قومی خبریں

اردو میڈیا سے وابستہ افراد کو زبان و بیان اور صحافتی اصول و ضوابط سے واقف کرانا بہت ضروری ہے: پروفیسر شافع قدوائی

نئی دہلی:قومی کونسل برائے فروغ اردو زبان نئی دہلی کے صدر دفتر میں آج ماس میڈیا پینل کی میٹنگ ہوئی جس کی صدارت علی گڑھ مسلم یونیورسٹی کے جرنلزم اینڈ ماس کمیونی کیشن ڈپارٹمنٹ کے پروفیسر شافع قدوائی نے کی۔ اس میٹنگ میں ملک کے مختلف علاقوں سے تعلق رکھنے والی اہم شخصیات نے شرکت کی۔ میٹنگ کے آغاز میں قومی اردو کونسل کے ریسرچ آفیسر ڈاکٹر کلیم اللہ نے تمام مہمانوں کا استقبال کیا اور اس پینل کے مقاصد پر روشنی ڈالی۔ اس موقعے پر قومی اردو کونسل کے ڈائرکٹر ڈاکٹر شمس اقبال نے کہا کہ ہر زمانے میں جب نئے چیلنجزاور مسائل آتے ہیں تو راستے بھی نکلتے ہیں۔ آپ حضرات میڈیا کے اہم ستون ہیں۔ آج میڈیا کے مسائل اور چیلنجز کو سامنے رکھتے ہوئے ہمیں ایسے مفید مشورے دیں جن کو بروئے کار لاکر اردو میڈیا کے مسائل او رامکانات کے حوالے سے مثبت اور معنی خیز گفتگو کی جاسکے ۔ پروفیسر ایم شافع قدوائی نے ماس میڈیا پینل کی اہمیت اور افادیت پر روشنی ڈالی اور کہا کہ یہ پینل ورکنگ جرنلسٹ کے لیے بہت اہم ہے۔ بنیادی مسائل سے عدم واقفیت کی بنا پر بسااوقات بہت سی فاش غلطیاں بھی دیکھنے کو ملتی ہیں۔ آج اردو میڈیا سے وابستہ افراد کو زبان و بیان اور صحافتی اصول و ضوابط سے واقف کرانا بہت ضروری ہے۔ اس پینل کے ذریعے ماضی میں بھی قومی اردو کونسل نے اہم ورکشاپ کرائے جن کے مفید اور مثبت نتائج سامنے آئے۔ اس طرح کے ورکشاپ کی مزید ضرورت ہے۔ ڈاکٹر قاسم خورشید (سابق صدر ایس سی آر ٹی بہار) نے کہا کہ منظرنامہ بدل چکا ہے، بدلتے منظرنامے کے مطابق ہی منصوبہ بنانے کی ضرورت ہے۔ پروفیسر دانش اقبال (انور جمال قدوائی ماس کمیونی کیشن ریسرچ سینٹر، جامعہ ملیہ اسلامیہ) نے کہا کہ آج کے دور میں میڈیا کے جو اہم مسائل ہیں ان پر سنجیدگی سے غور کیا جانا چاہیے ۔ جناب محمد سلیم عارف نے کہا کہ تلفظ اس وقت کا اہم مسئلہ ہے۔ اس کے لیے ہمیں تھیٹر ورکشاپ اور اسپیکنگ ڈکشنری کی سخت ضرورت ہے۔ پروفیسر سیدہ افسانہ (میڈیا ایجوکیشن ریسرچ سینٹر، کشمیر یونیورسٹی ) نے کہا کہ اردو زبان کو پاپولر بنانے کے لیے اسٹوری ٹیلنگ کا نیشنل پروگرام کیا جائے تو اس سے نوجوانو ں کو رہنمائی اور روشنی ملے گی۔ ان حضرات کے علاوہ پروفیسر وریندر کمار بھارتی (صدر ڈپارٹمنٹ آف پبلی کیشنز اینڈ ایڈیٹر کمیونی کیٹر جنرل، آئی آئی ایم سی، نئی دہلی)، پروفیسر احتشام احمد خان (اسکول آف ماس کمیونی کیشن اینڈ جرنلزم، مولانا آزاد نیشنل اردو یونیورسٹی حیدرآباد)، ڈاکٹر شہباز حسیبی (پی آئی بی)، جناب محمد عبدالستار (وائس پریسیڈنٹ فار دکن اردو ایڈیٹرس کانفرنس ، حیدرآباد) وغیرہ نے بھی اظہار خیال کیا۔ میٹنگ کے دوران اس پینل کے تحت مختلف ایجنڈوں پر غور و خوض کیا گیا۔ ڈاکٹر کلیم اللہ (ریسرچ آفیسر) کے اظہار تشکر پر میٹنگ کا اختتام عمل میں آیا۔

انڈین نالج سسٹم اور کثیر لسانی ہندوستانی ثقافت کے فروغ میں اردو زبان و ادب کا کردار غیر معمولی اہمیت رکھتا ہے:ڈاکٹر شمس اقبال
قومی اردو کونسل کے صدر دفتر میں‘اردو ادب پینل’ کی میٹنگ

نئی دہلی:قومی کونسل براے فروغ اردو زبان کے صدر دفتر میں آج اردو ادب پینل کی میٹنگ کا اہتمام کیا گیا جس کی صدارت معروف ناقد و دانشور پروفیسر قدوس جاوید نے کی۔ میٹنگ کے آغاز میں کونسل کے ڈائرکٹر ڈاکٹر شمس اقبال نے تمام معزز مہمانوں کا استقبال کیا اور کہا کہ اس نوتشکیل شدہ پینل میں ملک کی نمایندہ ادبی شخصیات شامل کی گئی ہیں اور ہمیں توقع ہے کہ آپ کی رہنمائی میں اس پینل کے تحت مفید اور ضروری ادبی موضوعات پر کام ہوگا۔انھوں نے2047تک ترقی یافتہ ہندوستان کی تعمیر میں ہندوستانی نالج سسٹم اور کثیر لسانی ثقافت کے کردار کا حوالہ دیتے ہوئے مزید کہا کہ اس کے فروغ و استحکام میں ملک کی دیگر زبانوں کے ساتھ اردو کو بھی مطلوبہ کردار ادا کرنا چاہیے۔ڈاکٹر شمس اقبال نے کہا کہ اس مقصد کے حصول کے لیے اردو زبان میں مختلف ہندوستانی زبانوں کے معیاری ادب کا ترجمہ شائع کرنا ضروری ہے،جس کے لیے کونسل پرعزم ہے اور ریاستی اردو اکادمیوںکو خط ارسال کرکے متعلقہ ریاست کے نمایندہ ادب کی نشان دہی کی درخواست کی جائے گی تاکہ اسے اردو قارئین تک بھی پہنچایاجاسکے اور تمام ہندوستانی زبانوں کے مابین ہم آہنگی کو مضبوط کیا جاسکے۔ میٹنگ کے چیئر مین پروفیسر قدوس جاوید نے معیاری ادب کی اشاعت پر زور دیتے ہوئے کہا کہ اردومیں عربی،فارسی،سنسکرت کی بنیادی تحقیقی و تنقیدی کتابوں کے تراجم بھی شائع ہونے چاہئیں ۔انھوں نے کہا کہ روایتی انداز کے غیر مفید موضوعات کے بجائے موجودہ دور میں کارآمد موضوعات پر تصنیف،تحقیق اور ترجمے پر توجہ دینے کی ضرورت ہے۔ سینئر ادیب و دانشور جناب جانکی پرساد شرمانے کہا کہ ہندی ریاستوں کے لوک گیتوں کو اردو میں منتقل کرکے ان کا انتخاب شائع کرنا بھی ایک اہم کام ہوگا۔اس موقعے پر یہ فیصلہ بھی کیا گیا کہ اردو زبان میں اردو کی اہم ادبی شخصیات کے مونوگراف کے علاوہ ہندی اور دیگر ہندوستانی زبانوں کی اہم ادبی شخصیات کے بھی مونوگراف اور ان کی نمایندہ تحریروں کے انتخابات تیار کروائے جائیں تاکہ اردو والے بھی ان سے آشنا ہوسکیں۔ اسی طرح اس میٹنگ میں ہم عصر ٹکنالوجی جیسے آرٹیفیشیل انٹیلی جنس وغیرہ پر اردو مواد کی تیاری کے ساتھ ماحولیات اورقدرتی ذخائر کے تحفظ وغیرہ پر بھی اردو کتابوں کی تیاری و اشاعت پر زور دیا گیا۔
میٹنگ کے دوران اردو ادب پینل کی گزشتہ میٹنگ (منعقدہ 4اگست 2022)کی روداد کی تصدیق کے ساتھ اس کے تحت چل رہے مختلف اشاعتی پروجیکٹس کی صورتحال کا جائزہ لیا گیا اور متعدد کتابوں کی اشاعت پر اطمینان کا اظہار کیا گیا،جبکہ نئے موصول ہونے والے پروپوزلس پر بھی غورکرکے ان کے تعلق سے فیصلہ لیا گیا ۔پینل کے ممبران نے اس پر زور دیا کہ آج کے دور کے اشاعتی طریقۂ کار کو دیکھتے ہوئے ضخیم اور کئی کئی جلدوں پر مشتمل کتابوں کی کثیر تعداد میں اشاعت کی بجاے ’پرنٹ آن ڈیمانڈ‘ کے اصول پر عمل کیا جائے ،ان کا یہ بھی کہنا تھا کہ ضخیم کتابوں کے انتخابات شائع کیے جائیں اور اصل ورژن پی ڈی ایف یا ای پب فارمیٹ میں کونسل کی ویب سائٹ یا ای -کتاب ایپ پر آن لائن فراہم کروادیا جائے تاکہ جنھیں ضرورت ہو وہ اس سے استفادہ کرلیں۔
میٹنگ میں شامل پینل کے دیگر ممبران میں پروفیسر صغیر افراہیم،پروفیسر نسیم الدین فریس،پروفیسر شبنم حمید،پروفیسر احمد محفوظ،پروفیسر آفتاب عالم آفاقی،پروفیسر مشتاق عالم قادری(آن لائن)، ڈاکٹر نعیم انیس،ڈاکٹر درانی شبانہ قابل ذکر ہیں،جبکہ ڈاکٹر خاور نقیب کسی ناگزیر وجہ کی بناپر شریک نہ ہوسکے۔ان کے علاوہ این سی پو ایل کی گورننگ کونسل کے ممبران ڈاکٹر سید مشیر عالم (آن لائن) ور ڈاکٹر شمشیر سنگھ نے بطور مدعوئین خصوصی شرکت کی۔ کونسل سے ڈاکٹر شمع کوثر یزدانی(اسسٹنٹ ڈائرکٹر،اکیڈمک)، ڈاکٹر مسرت(ریسرچ آفیسر)،ڈاکٹر عبدالباری(اسسٹنٹ ایڈیٹر) نایاب حسن(ریسرچ اسسٹنٹ) ، نہاں(ریسرچ اسسٹنٹ)،نصرت جہاں(ریسرچ اسسٹنٹ) اور محمد افروز(ویب ماسٹر) وغیرہ میٹنگ میں موجود رہے۔

خصوصی خطبات طلبا و طالبات کی ذہن سازی کے لیے ناگزیر :پروفیسر ابوبکر عباد

نئی دہلی: شعبۂ اردو دہلی یونیورسٹی کے زیر اہتمام خصوصی لیکچر بعنوان ’’جدید ترقی پسندی” بتاریخ ٢٧؍مئی بروز بدھ منعقد ہوا۔ جس میں خصوصی لیکچر معروف ادیب و ناقد” پروفیسر اسلم جمشید پوری ” نے دیا۔تقریب کے آغازمیں صدر شعبۂ اردو پروفیسر ابوبکر عباد نے استقبالیہ کلمات پیش کرتے ہوئے خصوصی لیکچرکے اغراض و مقاصد بیان کیےاور کہا کہ ہم نصاب کے سوا ادب کے دیگر پہلوؤں پر بھی خصوصی لیکچرز منعقد کرتے ہیں تاکہ اس کے ذریعے طلباو طالبات نصاب کے دائرے سے باہر نکل کر ایسے ماہرین کو بھی سنیں جو دیگر شعبہ ہائے زندگی میں رہ کر ادب کی خدمات انجام دے رہے ہیں۔ایک سوال کا جواب دیتے ہوے پروفیسر ابوبکر عباد نے مزید کہا کہ کوئی بھی ادیب کسی تحریک یا ادب کو پیش نظر رکھ کر یا کسی مخصوص تحریک یا رجحان کے منشور کو سامنے رکھ کر ادب خلق نہیں کرتا، تاہم اس کے ذہن کے کسی گوشے میں اس کی پسندیدہ تحریک ہوتی ہے، جس کی وجہ سے اس کا ادب کسی تحریک یا رجحان کی طرف اشارہ کرتا ہے.

پروفیسر اسلم جمشید پوری نے اپنا پر مغز لیچکر دیا جس میں انھوں نے کہا کہ ہر چیز وقت کے ساتھ ترقی کرتی ہے لہذا ترقی پسند تحریک ،جدیدیت اور ما بعد جدیدت کا زمانہ اب ختم ہوا۔تاہم انہوں نے اس نئے دور کو جدید ترقی پسندی سے تعبیر کرتے ہوئے ہے کہا کہ اس نئے زمانے کو دوسرا کوئی اور نام بھی دیا جا سکتا ہے ۔انھوں نے خصوصی طور پر مابعد جدید کے اختتام کا اعلان کیا اور معاصر ادب میں پائے جانے والے جدید ترقی پسندی کی نشاندہی کی

پروگرام کے آخر میں شعبہ اردو چودھری چرن سنگھ یونیورسٹی ، میرٹھ سے نکلنے والا رسالہ "ہماری آواز "عارف نقوی نمبر کا اجرا‌ بھی عمل میں آیا۔

لکچر کے آخرمیں بطور خاص سوال و جواب کے سیشن کا بھی اہتمام کیا گیا بہت سے طلبہ و طالبات نے اپنے اپنے سوالات کیے جس کا انھیں تشفی بخش جواب بھی ملا۔

طلبہ کے بہت سے سوالوں کے جوابات شعبے کے مختلف اساتذہ نے بھی دیے ان میں صدر شعبہ اردو پروفیسر ابوبکر عباد صاحب اور پروفیسر ارجمند آرا صاحبہ بھی شریک رہیں۔

پروگرام میں شعبۂ اردو کے دیگر اساتذہ پروفیسر محمد کاظم،ڈاکٹر احمد امتیاز وغیرہ کے ساتھ اردو کے معروف افسانہ نگار ” جناب اسرار گاندھی” بھی موجود تھے۔ علاوہ ازیں شعبہ کے ریسرچ اسکالر اوردیگر طلبا و طالبات نے کثیر تعداد میں شرکت کی۔

قومی اردوکونسل کے صدر دفتر میں کریٹیو رائٹنگ اینڈ چلڈرن لٹریچر پینل کی میٹنگ

نئی دہلی: قومی اردو کونسل کے صدر دفتر جسولہ، نئی دہلی میں 22مئی 2025کو کریٹیو رائٹنگ اینڈ چلڈرن لٹریچر پینل کی میٹنگ ہوئی جس کی صدارت معروف فکشن نگار ، شاعر اور ماہر درسیات پروفیسر غضنفر نے کی ۔ میٹنگ میں قومی اردو کونسل کے ڈائرکٹر ڈاکٹر شمس اقبال ،گورننگ کونسل کے ممبران میں جناب محمد شہزاد،جناب ارشد فریدی کے علاوہ این بی ٹی کے چیف ایڈیٹر اور جوائنٹ ڈائرکٹر جناب کمار وکرم ، ڈاکٹر امجد حسین حافظ کرناٹکی ، جناب اقبال برکی، ڈاکٹر نعیمہ جعفری پاشا، جناب سراج عظیم ،محترمہ شاہ تاج خان،محترمہ شائستہ یوسف، ڈاکٹر شمع کوثر یزدانی (اسسٹنٹ ڈائرکٹر، اکیڈمک)، ڈاکٹر مسرت(ریسرچ آفیسر، اکیڈمک)، ڈاکٹر عبد الباری(اسسٹنٹ ایڈیٹر) ، نہاں رباب(ریسرچ اسسٹنٹ، اکیڈمک)اور محمد افروز (ویب ماسٹر)وغیرہ شامل ہوئے۔

اس موقعے پر اظہار خیال کرتے ہوئے قومی اردو کونسل کے ڈائرکٹر ڈاکٹر شمس اقبال نے کہا کہ نئی نسل کی تربیت اور ان کی صلاحیتوں کو پروان چڑھانا کونسل کی اولین ترجیح ہے ۔اسی لیے میں نے بچوں اور نوجوانوں کو سامنے رکھ کر یہ پینل بنایا ہے تاکہ نئی نسل کو ان کے ذوق کے مطابق علمی مواد فراہم کیا جا سکے۔کریٹیو رائٹنگ اینڈ چلڈرن لٹریچر پینل کے چیئرمین پروفیسر غضنفر نے کہا کہ آج ضرورت اس بات کی ہے کہ بچوں اور نوجوانوں کی تخلیقی صلاحیتوں کو بیدار کیا جائے تاکہ وہ اپنی تخلیقیت کا استعمال کر سکیں ۔ تخلیقیت کے فروغ کے لیے ورکشاپ کا اہتمام کیا جائے ۔ بچوں کی عمر کے اعتبار سے بیسک ووکیبلری تیار کیا جائے جن کی روشنی میں بچوں کی ذہنی سطح کے مطابق نصابات تیار کیے جا سکیں۔ این بی ٹی کے چیف ایڈیٹر اور جوائنٹ ڈائرکٹر جناب کمار وکرم نے کہا کہ اردو میں دوسری زبانوں سے بھی مواد ترجمے کی شکل میں لینے کی ضرورت ہے ۔ اردو کی کلاسیکی کتابوں کو مختصرورژن(Abridge Version) میں شائع کیا جائے۔ کمار وکرم نے کونسل کے کاموں کی بھی ستائش کی۔ کرناٹک اردو اکیڈمی کے سابق چیئرمین ڈاکٹر حافظ کرناٹکی نے کہا ہے کہ قومی اردو کونسل بچوں اور نئی نسل کے لیے بہت عمدہ کام کر رہی ہے ۔ آج کی اس میٹنگ میں تقریباً 45 دیدہ زیب کتابوں کو منظوری دی گئی جو قومی تعلیمی پالیسی 2020 کو ذہن میں رکھ کر ورکشاپ موڈ میں تیار کی گئی تھیں۔ اس سے اندازہ لگایا جا سکتا ہے کہ قومی اردو کونسل کے اراکین کس محنت و جاں فشانی سے کام کر رہے ہیں۔میٹنگ میں شرکا نے ایک سال کی مدت میں تیار کی گئی کتابوں کی اشاعت کی منظوری کے علاوہ سابقہ برسوں میں تیار کی گئی کتابوں کو بھی منظوری دی ۔ اس موقعے پروزارت تعلیم حکومت ہند کے ایپ‘ راشٹریہ ای ۔پستکالیہ’ سے بھی جڑنے کا بھی فیصلہ کیا گیا ۔میٹنگ میں موجود ممبران نے گذشتہ ایک سال میں کیے گئے کاموں کی ستائش کرتے ہوئے نئے عزائم اور منصوبے کو پایۂ تکمیل تک پہنچانے کے لیے نیک خواہشات کا اظہار کیا۔

