متفرقات

جامعہ ہمدرد نئی دہلی

گڑمار بوٹی (Gymnema sylvestre)

ایک قدیم جڑی بوٹی ہے جسے دنیا بھر میں ذیابیطس کے علاج میں مؤثر سمجھا جاتا ہے۔ اسے یونانی طب میں خاص مقام حاصل ہے اور یہ جنوبی اور وسطی ہندوستان، سری لنکا، افریقہ، اور آسٹریلیا کے جنگلوں میں عام پائی جاتی ہے۔

ماہیت (Botanical Characteristics)
گڑمار بوٹی ایک بیل نما پودا ہے جسے "شوگر ڈسٹروئر” بھی کہا جاتا ہے۔ یہ اپنے مخصوص ذائقے کو تبدیل کرنے والے خواص کی بنا پر مشہور ہے۔گڑمار کی جڑ چھوٹی انگلی جتنی موٹی، باہر سے ملائم اور سیدھی دھاریوں والی ہوتی ہے جبکہ ذائقہ میں نمکین یا تیز ہوتی ہے۔ اس کے پتے 1 سے 3 انچ لمبے اور 1/2 سے 1.5 انچ چوڑے، نوکدار اور چھوٹے ہوتے ہیں۔ یہ مدھیہ پردیش اور شمالی بھارت کے جنگلات اور باغوں کی جھاڑیوں میں عام ملتی ہے۔اس کے پتوں میں ایک خاص کیمیائی جزو جمناک ایسڈ پایا جاتا ہے جو میٹھے ذائقے کو عارضی طور پر بے اثر کر دیتا ہے۔ اس کے پتے ،جڑ اور بیج استعمال میں لائے جاتے ہیں۔

مزاج (Temperament)
گڑمار بوٹی کا مزاج گرم اور خشک بدرجۂ دوم ہے، اور یونانی طب میں اسے بلغم کو خارج کرنے اور جسم کے مختلف حصوں پر اثر انداز کرنے کی خصوصیات کے لیے استعمال کیا جاتا ہے۔

کیمیائی اجزاء (Chemical Constituents)
گڑمار بوٹی میں مختلف قدرتی اجزاء پائے جاتے ہیں جو ذیابیطس کے علاج میں مددگار ہیں، جیسے:
جمناک ایسڈ (Gymnemic Acid): خون میں گلوکوز کی سطح کو کم کرنے اور انسولین کی حساسیت کو بڑھانے میں معاون ہے۔
اینٹی آکسیڈنٹس: جسم سے آزاد ریڈیکلز کو خارج کرتے ہیں، جو جسمانی بیماریوں کے خلاف حفاظت فراہم کرتے ہیں۔
بیٹاامائیرین (Beta-Amyrin)، سٹگماسٹرول (Stigmasterol)، اور لوسیرپین (Lupeol): یہ اجزاء بھی صحت کو بہتر بنانے میں مدد کرتے ہیں اور جسم کو بہتر بنانے میں اہم کردار ادا کرتے ہیں۔

افعال (Pharmacological Actions)
یونانی طب کے مطابق گڑمار بوٹی کی افادیت درج ذیل ہے:
دافع شوگر: خون میں شوگر کی سطح کو کم کرتی ہے۔
مدربول: جسم میں اضافی پانی کو خارج کرنے میں معاون۔
مقوی جگر و گردہ: جگر اور گردے کو مضبوط بناتی ہے۔
ملین: نظام انہضام میں بہتر کارکردگی فراہم کرتی ہے۔
مدافعتی نظام کو مضبوط بنانا: جسم کی مدافعت کو بڑھاتی ہے۔

طبی افادیت اور ذیابیطس پر اثرات (Medicinal Benefits in Diabetes)

1- خون میں گلوکوز کی سطح کو کم کرنا:
گڑمار بوٹی میں موجود جمناک ایسڈ خون میں گلوکوز کی سطح کو کم کرنے میں اہم کردار ادا کرتا ہے۔ یہ جسم میں کاربوہائیڈریٹس کے جذب کو روکتا ہے، جس سے شوگر کی سطح میں کمی آتی ہے اور انسولین کی حساسیت میں اضافہ ہوتا ہے۔

2- انسولین کی پیداوار میں اضافہ:
یہ بوٹی لبلبہ (پینکریاس) کے بیٹا سیلز کو فعال کرتی ہے، جس سے انسولین کی پیداوار میں اضافہ ہوتا ہے۔ اس کے نتیجے میں خون میں گلوکوز کی سطح کم ہوتی ہے اور شوگر کے مریضوں کے لئے فائدہ مند ثابت ہوتی ہے۔

3- ذائقہ اور میٹھے کی خواہش کو کم کرنا:
گڑمار بوٹی کا ایک منفرد اثر یہ ہے کہ یہ زبان پر موجود میٹھے ذائقے کو عارضی طور پر بے اثر کر دیتی ہے۔ اس کے استعمال سے ذیابیطس کے مریضوں میں میٹھا کھانے کی خواہش میں کمی آتی ہے، جس سے شوگر کی سطح کو کنٹرول میں رکھنے میں مدد ملتی ہے۔

4- وزن میں کمی:
یہ بوٹی میٹابولزم کو تیز کرتی ہے، جس سے وزن میں کمی ممکن ہوتی ہے۔ یہ خاص طور پر ٹائپ 2 ذیابیطس کے مریضوں کے لیے مفید ہے، جنہیں وزن کی زیادتی کی وجہ سے مسائل کا سامنا کرنا پڑتا ہے۔
5- اینٹی آکسیڈنٹ خصوصیات:
گڑمار بوٹی میں موجود اینٹی آکسیڈنٹس جسم میں آزاد ریڈیکلز کو ختم کرتے ہیں اور جسم کو اندرونی سوزش سے محفوظ رکھتے ہیں، جو کہ ذیابیطس کے مریضوں میں عمومی صحت کے لیے ضروری ہے۔

مواقع اور دیگر استعمالات (Other Medical Applications)
ہاضمے کے مسائل: گڑمار بوٹی پیٹ کی سوزش کو کم کرتی ہے اور ہاضمے کے مسائل میں آرام پہنچاتی ہے۔
کولیسٹرول میں کمی: یہ خون میں کولیسٹرول کی سطح کو کم کرنے میں مدد کرتی ہے، جو دل کی صحت کے لیے مفید ہے۔
مدافعتی نظام کو تقویت دینا: گڑمار بوٹی جسم کی مدافعت کو بڑھاتی ہے، جس سے جسم مختلف بیماریوں سے محفوظ رہتا ہے۔

ترکیب استعمال (Method of Use)
1- پاؤڈر کی شکل میں:
گڑمار بوٹی کا پاؤڈر پانی یا دودھ کے ساتھ روزانہ استعمال کیا جا سکتا ہے۔ یہ پاؤڈر شوگر لیول کو کنٹرول کرنے میں مددگار ثابت ہوتا ہے۔
2- کیپسول یا ٹیبلٹ کی شکل میں:
یہ بوٹی کیپسول یا ٹیبلٹ کی شکل میں بھی تیار کیا جاسکتا ہے، جس سے اس کا روزانہ استعمال آسان ہوجائے ہے۔

3- چائے کی صورت میں:
گڑمار بوٹی کے پتوں کو پانی میں ابال کر چائے کی صورت میں پیا جا سکتا ہے، جو ذیابیطس اور نظام ہضم کے لیے مفید ثابت ہوتی ہے۔

احتیاطی تدابیر (Precautions)
گڑمار بوٹی کا زیادہ استعمال شوگر لیول کو غیر معمولی طور پر کم کر سکتا ہے، لہٰذا اس کے استعمال سے پہلے کسی طبیب سے مشورہ کرنا ضروری ہے۔
حاملہ خواتین اور دودھ پلانے والی ماؤں کو اس کا استعمال احتیاط سے کرنا چاہیے۔
ذیابیطس کے مریض جو انسولین یا دیگر دوائیں استعمال کر رہے ہیں، انہیں اس کا استعمال کرنے سے پہلے اپنے معالج سے مشورہ کر لینا چاہیے۔

خلاصہ
گڑمار بوٹی ذیابیطس کے مریضوں کے لیے ایک قدرتی اور موثر علاج کے طور پر سامنے آئی ہے۔ اس میں موجود جمناک ایسڈ اور دیگر اجزاء خون میں گلوکوز کی سطح کو کم کرنے، انسولین کی حساسیت کو بڑھانے، اور شوگر کی خواہش کو کم کرنے میں اہم کردار ادا کرتے ہیں۔ یونانی طب میں اسے ایک قدیم اور مفید جڑی بوٹی مانا جاتا ہے اور اس کے باقاعدہ استعمال سے ذیابیطس کے مریضوں کو قدرتی علاج کے ذریعہ شوگر لیول کو قابو میں رکھنے میں مدد مل سکتی ہے۔

حوالہ
1۔ "معرف Gymnema sylvestre دائراۃ المعارف لائف سے ماخوذ” eol.org۔ اخذ شدہ بتاریخ 29 ستمبر 2024ء
2۔خواص الادویہ از۔ ڈاکٹروحکیم نصیر احمد طارق
3۔جڑی بوٹیوں کاانسائیکلو پیڈیا از: حکیم و ڈاکٹرہری چند ملتانی

میڈیکل سائنس کے مطابق انسان کی آدھی صحت کا دارومدار Oral Hygiene یعنی منہ کی صفائ و درستگی پر ہے۔ یہی وجہ ہے کہ آپ دیکھتے ہیں کہ میڈیسین کے عام کورس کے متوازی دانتوں کا بھی ایک مکمل کورس (BDS, MDS) ہوتا ہے، جبکہ گریجویشن سطح پر آپ کو جسم کے کسی اور حصے پر کوئ ایسا مخصوص کورس نہیں ملے گا۔۔۔۔۔۔ آپ کو کئ مذاھب مل جائیں گے جہاں صحت کیا، صفائی ستھرائی تک ضروری نہیں۔ حد تو یہ ہے کہ بعض کے ہاں سالہا سال نہ نہانا، بالوں ناخنوں کو نہ کاٹنا جیسی چیزیں اور انکی عبادت گاہوں میں ننگے و گندے رہنا بھی بھی عین دھرم ہیں۔ اسلام کی خوبصورتی ہے کہ اس نے نہ صرف طہارت و صفائ ستھرائی کو نصفِ ایمان کا درجہ دیا اور ہمیں مساجد میں با زینت جانے کا مکلف بنایا، بلکہ یہ جانتے ہوئے کہ اورل ہائجین کا انسانی صحت کی حفاظت میں بہت بڑا کردار ہے، مسواک کے استعمال کو منہ کی طہارت و صفائ کے ساتھ رب کی رضا کا ذریعہ بھی بتادیا۔۔۔۔ “السواك مطهرة للفم، مرضاة للرب”۔ ۔۔۔۔۔ نہ صرف میڈیکل سائنس میں بلکہ چودہ سو سال قبل کے اسلام میں اورل ہائجین اس قدر اہم تھی کہ اللہ کے رسول صل اللہ علیہ وسلم نے یہاں تک فرمادیا کہ “لولا أن أشق على أمتي لأمرتهم بالسواك مع كل وضوء” ۔۔۔ مجھے امت کی مشقت کا خیال نہ ہوتا تو ہر وضوء کے ساتھ مسواک کو لازمی قرار دے دیتا۔

رمضان ہے، کم و بیش تمام ہاتھوں میں مسواک موجود ہوتی ہے، نیم کی ہو یا اراک کی۔ ۔۔۔۔۔ عرب ممالک میں استعمال ہونے والی مسواک اراک یعنی Salvadora Persica ہوتی ہے، جبکہ ہمارے ملکوں میں نیم یعنی Azadirachta Infica کو مسواک کے لیے استعمال کیا جاتا ہے۔

رمضان میں مسواک کا استعمال کیوں زیادہ ہے اسکی ایک بنیادی وجہ ہے۔ منہ میں کوئی غذا نہ پہونچنے کے سبب تھوک / Saliva کم بنتا ہے، اس تھوک میں جراثیم کو مارنے کی صلاحیت موجود ہوتی ہے۔ جب تھوک کم ہونے کے سبب جراثیم مر نہیں پاتے تو وہ منہ کے اندر بدبو کا سبب بنتے ہیں۔ مسواک انہیں جراثیم کو مارنے اور منہ کی بدبو دور کرنے کا کام کرتا ہے۔

زیادہ تر ریسرچیز سے یہ ثابت ہے کہ مسواک کی افادیت کسی بھی مصنوعی ٹوتھ پیسٹ سے زیادہ ہوتی ہے۔ تحقیق کاروں کے نتائج کے بموجب مسواک میں درج ذیل بنیادی اشیاء پائی گئی ہیں جو کہ اورل صحت کے لیے مفید ہیں۔

۱۔ Silica: یہ دانتوں پر لگے اسٹین / داغ اور جمے ہوئے plaque کو کھرچ کر نکالنے کا کام کرتا ہے۔

۲۔ Tanins / Tanic Acid: یہ مسوڑھوں کے ورم یعنی Gingivitis کو کم کرتا ہے۔

۳۔ Resins: یہ دانتوں کی سطح پر ایک حفاظتی کَوچ بناکر انہیں Dental Caries سے محفوظ رکھتا ہے۔

۴۔ Alkaloids: اسمیں Anti fungal اور Bactericidal صلاحیت ہوتی ہے، یعنی بیکٹیریا اور فنگس کو مار کر یہ دانتوں اور مسوڑھوں کو جراثیمی امراض سے بچاتا ہے۔

۵۔ Essential oils: اس کا کام ایک خاص قسم کی اچھی بُو پیدا کرنے کے ساتھ ساتھ جراثیم کو مارنے اور تھُوک / Saliva کی پیدائش میں اضافے کا بھی ہوتا ہے۔

۶۔ Sulphur: اس میں امراض کا باعث بیکٹیریا کو مارنے کی صلاحیت ہوتی ہے۔

۷۔ Vitamin C: یہ مسوڑھوں کے زخم بھرنے اور اورام کو دور کرنے میں معاون ہوتا ہے۔

۸۔ Calcium: یہ دانتوں سے کیلشیم کی کمی کو دور کرتا ہے۔

۹۔ Flouride: یہ Anticariogenic کے طور پر کام کرتا ہے، یعنی دانتوں کو سڑنے گلنے سے محفوظ رکھتا ہے۔

۱۰۔ Chloride and Flavonoids: یہ دانتوں میں کیکولس بننے کو روکتا ہے۔ اور نقصاندہ خراب خلیات کو ختم کرنے کا کام کرتا ہے۔

تلك عشرة كاملة!

