قندیل

افغانستان میں تیزی سے بدلتے حالات نے جنوبی ایشیائی
ممالک کے لیے ایک بار پھر خطرات کی گھنٹیاں بجادی ہیں، یہ ٹاپک پورے بیس پچیس سال سے کروڑوں انسانوں کے لیے تحیر انگیز اور ہر لمحہ چونکانے والا رہا ہےـ آپ دیکھیے کہ نائن الیون کے بعد امریکہ نے القاعدہ کا بھوت پکڑنے کے لیے افغانستان کا رخ کیا،جو اسے پاکستان میں ملا، مگر وہ یہاں بیس سال تک جما رہا، پہلے سے ہی غریب و نادار ملک کو نوچتا کھسوٹتا رہا اور پھر اچانک اسے خیال آیا کہ اب یہاں سے کوچ کرنا چاہیے اور چند ماہ کے اندر ہزاروں امریکی فوجیوں کا افغانستان سے نکل جانا طے ہوگیاـ مذاکرات کے کئی دور چلے، جن میں امریکہ سمیت افغان حکومت اور تیسرا فریق طالبان بھی موجود رہا، پڑوسی ممالک بھی ادھر ادھر حاشیے پر موجود رہےـ اب جبکہ اس مذاکرات کے مطابق امریکہ اور نیٹو اتحاد کی افواج افغانستان خالی کر رہی ہیں، تو پھر سے افغان فوج اور طالبان میں کشت و خون کا ماحول زوروں پر ہے، روزانہ کی بنیاد پر طالبان کی فتوحات کی خبریں ایسے آرہی ہیں کہ گویا انھوں نے کسی ملک پر حملہ کیا ہے اور ایک کے بعد دوسرے قلعے فتح کرتے جا رہے ہیں ـ دوسری طرف پاکستان دم بخود ہے، بھارت سرگرداں، ایران بھی نظریں گڑائے ہوئے ہے،چین و روس غالبا کسی نئی تدبیر میں مصروف اور امریکہ کسی تازہ موقعے کی تاک میں ـ سمجھ میں یہ نہیں آتا کہ اگر امن مذاکرات کی تکمیل کے بعد امریکہ نے جانے کا فیصلہ کیا تھا تو پھر اس کے جاتے ہی یہ مار دھاڑ کیوں ہو رہی ہے؟
جمعرات کو ہندوستان کے ابھرتے ہوئے فوٹو جرنلسٹ دانش صدیقی قندھار میں افغان فون اور طالبان کے درمیان فائرنگ کے تبادلے کے دوران جاں بحق ہوگئے ـ عام طورپر خبریں آئیں کہ طالبان نے انھیں مارا اور آج یہ خبر بھی آئی کہ طالبان نے ان کی لاش ریڈکراس کو سونپ دی ہے اور اب اسے ہندوستان ان کے اہل خانہ کو سونپنے کا انتظام کیا جا رہا ہےـ میڈیا کی ممکنہ جانب داری یا تعصب سے قطع نظر دانش جیسے عالمی سطح کے ابھرتے صحافی کے قتل سے مجموعی طور پر طالبان کی شبیہ کو ہی نقصان پہنچاہے اور وہ طبقہ جو ان کے لیے کسی قدر نرم گوشہ رکھتا ہے، وہ بھی اس حرکت کی کسی طور حمایت نہیں کر سکتاـ گوکہ محاذِ جنگ پر پتا نہیں چلتا کہ کون دشمن کا بندہ ہے اور کون محض تماشائی یا صحافی اور اخباری نمایندہ، اسی وجہ سے طالبان نے دانش کی موت پر اظہارِ افسوس کیا ہے اور ان کے ترجمان نے کہا ہے کہ وار زون میں آنے والے صحافی ہمیں مطلع کریں، ہم ان کا دھیان رکھیں گے،مگر سب سے بڑا مسئلہ تو یہی ہے کہ اگر مذاکرات میں قیامِ امن کی شرطوں پر بات چیت ہوچکی تھی، تو پھر امریکہ کے نکلتے ہی آخر افغان حکومت اور طالبان آپس میں کیوں مرنے مارنے پر اتارو ہوگئے؟ کیا مذاکرات کا عمل محض ایک ڈرامے بازی تھی اور امریکہ کسی طرح جان چھڑا کر نکلنا چاہتا تھا؟
افغان حکومت کا رویہ بھی عجیب و غریب ہے، صدر صاحب پاکستان پر طالبان نوازی کا الزام لگا رہے ہیں، دوسری طرف بھارت سے فوجی امداد لینے کے امکان کا اظہار ہو رہا ہےـ مگر کیا بھارت اس پوزیشن میں ہے کہ وہ کسی ملک کی فوجی مدد کر سکے، جب سے افغانستان میں نئی صورت حال پیدا ہوئی ہے، ہمارے وزیر خارجہ اور مشیر برائے قومی سلامتی خود یہاں وہاں بھاگے پھر رہے ہیں اور حکومت اندرونی طور پر ایسے اندیشے سے دوچار ہے کہ پتا نہیں کل کیا ہوجائے؟ عمران خان کا بھی دلچسپ بیان میڈیا میں گردش کر رہا ہے، جس میں انھوں نے خطے میں امن و امان کے قیام میں رکاوٹ آرایس ایس کی آئیڈیا لوجی کو قرار دیا ہے، ظاہر ہے کہ عمران کا یہ بیان محض اپنے لوگوں کو خوش کرنے کے لیے ہے، ورنہ وہ اچھی طرح جانتے ہیں کہ خطے میں قیامِ امن کی راہ میں آر ایس ایس کے علاوہ مزید کونسے کونسے اور کہاں کہاں کے روڑے حائل ہیں ـ
بش کا بیان بھی دو دن قبل آچکا ہے کہ امریکہ نے افغانستان سے جانے کا فیصلہ غلط کیا ہے اور اس کے خطرناک نتائج سامنے آئیں گےـ یوں تو امریکہ کے رہتے ہوئے بھی افغانستان کے حالات ابتر ہی تھے، مگر نئے سرے سے جو خوں ریزی کا دور شروع ہوا ہے، وہ بڑا دردناک ہےـ بندگانِ اقتدار کی ہوس کے شکار نہ جانے کتنے معصوم ہوچکے اور آنے والے دنوں میں نہ معلوم اور کتنے بے گناہ ان کی درندگی کی نذر ہوں گےـ ایسا لگتا ہے کہ مستقبل قریب میں افغانستان میں طالبان تو خیر اپنی حکومت کیا قائم کریں گے، مگر جنوبی ایشیا ایک نئی اور بڑی آفت سے دوچار ہوگا، جس میں کئی ملک اور ان کے عوام کے لیے تباہی و تاراجی لکھی ہوگی ـ واللہ اعلم