دہلی: دہلی یونیورسٹی کے شعبہ اردو میں ایم اے سال دوم کے طلبہ کے اعزاز میں ایک الوداعی تقریب کا انعقاد کیا گیا یہ تقریب شعبہ کے خواجہ احمد فاروقی کتب خانہ میں منعقد ہوئی تقریب کی ابتدا حمد و نعت سے ہوئی صدر شعبہ اردو پروفیسر ابو بکر عباد صاحب نے اپنے خطاب میں تمام طلبہ و طالبات سے فرمایا کہ علم ہی وہ دولت ہے جو آپ کو سرخ رو کرتی ہے اس لیے تعلیم و تعلم سے اپنا رشتہ ہمیشہ استوار رکھیں اور یہی آپ کے مستقبل کو سنوارنے میں معاون ہوگی اس کے ساتھ ساتھ یہ بھی فرمایا کہ آپسی اتحاد زندگی کے لیے اہم ہے انہوں نے نصیحت کرتے ہوئے کہا یہ بھی کہا کہ اپنی تخلیقی صلاحیتوں کو پہچانیں اور بروئے کار لانے کی کوشش کریں اس کے بعد سال دوم کے تمام طلبہ کا استقبال ایک تحفے اور پھول کے ساتھ کیا گیا پھر انہیں میں سے چند طلبہ و طالبات نے غزلیں اور نظمیں پیش کی اس تقریب میں پروفیسر ارجمند آرا ، پروفیسر محمد کاظم ، پروفیسر متھن کمار ، ڈاکٹر احمد امتیاز ، اور ڈاکٹر فرحت کمال اور دیگر اساتذہ بھی موجود رہے اس تقریب میں دو طلبہ کو مسٹر فیئر ویل اور دو طالبات کو مس فیئر ویل کے خطاب سے نوازا گیا اس کے بعد شکریہ کے ساتھ تقریب اختتام پذیر ہوئی-

نئی دہلی: شعبۂ اردو، جامعہ ملیہ اسلامیہ کے زیر اہتمام دیار میر کے میر انیس ہال میں ’’فراق گورکھپوری کی شخصیت اور فن: ایک جائزہ‘‘ کے زیر عنوان توسیعی خطبے کا انعقاد کیا گیا۔ یہ خطبہ کینیڈا میں مقیم ممتاز اردو محقق اور نقاد ڈاکٹر سید تقی عابدی نے ارشاد فرمایا۔ ڈاکٹر سید تقی عابدی نے دلکش اسلوب میں فراق گورکھپوری کے سوانحی کوائف، دلچسپ شخصیت، ذہنی کشمکش اور نفسیاتی پیچیدگیوں کا ذکر کرتے ہوئے ان کی شاعری کے چند اچھوتے اور نئے ابعاد و جہات کو روشن کیا۔ مہمان خطیب ڈاکٹر سید تقی عابدی نے اظہار خیال کرتے ہوئے کہا کہ فراق نے ہندوستان کی مٹی سے استعارے کی فصل اگائی۔ فراق کی شاعری صحیح معنوں میں سنسکرت اور ہندی کی جمالیات کا اعلی ترین اردو روپ ہے، فراق نے ڈکشن، طرز ادا، فکر و خیال اور استعارات و علامات کی سطح پر اردو شاعری کو اجنبی اور نادر جہتوں سے آشنا کیا۔

صدارتی خطبے میں صدر شعبۂ اردو پروفیسر کوثر مظہری نے کہا کہ فراق گورکھپوری ہمارے شعبے میں بطور خصوصی مطالعہ نصاب میں شامل ہے۔ فراق کی شاعری مسرت سے بصیرت تک کا سفر طے کرتی ہے۔ اپنے ہندوستانی جڑوں اور طرز تخلیق کے سبب فراق تلسی داس اور رسکھان سے متاثر تھے۔ فراق گورکھپوری کی شاعری کے ساتھ ان کی زندگی اور شخصیت بھی نہایت مقناطیسی اور پرکشش تھی۔ وہ گفتگو کرنے میں یدِ طولی رکھتے تھے۔ خطبے کے کنوینر ڈاکٹر سید تنویر حسین نے مہمان خطیب کا استقبال کرتے ہوئے ان کا مفصل تعارف پیش کیا، انھوں نے کہا کہ ڈاکٹر سید تقی عابدی کا تعلق ہندوستان کے تین زرخیز ادبی مراکز امروہہ، دہلی اور حیدر آباد سے رہا ہے۔ حالاں کہ وہ پیشے کے اعتبار سے فیزیشین ہیں لیکن اردو سے ان کا تعلق عشق و جنون کی حد تک ہے۔ وہ وطن عزیز سے بہت دور دیار غیر کے ایک اردو سے بیگانہ خطہ کینیڈا میں مقیم ہونے کے باوجود انھوں نے تحقیق و تنقید کے میدان میں غیر معمولی خدمات انجام دیں اور اب تک ان کی 70کتابیں شائع ہو چکی ہیں۔ خطبے کا آغاز ڈاکٹر شاہ نواز فیاض کی تلاوت اور اختتام ڈاکٹر مشیر احمد کے اظہار تشکر پر ہوا۔ پروگرام میں ایڈوکیٹ خلیل الرحمن، پروفیسر عبد القیوم انصاری، پروفیسر شہزاد انجم، پروفیسر احمد محفوظ، پروفیسر ندیم احمد، پروفیسر عمران احمد عندلیب، پروفیسر سرور الہدی، ڈاکٹر شاہ عالم، ڈاکٹر خالد مبشر، ڈاکٹر محمد مقیم، ڈاکٹر جاوید حسن، ڈاکٹر شاداب تبسم، ڈاکٹر راہین شمع، ڈاکٹر ثاقب عمران، ڈاکٹر نوشاد منظر، ڈاکٹر غزالہ فاطمہ، ڈاکٹر محمد آدم، ڈاکٹر حنبل رضا، جناب محمد عارف کے علاوہ کثیر تعداد میں ریسرچ اسکالرز اور طلبہ و طالبات موجود تھے۔

نئی دہلی: ادارہ ادب اسلامی حلقہ دہلی کی جانب سے معروف اسلامی شاعر، ادیب، استاد اور مفکر و دانشور ڈاکٹر تابش مہدی کی یاد میں یک روزہ قومی سیمینار بعنوان "ڈاکٹر تابش مہدی: تخلیقی جہات اور علمی خدمات” کا انعقاد کیا گیا۔ یہ سیمینار افتتاحی اجلاس، تین تکنیکی مجالس اور ڈاکٹر تابش مہدی کے مصرعوں پر مشتمل طرحی مشاعرے کے انعقاد پر مشتمل تھا۔

افتتاحی اجلاس کی صدارت مولانا آزاد یونیورسٹی جودھپور کے سابق صدر پدم شری پروفیسر اختر الواسع نے کیا۔ خطبہ استقبالیہ ڈاکٹر خالد مبشر نے پیش کیا جبکہ کلیدی خطبہ ڈاکٹر امتیاز وحید (اسسٹنٹ پروفیسر کولکاتا یونیورسٹی) نے پیش کیا
شاہ اجمل فاروق ندوی (فرزند ارجمند ڈاکٹر تابش مہدی) نے "ڈاکٹر تابش مہدی: سوانح اور شخصیت” کے عنوان سے مقالہ پیش کیا وہیں ڈاکٹر تابش مہدی کی صاحبزادی ڈاکٹر ثمینہ کوثر (اسسٹنٹ پروفیسر مانو) نے تاثرات کا اظہار کیا۔ اجلاس کا آغاز محمد اسجد (ایم‌ اے اردو جامعہ ملیہ اسلامیہ) کی تلاوت سے ہوا،
سید تجمل اسلام (ایم اے اردو جامعہ ملیہ اسلامیہ) نے ڈاکٹر تابش مہدی کی نعت گنگنا کر سامعین کو گرویدہ بنایا۔ نظامت کے فرائض مصدق مبین (سکریٹری ادارہ ادب اسلامی حلقہ دہلی) نے ادا کیے۔

پروفیسر اختر الواسع نے اپنے صدارتی خطاب میں کہا کہ ڈاکٹر تابش مہدی نے اپنی فکر اور موقف سے کبھی سمجھوتا نہیں کیا۔ وہ صرف شاعر نہیں بلکہ شاعر گر بھی تھے۔ تعلیم کے معاملے میں انھوں نے نبی کریم صلی اللہ علیہ وسلم کی پیروی کرتے ہوئے اسلامی اقداری کی پیروی کرتے ہوئے بیٹے اور بیٹیوں دونوں کی تعلیم پر یکساں توجہ دی۔

ڈاکٹر امتیاز وحید نے کلیدی خطبے میں کہا کہ ڈاکٹر تابش مہدی اسلامی شعائر کے دلدادہ تھے۔ طلبہ کی صلاحیتوں کو صیقل کرنا ان کا محبوب مشغلہ تھا۔ ان کی شاعری اسلامی شعائر کا مظہر اور اسلامی فکر کا ترجمان تھی۔

ڈاکٹر خالد مبشر نے خطبہ استقبالیہ پیش کرتے ہوئے کہا کہ ڈاکٹر تابش مہدی استاد سخن، ہمہ جہت شخصیت اور ادبی صحافت کا اہم ستون تھے۔ انہوں نے یہ بھی کہا کہ ان شاءاللہ یہ سیمینار تابش شناسی میں اہم کردار ادا کرے گا۔

شاہ اجمل فاروق ندوی نے اپنا مقالہ پیش کرتے ہوئے کہا کہ والد صاحب نے کسی کی دل آزاری کو کبھی روا نہیں سمجھا۔ وہ کتابی علم کے ساتھ ساتھ مجلسی و صحبتی علم پر بھی خاص توجہ دیتے تھے۔ انہوں ہمیشہ اپنے محسنین کو یاد رکھا اور اخلاقیات میں کبھی بھی نظریاتی خلیج کو آڑے نہیں آنے دیا۔

ڈاکٹر ثمینہ کوثر نے اپنے تاثرات کا اظہار کرتے ہوئے کہا کہ ایک عظیم باپ کی بیٹی ہونے کا فخر ہوتا ہے۔ والد صاحب نے ہمیشہ ہمیں زبان و املا پر خصوصی توجہ دی۔ اپنی بیٹیوں کو اعلی تعلیم دلا کر انہون نے وومن ایمپاورمنٹ کا سچا فریضہ انجام دیا۔

اردو اکادمی دہلی کے زیر اہتمام ’’معاصر اردو اسٹیج ‘‘پر سہ روزہ قومی سمینار کا دوسرا دن
نئی دہلی: اردو اکادمی دہلی کے زیر اہتمام سمینار بعنوان ’معاصر اردو اسٹیج ‘ کے دوسرے دن اردو ڈراما سے منسلک اہم شخصیات نے شرکت کی ۔ واضح رہے کہ اردو میں اسٹیج ڈراما پر بہت ہی کم سمینار منعقد ہوئے ہیں ۔ 32 برس قبل 1993 میں اردو اکادمی دہلی میں ہی اردو ڈرامے پر سمینار کا انعقاد عمل میں آیا تھا ،جس میں اس وقت کے مشہور و معروف شخصیات میں سے ابراہیم القاضی، حبیب تنویر، جاوید صدیقی، یش چوپڑا ،ساگرسرحدی وغیرہ بھی شامل تھے ۔ آج بھی اس سمینار میں اس فن کے مشہور و معروف شخصیات میں سے جناب ظہیر انور ، محتر مہ کیرتی جین ، سلیم عارف اور اسلم پر ویز جیسی شخصیات موجود ہیں ۔ دوسرے دن کا پہلا اجلاس جناب ظہیر انور اور جنا ب ونے ورما کی صدارت میں منعقد ہوا جس میں جناب محمد اسلم پرویز نے ’ہم عصر ہندوستانی تھیٹر اور اردو تھیٹر ‘، ڈاکٹر شاکر تسنیم نے ’ڈراما سے اسٹیج تک: مراحل اورمسائل ‘، جناب محمد سلیم عارف نے ’ شوقیہ تھیٹر سے کل وقتی تھیٹر تک :مسائل اور امکانا ت‘ ، پر وفیسر محمد کاظم نے ’ دہلی کے اردو تھیٹر گروپ : بہروپ کے خصوصی حوالے سے‘ اور محتر مہ اوما جھن جھن والا نے ’ اردو ہندی، ہندوستا نی تھیٹر ‘ پر اپنا مقالہ پیش کیا ۔ سلیم عارف صاحب نے اپنے مقالے کے درمیان ہی اس سمینار کی اہمیت پر بات کرتے ہوئے کہا کہ یہ پہلا موقع ہے کہ کوئی اردو ادارہ اردو ڈرا ما پر سمینار کرکے اپنے وقت کی اہم شخصیات کو شامل کیا اور ہم سبھی کو سنجیدہ گفتگو کا موقع بھی فراہم کیا ۔ صدارتی خطبہ پیش کرتے ہوئے جناب ظہیر انور نے کہا کہ ڈراما کرنے کی چیز ہوتی ہے جو سماج میں بیداری کا سب سے اہم ذریعہ ہے ، وجے تندولکر کے نظریے کو پیش کرتے ہوئے کہاکہ آرٹ ایک آئینہ نہیں جس پر عکس نظر آئے بلکہ ایک ہتھوڑا ہے جو سماج کو سدھارنے کا کام کرتا ہے ۔ تمام مقالوں پر گفتگو کرتے ہوئے مزید انہوں نے کہا کہ سوالات قائم کرنا جوابات سے زیادہ اہم ہوتا ہے ۔ اس اجلاس کے دوسرے صدر جناب ونے ورماتھے ، انھوں نے اپنی اداکاری سے ہندی اور تیلگو فلموں میں اپنی منفرد شناخت قائم کی ہے ،انھوںنے اردو تھیٹر کی اہمیت پر مختصر اندازمیں گفتگو کی ۔پہلے اجلاس کی نظامت کی ذمہ داری ڈاکٹر شاہنواز فیاض نے بخوبی ادا کی ۔
ظہرانے کے بعد دوسرا اجلاس شروع ہوا جس میں صدا رت کے فرائض جناب محمد سلیم عارف اور پروفیسر دانش اقبال نے انجام دیے اور نظامت کی ذمہ داری فیصل خاں نے ادا کی ۔ اس اجلاس میں ڈاکٹر رضوان الحق نے ’ تھیٹر میں ہونے والی ترقیاں اور اردو تھیٹر ‘، ڈاکٹر شیخ الماس حسین نے ’ معاصر اردواسٹیج اور اردو معاشرہ ‘، جناب اقبال نیازی نے ’ معاصر اردو تھیٹر : اخذ وترجمہ کی صورت حال ‘،ڈاکٹر عمر غزالی نے ’مغربی بنگال میں معاصر اردو تھیٹر : تنقیدی جائزہ ‘ اور جناب ندیم خان نے ’ بچوں کا تھیٹر : صورت حال اور امکانا ت ‘ پر مقالا ت پیش کیے ۔ اس اجلاس میں صدارتی کلمات ادا کرتے ہوئے پروفیسر دانش اقبا ل نے تمام مقالات پر اپنی بے باکانہ رائے کا اظہار کیا، انداز ایسا تھا کہ حاضرین زیر لب مسکرا بھی رہے تھے اور کچھ کھلکھلا بھی رہے تھے ۔ اجلاس کے دوسرے صدر محتر م جناب سلیم عارف نے اپنی گفتگو میں کہا کہ جب ہم ڈراما کے تخلیق کار پر بات کرتے ہیں تو ہمیں رائلٹی پر بھی بات کرنی چاہیے ۔ ہم سبھی یہاں ڈرامے والے موجود ہیں لیکن ہم میں سے کتنے ہیں جو قلمکار کو رائلٹی دیتے ہیں ۔
اہم سامعین میں پروفیسر معین الدین جینا بڑے ، جناب اقبال نیازی،ڈاکٹر انظر حسین، جناب مجیب خان،انیس اعظمی،محترمہ منیرہ سورتی، جناب ایس۔ این لعل، جناب محی الدین زور کشمیری، جناب وقار قادری، ڈاکٹر امان اللہ،جناب سراج عظیم،ڈاکٹر مظفرغزالی،جناب احمد جاوید، ڈاکٹر ایم آر قاسمی ، ڈاکٹر زاہد ندیم ، حبیب سیفی ، ڈاکٹر امیر حمزہ ، وڈرامے کے دیگر طلبہ و اساتذہ بھی شامل تھے ۔

دہلی: غالب انسٹی ٹیوٹ کے زیر اہتمام غزل سرائی مقابلے کا انعقاد کیا گیا۔ یہ مقابلہ بارہویں جماعت تک کے طلبا کے لیے منعقد کیا گیا تھا۔ اس مقابلے میں سید عابد حسین سینئر سیکنڈری اسکول، سالوان پبلک اسکول، کریسنٹ اسکول،سرودیہ کنیاودیالیہ، عیدگاہ روڈ دہلی، رابعہ گرل سینئر سیکنڈری اسکول،نیوہرائزن اسکول، حضرت نظام الدین،فاطمہ اکیڈمی لال کنواں، نیو وے اسکول،جامعہ نگر،اسلامیہ مڈل اسکول،پہاڑی بھوجلہ اور اینگلو عربک سینئر سکنڈری اسکول کے طلبا نے حصہ لیا۔پروفیسر آصف نقوی،محترمہ مدھومتا بوس اور معروف غزل سنگر استاد عبدالرحمٰن نے اس پروگرام میں جج کی حیثیت سے شرکت کی۔ اس موقع پر غالب انسٹی ٹیوٹ کے ڈائرکٹر ڈاکٹر ادریس احمد نے کہا کہ غالب انسٹی ٹیوٹ کے قیام کا مقصد غالبیات کی ہر سطح پر تفہیم کے لیے راہ ہموار کرنا ہے۔ اس مقابلے میں صرف غالب کا کلام پیش کیاگیا۔ پروفیسر آصف نقوی نے کہا کہ آج بچوں کی کارکردگی سے مجھے بہت خوشی ہوئی اور اطمینان ہوا اوراگر اس میں کچھ کمی بھی تھی تو ہمیں اس وقت صرف حوصلہ افزائی سے کام لینا چاہیے کیوں کہ کلام غالب کی قرات میں اساتذہ سے چوک ہوجاتی ہے یہ تو ابھی مبتدی ہیں۔ محترمہ مدھومتا بوس صاحبہ نے فرمایاکہ مجھے بے حد خوشی ہوئی آج طلبہ و طالبات نے مختلف انداز میں کلام غالب پیش کیا۔ اس طرح کے پروگرام کے انعقاد سے بچوں کی صلاحیت میں یقینا اضافہ ہوگا۔ استاد عبدالرحمٰن نے کہا کہ مجھے خوشی ہے کہ غالب انسٹی ٹیوٹ نے اس طرح کے مقابلہ کا انعقاد کرتا رہتاکیا۔ اس مقابلے کی وجہ سے ہمیں یہ بھی اندازہ ہوگا کہ ہمارے یہاں کیسے کیسے موتی چھپے ہیں اوراس سے غالبیات کی ترویج و اشاعت بھی ہوگی۔ اس پروگرام کی کوآڈینیٹر محترمہ یاسمین فاطمہ نے اظہار خیال کرتے ہوئے فرمایا کہ ہمیں بے حد خوشی ہے کہ آج غزل سرائی مقابلہ کا پروگرام بہت کامیاب رہا اور میں تمام شریک طلبا کے روشن مستقبل کی تمنا کرتی ہوں۔ اس مقابلے میں پہلا انعام ثوبیہ خان، نیوہرائزن اسکول، حضرت نظام الدین کو، دوسرا انعام محمد چاند اختر، سید عابد حسین سینئر سیکنڈری اسکول کو اور تیسرا انعام محمد مزمل، اینگلو عربک سینئر سکنڈری اسکول کو دیا گیا۔ اس کے علاوہ تین خصوصی انعام بھی رکھے گئے تھے جن میں آمنہ خان رابعہ گرلز سینئر سکنڈری اسکول، ہاردک کمار ،سالوان پبلک اسکول اورزین عبداللہ،اسلامیہ مڈل اسکول پہاڑی بھوجلہ کو پیش کیا گیا۔پروگرام کی نظامت جناب مشتاق احمد نے ادا کی اور پروگرام کے اختتام میں ڈائرکٹر غالب انسٹی ٹیوٹ نے باضابطہ طورپرمہمانوں،اساتذہ اورطلبا و طالبات کا شکریہ ادا کیا۔

