مراسلہ

حضرت امیرشریعت مولاناسیدمحمدولی رحمانیؒ کاسانحۂ ارتحال-اخترامام عادل قاسمی

آج 20/شعبان المعظم 1442ھ مطابق 3/اپریل 2021ء کوسہ
پہر میں حضرت امیرشریعت مولاناسیدمحمدولی رحمانی ؒ کےسانحۂ ارتحال کی خبر سن کر بے حد صدمہ ہوا،دل ودماغ پر ان کی مہجوری کابے حد اثر ہے،ہفتہ عشرہ قبل ان کی علالت کی خبر ملی تھی ،وہ 25/مارچ 2021ء کو میرے غریب خانہ(منورواشریف ) پرتشریف لانے والے تھے،لیکن 22/مارچ کوخانقاہ مونگیرسے حضرت کی علالت سےمتعلق فون آیا،اورآمد کاپروگرام منسوخ ہوگیا،حضرت امیرشریعت سے فون پرمیری آخری تفصیلی گفتگویکم مارچ 2021ءکوبعدنمازمغرب ہوئی تھی ،جوان کی بے پناہ شفقت ومحبت اورحسن اعتماد کا
مظہر تھی ،وہ کبھی کبھی اس حقیر کوخودیادفرماتے تھے ،اورمختلف مسائل پرتفصیل سے گفتگوفرماتے تھے،وہ میرے والد ماجد سے عمر میں ایک سال بڑےتھے ،والدصاحب سے گہرے تعلقات کےعلاوہ ہمارے خاندانی پس منظر سے بھی وہ پوری طرح باخبر تھے ،اس لئے اس حقیر پران کی شفقت وعنایت ہمیشہ قائم رہی،خاص طورپرامیرشریعت سابع منتخب ہونے کےبعدمجھے ان کو بہت قریب سے دیکھنےکاموقعہ ملا،بلاشبہ وہ اس وقت ہندوستانی مسلمانوں کاانتہائی قیمتی سرمایہ
تھے،اس وقت ملک وملت کوان کی بہت ضرورت تھی ، وہ ایک بہترین قائد،شاندارمنتظم ،عصریات میں تجدیدی شعور کےحامل ،نئی نسل کےمعمار،سحرالبیان خطیب ،صاحب طرزقلمکار،بےباک مبصر،اوراپنےدینی ،روحانی اورعلمی ورثہ کےساتھ جدید شعوروآگہی سےبھی آراستہ تھے،وہ ماضی کی تاریخ کےساتھ گردوپیش کےحالات سے بھی باخبررہتے تھے ،بلکہ حیرت انگیزطورپروہ چھوٹی چھوٹی چیزوں پر بھی پوری نظر رکھتے تھے ،اس طورپر ان کی شخصیت میں جوجامعیت تھی اس میں وہ اپنی مثال آپ تھے ،اسی لئے قدرت کی طرف سے ان کوبےپناہ مقبولیت ومحبوبیت حاصل ہوئی ،وہ ایک طلسماتی شخصیت کےحامل تھے،ان کےوجودمیں ایسی جاذبیت وکشش تھی ،کہ جدھرجاتے خلقت کاہجوم ان کےساتھ ساتھ
ہوتا،ان کی ایک جھلک دیکھنےکے لئےلوگ دیوانہ وارٹوٹ پڑتے تھے، خاص طورپرآخری دودہائیوں میں ان کوجوعظمت وقبولیت اورعوامی محبوبیت حاصل ہوئی،صرف بہارہی نہیں پورے ملک میں اس کی کوئی نظیر نہیں تھی ،اس حقیر نےجن بزرگوں کودیکھاحضرت قاری صدیق احمدباندوی ؒ کےبعداس باب میں کسی کوحضرت ولی رحمانی ؒ کا شریک وسہیم نہیں پایا ۔

انسان کی قدراس کےگذرنےکےبعدمعلوم ہوتی ہے،اورہرجانےوالااپنی جگہ خالی چھوڑکرجاتاہے، حضرت امیرشریعت مرحوم بےشمارمحاسن وکمالات کےمالک تھے،ان کےجانےکےبعدعلم وقیادت کی دنیامیں ایساخلاپیداہواہےجس کاپرہونا بہت مشکل ہے،اللہ پاک ان کی مغفرت فرمائے ،درجات بلند کرے اوران کی روح کواعلیٰ علیین میں جگہ نصیب فرمائے اورجملہ پسماندگان کوصبرجمیل عطافرمائے آمین۔

(مہتمم جامعہ ربانی منورواشریف )

کرناٹک ہائی کورٹ نے بنگلور کی سیشن عدالت کے اس فیصلہ کو پلٹ دیا ہے جس کے تحت کرناٹک کے وزیر اعلیٰ ایس یدیو رپا کے خلاف 8 کروڑ سے زائد کی بدعنوانی کے معاملے میں ان پر عاید مقدمہ ختم کردیا گیا تھا۔۔

یہ معاملہ دراصل 2012 کا ہے۔۔ اُس وقت بھی وہ کرناٹک کے وزیر اعلیٰ تھے۔۔ انہوں نے سرکاری تحویل میں لی گئی 24 ایکڑ زمین کو پرائیویٹ افراد کے حق میں بہت کم قیمت لے کر ریلیز کردیا تھا اور اس طرح حکومت کے خزانہ کو 8.50 کروڑ کا نقصان پہنچایا تھا۔۔ ان پر رشوت ستانی کا بھی الزام تھا۔۔

2012 میں سماجی رضاکار عالم پاشا نے وزیر اعلیٰ اور دیگر 12 افراد کے خلاف مقدمہ دائر کیا تھا ۔۔ لوک آیکت پولیس نے ان کے خلاف چارج شیٹ بھی داخل کردی تھی لیکن بعد میں لوک آیکت پولیس نے ہی مقدمہ خارج کرنے کی سفارش کردی تھی۔۔ 2016 میں سیشن عدالت نے یہ مقدمہ خارج کرتے ہوئے یدیورپا کو بری کردیا تھا۔۔

اب کرناٹک ہائی کورٹ کے جسٹس جون میخائل چونا نے مقامی عدالت کو ہدایت دی ہے کہ وہ ملزمین کے خلاف عاید چارج شیٹ کو قبول کرتے ہوئے قانون کے مطابق مقدمہ کی کارروائی کو آگے بڑھائیں ۔۔

ہائی کورٹ نے اپنے فیصلہ میں سپریم کورٹ بنام پنجاب کے ایک مقدمہ میں اسی طرح کے فیصلہ کو بطور نظیر پیش کرتے ہوئے کہا کہ چارج شیٹ داخل ہونے کے بعد مقدمہ ختم نہیں کیا جاسکتا ۔۔

واضح رہے کہ کرناٹک ہائی کورٹ کے چیف جسٹس کی بنچ اس سلسلے میں بہت سخت رویہ اختیار کرتی رہی ہے اور حکومت ‘ سرکاری وکیلوں اور سیشن عدالتوں کو سخت ہدایت جاری کر رکھی ہے کہ سیاستدانوں کے خلاف عاید مجرمانہ مقدمات’ ٹرائل کے بغیر ختم نہ کئے جائیں ۔۔ اس کے باوجود بی جے پی حکومت نے اپنے 160 سے زیادہ لیڈروں پر عاید مقدمات واپس لے لیے ہیں ۔۔ چیف جسٹس نے اس پر حکومت سے جواب مانگا ہے۔۔ دیکھنا ہے کہ کرناٹک کے وزیر اعلیٰ کب تک قانون کے شکنجہ سے بچتے رہیں گے۔

میں اِس شیطان کے تعلق سے کبھی کچھ نہیں لکھتا۔اس کی شیطانیت سے خود اُس کے مسلک کے لوگ بھی بیزار ہیں۔ شیعہ علما اس سے مختلف مواقع پر اظہار براءت کرچکے ہيں۔ لہذا اس نے ماضی میں مقدس شخصیات کی شان میں جو گستاخیاں کی ہیں ان کا ذکر کرنے کی کوئی ضرورت نہیں ہے۔

آج اس کا ذکر اس لئے آیا ہے کہ اس نے سپریم کورٹ میں ایک رٹ دائر کرکے قرآن پاک کی 26 آیات کو نکالنے کا حکم دینے کا مطالبہ کیا ہے۔۔ اس کا کہنا ہے کہ قرآن میں الله اور اس کے رسول نے تو ٹھیک ٹھیک پیغام دیا لیکن خلفائے ثلاثہ بوبکر و عمر اور عثمان (غنی رضی الله عنہم اجمعین) نے طاقت کے زور پر یہ جنگ وجدل اور قتال کی آیات از خود بڑھادیں تاکہ اسلام پھیل سکے۔ آج تک چینل نے دو گھنٹے پہلے اس کا انٹرویو نشر کیا ہے۔

ہمیں نہیں معلوم کہ سپریم کورٹ اس رٹ پر کیا رویہ اختیار کرتی ہے۔ آپ میں سے کچھ کو یاد ہوگا کہ 80 کی دہائی میں ایک مردود چوپڑا نے بھی قرآن پر پابندی کیلئے کلکتہ ہائیکورٹ میں رٹ دائر کی تھی۔ اس رٹ کو عدالت نے حقارت کے ساتھ خارج کردیا تھا ۔ اس وقت ماحول کچھ اور تھا۔۔ آج ماحول کچھ اور ہے۔