چند دنوں قبل برقی پیغام رسانی کے لیے سب سے زیادہ استعمال ہونے والے موبائل ایپ واٹس ایپ نے اپنی پرائیوسی پالیسی میں تبدیلی کا عندیہ دیا اور ساتھ ہی یہ بھی اعلان کردیا کہ جو صارف بھی اس تبدیل شدہ پالیسی سے اختلاف کرے گا،اس کا اکاؤنٹ 8/فروری کو ڈیلیٹ کردیا جائے گا۔یہ اعلان دنیا بھر میں واٹس ایپ استعمال کرنے والے کرڑوں صارفین کوموصول ہوا۔رپورٹس کے مطابق پہلے مرحلے میں یہ پیغامات ہندوستانی صارفین کو موصول ہوئے، جن میں زیادہ تفصیل تو نہیں بتائی گئی، مگر جب صارف اس پر کلک کرتا تو اس کے سامنے واضح پیغام نمودار ہوتا۔واٹس ایپ کی جانب سے جاری ہونے والے پیغام میں بتایا گیا کہ کمپنی کس طرح آپ کی ذاتی معلومات حاصل کر کے انھیں فیس بک کے لیے استعمال یا اسے فراہم کرے گی۔ مزید بتایا گیا کہ واٹس ایپ سروس استعمال کرتے ہوئے آپ کسی دوسرے بزنس کے ساتھ رابطے میں آتے ہیں، تو اس کی تمام معلومات کمپنی کے پاس پہنچ جاتی ہیں،جن کو فیس بک کی زیرملکیت دیگر ایپلی کیشنز سے شیئر کیا جاسکتا ہے۔واٹس ایپ کی جانب سے جاری نئی پالیسی کے مطابق ادارے کو اپنی مارکیٹنگ، سپورٹ، تبدیلیاں اور سروسز کو بہتر بنانے کے لیے صارفین کی معلومات درکار ہیں، جو نئی پالیسی کو قبول کیے بغیر حاصل نہیں کی جاسکتیں۔اس سلسلے میں کمپنی کے ترجمان کاکہنا تھا کہ ”واٹس ایپ اپنی سروسز کو بہتر کرنے کے لیے فیس بک اور دیگر تھرڈ پارٹی کمپنیوں کے ساتھ مل کر کام جاری رکھے ہوئے ہے، واٹس ایپ صارفین کی معلومات ان سے شیئر کی جاتی ہیں، اس اقدام کا مقصد صارفین کے مسائل کو حل کرنا ہے“۔
مگر اس اعلان کے بعد فوراً پوری دنیا میں بالعموم اور ہندوستان میں بالخصوص واٹس ایپ کے خلاف شدید ناراضی و بے اعتمادی پھیل گئی اور لوگ تیزی سے واٹس ایپ کے متبادل کی تلاش میں نکل پڑے۔رائٹرزنے اس حوالے سے ایک رپورٹ شائع کی کہ واٹس ایپ کو ابھی تک ہندوستان میں بڑے پیمانے پر اَن انسٹال نہیں کیا گیاہے؛ لیکن پرائیویسی کے بارے میں فکرمند صارفین حریف ایپس جیسے سگنل اور ٹیلی گرام کو تیزی سے ڈاؤن لوڈ کررہے ہیں۔ تحقیقاتی فرمز کا کہنا ہے کہ صارفین کی جانب سے ایسا کرنے سے ان ایپس کے ڈاؤن لوڈ چارٹس بڑھ رہے ہیں اور یہ ایپس بھارت میں پہلی مرتبہ ہر جگہ عام ہورہے ہیں۔ ہندوستان میں 40 کروڑ صارفین واٹس ایپ کا استعمال کرتے ہیں اور سب سے زیادہ شدید رد عمل یہیں دیکھا جارہا تھا،جس کی وجہ سے واٹس ایپ نے پچھلے ہفتے کم از کم 10 انگریزی اور ہندی اخبارات میں کروڑوں روپے لاگت کے اشتہاری پیغامات شائع کرائے اور اپنے صارفین کو یقین دہانی کروانے کی کوشش کی کہ ان کی ذاتی معلومات کے ساتھ چھیڑ چھاڑ نہیں کیا جائے گا اور یہ کہ کمپنی کے اعلان کو غلط سمجھا گیا ہے۔واٹس ایپ نے ایک اخبار میں کیے گئے اعلان میں کہا کہ آپ کی پرائیویسی کا احترام ہمارے ڈی این اے میں شامل ہے۔میسجنگ ایپ نے کہا کہ اس کی پرائیویسی پالیسی اپ ڈیٹ کسی بھی طریقے سے آپ کے دوستوں اور اہل خانہ کے ساتھ آپ کے پیغامات کی پرائیویسی کو متاثر نہیں کرتی۔واٹس ایپ نے یہ بھی کہا کہ پرائیویسی پالیسی کی تبدیلیاں صرف صارفین کے کاروباری تعلقات سے متعلق ہیں۔ اتناہی نہیں،واٹس ایپ نے کم ازکم دودن تک سٹیٹس کے ذریعے بھی تمام صارفین کو مطمئن کرنے کی کوشش کی اور وضاحت کرتا رہا کہ واٹس ایپ آپ کی ذاتی معلومات کسی سے شیئر نہیں کرتا ہے۔
واٹس ایپ کی سکیورٹی کے حوالے سے نئے خدشات کے بعد روسی میسنجر ٹیلی گرام کی صارفین کے تعداد عروج پر پہنچ گئی، ٹیلی گرام کے بانی نے اسے انسانی تاریخ کی سب سے بڑی ڈیجیٹل ہجرت قرار دیا۔روسی میڈیا کے مطابق روسی میسنجر ٹیلی گرام نے امریکہ،ہندوستان اور پاکستان سمیت دنیا بھر میں مقبولیت کے ریکارڈ توڑ دیے۔ٹیلی گرام کی جانب سے سوشل میڈیا پر کہا گیا کہ اس عالمی رجحان کے بعد دو صدور نے اپنے ٹیلی گرام چینلز شروع کیے، جس میں برازیل کے صدر جیر بولسنارو اور ترکی کے صدر رجب طیب اردگان شامل ہیں۔بانی کا کہنا ہے کہ فرانسیسی صدر ایمانویل میکرون اور یوکرین کے صدر ولادی میر زیلینسکی کے علاوہ اسرائیلی وزیر اعظم بینجمن نیتن یاہو سمیت متعدد دیگر عالمی رہنماؤں نے بھی ٹیلی گرام میسنجر میں اندراج کیا ہے۔انہوں نے کہا کہ ہمیں یہ اعزاز حاصل ہے کہ سیاسی رہنماؤں کے ساتھ ساتھ متعدد عوامی تنظیمیں غلط استعمال سے نمٹنے اور اپنے معاشروں میں اہم امور کے بارے میں آگاہی پھیلانے کے لیے ٹیلی گرام پر انحصار کر رہی ہیں۔ٹیلی گرام کے بانی نے زور دے کر کہا کہ میسنجر مبہم الگورتھم پر عمل نہیں کرتا جس سے یہ طے ہوتا ہے کہ صارف اپنی مرضی کا مواد ہی دیکھ سکیں گے۔اس سے قبل ڈوروف نے اعلان کیا تھا کہ ٹیلی گرام استعمال کرنے والوں کی تعداد 500 ملین سے تجاوز کر چکی ہے جبکہ صرف 3 دنوں میں 25 ملین افراد ٹیلی گرام کا استعمال شروع کرچکے ہیں۔کچھ لوگوں نے ترکی الاصل میسیجنگ ایپ بی آئی پی(BIP)کی طرف بھی ہجرت کی،خاص کر بنگلہ دیش اور انڈونیشیا وغیرہ میں زیادہ لوگ اس کی طرف منتقل ہوئے۔بہر کیف چند دنوں کے مسلسل ہنگاموں اور واٹس ایپ کی وضاحتوں کے بعد اب معاملہ کچھ ٹھنڈا ہوتا نظر آرہاہے،ویسے بات اگرواقعتاً پرائیویسی کے تحفظ کی کریں تو فی الحقیقت انٹرنیٹ استعمال کرنے والے کسی بھی شخص کی اب کوئی پرائیویسی نہیں رہ گئی؛کیوں کہ آپ کوئی بھی ایپلی کیشن انسٹال کرتے ہیں تو وہاں آپ کو اپنی ذاتی معلومات،درست فون نمبر یا ای میل آئی ڈی ہی سہی،ہر حال میں دینا ہوتی ہیں،اس کے بغیر آپ اسے انسٹال نہیں کرسکتے،استعمال نہیں کر سکتے؛بلکہ نیااسمارٹ فون لیتے ہی اسے ایکٹیو کرنے کے لیے سب سے پہلے انٹرنیٹ کے سہارے اس پر اپنا اکاؤنٹ بنانا ہوتاہے،تبھی آپ کا فون چلے گا،اس کے بغیر چل ہی نہیں سکتا اور ظاہر سی بات ہے کہ اکاؤنٹ بنانے کے لیے آپ کو ذاتی معلومات تو دینی ہی ہوں گی،پس اب پرائیویسی وغیرہ کا کوئی مطلب نہیں رہ گیا۔انٹرنیٹ،اینڈرائڈموبائل اور آئی فون کے عہد میں اگر پرائیویسی پچانی ہے،تو سرے سے ان چیزوں سے کنارہ کش رہنا ہوگا،ورنہ تو قدم قدم پر آپ کے ذہن میں اندیشے پنپتے رہیں گے۔ایک بہتر قدم وہ بھی ہوسکتا ہے،جس کی طرف 18/جنوری کو دہلی ہائی کورٹ نے اس تعلق سے دائر درخواست کی سماعت کرتے ہوئے رہنمائی کی ہے کہ اگر آپ کو واٹس ایپ کے تعلق سے اندیشے ہیں،تو اسے اپنے فون سے ڈیلیٹ کردیں؛ کیوں کہ اگر زیادہ گہرائی میں جائیں گے،تو کسی بھی سوشل پلیٹ فارم پر آپ کی پرائیویسی محفوظ نہیں ہے۔ پس کونسا ایپ استعمال کرنا ہے اور کونسانہیں،یہ آپ کی پسنداور متعلقہ ایپ کی خوبیوں،فیچرز پر منحصر ہے،اس کے لیے یہ دلیل غالباً بیکار ہی ہوگی کہ فلاں کمپنی ہماری ذاتی معلومات کی حفاظت کرے گی اور فلاں نہیں کرے گی۔