جب سے کارپوریٹس نے تعلیم اور صحت کے میدان میں انویسٹمنٹ کرنا شروع کیا ہے پرائیوٹ اسکولوں اور ہسپتالوں میں تعلیم اور علاج کافی مہنگے ہو گئے ہیں۔

گرچہ ابھی تک ہمارا ملک عزیز ایک رفاہی ریاست ہے جس کی بنیادی ذمے داری عام لوگوں کو تعلیم، علاج، بجلی ، پانی ، سڑک اور ادنیٰ طبقات کی قوت شرا کو مدنظر رکھتے ہوئے پبلک ٹرانسپورٹ اور دیگر سہولتیں مہیا کرانا ہے لیکن یہ خصوصیات ایک سوشلسٹ ریاست کی ہیں اور ہمارا ملک اب کیپیٹلسٹ اسٹیٹ ہونے کی طرف گامزن ہے۔

پرائیوٹ اسکول کو نہ جانے کیوں پبلک اسکول کہا جاتا ہے !

ان اسکولوں میں فیس اور اس کے ساتھ کے لوازمات جیسے نصاب کی کتابیں، اسکول، بیگ اور یونیفارم وغیرہ ان اسکولوں سے ہی خریدنے کے لیے والدین کو مجبور کیا جاتا ہے۔ ظاہر ہے بازار سے زیادہ قیمت یا فرضی ایم آر پی پر یا بازار کے برعکس ،کسی ڈسکاؤنٹ کے بغیر ۔ یہ سارے مالی منفعت کے کام اسکول انتظامیہ کرتا ہے صرف ٹیوٹر کی تقرری آپ کے لیے چھوڑا جاتا ہے۔

پرائیوٹ ہسپتالوں کا معاملہ اور بھی ابتر ہے وہ اس طرح کہ گرچہ سرکاری ہسپتالوں اور ان کے کام چور کرمچاریوں کے برعکس پرائیوٹ ہسپتال زیادہ منظم ، صاحب ستھرا اور آپ کا استقبال کے لیے مستعد عملہ فائیو اسٹار نہیں تو کم از کم تھری اسٹار ہوٹلوں جیسی سروسز دیتے ہیں لیکن ان کے عوض وہ خطیر رقم بھی وصول کرتے ہیں۔‌

جب سے حکومت نے مختلف طبقات کو انشورینس کارڈ ایوشمان اور پرائیوٹ کمپنیوں اور کارپوریٹس نے اپنے عملہ کو انشورینس کوریج دینا شروع کیا ہے اس وقت سے ان پرائیوٹ ہسپتالوں نے اپنا اعلیٰ نرخ اسی کے مطابق طے کر رکھا ہے اور وہ چاہتے ہیں کہ ان کے یہاں بغیر انشورینس کوریج کا کوئی مریض نہ پہنچے ۔ اگر پہنچتے ہیں تو ان سے بھی وہی خطیر رقم وصول کی جاتی ہے۔

خط افلاس پر یا اس سے نیچے اوپر والے، جن کے پاس آیوشمان کارڈ ہے یا جو سرکاری یا کارپوریٹ کمپنیوں میں ملازمت کرنے کی وجہ سے انشورینس کوریج اسکیم کے حصے ہیں، کے علاوہ جو طبقات ایسی کسی اسکیم کا جز نہیں ہوتے ہیں ان کے لیے پرائیوٹ ہسپتالوں میں علاج کرانا کافی مہنگا ہوتا ہے ۔

اس لیے ایسے لوگوں کو میڈیکل انشورنس کرا لینا چاہیے ۔ علاج کوئی بلیٹ ٹرین کا سفر نہیں ہے کہ آپ چاہیں تو اس مہنگی ٹرین میں سفر کریں یا عام ریل گاڑی میں۔ اچھا علاج کے لیے بہر حال آپ کو اچھے ہسپتال جانا ہوگا اور اس کے اخراجات کے لیے ان ہسپتالوں میں رائج روش کے مطابق انشورینس کرانا ہوگا تاکہ اس انشورینس کمپنی سے آپ میڈیکل کلیم لے سکیں۔ اس کے لیے آپ کو کچھ کرنا نہیں ہوتا ۔‌ ہر پرائیوٹ ہسپتال میں اس کا باضابطہ دفتر یا کاؤنٹر ہوتا ہے وہ آپ کی ساری کارروائی پوری کرتا ہے کیا خرچ ہوگا آپ کو ٹینشن لینے کی ضرورت نہیں ہے آپ بس علاج کرائیں ۔

ریختہ کے تناظر میں بعض لوگوں کے شکوے کو رسم الخط سے جوڑنا خلط مبحث ہے۔ ایک دور میں دھارمک گرنتھوں کو پڑھنے پڑھانے پر برہمنوں کی اجارہ داری تھی ۔ غیر برہمنوں کو پڑھنے کی اجازت تھی اور نہ سننے کی ۔ سننے والوں کے کانوں میں پگھلا ہوا سیسہ ڈال دیا جاتا تھا ۔

(اجارہ داری شاید عام فہم زبان نہیں اس لیے اس کی وضاحت شاید مطلوب ہو۔ اس کا ترجمہ ہندی میں एकाधिकार اور انگریزی میں monopoly ہے)

جو اردو رسم الخط جانتا ہو کیا صرف اسی کو اردو زبان وادب سے محظوظ ہونے کا حق ہو گا !

آج دہلی کی کئی یونیورسٹیوں میں تقریباً ٥٠٠ غیر مسلم طلباء وطالبات جوان بوڑھے بچے لڑکے اور لڑکیاں اردو جاننے کے شائقین ڈپلومہ اور سرٹیفیکیٹ کلاسز میں تعلیم حاصل کرتے ہیں اور بے شمار غیر مسلم آن لائن سیکھتے ہیں ۔ اردو غزلوں کی بے شمار مجموعے دیوناگری اور رومن میں مختلف ناشروں نے شائع کیا ہے۔ اردو زبان کی شیرینی سے متاثر بہت سے غیر مسلم اردو غزل کی تخلیق میں طبع آزمائی کرتے ہیں ۔ یہ اردو زبان کی مقبولیت کے شواہد ہیں ۔ کیا ان پر پابندی لگائی جا سکتی ہے !

عربی زبان سے نابلد خليجی ممالک میں روزگار کے لیے جانے والوں کے لیے ہندوستانی اور عرب یونیورسٹیوں میں باضابطہ اللغه العربيه لغير الناطقين بها کا ڈپلومہ اور سرٹیفیکیٹ کورس کرایا جاتا ہے۔ عموماً انہیں عربی لکھنا اور پڑھنا بھی سکھایا جاتا ہے لیکن ایگزیکٹیو کلاس کے لوگ صرف بولنا سیکھتے ہیں ۔ وہ اپنے اپنے رسم الخط میں نوٹ کرتے ہیں ۔

کیا اس سے عربی زبان کو کوئی خطرہ ہے ! ظاہر ہے نہیں ۔

رسم الخط پر خطرہ اردو کے کلیات اور مجموعۂ کلام کو دیوناگری اور رومن میں شائع کرنے سے نہیں اپنی نسل کو اردو کی تعلیم سے محروم رکھنے سے ہے۔ ساڑھے تین اور چار برس کے بچوں کو معیاری تعلیم کے لیے انگلش میڈیم پلے اسکول ، کانونٹ ، مڈل اسکول اور ہائی اسکول میں تعلیم دلانا قابلِ ستائش تو ہے لیکن اپنی مادری زبان اردو کے لیے خصوصی اتالیق کا نظم نہیں کرنے یا اردو مکاتب میں اسکول کے اوقات کے بعد گھنٹہ دو گھنٹے کے لیے نہیں بھیجنے سے خطرہ ہے۔

آج حال یہ ہے کہ مساجد کے اعلانات بھی دیوناگری میں لکھے جاتے ہیں ۔ مثال کے طور پر : मीनार मस्जिद में तरावी दस बजे। , ایک تو دیوناگری میں لکھنا اور دوسرا تلفظ تراویح کی بجائے تراوی!

جامعہ نگر خالص مسلم علاقہ ہے یہاں ہر طرف بینر پوسٹر نیون سائن، اشتہارات اور بورڈ وغیرہ ہندی یعنی دیوناگری رسم الخط میں لکھے ہوئے ملیں گے کیا یہ لوگ اردو رسم الخط کے دشمن ہیں ؟ ظاہر ہے نہیں ۔ دشمن وہ لوگ ہیں جو اس نسل کو اردو رسم الخط سیکھنے سے محروم رکھا‌ ‌ ۔ جنہوں نے پرائمری اور مڈل اسکولوں میں اردو معلم کی تقرری کا مطالبہ نہیں کیا ۔ جنہوں نے مالی وسعت کے باوجود خصوصی اتالیق رکھ کر اپنے بچوں کو اردو پڑھانے کا نظم نہیں کیا ۔ اردو زبان وادب اور اردو رسم الخط کے دشمن وہ سیاسی لیڈران ہیں جنہوں نے ریاست کی دوسری زبان اردو تسلیم کرانے کی جدوجہد نہیں کی اور اردو کو بطور سبجیکٹ اسکولی نصاب میں شامل نہیں کرایا۔ دشمن وہ بھی ہیں جو اردو کے مشہور معروف ادیب، صحافی، شاعر ، پروفیسر ہیں مگر ان کے بچے اردو لکھنے پڑھنے سے قاصر ہیں۔ کتنے ایسے ادباء شعراء اور پروفیسر حضرات ہیں جن کے گھروں کی لائبریریوں میں نادر و نایاب کلاسیکی ادب کے شہ پارے اور مختلف موضوعات پر اردو کتب ہیں مگر ان کا کوئی اردو داں وارث نہیں ہے ۔ ان کی وفات کے بعد ان کے بچوں نے کتابوں کے ذخیرے کو کباڑی سے بیچ دیا اس کے شاہد میرے ایک صحافی دوست ہیں ۔

بیچارے دانش بھائی رات بھر سو نہیں سکے۔ کیسے سوتے، کیسے نیند اتی۔ زمانہ سے عوامی خدمت گار بنے ہوئے تھے، دیش کے سب سے بڑے آئینی ادارے کے ممبر ہیں۔ سنویدھان کے اس مندر میں بیٹھتے ہیں، جس کی سیڑھیوں پر چڑھنے سے پہلے وشو کے گرو ماتھا ٹیک کر یہ پیغام دے چکے ہیں کہ بھارت کا وقار اسی سنسد کے احترام میں پوشیدہ ہے۔ اسی مندر میں انہیں کٹوا، ملا، اگروادی اور اتنکوادی جیسے غیر پارلیمانی زبان سے نوازا گیا۔ بیچارے رو ہی سکتے ہیں، کچھ کر نہیں سکتے۔ وہ کیا ان کی پوری کمیونٹی کچھ نہیں کر سکتی۔ انہیں سمجھنا چاہئے کہ یہ نیا بھارت ہے، کوئی انڈیا یا ہندوستان نہیں، جہاں تہذیب، احترام، عزت اور لحاظ کی پاسداری ہوتی تھی۔

جو ہوا وہ حیرت ناک تو بالکل نہیں ہے جو اسے حیرت انگیز سمجھ رہے ہیں انہیں یاد رکھنا چاہئے کہ اسی مندر میں ایک سادھوی بھی بیٹھتی ہے جس پر اجمیر بم دھماکہ میں ملوث ہونے کا الزام ہے اور وہ خرابی صحت کے بہانے نہ صرف پیرول پر رہا ہے بلکہ سنسد کی ممبر بھی ہے۔ اسی مندر میں وہ بھی موجود ہے جس نے کھلے عام مسلمانوں کو گولی مارنے کا حکم نامہ جاری کیا تھا۔ اور ایسے نہ جانے کتنے ہیں جو ہندوستانی مسلمانوں کو غدار پکارنے کی سپاری لے چکے ہیں۔ خود ہوم منسٹر اور وشوگرو مسلمانوں کو اذیت ناک ناموں سے پکار چکے ہیں ایسے میں ودھوری کو عوام کے ذریعہ چنا ہوا سانسد کٹوا یا آتنک وادی کہتا نظر آتا ہے تو اس میں حیرت کی کیا بات ہے۔

