کی جان کو خطرہ لاحق ہوتا ہے تو اسے خانقاہ اور درگاہ کی غیر مرئی محبت مل جاتی ہے۔ یہ اردو زبان کیمیائے محبت کی وجہ سے ہی زندہ ہے۔ورنہ یہ زبان کب کی نفرتوں کی نذر ہوجاتی۔ اس حقیقت سے شاید ہی کوئی انکار کرے کہ اردو کو خانقاہوں میں نہ صرف پناہ ملی بلکہ بے پناہ پیار بھی ملا ۔ یہ بات نہ ہوتی تو مولوی عبدالحق جیسے ناقد و محقق اردو زبان کی نشو نما میں صوفیاء کرام کا حصہ جیسی کتاب نہ لکھتے اور نہ ہی ارباب علم و دانش اردو شاعری میں تصوف جیسے موضوعات پر کتب اور مقالات تحریر کرتے۔ یہ حقیقت ہے کہ اردو زبان و ادب پر تصوف کا گہرا اثر ہے اور زیادہ تر شاعروں کے یہاں تصوف کے عناصر ملتے ہیں۔ شاید ہی کوئی ایسا شاعر ہو جس کی شاعری میں تصوف کا عکس نہ ملتا ہو اور حقیقت یہ ہے کہ اگر اردو شاعری سے تصوف کو منہا کردیا جائے تو اردو کے شعری سرمایہ میں ایک چوتھائی حصہ بھی نہیں بچے گا۔ تصوف اردو شاعری کی جان ہے۔ بہت پہلے مولانا حسرت موہانی نے کہا تھا:
مرا ایماں عجب کیا ہے جو ایمان تصوف ہے
تصوف جان مذہب عاشقی جان تصوف ہے
اردو میں تصوف سے گہری ذہنی مناسبت کی وجہ سے غالب اور تصوف، اقبال اور تصوف، اردو غزل پر تصوف کے اثرات، اردو رباعی میں تصوف کی روایت، اردو شاعری تصوف اور روحانی اقدار، تصوف اور اردو کی صوفیانہ شاعری، غالب اور وحدۃ الوجود، غالب اور تصوف، بہار میں اردو کی صوفیانہ شاعری جیسی بہت ساری کتابیں لکھی گئیں اور اس موضوع کے تمام زاویوں کا احاطہ کر لیا گیا ہے اس لیے اس پر مزید گفتگو محض اعادہ اور تکرار کہلائے گی۔
جہاں تک پہلی شق کی بات ہے تو حقیقت یہ ہے کہ سماج پر تصوف کا نہایت گہرا اثر پڑا ہے۔ اگر تصوف سے سماج کا رشتہ نہ ہوتا تو ہمارا پورا معاشرہ وحشی سماج میں بدل چکا ہوتا۔ آدمی کی شکل و صورت میں ہر طرف خطرناک درندے ہی نظر آتے۔ ہمارا سماج مکروہات اور منہیات کا مجموعہ ہوتا۔ تشدد، قحبہ گری، ڈکیتی، بدعنوانی، کرپشن اور اس طرح کی بہت ساری چیزیں عام ہوتیں۔ منفی رویے،رجحانات اور ذہنیت کی وجہ سے سماج کا شیرازہ بکھرا ہوا ہوتا۔ تصوف ہی کا فیض ہے کہ اس نے سماج کو اخلاقی اور روحانی اقدار سے جوڑے رکھا ہے اور تصوف ہی نے انسانی روح کے خالی پن، ویرانی اور اس خلا کو دور کیا ہے جسے سائنس ٹکنالوجی بھی دور نہیں کر سکتے۔ درگاہوں اور خانقاہوں میں خلقت کا ہجوم اس کا ثبوت ہے کہ انسان روح کی ویرانی کا مداوا صرف تصوف کے پاس ہے۔ خانقاہوں نے عوام کو جوڑا ہے۔ یہی وجہ ہے کہ خانقاہیں آباد ہیں جب کہ شہنشاہوں کے محل ویران نظر آتے ہیں۔ درگاہوں اور خانقاہوں میں ہر طرف روشنی ہی روشنی ہوتی ہے۔ جب کہ شہنشاہوں کے دربار میں اندھیرے چھائے ہوئے ہیں۔ یہ تصوف کی کرامت نہیں تو اور کیا ہے۔
