نعت

عرفان وحید
حیات آفریں سب انقلاب اُنؐ کے ہیں
ازل سے جو بھی ہیں روشن نصاب اُنؐ کے ہیں
غلام سارے ہی عزت مآب اُنؐ کے ہیں
تمام ذرے بنے آفتاب اُنؐ کے ہیں
اگرچہ جاں سے گزرنا ہے دشتِ حق کا سفر
وفا شعار مگر فوزیاب اُنؐ کے ہیں
فضا ہے ساری معطر بفیضِ ذکرِ نبیؐ
مشامِ جاں میں مہکتے گلاب اُنؐ کے ہیں
جو اُنؐ کے جادے سے بھٹکی وہ زیست زیست نہیں
رہِ حیات کے سارے نصاب اُنؐ کے ہیں
اُنھیںؐ کی نعتِ مسلسل جسے کہیں قرآں
سخن خدا کا، ثناؤں کے باب اُنؐ کے ہیں
انھیں سے ہم کو ملی ہے ضیاے فکر و نظر
درونِ ذات کُھلے ہیں جو باب اُنؐ کے ہیں
ہماری نیند سدا اُنؐ کی تشنۂ دیدار
ہماری جاگتی آنکھوں میں خواب اُنؐ کے ہیں
جہاں میں لوگ وہی خوش نصیب ہیں عرفانؔ
درِ نیاز سے جو باریاب اُنؐ کے ہیں

عمیرنجمی
میں اُن کی وجہ سے ہوں درج ذیل تین کے ساتھ
خدا کے ساتھ، صحیفے کے ساتھ، دین کے ساتھ
یہی بہت ہے، زیارت ہو ان کی آنکھوں کی
مجھے بٹھاؤ مدینے کے زائرین کے ساتھ
امانتوں کے تحفظ کی رسم کے ہیں امیں
ہمارا ربطِ مسلسل ہے اک امین کے ساتھ
زمین زاد اگر کوئی اور ہے تو بتا
جو بے حجاب رہا عرش کے مکین کے ساتھ
وہ بادشاہ، غلاموں میں ایسے رہتا تھا
افق پہ جیسے جڑا ہے فلک، زمین کے ساتھ
یہی نہیں کہ اتارا تھا صرف حسنِ تمام
خدا نے عشق اتارا تھا اُس حسِین کے ساتھ
سوال: کتنے برس تک زمیں تھی رشکِ فلک؟
جواب: صرف تریسٹھ برس، یقین کے ساتھ!

اعظم سیتاپوری
نبی کے در پہ پہنچ کر میں بھی سلام کروں
بیانِ حال ادب سے کروں، کلام کروں
بشوق عرض کروں ان کے رو برو جاکر
ملے یہ اذن کہ میں بھی یہیں قیام کروں
عمیم لطف سے پر کیف ہو گئی ہے حیات
حسین تر ہو اسے جو تمھارے نام کروں
سناؤں حال میں امت کا ان سے رو رو کر
بیاں زبونیِ مسلم کو میں تمام کروں
سنا ہے یہ کہ محبت میں بھی نشہ ہے بہت
تو کیوں نہ سرورِ عالم سے حبِ تام کروں
چڑھے مجھے مرے ساقی محبتوں کا نشہ
طلب صراحی و بادہ، صبوحی جام کروں
نزولِ رحمتِ رب ہو گا خود بخود اعظم
درود پاک کا کیوں نہ میں  اہتمام کروں

27/03/18