امید تو یہی ہے کہ سپریم کورٹ بھی اس رٹ کو ردی کی ٹوکری میں پھینک دے گی لیکن اگر عدالت نے نوٹس اشو کرنے کا فیصلہ کیا تو مسلم پرسنل لا بورڈ کو تمام مسالک کے علماء کے ساتھ مشورہ کرکے جواب کی تیاری کرنی چاہیے۔۔ یہی نہیں بلکہ اس شیطان کی ہفوات کا بھی عوامی طور پر مسکت جواب دینا چاہئے ۔ اس موقع پر علمائے اہل تشیع سے بھی گزارش ہے کہ وہ اس شیطان کی تازہ حرکت سے اسی طرح اظہار بیزاری کریں جس طرح وہ کئی بار کرچکے ہیں ۔

میں بھی بھاگوت جی کے ساتھ ہوں،
کسی کے ساتھ کھڑے ہونے کا مطلب اس کی برابری نہیں ہوتا، نہ ہی اس کی مکمل ہم نوائی ہوتی ہےـ کبھی کبھی ساتھ تو ہوتا ہے لیکن ساتھ ہونے کا مقصد جدا ہوتا ہے،کل آر ایس ایس چیف موہن بھاگوت جی نے ایک مرتبہ پھر اکھنڈ بھارت کی بات کہی، موقع ایک آر ایس ایس کے مہاشے کی سنسکرت کتاب کی رسم اجرا کا تھا اور مقام اجرا شہر حیدرآباد فرخندہ بنیاد تھاـ اکھنڈ بھارت کا خواب، پہلے سلوگن تھا جو بڑا خیال آفریں تھا، ہندو عظمت رفتہ کی بحالی کی خواہش کو منعکس کرتا تھا اور ساتھ ہی خیالوں میں وسیع حکمرانی، برتر تہذیب اور سارے علاقے کی موہوم یک رنگی کی داستان سناتا تھاـ
میں موہن بھاگوت جی کے ساتھ اکھنڈ بھارت کے خواب اور اس خواب کی تعبیر میں ساتھ کھڑا ہوں، لیکن میرا مقصد، میرا خواب اور میری تعبیر اتنی گنجلک دھندلی اور بے تصویر نہیں بلکہ بالکل واضح نکھری اور شفاف ہےـ میں یہ سوچتا ہوں کہ اگر اکھنڈ بھارت بن جائے اور اس میں افغانستان جیسا ملک شامل نہ بھی ہو، صرف پاکستان اور بنگلہ دیش شامل ہوجائیں تو میرا ہدف پورا ہوجاتا ہےـ اگر بھارت میں موجود پچیس کروڑ مسلم آبادی میں مزید پچاس کروڑ مسلمان ضم ہوجائیں تو میری موب لنچنگ اسی دن رک جائے گی ـ این آر سی کا ہوا ختم، میرے خلاف قانون سازی کی کسے مجال،فوج عدلیہ مقننہ سے مجھے کیا خدشات؟ مجھے موہن بھاگوت کے خواب میں اپنا خواب دکھتا ہے، لیکن مجھے لگتا ہے وہ اپنی اس خواہش میں قطعی سچے نہیں ـ مجھے ان کی نیت میں کھوٹ دکھتا ہے اور اس منصوبے پر کبھی کام نہیں کریں گےـ یہ تاریخ کا فیصلہ ہے جو ماضی میں لکھا گیا، حال یہی ہے اور مستقبل اس کے سوا کچھ نہیں ـ اکھنڈ بھارت کسی کے لیے جیسا بھی ہو میرے لیے خوابوں کی دنیا، سہانے سپنوں کا سنسار ہے، کیوں کہ میں اس میں آج کے بھارت کے مقابلے میں کہیں زیادہ محفوظ بلکہ طاقتور ہوں گاـ

محبت کیاہے؟
توجہ کی ایک نظریا دل کی کوئی لگن؟
آنسوئوں کی تجلی یا مسکراہٹوں کی روشنی؟
سرشاری کا کوئی لمحہ یاہجر کی کوئی کروٹ؟
مسرت کا کوئی پل یا اذیت کی کوئی ساعت؟
روح کا تعلق یاذہنی قربت؟
آنکھوں میں جھلملاتی سب کچھ پالینے کی چاہت؟
یا تنہا ئی میں خاموشی سے سلگنے کی کیفیت ؟
محبت کیاہے؟
ایک پھول…ایک چراغ…ایک خوشبو…
اظہاروبیان کے تمام ترپیمانوں سے بالاتر…لہجوں ‘رویوں سے نمایاں ہونے والا ایک خوبصورت احساس!
محبت‘ اپنی ماں کے چہرے کی جھریوں میں‘ کسی رنج کی لکیر کودیکھ کر بے چین ہوجانے والی ایک نظرہے۔ محبت‘ تشویش کا وہ لمحہ ہے ‘جب ماں‘بچے کے انتظار میں اپنی آنکھیں‘ دہلیز پر رکھ کر بھول جائے۔محبت ‘ایک باپ کی تھکن ہے۔ صحرا کاسفر ہے ۔اپنوں کی آسودگی کی خاطر‘ پردیس میں عمر گنوانے کا نام ہے۔محبت‘ خوف کا وہ عالم ہے‘ جب کوئی ‘کسی اپنے کی سلامتی کے تئیں سوچ کر کپکپانے لگے۔ محبت وہ دعا ہے‘ جس کے زبان پر آنے سے قبل‘ وہ چہرے تصور میں آجائیں‘ جوبے حدعزیزہیں۔محبت ‘کسی بزرگ کی شفقت کا وہ لمس ہے ‘ جس کی تاثیر‘ وقت کی تیزروی بھی زائل نہ کرسکے۔
محبت ‘احساس ہے ‘ایک خوبصورت احساس!

آپ نے نبی کریم ﷺ کی سیرتِ طیبہ کا مطالعہ کیا ہوگا یا کم ازکم جلسۂ سیرت میں شرکت کی ہوگی،دورانِ مطالعہ آپﷺ کی حیاتِ طیبہ کے مختلف گوشوں کو پڑھا ہوگا،جلسہ، جلوس میں آپؐ اور آپؐ کے بے لوث اصحاب کی قربانیوں کا تذکرہ آیا ہوگا، ضرور آپ نے نبیؐ کے شعبِ ابی طالب کے وہ تین سالہ کٹھن ،پرمشقت اور درد ناک ایام بھی پڑھے ہوں گے،اہلِ طائف کے نبیؐ کو دئے ہوے زخم بھی آپ کے ذہنوں میں محفوظ ہوں گے ، جنگِ احد میں آپؐ کا زخمی چہرہ بھی یاد ہوگا،میدانِ عرفات وغیرہ میں تڑپ تڑپ کر ہم جیسوں کی مغفرت کی دعا کرنا،زندگی بھر ہدایتِ امت کی خاطر تڑپتے رہنا،اور پھر خدائی تسلی ” لعلک باخع نفسک علی آثارھم” بھی یاد ہوگی،حق گوئی کے خاطر وطنِ عزیز کو پرنم آنکھوں سے "الودع” کہنا بھی یاد ہوگا، روزِ قیامت آپؐ کا "امتی، امتی” کے نعرے لگانا بھی آپ نے بیانات میں کئی بار سنا ہوگا؛ لیکن کیا یہ سننا اور شرکت کرنا محض وقت گزاری اور تفریحِ طبع کے لیے تھا، یا عبرت و نصیحت کے لیے؟ کیا کبھی ہم نے سوچا کہ آپؐ نے یہ قربانیاں کیوں دی؟ اور ہم نے ان قربانیوں کا کیا حق ادا کیا،یا کم از کم ادائگی کی کوشش کی،تبلیغِ دین کے خاطر کچھ مصائب بھی برداشت کیے،سنتوں کے چھوٹنے پر کچھ غم ہوا،دوسروں کو مصیبت میں دیکھ کر کبھی ان کی مدد کی فکر ہوئی،ارتداد کی آندھیوں کو روکنے کے لیے آپ نے کچھ کیا،شفاعتِ نبیؐ کی امید میں کبھی آپ معاصی سے رکے؟ اگر نہیں! اور واقعتا نہیں! تو آپ کو فکر کرنی چاہیے؛ کیوں کہ ایک نہ ایک دن رہبرِ امت ﷺ کے سامنے کھڑا ہونا ہے، تو اسی لیےاپنا رخ درست کریں ، نبیؐ کریم کے عاشقِ صادق بن جائیں،اور یہ بات ذہن میں رکھ لیں کہ آپ سے بہت زیادہ نہیں، بہ قدرِ وسعت تقوی کا مطالبہ کیا گیا،فاتقوا اللہ مااستطعتم۔
یہ حوصلہ عطا کر مجھے خدائے کریم
کہ اپنے آپ کو خود آئینہ دکھاؤں میں