تصوف نے تطہیر، تزکیہ اور تنقیہ نفس کا وہ منتر دیا ہے جس کے ذریعہ انسان نفس امارہ کی خواہشات ، افعال ذمیمہ اور دیگر منفی عناصر سے نجات حاصل کر سکتا ہے۔ تصوف جہاں تزکیہ کے ذریعہ انسانی وجود سے نفاق، شرک، ریا، بخل، غرور، حب دنیا اور دیگر منفی صفات و حرکات کو ختم کرتا ہے وہیں تحلیل کے ذریعہ وہ بری صفات کو اچھے اوصاف میں تبدیل کرتا ہے۔ انسان کے اندر اخلاص، صدق، شکر، صبر، امید جیسے جذبات پیدا کرتا ہے۔
دراصل تصوف بری عادتوں سے اچھی عادتوں اور مکارم اخلاق کی طرف ہجرت کا نام ہے۔ خالق کے ساتھ مخلوق کا مضبوط رشتہ تصوف کہلاتا ہے۔ mind and soul of detoxification کے لیے اس سے بہتر کوئی نسخہ کیمیا نہیں ہے۔ من کا وش ہرن اسی سے ہو سکتا ہے دوسرا اور کوئی راستہ نہیں ہے۔ کوئی تو وجہ ہوگی کہ پورا ویسٹ آج نغمہ رومی پر جھوم رہا ہے رقص کررہا ہے کلام رومی میں وہ سوز و گداز ہے جس کی دنیا کو آج ضرورت ہے۔ اس میں قلبی اور ذہنی سکون ہے جسے دولت و ثروت سے حاصل نہیں کیا جاسکتا اسے صرف میڈیٹیشن مراقبہ اور روحانیت سے حاصل کیا جاسکتا ہے۔ مغرب رومی میں اسلام کا face radiant دیکھتا ہے رومی انہیں رگ جاں کے قریب محسوس ہوتا ہے۔ مغرب مولانا رومی کے کلام سے اپنے مائنڈ کو detoxify کر رہا ہے ۔کیوں کہ مولانا رومی اتحاد اور محبت کی ایک علامت (Icon of Unity and love)اور انسانیت کا مظہر (Epitome of humanity)تھے۔ان کا مذہب اور مشرب صرف انسانیت اور عشق تھا۔اسی وجہ سے مولانا رومی کا نغمۂ محبت اور انسانیت مغربی ذہن وشعور کا بھی ایک حصہ بن چکا ہے۔William Dalrampleنے گارجین میں ایک مضمون لکھاتھا کہ نائن الیون کے بعد جب پوری دنیا میں مسلمانوں کی شبیہ مسخ ہوگئی تھی ، تب بھی امریکہ کا رابرٹ فراسٹ، رابرٹ لوویل، شیکسپئر، ہومر، دانتے، یا یورپین شاعر ہی نہیں بلکہ رومی Best sellingپویٹ تھا۔مغرب میں مولانا رومی کی مقبولیت کا عالم یہ ہے کہ جنون اور دیوانگی کی حد تک مولانا رومی سے محبت کرنے والے لوگ ہیں اور ان کی شاعری کو اپنے لیے مسیحائی تصور کرتے ہیں ۔کیونکہ ان کی پوری شاعری انسانوں سے غیر مشروط محبت پر مبنی ہے۔ان کا ایک آفاقی تصور ہے جس میں سب سے زیادہ مرکزیت، انسانیت اور عشق کو حاصل ہے۔ مولانا رومی کو اس بات کا یقین تھا کہ کائنات میں سب سے مضبوط متحد کرنے والی طاقت(Unifying force)صرف محبت ہے اور کائنات کی تمام چیزیں ایک ہی محور پر گردش کرتی ہیں اور اس کا ایک ہی مظہر ہے جس کا نام ’محبت ‘ہے۔وہ کہتے ہیں:
ازمحبت خارہا گل می شود
وزمحبت سرخہا کامل شود
از محبت دار تختی می شود
وز محبت دار بختی می شود
از محبت سجن گلشن می شود
وز محبت خانہ روشن می شود
از محبت نارنوری می شود
وز محبت دیوحوری می شود
مولانا کے نزدیک محبت ہی ہر مرض کی دوا اور ہر مرض کا مداوا ہے ، اسی لیے وہ کہتے ہیں کہ :
از محبت دردہا صافی شود
ازمحبت دردہاشافی شود
از محبت مردہ زندہ می شود
از محبت شاہ بندہ می کند
مولانا جلال الدین رومی کے خیال میں انسانی نجات یا موکش کے لیے صرف خدا نہیں بلکہ اس کی مخلوق سے بھی محبت ضروری ہے۔ انسان سے محبت کے بغیر کسی کو تقدس حاصل نہیں ہوسکتا ۔مولانا رومی کے خیال میں تمام انسانوں کی جڑ ایک ہے اور جتنے بھی اختلافات ہیں یا تصادم وہ صرف مادّی نقطۂ نظر کی وجہ سے ہے ، روحانی اعتبار سے تمام انسان ایک دوسرے سے جڑے ہوئے ہیں۔اسی لیے انھوں نے سب سے زیادہ زور انسانیت کی تکریم، احترام آدمیت(Dignity of humanity)پر دیا ہے۔ان کے خیال میں دنیا میں جو بھی تصادم ہے ، وہ صرف مختلف تعبیرات اور منفی تصورات(Negative thoughts) کی وجہ سے ہے۔انھوں نے محبت کی بنیاد پر انسانی رشتے کی جستجو کی اور یہ واضح کیا کہ انسانوں کے درمیان مشترکات ہیں اور تمام مخلوق خدا کا ایک کنبہ ہے۔مولانا رومی کا سارا تصور تشدد، تصادم، تفریق، تعصب کے خلاف ہے اور ان کا سارا زوراتحاد واشتراک، اتفاق واجتماع، تفاوق وتطابق، یکتائی ویکجہتی پر ہے۔انھوں نے یہ واضح کیا ہے کہ مذہبی، نسلی ، قومی اختراق انسانی اشتراک کی راہ میں مانع نہیں ہے۔اسی تنوع میں وحدت ہے ۔ہر سطح پر اختلاف کے باوجود جذباتی سطح پر انسانوں کے درمیان ہم آہنگی ہے۔سب کے دکھ درد ،خواب اور عذاب ایک سے ہیں۔ مذاہب یا تہذیبوں کا اختلاف ، وطنیت ، قومیت یا انسانیت کی راہ میں رکاوٹ نہیں ہے، مختلف شناختوں میں بٹے ہونے کے باوجود ہماری ایک ہی اجتماعی شناخت ہے اور وہ ہے انسانیت۔کوئی سکھ، عیسائی ہندو اور مسلمان ہے مگر انسان نہیں تواس کی حیثیت بے جڑ کے پودے یا شاخ سے گرے ہوئے پتے سے زیادہ نہیں ہے کیونکہ وہ اپنی اصل جڑ سے دور ہوچکا ہے ۔پوری دنیا کے انسانوں کی ایک ہی جڑ ہے اور وہ انسانیت اور محبت ۔ مولانا رومی کا وہی تصور ہے جو شیخ سعدی کے اس شعر میں بھی واضح ہوا ہے کہ:
بنی آدم اعضائے یک دیگرند