نیا بھارت ہے، نئی ہوا ہے، نئی فضا ہے، پرانی سوچ پر نیا لیبل لگا ہے۔ یہ سب تو ہوتا ہی رہے گا اور کوئی یہ بھرم نہ پال لے کہ ودھوری پر کوئی کارروائی ہوگی بلکہ اس کے الٹ یہ سوچ لینا زیادہ بہتر ہوگا کہ اس کے عہدہ میں اضافہ ہوگا۔ ایسے کئی معاملہ میں مزید نوازنے کا مظاہرہ ہو چکا ہے۔

دانش کی اصل غلطی تو یہی ہے کہ وہ سانسد کیوں ہیں۔ جب حکومت والی پارٹی نے مسلم نام والے کسی شخص کو الیکشن میں ٹکٹ نہ دینے کا رواج قائم کر دیا ہے۔ 80/20 کے تناسب میں ووٹ دینے کی اپیل کر دی ہے تو ان کا مان رکھنا چاہئے۔ دوسری پارٹی سے سانسد بننے اور سنسد میں منہ کھولنے کی سزا تو ملے گی ہی، سو وہ ملی۔ اب روئیے یا نیند کو ترسئیے۔ دانش صاحب جو آپ کے ساتھ ہوا وہ بھارت کے مسلمانوں کے ساتھ روز کہیں نہ کہیں کسی مقام پر ہوتا رہتا ہے۔ اور جس کے ساتھ ہوتا ہے وہ یا تو ابدی نیند سوجاتا ہے یا پھر آپ ہی کی طرح سونے سے بھی ڈر جاتا ہے۔

اپنی رہنما مایاوتی سے کہئے کہ اگر وہ اپنے کیڈر ووٹروں کو بھی بی جے پی کو ووٹ دینے سے نہیں روک پاتی ہیں تو مذمتی بیانات کیا معنی رکھتا ہے۔ سوچئے آپ لوگ، رہنما ہیں ہم سب تو جنتا ہیں اور جنتا کا کیا، کوئی بہلا دے، کوئی پھسلادے، کوئی بہکا دے، کوئی گالی دے دے۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)

ایک دانشور کا خیال ہے کہ "ائمہ اربعہ و حئ ربانی یعنی قرآن کی راہ کا پتھر ہیں”۔

انکا یہ خیال ائمہ اربعہ پر ایک ایسا سنگین ترین الزام ہے جسکی کوئی تک نہیں۔ یہ الزام ہمارے ان محسنین کے ساتھ ظلم عظیم ہے۔ انہوں نے جو کام کر دیا اسکا کوئی بدل نہیں۔ انہوں نے وحیء ربانی کا راستہ کیسے روک دیا ؟ انہوں نے تو شریعت پر عمل آسان کر دیا۔ انہوں نے خدمت اسلام کی ہے۔ اور اس اخلاص کا مظاہرہ کیا ہے جس کی نظیر نہیں ملتی۔

دانشور صاحب کو لکھنا ہی تھا تو یہ لکھنا چاہیے تھا کہ وحئ ربانی تک رسائی تو آج بھی آسان ہے۔ صرف ارادے، کوشش اور اخلاص کی ضرورت ہے۔

البتہ اس طرح کا کوئی الزام لگ سکتا ہے تو وہ ان علما اور مدارس پر لگ سکتا ہے جن کے نصاب تعلیم میں قرآن مجید تزکیے کی آسمانی کتاب کے طور پر نہیں بلکہ صرف اور صرف فقہی و مسلکی تفوق کے لیے ‘مستعمل’ ہے۔ وہاں طلبا کو قرآن اس طرح اور اس لیے نہیں پڑھایا جاتا کہ وہ قرآن کا مطلوب انسان بن سکیں بلکہ اس طرح اور صرف اس قدر پڑھایا جاتا ہے جس سے وہ مسلک پرست قاضی اور روایت پرست محدث بن کر اپنے مسلک و منہج کے سپاہی بن سکیں۔

وحئ ربانی کی راہ کا اصل پتھر وہ "اہل سنّت” علما ہیں جو اپنے اکابر کے افکار و نظریات کو قرآن و سنّت پر ترجیح دینے کا جرم عظیم کرتے ہیں۔ نہ قرآن سمجھتے ہیں نہ سمجھاتے ہے، نہ پڑھتے نہ پڑھاتے ہیں۔ بلکہ اپنے من پسند بزرگوں کے قصوں اور کہانیوں پر اپنے دین و عقائد کی بنیاد رکھتے ہیں۔

و حئ ربانی کی راہ کا پتھر وہ روایت پرست علما ہیں جو خود کو "اہل حدیث” کہتے ہیں اور روایات کو قرآن پر مقدم رکھنے کا گناہ کبیرہ کرتے ہیں۔

وحئ ربانی کی راہ کا پتھر وہ شدّت پسند "اہل قرآن” ہیں جو قرآن کو حدیث رسول اور سنّت رسول کے بغیر سمجھنے کے پاگل پن میں مبتلا ہیں۔ اور قرآن کی باالرائے تفسیر کر کے سیدھے سادے لوگوں کو گمراہ کرتے ہیں۔

ان کے علاوہ ہر وہ شخص خود اپنے اور وحئ ربانی کے بیچ کا پتھر ہے جسے اک قرآن کے علاوہ سب کچھ جان لینے اور سب کچھ سمجھ لینے کی خواہش بھی ہے اور عقل بھی۔ اس کے بھیجے میں یہ بات کہاں سے آ گئی کہ وہ سب کچھ سمجھ سکتا ہے صرف "قرآن نہیں سمجھ سکتا” ؟ اسے یہ اطمینان کس نے دلا دیا ہے کہ اللہ کی کتاب کو دنیا میں ‘رد’ کر کے وہ آخرت میں بچ جائے گا ؟ آخر وہ اس کتاب کے ‘مصنف’ کو کیا جواب دے گا جس نے اسے وجود بخشا اور پھر اسی وجود کو سنوارنے اور نکھارنے کے لیے یہ کتاب دی تھی ؟

اللہ کی اسکیم میں یہ بات ایک دم واضح ہے کہ ایک سچے طالب حق کے لیے بشرطیکہ وہ خود غافل نہ ہو اور کمزور نہ پڑے، کوئی اس کے اور اسکی طلب ہدایت کے بیچ سد راہ نہیں ہو سکتا !

یاد رکھیں ! جس دن آپ نے ہدایت کی تڑپ رکھتے ہوئے وحئ ربانی کو ہاتھوں میں پکڑ لیا اور اسکی راہ لگ گئے اس دن آپ خود کو نہ "اہل سنّت” کہیں گے نہ "اہل حدیث” کہیں گے اور نہ "اہل قرآن”۔ آپ سمجھ جائیں گے کہ آپ صرف مسلمان ہیں کیونکہ آپ کا نام اللہ نے "مسلمان” رکھا ہے۔

دھیان رکھیں ! قرآن کا پہلا مفسر خود اللہ ہے، اسکی عملی تفسیر رسول اللہ صل اللہ علیہ وسلم ہیں، لہذا اللہ کا نام لیکر اپنی زبان میں موجود کسی بھی ترجمے والا قرآن ہاتھ میں تھامیں اور ساتھ میں سیرت رسول اللہ کو پکڑ لیں۔ قرآن کا ایک ترجمہ، پھر دوسرا ترجمہ، پھر تیسرا۔ اس طرح چند سالوں میں ہی ایک دن ایسا آ جائے گا جب آپ کے اور وحئ ربانی کے درمیان کسی تیسرے ‘مفسر’ کی آپ کو ضرورت ہی محسوس نہ ہوگی۔

خود سوچئے ، کیا اس کام کے لیے عمر کے چند سال آپ نہیں دے سکتے؟ رہی بات قرآن کے ذریعہ تزکیۂ نفس کی تو یہ کام تو آخری سانس تک کا ہے۔ قرآن سے ایک مومن صادق کا تعلق آخری سانس تک ہوتا ہے۔ ایک دو بار ترجمے کے ساتھ پڑھ لینے کا نہیں۔

یہ ذہن نشیں رہے کہ آپ کو ‘مفسر’ بننے کی حاجت نہیں ہے بلکہ اصلاً قرآن کا وہ قاری بننے کی ضرورت ہے جس کے ضمیر پہ نزول کتاب ہو سکے !

ترے ضمیر پہ جب تک نہ ہو نزولِ کتاب

گِرہ کُشا ہے نہ رازی نہ صاحبِ کشّاف

بس یہی مقصد ہونا چاہیے تفہیم قرآن کی کوششوں کا۔ پھر دیکھیں جاہل مولویوں، گمراہ دانشوروں اور نام نہاد بزرگوں اور ولیوں سے یہی قرآن آپ کی کیسے حفاظت کر تا ہے ۔ اور کس طرح یہی قرآن آپ کی زندگی کو پاکیزہ اور ہر اعتبار سے خوشحال بناتا ہے۔ آپ کی زندگی کو با مقصد بنا کر خوبصورت اور پر مسرت بناتا ہے۔ اور کس طرح یہی قرآن قبر سے لیکر حساب کتاب کے دن تک آپ کا وکیل بنتا ہے۔

اللہ کریم ہم سب کا حامی و ناصر ہو، شیطان رجیم سے ہماری حفاظت فرماۓ اور ہمیں سایۂ قرآن میں زندگی گزارنے کی توفیق و استطاعت دے !!!

شاید تم اس تک بہت دن بعد پہنچو۔۔۔ سو میں بھی اپنی ڈائری اپنی آپ بیتی سے بھر رہا ہوں۔ تو یہ میرے لیے بھی کہا گیا ہے۔ کہیں پڑھا تھا، تخلیق کار کبھی بھی کسی خیال کے تئیں نہیں، اس وقت کے سماج کے تئیں گواہ ہوتا ہے، جس میں وہ رہ رہا ہے۔ اسے میرے تنہائی کی بستی کا انسان ہی تصور کرنا۔

ہم تخلیق میں کتنے ہی نجی ہوں اور کتنے سماجی، یہ ہمارا انفرادی عمل ہے۔ ہم نہیں چاہتے کہ کہیں سے کوئی آکر ہمیں سند تفویض کرے۔ یہ ادارہ جاتی ہونے جانے کی سہولت کے بالکل الگ ہے۔ ہر خیال، نظریہ، فکر، ایسے ہی ایک ’ادارہ‘ ہے، جس کے اپنے بنے بنائے ڈھانچے ہیں۔

ہم ان میں ڈھلنے کو تیار نہیں ہیں۔ اب تو قطعی نہیں۔ یہ ہمارا حق ہے۔ یہ ٹھیک ہے کہ اپنے ماضی کے دنوں میں ہم نے سماجی اقدار کو دھیان میں رکھ کر لکھنا شروع کیا، مگر آج بالکل ابھی۔ اگر اس کی کسوٹی پر مجھے ’نہ‘ کہہ دیا جائے تو مجھے کوئی پریشانی نہیں ہوگی۔

جس نظریے یا فکر سے متاثر ہوکر وہ تخلیق کو ’’پونجی واد‘‘ سے لڑنے کا ہتھیار قرار دے رہے ہیں۔ اس فکر سے الگ یہ اکیلے ہوتے جانا کم زوری نہیں ہے۔ ہم اس دور کی حکومت، نظم ونسق اور اس میں خرابی کا حصہ نہیں ہیں۔ ہماری تنہائی اس کے خلاف بر سرپیکار ہے۔

جہاں اس دنیا کے سارے سکون ثابت ہوتے جا رہے ہیں، وہیں کہیں ہم بھی چھپے اور دبے لہجے میں اپنی بات کہہ رہے ہیں۔ بھلے ہمارا طریقۂ کار الگ ہو۔ یہ انفرادیت کا پیش کردہ طریقۂ کار نہیں ہے۔ یہ نظریۂ فکر کے مطابق سمٹ جانے کا انکار ہے۔

ہم ان کئی تخلیق پاتے نظریہ سازوں کے رویہ جات کو سمجھتے کی کوشش کررے ہیں۔ ہماری تقسیم کا طریقۂ کار ویسا نہیں ہے۔ یہ کسی بھی طرح سے تبدیلی کی طرف جھکنے والا نظریہ نہیں ہے، بلکہ یہ فکری بنیادوں پر انتہا ئی کمزور طریقہ ہے۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)

مدارس و مکاتب ملت اسلامیہ کے لیے ریڑھ کی ہڈی کی حیثیت رکھتے ہیں ، جس کے ذریعہ دین و شریعت کی حفاظت ہوتی ہے ، اس سے دینی ضرورتوں کی تکمیل ہوتی ہے۔