ویب پورٹلس اور اخبارات کی رپورٹس پڑھنے اور چینلوں پر رپورٹرس کی وژول رپورٹس دیکھنے سے لگتا ہے کہ حکومت کسانوں سے زیادہ اور کسان حکومت سے زیادہ تیاریوں میں مصروف ہے۔
جب آپ پولیس کی جارحانہ بندشوں کو دیکھتے ہیں تو لگتا ہے کہ کسان جلد ہی کچل دئے جائیں گے۔ جب آپ ملک بھر کے کسانوں کا والہانہ جوش دیکھتے ہیں تو لگتا ہے کہ حکومت کی کوششیں دھری رہ جائیں گی۔
6 فروری کے بھارت بند میں کیا ہوگا۔کسان اپنی تیاریاں کر رہے ہیں اور حکومت اپنی۔حکومت سے کسانوں کا مطالبہ ہے کہ وہ زراعت سے متعلق تینوں قوانین واپس لے لے۔ جبکہ کسانوں سے حکومت کا مطالبہ ہے کہ وہ ان قوانین میں ترمیم پر راضی ہوجائیں ۔ دونوں فریق اپنی ضد پر اڑے ہوئے ہیں۔ کوئی پیچھے ہٹنے کو تیار نہیں۔ پیچھے ہٹنے کو حکومت اپنی انا کا اور کسان اپنی بقاء کا مسئلہ سمجھ رہے ہیں ۔
کسانوں کے پاس محض افرادی قوت ہے جبکہ حکومت کے پاس کئی طاقتیں ہیں ۔غازی پور’ ٹیکری بارڈر اور سنگھو بارڈر پر حال یہ ہے کہ پینے کو چھوڑئے مظاہرین کے پاس اب بیت الخلاء میں استعمال کےلیے بھی پانی میسر نہیں ہے۔یقین نہ آئے تو این ڈی ٹی وی کے اُن رپورٹروں کی رپورٹس دیکھ لیجیے جو ساڑھے تین کلومیٹر کا پا پیادہ سفر کرکے ہانپتے کانپتے رپورٹس بھیج رہے ہیں ۔
اب کسان اور حکومت آمنے سامنے ہیں۔۔ وزیراعظم کے یہ کہنے کے باوجود کہ کسانوں اور حکومت کے درمیان صرف ایک فون کال کا فاصلہ ہے’ حکومت جابرانہ فاصلے بڑھاتی جارہی ہے۔راکیش ٹکیت کے روپڑنے کے بعد تحریک کے باقی 39 لیڈر پس منظر میں چلے گئے ہیں۔ یہاں تک کہ تحریک کے سب سے پڑھے لکھے اور سب سے قابل لیڈر یوگیندر یادو تک غیر موزوں سے ہوگئے ہیں ۔
راکیش ٹکیت سے بہت سے واقعات وابستہ ہیں ۔۔ تازہ یہ ہے کہ وہ ایک طرف جہاں مظفر نگر کے مسلم مخالف فسادات میں ملوث رہے ہیں وہیں دوسری طرف مغربی اترپردیش میں چودھری چرن سنگھ کے وارث کی شرمناک شکست اور بی جے پی کی بے مثال کامیابی میں بھی اہم کردار ادا کرچکے ہیں ۔ یعنی وہ بی جے پی کے دشمن نہیں ہیں۔ اس کے باوجود آج وہ اور حکومت/ کسان اور بی جے پی ایک دوسرے کے سامنے دشمنوں کی طرح ڈٹے کھڑے ہیں۔

الله کا نظام بھی کمال کا ہے قرآن کریم کی محض دو آیات ہی سنت الہی کی لازوال تفسیر ہیں۔ وتلک الایام نداولہا بین الناس۔ اور ہم اِن دنوں کو لوگوں کے درمیان گھماتے پھراتے رہتے ہیں۔ ومکروا ومکر الله – والله خیر الماکرین۔ اور وہ بھی تیاری کرتے ہیں اور الله بھی تیاری کرتا ہے۔ اور الله ہی بہترین تیاری کرنے والا ہے۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)

ہم با ت کرتے ہیں معیار کی تو پھر ممتاز سے کم کے درجے پر نگاہیں نہیں روکتے۔

سلام مسنون،سلام عقیدت،سلام رحمت وغیرہ کے درمیان اپنی تمام تر اعلیٰ خوبیوں کے ساتھ جو سلام ہے وہ کملی والے کا سلام ،مذکورہ کلمات سلام نبویﷺ کا بدل ہر گزنہیں ہوسکتے۔

آپ ﷺ کی زبان مبارک سے نکلے اعلیٰ درجے کے فصیح و بلیغ کلمات : السلام علیکم ورحمۃ اللہ

ہم جب بات کرتے ہیں گفتگو کی مہارت پرتو اس سے پہلے کیوں نہ اس خاص ادب کو زندگی میں ملحوظ رکھیں ۔

سلام انہی کلمات سے ادا کرنے کی کوشش کرتے ہیں ،کیونکہ اولاً یہ ایک طرح سے سنت کی ادائیگی ،پھر سنت کی تبلیغ بھی،سلام کرنے والا ثواب کا حقدار بھی ہوتا ہے ۔ ساتھ ہی ان کلمات کی تاثیر اور برکت کچھ ایسی ہے کہ سلام کرنے اور سننے والے دونوں فریق پُر امن رہتے ہیں ِ،محبت و مودت میں بھی اضافہ ہوتا ہے،تو ایک طرح سے نبوی کلمات یعنی یہ حدیث ہی ہیں ،اس لئے اس کے اپنے فیوض و برکات ہیں ۔

بہر حال یہ سلام کی کوالیٹی کی بات ہے نہ کہ فتوے کی ۔آپ سے ذکر اس لئے چھیڑا کہ ہم سب برینڈ کانشیزہوچکے ہیں ،تو کیوں نہ یہاںبھی ہم ہی آگے رہیں ۔

اردو اور فارسی کے سلامتی کلمات بھی کلمات ہیں ،لیکن یہاں فرسٹ کاپی کا معاملہ ضرورہے،اس لئے بہترین کا انتخاب کریں ،لمبا لکھنے کے تساہل سے بچ کر غیر معیاری چیزوں سے بچیں ۔قیمتی چیزوں کا انتخاب یقیناًآپ کی شخصیت کو بھی قیمتی بناتا ہے ۔

ہمارے وزیراعظم کے جگری دوست اور امریکہ کے مزید 14 دن کے صدر ڈونالڈ ٹرمپ کی ایک گھنٹے کی ٹیلیفونک گفتگو عام ہوئی ہے۔ اس گفتگو کو پہلے واشنگٹن پوسٹ نے اور پھر نیو یارک ٹائمز نے عام کیا ہے۔۔ اس گفتگو میں ٹرمپ’ جارجیا کے (ریپبلکن) سیکریٹری آف اسٹیٹ Brad Raffensperger کو مسلسل خطرناک نتائج کی دھمکی دے رہے ہیں اور ان سے صدارتی انتخابات کے نتائج کے اعدادوشمار تبدیل کرنے کا مطالبہ کر رہے ہیں ۔

واشنگٹن پوسٹ نے ایک گھنٹے کی گفتگو کا یہ نچوڑ نقل کیا ہے۔ ٹرمپ نے کہا: بیلٹ گڑ بڑ ہیں ۔ یہ پورے طور پر غیر قانونی ہے۔ تمہارے لئے یہ اور بھی زیادہ غیر قانونی ہے۔۔ کیونکہ جو کچھ انہوں نے (الیکشن افسران) نے کیا ہے وہ تم جانتے ہو مگر رپورٹ نہیں کر رہے ہو ۔ یہ جرم ہے۔ یہ مجرمانہ فعل ہے۔ اور تم یہ ہونے نہیں دے سکتے۔ تمہارے لئے یہ ایک بڑے خطرے والی بات ہے۔ میں جو کچھ چاہتا ہوں یہ ہے۔ میں 11780 ووٹ پانا چاہتا ہوں۔”

"… تو بتاؤ مجھ کو براڈ’ ہمیں کیا کرنا ہے۔ ہم الیکشن جیت چکے ہیں ۔ اور اس طرح مجھ سے الیکشن چھیننا ٹھیک نہیں ہے۔ اور یہ تمہیں کئی اعتبار سے بہت مہنگا پڑے گا۔ میں کہتا ہوں کہ تمہیں یہ کہنا ہی ہوگا کہ میں دوبارہ چیک کرتا ہوں ۔ اور تم دوبارہ چیک کرسکتے ہو۔ دوبارہ چیک کرو ان لوگوں کے ساتھ جو جواب دریافت کرسکیں ۔ ان لوگوں کے ساتھ نہیں جو کوئی جواب دریافت کرنا نہیں چاہتے ۔”

ڈونالڈ ٹرمپ اپنی پہلی مدت عہدہ 20 جنوری 2020 کو پوری کرلیں گے۔۔ دوسری مدت کا الیکشن وہ ہارگئے ہیں ۔ ان کے مقابل بائیڈن ریکارڈ کامیابی سے ہم کنار ہوئے ہیں ۔ ٹرمپ کو جارجیا سے ہی امید تھی کہ آخری گنتی میں وہ ان کو جتاسکتا ہے۔ لیکن جارجیا کے 16 ووٹ بائیڈن کے حق میں چلے گئے ۔ ٹرمپ نے جارجیا کی عدالت میں جو رٹ ڈالی تھی وہ خارج ہوچکی ہے۔ دیگر چند مختلف عدالتیں بھی ان کی رٹ مسترد کرچکی ہیں ۔ سپریم کورٹ سے رجوع کرنے سے پہلے جو مراحل طے کرنے تھے’ ٹرمپ وہ طے نہیں کرسکے۔ بائیڈن کی واضح کامیابی کے پیش نظر سپریم کورٹ سے ٹرمپ کو کوئی راحت ملنے کا امکان نہیں ہے۔ ایسے میں ٹرمپ جارجیا کے حکمرانوں کو ڈرا دھمکا رہے ہیں ۔