نئی دہلی:پروفیسر شمس الحق عثمانی کی رحلت سے فکشن تنقید کے ایک روشن باب کا خاتمہ ہوگیا۔ ’بیدی نامہ‘ اور’باقیات بیدی‘ جیسی کتابوں کو بیدی شناسی میں اہم حوالے کا درجہ حاصل ہے۔ان کا اسلوب زیست مذہب اور ادب کا ایک نہایت دلکش سنگم تھا۔ فعالیت، اصول پسندی، نظم و ضبط اور منفرد طرز فکر ان کی شخصیت کے نمایاں عناصر تھے۔ ان خیالات کا اظہار عہد حاضر کے ممتاز فکشن نقاد، مدون، محقق اور معلم سابق صدر، شعبہئ اردو، جامعہ ملیہ اسلامیہ پروفیسر شمس الحق عثمانی کی رحلت پر شعبۂ اردو، جامعہ ملیہ اسلامیہ کے تعزیتی جلسے میں صدر شعبہ پروفیسر کوثر مظہری نے کیا۔سوگوار فضا میں پروفیسر شہزاد انجم نے کہاکہ ان کے سانحہ ارتحال سے ادبی دنیا ایک گھنیرے سایے سے محروم ہوگئی۔پروفسیر شمس الحق عثمانی کی فکشن تنقید کی اپنے زمانے کے تمام بڑے نقادوں نے تحسین کی۔ بحیثیت معلم ان کی دیانت، وقت کی پابندی اور تدریس سے جنونی وابستگی ہمارے لیے نمونہئ عمل ہے۔پروفیسر احمد محفوظ نے اظہار کرب کرتے ہوئے کہا کہ انھوں نے اپنی طرح کی ایک مختلف زندگی بسر کی، فکشن کے حوالے سے ان کی بصیرتوں کو ادبی تاریخ فراموش نہیں کرسکتی۔غم و اندوہ کے ماحول میں پروفیسر ندیم احمد نے ان کی قناعت پسندی، محبت و شفقت، غیر مصلحت پسند انہ رویہ، دنیا داری سے بے نیازی اور غیر معمولی علم دوستی کا ذکر کرتے ہوئے انھیں خراج عقیدت پیش کیا۔ پروفیسر عمران احمد عندلیب نے اپنے ذاتی تعلقات کو یاد کرتے ہوئے ان کی مختلف اور منفرد طرز ادا، لفظ، زبان، قواعد اور رموز اوقاف کے سلسلے میں ان کی شدید حساسیت کا ذکر کیا۔پروفیسر شمس الحق عثمانی کی وفات پراپنے غم انگیز جذبات کا اظہار کرتے ہوئے پروفیسر سرور الہدیٰ نے کہا کہ اپنے عہد کے باغی اور حساس ادبی ذہنوں سے ان کا گہرا رشتہ تھا۔وہ تخلیق اور تنقید میں اپنے طور پر ایک ارتباط قائم کرلیتے تھے۔ انھوں نے شاعری اور فکشن میں بھی وحدت تلاش کی۔ ڈاکٹر شاہ عالم نے کہا کہ شمس الحق عثمانی ایک خوش گفتار اور نیک انسان تھے۔ وہ متن کی تدریس میں استغراق کی کیفیت سے دوچار ہوجاتے تھے۔ تعزیتی جلسے میں ڈاکٹر مشیر احمد، ڈاکٹر سید تنویر حسین، ڈاکٹر محمد مقیم اور ڈاکٹر محمد آدم نے مرحوم کی خوبیوں کا ذکر کرتے ہوئے گہرے رنج و غم اورخراج عقیدت کا اظہار کیا۔ اس موقع پر شعبۂ اردو کی جانب سے تعزیتی قرار داد پیش کرتے ہوئے ڈاکٹر خالد مبشرنے پروفیسر شمس الحق عثمانی کی زندگی، شخصیت، ادبی اور تدریسی خدمات کا مفصل ذکر کیا۔ جلسے میں ڈاکٹر عادل حیات،ڈاکٹر جاوید حسن، ڈاکٹر شاداب تبسم، ڈاکٹر راہین شمع، ڈاکٹر نوشاد منظر، ڈاکٹر ثاقب عمران،ڈاکٹر غزالہ فاطمہ، ڈاکٹر شاہ نواز فیاض، ڈاکٹر حنبل رضا اور جناب محمد عارف شریک رہے۔

عالمی یوم کتاب اور کاپی رائٹ کے موقعے پر قومی اردو کونسل کے زیراہتمام یک روزہ بک کنکلیو کا اہتمام

نئی دہلی : قومی کونسل برائے فروغ اردو زبان نئی دہلی کے زیراہتمام 23 اپریل 2025 کو عالمی یوم کتاب اور کاپی رائٹ کے موقعے پر یک روزہ بک کنکلیو کا انعقاد ہوا جس کے تحت تین اجلاس ہوئے۔ پہلے اجلاس کا عنوان ‘مصنوعی ذہانت کے دور میں کاپی رائٹ کے چیلنجز’ تھا جس کی صدارت پروفیسر محمد افشار عالم وائس چانسلر جامعہ ہمدرد نے کی۔ تعارفی اور استقبالیہ کلمات پیش کرتے ہوئے قومی کونسل برائے فروغ اردو زبان نئی دہلی کے ڈائرکٹر ڈاکٹر شمس اقبال نے کہا کہ قاری، مصنف اور ناشر کی تثلیث سے ایک کتاب کی تشکیل ہوتی ہے۔کتاب سے ایک انٹیلکچول ڈسکورس قائم کیا جاسکتا ہے۔ کتاب کے ذریعے ہی ہم ایک مہذب سماج کی تعمیر میں اہم کردار ادا کرسکتے ہیں۔ انھوں نے کہا ہے کہ تحریر و تخلیق کی مثال بچے کی ہے،جو اس کے مصنف کی ملکیت ہوتی ہے،اے آئی یا کسی بھی ذریعے سے کسی کی کتاب یا تخلیق کو اپنے نام سے شائع کروانا گویا کسی کے بچے کو کڈنیپ کرنے جیسا ہے۔ پروفیسر محمد افشار عالم نے صدارتی کلمات پیش کرتے ہوئے کہا کہ کاپی رائٹ آج کے عہد کا ایک بہت گمبھیر مسئلہ ہے اور اس کے تعلق سے حکومت کے ساتھ ساتھ بہت سے تعلیمی ادارے بھی حساس ہوگئے ہیں اور اس حوالے سے اقدامات بھی کررہے ہیں۔قومی اردو کونسل کا یہ پروگرام اس حوالے سے ایک یادگار قدم ہے۔وانی پرکاشن گروپ ،نئی دہلی کی سی ای او محترمہ ادیتی مہیشوری نے کہا کہ اے آئی کے دور میں کاپی رائٹ کے مسائل بہت بڑھ گئے ہیں، موجودہ دور میں جب کہ اے آئی اپنے عروج پر ہے ایک نئے ترمیم شدہ کاپی رائٹ قانون کی ضرورت ہے۔ انٹلکچول پراپرٹی رائٹس کی مشہور وکیل محترمہ دہلیا سین اوبرائے نے اپنی تقریر میں کاپی رائٹ کےمختلف پہلوؤں اور مصنوعی ذہانت کے دور میں اس کے چیلنجز پر مربوط اور مبسوط گفتگو کرتے ہوئے کہا کہ کاپی رائٹ کی خلاف ورزی کرنے والوں کے ساتھ قانونی اور عدالتی چارہ جوئی بھی کی جاسکتی ہے، کیونکہ کاپی رائٹ کی خلاف ورزی دراصل کسی کی محنت پر شب خون مارنے جیسا ہے اور یہ کسی دوسرے کی ملکیت پر غاصبانہ قبضہ کرنے جیسا ہے۔ نظامت کے فرائض ڈاکٹر شاداب شمیم نے انجام دیے۔ اجلاس کے آغاز سے قبل دو منٹ کی خاموشی کے ذریعے پہلگام دہشت گردانہ واقعے کے شہدا کو خراجِ عقیدت پیش کیا گیا اور اس روح فرسا واقعہ کی مذمت کی گئی۔

دوسرے اجلاس میں ‘پریم چند: مطالعے کی نئی جہتیں’ نامی کتاب کا اجرا ہوا۔یہ کتاب ہندی کے معروف دانشور ڈاکٹر کمل کشور گوئنکا نے تصنیف کی ہے،جس کا ترجمہ جناب محمد صغیر حسین نے کیا ہے۔اس تقریب کی صدارت جناب اے رحمان نے کی۔ انھوں نے صدارتی تقریر میں مختلف زبانوں سے کیے جانے والے اردو ترجمے کو درپیش چیلنجز پر روشنی ڈالتے ہوئے کہا کہ ترجمے کی زبان مترجم کی علاقائی وابستگی وغیرہ کی وجہ سے بدل جاتی ہے۔ انھوں نے کہا کہ پریم چند پر لکھی گئی اس کتاب میں ان کی زندگی،شخصیت اور تخلیقات کے حوالے سے ایسی بہت اہم معلومات ملتی ہیں،اس اعتبار سے یہ کتاب منفرد قرار دی جاسکتی ہے۔ اس موقعے پر پروفیسر محمد کاظم، پروفیسر شاہینہ تبسم اورکتاب کے مترجم محمد د صغیر حسین نے بھی کتاب کے تعلق سے اظہارِخیال کیا۔ پروفیسر صغیرافراہیم مہمانِ اعزازی کے طور پر شریک ہوئے ۔ انھوں نے مذکورہ کتاب اور پریم چند کے حوالے سے بہت سے اہم نکات کی نشان دہی کی۔ نایاب حسن نے اس پروگرام کی نظامت کی۔

تیسرے اجلاس کا موضوع ‘نئی نسل میں سائنسی مزاج کا فروغ’ تھا جس کی صدارت ڈاکٹر محمد اسلم پرویز (سابق وائس چانسلر مانو، حیدرآباد) نے کی۔ انھوں نے اپنے صدارتی خطبے میں کہا کہ علم کا اصل مفہوم ہی سائنس ہے اور ہم سائنسی مزاج اپنائے بغیر انفرادی و اجتماعی ترقی حاصل نہیں کر سکتے۔انھوں نے کہا کہ اردو میں سائنسی مواد کی تیاری اور زیادہ سے زیادہ اشاعت موجودہ دور کی اہم ضرورت ہے ۔ ڈاکٹر ماجد احمد تالی کوٹی نے اظہار خیال کرتے ہوئے کہا کہ سائنسی مواد کے ترجمے و اشاعت کے حوالے سے قومی اردو کونسل لائق تحسین خدمات انجام دے رہی ہے۔ انھوں نے کہا کہ تعلیم کے ساتھ زندگی کے دوسرے تمام شعبوں میں ہمیں سائنسی اپروچ اختیار کرنا چاہیے۔ اس اجلاس میں ماہر امراض چشم ڈاکٹر عبدالمعز شمس نے اظہار خیال کیا۔ نظامت ڈاکٹر عبدالباری نے کی۔اس اجلاس میں قومی اردو کونسل سے شائع شدہ بچوں کی کتابیں انسانی دماغ(انس مسرور انصاری)،بھوجی نہیں بوجی،مچھلی کے بچے،خزانوں کی تلاش اور عریش کا اجرا بھی عمل میں آیا۔

افسانوی ادب کے ممتاز نقاد اور منٹو شناس کو نم آنکھوں سے کہاگیا الوداع 

دہلی: اردو کے ممتاز افسانوی نقاد اور منٹو و بیدی کے ادا شناس پروفیسر شمس الحق عثمانی کا آج (/22اپریل۔2025)دوپہر میں انتقال ہوگیا۔ان کی تدفین دلی گیٹ قبرستان میں ہوئی جہاں ان کے احباب، شاگردوں اور ان سے محبت کرنے والوں نے نم آنکھوں کے ساتھ انھیں الوداع کہا۔پروفیسر عثمانی شعبہ اردو جامعہ ملیہ اسلامیہ سے اکتوبر 1989میں وابستہ ہوئے تھے اور فروری 2013میں وظیفہ یاب ہوئے۔شعبہ کی مختلف ذمہ داریاں انھوں نے انجام دیں۔بطور صدر شعبہ بھی انھوں نے اپنی ذمہ داری نبھائی۔شعبہ کے اہم اساتذہ میں ان کا شمار ہوتا تھا۔فکشن مطالعات ان کا خاص میدان تھا۔ چند روز پہلے وہ بیمارہوئے تو انھیں ہاسپٹل لایا گیا مگر علاج کارگرنہ ہوسکا اور آج وہ دوپہر میں عالم فانی سے کوچ کرگئے۔پس ماندگان میں بیوہ کے علاوہ ایک بیٹا اور بیٹی ہیں۔
پروفیسر شمس الحق عثمانی 15فروری 1948کو دیوبند سہارن پور میں پیدا ہوئے۔ابھی چار برس کے تھے کہ والد کے ساتھ دلی آگئے اور پھر یہیں کے ہوکر رہ گئے۔انھوں نے اینگلو عربک ہائر سکینڈری اسکول سے ہائر سکینڈری کی تعلیم مکمل کی۔ذاکر حسین کالج سے بی اے کیا۔ایم اے اور ڈاکٹریٹ کی ڈگری جامعہ ملیہ اسلامیہ کے شعبہ اردو سے حاصل کی۔راجیندر سنگھ بیدی کی شخصیت اور فن پر انھوں نے ڈاکٹریٹ کا مقالہ لکھا تھا جو بیدی نامہ کے نام سے کتابی شکل میں شائع ہوکر مقبول ہوا۔
پروفیسر شمس الحق عثمانی کا شمار اردو کے اہم قلم کاروں میں ہوتا ہے۔ان کے قلم سے دودرجن سے زائد کتابیں نکلیں۔ترتیب وتدوین کے ساتھ ساتھ ان کے مضامین کے متعدد مجموعے جن میں دراصل،درحقیقت،فسانہ و شعر کا بلاوا،غالب اور منٹو،شامل ہیں مقبول ہوئے۔ابو الفصل صدیقی شخص اور فن کی تفہیم،باقیات بیدی اور آئنوں کی نگری ان کے افسانوی پرکھ کی آئینہ دار کہی جاسکتی ہیں۔رسالہ جامعہ کی ستر سالہ تحریروں کا چار جلدوں میں انتخاب بھی انھوں نے کیا۔پورا منٹو دراصل یہ منٹو کی کلیات ہے جس کی چار جلدیں اکسفورڈ پریس کراچی سے شائع ہوچکی ہیں مزید منتظر اشاعت ہیں۔نظیر اکبرآبادی سے متعلق تمام تحریروں کو انھوں نے دوجلدوں میں نہایت سلیقہ کے ساتھ مرتب کرکے ”نظیر فہمی“کے نام سے کتابی شکل میں شائع کیا۔
پروفیسر شمس الحق عثمانی کی ادبی خدمات کے اعتراف میں جہاں ان کی متعدد کتابوں کو ایوارڈ سے سرفراز کیا گیا وہیں غالب انسٹی ٹیوٹ نئی دہلی نے ان کی مجموعی ادبی خدمات پر غالب انعام(2014)سے سرفراز کیا تھا۔دلی اردو اکیڈمی نے ان کی تنقیدی خدمات کے اعتراف میں انھیں ایوارڈ سے سرفراز کیا تھا۔ آج کا دن ان کے بے شمار شاگردوں کے لیے نہایت رنج اور غم کا دن ہے۔

نئی دہلی : آج کی صبح شعبۂ اردو، جامعہ ملیہ اسلامیہ کی فضا میں ایک نوع کی اداسی چھائی ہوئی تھی۔ تمام چہروں پر کسی محبوب شخصیت کے شعبے سے رخصت ہونے کا رنج و ملال نمایاں تھا۔ ایسے جذباتی ماحول میں لفظوں کی جگہ خموشی کی زبان نے لے لی تھی۔ شعبۂ اردو، جامعہ ملیہ اسلامیہ میں ۲۴ برسوں تک غیرمعمولی تدریسی خدمات انجام دینے والے عہدِ حاضر کے ممتاز فکشن نگار پروفیسر خالد جاوید کی سبک دوشی کے موقع پر شعبے کی جانب سے ایک یادگار اور نہایت ہی جذباتی الوداعی تقریب کا انعقاد کیا گیا۔ اس موقع پر صدرِ شعبہ نے شعبے کی جانب سے ایک دلکش سیپلنگ سے پروفیسر خالد جاوید کا استقبال کرتے ہوئے ان کی شال پوشی بھی کی۔ نیز ان کی خدمت میں ایک دیدہ زیب مفلر، نفیس میمینٹو، خوب صورت ڈائری اور قلم اور جاذب نظر ٹرالی بطور تحفہ پیش کی۔ صدارتی خطاب میں صدرِ شعبہ پروفیسر کوثر مظہری نے اپنی دیرینہ رفاقتوں اور خالد جاوید کی علم و دانش سے معمور زندگی پر والہانہ جذبات کا اظہار کرتے ہوئے کہا کہ خالد جاوید نے جس خوب صورتی سے اپنا تدریسی سفر طے کیا ہے وہ ایک مسرت بخش پہلو ہے۔ نظم و ضبط کی پابندی ان کی ایک نمایاں صفت رہی ہے۔ خالد جاوید کا اسلوب گردش کرتے ہوئے لٹّو کی طرح ہے، جو چھوٹے چھوٹے دائرے بناتے ہوئے ایک بڑے دائرے کی تشکیل کرتا ہے اور یہ عمل بیک وقت مرکز گریز اور مرکز جو قوتوں کے تصادم سے ظہورپذیر ہوتا ہے۔ خالد جاوید کی حیثیت شعبے میں ایک روشن تدریسی باب کی تھی۔ اس حسرت خیز فضا میں مزید محزونی اس وقت بڑھ گئی جب پروفیسر شہزاد انجم نے کہا کہ ہم خالد جاوید کی ایک ایک ادا کو مدتوں یاد کریں گے۔ ان کا فن، ان کی فکر، ان کی شخصیت اور ان کی زندگی، یہ سب کچھ ہم آمیز ہو کر شعبۂ اردو، جامعہ ملیہ اسلامیہ کی امتیازی شان کی شناخت بن گیا ہے۔ خالد جاوید کو الوداع کہتے ہوئے پروفیسر احمد محفوظ نے ان سے اپنے دیرینہ تعلقات کو یاد کیا اور کہا کہ مغربی فلسفوں پر وہ غائر نظر بھی رکھتے ہیں اور ادب کو فلسفے سے ہم رشتہ بھی کرتے ہیں۔ پروفیسر ندیم احمد نے یہ امید ظاہر کی کہ وہ مستقبل میں ادب کے مزید بڑے ایوارڈ سے سرفراز ہوں گے اور ہمارے شعبے کا نام مزید تابناک ہوگا۔ اداسی کی اس کیفیت میں ذرا سی شوخی کا رنگ اس وقت پیدا ہو گیا جب پروفیسر عمران احمد عندلیب نے اپنے مخصوص باغ و بہار طرزِ خطاب میں کہا کہ ان کے انعامات ڈھونے کے لیے مال گاڑی کی ضرورت پیش آتی ہے۔ ہم جیسوں کی علمی، تحقیقی، تخلیق کوتاہیوں کا کفارہ اکیلے خالد جاوید صاحب ادا کر دیتے ہیں۔ ہمیں ان پر بہت ناز ہے اور ان سے اپنی اس قربت پر ہمیشہ فخر رہے گا۔ جلسے میں مزید سنجیدگی اس وقت طاری ہو گئی جب خالد جاوید کی رخصتی کے اس لمحے میں پروفیسر سرورالہدیٰ نے کہا کہ خالد جاوید کی گفتگو، ان کے فکری ارتعاشات، ان کا رویہ اور ان کے ردعمل کو میں سرتاپا فکشن کے طور پر دیکھتا ہوں۔ شعبے کے استاد ڈاکٹر شاہ عالم نے خالد جاوید کے ساتھ بیتے خوش گوار لمحات اور واقعات کا ذکر کرتے ہوئے انھیں خراجِ تحسین پیش کیا۔ ڈاکٹر خالد مبشر نے نظامت کے فرائض انجام دیتے ہوئے بحیثیت شاگرد خالد جاوید کی معلمانہ عظمتوں پر مبنی ایک مختصر تحریر میں کہا کہ خالد جاوید مختلف علوم و فنون کا سررشتہ ادب سے اس طور پر قائم کرتے ہیں کہ فکر و نظر کے نئے دریچے وا ہو جاتے ہیں۔ اس موقع پر ڈاکٹر مشیر احمد نے کہا کہ خالد جاوید ہم سب سے خوش خلقی کے ساتھ پیش آتے۔ انھوں نے کبھی کسی قسم کی سیاست سے دلچسپی نہیں لی۔ محبت و شفقت ان کا شیوہ رہا۔ ڈاکٹر سید تنویر حسین نے ابنِ صفی پر کام سے متعلق ان کی اولیت کا ذکر کرتے ہوئے کہا کہ ابنِ صفی کا ادبی مقام و مرتبہ متعین کرنے میں پروفیسر خالد جاوید کو اولیت اور امتیاز حاصل ہے۔