مسلم سماج کو دینی تعلیم کی ضرورت ہے ، تاکہ وہ خود دین اور دین کی باتوں سے واقف ہوں ، نیز اس کی بھی ضرورت ہے کہ ان کے بچے / بچیاں دین سے واقف ہوں ، اسلام کی بنیاد کلمہ ، نماز ،روزہ ،حج اور زکوۃ ہے ، ان کے احکام کو جاننا ہر مسلمان پر فرض ہے ، ان کی باضابطہ تعلیم جہاں دی جاتی ہے ،وہ مکاتب اور مدارس ہیں،

دین کا ایک اہم ستون نماز ہے ، نماز کے قیام کے لیے مساجد ہیں ، مساجد مسلمانوں کے ہر محلے میں ہیں ، مساجد میں امامت ، خطابت ،وعظ و نصیحت کے لیے امام کی ضرورت ھے ، یہ ضرورت مدارس پوری کرتے ہیں، مدارس سے مفتی ، قاضی اور عالم و فاضل نکلتے ہیں ،جو ملت اسلامیہ کی بڑی ضرورت پوری کرتے ہیں ۔

یہ مدارس و مکاتب نہ صرف علماء ، فضلاء ، مفتی اور قاضی پیدا کرتے ہیں ، بلکہ یہ دینی علوم و فنون کے ماہر افراد تیار کرتے ہیں ، جو ملک و ملت کے لیے ہر میدان میں کھڑے نظر آتے ہیں۔

ایک اہم کمیشن کی رپورٹ کے مطابق ان مکاتب و مدارس میں مسلم سماج کے صرف 4 / فیصد بچے تعلیم حاصل کرتے ہیں ، ان 4/ فیصد میں سے 2/ فیصد کسی بورڈ سے ملحق مدارس میں پڑھتے ہیں اور صرف 2/ فیصد آزاد مدارس میں پڑھتے ہیں ، یہ 2/ فیصد نہایت ہی اہم ہیں ، دینی تعلیم ، مسلم تہذیب و ثقافت اور شعائر اسلام کی حفاظت کے لیے ان کی خیر خواہی اور ان کا تحفظ ملت اسلامیہ کے ہر فرد کے لیے ضروری ہے۔

پوری دنیا بالخصوص بر صغیر میں دین کا تحفظ ان ہی کے ذریعہ ہوا ہے اور ہورہا ہے ، یہ تو سب اعتراف کر رہے ہیں کہ بر صغیر میں مسلمانوں کے درمیان دینی شعور کو پختہ کرنے میں ان اداروں نے اہم کردار ادا کیا ہے ، اس لیے مسلم سماج کا بڑا طبقہ مدارس اور علماء کا گرویدہ ہے ، اس سے جہاں غیروں میں بیزاری ہے ،وہیں اپنوں میں بھی بہت سے لوگ ہیں ، جن میں بیزاری پائی جاتی ہے ، اس لیے پوری دنیا میں اسلام مخالف طاقتیں کام کر رہی ہیں ، ان میں کچھ ہمارے خیر خواہ بن کر بھی اس کو ہوا دینے کا کام کرتے ہیں ، مسلم سماج کو ایسے لوگوں سے ہوشیار رہنے کی ضرورت ہے ،

موجودہ دور فتنہ کا ہے ، دین بیزاری عام ہے ، دوسرے تو مخالفت کرتے ہی ہیں ، ہمارے اپنے میں سے بھی بہت سے لوگ دین کے نام سے چین بہ جبیں ہو جاتے ہیں ، اور ان کی صرف ایک خواہش ہوتی ہے کہ دین کو ان کی خواہش کے مطابق بنادیا جائے ، وہ دین پر نہ چلیں ، بلکہ دینی احکام کو ان کی خواہش کے تابع کردیا جائے ، افسوس ہے ایسی فکر پر دین و شریعت مسلم سماج کا بڑا سرمایہ ہے ، خدا نخواستہ اگر مسلم سماج کے لوگ ان اداروں سے محروم ہوگئے ، تو جس طرح اسپین کی حالت ہوئی ،اسی طرح اس ملک کے مسلمانوں کی حالت ہوجانے کا اندیشہ ہے ، چونکہ مکاتب و مدارس دین و شریعت کی حفاظت کا بڑا ذریعہ ہیں ، بالخصوص بر صغیر میں دین کی حفاظت کے لیے یہ سب سے بڑا ذریعہ ہے ، اس لیے مسلمانوں کی ذمہ داری ہے کہ جس طرح ان کی حفاظت ہمیشہ سے کرتے آئے ہیں ، آئندہ بھی ان کی حفاظت کرتے رہیں ،بلکہ پہلے کے مقابلہ موجودہ وقت میں ان کی حفاظت کی زیادہ ضرورت ہے ، اس وہ مدارس و مکاتب کی جانب زیادہ توجہ دیں ، ان کی زیادہ سے زیادہ مدد کریں ، ان کو مالی اعتبار سے اتنا مضبوط کریں کہ وہ یکسو ہو کر دین کی خدمت کر سکیں ، البتہ اہل مدارس کی زمہ داری زیادہ ہے کہ ان مدارس و مکاتب کی حفاظت کے لیے ابھی سے لائحہ عمل تیار کریں ، ان کی حفاظت کے لیے سرکاری ضابطہ پر عمل کریں ، ملی تنظیموں کی جانب سے جاری گائیڈ لائن کی پابندی کی جائے ، اساتذہ کو مناسب تنخواہ دی جائے ، طلبہ کے قیام و طعام کا مناسب انتظام کیا جائے ، تاکہ مدارس و مکاتب فتنہ سے محفوظ رہیں ، اللہ تعالی ان اداروں کی حفاظت فرمائے۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)

خبر ہے کہ بہار کی مہاگٹھ بندھن سرکار میں صرف چار مسلمانوں کو جگہ دی جارہی ہے-اگر ایسا ہوتاہے تو یہ مسلمانوں کے ساتھ بڑا مذاق اور دھوکہ ہوگا ، ہر حال میں یادو سے زیادہ مسلم لیڈروں کو کابینہ میں جگہ دی جائے کیوں کہ تیجسوی یادو کو بھی یاد ہوگا کہ 2020کے الیکشن میں یادو نے متعدد جگہ راجد کو دھوکہ دیا ہے،اگر یادو دھوکہ نہ دیتے تو تیجسوی یادو سی ایم ہوتے-اسی طرح 2019 میں مہاگٹھ بندھن نے بہار میں لوک سبھا کی صرف ایک سیٹ جیتی وہ بھی مسلم حلقہ سے مسلم ممبر پارلیمنٹ بنے ورنہ یادو نے تو راجد، کانگریس کو بری طرح سے ہرانے میں اہم کردار ادا کیا ہے، یہ ڈھکی چھپی بات نہیں ہے-

مہاگٹھ بندھن سرکار ٹھگی نہ کرے، اگرنئی سرکار میں 31وزیر بن رہے ہیں تو کم ازکم چھ مسلمان وزیر ہونے چاہئیں اگر 37/38 وزراء ہوں تو آٹھ مسلم وزیر بنائے جائیں تبھی سماجی انصاف کے نعرہ کی معنویت سمجھ میں آئے گی ورنہ یہ بھی جملہ ہوگا-اور ٹھگ بندھن سرکار کی شروعات ہوگی، بہار کی مسلم تنظیموں، اداروں اور نمائندوں کو آوازاٹھانی چاہیئے-تاکہ سیکولروں کو یہ احساس ہو کہ اب مسلمان سوئے نہیں ہیں اور اگر نام نہاد سیکولروں کا یہی رویہ رہا تو متبادل دیکھاجاسکتاہے، بلاشرط کسی بھی پارٹی کی حمایت یا طرفداری اب نہیں کی جاسکتی، یہی وہ غلطی ہے جو آزادی کے بعد کی جاتی رہی ہے تبھی مسلمانوں کو ووٹ بینک اور بندھوا مزدور سے زیادہ نہیں سمجھاگیا، ابھی بھی وقت ہے کہ طرز سیاست بدلاجائے، سیکولروں کی غلطی پر گرفت کی جائے، قصیدہ خوانی کی بجائے آئینہ دکھایا جائے اور اپنے اندر سیاسی سوجھ بوجھ پیداکی جائے، تبھی سیاسی وزن پیدا ہوگا، سیاسی بے وزنی ہی بہت سارے مسائل کی جڑ ہے-

محمد شارب ضیاء رحمانی
چلیے بہار میں ایک بار پھر مہاگٹھ بندھن سرکار، لیکن کابینہ کی تشکیل میں مسلمانوں کے ساتھ ٹھگی نہیں ہونی چاہیے- مسلم اداروں اور اہم نمائندوں کو راجد، جدیو، کانگریس پر دبائو دینا چاہیے کہ آبادی کے تناسب سے کابینہ میں مسلم نمائندگی دی جائے اس لحاظ سے کم از کم آٹھ مسلم ممبران اسمبلی/اراکین قانون ساز کونسل کو وزارت ملنی چاہیے کیوں کہ مسلمانوں نے یک طرفہ راجد کانگریس کا ساتھ دیاتھا، تیجسوی یادو ٹھگنے کی کوشش نہ کریں،انھیں دو سال بعد لوک سبھا بھی لڑنا ہے، مسلمانوں نے یادو سے زیادہ وفاداری دکھائی ہے، کئی جگہ یادو نے راجد کو دھوکہ دیا ہے لہذا یادو وزیروں سے زیادہ مسلم وزراء کی تعداد ہرحال میں زیادہ ہونی چاہیے، اب مہاگٹھ بندھن میں جیتے ہوئے ممبران اسمبلی میں مسلم ممبران کا قحط نہیں ہے، راجد سے اخترالاسلام شاہین، رکن قانون ساز کونسل قاری صہیب، کامران سمیت نوجوان کو موقع دینا چاہیے ان کے علاوہ عبدالباری صدیقی گرچہ ہار گئے ہوں لیکن قانون ساز کونسل کے ذریعہ ان کو کلیدی حیثیت ملنی چاہیے، جدیو سے زمان خان تو ہیں ہی، ان کے علاوہ قانون ساز کونسل سے جدیو موقعہ دے سکتی ہے جن میں ڈاکٹر خالد انور، غلام غوث، غلام رسول بلیاوی کو بھی کابینہ میں موقعہ دیا جائے، کل ملاکر آٹھ سے دس تک کی مسلم وزراء کی تعداد ریاستی کابینہ میں ضروری ہے، ریاستی مسلم قیادت اس کے لیے ابھی سے مہاگٹھ بندھن پر پریشر بنائے-

زمینی اطلاع ہے کہ جہاں بی ایس پی کے مسلم امیدوار ہیں وہاں دلت پورے طور پر بی جے پی کو ووٹ کررہے ہیں اور جہاں بی ایس پی کے غیرمسلم امیدوار ہیں وہاں بی ایس پی کو دے رہے ہیں شاید بہن جی نے زیادہ مسلم کو ٹکٹ اسی لیے دیا ہے،تاکہ مسلم ووٹ تقسیم ہوسکے یعنی دونوں طرف سے وہ بی جے پی کو فائدہ پہونچا رہی ہیں،ایسے میں مسلمانوں کی واضح حکمت عملی یہی ہونی چاہیے کہ کسی بھی حال میں،چاہے بی ایس پی کا مسلم امیدوار کیوں نہ ہو(کیوں کہ اسے بی ایس پی کا کور ووٹ ملے گا نہیں، وہ ویسے بھی نہیں جیت رہاہے-)ہرگز ایک ووٹ بھی بی ایس پی کو نہ دیں، آپ کا دیا ہوا بی ایس پی کو ایک ایک ووٹ بی جے پی کے لیے مفید ہوگا،کیوں کہ اگر بی ایس پی کے پانچ دس پندرہ امیدوار جیت بھی گئے، اور بی جے پی کو چند سیٹ کی ضرورت پڑی تو طے ہے کہ بی ایس پی، بی جے پی کے ساتھ جائے گی، اس لیے مقابلہ کو سہ رخی ہونے سے بچائیں، ابھی جو ریاست کی صورت حال ہے، اس میں یہی ضروری ہے کہ پانچ سے دس سیٹ جہاں اگر مجلس بہت مضبوط ہو اور جیت رہی ہو وہاں مجلس کو دیں (جس طرح تلنگانہ میں مجلس ٹارگیٹ بناکر سات ہی سیٹ پر الیکشن لڑتی ہے،یوپی میں بھی یہی ماڈل اپنانا چاہیے، کیوں کہ یہ بھی طے ہے کہ مجلس کا اتحاد کسی بھی حال میں سرکار بنانے کے قریب تک نہیں ہے،اس لیے جتنا کنفرم ہو اتنے پر زور دیا جائے، تاکہ ووٹ کی تقسیم سے بچاجاسکے-)باقی تمام جگہوں پر ووٹ سماجوادی گٹھ بندھن کو دیں، کانگریس،بی ایس پی کو ایک ووٹ بھی دے کر برباد نہ کریں،سماجوادی بہت بری ہے بے شک،لیکن اس میں بھی شک نہیں کہ ابھی بی جے پی کو وہاں وہی روک سکتی ہے اور وہی فائٹ میں ہے اور اگر مجلس کو پانچ دس سیٹ آئے گی اور ایس پی کو ضرورت ہوئی تو ایک مجبور سرکار مجلس اور کانگریس کے ساتھ ہی بنائے گی اور مجبور سرکار مسلمانوں کے حق میں بھی ہے اور جمہوریت کےمفاد میں بھی، اس لیے اور کسی طرف ووٹ دے کر ہرگز اپنا حق برباد نہ کریں، دوسری گزارش اویسی صاحب سے بھی ہے کہ ابھی وہاں کسی بھی متنازعہ ایشو کو اٹھانے سے بچاجائے، ابھی تک عوامی بنیادی مسائل بھی انتخابی ایشو بنے ہیں، بی جے پی کی کوشش ہے کہ پولرائزیشن کی پچ پر اپوزیشن کو لایاجائے،اور مہنگائی،بے روزگاری جیسے ایشوز بالکل سامنے نہ ہوں، ایسے میں گزارش ہے کہ ابھی صرف عوامی بنیادی مسائل ہی اٹھائے جائیں-