کہ از آفرینش زیک جوہرند
کہ تمام بنی آدم ایک دوسرے کے اعضا کی حیثیت رکھتے ہیں اور ان کی پیدائش ایک ہی جوہر سے ہوئی ہے تو پھر یہ تفریق اورتصادم کیوں؟ نسلی، قومی اور مذہبی اختلافات صرف اور صرف انفرادی شناخت نامے ہیں ، اجتماعی شناخت نامہ صرف انسانیت ہے۔اسی لیے انھوںنے نقش دوئی مٹانے ، غیریت کے پردے اٹھانے کی بات کی اور یہ بتایاکہ انسانی تجربوں کے تناظرات (Perspectives)الگ الگ ہوسکتے ہیں، تعبیرات بھی الگ ہوسکتی ہیں ، مگر حقیقت ایک ہے اس کا تصور صرف الگ الگ ہے۔ انھوںنے ایک حکایت کے ذریعے اسے بیان کیا کہ ایک شخص نے چادر آدمیوں کو ایک درہم دیا جن میں ایک ایرانی، دوسرا ترک، تیسرا عرب اور چوتھا آرمینی تھا۔اس ایک درہم سے چاروں اپنی پسند کی چیز خریدنا چاہتے تھے۔اس پر ان لوگوں میں لڑائی ہوگئی۔ایرانی نے کہا کہ مجھے اس ایک درہم کا انگور چاہئے ۔ عرب نے کہا کہ ہمیں انب چاہیے۔ترک نے کہا ازوم چاہیے اور آرمینی نے کہا کہ میں استافیل چاہتا ہوں۔چاروں ایک ہی چیز چاہتے تھے مگر چاروں کی زبان الگ تھی اور وہ ایک دوسری کی زبان سے ناواقف تھے اسی لیے چاروں میں لڑائی ہوگئی ۔سب کی پسند ایک ہی چیز تھی انگور ۔ان کے نام مختلف تھے، مراد ایک تھی۔اسی طرح تہذیب کا معاملہ ہے کہ سب کے راستے الگ الگ ہیں مگر منزل ایک ہی ہے۔جس طرح کعبہ اور کاشی کے بہت سے راستے ہیں۔کعبہ کی طرف ایک ہی راستہ نہیں جاتا ، نہ ہی صرف کاشی کا راستہ متھرا ہوکر جاتا ہے۔رستے الگ ضرور ہیں مگر منزل ایک ہے اور مولانا رومی نے اپنی مثنوی میں اسی منزل کو اپنامرکز ومحور بنایا ہے۔اس لیے وہ کسی بھی طرح کے مذہبی یا تہذیبی اختلاف کے خلاف ہے ۔اسی لیے وہ کہتے ہیں کہ
ہر نبی ہر ولی را مسلک است
لیک تا حق می برد جملہ یکے است
نبی ہو یا ولی ہو ہر ایک کا اپنا اپنا طریقہ اور اپنا اپنا راستہ ہے لیکن حق تک پہنچنے میں سب برابر ہیں۔وہ یہ بھی کہتے ہیں کہ :
پس مگو کہ ایں جملہ دین ہا باطل اند
باطلاں برموئے حق دام دل اند
جملہ ادیان ومذاہب کو کیسے باطلان حق کہا جاسکتاہے ۔سب میں دلکشی اور حق کی بوہے ۔مولانا رومی پولرائزیشن پر نہیں ، ری کنسلیشن پر یقین رکھتے تھے۔ ان کی Pacificismکی بنیاد Penthismاور Loveپر ہے وہ محبت ہی کی نگاہ سے ہی ہر چیز کو دیکھتے ہیں جہاں خدا کے سوا اور کچھ نہیں۔Pacificismکی بنیاد اخلاقی اقدار اور اصولوں پر ہے جہاں نفرت ،تشدد اور بغض وعداوت کے لیے کوئی گنجائش نہیں ہے۔اس میں ہم آہنگی ہے ۔یہ مکمل طورپر جنگ اور تشدد کے خلاف ہے۔