جلسے کا آغاز ڈاکٹرشاہنواز فیاض کی تلاوت سے ہوا۔ اس موقع پر ڈاکٹر جاوید حسن، ڈاکٹر راہین شمع، ڈاکٹر محمد آدم، ڈاکٹر ثاقب عمران، ڈاکٹر نوشاد منظر، ڈاکٹر غزالہ فاطمہ، ڈاکٹر شاداب تبسم، ڈاکٹر حنبل رضا، ڈاکٹر محمد عارف اور ڈاکٹر روبینہ شاہین زبیری کے علاوہ بڑی تعداد میں شعبے کے ریسرچ اسکالر اور طلبہ و طالبات موجود تھے۔

نئی دہلی:دلّی ہر دور میں اپنی تہذیبی ،تمدنی اور لسانی امتیاز کی حامل رہی ہے،دلّی کی تاریخ کئی صدیوں پر محیط ہے ۔ خوش آیند ہے کہ اردو اکادمی،دہلی اسی قیمتی اثاثے،ورثے اورسرمائے کا احیا کررہی ہے۔اس طرح ایک بار پھر اس کی اہمیت و افادیت اور معنویت کا احساس پیدا ہورہا ہے۔مذکورہ خیالات کااظہار اردو اکادمی، دہلی کے زیر اہتمام ، بیسویں صدی میں دہلوی اردو نثر کے عنوان سے تیسرے اجلاس کی صدارت کرتے ہوئے پروفیسر قاضی عبیدالرحمن ہاشمی نے کیا ۔

انھوں نے اپنے خطاب میں اس سیشن میں پیش کیے گئے تمام مقالوں پر اظہار خیال کرتے ہوئے کہا کہ اس سیشن میں پیش کیے گئے مقالے تو گہرے اور سنجیدہ مطالعے کے غماز ہیں، ساتھ ہی دلّی کی گمشدہ وراثتوں کی بازیافت کی شان دار کوشش کی گئی ہے،اس کے لیے تمام ہی مقالہ نگاران خصوصی مبارک باد اور تہنیت کے حامل ہیں۔

اجلاس کے دوسرے صدر پروفیسر خالد علوی نے تمام مقالوںپر فرداً فرداً تبصرہ کرتے ہوئے کہاکہ دہلوی نثر مثالی نثر ہے جو بے نظیر بھی ہے اور لازوال بھی چنانچہ اس کا تحفظ ہم سب کی ذمے داری ہے۔میں تمام مقالہ نگاروں کو مبارکباد دیتا ہوں کہ انھوں نے اس شان دار سلسلے کو باقی رکھنے میںنہایت جاں فشانی سے کام لیاہے اور اپنے ہنر سے کام لیاہے۔

اجلاس کے تیسرے صدر پروفیسر عبد الحق (پروفیسر ایمرٹس ،دہلی یونیورسٹی)نے اپنے خطاب میںتمام مقالوں پر اپنے اطمینان کا اظہار کرتے ہوئے کہا کہ مقالوں کو سن کر یوں لگا کہ یہ مٹی نہایت زرخیز ہے اور اس پر دور دورتک بھی خزاں کے سائے نہیں ہیں۔ انھوں نے دہلوی زبان اور تہذیب کا تفصیل سے جائزہ لیتے ہوئے کہا کہ ہمیں گزشتہ پچاس ساٹھ برسوں کے ادب اور ادیبوں کا بھی جائزہ لینا چاہیے ۔مجھے امید ہے کہ اگر ان پر کام ہوگا تو یقینا کئی ایسے نام اس دہلوی زبان و تہذیب کی سنہری کڑی میں جڑیں گے جن کے کارنامے بے مثال ہیں ۔ مزید یہ بھی کہاکہ اس طرح کے سلسلے جاری رہنے چاہئیں ،ان سے ہماری قدروں اور روایتوں کی یاددہانی ہوتی ہے اور ان کے تئیں ہمیں اپنی ذمے داری کا احساس بھی ہوتا ہے۔

اس اجلاس میں کل سات مقالے پڑھے گئے جن میں پروفیسر خالد اشرف(قاری سرفراز حسین عزمی دہلوی کا ناول ’’شاہد رعنا‘‘)پروفیسر احمد محفوظ (میرے زمانے کی دلّی: دلّی کا ایک مورخ ملا واحدی)سہیل انجم (امداد صابری کی کتاب’’دلّی کی یادگار شخصیتیں‘‘ایک جائزہ)ڈاکٹر شمیم احمد (مرزا محمود بیگ کی نثر)ڈاکٹر ابو شہیم (اسلم پرویز کی نثر نگاری’’گھنے سائے‘‘ کے آئینے میں) ڈاکٹر محمد مقیم (آغا محمد اشرف کی طویل کہانی ’’ڈاکٹر صاحب‘‘کا اسلوبیاتی مطالعہ )ڈاکٹر عالیہ(حمیدہ سلطان کی افسانہ نگاری)شامل ہیں۔اجلاس کی نظامت کے فرائض ڈاکٹر ثاقب عمران نے نہایت خوبصورت انداز میں انجام دیے۔

سمینار کا آخری اجلاس دوپہر ڈھائی بجے پروفیسر شہزاد انجم،پروفیسر احمد محفوظ اور پروفیسر مظہر احمد کی صدارت میں شروع ہواجس کی نظامت کے فرائض ڈاکٹر فرحت کمال نے انجام دیے۔اس اجلاس میں کل چار مقالے پڑھے گئے جن میںڈاکٹرفیضان حسن(سات طلاقنوں کی کہانیاں )ڈاکٹر معید رشیدی(دہلی کی آخری شمع کا تنقیدی مطالعہ) ڈاکٹروحید الحق(شان الحق حقی کی خود نوشت’’افسانہ درافسانہ‘‘کا تنقیدی مطالعہ)ڈاکٹرعفیفہ بیگم (یوسف بخاری کی کتاب’’یہ دلّی ہے‘‘کا تہذیبی مطالعہ )شامل ہیں۔

اجلاس کے صدارتی خطبے میں پروفیسر شہزاد انجم نے کہا کہ دہلوی نثر ایک شان دار سرمایہ اورقیمتی اثاثہ ہے جسے یقینا اسی نیت اور ارادے سے فروغ دیا جاتارہا ہے۔آج کے حالات میں بھی اس کی سخت ضرورت ہے ۔چنانچہ اردو اکادمی،دہلی کا قدم احسن قدم ہے ۔انھوں نے مزید کہا کہ اس طرح کے پروگراموں سے نہ صرف ہم اپنا ماضی کی یادیں تازہ کرتے ہیں بلکہ حال اور مستقبل کے تناظر میں بھی ان کے لیے امکانات تلاش کرتے ہیں ۔

اجلاس کے دوسرے صدر پروفیسراحمد محفوظ نے کہا کہ اس اجلاس میں مقالہ نگاری کے تحت ایسے موضوعات کا انتخاب کیا گیا ہے جو اس سے قبل کسی بھی سیمینار میں دیکھنے کو نہیں ملے ،اس طرح اردو اکادمی اپنا امتیاز اور اختصاص برقرار رکھنے میں کامیاب رہی نیز یہ سیمینار دہلی میں منعقد ہونے والے سیمیناروں کی فہرست میں ایک شاندار اضافہ ہے۔ انھوں نے سیشن کے چاروں مقالوں پر تفصیلی اظہار خیال کیا۔

اجلاس کے تیسرے صدر پروفیسر مظہر احمد نے سیمینارے کے خاکے،موضوعات و عناوین ، قلم کاروں و مقالہ نگاران کے انتخاب نیز دہلوی نثر و دہلوی تہذیب کے متعلق بالتفصیل اظہار خیال کیا۔بعد ازاں انھوں نے اردو اکادمی،دہلی اور دلّی سرکار، تمام شرکا،مقالہ نگاران اور سامعین کا شکریہ اداکیا۔

تینوں دن کے اجلاس میں سامعین کی کثیر تعداد موجود تھی جن میں خصوصی طور پر ڈاکٹرمحمد معین الدین ،ڈاکٹر یوسف رام پوری ،ڈاکٹر عالیہ ، ڈاکٹر خان محمدرضوان،ڈاکٹر جاوید حسن،ڈاکٹر عاشق الٰہی،ڈ ڈاکٹر انوارالحق، ڈاکٹر فرمان چودھری، ڈاکٹر امیر حمزہ، عمران عاکف خان معین شاداب ،ڈاکٹر محمد ریاض ،ڈاکٹر عارف اشتیاق ،ڈاکٹر ندیم احمد ، طٰہٰ نسیم، حبیب سیفی، ڈاکٹر شاداب شمیم، اجے کمار، پونیت، ندھی، دکش سنگھ، امت سریواستوا وغیرہ شامل تھے۔

نئی دہلی: شمالی ہند میں اردو نثر کا آغاز شاعری کے مقابلے میں بہت تاخیر سے ہوا۔ دکن میں اردو نثر کا آغاز بہت پہلے ہوگیا تھا۔ دکن میں جب اردو نثر نے ترقی کے منازل طے کرلیے اس کے بعد شمالی ہند میں اردو نثر کا آغاز ہوا۔ شمالی ہند میں اردو نثر کے تاخیر سے ترقی کرنے کی ایک وجہ یہ بھی تھی کہ یہاں فارسی زبان وادب کا غلبہ تھا۔میر جعفر زٹلی، فضل علی فضلی، ملاحسین واعظ کاشفی جیسے ادیبوں نے شمالی ہند میں اردوکے اولین نمونے پیش کیے۔ میر عطاحسین تحسین ، محمد باقر آگاہ، عیسوی خاں بہادر اور فورٹ ولیم کالج کی نثر نگاری نے شمالی ہند میں اردو نثر کو مزید تقویت بخشی۔

تاریخ ادب اردو میں مختلف تحریکوں کے ساتھ چند ادبی دبستانوں کا تذکرہ کیا جاتا ہے۔ شاعری میں دبستان دہلی اور لکھنؤ کو نمایاں حیثیت حاصل رہی ہے۔ دبستانوں کی یہ تقسیم تاریخی، جغرافیائی اور معاشرتی خصوصیات کے علاوہ زبان و بیان اور موضوعات کی بنیاد پر درست معلوم ہوتی ہے، اگرچہ جدید تنقید نے ان دبستانوں پر سوالیہ نشان بھی لگا دیے ہیں۔ دہلی کے دبستانِ شاعری پر چند معتبر کتابیں شائع ہو چکی ہیں، مگر افسوس کہ نثر کے دبستانوں پر تحقیقی و تنقیدی کام بہت کم ہوا ہے۔ سید ضمیر حسن دہلوی اور ڈاکٹر محمد عبدالرحیم جاگیردار جیسے محققین کی کاوشیں بھی اس حوالے سے تشنگی کا احساس دلاتی ہیں۔خصوصاً دہلی کے دبستانِ نثر پر کوئی خاطر خواہ تحقیقی کام منظرِ عام پر نہیں آیا۔ بیسویں صدی کی دہلوی نثر کے معماروں میں کئی اہم اور قابلِ ذکر نام شامل ہیں، جنھوں نے دہلی کی تہذیب و ثقافت اور تاریخی حقائق کو مدنظر رکھتے ہوئے اپنی نگارشات پیش کی ہیں۔ ان نثر نگاروں نے دہلوی نثر کی عمدہ نمائندگی کی ہے اور اس کے مختلف پہلوؤں کو اجاگر کرتے ہوئے اپنے شہر کی تاریخ کو مرتب کیا ہے اور اس کے تہذیبی و ثقافتی ورثے کو صفحۂ قرطاس پر منتقل کیا ہے۔

اردو اکادمی، دہلی نے اس حوالے سے ’’بیسویں صدی کی دہلوی نثر‘‘کے موضوع پر سہ روزہ قومی سمینار کا انعقاد کیا ہے۔ آج سمینار کا افتتاحی اجلاس اکادمی کے قمر رئیس آڈیٹوریم میں منعقد ہوا۔ افتتاحی اجلاس میں مہمان خصوصی کی حیثیت سے پروفیسر شریف حسین قاسمی شریک ہوئے جنہوں نے اس سیشن کی صدارت کے فرائض بھی انجام دیے۔ استقبالیہ کلمات محمد احسن عابد، سکریٹری اردواکادمی نے پیش کیے۔ سمینار کے کنوینر پروفیسر مظہراحمد نے تعارفی کلمات پیش کیے جبکہ نظامت کی ذمہ داری ڈاکٹر شفیع ایوب نے بحسن وخوبی نبھائے۔ سکریٹری اکادمی نے شریف حسین قاسمی اور عبدالعزیز صاحب کو پودا پیش کرکے اُن کا استقبال کیا ۔ انہوں نے استقبالیہ کلمات میں بیسویں صدکی دہلوی نثر کے حوالے سے کچھ اہم نکات پیش کیے اور اکادمی کی پوری ٹیم کو اس پروگرام کے لیے نیک خواہشات پیش کیں۔

پروگرام سے قبل سابق ڈین اور صدر شعبہ اردو، دہلی یونیورسٹی پروفیسر نجمہ رحمانی کو تعزیت پیش کی گئی۔پروفیسرمظہراحمد نے نجمہ رحمانی سے اپنے دیرینہ تعلقات کا اظہار کیا۔ ان کی خوبیوں کا تذکرہ کرتے ہوئے انہیں نم آنکھوں سے خراج عقیدت پیش کیا۔ آڈیٹوریم میں موجود سامعین نے ان کے لیے دو منٹ کی خاموشی اختیار کی اور ان کی مغفرت کی دعائیں کیں۔

سمینار کا کلیدی خطبہ جناب عبدالعزیز(سابق استاذذاکر حسین دلی کالج) نے پیش کیا۔ بیسویں صدکی دہلوی نثر پر اپنے باضابطے مقالے میں انہوں نے دہلوی زبان وادب پر مفصل گفتگو کی۔ بیسویں صدی کے دہلوی نثر نگاروں کا ذکر کرتے ہوئے ایک صدی کا قصہ مختصر سے وقفے میں پیش کیا۔ انہوں نے فورٹ ولیم کالج کے حوالے سے میر امن ’کے باغ وبہار‘ کا تذکر کرتے ہوئے ان کے سادہ ، رواں اور سلیس نثر کی خوبیوں کو بھی اُجاگر کیا۔ انہوں نے ’غدر کے بعد دہلی‘ اور ’تقسیم ہند کے بعد دہلی‘ کے مابین پیدا شدہ نثر اور اس کے فرق کی بھی وضاحت کی کہ ان دونوں ادوار میں کس طرح کی نثر لکھی گئی اور ان میں کس قسم کا فرق دیکھنے کو ملتا ہے۔ انہوں نے اس بات کی بھی وضاحت کی کہ ’دہلی کی تجارتی سرگرمیوں نے فنون لطیفہ کا دم گھونٹ دیا‘۔انہوں نے اس بات کا بھی شکوہ کیا کہ اب فصیل بند شہر میں مشاعروں اور ادبی مجلسوں کا خاتمہ سا ہوگیا ہے۔ انہوں نے محاورے اور روزمرہ کے دہلوی طرز بیان کو پھر سے زندہ کرنے کی ضرورت پر بھی زوردیا۔

مہمان خصوصی پروفیسر شریف حسین قاسمی نے اپنے صدارتی خطبے میں دہلوی نثر اور ممتاز نثر نگاروں کے حوالے سے گفتگو کی۔ انہوں نے کلیدی خطبے کے رموز ونکات پر مفصل بات کی اور کہا کہ ادب میں کسی بھی بات وضاحت اس وقت ہوتی ہے جب تقابلی مطالعہ پیش کیا جائے اور مثالوں کے ذریعہ اس کی وضاحت کی جائے۔ انہوں نے اپنے خطبے میں سرسید کا خصوصی ذکر کیا اور انہیں مفاخر دہلی قرار دیتے ہوئے ان کی زبان اور آثار الصنادید کا بھی تذکرہ کیا۔ انہوں نے اپنی گفتگو میں ایک اہم بات کی طرف اشارہ کرتے ہوئے اس جانب توجہ دلائی کی اردو کی مذہبی کتابوں خصوصاً قرآن کے تراجم کو دہلوی نثر کے حوالے سے دیکھنا بہت اہم اور اشد ضروری ہے تاکہ بیسویں صدی کی رائج نثر کو بہتر طور پر سمجھا جاسکے۔

افتتاحی اجلاس میں پروفیسر شہپررسول، شبانہ نذیر، معین الدین جینابڑے، سہیل انجم، پروفیسر ابوشہیم ،ڈاکٹر شمیم احمد، پروفیسر قمرالہدیٰ فریدی، پروفیسر خالد اشرف، ڈاکٹر معید رشیدی، ڈاکٹر جاویدحسن، حبیب سیفی، ڈاکٹر خان رضوان،ڈاکٹر عفیفہ بیگم وغیرہ شریک رہے۔ نظامت کے فرائض انجام دے رہے ڈاکٹر شفیع ایوب نے پروگرام کے آخر میں تشکر پیش کیا۔

نئی دہلی: امام مظہر عالم مرحوم کی الم ناک زندگی کے مطالعے سے اندازہ ہوتا ہے کہ ان کی شاعری دراصل ان کی زندگی کا ہی آئینہ ہے اور یہ مجموعہ ’’حادثوں کے درمیاں‘‘ اسم بامسمیٰ ہے۔ ان کے بعض اشعار اس قدر پختہ، کلاسیکی رچاؤ کے حامل اور آفاقیت سے معمور ہیں کہ انھیں اعلیٰ اشعار کی مثالوں میں بلاخوفِ تردید پیش کیا جا سکتا ہے۔ ان خیالات کا اظہار ممتاز ادیب پروفیسر خالد محمود نے دی ونگس فاؤنڈیشن اور ڈائنامک انگلش اکیڈمی کے زیرِاہتمام، ڈائنامک انگلش اکیڈمی، بٹلہ ہاؤس، نئی دہلی میں ماسٹر امام مظہر عالم مرحوم کے شعری مجموعے ’’حادثوں کے درمیاں‘‘ کی تقریبِ رونمائی میں صدارتی خطاب کے دوران کیا۔ مہمان خصوصی سید محب الحق (جنرل سکریٹری، بہار مدرسہ بورڈ شکچھک سنگھ) نے اظہارِ مسرت کرتے ہوئے کہا کہ بہار مدرسہ بورڈ سے وابستہ استاذ کا ایسا خوب صورت کلام کتابی صورت میں شائع ہونا ہمارے لیے باعثِ افتخار ہے۔ مجھے یقین ہے کہ امام مظہر عالم کی شاعری سے دیگر تخلیق کار اساتذہ کو ترغیب ملے گی۔ مہمان اعزازی صاحبِ طرز نثرنگار حقانی القاسمی نے کہا کہ امام مظہر عالم کی شاعری ان کے جذبات و احساسات کا نگارخانہ ہے۔ ان کی زندگی کے تجربات و حوادث شعری سانچوں میں ڈھل گئے ہیں۔ یہ شاعری انفرادی و اجتماعی واردات کا پراثر شعری بیانیہ ہے۔ اس موقعے پر ممبئی کے مشہور صحافی اختر کاظمی نے مبارک باد پیش کرتے ہوئے کہا کہ شہر سے دور حاشیائی علاقوں میں اب بھی ایسے فن کار موجود ہیں جن کی طرف مرکز میں بیٹھے نقادوں کی نگاہ نہیں پہنچتی۔ مہمان اعزازی ممبئی میں مقیم مشہور ادیبہ شمع اختر کاظمی نے کہا کہ گمنام اور نظرانداز شدہ ادیبوں پر توجہ کرنا سچی ادب دوستی ہے اور اس محفل میں یہ فریضہ انجام دیا جانا لائق تحسین ہے۔ ماہنامہ یوجنا مدیر کے عبدالمنان نے استقبالیہ کلمات پیش کرتے ہوئے مرحوم امام مظہر عالم کے سوانحی کوائف تفصیل سے بیان کیے، جس سے اندازہ ہوا کہ ان کی زندگی سانحات کے ایک دل دوز سلسلے سے عبارت ہے۔ معروف ریڈیو صحافی افتخارالزماں نے ان کی شاعری کو سیمانچل کی زندگی، سماج، تہذیب اور تاریخ کی ایک شعری دستاویز قرار دیتے ہوئے کہا کہ ایسی شاعری ہمیں اپنی مٹی اور اپنی جڑوں سے وابستہ کرتی ہے۔ جے. این. یو کے استاذ ڈاکٹر محمد اجمل نے ان کی شاعری کا محاکمہ کرتے ہوئے کہا کہ امام مظہر عالم کا کلام دلوں کو چھونے کی صلاحیت رکھتا ہے۔ اس میں ہماری روزمرہ زندگی سانس لیتی ہوئی محسوس ہوتی ہے۔ پٹنہ یونی ورسٹی کے استاذ ڈاکٹر نعمان قیصر نے کہا کہ ماسٹر امام مظہرعالم مرحوم ہمارے دیار کے بزرگ شاعر تھے۔ ان کی شاعری ہماری روح کی آواز معلوم ہوتی ہے۔ ان کے ایک ایک لفظ میں سیمانچل کا دردوکرب جذب ہو گیا ہے۔ دی ونگس فاؤنڈیشن اور ڈائنامک انگلش اکیڈمی کے بانی ڈاکٹر انوارالحق نے کہا کہ مجھے مرحوم امام مظہر عالم کے صاحب زادے اور اس کتاب کے مرتب ابوالمحاسن کی رفاقت حاصل رہی ہے۔ امام مظہر عالم کی شاعری میں جو سادگی، سلاست اور فطری پن ہے وہ نہایت متاثرکن ہے۔ نظامت کے فرائض انجام دیتے ہوئے ڈاکٹر خالد مبشر نے کہا کہ ماسٹر امام مظہر عالم مرحوم ایک مثالی معلم، صاحب دل صوفی، مخلص سماجی خادم، ولولہ انگیز مقرر اور سچے جذبات کے شاعر تھے۔ ان کی تخلیقی شخصیت بیگنائی تہذیب کے خمیر سے تشکیل پذیر ہوئی تھی۔ ان کے دل و دماغ پر بیگنا اسٹیٹ کے جاگیردارانہ ماحول، خانقاہ صوفیہ بیگنا، مدرسہ اسلامیہ غوثیہ صوفیہ بیگنا اور سماج سدھار کرانتی سمیتی کے گہرے اثرات مرتب ہوئے۔