ہر سال اسکول وکالجز اور یونیورسٹیز سے لاکھوں لوگ فارغ ہوتے ہیں ـ یہ تعداد مدارس سے فارغ ہونے والوں کے مقابلے میں بہت زیادہ ہےـ اگر مدارس کے فارغین نے عوام کے ذہنوں میں مدارس کی اہمیت پیدا کی، اور ان کے قیام کو ثواب کا کام بتایا تو فارغین یونیورسٹیز کم از کم اپنے حلقے کے لوگوں کو بھی یہ باور کیوں نہیں کراسکے کہ اسکول کھولنے میں بھی ثواب ہےـ وہ اسکول وکالجز کے فارغین کو تو یہ سمجھاسکتے تھے کہ اسکول کھولنا بھی ثواب کا کام ہے اور انھیں اسکول کھولنے سے کس نے روکاـ ان کی خود اتنی بڑی تعداد ہے کہ اگر وہ اس معامکے میں سنجیدہ ہوتے تو بے شمار اسکول کھول سکتے تھے. مگر وہ سب کے سب الا ماشاء اللہ اپنی دیگر مصروفیات ممسے وابستہ رہنے کو ہی ترجیح دیتے ہیں. دیکھا یہ گیا ہے کہ اب بھی جو زیادہ تر اسکول ہیں وہ مدارس کے فارغین کے ہی کھولے ہوئے ہیں ـ

اس لیے ہر چیز کے دوشی صرف اہل مدارس نہیں ہیں ـ یقینا ان میں بہت سی کمیاں ہیں اور ان سے بہت سے کوتاہیاں ہوئی ہیں. لیکن اس کا مطلب یہ نہیں کہ ہر چیز کا دوش انھیں دیاجائےـ

آخری بات یہ کہ اب تک جو ہوا سو ہوا، اب اسکول وکالجز کے فارغین کو چاہیے کہ وہ اپنے حلقے میں اسکول کے قیام کی اہمیت وثواب کا خوب پرچار کریں اور جگہ جگہ ان کا جال بچھادیں ـ انھیں کسی نے نہ کل روکا ہوا تھا اور نہ آج روک رکھا ہےـ یہ نہ کہاجائے کہ اسکول کے نام پر چندہ نہیں دیا جاتاـ اگر لوگوں نے کوشش کی ہوتی تو اسکول کے نام پر بھی چندہ ملتا، لیکن اس پہلو سے کوشش ہی نہیں کی گئی. اس لیے کہ یہ کام عزت نفس کے خلاف ہے جو ہر کسی کے بس کی بات نہیں ـ

مقصود کلام یہ ہے کہ دروازہ کھلا ہوا ہے. آگے بڑھیں اور کام کریں. یہ وقت ایک دوسرے کو دوش دینے کا نہیں ہےـ خدا ہم سب سے اپبے دین کا کام لےـ

میرے دورۂ گجرات کے دوران میں آج (28 جنوری 2022) جناب عبد الرزاق سکریٹری اسلامی ساہتیہ پرکاشن (گجراتی زبان میں دینی کتابیں شائع کرنے والا ادارہ) نے یہ خوش خبری دی کہ آج گجراتی زبان میں تفہیم القرآن کی آخری (چھٹی) جلد کے ترجمہ کی کمپوزنگ اور تصحیح کا کام مکمل ہوگیا ہے اور اسے پریس کے حوالے کیا جا رہا ہے _ فالحمد للہ علی ذلک ۔

گزشتہ صدی کی آٹھویں دہائی میں مولانا سید ابو الاعلی مودودی رحمہ اللہ کے ترجمۂ قرآن و مختصر حواشی کے گجراتی ترجمہ کا کام جناب ظہیر الدین شیخ نے انجام دیا تھا ۔ اس کے لیے جناب شمس پیرزادہ (مؤلف دعوۃ القرآن) ہر ماہ تین چار روز کے لیے مہاراشٹر سے گجرات تشریف لاتے تھے ۔ چھ افراد کی ٹیم (جس میں پیر زادہ صاحب بھی شامل تھے) ظہیر الدین شیخ صاحب کے ترجمے پر نظر ثانی کرتی تھی _ اس ترجمۂ قرآن کے اب تک 13 ایڈیشن شائع ہوچکے ہیں۔

ترجمۂ قرآن کے بعد مولانا مودودی کی تفسیر تفہیم القرآن کا ترجمہ گزشتہ 4 برس قبل شروع ہوا ۔ یہ کام بھی جناب ظہیر الدین شیخ نے انجام دیا۔ جناب جمال پٹّی والا اور جناب امین سیٹھ نے اس پر نظر ثانی کی ۔ ابتدائی 3 جلدوں کی اشاعت کے جملہ مصارف جناب اقبال ورق والا نے برداشت کیے اور اپنے ذاتی ادارے سے ان کی طباعت کی، پھر طے پایا کہ آگے کی جلدیں اسلامی ساہتیہ پرکاشن سے طبع ہوں اور سابق اسٹاک کی مارکیٹنگ بھی پرکاشن کے ذریعے ہو ۔ جناب اقبال ورق والا اس کے لیے بہ خوشی تیار ہوگئے۔

جماعت اسلامی ہند کی کوششوں سے مولانا مودودی کے ترجمۂ قرآن ، تفسیر تفہیم القرآن اور دیگر کتب کا ہندوستان کی بہت سی مقامی زبانوں میں ترجمہ ہوگیا ہے ۔ اس کے ذریعے تحریکی فکر کو عام کرنے میں بہت مدد ملی ہے۔ اس کام میں جن بزرگوں نے اپنی زندگیاں کھپا دی ہیں اللہ تعالیٰ انہیں بھرپور بدلہ عطا فرمائے۔ جن کا انتقال ہوگیا ہے انہیں جنت الفردوس میں جگہ عطا کرے اور جناب ظہیر الدین شیخ کا سایہ تادیر قائم رکھے ، آمین یا رب العالمین۔

ایک تحریر میں ہم نے لکھا تھا کہ امت کو اپنی توجہ مسلم چہروں پر نہیں مسلم ایشیوز پر رکھنی چاہیے، اس کی وضاحت میں چند سطریں تحریر کرنا ضروری معلوم ہوتا ہے:
سب سے پہلے چند تاریخی حقائق بطور مثال ملاحظہ کیجیے:

1. ہندوستان کے آزاد ہوتے ہی نصاب تعلیم میں دیوناگری بت پرستانہ تہذیب داخل کی جانے لگی اور ہم جانتے ہیں کہ آزادی سے دس برس تک ملک کا وزیر تعلیم کیسا عظیم مسلم چہرہ تھاـ

2. علی گڑھ مسلم یونیورسٹی کو اپنے اقلیتی کردار کے سلسلے میں سب سے شدید بحران کا جب سامنا کرنا پڑا اس وقت وزارت تعلیم کریم چھاگلہ صاحب کے پاس تھی اور اس مسلم چہرہ کا خیال تھا کہ علی گڑھ مسلم یونیورسٹی کے نام سے "مسلم” نکال دینا چاہیےـ

3. کشمیری عوام کو مرکزی حکومت سے ظلم وستم کی سب سے زیادہ شکایت جن دنوں (1988-1989) میں رہی اس وقت ملک کے وزیر داخلہ کشمیر کے معروف سیاسی راہنما مفتی محمد سعید (محبوبہ مفتی کے والد) تھےـ

4. بہوجن سماج پارٹی نے جب پارلیمنٹ میں سی اے اے کی حمایت کی تو اس کے ارکان میں بھی مسلم چہرے تھےـ

5. مظفر نگر کے فسادات کے وقت ریاستی حکومت میں بہت سے مسلم چہرے تھے، بڑے بھی اور چھوٹے بھی،لیکن ہمارے کان ان میں سے کسی ایک سے بھی کوئی حرف مذمت چھوڑیے حرف ندامت تک سننے کو ترس گئےـ

اس لیے یہ سوال نہ کیجیے کہ پوسٹر یا اسٹیج پر فلاں چہرہ کیوں نہیں ہے، یہ چہرے آپ کے کام آنے والے نہیں ہیں، سوال (مثلا) یہ کیجیے کہ آپ نے جن مسلم بے قصوروں کی رہائی کی بات کی تھی وہ آپ کے پچھلے عہد حکومت میں رہائی کیوں نہیں پاسکےتھے؟
اور یہ بھی سوچیے کہ اگر ملک گیر این پی آر ہونے لگا تو کس پارٹی کی حکومت سے یہ توقع کی جاسکتی ہے کہ وہ ملک کی بعض دیگر ریاستوں کی طرح نئے فارمیٹ کا انکار کردے گی, اس کو ووٹ کیجیے اور جس پارٹی کے بارے میں یہ لگے کہ وہ این پی آر نئے فارمیٹ کے مطابق کرائے گی اس کو ہرانے کی ہر ممکن کیجیے، اس لیے نہیں کہ ہم نے اس کو ہرانے کا ٹھیکا لیا ہوا ہے، بلکہ اس لیے کہ ہماری شہریت خطرے میں نہ پڑجائےـ

مسلم قیادت نام کی کوئی چیز اس ملک میں نہیں ہے اور قریب میں ہونے کا مجھے کوئی امکان بھی نظر نہیں آ رہا ہےـ ماضی میں جوشیلے مسلم لیگیوں سے کچھ فاش غلطیاں ہوئی تھیں جن کا خمیازہ آج بھی بر صغیر کے مسلمان بھگت رہے ہیں۔ جو خود دیوار سے چپکے ہوئے ہوتے ہیں وہ پہلے اپنا بچاؤ کرتے ہیں اور پھر دوسروں کے بارے میں سوچتے ہیں، یہی عام ضابطہ ہے۔

یوپی الیکشن میں اس وقت جو لوگ مسلم قیادت کی بات کررہے ہیں وہ اصل میں ملک اور مسلمان دونوں کے ساتھ خیانت کر رہے ہیں۔ وہ قائد نہیں مسلمانوں کے خائن ہیں اور مسلم قیادت کے نام پر کچھ جوشیلے یا موقع پرست لوگوں کو بچوں کا جھنجھنا پکڑا کر خود اپنی سیاسی روٹی سینک رہے ہیں۔ کوئی ایک فرد یا ایک خاندان کے لوگ پورے ملک کے بیس کروڑ مسلمانوں کی سیاسی قیادت نہیں کر سکتے، یہ صاف صاف دھوکہ ہے۔

تاریخی غلطیاں ہمیشہ نہیں ہوتیں اور کچھ غلطیاں بعد میں درست بھی نہیں ہوتیں، نیز ان غلطیوں کے برے نتائج قوم کا مقدر بن جاتے ہیں۔ پیارے ملک ہندوستان میں کسی اور قوم کا من حیث القوم کیا بگڑا، پتہ نہیں؛ لیکن مسلمانوں کا بہت کچھ بگڑ چکا ہے۔ یہاں کی سیاست یکسر بدل چکی ہے اور ہمارے ملک میں یورپ، امریکہ جیسی جمہوریت بھی نہیں ہے جہاں بہر حال، نام نہاد ہی سہی، قانون اور حقوق انسانی کی بات کی جاتی ہے۔ اقلیت اور اکثریت یہ عددی حقیقت ہے، اس کو بدلنا کسی کے بس میں نہیں اور انتخابی جمہوریت میں جس کے پاس عدد ہے وہی بادشاہ ہوتا ہےـ

کتنی آسانی سے لوگ مسلمانوں کو کسان آندولن سے سبق حاصل کرنے کی نصیحت کرتے ہیں! جبکہ انہیں معلوم ہونا چاہیے کہ مسلمانوں کا ہر معاملہ بہت حساس ہوتا ہے اور ہندو مسلم منافرت کو ہوا دینے کے امکانات سے پر ہوتا ہے۔ اس لیے مسلمانوں کے احتجاج اور دھرنے کو کسان آندولن پر قیاس کرنا درست نہیں ہے۔ مسلمانوں کو عار دلانے والوں اور سبق حاصل کرنے کی نصیحت کرنے والوں کو قیاس مع الفارق کے مفہوم کو ذہن نشین رکھنی چاہیے ۔

دوسری بات یہ کہ پنجاب کے کسانوں پر جب خالصتانی کا الزام لگایا جانے لگا تو وہ فرنٹ سے ہٹ گئے اور زمام قیادت اترپردیش کے جاٹ لیڈر راکیش ٹکیٹ کو سونپ دیا۔