ماہرین قانون کے مطابق جارجیا کے قانون کے تحت ٹرمپ کے خلاف فون پر دھمکی دینے کا مقدمہ قائم کیا جاسکتا ہے۔ جارجیا کے سیکریٹری آف اسٹیٹ حالانکہ ٹرمپ کی پارٹی سے تعلق رکھتے ہیں لیکن انہوں نے واضح طور پر کہہ دیا ہے کہ وہ اب نتائج میں کوئی تبدیلی نہیں کرسکتے۔ مجھے یاد آیا کہ بہار میں اپوزیشن نے ووٹوں کی گنتی کے دوران وزیر اعلی نتیش کمار پر الزام عاید کیا تھا کہ انہوں نے بعض افسران پر دباؤ ڈال کر 20 سے زیادہ امیدواروں کے نتائج تبدیل کرادئے تھے۔ ہم رات دن امریکہ کو لعن طعن کرتے ہیں لیکن اخلاقی اعتبار سے امریکی معاشرہ آج بھی ہم سے بہت منفرد ہے۔

مؤرخہ ۲۳دسمبر بروز بدھ۳۰ دنوں سے چل رہے کسانوں کے آندولن میں شریک ہونے کا موقع ملا۔ کسانوں کا یہ احتجاج لگتا ہے کہ ملک کا لاۂحہ عمل طے کریگا کہ آیا ملک میں فاشسٹ طاقتیں برسراقتدار رہے گی یا سیکولر پارٹیاں پھر سے صوبوں اور دہلی میں واپسی کرے گی۔
سنگھو بورڈر پر کسانوں کا احتجاج نہایت ہی منظم طریقہ سے چل رہا ہے، احتجاج میں شرکت کرنے والوں کا پورا خیال رکھا جا رہا ہے، ایک طرف احتجاج کرنے والوں کے لیے کھانے کا انتظام ہے ، وہی پر دوسری طرف ناشتے اور اسپیشل چاۓ کا انتظام ہے، تیسری طرف ان کے لیے واشنگ مشین کا انتظام ہے، چوتھی طرف علاج کے لیے ایم۔ بی۔ بی۔ ایس۔، بی۔ یو۔ ایم۔ ایس۔ اور۔ بی۔ اے۔ ایم۔ ایس۔ ڈاکٹروں کی ٹیم ہر وقت کسانوں اور آنے جانے والوں کے لیے فری ہے، پانچویں طرف احتجاج کرنے والے اپنا خون عطیہ کر رہے ہیں۔
احتجاج کی کچھ خاص باتیں:
۱ گودی میڈیا کو منہ نہ لگانا
۲دہلی بورڈر سے لے کر احتجاج کے آخری کونے تک افراد کا حفاظتی اقدامات پر چوکس رہنا
۳کسانوں اور کسانوں کے مسائل سے جڑے ہوۓ لوگوں کو موقع دینا
۴ جو افراد کسانوں کے احتجاج سے منسلک نہیں ہیں ان سے بچنا
۵ جذبات سے زیادہ عقل سے کام لینا
۶احتجاج میں شرکت کرنے والوں کے ساتھ خوش اخلاقی سے پیش آنا
۷کسان احتجاج کی وجہ سے این۔ ایچ۔ ۴۴کابند ہونا جوکہ ہریانہ کو دہلی سے جوڑنے والی قومی شاہراہ ہے

القرآن اکیڈمی،کیرانہ

ابھی کوئی چار پانچ روز پہلے کی بات ہے مولانا عبد الحمید نعمانی کی ہندوتو سے متعلق چار کتابوں کا ایک سیٹ ایک لمبے انتظار کے بعد موصول ہوا۔پیکٹ ملتے ہی رہا نہ گیا۔دیگر تمام مصروفیات کو بالائے طاق رکھتے ہوئے ،فوراً مطالعہ شروع کیا،کتابیں اس قدر دلچسپ کہ کوئی آٹھ سو صفحات پر مشتمل یہ تمام چاروں کتابیں صرف چار روز سے بھی کم وقت میں مکمل ہو گئیں۔الحَمدُ للہ۔ کافی تفصیلی نوٹس بھی لیے گئے۔مطالعہ کے بعد بلا شبہ فکر کو جلا ملی،علم میں اضافہ ہوا اور ہندوتو کی جانب سے مسلمانوں کو درپیش چیلنجز کی تفہیم میں بڑی مدد ملی۔ گزشتہ رات القرآن اکیڈمی کیرانہ میں اسی تھیم پرایک لکچر بھی پیش کیا جو پوری طرح انہی کتابوں سے مستفاد تھا۔ مولانا نعمانی کو اللہ جزائے خیر دے،بلا شبہ آپ نے بڑا کام کیا۔میں مولانا کو خراج عقیدت پیش کرتا ہوں۔ نیز اُمید کرتا ہوں کہ مولانا ان خطوط پر آگے بڑھتے رہیں گے اور ہم جیسے طلبہ آپ سے استفادہ کرتے رہیں گے۔ تمام احباب سے درخواست ہے کہ مولانا کی ان چاروں کتابوں کا نہ صرف خود لازمی طور پر مطالعہ کریں بلکہ دیگر احباب کو یہ کتابیں گفٹ بھی کریں اور پڑھنے کے لیے کہیں۔ میں خود مولانا کی ان تصانیف کو بڑی تعداد میں لوگوں تک پہنچانا چاہتا ہوں۔ مجھے مولانا نوشاد زبیر ملک صدر الکتاب فاؤنڈیشن نوادہ (بہار) نے بتایا کہ وہ ان کتابوں کو سو لوگوں تک پہنچا چکے ہیں۔ کتابوں کے نام یہ ہیں:
۱. ساورکر: فکر و تحریک
۲. سنگھ کے بانی ڈاکٹر ہیڈ گوار
حیات و تحریک
۳. ہندتو: اہداف و مسائل
۴. ہندوتو اور راشٹرواد

آخر میں ایک درخواست مولانا نعمانی سے یہ ہے کہ آر ایس ایس اور ہندوتو کا جو تجزیہ آپ نے اپنی کتب میں پیش کیا ہے،براہ کرم اسے نہایت مختصر عمدہ کوالٹی ویڈیو سیریز کی شکل میں ضرور سامنے لائیں تاکہ نسل نو ان حقائق سے واقف ہو۔

بحیثیت صحافی ، میں اس حقیقت سے بخوبی واقف ہوں کہ ظفریاب جیلانی ہمارے پورے سیاسی اور قانونی ڈھانچے کے قابل رحم حالات کو عام لوگوں سے بہتر جانتے ہیں۔ وہ نہ صرف ہندوستانی مسلمانوں کی عزت بچانے کے لیے پوری کوشش کر رہے ہیں بلکہ ہندوستانی عدالتی نظام کی بھی۔ بابری مسجد کا معاملہ انسانیت، جمہوریت اور سیکولرازم کی علامت صرف مسلمانوں کے لیے ہی نہیں، بلکہ تمام ہندوستانیوں کے لیے بن گیا ہے۔ ہم سب اس کے لئے ان کا احترام کرتے ہیں۔ لیکن کیا ہم لوگ ہر معاملہ ظفریاب جیلانی کے لیے چھوڑتے رہیں اور مسلم پرسنل لا بورڈ کو محض ایک غیر فعال تماشائی کی حیثیت سے دیکھتے رہیں؟ مجھے پختہ یقین ہے کہ ہندوستان کے شہریوں کو نہ صرف اپنے جمہوری حقوق کے لئے بلکہ خود جمہوریت کے لئے بھی چوکنا رہنا چاہئے۔ جیلانی اپنا فریضہ بخوبی انجام دے رہی ہیں، وہ وہی کر رہے ہیں جو انہیں کرنا چاہیے ۔ نا ہی وہ اس جدوجہد میں تنہا تھے اور نہ ہی ہیں۔ مقبول و معروف ہندو وکلا نے اس کیس میں حصہ لیا ہے تاکہ وہ ہندوستان کے ٹو ٹے پھوٹے اور مرتے ہوئے سیکولر تانے بانے کو بچا سکیں۔ سینئر ایڈوکیٹ کپل سبل، راجیو دھون، راجو رام چندرن اور دیگر وکلا نے اس کیس میں حصہ لیکرایک سچے محب وطن کی حیثیت سے اپنا نام درج کروا دیا۔
ایک ذمے دار ہندوستانی شہری کی حیثیت سے بابری مسجد سے متعلق جدوجہد کے دوران آپ نے کیا کیا؟ کیا آپ فقط ایک مبصر ہیں؟ کیا آپ نے اپنے گھر اور اپنی عبادت گاہوں کی حفاظت کے لیے کچھ منصوبہ بنایا ہے؟ ہمارے غیر مسلم بھائیوں، کیا آپ بھی ظلم اور ناانصافی کے خلاف اس جنگ میں تعاون کریں گے؟
عرب ممالک اب خود بیت المقدس کو اسرائیل کے حوالے کر رہے ہیں۔ یروشلم اور ایودھیا کے معاملے کو دیکھتے ہوئے ان دونوں معاملات میں حیرت انگیز مماثلت موجود ہے۔ کیا اب یروشلم کی بھی اسی طرح جانے کی باری ہے؟
ظفریاب جیلانی کے لیے میری چھوٹی سی تجویز یہ ہوگی کہ وہ خود کو معاشرے کے قریب رکھیں، تاکہ لوگ انہیں صرف مسلم پرسنل لا بورڈ یا بابری مسجد کے معاملے پر کھڑا ہونے والا نا سمجھیں۔ انہیں اپنے آپ کو لوگوں کے ساتھ جوڑنا چاہئے اور ہندوستانی عوام کے ہر مسئلے پہ کھڑا ہونا چاہیے ۔ جہاں تک معاشرے کا تعلق ہے تو اسے انفرادی اور اجتماعی طور پہ اپنے لئے آواز اٹھانی چاہیے ۔ جب ہر ذرہ حرکت میں ہوتا ہے، تو پورا نظام اٹوٹ ہوجاتا ہے۔ ہندوستان، اس کی جمہوریت، ظفریاب جیلانی اور قوم کے لیے میری انتہائی مخلص خواہشات اور دعائیں۔