آغا شورش کاشمیری نے اپنی مشہور خود نوشت سوانح’’بوے گل،نالۂ دل،دودِچراغِ محفل‘‘میں ۱۹۳۶ میں گاندھی جی سے ملاقات کا احوال لکھا ہے۔یہ وہ دور تھا جب ہندوستانی سیاست تیزی سے کروٹ بدل رہی تھی اور فرقہ وارانہ انتہا پسندی کا عفریت اپنے دہانے کھول رہا تھا۔شورش نے گاندھی سے ملاقات کے دوران کئی سوالات کیے،جن کے جواب گاندھی جی نے بڑے انشراح و اعتماد کے ساتھ دیا،جو ان کا انداز تھا۔ان سوالوں میں سے ایک سوال مسلم لیڈرشپ کے بارے میں تھا،انھوں نے پوچھا:
’’ مسلمانوں کی ناکامی کا سبب کیاہے؟‘‘۔
گاندھی نے جواب دیا:
’’میں سمجھتاہوں کہ ان میں کوئی شخص بھی فقیری کرنا نہیں چاہتا؛بلکہ فقیری سے اٹھ کر شہنشاہی کر رہا ہے۔قومی خدمت صرف فقیری کرنے سے ہوتی ہے‘‘۔
شورش نے گاندھی کے اس جواب کا خاص پس منظر بیان کیاہے؛لیکن اگر ہم پچھلے سو ڈیڑھ سو سال کی مسلم سیاست ،قیادت پر نظر ڈالیں تو گاندھی کی یہ بات کتنی سچی ہے؛بلکہ اگر آپ خالی الذہن ہوکر تحریکِ آزادی کے دوران صرف مسلمانوں کے پلیٹ فارم سے بننے والی سیاسی پارٹیوں کا سرسری جائزہ لیں،تو گاندھی کی اس بات کی سچائی اور بھی روشن ہوکر سامنے آئے گی ۔آزادی سے پہلے کانگریس اور مسلم لیگ کے علاوہ درجنوں خالص مسلم سیاسی جماعتیں تھیں اور ان میں سے ہر ایک کا دعویٰ تمام مسلمانوں کی نمایندگی کا تھا۔خود مسلم لیگ جس نے مسلمانوں کے تحفظ و خود مختاری کے لیے پاکستان بنوایا،اس سے ٹوٹ کر اب تک وہاں لگ بھگ دودرجن سیاسی جماعتیں بن چکی ہیں۔ آزاد ہندوستان میں بھی ’’مسلم قیادت و سیاست‘‘کے کئی طوفان گزر چکے ہیں،اگر ان کی تاریخ دیکھ لی جائے ،تو اس سے بھی گاندھی کے ’’قومی خدمت‘‘اور ’’فقیری‘‘کے معنی سمجھے جاسکتے ہیں۔
حالیہ پانچ چھ سالوں کے دوران حکومت کی متعصبانہ پالیسیوں اور مبینہ سیکولر جماعتوں کی مسلمانوں سے کنارہ کشی کی وجہ سے جنوبی ہند کے سیاست داں اور ممبر پارلیمنٹ اسدالدین اویسی کو میدان خالی ملا اور انھوں نے مسلم مسائل پر کھل کر بولنا شروع کیا،جس کے نتیجے میں مودی حکومت کے پہلے دور کے شروع ہوتے ہی وہ قومی سطح کے مسلم لیڈر بن گئے اور پھر بتدریج مسلمانوں کے بہت بڑے طبقے میں ایک بار پھر ’’اپنی قیادت‘‘ اور ’’اپنی سیاست‘‘ کو فروغ دینے کا جذبہ پیدا ہوا ہے،مگر حیرت ؛بلکہ المیہ ہے کہ ایسا ہر شخص اِس چکر میں ہے کہ اسی کو قائدِاعظم مان لیا جائے اور باقی سارے لوگ اس کی جھنڈا برداری کرتے نظر آئیں۔سوشل میڈیا پر مفکری کی باڑھ آئی ہوئی ہے اور چوک چوراہوں پر سیاسی پھکیت اپنی ہفوات کو اتنی خود اعتمادی سے پیش کرتے ہیں کہ معلوم ہوتا ہے قوم کی نجات و ترقی کا تیر بہ ہدف نسخہ بس اسی مہاپرش کے پاس ہے۔
بہار الیکشن کے موجودہ منظرنامے پر غور کیجیے تو جو پارٹیاں مسلمانوں کے زخموں کا مداوا کرنے کا دعویٰ کرتی ہیں،خود ان کی سمتیں بھی مختلف ہیں،مثال کے طورپر مجلس کسی اور اتحاد میں شامل ہے،جبکہ ایس ڈی پی آئی کسی دوسرے اتحاد کا حصہ ہے،جو کہ من حیث المجموع بہار الیکشن کا چوتھا اتحاد ہے۔ پھر مجلس کا اتحاد بھی بی ایس پی اور اوپندر کشواہا کی پارٹی سے ہے،جن کا بھی کچھ پتا نہیں کہ کیا گل کھلائیں گے۔ مایاوتی کی تاریخ بھی پلٹی بازی کی ہے اور کشواہا تو خیر این ڈی اے کے ذریعے ہی قومی سیاست میں نمایاں ہوئے ہیں اور مرکزی وزیر بھی رہے ہیں۔اس اتحاد میں اور بھی پارٹیاں شامل ہیں،مگر مرکز میں یہی تینوں ہیں اور یہ اتحاد پورے بہار میں الیکشن لڑ رہاہے۔ایس ڈی پی آئی نے چندرشیکھر آزاد اور پپو یادو والے الائنس میں شمولیت کا فیصلہ کیا ہے اور یہ الائنس بھی پورے صوبے میں الیکشن لڑ رہا ہے۔ دوسری طرف ان سے ،خصوصاً مجلس سے وابستہ کارکنان کا ردِعمل عجیب و غریب ہے۔ عام طورپر وہ اپنا موقف معروضیت کے ساتھ رکھنے کی بجاے دوسروں پر تبرے بازی پر اتر آتے ہیں، جو سیاست کے علاوہ عام زندگی میں بھی حد درجہ مذموم ہے اور ایسی حرکتوں سے آپ کے انفرادی کیرکٹر کی ہی پول نہیں کھلتی،پوری جماعت کی اصل شبیہ سامنے آتی ہے۔
دوسری طرف کچھ لوگ جو سیاسی طبع آزمائی کے لیے مجلس سے وابستہ ہوگئے تھے اور اس امید میں تھے کہ الیکشن لڑنے اور’’اسلام کی خدمت کرنے‘‘کا موقع ملے گا،جب انھیں ’’کسی وجہ ‘‘سے ٹکٹ نہیں دیا گیا،تووہ ایک سے بڑھ کر ایک انکشاف کر رہے ہیں۔اب تک کئی لوگ سوشل میڈیا پر آکر یہ الزام لگا چکے ہیں کہ مجلس نے لیاقت کی بجاے پیسے کو ٹکٹ کا معیار بنایا ہوا ہے اور بہار کے صںدرِ مجلس سمیت ان کے بعض خاص معاونین پر بھی پیسے لے کر ٹکٹ دینے کے الزامات لگ رہے ہیں،حالاں کہ یہ بات تو سارا ملک جانتا ہے کہ دوایک پارٹیوں کے علاوہ تقریباً تمام سیاسی جماعتیں انتخابات میں کسی بھی امیدوار کو مفت میں ٹکٹ نہیں دیتیں ؛لیکن اس کو سیاسی اخلاقیات یا مجبوری یا کچھ بھی کہیے کہ ایسی باتیں بس نجی محفلوں میں ہوتی ہیں،قومی سطح پر یہ کبھی موضوعِ بحث نہیں رہا۔
اب ان الزام لگانے والوں کی باتیں درست ہیں یا نہیں،اس کی وضاحت تو پارٹی کے ذمے داران کریں گے۔خبریں تو ایسی بھی آرہی ہیں کہ بعض ناراض کارکنان کو مجلس نے ٹکٹ دینے کا فیصلہ کرلیا ہے، مگر اس پورے سلسلۂ واردات سے دوباتیں سمجھ میں آتی ہیں۔ایک تو یہ کہ جو لوگ ٹکٹ نہ ملنے کی وجہ سے پریشان ہیں ،مجلس کی قیادت کو کوس رہے ہیں اور اس کا بھانڈا پھوڑنے کا دعویٰ کررہے ہیں،وہ کبھی بھی نہ مجلس کے تئیں مخلص رہے اور نہ اپنے اس دعوے میں کہ وہ مسلمانوں کے لیے فلاں فلاں تیر ماریں گے۔دوسری یہ کہ خود مجلس کو اُسی طرح کی ایک سیاسی پارٹی سمجھنا چاہیے،جیسی ملک کی دوسری بڑی چھوٹی پارٹیاں ہیں، جو موقع لگنے پر کسی سے بھی اتحاد کر سکتی ہے اور امیدواروں کے انتخاب میں اس کا معیار بھی وہی ہے،جو دوسری پارٹیوں کا ہے،باقی کہنے اور اپنے لوگوں کو Motivateکرنے کے لیے بے شمار باتیں ہوسکتی ہیں ۔اویسی بلا شبہ ایک قابل سیاست دان ہیں اور انھوں نے مسلمانوں سے متعلق مسائل پر کھل کر اپنے موقف کا اظہار کیا ہے، مگر ایسے اور بھی بہت سے لوگ ہیں اور ان میں سے کچھ تو غیر مسلم بھی ہیں۔تو آپ اپنی صوابدید کے مطابق کسی بھی جماعت سے وابستگی اختیار کر کیجیے اور خلوص کے ساتھ سماجی و سیاسی سرگرمیوں میں حصہ لیجیے ؛لیکن فکر و عمل میں اعتدال و وسطیت کا لحاظ رکھنا ضروری ہے۔نہ کسی کی حمایت میں اندھا ہوجانا چاہیے اور نہ مخالفت میں حد سے گزرنا چاہیے،دونوں صورتیں مضر ہیں اور ہر حال میں مضر ہیں۔ آپ مجلس کو بھی ملک کی دوسری سیاسی پارٹیوں کی طرح ایک سیاسی پارٹی مان کر چلیے اور اگر دل چاہے تو اس کے پلیٹ فارم سے کام کیجیے،ایسے میں اگر خدا نخواستہ پارٹی سے کبھی آپ کا’’موہ بھنگ‘‘بھی ہوا،تو زیادہ تکلیف نہیں ہوگی؛لیکن اگر کہیں یہ سوچ کر اس سے وابستگی اختیار کرلی کہ مجلس کے جیتتے ہی مسلمانوں کے سارے مسائل ہوا ہو جائیں گے اور اویسی ’’اردوانِ ہند‘‘ہیں ،پھر کسی موقعے پر پارٹی یا اس کے قائدین آپ کی امیدوں پر کھرے نہیں اترے،تو ایسے میں تکلیف شدید ہوگی؛بلکہ بہت شدید ہوگی۔