کسان آندولن کو بھی بدنام کرنے کی کوشش کی گئی لیکن چونکہ یہ آندولن عام کسانوں کا تھا نہ کہ سکھ کمیونٹی سے جڑا ہوا اس لیے اسے ناکام کرنے والوں کو منہ کی کھانی پڑی۔ اس کے برعکس مسلمانوں کا احتجاج ظاہر ہے ایک مخصوص مذہبی کمیونٹی کا تھا ، گرچہ اس میں بعض غیر مسلموں کی بھی شرکت تھی، اس لیے اسے بدنام کرنا آسان تھا۔
کوئی بھی عوامی تحریک اگر صرف مسلمانوں کی ہوگی، تو اس کا انجام ناکامی ہے اس لیے کہ یہ لقمہ تر ہے، ہر کس و ناکس اسے پاکستانی ، جہادی، بنیاد پرست، شدت پسند، دیش دروہ ، جس تھالی میں کھاتے ہیں اسی میں چھید کرنے والے وغیرہ وغیرہ کہہ کر سبوتاژ کرنا آسان ہوتا ہے۔
مسئلہ گرچہ ظلم کے خلاف آواز بلند کرنے کا ہوتا ہے پھر بھی خالص مسلمانوں کی تحریک کے ساتھ سول سوسائٹی کے بہت سے ارکان وابستہ نہیں ہوتے،شاید اس لیے کہ کہیں ان کو ٹرول نہ کیا جانے لگے،دیش دروہ کا ٹھپہ نہ لگا دیا جائے۔

واٹس ایپ اور فیس بک پر یہ خبر بہت گشت کر رہی ہے کہ تریپورہ کی حالت بہت خراب ہے،وہاں فرقہ وارانہ فساد پھوٹ پڑا ہے ،قرآن کریم کی بے حرمتی کی جارہی ہے، مسجدیں جلائی جارہی ہیں ، مسلمانوں کے گھروں کو جلایا اور منہدم کیا جارہا ہے ،جان ،مال ،عزت و آبرو سے کھلواڑ کیا جارہا ہے ، ایسا کئی دنوں سے ہورہا ہے ، مگر اب تک یہ سلسلہ بند نہیں ہوا ہے ،یہ نہایت ہی افسوس کی بات ہے ، خبر کے مطابق ابھی تک اس کے روک تھام کے لئے وہاں کی حکومت نے کوئی کاروائی نہیں کی ہے اور ہر طرف ظلم و ستم کا بازار گرم ہے۔
ابھی چند مہینے گذرے ہیں ، ملک کی ملی تنظیموں کی کانفرنس منعقد ہوئی تھی ، اس کانفرنس میں اس طرح کے حادثات کے وقت اجتماعی اقدامات کی تجویز منظور کی گئی تھی ،جس سے بہت سی امیدیں جھلک رہی تھیں ، یقینا یہ ایک خوش آئندہ بات تھی اور ہے تریپورہ میں مسلمانوں کی بھی آبادی ہے ،وہاں مسلم تنظیمیں بھی ہیں ،نیز قریب کے صوبوں میں بھی مسلمانوں کی آبادی ہے ، مگر افسوس کی بات ہے کہ قریب کے صوبوں سے بھی کوئی آواز سننے کو نہیں مل رہی ہے ، جبکہ آپسی تال میل کے ذریعے باہمی تعاون سے کام لیا جاسکتا ہے ، نیز جمعیت علما اور جماعت اسلامی کی صوبائی تنظیم وہاں ضرور ہوگی ،موجودہ وقت میں وہاں کی تنظیموں سے صحیح صورت حال معلوم کرنے کی سخت ضرورت ہے ۔
تریپورہ کے معاملے پر اکابر ملت اور ملی تنظیموں کی توجہ ضرور ہوگی ، میں تمام ملی تنظیموں کے قائدین سے، خاص طور پر جمعیت علماء ہند کی دونوں تنظیموں ،ملی کونسل اور جماعت اسلامی کے قائدین سے اپیل کرتا ہوں کہ وہ اس سلسلے میں پہل کریں ،پہلے مرکزی حکومت کے ذمے داروں سے بات کرنے کی زحمت کریں ،پھر حالات کے اعتبار سے صوبائی حکومت سے ، فساد پر قابو پانے کے لیے دونوں پر زور دیا جائے ، جس علاقے میں فساد ہوا ہے ،وہاں امن و شانتی بحال کرنے کے لیے کوشش کی جائے ؛ تاکہ حالات معمول پر آسکیں اور امن و شانتی بحال ہوسکے ،نیز حکومت پر زور دیا جائے کہ دنگائیوں کی نشان دہی کرے اور ان پر کاروائی کرے ۔

میں نے ابھی مولانا ارشد مدنی صاحب کا سدرشن ٹی وی کو دیا گیا انٹرویو دیکھا ہے، مجموعی طور پر مولانا کے جوابات اچھے رہے، حالانکہ کچھ مشمولات پر اشکال بھی ممکن ہے،جبکہ بدبخت اینکر نے اس امید پر بارہا اشتعال انگیز سوالات کیے کہ مولانا غصہ سے مغلوب ہوکر کوئی ایسی بات کہہ گزریں جس کو مدعا بناکر اچھالا جاسکے، بات کا بتنگڑ، رائی کا پہاڑ بنایا جاسکے، مگر اللہ شکر ہے مولانا نے اپنا اعتماد بحال رکھا اورصبر وضبط کے ساتھ مضبوط جواب دیے ـ

جو لوگ سدرشن دیکھتے رہتے ہیں وہ خوب جانتے ہیں کہ چوہان کتنا بدتمیز، بدزبان اور جاہل ہے، مخاطب کو مشتعل کرکے فائدہ اُٹھانے میں اُسے مہارت حاصل ہے، جاہل آدمی ہے جاہلانہ سوال کرتا ہے، عامیانہ باتیں کرتا ہے، اس لیے کئی مسلمانوں کے ذہن میں اس انٹرویو کے سلسلے میں بہت سےخدشات تھے نیز ہندوستانی مسلمانوں کی سب سے بڑی شخصیات میں سے ایک مولانا ارشد مدنی کی بے اکرامی اور انھیں بے وجہ تنازعہ میں گھسیٹے جانے کا خطرہ بھی تھا ـ

الحمدللہ انٹرویو سننے کے بعد بڑی حد اطمینان ہوا لیکن اس ناچیز کا اب بھی یہی خیال ہے کہ مولانا کو اس جاہل اور کھلے دشمن کے ساتھ نہیں بیٹھنا چاہیے تھا، جمیعۃ علماء ہند کے شعبہ میڈیا کو چاہیے کہ اگر آئندہ اس طرح کے لوگوں سے گفتگو کرنا پڑ ہی جائے تو اس کے لیے کسی دوسرے مناسب نمائندے کو تیار رکھیں، جو ایسے شرپسندوں کو ترکی بترکی جواب دے سکے ـ مولانا کا یہ معیار ہرگز نہیں ہے کہ اس طرح دو ٹکے غنڈے کے ساتھ بات کریں اور اس اجہل کو اعتبار بخشیں ـ

دارالعلوم دیوبند و دیگر بڑے دینی مدارس سے ہزاروں طلباء ہر سال فارغ التحصیل ہوتے ہیں وہ سب کے سب فقیہ، مفتی، مدرس، خطیب،امام یا مؤذن نہیں ہو سکتے اور شریعت کی رو سے نہ یہ مطلوب ہے تو پھر کیوں نہیں ایسے فضلاء کو عصری دانشگاہوں میں مزید تعلیم کے لیے داخلے کا اہل بنایا جاتا ہے ؟
اس کے لیے نصاب تعلیم میں بسیط ترمیم کی ضرورت ہے اور وہ یہ کہ این سی آر ٹی کی آٹھویں و نویں درجے کی کتابیں ہفتم و دورہ سے پہلے کے سالوں میں شامل کر دیں اور اس طرح انہیں:
١- جامعہ ملیہ اسلامیہ دہلی، علی گڑھ مسلم یونیورسٹی، دہلی یونیورسٹی، جے این یو، اور دیگر یونیورسٹیوں میں راست بی اے کے مختلف کورسز میں داخلہ کا اہل بنایا جائے۔
٢- نیشنل انسٹی ٹیوٹ آف اوپن اسکولنگ NIOS سے میٹرک کا امتحان میں شریک ہو سکیں۔
٣- کسی بھی تجارتی مرکز فیکٹری یا دفتر میں اہلیت کے مطابق ملازمت حاصل کر سکیں۔
٤- ڈپلومہ ان کمپیوٹر اپلیکیشن DCA حاصل کر کے کسی کمپنی میں کمپیوٹر آپریٹر کی ملازمت حاصل کر سکیں۔
٥ – اور سب سے بڑی بات یہ کہ تعلیم یافتہ ، اپنی ذمہ داری اور فرض سے واقف اچھا اور ذمہ دار شہری بن سکے۔ظاہر ہے اچھا اور ذمہ دار شہری کے لیے ضروری ہے کہ ملک کے نظام اور دستور کے عام لوگوں سے متعلق بنیادی بنود سے واقف ہو۔
بدقسمتی سے دینی مدارس کے ارباب حل و عقد نصاب تعلیم میں عصری علوم کی چند کتابوں؛ ہندی، انگریزی، ریاضی، سوشل سائنس، جغرافیہ، جنرل نالج کی باتیں تو کرتے ہیں اعلان بھی کرتے ہیں مگر اس پر عمل درآمد نہیں ہوتا ہے۔
مجھے تکلیف اس وقت زیادہ ہوتی ہے جب دیکھتا ہوں کہ دارالعلوم یا ندوہ وغیرہ کے فضلاء اردو زبان وادب میں ماہر اور بہترین تنقید نگار کسی سرکاری غیر سرکاری ادارے میں ڈائریکٹر کے عہدے پر فقط اس لیے فائز نہیں ہو سکتے کہ اس کے پاس گریجویشن پوسٹ گریجویشن کی ڈگری نہیں ہے۔ بعض اداروں میں وہ زندگی بھر تھوڑی تنخواہ پر کم اہل ڈائریکٹروں کے معاون کے طور پر کام کرتے رہتے ہیں۔ ایسا لگتا ہے بعض مدارس کے ارباب حل و عقد اور مساجد کے متولیان اپنے ماتحتوں کی عزت نفس کو پاش پاش کر کے اپنی مریض ذہنیت کو لذت پہنچاتے ہیں یا احساس کمتری کے شکار ہوتے ہیں یا انہیں اندیشہ ہوتا ہے کہ آگے چل کر ماتحت ان سے آگے بڑھ جائیں گے۔ مدارس میں اصلاح نہیں کرنے کے پیچھے یہ بھی ایک محرک ہے۔

اگر چوروں کا کوئی گروہ آپ کا ووٹر ہو تو کیا اس کی چوری پر آپ مبارک بادی دیں گے؟ زانیوں کے کسی گروہ سے آپ کو ووٹوں کی امید ہو تو کیا اس کے زنا کرنے پر” شاباش” کہیں گے؟ آپ کے حلقہ انتخاب میں اگر ظالموں کی جماعت لوگوں پر ظلم و ستم کی بارش کررہی ہو لیکن آپ کو اپنے حق میں اس سے اچھی امید ہو، تو کیا اس ظلم و ستم پر اعلانیہ ” بدھائی ہو” کہیں گے؟ نہیں،ہر گز نہیں، کیونکہ غلط اور حرام کاموں پر مبارکبادی نہیں دی جاسکتی ـ
اسلام کی نظر میں شرک اور شرکیہ اعمال چوری، زنا اور ظلم و ستم سے زیادہ خطرناک بلکہ ناقابل معافی جرم ہے لیکن ہمارا مسلمان سیاسی طبقہ بڑے زور وشور سے اعلانیہ طور پر بلکہ مورتیوں کی نمائش کے ساتھ کہتاہے” آپ کو درگا پوجا کی بدھائی ہو”ہولی مبارک ہو وغیرہ "،یاد رہے کہ مبارکبادی ہمیشہ اچھے کاموں میں دی جاتی ہے،برے کاموں میں نہیں، شرک آپ کے مذہب میں ناقابل معافی گناہ ہے، پہلا کلمہ ہی شرک سے نفرت سکھاتا ہے، کلمہ شہادت آپ سے غیراللہ کی نفی کا مطالبہ کرتا ہے، اس کی مبارک بادی کامطلب اس کے سوا اور کیا ہے کہ آپ اس کو اچھا سمجھ رہے ہیں ـ بے شک برادران وطن بھی آپ کو عید کی مبارکبادی دیتے ہیں لیکن وہ اس لیے دیتے ہیں کہ ان کے ہاں وہ ناجائز نہیں ہے، ذرا ان کو کہیے کہ گاؤ خوری پر مبارک باد پیش کردیں، قیامت تک وہ نہیں دیں گے،کیونکہ ان کی نظر میں آپ ان کے معبود کی تذلیل کر رہے ہیں، لیکن ایک خدا کو چھوڑ کر ہزاروں معبودان باطلہ کی عبادت کرنے والے خدا کی توہین کررہے ہیں اور آپ ان کو مبارکباد پیش کر رہے ہیں،کیسے مسلمان ہیں آپ،چند سو ووٹوں کی خاطر اپنے ایمان کا سودا کرنا کہاں کی دانشمندی ہے؟ہمارے بچپن میں اس کا تصور بھی نہیں تھا، خوش ہی کرنا مقصود ہے تو غیر مسلم بیمار پڑوسیوں کو دوادارو کے ذریعے کیجیے، راہ چلتے ہندو مسافروں کو اپنی گاڑی پر بیٹھا کر کیجیے، دلت ہندووں سے بغل گیر ہوکر کیجیے، مبارک باد پیش کیجیے ان کی تعلیمی ترقی پر، سماجی ترقی میں ان کی حصہ داریوں پر، ظالموں سے مقابلہ آرائی پر، یہ چیزیں دیر پا اثر انگیز ہوں گی نہ کہ انھی چیزوں پر جو ہمارے اور ان کے درمیان حد فاصل کا درجہ رکھتی ہیں ـ قرآن نے صاف کہا ہے: إن الشرک لظلم عظیم، إن اللہ لایغفر ان یشرک بہ.