نوٹ:یہ مضمون بابری مسجد انہدام کی 28 ویں برسی کے موقع پر 6 دسمبر 2020 بروز اتوار ٹائمز آف انڈیا کے ذریعے شائع شدہ ظفریاب جیلانی کے ایک بیان کے حوالے سے لکھا گیا ہے۔

چودھری صاحب اویسی مسلمانوں کا ٹھیکیدار نہیں، صحیح کہا آپ نے مگر کانگریس، سپا، بسپا، راجد، جدیو وغیرہ وغیرہ کوئی بھی مسلمانوں کا ٹھیکیدار نہیں۔ اویسی اور اجمل سے سب سے زیادہ کانگریس کو تکلیف کیوں ہے ؟

١٤ سال کانگریس اور مجلس شیرو شکر رہے تب وہ فرقہ پرست پارٹی نہیں تھی اس لئے کہ اس کی مددسے آندھرا میں کانگریس کی حکومت جو بنتی تھی۔ پھر اسی حکومت نے ٢٠١٢ میں چارمینار کے قریب ایک مندر کی تعمیر و توسیع اور مرمت کو لے کر دونوں پارٹیوں میں اختلاف ہوگیا اور مجلس نے آندھرا اسمبلی میں اور مرکز میں کانگریس قیادت والی یو پی اے سے ناطہ توڑ لیا !

اب کوئی پارٹی مسلمانوں کے ووٹ کو اپنی ملکیت سمجھنے کی غلطی نہ کرے۔ آپ اپنی کارکردگی شمار کرائیں اور انتخابی منشور میں عام ہندوستانیوں بالخصوص پسماندہ طبقات کی فلاح و بہبود کا مصمم عزم کریں اگر آپ کی باتوں میں صداقت ہوگی اور ووٹرز مطمئن ہوئے تو آپ کو ووٹ کریں گے۔ اگر نہیں کیے تو الزام اپنی اسٹریٹیجی کو دیں۔ جو لوگ مسلمانوں کو کانگریس کا، راجد یا سماجوادی یا کسی اور پارٹی کا ووٹ بینک مانتے ہیں در اصل وہ مسلمانوں اور ان کی عقل اور سوجھ بوجھ کی توہین کرتے ہیں۔ کیا مسلمانوں کو اپنے لئے اچھے برے میں تمیز کرنے کی صلاحیت نہیں ہے۔ ان کو ووٹنگ کسے کرنا ہے یہ بتانے کے لئے لوگ باہر سے آئیں گے ؟ اگر مسلمانوں میں اتنی صلاحیت نہیں تو کیا دلتوں میں ہے ؟ کیوں ایم وائی سمیکرن کے باوجود یادو کی اکثریت راجد کے مسلم امیدوار کو ووٹ نہیں کرتی؟ اس بارے میں کوئی سوال نہیں پوچھتا !

ہم یہ چاہتے ہیں کہ مسلمانوں کے لیے کوئی بھی پارٹی کوئی مخصوص وعدہ نہ کرے۔ ترقیاتی منصوبوں پر عملدرآمد مذہب اور ذات دیکھ کر نہیں ہوتا۔ آپ تعلیم کے لئے اچھے معیاری اسکول، صحت عامہ کے لئے اچھے ہسپتال کلینک اور ڈسپنسری ، عام شہریوں بالخصوص خواتین کے تحفظ کے لئے چاق و چوبند سیکورٹی سسٹم اور سی سی ٹی وی کیمرے، روشن سڑکیں، پبلک ٹرانسپورٹ، سڑک، بجلی اور سیوریج کا نظم کرانے کا عہد کریں اور جیتنے کے بعد ان وعدوں کو پورا کریں، عوام آپ کے ساتھ ہوں گے۔ ملک کی نام نہاد سیکولر پارٹیاں اپنے ووٹرز کو اتنے کچے دھاگے سے کیوں باندھتی ہیں کہ وہ توڑ کر بھاگ جائیں !

مسلمانوں کا کوئی ٹھیکیدار نہیں ہے، نہ سیاسی پارٹیاں اور نہ مذہبی قیادت ۔ اب مسلمان محراب و منبر سے  کسی فرمان کا منتظر ہے اور نہ کسی امام اور حضرت کے  "فتوے” کا اسیر اور نہ اس معاملے میں کسی سجادہ نشین کی اطاعت سے بندھا ہوا ہے۔ وہ دستور میں دیے گئے حق رائے دہی کا آزادانہ استعمال کرنا چاہتا ہے، لیکن اس سے پہلے وہ امیدوار اور پارٹی کا رپورٹ کارڈ بھی پڑھنا چاہے گا۔ وقت بدل گیا ہے، اب آپ کسی پارٹی کو روکنے کی بجائے اپنے کارناموں اور عہد و پیمان  سے ووٹرز کو اپنی طرف مائل کریں۔ الیکشن لڑنے سے آپ کسی کو روک نہیں سکتے ہاں دم ہے تو ووٹرز کو  convince کریں کہ وہ آپ کو ووٹ دے۔

رمضان ۱۴۴۱ میں ایک متعارف شخص کا فون آیا، علیک سلیک کے بعد انہوں نے بتایا کہ ان کے بھائی کی طبیعت خراب ہے اور کئی عاملین کو دکھانے کے باوجود کچھ بھی افاقہ نہیں ہورہا ہے لہذا آپ مولانا حسن الہاشمی سے بات کیجیے اور ان سے علاج کروادیجیےـ میں نے رات گیارہ بجے استاذ العاملین مولانا حسن الہاشمی سے بات کی،حضرت نے کہا کل آئیے اور میں ان کے گھر صحیح وقت پر پہنچ گیا اور حضرت سے کئی معاملات پر تبادلۂ خیال کیا۔

حضرت مولانا حسن الہاشمی رحمہ اللہ طلبا سے حسن اخلاق سے پیش آتے تھے، طلبا، علما، عوام اور خواص کے مسائل و معاملات پر نظر رکھتے تھے، امیر، غریب،علما، طلبا، صحافی اور نیتا سبھی کا احترام کرتے تھے اور دیوبند میں اپنے ادارہ "خدمت خلق” کے پلیٹ فارم سے غریبوں، اساتذہ، متعلقین اور کمزور افراد کی مدد کیا کرتے تھے۔

حضرت مرحوم نے عملیات کے ذریعے کئی بڑی شخصیات کا علاج کیا ہےـ ہندوستان کے وزیراعظم نرسمہا راؤ نے حضرت سے اپنا علاج کروایا تھا، آپ طلبا کو رسوخ فی العلم پیدا کرنے کی تلقین فرمایا کرتے تھے، امت کے باہمی انتشار سے سخت نفرت کیا کرتے تھے اور اتحاد امت کے علمبردار تھے، آپ امت مسلمہ کے مستقبل سے مایوس نہیں تھے اور آپ کہا کرتے تھے کہ اللہ جلد از جلد حالات کو ہمارے موافق کردے گا ۔

آپ دارالعلوم دیوبند سے فراغت کے بعد کچھ سالوں تک تدریسی خدمات سے جڑے رہے، اس کے بعد سماجی طور پر کام کرتے رہے، کئی مجلات میں بطورِ مدیر کام کرتے رہے۔عملیات کے ذریعہ عوام وخواص کو مستفید کرتے رہےاور آپ ہمیشہ توکل کی تلقین کرتے تھے۔

اللہ سے دعا ہے کہ اللہ آپ کے حسنات کو قبول فرمائے۔ میں دکھ کی اس گھڑی میں حضرت مرحوم کے صاحبزادہ ربیع ہاشمی اور مفتی وقاص جامی کو تعزیت مسنونہ پیش کرتا ہوں۔