بہار الیکشن سے عین قبل ریاست میں کئی مسائل بھڑک اٹھے ہیں،جنھیں حل کرنے یا یہ کہیں کہ سرد کرنے کی حکومتی تدبیریں بھی جاری ہیں۔کسی دلت کے قتل پر ایک وارث کو سرکاری نوکری،انٹر پاس غیر شادی شدہ لڑکیوں کواب دس کی بجاے پچیس ہزار اور گریجویشن پاس لڑکیوں کو پچیس کی جگہ پچاس ہزار روپے کا خصوصی اسکالرشپ ، حال ہی میں اسسٹنٹ پروفیسروں کی تقرری اور اردو مترجم و معاون مترجم کی تقرری کے لیے امتحانات کی ممکنہ تاریخ کے اعلانات کو اسی سلسلے کی کڑی قرار دیاجا سکتا ہے۔وزیر اعظم نریندر مودی بھی مختلف شعبوں میں کئی سو کروڑ کے منصوبوں کا افتتاح کر چکے ہیں،دربھنگہ ہوائی اڈے کی شروعات کی خبر ایک بار پھر انگڑائی لینے لگی ہے ۔انہی انتخابی مسائل و موضوعات میں ایک موضوع اردو کا بھی شامل ہوگیا ہے۔حالاں کہ اردو کے کچھ مسئلے مثلاً بہار اردو اکیڈمی ،اردو مشاورتی بورڈ وغیرہ جیسے سرکاری اداروں سے متعلق پہلے سے بھی موجود تھے ۔تازہ مسئلہ بھی مئی میں ہی پیدا ہوا تھااور وہ یہ تھا کہ ہائی اسکولوں میں اردو کو لازمی مضمون کی بجاے اختیاری مضمون قرار دے دیا گیا اور اب اساتذہ کی تقرری پانچ لازمی سبجیکٹ (ہندی،انگریزی، سماجیات، سائنس، ریاضی) اور ایک استاذ کی تقرری دوسری زبان کے لیے ہوگی جس میں سنسکرت، بنگلہ، میتھلی، بھوجپوری ،عربی و فارسی وغیرہ پہلے سے تھیں اور نئے یعنی پندرہ مئی دوہزار بیس کے محکمۂ تعلیم،بہار کے نوٹیفکیشن کے بعد اس ضمن میں اردو بھی شامل ہوگئی ہے،اس سے قبل مادری زبان اور دوسری راج بھاشا ہونے کی حیثیت سے اردو لازمی مضمون کی حیثیت سے شامل نصاب رہی ہے۔ نتیش کمار نے پہلی بار ہی حکومت میں آنے کے بعد یہ اعلان کیاتھا کہ بہار کے تمام اسکولوں میں اردو کے اساتذہ تقرر کیے جائیں گے،ان کی حکومت میں اردو کے حق میں کئی قابل ستایش قدم اٹھائے بھی گئے،اردو کے کئی ادارے بہار میں سرکاری سرپرستی میں چل رہے ہیں ،یہ الگ بحث کا موضوع ہے کہ ان اداروں سے اردو کے فروغ کا کیا اور کتنا کام ہو رہا ہے اور بہار کے اسکولوں میں کتنے اساتذہ کی سیٹیں ہنوز خالی ہیں۔
مئی والے نوٹیفکیشن کا علم اردو والوں کو تقریباً دو ماہ تک نہیں ہوسکا تھا یا معلوم تھا مگر اس پر خاموشی تھی ،غالباً جولائی کے آغاز یا جون کے اواخر میں ایک ہندی اخبار نے اس تعلق سے ایک خبر شائع ،پھر ڈاکٹر مشتاق دربھنگوی، مفتی ثناء الہدی قاسمی،ڈاکٹر سید احمد وغیرہ کے تفصیلی مضامین اس حوالے سے شائع ہوئے،بہار سٹیٹ اردو ٹیچرز ایسو ایشن بھی جولائی کے وسط سے اس معاملے میں سرگرم ہے،اس کی طرف سے 11جولائی کو ہی وزیر اعلیٰ کو خط لکھ کر توجہ دلائی گئی تھی۔اردو اخباروں میں کئی لوگوں کے بیانات شائع ہوئے اور اگست کے وسط تک بہار کے تقریباً تمام اردو والوں کویہ بات پتا چل گئی کہ حکومت نے ہائی اسکول سطح کے نصابِ تعلیم سے اردو سبجیکٹ کی لازمی حیثیت کو ختم کردیا ہے؛ چنانچہ پٹنہ و آس پاس میں موجود اردو کے سرکاری و غیر سرکاری اداروں سے وابستہ بعض سرگرم اشخاص سمیت عام اردو والے بھی بیدار ہوگئے،کچھ لوگوں نے وزیر تعلیم سے ملنے اور مسئلے کو حل کروانے کی کوشش کی،تو کچھ لوگوں نے احتجاج و مطالبۂ انصاف کا فریضہ ادا کیا۔ سوشل میڈیا اور اردو اخبارات میں بہار کے متعدد اضلاع سے ایسی تصویریں مسلسل نظر آرہی ہیں ،جن میں چند لوگ اپنے ہاتھوں میں پلے کارڈز اٹھائے بہار حکومت سے اردو کے ساتھ انصاف کرنے کا مطالبہ کر رہے ہیں اور جوں جوں الیکشن کے دن قریب آ رہے ہیں،یہ سلسلہ بھی تیز تر ہوتا جارہا ہے۔
اب ایک نیا نوٹیفکیشن محکمۂ تعلیم کا گشت کر رہا ہے،جس میں یہ کہا گیا ہے کہ جس اسکول میں بھی اردو یا دیگر دوسری زبانوں میں سے کسی ایک کے پڑھنے والے طلبہ ہوں گے،وہاں اس زبان کے استاذ کی تقرری ہوگی،مئی والے اور تازہ نوٹیفکیشن میں فرق یہ ہے کہ پہلے والے میں چالیس طلبہ کی حد بندی تھی،اس میں اس تعداد کو مبہم رکھا گیاہے،مگر حیثیت اردو کی دوسری بھاشا کی پہلے والے میں بھی تھی اور اس میں بھی ہے۔ یہ دوسرا اعلامیہ ستائیس اگست کا جاری کردہ ہے اور مدرسہ بورڈ کے موجودہ چیئر مین و انجمن ترقی اردو کی بہار شاخ کے سکریٹری عبدالقیوم انصاری کا کہنا ہے کہ یہ دوسرا نوٹیفکیشن انجمن ترقی اردو بہار کی کوششوں سے ہی جاری ہوا ہے،یہ بات انھوں نے جہان آباد میں ایک پریس کانفرنس کے دوران کہی ہے،ان کا ایک لمباسا بیان پچیس ستمبر کو بہار کے کئی اردو اخباروں میں شائع ہوا ہے۔اس سے قبل 11ستمبر کو انجمن ترقی اردو بہار کی جانب سے لگ بھگ آدھے پیج کا ایک اشتہار شائع کروایا گیا تھا،جس میں اردو اور اقلیتوں(مسلمانوں) کے حق میں نتیش حکومت کے فیصلوں،اقدامات اور منصوبوں کا گن گان کیا گیا تھا،اس کی ابتدائی سطروں میں مئی والے نو ٹیفکیشن اور اس کے بعد ستائیس اگست والے نوٹی فکیشن کا بھی ذکر تھا اور یہ لکھا گیا تھا کہ ’’انجمن ترقی اردو بہار کی کوششوں سے محکمۂ تعلیم نے 15-05-2020کو جاری کردہ اعلامیے میں ترمیم کرتے ہوئے 27-08-2020کو نیا اعلامیہ جاری کیا ہے،جس کے مطابق اگر سکینڈری و انٹر سطح کے اسکولوں میں اردو کا ایک طالب علم بھی ہوگا تو اس کے لیے استاذ کی تقرری کی جائے گی‘‘۔
ایک دلچسپ بات یہ ہے کہ انجمن ترقی اردو ہند کے صدر دفتر یعنی دہلی سے مختلف قسم کی آواز اٹھ رہی ہے اور اس کی بہار شاخ کا موقف کچھ اور ہے۔ چوبیس ستمبر کو اردو کے اخبارات میں انجمن ترقی اردو ہند کے ذریعے وزیر اعلی بہار کو انجمن کے قومی صدر پروفیسر صدیق الرحمن قدوائی،رکن مجلس عاملہ پروفیسر اختر الواسع اور سکریٹری اطہر فاروقی کے ذریعے روانہ کردہ ایک خط کے حوالے سے خبر شائع ہوئی ہے،جس میں انھوں نے بہار حکومت کے فیصلے کو غیر آئینی قرار دیتے ہوئے اس کی سابقہ حیثیت کو بحال کرنے کا مطالبہ کیا ہے۔ دوسرے نوٹیفکیشن کے حوالے سے آج روزنامہ قومی تنظیم و دیگر اردو اخبارات میں ایک خبر شائع ہوئی ہے،جس کا عنوان ہے’’محکمۂ تعلیم کی وضاحت،اردو کی لازمیت بر قرار‘‘،مگر خبر جے ڈی یو کے نو منتخب رکن قانون ساز کونسل پروفیسر غلام غوث اور اردو کونسل کے ناظم اعلیٰ ڈاکٹر اسلم جاوداں کی وزیر اعلیٰ بہار کے پرنسپل سکریٹری، محکمۂ تعلیم کے پرنسپل سکریٹری اور بہار ایگزامنیشن بورڈ کے چیئر مین کے ساتھ ہونے والی میٹنگ کے تعلق سے ہے، اس میں جو تفصیلات درج ہیں،ان سے معلوم ہوتا ہے کہ ان افسران نے بس زبانی یقین دہانی کی کوشش کی ہے۔غلام غوث صاحب کا کہنا ہے کہ’’ اردو والوں کے مطالبات کی تکمیل کی مہم جاری رکھیں گے‘‘،انھوں نے امید ظاہر کی ہے کہ ہمیشہ کی طرح محبانِ اردو کا تعاون انھیں حاصل رہے گا۔
بہار اسٹیٹ اردو ٹیچرس ایسوسی ایشن کے چند عہدے داروں نے مل کر24ستمبر کو حزبِ اختلاف کے لیڈر تیجسوی یادو کومیمورنڈم دیا ہے،تیجسوی نے رسمی طورپر یقین دہانی کروائی ہے کہ ’’وہ اپنی سطح پر اس مسئلے کو بھر پور طریقے سے اٹھائیں گے اور حکومت سے مطالبہ کریں گے کہ اردو کے ساتھ نا انصافی بند کرے‘‘۔ یکم ستمبر کو آرجے ڈی لیڈر عبدالباری صدیقی کابیان بھی اس ضمن میں آچکا ہے، انھوں نے کہا تھا کہ ’’اردو ٹیچر کی بحالی کے لیے چالیس طلبہ کی قید بہار سے اردو کو ختم کرنے کی سازش ہے ‘‘۔آرجے ڈی کے ممبر اسمبلی فیصل رحمن نے بھی 21ستمبر کو اس تعلق سے وزیر اعلیٰ کو خط لکھاہے۔ اس کے علاوہ جمعیت علما ے بہار اور امارت شرعیہ بھی اس تعلق سے بیان کی حد تک اپنی ذمے داری سے فارغ ہو چکی ہیں۔
الغرض ہائی اسکولوں کے نصاب میں لازمی طورپر اردو کی بقا کے سلسلے میں ایک طرف حکومت صفائیاں پیش کر رہی ہیں ،بہار ایگزامنیشن بورڈ کا پچیس ستمبر کو وضاحتی اشتہار بھی شائع ہوا ہے،دوسری طرف حکومتی موقف کے خلاف آوازیں بھی بہت زور وشور سے اٹھ رہی ہیں،مگر خاص بات یہ ہے کہ ان آوازوں میں کسی قسم کا اتحاد نہیں ہے،سب کی اپنی اپنی ڈفلی،اپنا اپنا ڈھول ہے۔گورنمنٹ کا نوٹیفکیشن جاری ہونے کے بعد کے دوڈھائی ماہ تک تو مکمل خاموشی رہی،گنے چنے دانشوران اور اہلِ قلم نے اس جانب توجہ دلائی ،تو بھی متعلقہ با اثر شخصیات یا ادارے سبک سری کا مظاہرہ کرتے رہے، مگر اب ایسا لگتا ہے کہ ہر کوئی الیکشن کے موسم کو غنیمت جانتے ہوئے ’’خادمِ اردو‘‘ اور’’قائدِ اردو‘‘ کا تمغہ اپنے نام کرنا چاہتاہے۔بہار میں اردو کے نام پر سیاست کی اپنی تاریخ ہے اور اسے اِس الیکشن میں بھی دہرانے کی کوششیں تیز ہو رہی ہیں۔اب تو ووٹنگ کی تاریخوں کےاعلان کے ساتھ انتخابی ضابطۂ اخلاق بھی نافذ ہوچکا ہے،تو شاید اس موضوع پر حکومت کی جانب سے کوئی نیا عملی اقدام یا وضاحت مشکل ہے ۔ سو دیکھنا یہ ہے کہ کیا حکومت اردو والوں مطمئن کر نے میں کامیاب ثابت ہوگی؟کیا اس نئے مسئلے کی وجہ سے جدیو اور این ڈی اے کے ووٹوں پر کچھ منفی یا مثبت اثر پڑے گا؟ اور کیا کسی دوسری پارٹی کو بھی اس کا فائدہ ہو سکتا ہے؟