اس فلسفے میں شر بھی ایک اضافی ہے، اس لیے مولانا رومی کا تصور تھا کہ There is no absolute love in the world، ان کی قومیت محبت ہے، ان کا مذہب بھی محبت اور یہی ان کا محبوب بھی ہے ۔ یہی وجہ ہے کہ وہ اپنی ہر فکر کا محور اس محبت کو بناتے ہیں جس میں قوت شفا ہے اور جو صرف انسان کی باطنی ذات کو دیکھتا ہے ، خارجی نہیں۔ان کی نظر میں انسانی وجود میں ایک طرح کی مساوات اور وحدت ہے۔وہ کسی بھی سطح پر انسان کی تفریق کے قائل نہیں ہیں۔ان کا خیال ہے کہ سارے انسان اس چراغ کی مانند ہیں جن کی شکلیں تو الگ الگ ہیں مگر روشنی ایک جیسی ہے۔ ان کی نظر میں رنگ ، نسل ،ذات کی تفریق صرف ایک نشانِ امتیاز ہے، ایک شناختی کارڈ ہے مگر اصل تشخص انسانیت ہے۔مولانا رومی فرماتے ہیں:
درمعنی قسمت واعداد نیست
درمعنی تجزیہ و افراد نیست
یک گوہر بودیم چوہم آفتاب
بے گراں بودے صافی ہم چو آفتاب
مولانا رومی تہذیبوں اور مذاہب کے مابین تفریق نہیں تعامل کے قائل تھے ، وہ جانتے تھے کہ تہذیبوں کا تمول تعامل پر منحصر ہے ۔انھوں نے اپنی مثنوی میں جسے ہست قرآں درزبان پہلوی بھی کہاجاتاہے۔اسی انسانیت کادرس دیا ہے اور ان کی پوری زندگی خود بھی انسانی اقدار سے معمور اور متصف تھی۔ یہی وجہ ہے کہ انسانیت کے جو تقاضے ہوتے ہیں ، ان کی انھوں نے اپنے عمل سے بھی تکمیل کی ۔ان کی پوری زندگی کا مطالعہ کریں تو پتہ چلے گا کہ ان کے اندر ایثار بھی تھا، قربانی بھی تھی، تواضع بھی تھی، انکساری بھی تھی، سخاوت بھی تھی ، فیاضی بھی تھی، انسانوں کی خیر خواہی اور دلجوئی بھی تھی اور دل آزاری سے نفرت بھی تھی کہ دل آزاری ان کی شریعت میں گناہ ہے ، وہی جو حافظ نے کہا تھا کہ :
مباش درپہ آزار ہر چہ خواہی کن
کہ در شریعت ماغیرازیں گناہ نیست
مولانا رومی صرف گفتار نہیں ، بلکہ اپنے کردار کے اعتبار سے بھی مکمل طورپر انسانیت پسند تھے۔ان کی ا نسانیت پسندی کا یہ عالم تھا کہ ایک مرتبہ ایک تنگ راستے سے جارہے تھے ۔آپ نے دیکھاکہ راستے میں کتا سویا ہوا ہے ، آپ وہیں ٹھہر گئے، اتنے میں اس کتے کو کسی نے ہٹادیا، تو آپ نے کہا کہ اسے کیوں بے وقت بیدار کردیا۔کتے کے ساتھ ہمدردی کا جس کا یہ عالم ہو تو انسانوں کے ساتھ اس کا کیا عالم ہوگا۔اسی طرح ایک واقعہ ہے کہ دو لوگ آپس میں جھگڑ رہے تھے، ان میں سے ایک نے دوسرے کو کہا کہ اگر تم مجھ کو ایک بات کہوگے تو ہزار باتیں سنوگے، مولانا نے سنا تو آگے بڑھ گئے اور دونوں سے کہا کہ اگر تم دونوں کو جوکہنا ہے مجھے کہہ لو،اگر تم ہزار بھی کہوگے تو ایک نہ سنوگے۔ مولانا کی زندگی کے جس زاویہ پر بھی نظر ڈالو گے وہاں تصادم، نفرت ، بغض وعناد اورتعصب سے گریز ہی ملے گا۔کیونکہ ان کا دل عشق ومحبت سے معمور تھا، اس لیے ان کے دل میں نفرت کے لیے کوئی جگہ ہی نہیں بچی تھی۔ان کا تصور تھا کہ محبت ایک ایسی مثبت قوت ہے جو جنگ کو امن ، تلخی کو شیرینی، بد صورتی کو خوبصورتی میں بدل دیتی ہے ، اسی لیے انھوں نے اپنی پوری شاعری کو محبت پر مرکوز رکھا اور اپنی مثنوی میں صرف اور صرف عاشق ومعشوق ، آتما اور پرماتما کی بات کی، انھوںنے اپنے تھیوسوفیکل آئیڈیاز کو اپنی مثنوی میں پیش کیا اور پوری دنیا سے اپنا روحانی تجربہ شیرکیا، جس طرح ڈارون نے دنیا کو جسمانی ارتقا کا ایک فلسفہ دیا، اسی طرح مولانا رومی نے پوری کائنات کو روحانی ارتقا کا ایک تصور دیا ہے۔ ان کے خیال میں ہر انسان کی روح مقدس ہے کہ خدا سے اس کی تخلیق ہوئی ہے اور وہ اشرف المخلوقات ہے۔ وہ دل کو زیادہ اہمیت دیتے تھے جو کہ خدا کا مقام ہے نہ مادی مظاہر کو جو معابد ومنادر کی شکل میں ہمارے سامنے ہے۔
مولانا رومی نے جو تصور دیا تھا، آج کے زمانے میں اس کی اہمیت بہت زیادہ ہے ، انھوں نے کامن لیٹی اور ہیومینٹی کی بات کی تھی اور سماج میں ہم آہنگی کا تصور دیا تھا ، آج کے انٹر کمیونل اور civilistionalڈائیلاگ کے لیے رومی کے خیالات بہت زیادہ مفید ہیں ۔آج جب کہ پوری دنیا میں خوف ودہشت ہے ، تو مولانا رومی نے اپنے افکار کے ذریعہ پوری دنیا کو یہ پیغام دیا ہے کہ سماج کو خوف ودہشت نہیں ، محبت وانسانیت کی ضرورت ہے۔ اور یہ بھی پیغام دیا کہ انصاف ، مساوات اور رواداری کے بغیر کوئی بھی انسانی معاشرہ مہذب نہیں ہوسکتاکہ انسانیت ہی سے انسانی کائنات کا مستقبل محفوظ ہے ۔ انھوںنے اپنی شاعری کے ذریعے جو پیغام دیا کہ اگر تمام بنی نوع انسان ایک ہے اور خدا کا کنبہ ہے تو پھر مزاحمت نہیں، مفاہمت چاہیے ، مجادلہ نہیں مکالمہ ہونا چاہیے ، وواد نہیں سمواد ہونا چاہیے ، اور اس کے لیے محبت کی نظر ضروری ہے ، یہی نظر ہر فرد کو ایک ہی زاویہ سے دیکھتی ہے اور آج کی دنیا میں ایسی نگاہ محبت کی ضرورت ہے۔ مذہب معاشرے کے لیے لازمی ہے ، مگر خبط مذہب معاشرے کو تباہ وبرباد کردیتا ہے۔ مولانارومی کی مثنوی پوری دنیا میں الگ الگ تہذیبوں اور ثقافتوں میں اسی لیے مقبول ہے کہ انھوںنے اس میں نغمہ محبت وانسانیت کو چھیڑا ہے اور سازاور سوز زندگی کوپیش کیا ہے ،اسی لیے شاید علامہ اقبال نے کہا تھا:
نہ اٹھا پھر کوئی رومی عجم کے لالہ زاروں سے