اس موقعے کی مناسبت سے عبدالرحمن، سید تجمل اسلام اور محمد ذیشان نے ماسٹر امام مظہر عالم مرحوم کی غزلیں ترنم سے پیش کیں۔ تقریب رونمائی کے اس یادگار جلسے میں سہیل انجم، محمد ارشد، حارث مروان، محمد ندیم، مدثر عالم، ذکی انور، مزمل حسین، عقیل انور، قمرالحسن، جمیل سرور، ابو ہریرہ اور شعیب عزیز کے علاوہ دہلی کے معززین شریک تھے۔ پروگرام کا آغاز عبدالرحمن کی تلاوت اور اختتام ڈاکٹر انوارالحق کے اظہارِ تشکر پر ہوا۔

نئی دہلی:دہلی یونیورسٹی کی آرٹس فیکلٹی کے زیراہتمام فیکلٹی کے ہال نمبر۲۲ میں آرٹس فیکلٹی کی سابق ڈین اورسابق صدرشعبہ اردوپروفیسر نجمہ رحمانی کی وفات کے بعد تعزیتی اجلاس کاآج انعقادکیاگیا۔اس تعزیتی اجلاس میں آرٹس فیکلٹی کے تمام شعبوں کے صدور،اساتذہ،طلباوطالبات اورریسرچ اسکالرزنے شرکت کی ۔اس تعزیتی پروگرام کی نظامت فیکلٹی کے ڈین پروفیسرامیتابھ چکرورتی نے کی۔اس موقع پرپروفیسرنجمہ رحمانی کی یاد میں پورااسٹیج خالی رکھاگیا۔تمام اساتذہ اورمقررین صف سامعین میں نظرآئے ۔اسٹیج پرصرف پروفیسرنجمہ رحمانی کی تصویررکھی گئی تھی،جس پرسامعین اورمقررین گلہائے عقیدت نچھاورکرتے رہے۔

تعزیتی نشست میں اظہارخیال کرتے ہوئے فیکلٹی کے ڈین پروفیسرامیتابھ چکرورتی نے کہاکہ بہت کم لوگ ایسے ہوتے ہیں، جن کی تعلیم کا طریقہ اور انصاف پسندی کی ذہنیت آپ کو متاثر کرتی ہے،ان میں ایک بہت اہم نام پروفیسرنجمہ رحمانی کاہے ۔اس ہال میں کون ہے ،جو ان کے جانے کے غم سے نڈھال نہیں ہے ۔پروفیسرنجمہ رحمانی کی مقبولیت کی دلیل ہے کہ آرٹس فیکلٹی کایہ ہال بھراہواہے اورہرکوئی اظہارخیال کرناچاہتاہے۔ان سے اپنے دیرینہ تعلقات کااظہارکرناچاہتاہے ۔پروفیسررحمانی زندگی سے لبریزشخصیت کانام ہے،جن کی یادیں ہم نہیں فراموش نہیں کرسکیں گے ۔

شعبہ اردوکے صدرمعروف ناقد پروفیسرابوبکرعبادنے اس موقع پرکہاکہ پروفیسرنجمہ رحمانی میں ایک موثرشخصیت کی ساری خوبیاں موجودتھیں، وہ اپنے اور اپنے طلبا و طالبات کے لیے پوری زندگی جدوجہد کرتی رہیں ، جب وہ صدر شعبہ بنیں تو شعبے میں خاصی مثبت تبدیلیاں نظر آئیں، انھوں نے شعبہ کے لیے بہت سے مثبت اوردوررس نتائج رکھنے والے کام کیے، پروفیسررحمانی کو کسی چیز کی کمی نہیں رہی، انھیں ان کے گھر والے ان کے دوست سب بہت اچھے ملے، کسی سے ڈرتی نہیں تھیں، نجمہ رحمانی نے کبھی اپنے دوست نہیں بدلے نہ دشمن بدلے، کسی سے فریب نہیں کیا، کسی کی پیٹھ پر چھرا نہیں بھونکا، کسی کو دھوکہ نہیں دیا، نجمہ کی طرح میں نے کسی کو فعال و متحرک نہیں دیکھا۔

ذاکرحسین دلی کالج (شبینہ)کے استاذپروفیسرمظہر احمد نے کہا کہ پروفیسرنجمہ رحمانی سے میرے چالیس برس پرانے تعلقات تھے، چالیس برس پرانے تو دشمن بھی عزیز ہوتے ہیں، وہ تو میری دوست تھی، ہمیں کبھی احساس ہی نہیں ہوا کہ ہم کبھی الگ ہوں گے، نجمہ اور اس کے قہقہے آج بھی ہمارے دلوں میں گونج رہے ہیں، نجمہ کے قہقہے دراصل ہم سب اور خود اس کی زندگی کے گواہ تھے، نجمہ اپنے طلبا کو انصاف دلانے کے لیے اور ان کی اصلاح کے لیے عملی زندگی گزارتی تھی، چالیس سال کی کہانیاں اتنی ہیں کہ میں سناتاجاوں، تب بھی ختم نہیں ہوں گی، نجمہ نے شعبہ کو ترقی کی راہ پر گامزن کرنے کا جو معیار قائم کیا، اس تک پہنچ پانا بہت مشکل کام ہے، جاتے جاتے وہ ہماری نیند بھی لے گئی۔

جرمن اینڈرومانس اسٹڈیزکی صدروجیاوینکٹ رمن نے کہا وہ متحرک وفعال تھیں، دوستوں کو وقت دیتی تھیں اور وہ اپنے شعبہ کے علاوہ دہلی یونیورسٹی ٹیچرز ایسوسی ایشن میں بھی عہدے پر رہیں اور ممبر بھی رہیں، ان کا دل اور ان کا گھر ہر وقت مستفید ہونے والوں کے لیے کھلا رہتا تھا، وہ مستحکم اور پائیدار حوصلوں کی خاتون تھیں۔وہ اپنے اصولوں سے کبھی سرموانحراف نہیں کرتی تھیں ۔ان کے ساتھ کام کرنے کابرسوں تک ہمیں موقع ملا۔جاتے جاتے وہ سب کورلاگئیں ۔

پروفیسرنجمہ رحمانی کے بڑے بھائی اورمعروف ملی وسماجی شخصیت ڈاکٹرتسلیم رحمانی نے کہا کہ 58 سالہ واقعات تسلسل کے ساتھ میرے سامنے صف بہ صف آرہے ہیں، پہلی بارمیں نے اسے تب دیکھا تھا ،جب میں تین برس کا تھا اور وہ پیدا ہوئی تھی، اس نے اپنے آپ کو بار آور بیج بناکر سنگلاخ زمین میں خود کو دفن کردیا، اس نے ہمیشہ خود کو ثابت کیا ہے، اس پیڑ سے ہر ایک کوسایہ ملتارہا، وہ ہمیشہ دھوپ کے حصار میں رہی، لیکن ہمیشہ دوسروں کو دھوپ سے بچاتی رہی۔ہماری اور ہمارے گھر کی شناخت کا اٹوٹ بندھن ہے آج نجمہ رحمانی، وہ مخلص تھی، وہ جس کی بھی دوست تھی سب کے لیے مخلص تھی۔

شعبہ ہندی کے استاذاورمعروف دانش ورپروفیسراپوروانند نے کہا کہ رحمانی کے جانے کا اندیشہ تو تھا، لیکن اس خبر کو سن کر پریشان ہوگیا۔. 2020 کے مسلم مخالف دہلی فسادات کے وقت ان کے ساتھ کام کرنے کا موقع ملا، فساد زدگان کو کھانا پہنچانے والوں میں سب سے بڑا نام پروفیسرنجمہ رحمانی کا ہے، جس وقت سب ڈر جاتے ہیں اس وقت ایک عورت اپنے گھر کا دروازہ کھول کردوسروں کو پناہ دیتی تھی اوروہ نجمہ رحمانی تھیں ، کووڈ کے زمانے میں بھی اس نے ہاسٹل میں رہ جانے والے طلبا وطالبات کے کھانے کا انتظام کرتی تھیں۔

لاء فیکلٹی کے ڈاکٹرنریندر نے کہا کہ وہ ہمیشہ ناانصافی کے خلاف کھڑی رہتی تھیں،حاشیے پرکھڑے لوگوں اوراقلیتوں کے لیے ہمیشہ فکرمند رہتی تھیں۔میں جب بھی ان سے بات کرتاتھا وہ ہمیشہ مجھے کسی نہ کسی فکرمیں غلطاں نظرآتی تھیں۔

ذاکرحسین دلی کالج کی استاذپروفیسرشاہینہ تبسم نے کہا کہ پروفیسرنجمہ رحمانی اپنے مقدر میں جدوجہد لکھوا کر آئی تھیں، وہ ہماری قوم اور ہماری بچیوں کے لیے مشعل راہ تھیں، نجمہ رحمانی ہزاروں کے مجمع میں غلط کو غلط کہہ سکتی تھیں اور اس کی اصلاح کا جذبہ بھی رکھتی تھیں۔پروفیسر راجیو گپتا نے کہا کہ نجمہ جی کو میں نے پہلی بار ٹی ٹی اے میں دیکھاتھا، ان کے حوصلے کو بھی وہیں دیکھا، جو لوگ سماج میں بہتر اور مثبت تبدیلیاں پیدا کرتے ہیں، شاید اوپر بھی ان کی ضرورت ہوتی ہے۔اس لیے وہ ہم سے جلدی رخصت ہوجاتے ہیں ۔

شعبہ ہندی کی صدرپروفیسر سدھا سنگھ نے کہا کہ نجمہ ہمارے درمیان نہیں ہے، دل کو یہ یقین دلانا بہت مشکل کام ہے۔ایک عورت کو خود کو ثابت کرنے میں ہی دہائیاں گزر جاتی ہیں،اس کے باوجود اس نے خود کوبہت سے محاذوں پرکامیاب ثابت کیا، میں پسماندگان کو پرسہ دیتی ہوں۔

پروفیسرنجمہ رحمانی کے چھوٹے بھائی ندیم رحمانی نے کہا کہ میں آج یہاں ان کے بھائی کی حیثیت سے نہیں آخری طالب علم کی حیثیت سے کھڑا ہوں، انھوں نے گزشتہ دیڑھ برس میں میرا پورا نظریہ بدل کر رکھ دیا، انھوں نے مجھے سکھایا کہ حاشیے پر کھڑے لوگوں کو مین اسٹریم میں لانا کیوں ضروری ہے۔مظلوموں اوردبے کچلے لوگوں کے لیے آوازبلندکرناکیوں ضروری ہے ۔

شعبہ موسیقی کے ڈاکٹراوجیش نے کہا کہ انھیں موسیقی سیکھنے کا بہت شوق تھا، وہ میرے گھر آتی تھیں اور موسیقی سیکھتی تھیں، وہ تمام تر خصوصیات کے ساتھ بحیثیت انسان بہت اہم تھیں، ان کا انسانی چہرہ بہت صاف اور شفاف تھا، میری فیملی صدمے میں ہے، میرا ہی گھر وہ آخری گھر ہے، جہاں وہ آخری بار آئی تھیں۔ایسی شخصیت کا جانا ان کے خاندان سے زیادہ سماج کے لیے نقصان دہ ہے۔

شعبہ کیمسٹری کے پروفیسرشری کانت ککریتی نے کہا کہ ان سے اکثر دانش ورانہ باتیں ہوتی تھیں، مجھے نہیں لگتا کہ انھوں نے کبھی اپنی ذات کا خیال رکھا لیکن یقینی طور پر دوسروں کا بھرپور خیال رکھا۔وہ جہاں رہتی تھیں،وہاں اوروہاں کے لوگوں کی فکرمیں رہتی تھیں۔انسانی فلاح وبہبودکے لیے کیے گئے ان کے کاموں کواورانھیں ہمیشہ یادرکھاجائے گا۔

اس تعزیتی اجلاس میں لا فیکلٹی سائنس فیکلٹی اور آرٹس فیکلٹی کے تمام شعبوں بالخصوص شعبہ سنسکرت،شعبہ ہندی ،شعبہ عربی ،شعبہ فارسی ،شعبہ انگریزی ،شعبہ جرمن کے اساتذہ ،طلبااورریسرچ اسکالرزکے ساتھ شعبہ اردوکے اساتذہ میں پروفیسرارجمندآرا،پروفیسر مشتاق عالم قادری،شعبہ کے سابق استاذپروفیسرارتضی کریم ،دہلی یونیورسٹی ٹیچرس ایسوسی ایشن کی صدور پروفیسرنندتانرائن اورپروفیسرشاشوتی مجمدار،ڈاکٹراحمدامتیاز،ڈاکٹر علی احمدادریسی،ڈاکٹرشمیم احمد، ڈاکٹر فرحت کمال،ڈاکٹرزاہدندیم احسن،راکیش کمار،شعبہ کے طلباوطالبات اورریسرچ اسکالرز وغیرہ نے بالخصوص شرکت کی۔

علی گڑھ : خیابانِ ادب ثمر ہاؤس دھراعلی گڑھ میں عالمی اردو ریسرچ اسکالرز ایسوسی اور انجمن محبان اردو علی گڑھ کی جانب سے بعنوان”علی گڑھ میں فکشن نگاری کا مستقبل“ ایک ادبی نشست کا انعقاد عمل میں آیا۔جس کی صدارت معروف ناقد سابق صدر شعبہئ اردو علی گڑھ مسلم یونیورسٹی علی گڑھ پروفیسر صغیر افراہیم نے کی۔جب کہ نظامت کے فرائض عادل فراز نے بحسن و خوبی انجام دئیے۔اس موقع پر سہ ماہی ’سیما‘مجلہ علی گڑھ کے مخصوص شمارے علی گڑھ میں معاصر اردو فکشن (1974ء سے2024ء تک) کا رسم اجراء بھی عمل میں آیا۔صغیر افراہیم صاحب نے کہا کہ مجھے بہت خوشی محسوس ہو رہی ہے کہ خیابان ادب ثمر ہاؤس میں آج علی گڑھ کی فکشن نگاری کے ماضی،حال اور مستقبل کے حوالے سے بہت اہم گفتگو ہو رہی ہے۔علی گڑھ کے فکشن نگاروں کا جائزہ لیا جائے تو ایک طویل فہرست دیکھنے کو ملتی ہے۔مثلاًسید محمد اشرف، طارق چھتاری، غضنفر، پیغام آفاقی، احمد رشید، سید غیاث الرحمن، ابن کنول، شارق ادیب، غیاث الدین، آصف نقوی، اکرم شروانی، مصاعد قدوائی، ساجدہ زیدی، زاہدہ زیدی، صدیقہ بیگم، رفعت بلگرامی، نجمہ محمود، شبیہ زہرا حسینی، امیر زہرا، سیدہ ضیاء احتشام، شہناز ہاشمی، آصف اظہار علی، ماجدہ خاتون، نعیمہ پاشا، انجمن آرا،عفت آرا، عطیہ عابد، عذرا نقوی وغیرہ۔خوشی کی بات یہ ہے کہ آج سہ ماہی سیما کے مخصوص شمارے کا رسم اجراء علی گڑھ کی تیسری اور چوتھی پیڑی کر رہی ہے۔جس سے ثابت ہوتا ہے کہ آنے والے وقت میں فکشن نگاری کے حوالے سے علی گڑھ کا مستقبل بہت بلند ہے۔ثنا فاطمہ نے کہاعالمی اردو ریسرچ اسکالرز ایسوسی، انجمن محبان اردو علی گڑھ،بزم نوید سخن،انڈین لٹریری کلب،اور اردو ہندی ساہتیہ منچ کے اراکین کی شرکت سے ہماری اس بزم میں چار چاند لگ گئے ہیں۔یہ انجمنیں ہند،اردو،اور انگریزی زبان کے لکھنے پڑھنے والے نئے نوجوان قلم کاروں کو ایک پلیٹ فارم عطا کرتی ہیں جہاں وہ اپنی صلاحیتوں کا مظاہرہ کر سکیں۔فکشن کے حوالے سے ان تمام انجمنوں نے نئی نسل سے تعلق رکھنے والے نوجوان تخلیق کاروں کا تعارف دنیا بھر میں کرایا ہے۔سہ ماہی سیما کا یہ شمارہ اس وجہ سے بھی کافی اہم ہو جاتا ہے کہ اس میں علی گڑھ سے تعلق رکھنے والے نئے فکشن نگاروں کے حوالے سے اہم مضامین دیکھنے کو ملتے ہیں اور بہت سے ایسے افراد کے نام بھی دیکھنے کو مل جاتے ہیں جو اس رسالے کی آمد سے قبل منظر عام پر نہیں آ سکے تھے۔عادل فرازؔنے کہا اس رسالے کی یہ بھی خاص بات ہے کہ اس میں نئی نسل کے نوجوان افسانہ نگاروں کے فن کے حوالے سے اہم تبصراتی اور تنقیدی مضامین بھی دیکھنے کو مل جاتے ہیں۔بہت کم عرصے میں اس رسالے نے ادبی حلقوں میں اپنی ایک الگ شناخت قائم کر لی ہے۔خاص طور سے سہ ماہی سیما کے اس مخصوص شمارے کی اشاعت سے قبل ہی ادبی حلقوں میں بہت گہما گہمی تھی۔اور آج جب یہ رسالہ منظر عام پر آیا ہے تو اس نے ایک نئی تاریخ رقم کر دی ہے۔پروگرام میں شامل ہونے والوں میں،محمد ثمر،محمد افضل، محمد عالم،ذوالفقار خان،محمد حسین،سجاد حسن، راشداکبر، جاوید سرور، انعم فاطمہ،زینت زیبا، وغیرہ پیش پیش رہے۔