بہار اسمبلی الیکشن میں مجلس کی ’سیریس انٹری ‘سے وہاں کا سیاسی منظرنامہ خاصا ہنگامہ خیز ہوتا جارہا ہے۔ کل اویسی نے دویندر یادو کی پارٹی کے ساتھ اتحاد کرکے اور اس کے دائرے کو مزید وسیع کرنے کا عندیہ دے کر معاملے کو اور بھی توجہ طلب بنادیا ہے۔

یہ صورت حال دو پارٹیوں کے لیے سب سے زیادہ تشویشناک ہے،ایک آرجے ڈی اور دوسری جے ڈی یو۔ چوں کہ اب تک بہار کے مسلمان زیادہ تر انہی دو پارٹیوں کو ووٹ دیتے آرہے ہیں،کانگریس ایک عرصے سے وہاں قابلِ ذکر پوزیشن میں نہیں ہے اور بی جے پی کو تو خیر مسلم ووٹ کی ضرورت بھی نہیں ہے۔ نتیش کمار نے جو لگاتار تین بار کامیابی حاصل کی،اس میں ان کے اپنے سیاسی توڑ جوڑ کے علاوہ مسلم ووٹ کا بھی خاص کردار رہا،انھوں نے اپنے دورِ حکومت میں کچھ اہم اور بنیادی انفراسٹریکچر  سے جڑے ہوئے کام بھی کروائے ،اس کا بھی انھیں فائدہ ہوا،’سوشاسن بابو‘انھیں لقب بھی مل گیا۔ البتہ 2015میں ان کو کامیابی عظیم اتحاد کے پلیٹ فارم سے ملی تھی،جس سے انھوں نےسال ڈیڑھ سال بعد ہی پلہ جھاڑ لیا اور واپس این ڈی اے میں چلے گئے۔ اس کے بعد موجودہ مرکزی حکومت کی سربراہی میں خصوصاً مسلمانوں کے حوالے سے جو متعصبانہ اقدامات سامنے آئے،ان میں خود نتیش بھی شامل رہے،تین طلاق کے معاملے میں انھوں نے تگڑم سے کام لیا،این آرسی ؍سی اے اے کے مسئلے پر بی جے پی کے ساتھ گئے،حالاں کہ پچھلے دنوں این پی آر پر اسمبلی سے انھوں نے تجویز پاس کروالی ہے کہ اس کا فارمیٹ پہلے جیسا ہی ہوگا،اس میں کوئی تبدیلی نہیں ہوگی۔مگر دیگر کئی معاملوں میں انھوں نے یا تو اپنے موقف کو واضح نہیں کیا یا اندر خانہ مرکزی حکومت کی حمایت کی۔ ادھر کچھ دنوں سے بہار کے مختلف اضلاع میں فرقہ وارانہ فسادات کے واقعات  میں بھی اضافہ ہوا ہے،ان سارے واقعات نے بہار کے مسلمانوں کو نتیش کمار کے تئیں بہت حد تک بد گمان کردیا ہے اور اب وہ کسی متبادل کی تلاش میں ہیں،مگر کیا وہ متبادل آرجے ڈی یا اس کی سربراہی میں قائم ہونے والا متوقع عظیم اتحاد ہو سکتا ہے،جس کے خط و خال تا حال واضح نہیں ہیں؛بلکہ خود آرجے ڈی کے کئی سینئر رہنما پارٹی سے روٹھ کر اِدھر اُدھر جا چکے یا اس کی تیاری میں ہیں؟ ایک قدآور آرجے ڈی لیڈر بابو رگھوونش پرساد تو پارٹی سے ناراضی کے ساتھ ہی آں جہانی ہو چکے ہیں،حالاں کہ دَل بدلنے کا یہ سلسلہ این ڈی اے کی پارٹیوں میں بھی چل رہا ہے،مگر من حیث المجموع یہاں جے ڈی یو اور بی جے پی مضبوط پوزیشن میں ہیں،جبکہ عظیم اتحاد کا اونٹ کس کروٹ بیٹھے گا،اس بارے میں کچھ نہیں کہا جاسکتا۔

لا لویادو کی عدم موجودگی میں نہیں لگتا کہ تیجسوی یادو عظیم اتحاد کے قیام اور اسے کماحقہ مینج کرسکنے کی پوزیشن میں ہیں،اس کی ایک جھلک ہم نے پچھلے سال لوک سبھا انتخاب میں دیکھی بھی ہے کہ تیجسوی اینڈ کمپنی نے بہت ہی بری چال چلی اور بے تدبیری،تجربے کی کمی اور ابلہانہ طریقِ کار کے کئی مضحکہ خیز نمونے دیکھنے کو ملے،جس کا نتیجہ یہ ہوا کہ لوک سبھا الیکشن میں بہار  کی چالیس سیٹوں میں سے انتالیس پر این ڈی اے کو کامیابی ملی اور پانچ چھوٹی بڑی پارٹیوں کے اتحاد نے مل کر صرف ایک سیٹ پر کامیابی حاصل کی۔ابھی اسمبلی الیکشن سے قبل جس طرح کی صورت حال ہے،اس میں مجھے نہیں لگتا کہ حالات بہت کچھ بدل سکیں گے،تیجسوی یادو سے لوگوں کو بڑی امیدیں تھیں،مگر ان کی سب سے بڑی خامی یہ ہے کہ نہ تو وہ اپنی پارٹی کے بڑے اور تجربہ کار لیڈروں کو کنونس کر سکنے کی صلاحیت رکھتے ہیں اور نہ ہی اتحادی جماعتوں کو مطمئن کرسکنے کی پوزیشن میں ہیں،اسی وجہ سے جیتن رام مانجھی عظیم اتحاد میں شامل ہوتے ہوتے رہ گئے،انھوں نے الیکشن سے پہلے پھر این ڈی اے کا دامن تھامنے میں عافیت سمجھی ہے۔ غالباً یہی وجہ ہے کہ لالو یادو کی ضمانت کی کوششیں پھر سے تیز ہو گئی ہیں،اگر وہ الیکشن سے قبل کچھ  دنوں کے لیے بھی باہر آسکیں،تو کچھ امید کی جا سکتی ہے۔
مجلس اتحاد المسلمین کے ذریعے بہار الیکشن میں ایک نیا محاذ کھولنے کی کوششیں آرجے ڈی اور جے ڈی یو دونوں ہی کے لیے خطرے کی گھنٹی ثابت ہوسکتی ہیں؛کیوں کہ اکیلے بھلے ہی مجلس کچھ بہتر کارکردگی کا مظاہرہ نہ کرسکے؛لیکن اگر مسٹر اویسی بہار کی دوسری پارٹیوں کے ساتھ ایک قابلِ ذکر  اور مؤثر اتحاد قائم کرنے میں کامیاب ہوجاتے ہیں،تو اس کا نتیجہ یقیناً زمینی سطح پر نظر آئے گا،اسی لیے آرجے ڈی اور جے ڈی یو کے مسلم رہنما خاص طورپر پیچ و تاب کھا رہے ہیں۔کل19ستمبر کو جہاں اویسی اور دویندر یادو نے اپنے اتحاد کا اعلان کیا،وہیں کل ہی جے ڈی یو کے ایم ایل سی خالد انور کی سربراہی میں ’ مسلمانوں کی ترقی میں نتیش کمار کا کردار‘ کے عنوان سے ایک ورچوئل کانفرنس کا انعقاد کیا گیا، جس میں بہار کے بہت سے اضلاع سے مسلم لیڈران اور عوام نے شرکت کی اور اس میں نتیش حکومت کے وزرا اشوک چودھری،نیرج کمار اور ایم ایل اے نوشاد عالم،ماسٹر مجاہد وغیرہ نے خطاب کیا اور سبھوں نے نتیش کے دورِ حکومت میں مسلمانوں کے لیے کیے جانے والے اقدامات اور منصوبوں کاگن گان کیا۔کل ہی ایک یوٹیوب چینل پر آرجے ڈی کے ریاستی یوتھ صدر قاری صہیب کی ساڑھے پانچ منٹ کی بات چیت دیکھنے اور سننے کو ملی،جس میں قاری صاحب اویسی اور مجلس پر بے پناہ غصے کا اظہار کررہے ہیں اور غصے میں انھوں نے بعض ایسی باتیں بھی کہی ہیں،جن کی ایک بڑی پارٹی کی نمایندگی کرنے والے شخص سے توقع نہیں کی جاسکتی،انھوں نے ایک جذباتی مقرر  کی  طرح بولتے ہوئے کہا کہ مجلس ٹی بی کے مرض کی طرح ہے،وہ مسلم نوجوانوں کو بارود کے ڈھیر پر کھڑا کررہی ہے،وہ مسلم نوجوانوں کے ہاتھ سے قلم چھین کر تلوار پکڑا رہی ہے وغیرہ وغیرہ ۔دو مختلف پارٹیوں کا باہمی سیاسی اختلاف کوئی اچنبھے کی بات نہیں،مگر اس اختلاف کے اظہار کا سلیقہ ہوتا ہے،ہمارے پٹنہ ہی کے شہرۂ آفاق شاعر کلیم عاجز کہہ گئے ہیں:

بات چاہے بے سلیقہ ہو کلیم

بات کہنے کا سلیقہ چاہیے

اس قسم کی گفتگو آرجے ڈی کے حق میں قطعی نہیں جا سکتی،البتہ اس سے پارٹی کو نقصان ہونے کا امکان ایک سو ایک فیصد ہے۔ اویسی سے ملک کے بے شمار مسلمانوں کو اختلاف ہے اور ان کی بہت سی باتیں،آرا  قابلِ اختلاف ہیں بھی،مگر اس کی وجہ سے کیا یہ کہنا درست ہے کہ مجلس مسلم نوجوانوں کے ہاتھ میں تلوار تھما رہی ہے؟آپ کو اندازہ بھی ہے کہ محض پارٹی میں سرخروئی حاصل کرنے کے لیے کہی گئی آپ کی اس بات کا اثر کتنا گہرا اور دور رس ہو سکتاہے؟اگر آرجے ڈی اسی قسم کے مسلم نیتاؤں کو آگے بڑھا کر مسلمانوں کا ووٹ حاصل کرنا چاہتی ہے،تو پھر اسے اپنی خیر منانی چاہیے!