وہی آب وگل ایراں وہی تبریز ہے ساقی
رومی ایک روشنی کا نام ہے ، روشنی کائنات میں جتنی پھیلتی جائے گی، اندھیرے دور ہوتے جائیں گے۔ اس روحانیت اور روشنی کی بازیافت ہر سطح پر خاص طورپر آج کے متصادم ماحول میں بہت ضروری ہے کہ انسانی کائنات کو نفرتوں کے اندھیروںکی نہیں بلکہ محبتوں کے اجالوں کی ضرورت ہے۔
تصوف کا منشور عالمی بحران انتشار اور اضطراب کو دور کر سکتا ہے تصوف ایک طرح سے کیتھارسس کا عمل ہے۔
تصوف کو اگر صحیح طور پر پیش کیا جاتا تو آج ہمیں اسلامو فاشزم اور اسلاموفوبیا کی اصطلاح سننے اور پڑھنے کو نہیں ملتی اور نہ ہی اسلام اور ٹیرررازم بہت سے منفی ذہنوں کو Identical محسوس ہوتے ۔ تصوف تو سماجی مذہبی نسلی طبقاتی فاشزم کے خلاف ہے آج کاسٹ فاشزم نے سماج کا ذہن زاویہ جغرافیہ بدل گیا ہے۔ تصوف نے اس تقسیم و تفریق کو ختم کرنے کی کوشس کی تھی۔ آج دنیا میں Interfaith Harmony پر ڈسکورس کا سلسلہ شروع ہے۔ تصوف نے پہلے ہی بین مذاہب ہم آہنگی کا راستہ دکھایا تھا۔ اس پر عمل کیا جاتا تو شاید آج معاشرے میں اتنا انتشار نہ ہوتا۔ بہت پہلے ایک شعر کہا گیا تھا:
در حیرتم کہ دشمنی کفر و دیں، چرا است
ازیک چراغ کعبہ و ب خانہ روشن است
(میں کفر اور اسلام کی دشمنی پر حیران ہوں جب کہ ایک ہی چراغ سے کعبہ و بت خانہ روشن ہیں)
یہی اصل انسانی مذہب ہے اور صوفیا کرام نے اسی مذہب کی ہمیشہ تبلیغ اور تلقین کی ہے۔ اکبر الہ آبادی نے اسی لئے کہا تھا:
نہ کتابوں سے نہ وعظوں سے نہ زر سے پیدا
دین ہوتا ہے بزرگوں کی نظر سے پیدا
اور حقیقت یہی ہے کہ چاہے دین کا علم کتابوں سے مل جائے لیکن تدین بزرگوں کی صحبت سے ہی پیدا ہوتا ہے۔آج کے معاشرہ میں دین تو ہے مگر تدین نہیں۔ اسی لیے ہمارے معاشرے میں تفریق اور تعارض ہے۔ جب کہ تصوف میں معارضت نہیں، مفاہمت پر زور ہے۔
آخر میں یہ کہنا چاہوں گا کہ تصوف ہماری زندگی کے لیے Essential ہے۔ تصوف سے ہی ہمیں روشنی ملک سکتی ہے۔ اسی لیے آج ہی معاشرے میں رومی، عطار، سنائی، ابن الفارض، ابوالخیر ابن عربی، عبدالقادر جیلانی، جنید بغدادی، ابراہیم ادہم کو مرور ایام کے باوجود وقت نے فراموش نہیں کیا ہے بلکہ ذہنوں مزید تابندگی کے ساتھ زندہ کیا ہے۔ چونکہ انہوں نے جو تین راہیں دکھائی ہیں۔راہِ عمل (کرم) راہِ علم (گیان)، اور راہ ریاضت(بھکتی)یہی اخروی اور دنیوی فوز و فلاح کی راہیں ہیں اور انہی راہوں پر چل کر ہم لوگ اس منزل تک پہنچتے ہیں جو ہماری تخلیق کا مقصد و منشا ہے۔