چند شرپسند عناصر کی وجہ سے اراکین شوری متعدد حصوں میں منقسم تھے، نتیجتاً واٹس ایپ ،فیس بک اور دوسرے سوشل میڈیا پلیٹ فارم پر غلیظ ترین تبصرے ہورہے تھے، پگڑیاں اچھالی جارہی تھیں، الزامات و اتہامات کے ساتھ گالم گلوچ کی بھی گرم بازاری شروع ہوگئی تھی، احقاق حق کے نام پر کیمپس میں کبھی کسی گروپ کی آمد ہوتی تو کبھی دوسرے گروپ کی، لاکھ کوششوں کے باوجود پیچیدگیاں ختم نہیں ہورہی تھیں، معاملہ یہاں تک پہنچ گیاتھا کہ انتخاب امیر کے لیے  تین مختلف تاریخیں متعین ہوگئی تھیں،جن کے اعلانات اخبارات میں آرہے تھے، واضح طور پر محسوس ہورہاتھا کہ اب ایک نہیں تین مختلف جماعتوں کے تین مختلف امرا منتخب ہوں گے اور پھر وہ کھیل شروع ہوگا جس کا تصور بھی تکلیف دہ ہےـ
اسی دوران محترم نائب امیر شریعت نے شوری بلانے کی ٹھان لی اور اس پر جم گئے،چنانچہ بہت کم وقت میں اجلاس کی تیاری ہوئی اور آخر کار آج شوری کا اجلاس بھی ہوا جس میں تقریبا ساٹھ ستر اراکین شوری نے شرکت کی،سب کے سب فکرمند نظرآرہے تھے، گفتگو کرتے ہوئے کئی ممبران کی آنکھوں سے آنسو رواں ہوجاتے تھے، تھوڑے وقفے کےلیے اراکین شوری ذکرو اذکار میں میں بھی مشغول ہوئے، لوگوں نے دیکھا کہ اللہ کی مدد آئی، سب کے سب یک زبان ہوگئےاور متحد ہوکر نہ صرف انتخاب امیر کی تاریخ کااعلان کیا بلکہ طریقے کا بھی اعلان کردیا ،اس لیے اب ان شاءاللہ9/اکتوبر 2021 کو امیر شریعت کا انتخاب عمل میں آئے گا، مجھے اس بات کا احساس ہے کہ کام مشکل ہے اس لیے کہ شرپسندوں کی ٹولیاں اپناکام کریں گی بلکہ کچھ بدتمیزیاں شروع بھی ہوگئی ہیں لیکن ظاہر ہے شرپسند عناصر کامیاب ہی اس وقت ہوں گے جب خیر پسند افراد اپنے حصے کاکام کرنا چھوڑدیں گےـ
اب بس دعا فرمائیں کہ اللہ تعالیٰ مسلمانوں کو ایسا امیر عطا فرمائے جو حقیقی معنوں میں قیادت کا اہل ہو….!

اردو کے معروف افسانہ نگار اور ماہنامہ ” سب رس ” کے مدیر پروفیسر بیگ احساس ہمارے درمیان نہیں رہے۔ انا للہ وانا الیہ راجعون
وہ کئی دنوں سے وینٹی لیٹر پر تھے۔ ان کے دماغ نے کام کرنا بند کردیا تھا اور اعضا بھی ساتھ نہیں دے رہے تھے۔ انھوں نے آج صبح آخری سانس لی۔
ساہتیہ اکیڈمی انعام یافتہ پروفیسر بیگ احساس عثمانیہ یونیورسٹی اور حیدرآباد سینٹرل یونیورسٹی کے سابق صدر شعبہ اردو تھے۔ انھوں نے اپنے ادبی سفر کا آغاز افسانہ نگاری سے کیا تھا اور پچھلے دنوں ان کے ناول ” دخمہ” کو کافی پذیرائی حاصل ہوئی تھی۔ وہ بیک وقت ایک اچھے محقق، سنجیدہ نقاد، بہترین ادیب اور کامیاب مقرر تھے۔ نہایت نفیس طبیعت کے مالک اور دھیمے لہجے میں گفتگو کرنے والے پروفیسر بیگ احساس سے اکثر فون پر گفتگو ہوتی تھی اور جب کبھی حیدرآباد جانا ہوتا تو ملاقات بھی ہوتی تھی۔ ان سے پہلی ملاقات ۲۰۰۵ میں نیویارک میں ہوئی تھی۔
وہ یاروں کے یار تھے اور ان کی سب سے اچھی یاری ممتاز مزاح نگار مجتبٰی حسین مرحوم کے ساتھ تھی ۔ وہی ہم دونوں کے درمیان تعلق کا سبب بنے تھے۔ مرحوم کی مغفرت اور درجات کی بلندی کے لئے دعاگو ہوں۔

آنجہانی صدر جمہوریہ سروپلی رادھا کرشن کے یوم پیدائش ( 5 ستمبر )پر ہرسال پورے ملک میں ’یوم اساتذہ‘ منایا جاتا ہے اور اس موقع پر اساتذہ کو اعزاز واکرام سے نوازا جاتا ہے۔ ایک بہترین استاد ہی دراصل قوم کے مستقبل کا معمار ہوتا ہے، لیکن آج ہم جس دور میں زندہ ہیں، اس میں تعلیم ایک کاروبار کی شکل اختیار کرچکی ہے اور اساتذہ بھی اسی کاروبار کا ایک حصہ ہیں۔ ایسے اساتذہ خال خال ہی نظر آتے ہیں جن کا تذکرہ کیا جائے یا جنھیں صحیح معنوں میں خراج تحسین پیش کیا جائے۔ مگر میں آج کے دن کی مناسبت سے آپ کو ایک ایسے استاد سے متعارف کراتا ہوں، جنھوں نے مجھے زندگی میں سب سے زیادہ متاثر کیا۔ یہ تھے میرے پرائمری اسکول کے استاد جناب ساجد علی صاحب۔

مرادآباد میں اندراچوک (پرنس روڈ)پر واقع جونیئر ہائی اسکول، کٹارشہید میری ابتدائی تعلیم کی یادوں کا سب سے متحرک حصہ ہے۔ یہاں میں نے مڈل کلاس تک تعلیم حاصل کی ہے۔ جب میں ابتدائی جماعت میں داخل ہوا تو اسکول کی حالت بہت خستہ تھی، جیسی کہ اس زمانے میں اکثر سرکاری اسکولوں کی ہوتی تھی۔ٹاٹ کی ایک پٹی پر بیٹھ کر ہم پڑھتے تھے اور لکھنے کی مشق کرنے کے لیے تختی کو روزانہ کھریا مٹی سے دھوکر لاتے تھے۔ ماسٹر ساجد علی صاحب چوتھی یا پانچویں کلاس میں ہمارے تمام مضامین کے استاد تھے۔ کلاس میں بچوں کی تعداد تقریباً 25 تھی، لیکن ان میں چارپانچ بچے ہی ایسے تھے جنھیں پڑھنے سے کوئی سروکار تھا۔ باقی موج مستی کرنے اسکول آتے تھے۔ ماسٹر ساجد علی صاحب ان چاریاپانچ بچوں کو اسکول کی چھٹی کے بعد اپنے گھر لے جاتے تھے اور وہاں ہمیں کھانا کھلاکر شام تک پڑھاتے رہتے تھے۔ انھوں نے کبھی اس کا کوئی معاوضہ طلب نہیں کیا اور نہ ہی ہمارے والدین پر اس کا احسان جتایا۔انھوں نے ابتدائی کلاسوں میں ہم پر جو محنت کی تھی، وہی آج ہمارے بہت کام آرہی ہے۔آج کے دور میں ایسے اساتذہ کا کوئی تصور ہی نہیں ہے۔

تنہائی لوگوں کے لیے تباہ کن ثابت ہوسکتی ہے، ماہرین صحت کے مطابق تنہائی کا شکار افراد کے امراض قلب میں مبتلا ہونے کے خطرات زیادہ ہوتے ہیں۔ تنہائی کی وجہ سے جسم بعض ایسے ہارمون خارج کرتا ہے جو ڈپریشن اور تناؤ کو ظاہر کرتے ہیں،ان میں کارٹیسول بہت نمایاں ہے، اس سے دل کے امراض، بلڈ پریشر اور ذیابیطس کا جنم بھی ہوسکتا ہے۔تحقیق بتاتی ہے کہ اگر آپ کی تنہائی بہت طویل ہو تو اس سے بہت گہرے منفی اثرات مرتب ہوتے ہیں۔ماہرین کا کہنا ہے کہ اگر انسان تنہا اور الگ تھلگ رہتا ہے تو اس سے امراضِ قلب کے خطرات 29 فیصد اور فالج کے خطرات 32 فیصد تک بڑھ جاتے ہیں۔ماہرین کے مطابق تنہائی بلڈ پریشر میں اضافے اور جسم کے قدرتی دفاعی نظام کو شدید متأثر کرنے کی وجہ بنتی ہے۔

محترم و مکرّم رانا صاحب!

اللہ کے فضل سے زندگی گلزار ہے، عطا کی بارش ہے اور عافیت کا سایہ، امید کہ آپ بھی نعمِ خداوندی سے لطف اندوز ہورہے ہوں گے۔ ان دنوں آپ کا ایک متنازعہ مکالمہ خوب گردش کررہا ہے جس میں آنجناب ایک مؤقر سیاست داں کو ماں کی گالی دے رہے ہیں۔ اسی ماں کو جسے آپ نے اپنی شاعری کا موضوع بنایا، نام کمایا، شہرت کی بلندی پر پہنچے۔ ایک گالی نے آپ کی تمام تر شاعری کو مشکوک کردیا، لفظ بودے ہوگئے، ردیف اداکار نظر آنے لگے اور قافیے بےجان مجسمّے محسوس ہوئے۔ ماں کی عظمت اور ممتا کا تذکرہ کرنے والے انسان کا کردار تو یہ ہونا چاہیے کہ وہ اپنے دشمن کی ماں کا بھی احترام کریں؛ کیوں کہ ماں، ماں ہوتی ہے۔ اشتعال کا لاوا پھوٹ پڑے تب بھی کسی شریف انسان کو یہ حق نہیں پہنچتا کہ وہ مقدّس رشتے کا حوالہ دے کر گالم گلوچ کرے۔ "نیم کے پھول” میں آپ کا لہجہ شہد سے زیادہ شیریں ہے، یوں لگتا ہے جیسے شہد کا چشمہ جاری و ساری ہے، مگر اس متنازعہ مکالمہ کے دو بول نے اس پورے چشمے کو کڑوا کردیا ہے۔ لکھنو کی تہذیب، عمر کا پڑاؤ، مذہب کی تعلیم اور خاندان کی شرافت کا تقاضہ ہے کہ سرِعام معافی مانگی جائے۔ اختلاف ہو مگر سب و شتم سے گریز کیا جائے۔ تلخ کلامی ہو مگر بدگوئی نہ ہو۔ ناراضی ہو مگر تعصب نہ ہو۔ آپ کسی پر تنقید کریں گے تو لازماً وہ یا اس کے عقیدت مند آپ سے بازپرس کریں گے، کوئی سرپِھرا اشتعال بھی دلاسکتا ہے اس پر مشتعل ہوجانا موقف کی کمزوری یا بےظرفی کی علامت ہے۔ تنقید کے خبط میں راقم بھی مبتلا ہے اور اکثر تلخ لکھتا بھی ہے جس پر تنقید کی بھینٹ چڑھے ہوئے بزرگ کے عقیدت مند کال بھی کرتے ہیں مگر الحمد للہ اس نوعیت کے مکالمے وقوع پذیر نہیں ہوتے کیوں کہ یا تو خاموش رہتا ہوں یا کال ہی ریسیو نہیں کرتا۔

رانا صاحب! یہ” کال سسٹم” بڑی خطرناک چیز ہے۔ چند دنوں پہلے ہمارے یہاں ایک نوجوان نے جناب اویسی کی پارٹی ہی کے ایک ممبر آف پارلیمنٹ کی نیند حرام کردی تھی لہذا خاموش رہیں، شخصیت کا بھرم باقی رہتا ہے، منافقت پر پردہ پڑا رہتا ہے، جھوٹا کردار چھپا رہتا ہے اور شرافت کا مصنوعی دیا بدستور جلتا ہے۔ مجلس پر تنقید کریں اور ضرور کریں مگر سماج وادی پارٹی کا مکروہ چہرہ بھی لوگوں کو دکھائیں اور  کانگریس کی مکاری اور عیاری کو بھی عیاں کریں کیوں کہ ان دونوں نے مجلس سے زیادہ امت کا استحصال کیا ہے۔ حالیہ تناظر میں کوئی پارٹی یا سیاست داں مسیحا نہیں لہذا عوام کو فقط یہ مشورہ دیجیے کہ اپنے علاقے کے لیے موزوں ترین امیدوار کا انتخاب کریں۔ بی جے پی سے بھارت کو چھٹکارہ دلانا ہمارا مقصد نہیں، ہمارا مقصد اپنے مطالبات منوانا ہے۔ دل تو چاہتا ہے آپ سے اور بھی موضوعات پر گفتگو کی جائے مگر پھر آپ کا غضبناک چہرہ اور تھرتھراتے ہونٹوں سے نکلنے والی گالی یاد آجاتی ہے اس لیے یہیں پر اپنی بات ختم کررہا ہوں۔

ہاں! ایک التجا ضرور ہےکہ علماے امّت پر تنقید نہایت حسّاس موضوع ہے، یہاں آئینہ دکھانے والا کفر و فسق تک پہنچتا ہے، اب آپ ان کی جھوٹی اور بدنما تصویر بنائیں گے تو خود ہی اندازہ لگالیجیے کیا حشر ہوسکتا ہے؟ یہ سیاست داں نہیں جو جان لے کر پیچھا چھوڑ دیں یہ لوگ جہنّم تک دوڑاتے ہیں سو بچ کر رہیں!