یوں تو اس وقت ساری دنیا کورونا جیسی ہلاکت ناک وبا کی وجہ سے مختلف بحرانوں میں مبتلاہے،جن میں سب سے نمایاں طبی اور معاشی بحران ہیں۔جو ممالک اور وہاں کی حکومتیں اپنی ذمے داریوں کے حوالے سے سنجیدہ اور عوام کی فلاح و بہبود کے تئیں پابندِ عہد ہیں انھوں نے اپنے یہاں نہ صرف اس وبا پر بہت حد تک قابو پالیا بلکہ ان کی معیشتیں بھی پٹری پر آنے لگی ہیں۔حالاں کہ اس وقت امریکہ جیسی عالمی طاقت اس وبا سے سب سے زیادہ متاثر ہے اور اس کی وجہ سے وہاں کی معاشی صورت حال پر بھی منفی اثر پڑا ہے؛چنانچہ2020-21کے مالی سال کے دوسرے کوارٹر میں امریکی معیشت9.5فیصد گراوٹ سے دوچار ہوئی ہے اور اسی طرح دنیا کی ایک اور بڑی معیشت جاپان کو بھی قدرے سست روی کا شکار ہونا پڑا اور دوسرے کوارٹر میں 7.6فیصد گراوٹ سے دوچار ہوئی ہے۔مگر اس معاملے میں ہندوستان سب سے بری حالت میں ہے اور دوسرے کوارٹرمیں یہاں کی معیشت میں23.9فیصد کی گراوٹ درج کی گئی ہے جو گزشتہ کئی دہائیوں میں سب سے زیادہ ہے۔اس کی بنیادی وجہ کورونا وائرس کے سبب ملکی سطح پر نافذ کیے جانے والے سخت لاک ڈاو ¿ن اور اس کی وجہ سے وسیع پیمانے پر پھیلنے والی بے روزگاری کو قرار دیا جاسکتا ہے۔وزیر خزانہ سیتارمن نے تو اس حالت کا ذمے دار’ایکٹ آف گاڈ‘کو قرار دیاہے، جس پر اپوزیشن کی جانب سے کافی اعتراضات بھی کیے گئے ،سابق وزیر خزانہ اور کانگریسی رہنما پی چدمبرم نے چھ ستمبر کو انڈین ایکسپریس کے اپنے کالم میں ان کی اس بات کو خاص طورپر طنز کا نشانہ بنایا اور شیوسینا کے رہنما سنجے راوت نے بیان جاری کرکے کہا کہ سیتارمن بھگوان کو الزام دے رہی ہیں ،جو ہندوتوا کے نظریے کے خلاف ہے۔سابق آربی آئی گورنر رگھو رام راجن نے بھی موجودہ ملکی معیشت پر سخت تشویش کا اظہار کیاہے ،انھوں نے اپنے لنکڈ ان پیج پرایک پوسٹ میں لکھا کہ جی ڈی پی میں اس حد تک گراوٹ پورے ملک کے لیے خطرے کی گھنٹی ہے اور ہندوستانی بیوروکریسی کو جلد ازجلد اس سلسلے میں بامعنی اقدامات کرنے کی ضرورت ہے۔

پیر کے دن حکومت کی جانب سے جی ڈی پی کا ڈاٹا ریلیز کیاگیا ہے، اس سے یہ واضح ہوتا ہے کہ دوسرے کوارٹرمیں کئی اہم سیکٹرز میں غیر معمولی گراوٹ آئی ہے۔تعمیرات،صنعت اور مواصلات کے شعبوں میں سب سے زیادہ اثر پڑا ہے۔ اعداد و شمار سے تو یہ معلوم ہوتا ہے کہ ہندوستان اس وقت1996کے بعد کے سب سے بڑے معاشی بحران سے دوچار ہے۔ہندوستانی معیشت کو مزید پیچیدگی کا سامنا اس لیے بھی کرنا پڑ رہاہے کہ یہاں بڑی تعدادمیں لوگ غیر رسمی سیکٹر سے وابستہ ہوتے ہیں،وہ ایسے اداروں اور کمپنیوں میں ملازمت کرتے ہیں جو عام طورپر سرکارکی رسائی سے دور ہوتی ہیں،خود مختار ہوتی ہیں یا وہ خود اپنے طورپر چھوٹا موٹا کاروبار کرتے ہیں۔جیسے رکشہ چلانے والے،درزی،روزانہ مزدوری کرنے والے لوگ اور زراعت کے پیشے سے وابستہ افراد۔ ماہرین معاشیات کا تو یہ کہناہے کہ آفشیل اعداد و شمار میں ان شعبوں کی حقیقی صورت حال کی نشان دہی نہیں کی گئی ہے اور اصل حالت اس سے بھی بدتر ہوسکتی ہے۔

اِس سال کے شروع میں ہی چین اور دنیا کے دوسرے ملکوں میں کورونا وائرس کے پھیلاو ¿ کے بعد ہندوستان میں بھی اس کے اثرات نظر آنے لگے تھے اور مارچ آتے آتے حالت یہاں تک پہنچ گئی کہ پورے ملک میں سخت لاک ڈاو ¿ن لگادیا گیا،اتنی بڑی آبادی اور مہاجر مزدوروں کی کثیر تعداد رکھنے والے ملک میں یہ فرمان جاری کیاگیا کہ جوجہاں ہے وہیں رہے،ہر قسم کے نقل و حمل پر روک لگادی گئی،کارخانے،کمپنیاں اور تمام تجارتی و کاروباری مصروفیات بند کر دی گئیں یعنی پورا ملک اچانک تھم سا گیا،جو جہاں تھے،وہیں رکنے پر مجبور ہوگئے اور صرف اس وجہ سے بھی سیکڑوں جانیں گئیں اور دیگر نقصانات ہوئے۔اس صورت حال کی وجہ سے ملک کے مختلف شہروں میں مزدوری کرنے والے لاکھوں لوگ اپنے گھروں کو جانے لگے،کچھ دنوں کے بعد معاشی حالت کو کچھ بہتر کرنے کے لیے لاک ڈاو ¿ن میں کچھ ڈھیل دی گئی اور بعض کاروباری سرگرمیاں شروع کی گئیں،مگر اس کے نتیجے میں ملکی معیشت تو خیر کچھ بہتر نہ ہوپائی البتہ غیر معمولی برق رفتاری کے ساتھ پورے ملک میں کورونا وائرس پھیلنے لگا اور اس وقت کی صورتحال یہ ہے کہ ہندوستان کورونامتاثرین کے معاملے میں دوسرے نمبر پر پہنچ گیا ہے اور روزانہ نوے ہزار سے زائد کیسز آنے لگے ہیں۔اس معاملے میں ہندوستان سے اوپر صرف امریکہ رہ گیا ہے، برازیل بھی پیچھے چلاگیا ہے۔

محض چند سال قبل 1.3بلین آبادی والا ہندوستان دنیاکی تیزی سے ابھرتی ہوئی معیشت تھا اور مجموعی گھریلو پیداوارکی شرح آٹھ فیصد بلکہ اس سے بھی زیادہ تک پہنچ گئی تھی،مگر پھر جلد ہی اس میں گراوٹ بھی شروع ہوگئی اور کورونا سے پہلے بھی ہندوستانی معیشت کوئی بہت اچھی پوزیشن میں نہیں تھا۔مثال کے طورپر پچھلے سال اگست میں کار کی فروخت میں 32فیصد کی گراوٹ آئی تھی جو پچھلی دودہائیوں میں سب سے زیادہ تھی۔

حکومت نے پیر کو جو ڈاٹا ریلیز کیا ہے اس سے یہ پتا چلتا ہے کہ اخراجات،پرائیویٹ سرمایہ کاری اور کھیل کے شعبے بری طرح متاثر ہوئے ہیں۔اس کے علاوہ تجارت،ہوٹل اور مواصلات کے شعبے میں47فیصد گراوٹ آئی ہے۔ایک وقت میں نہایت توانا رہنے والی ہندوستانی مینوفکچرنگ انڈسٹری میں 39فیصد تک کمی آگئی ہے۔ اس رپورٹ کے مطابق صرف ایک شعبہ ہے جہاں ہندوستانی معیشت نے کچھ بہتر کارکردگی کا مظاہرہ کیا ہے اور وہ زراعت کا شعبہ ہے،پہلے کوارٹر میں اس شعبے میں شرحِ نموتین فیصد تھی جو دوسرے کوارٹرمیں3.4فیصد تک پہنچ گئی ہے۔ماہرین معاشیات اس کی وجہ اس مانسون میں ہونے والی اچھی بارش کو قرار دے رہے ہیں ۔چدمبرم نے اپنے کالم میں اسی حوالے سے حکومت پر طنز کیا ہے اور لکھا ہے کہ سیتارمن جی نے ملک کی گرتی معیشت کی ذمے داری پوری طرح ’گاڈ‘کے سر ڈال دی، مگر گاڈ نے ہی موسمِ برسات میں اچھی بارش برسائی جس کے نتیجے میں ملک کے زراعت سیکٹر میں بہتری آئی ہے ۔