کچھ لوگوں میں تعصب اس قدر کوٹ کوٹ کر بھرا ہوتا ہے کہ حق ناحق سے پرے وہ دشمنی نکالنے کا کوئی موقع ہاتھ سے جانے نہیں دینا چاہتے ہیں۔ دہلی میں ایشین گیمز کے تحت عراق بمقابل جنوبی کوریا فٹ بال میچ ہو رہا تھا اسٹیڈیم ناظرین سے کھچا کھچ بھرا ہوا تھا۔ٹیم اور کھلاڑی کا ملک اور مذہب کیا ہے اس سے بے نیاز اسپورٹس اسپرٹ سے معمور اچھے کھلاڑیوں کو لوگ داد و تحسین دے رہے تھے۔ مگر ان میں ہی کچھ ایسے مذہبی تعصب گزیدہ افراد بھی تھے جو نہ صرف عراقی کھلاڑیوں کے خلاف آواز بلند کر رہے تھے بلکہ اس کے ساتھ اسلام اور مسلمانوں کو بھی نشانہ بنا رہے تھے۔ ان پڑھے لکھے جاہلوں کو شاید معلوم نہیں تھا کہ جنوبی کوریا کی بہ نسبت عراق ہندوستان کا بہت اچھا دوست ملک ہے ، کروڑوں روپے کا پٹرول ادھار ہندوستان کو دے کر مشرق وسطی میں ہندوستان کا سب سے زیادہ قابل اعتماد ملک اور ٹریڈ پارٹنر ہے جو اس ملک کی معیشت کی توانائی کے لیےضروری ہے۔ لیکن تعصب سے نابینا ہوئے لوگوں کو ملک کی تعمیر و ترقی سے کیا لینا دینا !
فرانس کے صدر نے آئندہ الیکشن میں دائیں بازو کی تائید حاصل کرنے کے لئے ہی سہی جو موقف اختیار کیا ہے اس کی وجہ سے پوری دنیا میں مسلمان غیض وغضب کی حالت میں ہیں اور یہ فطری ہے اس لیے کہ اہانت رسول صلی االلہ علیہ وسلم سے ادنیٰ سے ادنیٰ درجے کے مسلمان کا دل بھی زخمی ہوا ہے ان کے مذہبی جذبات کو ٹھیس پہنچا ہے۔ ہندوستان میں تقریباً پندرہ سولہ کروڑ مسلمان بھی کبیدہ خاطر ہیں اور اپنے غم وغصہ کا اظہار پرامن طریقے سے کر رہے ہیں۔ ایسے میں برادران وطن کو اپنے مسلمان بھائیوں کے زخموں پر مرہم رکھنا انسانیت اور ہم وطنی کا تقاضا ہے مگر افسوس اسلام اور مسلم دشمن عناصر ” ہم فرانس کے ساتھ ہیں ” ٹرینڈ چلا کر ہمارے زخموں پر نمک پاشی کر رہے ہیں۔ ! انہیں اپنے برادران وطن کے مقابل اسلاموفوبیا سے متاثر فرانسیسی صدر سے ہمدردی ہے۔ یہ فرانسیسی صدر کے حق اظہار رائے کی وکالت سے محبت کی بناء پر نہیں مسلمانان عالم سے نفرت کی بناء پر ہے۔حب علی نہیں بغض معاویہ کا مظہر ہے۔

خبیب نے کل اپنی زبردست جیت کے بعد ریٹائرمنٹ کا اعلان کردیا۔ خبیب نے اپنے کیریئر میں 29 مقابلے کیے اور سب کے سب میں فاتح قرار پایا۔ یو-ایف-سی کے مالک ڈونا وائٹس نے اس افواہ کو بھی تقویت دے دی ہے کہ اس آخری فائٹ سے کوئی تین ہفتے پہلے خبیب کا پیر یا پیر کی انگلیاں ٹوٹ گئی تھیں۔ اس کے باوجود پہلے لمحے سے خبیب اپنے مقابل پر چھایا رہا۔ خبیب اپنے کیریئر میں صرف غیرمعمولی فائٹر ہی نہیں بنا بلکہ ایک منکسرالمزاج مسلم بن کر بھی سامنے آیا، اپنے والد کا فرمانبردار بیٹا بن کر بھی اس نے دکھایا اور پورے روس کیلئے بھی ایک قابل فخر سپوت بن کر ابھرا۔ خبیب اس لحاظ سے بھی منفرد رہا کہ وہ پیسے کیلئے نہیں بلکہ صرف اصل اعزاز کیلئے ہی لڑائی قبول کرتا۔ یہی وجہ ہے کہ کئی ایسی فائٹس اس نے ٹھکرا دی جس میں اسے بہت بڑی رقم آفر کی گئی اور جو فائٹس وہ بآسانی جیتنے پر قادر بھی تھا مگر اس نے انہیں قبول نہیں کیا۔ وجہ یہی کہ اس کا اصل منشا مال نہیں بلکہ تاریخ میں نام بنانا تھا۔

خبیب دیگر فائٹرز کی طرح گھمنڈ آمیز جملے بازی نہیں کرتا بلکہ اس کا نمائندہ انداز یہ تھا کہ پہلے شہادت کی انگلی اپنے سینے کی جانب کرکے نفی میں سر ہلاتا اور پھر یہی شہادت کی انگلی آسمان کی جانب اٹھا کر اثبات میں سر ہلاتا۔ گویا زبان حال سے یہ اعلان کرتا کہ میں خبیب کچھ بھی نہیں، اصل عزت صرف رب العالمین کو جچتی ہے۔ اپنے والد کے انتقال کا صدمہ خبیب کو نفسیاتی طور پر نہایت مضمحل کیے ہوئے ہے۔ خبیب تم نے صرف بیلٹس اور ٹائٹل نہیں جیتے بلکہ بلاشبہ ہم سب کے دل بھی جیتے۔ خبیب تمہاری ریٹائرمنٹ سے جہاں دکھ ہوا ہے، وہاں یہ اطمینان بھی ہے کہ تم نے عروج پر ریٹائر ہوکر شاید بہترین فیصلہ کیا ہے اور یوں اس کھیل کی تاریخ میں امر ہوگئے ہو۔گریٹ ورک چیمپ !

میرا تعلق ریاست اترپردیش کے ایک پس ماندہ ضلع بہرائچ سے ہے ، جو لکھنؤ سے تقریباً 125 کلومیٹر شمال میں نیپال سے متّصل واقع ہے۔
مجھے یہ جان کر بہت خوشی ہوئی کہ آج سے 66 برس قبل 1954ء میں ایک ہندو زمین دار سنت رام نے ، جو علاقہ مہسی کے میگلا نامی گاؤں کے باشندہ تھے ، اپنا ایک وسیع قطعۂ اراضی (41 بگھہ 13 بسوا) علی گڑھ مسلم یونی ورسٹی کو عطیہ کیا تھا ۔ چودھری سنت رام نے اپنی تمام جائیداد کو علی گڑھ مسلم یونی ورسٹی اور بنارس ہندو یونی ورسٹی کے درمیان برابر برابر تقسیم کردیا تھا۔
طویل عرصے تک اس قطعۂ اراضی کا کوئی خبر لینے والا نہ تھا۔ چند برس قبل وہاں تعلیمی اور رفاہی کاموں سے دل چسپی رکھنے والے کچھ افراد نے اس معاملے میں دل چسپی لی ، زمین کے کاغذات نکلوائے ، مسلم یونی ورسٹی کے ذمے داروں سے رابطہ کیا اور اس زمین کا کوئی اچھا مصرف نکالنے پر زور دیا ۔ بالآخر یونی ورسٹی کے ذمے داروں نے اس پر ایک ہائر سیکنڈری اسکول کھولنے کا فیصلہ کیا ہے ۔ اللہ کرے ، یہ کام جلد ہوجائے ۔ بنارس ہندو یونی ورسٹی کی طرف سے غالباً اب تک اس کو عطیہ کی گئی زمین کے بارے میں کوئی پیش رفت نہیں ہوئی ہے۔
کیسے کیسے لوگ تھے جنھوں نے مذہب اور ذات پات سے اوپر اٹھ کر قوم کی تعلیمی ترقی کی فکر کی تھی اور اپنی ساری دولت اس کام کے لیے نچھاور کردی تھی۔ سر سید علیہ الرحمۃ کے دور سے آج تک مسلم یونی ورسٹی کو تعاون فراہم کرنے والوں میں ہندوؤں کی بھی خاصی تعداد ہے۔

موجودہ بہار الیکشن میں کنڈیڈیٹ کے ذریعہ مہنگی اور موٹی رقم دے کر اپنی پسندیدہ پارٹی سے ٹکٹ حاصل کرنے کا جو کھیل جاری ہے، وہ جمہوریت اور ہندوستانیوں کے لیے خصوصا معاشی وسائل میں سب سے پسماندہ ریاست بہار کےلیے نقصان دہ ہے۔
کسی بھی جمہوری ملک میں الیکشن کا انعقاد وہاں کے عوام کی فلاح و بہبودی کےلیے کرایا جاتاہے، اسی لیے دوران الیکشن پیسہ لے کر ووٹ کو فروخت کرنے یا پیسہ کے سہارے لوگوں کے اپنی پسند کے خلاف ووٹ ڈلوانے کو جمہوریت کے لیے خطرناک قرار دیا گیا ہے ۔
مگر یہ بڑے افسوس کی بات ہے کہ مختلف پارٹیوں کے ذریعہ بہار الیکشن میں ایک ایک امیدوار سے کئی کئی کروڑ روپے حاصل کیے جارہے ہیں اور امیدوار بخوشی پارٹی کو اتنی موٹی رقم دے رہے ہیں۔ الیکشن کو عوام کی خدمت کے بجائے کاروبار اور جوا بازی بناکر رکھ دیا ہے ۔
کیا یہ ممکن ہے کہ اتنی موٹی رقم خرچ کرنے والے الیکشن میں یقینی طور پر جیت کر عوام کی خدمت کریں گے اوراپنے پیسہ کو واپس حاصل کرنے کی فکر نہیں کریں گے؟ یقینا یہ نا ممکن ہے اور عوام بھی ایسے لوگوں کو خوب پہچانتے ہیں۔ اس لیے ٹکٹ کے حصول میں امیدواروں کو سوچ سمجھ اور عقل مندی کا ثبوت دینا چاہیے؛تاکہ جیت کے بعدغریبوں مسکینوں اور لاچاروں کی مدد کرکے ان کے دل کو ہمیشہ کے لئے جیتا جاسکے۔ نہ یہ کہ الیکشن اور سیاسی کامیابی کو دولت و شہرت کے حصول کا ذریعہ بنایا جائے۔