فقط والسلام

میں تمام ہوش وحواس کے ساتھ آر ایس ایس چیف موہن بھاگوت کے تازه بیان کا خیر مقدم کرتا ہوں ۔انہوں نے گزشتہ روز غازی آباد میں "راشٹریہ مسلم منچ” کے ایک پروگرام میں تقریر کرتے ہوئے کئی باتیں بڑی اہم کہی ہیں ۔ انہوں نے یہ پہلی بار کہا ہے کہ ماب لنچنگ ہندوتوا کے خلاف ہے۔ یہ بھی پہلی بار کہا ہے کہ جو مسلمانوں کو ہندوستان چھوڑنے کیلئے کہے وہ ہندو نہیں ہے۔ انہوں نے یہ بھی کہا کہ ہندو اور مسلمانوں کو ڈوائڈ (تقسیم) کی نہیں ڈائیلاگ (مذاکرات) کی ضرورت ہے اور یہ کہ ہندوستان سب کا ہے اور یہ کہنا کہ ہندؤں کا زیادہ ہے یا مسلمانوں کا زیادہ ہے’ غلط ہے۔

میں نے ایک ٹویٹ کے ذریعہ موہن بھاگوت کے بیان کا غیر مشروط خیر مقدم کرتے ہوئے ان سے درخواست کی ہے کہ اپنے بیان کی روشنی میں آپ حکومت سے کہیں کہ وہ ماب لنچنگ کے خلاف ایک سخت قانون بنائے’ متاثرین کو معاوضہ ادا کرے اور مجرموں کو سزا دلوائے ۔

میرا خیال ہے کہ مسلمانوں کو موہن بھاگوت کے مذکورہ بیان کا فی الحال کوئی اگر مگر کئے بغیر خیر مقدم کرتے ہوئے مذکورہ مطالبہ دوہرانا چاہئے۔ آپ ان کے بیان کے "فریم” میں ہی ان سے عمل کا مطالبہ کیجئے۔ ان کے بیان سے آگے بڑھ کر کوئی بات نہ کہئے۔ نتیجہ کا انتظار کیجئے مگر کسی ممکنہ نتیجہ پر بھی کوئی رائے ظاہر نہ کیجئے۔ ایسا کرنے میں کوئی حرج نہیں ہے۔

” امیرالھند ” ہو یا امارت، ہندوستان کے پس منظر میں ان کی ضرورت اور افادیت پر اختلاف رائے ہوسکتا ہے اور ہے بھی،احقر کا شمار اگرچہ اربابِ بصیرت میں کبھی نہیں رہا، مگر الحمد للہ مالک نے مجھے صاحب نظر ضرور بنایا ہے،اس سلسلے میں میری بھی ایک رائے ہے، جس کا اظہار سابق میں بارہا کرتا رہا ہوں اور حسب موقع آئندہ بھی کرون گا- آج کی نشست میں کچھ دوسری بات عرض کرنی ہے ـ

آزاد ہندوستان میں ملی مسائل کے لئے بہت سی تنظیمیں سرگرم رہی ہیں، ہر تنظیم کا اپنا طریقۂ کار اور پالیسی ہوتی ہے ،جس سے ہمارا آپ کا متفق ہونا ضروری نہیں ہے، تاہم مجموعی کارکردگی کے اعتبار سے جب بھی ملت اسلامیہ ہند کے لئے کام کرنے والی تنظیموں کا ذکر آئے گا،تو ان میں جمیعۃ علماء ہند کو سرفہرست ضرور رکھنا پڑے گا ـ

ماضی قریب میں جس طرح ہندوستانی مسلمانوں کی اس مفید اور فعال تنظیم کے اندر آپسی اختلافات پیدا ہوئے، کوئی مانے یا نہ مانے ان اختلافات کا اثر جماعت کی مجموعی کارکردگی میں بھی صاف دیکھا گیا،اس لیے ملت کی موجودہ زبوں حالی اور درماندگی پر کُڑھنے والے ہر دردمند مسلمان کی یہ خواہش تھی کہ کاش قوم کی یہ متحرک تنظیم ایک بار پھر متحد ہوکر میدان سنبھالے ـ
شکرِ ربی کہ دعائیں قبول ہوئیں اور امیر الھند کے متفقہ انتخاب سے ” قران السعدین ” کا آغاز ہوگیا ہے، دعائیں جاری رہیں، اللہ نظر بد سے بچائے ـ

عمر گوتم اور ان کے ساتھی مفتی جہانگیر کی گرفتاری کو کئی دن گذر چکے ہیں۔ ایک معمولی مسئلے میں، جس میں ان کا براہ راست کوئی تعلق نہیں تھا، ان کو گرفتار کر کے ان پر الزام پر الزام لگایا جا رہا ہے: ایک ہزار پھر تین ہزار لوگوں کو زبردستی مسلمان بنانے کا الزام ہے۔ گونگے بہرے لڑکوں کو دھوکے سے مسلمان بنانے کا الزام ہے۔ بدنام زمانہ آئی ایس آئی سے اس کام کے لئے پیسے لینے کا الزام ہے۔ گودی میڈیا دن رات چنگھاڑ رہا ہے۔ سنگھ کے پیشہ ور نفرت پھیلانے کے ٹھیکیدار صبح شام زہریلے بیانات دے رہے ہیں۔ عمر گوتم اور ان کے ساتھی مفتی کی کوئی بھی بات سامنے نہیں آ رہی ہے۔صرف پولیس کے بیان آرہے ہیں یا سنگھی بول رہے ہیں۔ زبردستی لوگوں کا مذہب بدلوانے ، مسئلے کو دہشت گردی سے جوڑنے اور اب ان پر این ایس اے قانون لگانے کی بات ہو رہی ہے جو کہ صرف ان لوگوں پر لگتا ہے یا لگنا چاہیے جو ملک کی سلامتی کے لیے خطرہ ہوں۔

اس سب کے درمیان سب سے عجیب بات یہ ہے کہ مسلمانوں کی طرف سے بالکل خاموشی ہے! جو لوگ ملت کے چودھری بنے ہوئے ہیں، بڑی بڑی تنظیمیں چلا رہے ہیں، روز اپنے کارناموں کی پریس ریلیز نکالتے ہیں اور اردو اخبارات میں محنت کرکے چھپواتے ہیں ، ملت کے لیے کام کرنے کے نام پر بڑے بڑے چندے جمع کرتے ہیں؛ وہ سب لوگ خاموش ہیں جیسے اس مسئلے کا ان سے کوئی تعلق نہیں۔ شاید وہ سمجھتے ہیں کہ اس طرح یہ آگ یا ایجنسیوں کی دستک ان تک نہیں پہنچے گی۔

عمر گوتم کا مسئلہ ان کا ذاتی مسئلہ نہیں ہے۔ وہ تو دستور ہند کی دفعہ ۲۵ کے مطابق اپنا کام کر رہے تھے۔ اگر انھوں نے کوئی غلطی کی ہے تو اس کی صاف ستھرے طور سے چانچ ہونی چاہیے؛ لیکن میڈیا ٹرائل اور اتر پردیش حکومت کی ان کو پھانسنے کے لیے بے چینی بتاتی ہے کہ معاملہ کچھ اور ہے۔ در اصل اترپردیش کے الیکشن سے پہلے ماحول کو خوب گرم کرنا ہے، ہندو مسلم کر کے پولرائزیشن کرانا ہے، فسادات کرانے ہیں اور اس کے لیے اس طرح کی کارروائیاں ضروری ہیں۔

اس ظالمانہ سیلاب کو روکنے کے لیے ہمیں متحد ہوکر آواز بلند کرنی ہوگی ، متحد ہوکر سیاسی اور عدالتی چارہ جوئی کرنی ہوگی۔ ورنہ سب ایک ایک کر کے پھنسائے جائیں گے اور اس وقت بولنے والا کوئی نہیں ہوگا۔ اب بھی وقت ہے کہ ملی تنظیمیں اور قائدین مسئلے کو سنجیدگی سے لیں اور ایک پلیٹ فارم پرآکر اس طوفان بد تمیزی کا مقابلہ سیاسی اور عدالتی سطح پر کریں، ورنہ ایک وقت ایسا بھی آسکتا ہے، جب اس کی بھی اجازت سنگھی بادشاہت میں نہیں ہوگی۔

بے روزگاری سے عوام پہلے سے ہی پریشان تھے، مگر آج ایک خبر نے صورت حال کو مزید سنگین کر دیا ہے۔ انفارمیشن ٹیکنالوجی میں انقلاب آنے کا ایک بہت بڑا فائدہ یہ ہوا کہ ملازمت کے مواقع میں بے تحاشہ اضافہ ہوا اور ہندوستان کے کئی شہر بالخصوص حیدرآباد، پونے اور بنگلور آئی ٹی ہب بنے۔ ان مقامات پر ملکی و غیر ملکی کمپنیوں نے اپنا کام شروع کیا جس میں کمپیوٹر سائنس انجنیئر، آئی ٹی ایکسپرٹ ، سافٹ ویر ڈویلپر، سسٹم انیلسٹ ، پروگرامر سے لے کر مختلف زبانوں کے معاونین بشمول عربی کے لئے روزگار کے مواقع نکلے اور ہزاروں لوگ دہلی، حیدرآباد، پونے اور کرناٹک میں ان کمپنیوں میں برسر روزگار ہوئے۔
دوسرے میدان عمل بالخصوص صنعتی فیکٹریوں اور کنسٹرکشن ورک کے برعکس آئی ٹی کے کام کی نوعیت خالص کمپیوٹر سے منسلک تھی اس لیے لاک ڈاؤن سے یہ لوگ بہت زیادہ متاثر نہیں ہوۓ اور ورک فرام ہوم کام چلتا رہا اور مشاہرہ ان کے اکاؤنٹ میں ٹرانسفر ہوتا رہا۔

پریشان کن خبر یہ ہے کہ آئی ٹی کمپنیوں ؛ ٹاٹا کنسلٹنٹسی سروسز، انفوسس، وِپرو وغیرہ نے اعلان کیا ہے کہ 2022 تک وہ 30 لاکھ ملازموں کو بر طرف کر دیں گی، جن کی تنخواہوں پر تقریباً سو بلین ڈالر سالانہ خرچ ہوتا ہے۔ بالفاظ دگر ان کمپنیوں کی سالانہ 100 بلین ڈالر کی بچت ہو گی۔

ان ملازمین کے متبادل کے طور پر وہ روبوٹ کا سہارا لیں گی جسے (RPA) robotic process automation کہا جاتا ہے۔ یہ ایک سافٹ ویئر ڈیجیٹل ورک فورس ہے جو کمپیوٹر پر ویسے ہی کام کرتا ہے جیسے انسان کرتا ہے یعنی یہ کلک کرتا ہے، ٹائپ کرتا ہے ، اپلیکیشن یوز کرتا ہے ، کی بورڈ شارٹ کٹ یوز کرتا ہے اور فائل کھولتا ہے وغیرہ۔ یعنی انسان کی مکمل نقل کرتا ہے۔
گرچہ RPA سسٹم ڈیولپ اور انسٹال کرنے کے لئے بھی RPA based computer skilled انسانوں کی ضرورت ہوتی ہے اور آسامیاں خالی ہیں لیکن ظاہر ہے ان کی تعداد بہت کم رہے گی۔ مستقبل کے لیے منصوبہ بنا کر چلنے والوں کے لیے اب RPA کی تعلیم و تربیت پر توجہ مرکوز کرنی چاہیے۔