گرچہ اس ماہ کئی اہم صنعتی سیکٹر ز کے کھولنے کا فیصلہ کیاگیا ہے ،مگر اس کے باوجود کورونا وائرس ملک میں جس تیزی سے پھیلتا جارہاہے اور لوگوں میں جو خوف و ہراس سمایا ہواہے اس کی وجہ سے مستقبل قریب میں ہندوستانی معیشت کی مکمل بہتری کا امکان نظر نہیں آتا۔ملک کے ماہرینِ معاشیات بھی اس حوالے سے اسی رائے کا اظہار کررہے ہیں۔ آئی سی آر اے میں ایکونومسٹ محترمہ ادیتی نائرکا بیان نیو یارک ٹائمس نے شائع کیاہے کہ گرچہ ملک کے کچھ حصوں کی معیشت بہتر ہونے لگی ہے،مگر کورونا انفیکشن کے لگاتار بڑھنے کی وجہ سے حالات اُس رفتار میں بہتری کی طرف نہیں جاسکتے،جس کی ضرورت ہے۔اس ملک میں کورونا سے اموات کی شرح کم اس لیے ہے کہ دیگر ممالک کے مقابلے میں ہندوستان ایک نوجوان ملک ہے ،جہاں کی زیادہ تر آبادی نوجوانوں کی ہے اور وہ وائرس سے لڑنے کی زیادہ قوت رکھتے ہیں۔

اگر ملک کی ریاستوں کی بات کریں تواب بھی مہاراشٹر،بہار،کرناٹک،جھارکھنڈ،یوپی اور دیگر کئی ایسی ریاستیں ہیں جہاں حالات بہت بہتر نہیں ہیں اور وہاں کی حکومتیں گو مگو کی کیفت میں ہیں۔کبھی لاک ڈاو ¿ن میں ڈھیل دی جاتی ہے تو کبھی سختی کردی جاتی ہے۔کبھی ہفتے میں دودن لاک ڈاؤن کی تجویز آتی ہے تو کبھی رات کے وقت میں لاک ڈاؤن لگایا جاتا ہے۔اس کی وجہ سے بھی صنعت کاروں اور مزدوروں کو دشواریوں کا سامنا ہے اور وہ اپنا کاروبار یا مزدوری شروع کرنے کے سلسلے میں کوئی حتمی فیصلہ نہیں کر پارہے ہیں۔ وزیراعظم مسٹر مودی یہ نعرہ دیتے آرہے ہیں کہ 2024تک ہندوستان پانچ ٹریلین کی معیشت کا مالک ہوگا،مگر پچھلے سال ہندوستانی معیشت 2ٹریلین تھی اور عالمی سطح پر اس کا نمبر امریکہ، چین،جاپان اور جرمنی کے بعد پانچویں نمبر پرتھا،مگر اس سال کے اخیر تک ایسا اندیشہ ظاہر کیا جارہاہے کہ ہندوستانی معیشت میں کم ازکم دس فیصد تک کی گراوٹ آسکتی ہے۔

پی چدمبرم ،رگھو رام راجن سمیت کئی دیگر ماہرین معاشیات نے اپنی تحریروں اور بیانوں میں حکومت کو کئی مشورے دیے ہیں ،مثلا غیر رسمی صنعتی سیکٹرپر توجہ،غریبوں اور معمولی آمدنی والے لوگوں کا خیال رکھنا ، اختیارات کا عدمِ ارتکاز اور ریاستی حکومتوں کے لیے معاشی خود مختاری کا راستہ ہموار کرنا وغیرہ۔ان کا کہناہے کہ ان مشوروں پر عمل کرنے سے جی ڈی پی میں بہتری آسکتی ہے ،مگر حکومت کا اپنا موقف ہے،اس کا کہناہے کہ کورونا وائرس کی وجہ سے پوری دنیا کی معیشت پر اثر پڑاہے ،تو ہندوستان کیسے اچھوتا رہ سکتا تھا۔مگر کیالگ بھگ24فیصد تک جی ڈی پی میں گراوٹ کی واحد وجہ کورونا وائرس کو قرار دینا درست ہے؟

(معلمی کارِ پیغمبری)

معلم انسانی معاشرے کا سب سے اعلیٰ و برتر فرد ہوتا ہے،جس کے کندھوں پر فی الحقیقت قوموں کی تعمیر اور نسلوں کی تربیت کی ذمے داری ہوتی ہے۔ استاذ ایک مینارۂ نور ہے،جس سے اقوام و ملل روشنی حاصل کرتی ہیں؛کیوں کہ وہ انھیں جہل و نادانی کی تاریکیوں سے نکال کر علم و معرفت کے نور سے ہم کنار کرتا ہے۔ ہر دور کی تمام تر سماجی،علمی،فکری،مادی و معنوی ترقیات کا سرا راست یا بالواسطہ طورپر دنیا بھر کے منتخب ترین اساتذہ سے ہی جڑا ہوتا ہے۔ یہی وجہ ہے کہ ظہورِ عالم سے تاحال دنیا کی تمام ترقی یافتہ اور ترقی پسند قوموں نے اپنے استاذوں کو غیر معمولی توجہ،احترام و تعظیم کا حق دار جانا ہے اور عملی طورپر ان کے تئیں جذبۂ تکریم کا اظہار کرتی رہی ہیں۔

مذہبی نقطۂ نگاہ سے دیکھا جائے،تو تقریباً تمام مذاہبِ عالم نے علم ، آلۂ علم اور معلم کو غیر معمولی اہمیت دی ہے اور انھیں نشانِ فخر و عظمت قرار دیاہے۔ اسلام کے تو خیر کیا ہی کہنے کہ ہمارے نبی ﷺ پر وحیِ الہی کا آغاز ہی پڑھنے کے حکم سے ہوا اور احادیث میں آپﷺ نے بارہا تعلیم و تعلم کی نہ صرف فضیلت بیان کی؛بلکہ عملی طورپر اس کی ترغیب دیتے رہے اور ہر قسم کے نافع اور مفید علم کے حصول کی ترغیب دی۔ ایک بار آپ کا گزر صحابہ کی ایک جماعت کے پاس سے ہوا،جوتعلیم و تعلم میں مشغول تھے،تو آپ ان کے اس عمل سے بہت خوش ہوئے اور ان کی تحسین و تشجیع کے لیے کئی باتیں کہیں،ان میں سے ایک بات یہ بھی تھی کہ’’اللہ نے مجھے معلم بناکر مبعوث کیا ہے‘‘۔ (سنن ابن ماجہ،عن عبداللہ بن عمرو، حدیث نمبر:229)یہ حدیث گرچہ سند کے اعتبار سے ضعیف ہے،مگر معنی و پیغام کی صحت میں کلام نہیں ہوسکتا اور صحیح مسلم میں منقول اسی مضمون کی ایک دوسری حدیث سے اس کی تائید بھی ہوتی ہے،اللہ کے نبیﷺ نے فرمایا:اللہ نے مجھے لوگوں پر سختی کرنے والا،ان کو مشقتوں میں ڈالنے والا بناکر نہیں بھیجا؛بلکہ اس نے مجھے معلِّم اور آسانیاں پیدا کرنے والا بناکر بھیجا ہے‘‘۔(صحیح مسلم،عن جابر،حدیث نمبر:1478)آپؐ کے اصحابؓ جو آپ کے شاگرد بھی تھے،وہ کئی بار بڑے دلچسپ انداز میں آپ کی  معلمانہ صفات کو بیان کرتے ہیں،جس سے ہمیں سبق حاصل کرنا چاہیے ۔ صحیح مسلم ہی کی ایک روایت ہے،معاویہ بن حکمؓ راوی ہیں، فرماتے ہیں:میں نے آپ سے پہلے اور آپ کے بعد آپ سے بہتر طریقے سے تعلیم دینے والا نہیں دیکھا‘‘۔(حدیث نمبر: 537)سنن ابو داؤد میں یہی حدیث ان الفاظ میں مروی ہے کہ:میں نے کبھی آپ سے زیادہ نرم خو استاذ نہیں دیکھا‘‘۔(حدیث نمبر: 931)

تاریخ کے مختلف ادوار میں پائے جانے والے مفکرین،علما،اُدبا و دانشوران اورعلم و نظر کے ائمہ و سربرآوردگان نے معلمین اور اساتذہ کے حوالے سے بڑی قیمتی اور معنی خیز باتیں کہی ہیں،جن سے معاشرے کے اس ممتاز طبقے کی عظمت و اہمیت آشکار ہوتی ہے اور خود معاشرے کے تئیں معلم کی ذمے داریوں کا بھی علم ہوتا ہے۔ ہمیں ان کے اقوال و فرمودات سے اس لیے واقفیت حاصل کرنی چاہیے کہ ہم اپنے اساتذہ کے مقام و منزلت کو پہچان سکیں اور ان کی قدر کر سکیں،معاشرے میں استاذ کی حیثیت کا ادراک کرسکیں اور اسی کے مطابق ان کے ساتھ برتاؤ کرنے کی کوشش کریں۔ اسی مقصد سے معلم کے حوالے سے ذیل میں چند عالمی مفکرین کے اقوال پیش ہیں:

سقراط:عالم کو چاہیے کہ وہ جاہل سے ایسے گفتگو کرے جیسے ڈاکٹر مریض سے کرتا ہے۔

سسرو:جاننا ایک فن ہے اور سکھانا ایک مستقل فن ہے۔

سکندر مقدونی: میں اپنے والد کا ممنون ہوں کہ وہ میری اس دنیا میں آمد کا ذریعہ بنے اور اپنے استاذ کا ممنون ہوں کہ انھوں نے مجھے(شعور کی دنیا میں) زندگیِ نو دی۔

حضرت حسن بصری: اگر ایک استاذ اپنے شاگردوں کے مابین انصاف نہیں کرتا تو اس کا شمار ظالموں میں ہوگا۔

امام شافعی: جس نے طلبِ علم کی مشقتوں سے گریز کیا،وہ تاحیات جہالت کی ذلت برداشت کرتا رہے گا۔ جس نے ابتداے عمر میں تعلیم نہ حاصل کی،تو سمجھو وہ مرگیا۔ انسان کی عزت علم اور تقوی سے ہوتی ہے،اگر یہ دونوں اوصاف اس کے اندر نہ ہوں،تو وہ کچھ بھی نہیں ہے۔

غوتہ:وہ استاذ نہایت ہی برا ہے،جو اپنے شاگردوں کو صرف وہی چیزیں سکھائے جو اس کی ذمے داری ہے۔(یعنی استاذ کو چاہیے کہ وہ طلبہ کو نصابی مضمون کے علاوہ امور بھی سکھائے)

سپنگلر:میں نے اپنے اساتذہ سے بہت سیکھا،اپنے رفقا سے بہت زیادہ سیکھا اور اپنے شاگردوں سے بہت بہت زیادہ سیکھا۔