ان دنوں پورے بہار میں انتخاب کی آندھی بہت تیزی کے ساتھ چل رہی ہے، اگرچہ ابھی الیکشن کمیشن کی جانب سے چناؤ کی تاریخ کا آفیشیل اعلان نہیں کیا گیا ہے تاہم امید کی جارہی ہے کہ اکتوبر کے مہینے میں بہار میں انتخاب کرایا جائے گا
جس کی تیاری میں ریاست کی تمام چھوٹی بڑی پارٹیاں لگ چکی ہیں اور ہر پارٹی زیادہ سے زیادہ سیٹوں پر اپنی دعویداری پیش کر رہی ہے،
ایک طرف بہار کے سابق وزیر اعلی جیتن رام مانجھی عظیم اتحاد کو چھوڑ کر این ڈی اے میں شامل ہوچکے ہیں تو دوسری طرف رام ولاس پاسوان کی لوک جن شکتی پارٹی این ڈی اے سے الگ ہونے کا من بنا رہی ہےـ
جن ادھیکار پارٹی کے صدر راجیش رنجن عرف پپو یادو بھی اپنی پارٹی کی ترقی کیلئے خوب محنت کر رہے ہیں ـ
اسی بیچ کل(بروز سنیچر) کی شام سے یہ بہت بڑی خبر سیاسی گلیاروں میں خوب ہلچل مچائے ہوئی ہے کہ
آل انڈیا مجلس اتحاد المسلمین اور سماج وادی جنتا دل کے مابین اتحاد ہو گیا ہے یعنی یہ دونوں پارٹیاں اب مل کر بہار ودھان سبھا چناؤ لڑیں گی ـ
مجلس اتحاد المسلمین کے صدر بیرسٹر اسدالدین اویسی اور سماج وادی جنتا دل ڈیموکریٹک کے راہنما بہار کے معروف سیاستداں سابق مرکزی وزیر اور متعدد بار ممبر پارلیمنٹ رہ چکے ڈاکٹر دیویندر پرساد یادو نے مشترکہ کانفرنس کرکے بہار کی عوام کو یہ بڑی خبر سنائی، اس اتحاد کو یونائٹیڈ ڈیموکریٹک سیکولر الائنس کا نام دیا گیا ہے جس کا اشارہ صدر مجلس بہار اخترالایمان بارہا اپنے بیان میں کر رہے تھے ـ
یقینا یہ الائنس سیکولر لوگوں اور اقتدار میں اشتراک کی چاہت رکھنے والوں کیلئے ایک خوش آئند قدم اور امید کی کرن ہے ـ
امید ہے کہ یہ نیا اتحاد اپنے مقصد میں کامیابی حاصل کرے گا، دیگر سیاسی پارٹیوں کو بھی اس اتحاد میں شامل کرکے سیکولر ووٹ کی تقسیم کو روکنے کی حتی الامکان کوشش کرے گا تاکہ بہار کی سیاست میں ایک تیسرا مورچہ کھڑا ہو، بہار کی مظلوم و بے بس عوام کی آواز بن کر ان کے بنیادی ضروریات اور دیگر سہولیات کا بندوبست کرے، بہار بھی ترقی راہ پر گامزن ہو، اور اہل بہار اس اتحاد سے خاطر خواہ فائدہ حاصل کرےـ

ہندوستان ایک سوشلسٹ رفاہی ریاست ہے۔ سوشلسٹ ریاست کا مفہوم یہ ہوتا ہے کہ ریاست سماج کے ہر طبقے کے فلاح و بہبود کے لیے کام کرے نہ کہ صرف سرمایہ داروں کو ترجیح دے۔ حکومت کی پالیسی ایسی ہو کہ جس میں بالخصوص ملک کے پسماندہ طبقات کو خصوصی مراعات دینا حکومت کی ترجیحات میں شامل ہو۔

رفاہی ریاست welfare state کا مفہوم یہ ہے کہ ریاست اور اس کی حکومت بلا استثنا ہر طبقے کی سہولیات بہم پہنچانے کے لیے کوشاں رہے۔ سڑک بجلی پانی سیوریج تعلیم و صحت (اسکول اور ہسپتال) مفت ہر شہر گاؤں اور قصبوں میں مہیا کرے۔ عام آدمی کی قوت خرید purchasing power کو مد نظر رکھتے ہوئے پبلک ٹرانسپورٹ کا بندوبست کرے۔ عام آدمی کی قوت خرید کے لحاظ سے اشیا خوردونوش اور دیگر اشیاے ضروریہ essential goods مہیا کرائے۔

سبسڈی : اشیاے ضروریہ، مقامی پیداوار ہوں یا امپورٹڈ درآمد کی ہوئیں، اگر ان کی خرید کے مطابق قیمت فروخت طے کی جاتی ہے تو عام آدمی اسے خریدنے کی استطاعت نہیں رکھتا ایسی صورت میں حکومت تاجروں اور کسانوں کو پوری قیمت ادا کرتی ہے لیکن عام آدمی کو لاگت سے کم پر فروخت کراتی ہے خرید اور فروخت میں جو فرق ہے اسے حکومت اپنے خزانے سے ادا کرتی ہے۔

امپورٹ ایکسپورٹ سبسیڈی: پٹرول فرٹیلائزر اور بعض مخصوص مصنوعات ملک میں درآمد کرنے کے لئے حکومت سبسڈی دیتی ہے۔ اسی طرح بعض مقامی مصنوعات کے برآمد کو فروغ دینے کے لئے حکومت ٹیکس وغیرہ میں کمی کر کے سبسڈی دیتی ہے۔

پرائیویٹائزیشن : رفاہی ریاست کے برعکس پرائیویٹ انٹرپرائز کو اس سے کوئی مطلب نہیں کہ آپ کی قوتِ خرید کیا ہے۔ وہ محض منفعت حاصل کرنے کی غرض سے مکمل تجارتی انداز میں صارفین کو اشیاے ضروریہ، تعلیم ،صحت اور کمیونیکیشن مختلف خدمات پوری قیمت کے عوض میں پیش کرتے ہیں۔ سرکاری بس میں دہلی سے آگرہ کا کرایہ لاگت کے حساب سے اگر دو سو روپے ہونا چاہیے لیکن عام آدمی اس کا متحمل نہیں تو کرایہ سو روپے طے کر دیا جاتا ہے مگر پرائیویٹ بس والے عام آدمی کی جیب کے سائز کو دیکھ کر کرایہ طے نہیں کرتے بلکہ لاگت کے ساتھ نفع مد نظر ہوتا ہے۔ گرچہ حکومت پرائیویٹ انٹرپرائز کو مناسب قیمت فیس یا سروس چارج کے لئے گائیڈ لائن دیتی ہے مگر عموماً اس کا خاطر خواہ نتیجہ برآمد نہیں ہوتا۔