دہلی: اردو کی معروف اسکالر اور شعبۂ اردو دہلی یونیورسٹی کی سابق صدر پروفیسر نجمہ رحمانی کے انتقال سے ادبی معاشرے میں غم و افسوس ی لہر ہے۔ غالب انسٹی ٹیوٹ کے سکریٹری پروفیسر صدیق الرحمٰن قدوائی نے اظہار تعزیت کرتے ہوئے کہا کہ وہ ایک فعال ادیبہ کے طور پر ہم سب کو متاثر کرتی تھیں۔ وہ ہمیشہ اپنے شاگردوں کے لیے فکر مند رہتی تھیں اور مستقبل میں انھیں اچھے مقام پر دیکھنا چاہتی تھیں۔ ابھی ان سے بہت ساری توقعات وابستہ تھیں جنھیں ان کی بے وقت موت نے مایوسی میں بدل دیا ہے۔ غالب انسٹی ٹیوٹ کے ڈائرکٹر ڈاکٹر ادریس احمد نے کہا کہ وہ ادب کے ساتھ سماجی معاملات میں بھی بہت پیش پیش رہتی تھیں۔ ان میں ایک مضبوط خاتون کا عکس نظر آتا تھا۔ غالب انسٹی ٹیوٹ سے ان کا گہرا تعلق رہا یہاں کے سمیناروں میں وہ مقالہ نگار اور صدر اجلاس کی حیثیت سے اکثر شرکت کرتی تھیں۔ مجھے یاد آتا ہے کہ ان کی کتاب ’اردو افسانے کا سفر‘ پر یہاں بہت عمدہ مذاکرہ ہوا تھا۔ ان کا جانا اردو ادب کا ناقابل تلافی نقصان ہے۔ میں اپنی اور ادارے کی جانب سے ان کے پسماندگان اور طلبا کی خدمت میں تعزیت پیش کرتا ہوں اور ان کی مغفرت کے لیے دعا گو ہوں۔

نئی دہلی: دہلی یونیورسٹی کی سابق ڈین، فیکلٹی آف آرٹس اور سابق صدر شعبۂ اردو پروفیسر نجمہ رحمانی نے آج صبح داعیٔ اجل کو لبیک کہا۔وہ کافی عرصے سے کینسر جیسے موذی مرض سے نبردآزما تھیں۔ان کے انتقال پر اردو اکادمی،دہلی کے سکریٹری محمد احسن عابد نے اپنے گہرے رنج و غم کا اظہار کرتے ہوئے کہا کہ پروفیسر نجمہ رحمانی اردو دنیا کی ایک معتبر، علمی اور ادبی شخصیت تھیں۔انھوں نے اپنی پوری زندگی اردو زبان و ادب کے فروغ کے لیے وقف کر دی تھی۔ ان کی علمی بصیرت، تحقیقی گہرائی اور تنقیدی شعور اردو ادب کے لیے ایک قیمتی اثاثہ ہے۔
پروفیسر نجمہ رحمانی کا تعلق اردو اکادمی، دہلی سے زمانۂ طالب علمی ہی سے رہا ہے۔ وہ ابتدا میں ایک سرگرم طالبہ کی حیثیت سے اکادمی کی علمی و ادبی پروگراموں میں بڑھ چڑھ کر حصہ لیتی رہی تھیں اور بعد میں ایک استاد، محقق اور ادبی رہنما کے طور پر اکادمی کے مختلف پروگراموں میں شریک ہوا کرتی تھیں۔ وہ اردو اکادمی، دہلی کی گورننگ کونسل کی بھی ایک فعال رکن تھیں، جہاں انھوں نے اردو کے فروغ کے لیے کئی مؤثر تجاویز پیش کیں اور عملی اقدامات میں بھی بڑھ چڑھ کر حصہ لیا۔ ان کی موجودگی سے علمی محافل میں فکری بالیدگی اور وقار کا احساس ہوتا تھا۔ انھوں نے اردو ادب میں تحقیق و تنقید کے میدان میں نمایاں خدمات انجام دیں۔ ان کی تحریریں علمی حلقوں میں ایک بلند مقام رکھتی ہیں۔ ان کے شاگردوں کی ایک بڑی تعداد آج بھی ان کی تعلیمات سے فیض حاصل کر رہی ہے۔ ان کے انتقال سے اردو دنیا ایک مایہ ناز ادیب، محقق اور ناقد سے محروم ہو گئی ہے، جس کا خلا پْر کرناایک مشکل امر ہے۔ان کی علمی و ادبی خدمات ہمیشہ یاد رکھی جائیں گی۔
اردو اکادمی، دہلی ان کے انتقال پراپنے گہرے دکھ کا اظہار کرتے ہوئے ان کے اعزہ اقارب، شاگردوں اورفیض یافتگان سے تعزیت پیش کرتی ہے۔ اللہ تعالیٰ مرحومہ کو جنت الفردوس میں اعلیٰ مقام اوران کے پسماندگان کو صبرِ جمیل عطا فرمائے۔ آمین!

دہلی: ’’دی ونگس فاؤنڈیشن‘‘ اور ’’ڈائنامک انگلش اکیڈمی‘‘ کے زیر اہتمام پانچ کتابوں کی رسم رو نمائی کا انعقاد کیا گیا جن میں ڈاکٹر عادل حیات کی دو کتابوں، اردو اکادمی دہلی سے شائع شدہ مونو گراف ’’اختر انصاری دہلوی‘‘ اور بچوں کی کہانیوں کا مجموعہ ’’سپنوں کا گھر‘‘، ڈاکٹر انوار الحق کا مجموعۂ مضامین ’’نارنگ قراٴت‘‘، ڈاکٹر جاوید حسن کاساہتیہ اکیڈمی سے شائع شدہ پروفیسر محمد اسد الدین کے انگریزی مونو گراف ’’عصمت چغتائی‘‘ کا اردو ترجمہ اور نوید انجم کا مجموعۂ کلام’’نقش رائیگاں‘‘ شامل ہیں۔ اس تقریب کی صدارت کرتے ہوئے پروفیسر خالد محمود نے تمام صاحب کتاب کو مبارک باد پیش کی۔ انہوں نے کہا کہ عادل حیات کی ادبی کاوشوں کا دائرہ شاعری، تحقیق و تنقید اور ادب اطفال تک پھیلا ہوا ہے۔وہ ہر کام سنجیدگی اور یکسوئی کے ساتھ انجام دیتے ہیں۔ ڈاکٹر انوار الحق کے مضامین کا مجموعہ ’’نارنگ قراٴت‘‘ در اصل پانچ کتابوں کے حوالے سے تجزیاتی نوعیت کے پانچ مضامین پر مشتمل ہے۔ وہ ادب کے نئے رجحانات پر اچھی نظر رکھتے ہیں۔انہوں نے کہا کہ ڈاکٹر جاوید حسن کا اصل میدان ڈراما اور ترجمہ ہے اور وہ نئی نسل کے باصلاحیت ادیب ہیں۔ صاحب صدر نے اظہار خیال کرتے ہوئے کہا کہ نوید انجم کی شاعری میں جدت اور ندرت متاثر کن ہیں۔ مہمان خصوصی اور مہاتما گاندھی انٹرنیشنل انسٹی ٹیوٹ ماریشس کے اسسٹنٹ پروفیسر ڈاکٹر نازیہ بیگم جافو نے اظہار مسرت کرتے ہوئے کہا کہ ڈاکٹر عادل حیات، ڈاکٹر انوار الحق اور ڈاکٹر جاوید حسن میرے بہت ہی اچھے ادبی دوست ہیں اور ان کی یہ کتابیں ادبی دنیا کے لیے بیش قیمت تحفے کی حیثیت رکھتی ہیں۔ پروفیسر شہپر رسول نے کہاکہ اختر انصاری کے فکر و فن پر ڈاکٹر عادل حیات کی گہری نظر ہے۔ انہوں نے ڈاکٹر انوار الحق کی کتاب ’’نارنگ قراٴت‘‘ کے حوالے سے کہا کہ ان مضامین سے نارنگ فہمی میں مدد ملے گی۔شہپر رسول نے جاوید حسن کو ساہتیہ اکیڈمی جیسے موقر ادارے سے ان کی کتاب شائع ہونے پر مبارک باد پیش کی اور کہا کہ اس کا مطالعہ اہل اردو کے لیے مفید ثابت ہوگا۔ انہوں نے نوید انجم کی شاعری کی پذیرائی کرتے ہوئے کہا کہ وہ ایک تازہ کار شاعر ہیں چناں چہ ان کی تازگی ایک نوع کی فرحت کا احساس دلاتی ہے۔ پروفیسر احمد محفوظ نے ان پانچوں کتابوں پر فرداً فرداً اپنے تاثرات کا اظہار کرتے ہوئے تہنیت پیش کی۔ پروفیسر تسنیم فاطمہ نے ان کتابوں کی اشاعت پر دلی خوشی کا اظہار کرتے ہوئے کہا کہ ان کتابوں کے مصنفین مجھے بے حد عزیز ہیں اور مستقبل میں ان سے بہت سی امیدیں وابستہ ہیں۔ نظامت کے فرائض انجام دیتے ہوئے ڈاکٹر خالد مبشر نے کہا کہ ایک ہی جلسے میں پانچ کتابوں کا اجرا، کتابوں کے جشن سے کم نہیں ہے۔ ان پانچوں کتابوں کا تعلق ادب کی مختلف اصناف سے ہے اور اسی کی مناسبت سے مہمانان کا انتخاب بھی ہوا ہے۔ ان کتابوں کا تعلق تحقیق، تنقید، ادب اطفال، ترجمہ اور شاعری سے ہے۔

اس پروگرام کا دوسرا حصہ شعری نشست پر مشتمل تھا جس کی صدارت پروفیسر شہپر رسول نے کی۔ شعرا میں پروفیسر خالد محمود، پروفیسر احمد محفوظ، سہیل احمد فاروقی، راشد جمال فاروقی، ڈاکٹر احمد تنویر، ڈاکٹر واحد نظیر، ڈاکٹر خالد مبشر، نوید انجم، امتیاز رومی، سفیر صدیقی، خوشبو پروین اور عزیز اختر شامل تھے۔ شعری نشست کی نظامت کے فرائض آصف بلال نے انجام دی۔ پروگرام کا آغاز عبدالرحمٰن کی تلاوت اور اختتام ڈاکٹر انوار الحق کے اظہار تشکر پر ہوا۔ اس موقع پر ڈاکٹر عادل حیات، ڈاکٹر انوار الحق، ڈاکٹر خالد مبشر ، ڈاکٹر جاوید حسن اور شبانہ ناز نے مہمانان کی خدمت میں گلدستے سے ان کا استقبال کیا۔

شعبۂ اردو، جامعہ ملیہ اسلامیہ، نئی دہلی کے زیرِ اہتمام توسیعی خطبے کا انعقاد

نئی دہلی : سنسکرت فارسی زبان کی بہن ہے۔ متعدد الفاظ کے تلفظ اور معانی سے اس کی تصدیق ہوتی ہے۔ فارسی زبان ہندوستانی تہذیب و ثقافت سے اس قدر ہم رشتہ ہے کہ اسے غیر ملکی زبان نہیں کہا جا سکتا۔ یہ مفروضہ بھی غلط ہے کہ فارسی ہندوستان میں محمود غزنوی کے ساتھ آئی، بلکہ وہ پہلے سے برصغیر میں موجود تھی۔ اردو، ہندی اور اس کی شیلیوں میں ابتداءً فارسی تراکیب، استعارے اور تشبیہات کے علاوہ فارسی کے یکتائے زمانہ شعرا کی گہری چھاپ نظر آتی ہے۔ شمالی ہند کے بالمقابل دکن کی فارسی ایرانی لب و لہجے اور الفاظ و تراکیب سے زیادہ قریب ہے۔ ان خیالات کا اظہار شعبۂ اردو، جامعہ ملیہ اسلامیہ کے زیرِ اہتمام ’’اردو فارسی شاعری کا ادبی و لسانی رشتہ‘‘ کے عنوان سے توسیعی خطبہ پیش کرتے ہوئے فارسی کے معروف ادیب و شاعر پروفیسر اخلاق احمد آہن (شعبۂ فارسی، جے این یو) نے کیا۔ انھوں نے کہا کہ دکن کے برعکس شمالی ہند میں فارسی پہلے سے موجود تھی، لہٰذا یہاں تصرفات کا عمل زیادہ دکھائی دیتا ہے۔ برطانوی استعمار سے پہلے ایشیا میں فارسی کو رابطے کی زبان کا درجہ حاصل تھا۔ اردو اور فارسی کے لسانی رشتے پر گفتگو کرتے ہوئے انھوں نے کہا کہ اچھی اردو جاننے والا فارسی زبان بہ آسانی سیکھ سکتا ہے۔ اردو شاعری نے فارسی شعری روایت سے بیش از بیش اکتساب اور استفادہ کیا ہے۔ اردو نہ صرف اساسی اصناف کے تعلق سے فارسی کی خوشہ چیں ہے، بلکہ اردو کی قواعد بھی فارسی گرامر سے مستعار ہے۔ صدارتی کلمات میں صدر شعبۂ اردو، جامعہ ملیہ اسلامیہ پروفیسر کوثر مظہری نے کہا کہ مہمان مقرر کی گفتگو تحقیقی ہوتے ہوئے مربوط، مبسوط اور رواں تھی۔ ان کے اس خطبے میں بھرپور علمیت کے ساتھ معروضیت، استدلال اور منطقیت کی ہم آہنگی مثالی ہے۔ خطبے کے کنوینر پروفیسر شہزاد انجم نے مہمان مقرر اور حاضرین کا استقبال کرتے ہوئے خطیب کا مفصل تعارف بھی پیش کیا۔ پروگرام کا آغاز شعبے کے ریسرچ اسکالر زین العابدین ہاشمی کی تلاوت اور اختتام ڈاکٹر محمد آدم کے اظہارِ تشکر پر ہوا۔

اس موقعے پر پروفیسر عبدالحلیم، پروفیسر کلیم اصغر، ڈاکٹرہ زہرہ فاروقی، پروفیسر احمد محفوظ، پروفیسر ندیم احمد، پروفیسر عمران احمد عندلیب، پروفیسر سرورالہدیٰ، ڈاکٹر شاہ عالم، ڈاکٹر خالد مبشر، ڈاکٹر مشیر احمد، ڈاکٹر سید تنویر حسین، ڈاکٹر محمد مقیم، ڈاکٹر عادل حیات، ڈاکٹر انوارالحق، ڈاکٹر جاوید حسن، ڈاکٹر راہین شمع، ڈاکٹر شاداب تبسم، ڈاکٹر نوشاد منظر، ڈاکٹر ثاقب عمران، ڈاکٹر شاہنواز فیاض، ڈاکٹر غزالہ فاطمہ، ڈاکٹر حنبل رضا اور ڈاکٹر محمد عارف کے علاوہ ریسرچ اسکالرز اور طلبہ و طالبات شریک تھے۔

دربھنگہ:مولانا آزاد نیشنل اردو یونیورسٹی (دربھنگہ پالیٹکنک) میں27 فروری کو نیشنل کانفرنس کا انعقاد کیا گیا۔ اس قومی کانفرنس میں کثیر تعداد میں ماہرین تعلیم اور طلبہ و طالبات نے شرکت کی۔کانفرنس کا موضوع تھا "ابھرتی ٹکنالوجی اور پائیدار ترقی میں اس کا کردار”(Emerging Technology And Its Role In Sustainable Development )۔واضح ہو کہ یہ کانفرنس مانو پالیٹکنک دربھنگہ کے ذیر اہتمام منعقد کی گئی جس کے کنوینر کالج کے پرنسپل ڈاکٹرمحمد عبد المقسط خان اور کوآرڈینیٹرڈاکٹر صابر علی تھے۔اس موقع پرایک آف لائن سیشن اوردو آن لائن سیشن میں پیپر پیش کیے گئے ۔اس سے پہلے افتتاحی اجلاس کالج کے طالب علم محمد عمران (شعبہ کمپیوٹر)کے تلاوت قران اور عافیہ شاہین کے ترجمہ سے شروع ہوا۔اس نشست میں دربھنگہ کالج آف انجینئرنگ کے میکانکل برانچ کے صدر شعبہ پروفیس چندن کمار بحیثیت مہمان خصوصی اور مانو کالج آف ٹیچر ایجوکیشن دربھنگہ کے سینیر پروفیسر ڈاکٹر ایڈم پال بحیثیت مہمان اعزازی شریک ہوئے۔پروفیسر چندن کمار نے اپنے پر مغز خطاب میں ترقی خصوصا پائدار ترقی (Sustainable Development) کی اہمیت پر روشنی ڈالی۔ انہوں نے کہا کہ ترقی کا مطلب یہ نہیں ہے کہ ہمیں آسائش حاصل ہو جائے بلکہ حقیقی ترقی یہ ہے کہ آنے والی انسانیت بھی اس سے مستفیض ہو۔انہیں نے اقوام متحدہ کے 17 اہداف کے حوالے سے بتایا کہ کس طرح پائیدار ترقی ماحولیاتی تحفظ کے لیے ضروری ہے۔انہوں نے کہا کہ بہت سارے شعبہ میں جس طرح سے ٹیکنالوجی کا استعمال بڑھا ہے وہ وِکاس کم اور وِناش زیادہ ہے۔پروفیسر چندن کمار نے اس موضوع کے انتخاب پر کالج کو مبارکباد پیش کی۔اس سے پہلے مانو پالیٹکنک کے شعبہ فزکس کے اسسٹنٹ پروفیسر ڈاکٹر محمد صابر علی نے اس کانفرنس کی غرض و غایت بتائی اور خاکہ پیش کیا۔ مانو کالج آف ٹیچر ایجوکیشن کے پروفیس ایڈم پال پٹیٹی نے ٹیکنالوجی کے استعمال سے ہونے والی مختلف آلودگی کو کیسے کم کیا جائے اس حوالہ سے بات کی۔انہوں نے کہا کہ حقیقی ترقی یہ ہے کہ انسانیت کو نقصان نہ ہو۔پروفیسر پال نے کہا کہ اس کے لیے چاہیے کہ کسی بھی شعبہ میں پہلے ڈیٹا جمع کیا جائے پھر اس سے معلومات حاصل کی جائے جس کی بنیاد پر کوئی نتیجہ نکلے ۔اس کے بعد دورندیشی اور حکمت کو ملحوظ رکھتے ہوئےٹیکنالوجی کو استعمال کیا جائے۔انہوں نے کاپرنکس کے سورج پر دیئے گئے نظریہ کے حوالہ سے بتایا کہ کس طرح ایک اچھی دریافت انسانیت کے لئے مفید اور کارآمد ہوتی ہے۔

مانو پالیٹکنک دربھنگہ کے پرنسپل اور اس پورے سیمینار کے کنوینر ڈاکٹرمحمد عبد المقسط خان نے اس نوعیت کی کانفرنس کی اہمیت پر زور دیا۔انہوں نے کالج کے طلبہ و طالبات سےکہا کہ وہ اس طرح کے پروگرام میں بڑھ چڑھ کر حصہ لیں تاکہ ان کی تعلیمی و غیر تعلیمی سرگرمی بہتر ہو۔

افتتاحی نشست کے بعد پیپر پرزنٹیشن کے سیشن میں مختلف کالجز ،و یونیورسٹی کے فیکلٹی اور طلبا نے اپنے پیپر پیش کیے۔آف لائن سیشن میں سب سے بہتر پیپر کے لئے این آئی ٹی پٹنہ سے پی ایچ ڈی کر رہے محمدحفیظ کو ایوارڈ اور مومنٹو سے نوازا گیا وہیں آف لائن سیشن میں پورنیہ کالج کی کاجل کماری اور RMLS کالج مظفرپور کے اسسٹنٹ پروفیسر رفیع اللہ انصاری سب سے اچھے پیپر کے لیے منتخب کیے گئے۔