کیا ہندوستان کے متوسط اور ادنیٰ طبقات پرائیویٹائزیشن کے متحمل ہو سکتے ہیں ؟

سہرسہ، مظفرپور کے مصراولیاء اور دربھنگہ کے برھی گاؤں میں ہوئی حالیہ فرقہ وارانہ کشیدگی میں مسلمانوں کے ساتھ پولیس نے جو ظالمانہ رویہ اپنایا ہےوہ نہ صرف قابل مذمت بلکہ انتہائی تکلیف دہ ہے، ان مقامات پرشرپسند عناصر کے ساتھ پولیس کی ملی بھگت سے فرقہ وارانہ کشیدگی میں بڑی تعداد میں بے قصور مسلم نوجوانوں کی گرفتاری عمل میں آئی اور دہلی و یوپی کے طرز پر دنگائیوں کے ساتھ پولیس نے مسلمانوں کے گھروں میں گھس کر بے رحمی سے مردوں کے ساتھ ساتھ خواتین کو بھی ظلم وتشدد کا نشانہ بنایا اور خوف ودہشت پھیلانے میں پولیس نے اہم کردار ادا کیا، اس لئے تحقیقات کے بعد فوری طور پر ان خاطی پولیس اہل کاروں کے خلاف سخت قانونی کارروائی کی جانی چاہیے تاکہ آئندہ کسی علاقہ میں پولیس ایسی جرأت اور غلطی نہ کرسکے –
پولیس ایسے مشکل حالات میں انسانی جان کے تحفظ اور فرقہ وارانہ ماحول کو بہتر بنانے کیلئے ہوتی ہے لیکن حالیہ کئی واقعات نے بہارکے پولیس افسران کی شبیہ کو داغ دار اور مشکوک بنادیاہے۔ مظفرپور کے مصراولیاء گاؤں میں کشیدگی کے بعد بہار کے اعلی حکام کی طرف سے مظلومین کو یہ یقین دہانی کرائی گئی تھی کہ جلد ہی ان قصور وار پولیس والوں کے خلاف قانونی کارروائی کی جائے گی اور بے قصور نوجوانوں کو رہا کردیا جائے گا لیکن ابھی تک اس یقین دہانی پرعمل نہیں ہوسکاہے جو بیحد افسوس ناک ہے۔ شمالی بہارمیں یکے بعد دیگرے فرقہ وارانہ کشیدگی اتفاق نہیں؛ بلکہ ایک منصوبہ بند سازش کا نتیجہ ہے۔ وزیراعلیٰ نتیش کمار ان واقعات کو ہلکے میں نہ لیں اور پولیس کے ساتھ جو لوگ بھی ان فسادات کے قصوروار ہیں، ان کے خلاف سخت سے سخت کارروائی کی جائے، ورنہ بہار میں ان فرقہ پرست طاقتوں کے حوصلے مزید بلند ہوجائیں گے اور اس سے پوری ریاست کو سخت نقصان پہنچ سکتا ہے۔
دربھنگہ میں فساد متاثرہ علاقے کے مقامی ایم ایل اے فرازفاطمی اور بہارکے مسلم رہنماؤں کی مجرمانہ خاموشی بھی معنی خیز ہے، کشیدگی کے بعد آپسی بھائی چارہ اور امن‌و شانتی کے نام پر قصورواروں کو بچانا سرکار اور ضلع انتظامیہ کی ناکامی اور بزدلی کی علامت ہے۔ علاقائی سطح پر جہاں بھی ایسے فسادات یا فرقہ وارانہ کشیدگی ہوتی ہے ،وہاں ضلع انتظامیہ اور مقامی تھانہ کو جب تک جواب دہ نہیں بنایا جائے گا ان جیسے واقعات کو روکنا نا ممکن ہے۔ بہارکے وزیراعلیٰ نتیش کمار، اعلی حکام اور ملی و سماجی اور سیاسی شخصیات کو چاہیے کہ وہ پے درپے رونما ہونے والے ایسے تشویشناک واقعات کا نوٹس لیں اور بہار کو فرقہ وارانہ فسادات سے روکنے کیلئے ٹھوس لائحہ عمل طے کریں ۔

نئی تعلیمی پالیسی پر تجزیہ اور تاثرات کا سلسلہ جاری ہے، میں نے بھی اس پالیسی کا مطالعہ کیا ہے، میں ابھی اس سے متعلق صرف مدارس کی تعلیم پر اپنے مطالعہ کو پیش کررہا ہوں۔

کئی حضرات نے نئی تعلیمی پالیسی کا جائزہ لیتے ہوئے تحریر کیا ہے کہ یہ پالیسی مدرسہ ایجوکیشن سسٹم پر خاموش ہے،کہیں بھی اس کا تذکرہ نہیں ہے،جبکہ دیگر سسٹمز کا ذکر ہے۔ میں نے بھی اپنے مطالعہ میں یہی پایا،اس کی وجہ کیا ہے؟ مطالعہ کے بعد میں اس نتیجے پر پہنچا کہ نئی تعلیمی پالیسی نے رائٹ ٹو ایجوکیشن قانون کو برقرار رکھا ہے،یعنی رائٹ ٹو ایجوکیشن باقی رہے گا اور اس کی دفعات میں ضرورت پڑنے پر پھیر بدل کیا جائے گا ؛تاکہ رائٹ ٹو ایجوکیشن قانون کے ساتھ نئی تعلیمی پالیسی کا نفاذ ہوسکے، رائٹ ٹو ایجوکیشن کا اعلان ہوا، تو اس میں مدارس شامل تھے۔ اس کی بہت سی دفعات مدارس کے لئے خطرناک تھیں ،اس پر ہر طرف سے آواز بلند کی گئی، تو بڑی پریشانیوں کے بعد حکومت نے مدرسہ ایجوکیشن سسٹم کو مستثنیٰ قرار دے دیا، چونکہ رائٹ ٹو ایجوکیشن قانون کے تحت مدارس مستثنیٰ ہیں، اس لیے نئی تعلیمی پالیسی میں مدارس کا ذکر نہیں ہے، کیونکہ مدارس کے سلسلے میں کوئی پالیسی وضع کرنے سے پہلے رائٹ ٹو ایجوکیشن قانون میں ترمیم کی ضرورت پڑتی اور یہ ایک مشکل کام تھا ،اس لئے نئی تعلیمی پالیسی میں اس پر خاموشی اختیار کی گئی ہے ،میرے خیال سے نئی تعلیمی پالیسی میں مدارس کا ذکر اسی وجہ سے نہیں کیا گیا ہے۔ ابھی تک یہی معاملہ ہے۔ اللہ سے دعا ہے کہ حالات اسی طرح برقرار رہیں، نئی تعلیمی پالیسی میں مدارس کا ذکر نہیں ہے،اس کو اسی تناظر میں لینے کی ضرورت ہے۔ اللہ ان اداروں کی ہر طرح حفاظت فرمائے۔

مسعود جاوید

آزادی کے بعد سے آج تک کسی بھی ملی تنظیم نے اوقاف کی جاگیروں کی بازیابی یعنی مسلم کمیونٹی کے مفادات فلاح و بہبود کے لئے ان جائیدادوں کے استعمال کے لئے مضبوطی سے کوشش نہیں کی۔ چند قرار داد پاس کر کے فرض کفایہ ادا کر دیا۔ اوقاف کی زمینوں پر شاپنگ مال، ملٹی پلیکس، صنعت کاروں کے محلات سرکاری دفاتر کی بلڈنگیں ہیں اور بہت سے اثر و رسوخ والوں کے تصرف میں ہیں۔
اوقاف کی جاگیروں میں تصرف کا کلی حق اگر ملت کو دیا جاۓ تو مسلمانوں کی تعلیمی اور معاشی زبوں حالی چند برسوں میں ختم ہو جائے گی۔ ان جاگیروں کی آمدنی سے منظم طور پر ضرورت مندوں کی کفالت کی جا سکتی ہے معیاری تعلیمی ادارے قائم کئے جا سکتے ہیں ووکیشنل ٹریننگ ، پروفیشنل کورسز اور کمپٹیشن ایکزامس کے لئے کمیونٹی کے بچوں اور بچیوں میں تعلیمی لیاقت پیدا کی جا سکتی ہے۔ مدارس دینیہ کی طرح قصبہ، گاؤں سے لے کر شہر تک معیاری ماڈل انگلش میڈیم اسکول کا جال بچھایا جا سکتا ہے جس میں اسلامیات بھی ایک سبجیکٹ لازمی ہو۔
اوقاف کی جاگیروں کو اپنے تصرف میں لے کر پروفیشنل طور پر ان میں انویسٹمنٹ کرایا جا سکتا ہے۔ مارکیٹ ریٹ پر لیز پر دیا جا سکتا ہے۔ اس کی آمدنی میں سے کمیونٹی کے افراد کو خیرات نہیں پروفیشنل میکانزم اپلائی کرتے ہوئے قرض دیا جا سکتا ہے۔ بلا سودی بینک قائم کیے جا سکتے ہیں ۔ اس کی آمدنی سے تجارت میں شراکت مرابحت اور دیگررائج حلال کاروبار میں پیسے لگائے جا سکتے ہیں۔ چیریٹیبل و سیمی چیریٹیبل ہاسپیٹل قائم کیے جا سکتے ہیں، مناسب چارج والے ملٹی اسپیشلٹی ہاسپیٹل اور نرسنگ ہوم ہر چھوٹے بڑے شہر میں کھولے جا سکتے ہیں۔ فرقہ وارانہ فسادات اور لاک ڈاؤن نے اس کی اشد ضرورت اہمیت اور افادیت کو اجاگر کیا ہے اس پر فوری توجہ کی ضرورت ہے۔
ہر جماعت اور جمعیت سیلاب سے متاثرہ افراد کے لئے ریلیف کا کام ہی کیوں کرے؟ عدالتوں میں قضیوں کی پیروی ہی کیوں کرے؟ ملی تنظیموں کے اغراض ومقاصد یکساں کیوں ہیں، کیا اس لئے کہ دیکھی بھالی پگڈنڈی پر چلنا آسان ہوتا ہے؟ اگر موجودہ ملی تنظیمیں نہیں تو ملی تنظیموں پر تنقید کرنے والے اس مقصد کے لیے اپنی تنظیم کیوں نہیں قائم کرتے ؟
اوقاف کی جاگیروں کا خرد برد اوقاف کے مسلم و غیرمسلم بعض افسران اور زمین مافیا کے نیکسس سے ہوتا ہے۔ علاقے کے افراد میں اگر بیداری ہو اور محاسبہ کی جرات کریں تو حرکت میں برکت ہے ۔ بات سرکاری دفاتر سے نکل کر سڑکوں تک پہنچے گی، چرچا کا وشے talk of the town ہونے کے بعد میڈیا کور کرنے کے لئے مجبور ہوگا۔