پیپر پرزنٹیشن کے بعد اختتامی اجلاس منعقد کیا گیا جس میں سی ایم سائنس کالج کے پرنسپل اور فیکلٹی آف سائنس کے ڈین پروفیسر دلپ کمار چودھری نے بحیثیت مہمان خصوصی اور مانو کالج آف ٹیچر ایجوکیشن کے پرنسپل پروفیس فیض احمد نے بحیثیت مہمان اعزازی شرکت کی۔پروفیس فیض احمد نےطلبہ و طالبات سے اپنے خطاب میں کہا کہ نامسائد حالات میں بھی مواقع تلاشنا ایک بہتر انسان کی پہچان ہوتی ہے۔انہوں نے اپنے ایک شاگر د کے حوالے سے بتایا کہ بعض دوسرے ممالک کس طرح ہم سے ٹیکنالوجی کے فیلڈ میں ہم سے آگے ہیں۔

پروفیسر دلپ کمار چودھری نے کالج انتظامیہ بالخصوص ڈاکٹر عبد امقسط خان کو اس کانفرنس کے لیے مبارکباد پیش کی ۔انہوں نے اپنے خطاب میں کہا کہ ملک کی ترقی، ٹیکنالوجی کی بہتری پر بھی منحصر کرتی ہے۔سابق ایم ایل سی اور موجودہ ڈین پروفیسر چودھری نے کہا کہ ہمیں اس نوعیت کی کانفرنس سے اچھے نتائج حاصل ہوتے ہیں۔اس موقع پر کالج کے تینوں شعبے کے صدور ڈاکٹر اے روی(الیکٹرانکس)، ڈاکٹر انجیہ ادیپو(کمپیوٹر)، ڈاکٹر یو ارون کمار(سول) ڈائس پر موجود تھے۔دونوں اجلاس کی نظامت شعبۂ کمپیوٹر کے اسسٹنٹ پروفیسرعبد الرب بن محسن اور شعبۂ سول کے لیکچرر سید صفوان غنی نے کی۔ شعبۂ کیمیا کے اسسٹنٹ پروفیسر ڈاکٹر آفتا ب احمد سلیمان کے اظہار تشکر پر پروگرام کا اختتام ہوا۔اس موقع پر کالج آف ٹیچر ایجوکیشن کے ڈاکٹر شفاعت احمد، ڈاکٹر ظفر عالم زیدی، سونو رجک اور مانو پالیٹکنک سے ڈاکٹر آفتاب عالم، ایس کے وسیم انور، ڈاکٹر شمس الرحمن، طفیل احمد زلفی، آفتاب عالم،نوین کمار، ڈاکٹر ابو ریحان، صدام حسین، محمد محسن، محمد علاؤالدین، فاروق اعظم ،متین اعظمی، عبد العزیز، نسیم عالم ،محمد ارشد،، اخلاق الرحمن، جنید عالم ، ڈآکٹر اشوک کمار، علقمہ رضوی، سوم پرکاش ، شائبہ جعفری،محمد رضاالدین ، مانو آئی ٹی آئی سے کمال حسن، زاہد حسین،محمد آصف، جاوید اخترکے علاوہ کثیر تعداد میں طلبہ و طالبات موجود تھے۔

شعبۂ اردو،دہلی یونیورسٹی کے خواجہ احمدفاروقی ہال میں ریسرچ اسکارزسمینارکاانعقاد

نئی دہلی:شعبۂ اردو ،دہلی یونیورسٹی کے زیراہتمام یک روزہ ریسرچ اسکالرز سمینارکاانعقادخواجہ احمدفاروقی لائبریری میں کیاگیا۔اس سمینارمیں کلیدی خطاب پروفیسرمعین الدین جینابڑے نے پیش کیااورسمینارکے پہلے اجلاس کی صدارت پروفیسر خالداشرف نے کی ۔اس موقع پرمہمانوں کااستقبال کرتے ہوئے شعبہ اردو کے صدر معروف ناقد وشاعر پروفیسرابوبکرعباد نے طلبا وطالبات کو مخاطب کرتے ہوئے کہاکہ ریسرچ اسکالرز کوچاہیے کہ وہ ادب کے مطالعے کے ساتھ اس پرسنجیدگی سے غوروفکرکی بھی عادت اورصلاحیت پیداکریں ۔ادب کے مطالعے کے ساتھ زندگی کاباادب ہونابھی ضروری ہے۔زندگی کے لیے بھی ادب سیکھناانتہائی ناگزیرہے ۔

اپنے کلیدی خطاب میں معروف افسانہ نگاروناقد پروفیسرمعین الدین جینابڑے نے تحقیق کی اہمیت وافادیت پر پرمغز گفتگوکرتے ہوئے کہاکہ ادب دوخانوں میں منقسم ہے ایک تحقیق اوردوسراتنقید،تنقیدکے لیے ندرت شرط ہے ۔جب آپ کے پاس سوال اورفکر نہیں ہے توآپ کچھ نہیں لکھ سکتے اوریہی صورت حال سندی تحقیق کی سند حاصل کرنے والے نوے فیصدطلباوطالبات کی ہے ۔ذہن میں ایسے سوالات کااٹھنا،جوکسی کومحقق اور نقاد بنانے کی صلاحیت رکھتے ہوں کافی اہم ہیں ۔آپ کاموضوع جوبھی ہو،پڑھ کرسمجھنے اورمتن کے خلاکودورکرنے کوتنقیدکہتے ہیں ۔زیربحث متن پرتوجہ کومرکوز کرنےاورمتن کی تفہیم کوممکن بنانے میں ہی ریسرچ اسکالرزکی کامیابی مضمرہے۔

سمینارکے پہلے اجلاس میں سات مقالے پیش کیے گئے ۔جامعہ ملیہ اسلامیہ کی ریسرچ اسکالردرخشاں نے شوکت حیات کاادبی سفر:اردوافسانے کے حوالے سے ،جواہرلعل نہرویونیورسٹی کے ریسرچ اسکالرمحمداسجدنے منورلکھنوی کی ادبی خدمات:ایک تعارف،شعبہ اردو،دہلی یونیورسٹی کے ریسرچ اسکالرزمحمدفیصل خان نے شعبہ اردو،دہلی یونیورسٹی میں میرشناسی کی روایت،تسنیم عابدنے ترقی پسندتحریک کے نقیب اول پریم چندپرٹالسٹائی اورگورکی کے اثرات،ساجدانصاری نے فورٹ ولیم کالج سے قبل سلیس نگاری کے نقوش :ایک جائزہ،محمدنوید نے سینٹ جانس کالج ،آگرہ میں اردوادب :تاریخی ،تدریسی اورتحقیقی جائزہ اورمصری ریسرچ اسکالر یاسمین جابرمحمدنے اردوشاعری میں انسان دوستی کے عناوین پرمقالات پیش کیے ۔

اس اجلاس کے صدارتی خطبے میں پروفیسرخالداشرف نے مقالہ نگاروں کےتلفظ کی غلطیوں کی طرف اشارہ کرتے ہوئے بڑے مفیدمشورے دیے ۔انھوں نے مزیدکہاکہ اپنی بات بادلیل کہنی چاہیے اورمقالہ لکھتے ہوئے یہ خیال رکھناچاہیے کہ جوبھی بات کریں ،اس میں اس عہدکاذکرضرورکریں ،کلاسیکی کتابوں کاحوالہ دیتے ہوئے اس کی سن تصنیف اورسن اشاعت کاذکریقینی طورپرکرناچاہیے۔ سمینارکے پہلے اجلاس کی نظامت ڈاکٹر نورین علی حق نے کی اوراجلاس کے آخر میں شعبے کے استاذ ڈاکٹراحمد امتیاز نے مہمانوں کاشکریہ اداکیا ۔

سمینارکے دوسرے اجلاس کی صدارت ذاکرحسین دلی کالج (شبینہ)کے پروفیسرمظہراحمداورشعبہ اردو،دہلی یونیورسٹی کے استاذ ڈاکٹر ارشادنیازی نے کی ۔اس اجلاس میں جواہرلعل نہرویونیورسٹی کے ریسرچ اسکالرعبدالوارث نے رالف فاکس کی شہرہ آفاق تصنیف ناول اورعوام پرایک نظر،جامعہ ملیہ اسلامیہ کے ریسرچ اسکالرسیف الرحمان نے پدماوت نظم ،حقیقت اورفسانہ ،اگنوکے ریسرچ اسکالرمحمدعمرنے ناول مکان میں شہری مسائل :ایک تنقیدی جائزہ ،شعبہ اردو،دہلی یونیورسٹی کے ریسرچ اسکالرزمحمدشاہ رخ عبیرنے نوواردان غزل کی تین آوازیں،عبدالرزاق نےسماجی تناظرمیں اردوصحافت کامعاصرکردار،تنویراحمدنے خضرراہ برصغیرکے ادب میں عالمی انقلاب کی پہلی آوازاور میسرہ اختر نے شائستہ فاخری کے افسانوں میں تانیثی پہلوجیسے عناوین کے تحت مقالات پیش کیے ۔اس اجلاس کی نظامت محمدتجمل حسین نے کی ۔

سمینارکے دوسرے اورآخری اجلاس میں صدارتی تقریر کرتے ہوئے شعبے کے استاذ ڈاکٹر ارشادنیازی نے کہاکہ تمام مقالہ نگاروں کومبارک باد پیش کرتاہوں ۔مقالہ پیش کرنے سے قبل اپنے دوستوں اوراساتذہ کواپنے مقالے ضرور سنایاکریں،اس عمل سے اصلاح کے امکانات روشن ہوجاتے ہیں ۔انھوں نے مزید کہاکہ ترجمہ ایک روحانی کشف کانام ہے،جب تک متن سے لطف اندوز نہیں ہوں گے ،حظ نہیں اٹھائیں گے،اچھاترجمہ نہیں ہوسکتا۔

پروفیسر مظہراحمدنے اپنے صدارتی خطبے میں کہاکہ گھبرانے کی نہیں مطالعہ اورافہام وتفہیم میں تسلسل کی ضرورت ہے ۔انھوں نے مزید کہاکہ اردوکے سب سے بڑے تانیثی افسانہ نگارراجندرسنگھ بیدی تھے۔ معاصرہندی سینماپراردوکے علاوہ دیگرزبانوں میں بھی ہمیں مضامین لکھنے چاہئیں،چوں کہ اس زمانے میں تاریخ کوتوڑمروڑ کرپیش کرناعام بات ہوگئی ہے ۔پروگرام کے آخر میں شعبہ اردوکی استاذ پروفیسرارجمندآرانے شکریہ اداکیا۔تمام مقالہ نگاروں کوسندسے بھی نوازاگیا۔اس ریسرچ اسکالرزسمینارمیں پروفیسرارجمندآرا،پروفیسر مشتاق عالم قادری،پروفیسر متھن کمار،ڈاکٹرعلی احمدادریسی ،ڈاکٹراشتیاق عارف،ڈاکٹربشیرشاہین،ڈاکٹرزاہدندیم احسن،ڈاکٹرفرحت کمال،راکیش کماروغیرہ کے علاوہ شعبہ اردوکے طلباوطالبات اورریسرچ اسکالرزاوردیگر شعبے کے اساتذہ وطلبا نے شرکت کی ۔

نئی دہلی : بلا شبہ یہ دور ڈیجیٹل میڈیااور کمپیوٹرکا عہد ہے،جس کا سیکھنا اور اس پر کام کرنا آج کی سخت اور اہم ترین ضرورت ہے،اس کے بغیر نہ تو ہم معاصر دنیا سے ہم آہنگ ہوسکتے ہیں اور نہ ہی زندگی کے بنیادی اہداف و مقاصد ہی حاصل کرسکتے ہیں ،لہٰذا ہمارے لیے لازمی ہے کہ ہم کمپیوٹر اور ڈیجیٹل تعلیم کی طرف خصوصی توجہ دیں۔مذکورہ خیالات کااظہار دہلی اردو اکادمی ،دہلی کے زیر اہتمام ’’ڈیجیٹل میڈیا اور اردو زبان و ادب: عصری تناظر اور امکانات‘‘ کے عنوان سے سے منعقدہ تیسرے اجلاس کی صدارت کرتے ہوئے معروف صحافی لئیق رضوی نے کیا۔انھوں نے کہاکہ آج اکثر کہا جاتا ہے کہ ڈیجیٹل میڈیا اور پلیٹ فارمس اور سائٹس پر اردو زبان و ادب اور رسم الخط و املا کے تعلق سے بے شمار غلطیاں ہوتی ہیں،مگر اس کا مثبت پہلو یہ ہے کہ ہم کہیں نہ کہیں ڈیجیٹل دنیا کے شانہ بشانہ تو ہیں،یہ ہمارے لیے نہایت خوش آیند بات ہے،لہٰذا ہمیں ان غلطیوں کو سدھارتے ہوئے مسلسل آگے بڑھتے رہنا ہے۔صدراجلاس لئیق رضوی نے اس اجلاس میں پڑھے گئے مقالات پر مجموعی اظہار خیال کیا۔اجلاس کی نظامت کے فرائض محترمہ شہلا کلیم نے نہایت خوش اسلوبی سے انجام دیے۔اس اجلاس میں کل سات مقالے پڑھے گئے جن میں:پروفیسر خواجہ محمد اکرام الدین(اردو فونٹ کا ارتقا)،ڈاکٹر یامین انصاری (سوشل میڈیا پر ادب: فیس بک،انسٹاگرام اور ٹوئٹر(ایکس)پر شاعری و نثر)، معروف شاعر و براڈکاسٹر نعمان شوق(عصری ادب اور ڈیجیٹل قارئین)،ڈاکٹر راغب اختر(مصنوعی ذہانت اور اردو زبان و ادب)،ڈاکٹر نورالامین(اردو اور آج کا ڈیجیٹل میڈیا)،مرزا عبدالباقی بیگ(آن لائن اردومیڈیا)، ڈاکٹر توصیف خان(اردو میں ای بکس،ای پبلشنگ کے پلیٹ فارمس)،وسیم احمد علیمی(زبانوں کے ڈیجیٹل لغات اور ترجمہ کی سہولت )شامل ہیں۔

سمینار کا آخری اجلاس دوپہر ڈھائی بجے شروع ہوا جس کی صدارت پروفیسر ابوبکر عباد نے کی اور نظامت محترمہ زیبا خان نے کی۔ اس اجلاس میں کل چار مقالے پڑھے گئے جن میں جناب تحسین منور (اردو کے فروغ میں ٹیلی ویژن کردار)، ڈاکٹر عرفان وحید (ڈیجیٹل میڈیا: اردو اور پاپولر کلچر)، ڈاکٹر صدف فاطمہ (ڈیجیٹل عہد میں ادب کا ارتقا) اور جناب شمس تبریز قاسمی ( ادب کے اظہار کے لیے ذرائع (ویب سائٹس، بلاگز، ولاگز، پوڈکاسٹ وغیرہ) شامل تھے۔

پروفیسر ابوبکر عباد نے اظہارِ خیال کرتے ہوئے کہا کہ شعبۂ میڈیا سے جڑے احباب کی یہ ذمہ داری ہے کہ وہ عصر حاضر میں ڈیجیٹل میڈیا پلیٹ فارم کے ذریعے اردو کے فروغ پر زیادہ توجہ دیں، ڈیجیٹل میڈیا کے اس دور میں اکادمی جیسے اداروں کو ایک جامع و مانع ڈیجیٹل ڈکشنری تیار کرنے پر کام کرنا چاہئے۔ رسالوں میں شائع ہونے والے مقالات پر بحث و مباحثہ کا دور آج کے ڈیجٹل دور میں ختم سا ہوگیا ہے، جس کی جانب توجہ دینے کی ضرورت ہے۔ ہندی فلموں میں ترقی پسندوں نے اردو کو ایک نئی راہ اور سمت عطا کی جس سے ادب کے ساتھ ساتھ ہماری گنگا جمنی تہذیب بھی پروان چڑھی۔

کنوینر سمینار پروفیسر خواجہ محمد اکرام الدین نے تمام مقالہ نگاروں اور سامعین کا شکریہ ادا کرتے ہوئے اکادمی کے سکریٹری اور اسٹاف ممبران کی ستائش کرتے ہوئے کہا کہ اردو اکادمی، دہلی ہندوستان کی تمام اکادمیوں میں ایک اہم ادارے کے طور پر کام کررہی ہے۔ اکادمی نے اب تک جو کام کیے ہیں تمام اکادمیوں کے لیے رہنما اصول ہے۔

فن خطاطی کو جدید عصری تقاضوں سے ہم آہنگ کرنا ضروری : ڈاکٹر شمس اقبال
نئی دہلی: قومی کونسل برائے فروغ اردو زبان نئی دہلی کے صدر دفتر میں آ ج کیلی گرافی اینڈ گرافک ڈیزائن کے ماہرین کی میٹنگ ہوئی جس میں دہلی اوربیرون دہلی کے ماہرین شامل ہوئے۔ یہ میٹنگ خطاطی اورگرافک ڈیزائن کے کورس کے اپڈیشن،کورس کے مواد میں ترمیم اورکورس کو مزید پرکشش اور مفید بنانے پر غور کرنے کے لیے کی گئی تھی۔ اس موقعے پر اظہارخیال کرتے ہوئے قومی اردو کونسل کے ڈائرکٹر ڈاکٹر شمس اقبال نے کہاکہ کیلی گرافی کی اہمیت ہرزمانے میں رہی ہے اور نئی تعلیمی پالیسی (NEP 2020) میں بھی اس کوخاص جگہ دی گئی ہے۔انھوں نے مزید کہاکہ کیلی گرافی میں جدت اور نیاپن لانا بے حد ضروری ہے اس کے بغیر ہم اپنے آرٹ کو زیادہ دن تک محفوظ نہیں رکھ سکتے۔ ڈاکٹر شمع کوثر یزدانی(اسسٹنٹ ڈائرکٹر اکیڈمک) نے اپنے خیالات کا اظہارکرتے ہوئے کہاکہ کیلی گرافی اورگرافک ڈیزائن کورس کو وقت کے ساتھ اپڈیٹ کرنے کی ضرورت ہے تاکہ طلبہ اس سے زیادہ سے زیادہ مستفید ہوسکیں اوراس کورس کی تکمیل کے بعد انھیں روزگار کے مواقع میسر ہوں۔ میٹنگ میں شامل ماہرین نے کئی اہم اورمفید مشورے دیے جن کی روشنی میں خطاطی کے کورس کو اوربھی مفید اور کارآمد بنایا جاسکتا ہے۔ اس میٹنگ میں پروفیسر ظہور احمد زرگر، جناب خورشیدعالم، جناب انیس الحق صدیقی، جناب فیض احمد، جناب مشتاق احمد، جناب محمدعارف، جناب وکیل بستوی، جناب محمدزبیر، جناب امیرالدین علوی اورمحترمہ عرش کوہ نور صاحبہ کے علاوہ ریسرچ آفیسر انتخاب احمد اورمحمد قاسم وغیرہ موجود رہے۔

نئی دہلی: فکشن کی تخلیق، استحکام اور توانائی میں تکنیک کا اہم دخل ہوتا ہے۔ فکشن خارج کی تصدیق سے بے نیاز ہوتا ہے۔ داستان زبانی بیانیہ کا فن ہے اور اس کی بنیاد تخیل پر قائم ہوتی ہے، جب کہ ناول اور افسانہ تعقل پر مبنی ہے۔ فکشن کی تکنیک پر راوی کے گہرے اثرات مرتب ہوتے ہیں۔ خودکلامی، آزاد تلازمۂ خیال، شعور کی رو، حقیقت نگاری، ماورائے حقیقت نگاری، جادوئی حقیقت نگاری، فلیش بیک، علامتیت، تجریدیت، اوپن اینڈیڈ اور کلوز اینڈیڈ کہانی، اساطیریت، سہ ابعادی تکنیک، فنتاسی، اظہاریت، ملفوظاتی تکنیک، تمثیلی تکنیک، ڈائری، خط اور آپ بیتی کی تکنیک فکشن کی اہم تکنیکیں ہیں۔ فکشن کا زور بیان کے بجائے بیانیہ پر ہوتا ہے۔ بیانیہ وقت کی تبدیلی سے وابستہ ہوتا ہے۔ افعال کے استعمال کے بغیر واقعہ آگے نہیں بڑھتا، لہٰذا افعال بیانیہ کا لازمی جزو قرار پاتے ہیں۔ ان خیالات کا اظہار شعبۂ اردو، جامعہ ملیہ اسلامیہ، نئی دہلی کے زیرِ اہتمام منعقدہ توسیعی خطبے میں ’’فکشن کی تکنیک‘‘ کے موضوع پر خطبہ ارشاد کرتے ہوئے صدر شعبۂ اردو، دہلی یونیورسٹی اور معروف ادیب و شاعر پروفیسر ابوبکر عباد نے کیا۔ صدارتی خطاب میں صدر شعبۂ اردو، جامعہ ملیہ اسلامیہ پروفیسر کوثر مظہری نے کہا کہ یہ خطبہ صحیح معنوں میں اطلاقی تنقید کا بہترین نمونہ تھا۔ پروفیسر ابوبکر عباد نے فکشن کی تکنیک سے متعلق تمام نظری مباحث کو فکشن کے متون پر منطبق کرکے جس سلیقے سے پیش کیا، اس سے طلبہ کو ہی نہیں بلکہ اساتذہ کو بھی فیض یابی کا موقع ملا۔ اس توسیعی خطبے کے کنوینر ڈاکٹر خالد مبشر نے نظامت کے فرائض انجام دیتے ہوئے کہا کہ پروفیسر ابوبکر عباد کا تعلق ایک موقر علمی و ادبی گھرانے سے ہے۔ عہدِ حاضر میں ان کی فکشن تنقید گوناگوں معنویت و افادیت سے معمور ہے۔

پروگرام کا آغاز شعبے کے ریسرچ اسکالر عبدالرحمن کی تلاوت اور اختتام ڈاکٹر جاوید حسن کے اظہارِ تشکر پر ہوا۔ پروگرام میں پروفیسر حبیب اللہ، عشرت ظہیر، طٰہٰ نسیم، پروفیسر شہزاد انجم، پروفیسر احمد محفوظ، پروفیسر ندیم احمد، پروفیسر عمران احمد عندلیب، پروفیسر سرورالہدیٰ، ڈاکٹر مشیر احمد، ڈاکٹر سید تنویر حسین، ڈاکٹر محمد مقیم، ڈاکٹر امتیاز وحید، ڈاکٹر عادل حیات، ڈاکٹر انوارالحق، ڈاکٹر راہین شمع، ڈاکٹر شاداب تبسم، ڈاکٹر محمد آدم، ڈاکٹر نوشاد منظر، ڈاکٹر ثاقب عمران، ڈاکٹر شاہنواز فیاض، ڈاکٹر غزالہ فاطمہ، ڈاکٹر حنبل رضا اور ڈاکٹر محمد عارف کے علاوہ ریسرچ اسکالرز اور طلبہ و طالبات شریک تھے۔

دربھنگہ: عالمی ادب کے مطالعے سے یہ حقیقت واضح ہو جاتی ہے کہ ادب اپنے علاقائی تہذیب وتمدن کا اہم دستاویز ہوتا ہے اور ادب کے ذریعہ کسی خاص علاقے کی تہذیبی وثقافتی تاریخ مرتب کی جا سکتی ہے۔ان خیالات کا اظہار اپنے صدارتی خطبہ میں پروفیسر مشتاق احمد، پرنسپل سی ایم کالج، دربھنگہ نے کیا۔پروفیسر احمد شعبۂ اردو وفارسی کے زیر اہتمام آئی سی ایس ایس آر کے تعاون سے منعقد یک روزہ قومی سمینار بہ موضوع’’اردو زبان وادب پر متھلا کلچر کے اثرات‘‘ کے افتتاحیہ اجلاس سے خطاب کر رہے تھے۔پروفیسر احمد نے کہا کہ کوئی بھی فنکار اپنے گردو نواح سے بے خبر نہیں رہتا اور اپنے ماحول سے جو اثرات قبول کرتا ہے اسے وہ اپنی تخلیق میں نمایاں کرتا ہے۔خطۂ متھلانچل تہذیبی وثقافتی اعتبار سے ایک منفرد علاقہ ہے اور یہاں کا کلچر ملک کے دیگر حصوں سے بالکل الگ ہے اس لئے یہاں کا متھلا کلچر نہ صرف عام زندگی میںدیکھنے کو ملتا ہے بلکہ یہاں کے اد ب میں بھی اس کی جھلک موجود ہے ۔پروفیسر احمد نے کہا کہ یہ بین العلومی مطالعے کا موضوع ہے اور اس اہم موضوع پر جتنے بھی مقالہ نگار اپنی رائے پیش کریں گے اسے دستاویزی صورت میں کتابی شکل دی جائے گی تاکہ یہ ثابت ہو سکے کہ متھلانچل کے ادبا وشعرا نے کس طرح یہاں کے معاشرتی نظام سے فکری اور نظری سرمایے حاصل کئے ہیں اور اسے اپنی تخلیق میں جگہ دی ہے۔پروفیسر احمد نے کہا کہ انیسویں صدی کے آغاز سے ہی مغر ب میں یہ بحث شروع ہوگئی تھی کہ ادب میں کسی خاص علاقے کی تہذیب کس طرح پرورش پاتی ہے ۔ انہو ںنے ایڈورڈ ایلسورتھ روس کی کتاب ’’سوشل کنٹرول ‘‘ مطبوعہ 1901ء اور سفر نامہ ابن بطوطہ کے ساتھ ساتھ گارساں دتاسی، سید صباح الدین عبدالرحمن، چارلس بوکوسکی وغیرہ کے حوالے سے یہ ثابت کیا کہ اردو زبان وادب طرزِ فکرواحساس کی بنیاد پر ثقافتی تنوع کو مستحکم کرتی ہے اور متھلانچل کے تہذیبی وراثت کی امین ہے ۔اپنے کلیدی خطبے میں اردو کے نامور ادیب پروفیسر ڈاکٹر ندیم احمد ، جامعہ ملّیہ اسلامیہ نے کہا کہ اردو میں متھلانچل کی تہذیب وثقافت کی بھرپور عکاسی ہے اور اس علاقے کے ادبا اور شعرا نے یہاں کی تہذیبی وراثت کو اپنی فکر ونظر کا حصہ بنایا ہے ۔ انہوں نے مختلف شعرا اور ادبا کے حوالے سے گفتگو کی اور سمینار کے موضوع کی تعریف کی ۔پروفیسر محمد جوہر علی ، شعبۂ اردو علی گڑھ مسلم یونیورسٹی، علی گڑھ نے اپنے پر مغز خطاب میں کہا کہ متھلا کلچر نے اردو ادب کو تہذیبی شناخت دی ہے اور یہ سمینار ایک نئے موضوع پر ہو رہاہے جس سے تمام اردو دنیا کو استفادہ کا موقع ملے گا اور نئی روشنی حاصل ہو سکے گی ۔ انہو ںنے لسانی اور تہذیبی رشتوں پر تفصیلی گفتگو کی اور متھلانچل کی تہذیب کی عکاسی کی مثالوں سے یہ ثابت کیا کہ متھلانچل کی جیتی جاگتی تصویر اردو ادب میں دیکھنے کو ملتی ہے۔ پروفیسر محمد کاظم، شعبہ اردو دہلی یونیورسٹی، دہلی نے متھلانچل کے مخصوص کلچر پر گفتگو کی اور اس کلچر نے کس طرح اردو کے افسانہ نگاروں اور ناول نگاروں کو متاثر کیا ہے اس پر بھرپور روشنی ڈالی ۔ انہوں نے کہا کہ اردو کے افسانہ نگار سہیل عظیم آبادی، شین مظفرپوری، کوثر مظہری وغیرہ کے یہاں متھلانچل کی بولی اور یہاں کے کلچر کے اثرات نمایاں ہیں۔آغاز میں ڈاکٹر خالد انجم عثمانی نے سمینار کے موضوع کی علمی وادبی اہمیت وافادیت پر روشنی ڈالی اور تعارفی کلمات کے ساتھ ساتھ تمام مہمانوں اور شرکا کا خیر مقدم کیا ۔ افتتاحی اجلاس کی نظامت ڈاکٹر فیضان حیدر نے بحسن وخوبی انجام دیا اور اظہارِ تشکر شعبۂ اردو کی استاد ڈاکٹر شبنم نے پیش کیا۔ افتتاحی اجلاس کے علاوہ دو تکنیکی اجلاس منعقد ہوئے۔ پہلے اجلاس میں پروفیسر ندیم احمد ، پروفیسر محمد کاظم ، پروفیسر محمد علی جوہر، پروفیسر آفتاب اشرف،پروفیسر محمد افتخار احمد، ڈاکٹر شہنواز عالم، ڈاکٹر قرۃ العین، ڈاکٹر مطیع الرحمن، ڈاکٹر عبدالحی، ڈاکٹر شبنم وغیرہ نے اپنے مقالات پیش کیے ۔ دوسرے اجلاس میں ڈاکٹر نسرین ثریا، ڈاکٹر مسرور ہادی، ڈاکٹر مجاہد اسلام، ڈاکٹر علاء الدین خاں، ڈاکٹر محمد موصوف رضا، ڈاکٹر جسیم الدین، ڈاکٹر منور راہی، محمد سمیع الدین خلیق، ڈاکٹر فیضان حیدر وغیرہ نے اپنے مقالات پیش کئے ۔اس موقع پر اردو کے عالمی شہرت یافتہ شاعروادیب پروفیسر شاکر خلیق نے سمینار کے موضوع کی تاریخی وعلمی اہمیت پر اپنے خیالات کا اظہار کیا اور متھلانچل کی ثقافتی شناخت واردو زبان وادب کے رشتے پر گفتگو کی ۔ واضح ہو کہ پروفیسر خلیق برسوں سے متھلانچل کی تہذیبی شناخت اور اردو کے رشتے پر مضامین ومقالات لکھتے رہے ہیں جس کا ذکر بیشتر مقالہ نگاروں نے کیا۔ سمینار میں شہر دربھنگہ اور گردو نواح کے کالجوں کے اساتذہ وریسرچ اسکالر بڑی تعداد میں شامل ہوئے ان میں ڈاکٹر ڈاکٹر نجیب اختر،محمد بدرالدین، ڈاکٹر زیبا پروین، ڈاکٹرایمن عبید، ڈاکٹر رحمت اللہ افضل وغیرہ شامل ہیں ۔ اس موقع پر شرکائے سمینار کے ذریعہ علی گڑھ میگزین کا بھی رسمِ اجرا عمل میں آیا۔واضح ہو کہ سمینار کے مقالات بہت جلد کتابی صورت میں شائع ہوں گے۔

سہ روزہ قومی سمینار’ڈیجیٹل میڈیا اور اردو زبان و ادب:عصری تناظرات و اور امکانات‘ کا دوسرا دن

ڈیجیٹل میڈیا آج کے انسان کی ناگزیر ضرورت ہے،اس کے بغیر نہ ہم اپنے ارد گرد سے باخبر رہ سکتے ہیں اور نہ ہی دنیا جہان کی ہمیں کوئی خبر ہوسکتی ہے۔بعض حالات میں تو سوشل میڈیا انسان کی ایسی ضرورت بن گیا ہے کہ اس کے استعمال کیے بغیر انسان مکمل بے بس اور بے آسرا ہوجاتاہے،لہٰذا وقت کی ضرورت کے مطابق ہمیں اس سے آگاہ ہونا اور اس کے ٹولس سیکھنانہایت لازمی ہے۔ مذکورہ خیالات کااظہار اردو اکادمی، دہلی کے زیر اہتمام ’’ڈیجیٹل میڈیا اور اردو زبان و ادب: عصری تناظر اور امکانات‘‘ کے عنوان سے پہلے اجلاس کی صدارت کرتے ہوئے پروفیسر خالد اشرف نے کیا ۔انھوں نے اپنے خطاب میں مزید کہا کہ یہ درست ہے کہ جدید ٹیکنالوجی اور ڈیجیٹل میڈیا آج کے وقت کی اہم ترین ضرورت ہے مگر اسے اپنے اوپر حاوی نہیں ہونے دینا چاہیے۔ مشینیں انسان ایجاد کرتا ہے نہ مشینوں نے انسان ایجاد کیے ہیں،یہ معاملہ واقعی تشویش ناک اور قابل تاسف ہے کہ انسان اس کے چنگل میں پھنس جائے ۔

اجلاس کے دوسرے صدر معروف صحافی معصوم مرادآبادی نے تحریری صدارتی خطبہ پیش کیا جس میں ہلکے پھلکے انداز میں جدید ٹیکنالوجی و ڈیجیٹل میڈیا کے نقصانات و فوائد بیان کیے۔ انھوں نے اس خطبے میں بتایا کہ ڈیجیٹل میڈیا اور جدید ٹکنالوجی کو ہیجانی میڈیا کہنا درست نہیں ہے یا قبل ازوقت ہے،جب کہ اس کے فائدے اور انسان کی معاونت میں اس کا کردار ناقابل فراموش ہے۔

اس اجلاس میں کل سات مقالے پڑھے گئے جن میں ڈاکٹر محمدرکن الدین(اردو کے آن لائن رسالے)،ڈاکٹرامتیاز رومی(یورپ میں اردو پورٹلس مواقع و امکانات)،ڈاکٹر رضی شہاب (صحافت میں مصنوعی ذہانت :مواقع اور چیلنجز اور امکانات) ،معروف صحافی جناب شاہد لطیف (آن لائن ادبی تبصرے : نوعیت و افادیت ) ،معروف صحافی جناب سہیل انجم (زبانوں کی بقا اور ڈیجیٹل میڈیا)،ڈاکٹر شکیل اختر(ڈیجیٹل میڈیا :ریڈیو اور بچوں کاپروگرام) اورڈاکٹر عبد الحئی (ڈیجیٹل میڈیاپر ادب و تنقید کا معیار اور رجحانات) کے اسمائے گرامی شامل ہیں جب کہ اجلاس کی نظامت کے فرائض ڈاکٹر امیر حمزہ نے نہایت عالمانہ اور محققانہ انداز میں انجام دیے۔

سمینار کا دوسرا اجلاس معروف صحافی شاہد لطیف اور ایڈوکیٹ ناصر عزیزکی صدارت میں دوپہر ڈھائی بجے شروع ہواجس کی نظامت کے فرائض نوید رضا نے انجام دیے۔اس اجلاس میں کل سات مقالے پڑھے گئے جن میںپروفیسر دانش اقبال(ڈیجیٹل ایجوکیشنل پورٹل)،ڈاکٹر رضوان الحق (اردو میں ای کنٹینٹ )،ڈاکٹر محمد قاسم انصاری(اردو صحافت اور ڈیجیٹل میڈیا)،ڈاکٹر لیاقت علی(اردو تعلیم میں ڈیجیٹل ٹیکنالوجی کا کردار )،ڈاکٹر مظہر حسنین(اردو اور سوشل میڈیا) ،ڈاکٹر تالیف حیدر(ڈیجیٹل میڈیا او ر اردو زبان)،ڈاکٹر سفینہ بیگم(اردو میں ای۔لرننگ کے پلیٹ فارمس)شامل ہیں۔

اجلاس کے صدارتی خطبے میں ناصر عزیز نے کہا کہ گزشتہ دس پندرہ برسوں میں ڈیجیٹل میڈیا نے ہماری ادبی اور سماجی زندگی کو متاثر کیاہے جس پر ہمارے مقالہ نگاروں نے بھی توجہ دی ہے اور اس موضوع پر شاندار مقالات پیش کیے ہیں۔انھوں نے مزید کہا کہ یہ مقالے یقینا ڈیجیٹل ورلڈ اور میڈیا سے ہماری رہنما کریں گے ۔ اجلاس کے دوسرے صدر شاہد لطیف نے فرداً فرداًتمام مقالوں پر اظہار خیال کیا۔انھوں نے مزید کہا کہ ڈیجیٹل عہد میں ہمیں ہرگز یہ فراموش نہ کرنا چاہیے کہ ہمارے بچے کتابوں سے دور ہوجائیں اور آنے والے چند برسوں میں ایسا ماحول بنے کہ وہ کتاب نام کی کسی چیز سے واقف نہ ہوں۔انھوں نے کہا کہ ڈیجیٹل عہد میں ہمیں ضرور چیلنجوں کا سامنا ہے لہٰذا مناسب ہوگا کہ ہم سوشل میڈیا کا استعمال بقدر ضرورت ہی کریں۔انھوں نے جدیدٹیکنالوجی کی اہمیت پر زور دیتے ہوئے کہا کہ ہمیں جدید انفارمیشن ٹیکنالوجی سے اس لیے واقف ہونا ضروری ہے، تاکہ ہم کسی سے پیچھے نہ رہ جائیں ۔

طلبہ اپنے مقصد کے لیے ہمیشہ کوشاں رہیں: پرنسپل پروفیسر بھاونا پانڈے

نئی دہلی:دیال سنگھ ایوننگ کالج کے شعبۂ اردو کی جانب سے آج رابطہ کے تحت ایک ادبی پروگرام کا انعقاد کیا گیا جس میں اساتذہ کے علاوہ طلبہ و طالبات بھی شریک ہوئے۔ڈاکٹر فیاض عالم (ستیہ وتی کالج)کی صدارت میں یہ پروگرام ہوا جب کہ نظامت سید محمد احمد( سال دوم )نے کی ۔پرنسپل پروفیسر بھاونا پانڈے نے استقبالیہ خطبہ میں طلبہ سے مخاطب ہو کر کہا کہ آپ سب شاہین کی طرح ہیں ۔ آ پ کے سامنے ہزاروں راستے ہیں ۔ اپنے منزل کے لیے ہمیشہ جد و جہد کرتے رہیں۔صدر شعبہ پروفیسر ساجد حسین نے تعارفی کلمات میں تمام مہمانان ،استاتذہ اور طلبہ و طالبات کا خیر مقدم کرتے ہوئے کہا کہ وقت کے ساتھ آگے بڑھیں، وقت کی قدر کریں اوراس کی اہمیت کو سمجھیں۔اب وقت ضائع کرنا ہم سب کے لیے کافی نقصاندہ ثابت ہوگا۔ اس پر فتن دور میں پڑھائی کے لیے حالات کو سازگار بنائیں،مزید انہوں نے کہا کہ کامیاب ہونے کے لیے خواب دیکھنے کے بجائے کام کرنے کی ضرورت ہے۔ ڈاکٹر شاہد اقبال نے طلبہ کو ڈسپلن کے ساتھ آگے بڑھنے کی تلقین کی اور مزید کہا کہ آپ سب میں وہ تمام صلاحتیں موجود ہیں جو ایک کامیاب اسکالر میں ہوتا ہے اسی لئے اپنی توجہ پڑھائی پر مرکوز کریں۔ڈاکٹر فیاض عالم نے صدارتی خطبہ میں طلبہ سے مخاطب ہو کر کہا کہ اپنے خوابوں کی تکمیل کے لیے ہر ممکن کوشش کریں۔ مزید انہوں نے یہ بھی کہا کہ اپنے زندگی کے کسی بھی شعبہ کے لیے جب تک آپ لگن اور محنت کے ساتھ کام نہیں کریںگے تب تک منزل مقصود تک نہیں پہنچ سکتے۔اپنے آپ پر یقین رکھیں،اپنی صلاحتوں پر غور کرتے ہوئے معقول اعتماد کے ساتھ آگے بڑھیں۔اس کے علاوہ بزم ادب کے انتخابی پروگرام کا اہتمام کیا گیا جس میں بی ۔اے پروگرام کے سبھی طلبہ و طالبات شریک ہوئے۔یہ انتخابی پروگرام صدر شعبہ پروفیسر ساجد حسین کی نگرانی میں تکمیل کو پہنچا۔ اس پروگرام میں طلبہ و طالبات نے نعت اور غزل پڑھ کر سبھی کو محظوظ کیا ۔انتخابی عمل سے پہلے پروفیسر ساجد حسین نے بزم ادب کے اغراض و مقاصد پر روشنی ڈالی اور کہا کہ اس بزم کے ذریعے تمام طرح کے ادبی پروگرام منعقد ہوتے رہیں گے۔عدنان رحمت،محمد زید راشد،مہتاب رضا،محمد ندیم،ساحل مشتاق، فاطمہ،زبیر احمد،عاشق البیلا،محمد ساحل، محمدکوثر،مدبرہ،امیمہ اور نازیہ پروگرام کو کامیاب بنانے میں پیش پیش تھے۔