لیونارڈو ڈاونچی: شاگرد کے اندر اگر اپنے استاذ پر سبقت لے جانے کی صلاحیت نہ پیدا ہو، تو وہ ایک معمولی شاگرد ہی رہ جاتا ہے۔

جون لاک: معلمی کا پیشہ حکمرانی سے بھی زیادہ مشقت آمیز ہے۔

خلیل جبران: اے استاذ!ہم آپ کے ہاتھ میں دھاگوں کے مانند ہیں اور آپ کے لوم کے حوالے ہیں،پس اگر آپ چاہیں تو ہمیں اعلیٰ و نفیس قسم کے کپڑے میں تبدیل کر سکتے ہیں۔

خلیل جبران: کسی بھی ملک کی تعمیر تین لوگوں کے کندھوں پر ہوتی ہے: دہقاں جو روزی کی فراہمی کا ذریعہ بنتا ہے،سپاہی جو ملک کی سرحدوں کی حفاظت کرتا ہے اور معلم جو ملک کے شہریوں کی تعلیم و تربیت کا فریضہ انجام دیتا ہے۔

محمد الغزالی: معلم طلبہ کی مرادہوتے ہیں ،مرید نہیں ۔

احمد امین: معلم ایک زاہد کی طرح ہوتا ہے،جو اپنے آپ کو علم کی خدمت کے لیے وقف کر دیتا ہے جیسے کہ ایک زاہد اپنے آپ کو عبادتِ خداوندی کے لیے وقف کر دیتا ہے۔

احمد رفیق المہدوی: لوگ کماحقہ اپنے استاذ کی قدر نہیں کرتے،ان کا حق تو یہ ہے کہ والدین کی طرح ان کی تعظیم کی جائے۔

احمد شوقی: استاذ کے احترام میں کھڑے ہوجاؤ اور جی جان سے اس کی تعظیم کرو،کہ معلمی کارِ پیغمبری ہے۔

سی ایس لویس: دورِ جدید کے استاذ کی ذمے داری محض جنگلات کی صفائی نہیں؛بلکہ صحرا کو گلزار بنانا ہے۔

شاہ فیصل: اگر میں بادشاہ نہ ہوتا تو استاذ ہوتا۔

سلامہ موسی: ایک منفرد استاذ محض اپنے شاگردوں کے دماغ میں علوم نہیں انڈیلتا؛بلکہ وہ انھیں سیکھنے اور پڑھنے کی ایسی تکنیک بتاتا ہے کہ وہ استاذ سے بے نیاز ہوجاتے اور پھر پوری زندگی خود ہی سیکھتے رہتے ہیں۔

الیزابیتھ باریٹ براؤننگ: کتاب ایک ایسا معلم ہے،جو بغیر مارے،بغیر ڈانٹے ،بغیر غصہ کیے اور بغیر روٹی پانی مانگے ہمیں بہت سی چیزیں سکھاتا ہے۔ آپ اس کے پاس کسی بھی وقت جائیں ،تو وہ سوتا ہوا نہیں ملے گا،جب ملنا چاہیں دستیاب ہوگا،آپ نے کوئی غلطی کی تو ڈانٹےگا نہیں،اگر اس کے سامنے آپ کی جہالت آشکار ہوگئی تو آپ کا تمسخر بھی نہیں اڑائے گا۔

تھوماس کارتھرس: معلم وہ ہوتا ہے جو آپ کے اندر ایسی صلاحیت پیدا کردے کہ آپ دھیرے دھیرے اس کی ضرورت سے بے نیاز ہوجائیں۔

بوب ٹالبرٹ: اچھا استاذ مہنگا ہوتا ہے(خرچے کے اعتبار سے)،مگر برا استاذ بہت مہنگا پڑتا ہے(نتائج کے اعتبار سے)۔

ولیم پرنس: استاذ کا احترام اسے دیا جانے والا سب سے قیمتی انعام ہے۔

کامل درویش: روئے زمین پر چمکنے والی ہر تہذیب و ثقافت کے پس پردہ معلموں کی ضوفشانی کارفرما ہوتی ہے۔

ولیم آرتھر وارڈ: کمتر معلم ہمیں سکھاتا ہے،اچھا معلم ہمارے سامنے اشیا و افکار کی وضاحت کرتا ہے، ممتاز معلم دلائل و براہین فراہم کرتا ہے اور عظیم و جینیس معلم ہمیں انسپائر کرتا ہے۔

آرتھر کوسٹلر: تخلیق ایک قسم کی تعلیم ہی ہے،مگر اس میں استاذ اور شاگرد دونوں ایک ہی شخص میں جمع ہوتے ہیں۔

البرٹ کامیو: میرے آس پاس سب جھوٹے اور ریاکارہیں،میں انھیں سچائی اور شرافت کے ساتھ زندگی گزارنے پر مجبور کروں گا۔ میرے پاس ایسے وسائل ہیں جن سے ان کی زندگیاں محروم ہیں۔ مجھے معلوم ہے کہ وہ علم اور باشعور معلم سے محروم ہیں۔

نجیب محفوظ: معلمی سب سے عظیم پیشہ ہے کہ دنیا کے تمام پیشے اسی سے جنم لیتے ہیں۔

ہیکٹر بیرلیوز: زمانہ ہمارا سب سے بڑا استاذ ہوتا ہے۔

غازی عبدالرحمن القصیبی: کوئی بھی تدریسی مضمون اس وقت تک مفید نہیں ہوسکتا،جب تک اسے پڑھنے کی ترغیب نہ دلائی جائے اور طلبہ کے اندر اسے سیکھنے کی رغبت تبھی پیدا ہوگی جب وہ سادہ و سہل ہو اور اس مضمون میں افادیت،تشویق و سہولت کے اوصاف تبھی پیدا ہوسکتے ہیں،جب ایک استاذ اسے پڑھانے کے لیے اپنے طلبہ سے کئی گنا زیادہ محنت کرے۔

بل گیٹس: ٹکنالوجی تو محض بچوں کوحصولِ علم کی ترغیب دینے کا ذریعہ اور وسیلہ ہے،اصل اہمیت تو معلم کی ہے۔

ابھی چند دن قبل ہندوستان کے مسلمان ترکی میں ایا صوفیہ نامی عمارت کو وہاں کی حکومت کے ذریعے میوزیم سے مسجد میں منتقل کیے جانے پر خوشیاں منارہے تھے اور آج وہی ہندوستان میں بابری مسجد کی جگہ رام مندر کی تاسیس کی وجہ سے شدید غمگین ہیں۔ یہ قدرت کا نظام ہے،تاریخ ایسے ہی بنتی،بدلتی اور آگے بڑھتی رہتی ہے۔

بابری مسجد کا معاملہ تو اسی دن ’’سلٹا دیا گیا‘‘تھا،جب سپریم کورٹ کی پانچ رکنی بنچ نے شواہد و ثبوت اور تاریخی حقائق کے بابری مسجد کے حق میں ہونے کے اعتراف اور اس کے انہدام کو ’’مجرمانہ عمل‘‘قرار دینے کے باوجود زیر بحث مقام کو مندر کے دعوے داروں کے سپرد کرنے کا فیصلہ دیا اور مسجد کے لیے وہاں سے کئی کیلو میٹر دور ایک کونے میں جگہ دی گئی۔

بابری مسجد کی تاریخ،اس پر اٹھنے والے تنازع اور اس کے مختلف تاریخی و سیاسی مراحل پر اب گفتگو کی اتنی معنویت نہیں رہی،مگر مابعد بابری مسجد کے مرحلے میں ہندوستان کے سیاسی و سماجی منظرنامے میں غیر معمولی بدلاؤ کی توقع اور اس کے اظہارات ابھی سے ہونے لگے ہیں۔

جوں ہی پانچ اگست کو بھومی پوجن کے دن قریب آنے لگے،کورونا جیسی جان لیوا وبا اور خود ایودھیا میں اس کے پچاسوں متاثرین کے پائے جانے کے باوجود بی جے پی اور سنگھ پریوار میں غیر معمولی جوش نظر آنے لگا اور مارے خوشی کے کیلاش وجے ورگیہ جیسے بی جے پی رہنماؤں نے بھومی پوجن کے لیے اس دن کے انتخاب کی وجہ بھی بیان کردی کہ یہ دراصل جموں و کشمیر سے آرٹیکل تین سو ستر کے الغا کی پہلی سالگرہ ہے اور اسے ہم رام مندر کی تاسیس کے ذریعے یاد گار بنانا چاہتے ہیں۔ یہ بات درست بھی تھی اوراس سے بھی زیادہ درست بات یہ تھی کہ بی جے پی نے بھومی پوجن اور شیلانیاس کے لیے اس دن کا انتخاب اس لیے کیاکہ وہ میڈیا کو پوری طرح اُدھر مشغول رکھنا چاہتی تھی،اب دیکھ لیجیے کہ سارے ہندوستانی میڈیا میں کہیں کونے کھدرے میں بھی کشمیریوں پر پچھلے ایک سال سے گذر رہی قیامت کا کوئی ذکر نہیں ہے،انٹرنیشنل میڈیا میں بھی نہیں۔ ہر طرف رام مندر اور ایودھیا کی جے جے ہے،آج ہی مودی کے نئے سادھووں والے اوتار کا بھی عقدہ کھلا جب انھیں بھومی پوجن میں دھوتی کرتے اور مخصوص ڈاڑھی مونچھوں سمیت بیٹھا ہوا دیکھا گیا،وہ بھی ایودھیا کے سادھووں میں سے ایک لگ رہے تھے۔

کانگریس اس موقعے پر سب سے زیادہ بے چینی،اضطراب اور شدید چھٹپٹاہٹ کی شکار رہی؛کیوں کہ اسے بخوبی احساس تھا کہ بابری مسجد کے ملبوں پر رام مندر کی داغ بیل ڈالنے کا سارا کھیل تو اس نے اور اس کے آںجہانی نیتاؤں نے رچا تھا،مگر اب جبکہ یہ کھیل اپنی انتہا کو پہنچا تو اسے ہاتھ ملنے کے سوا کچھ ملتا نظر نہیں آرہا ہے۔ یہی وجہ ہے کہ کانگریس کے صفِ اول کے رہنما تابڑ توڑ بیانات دے کر،سوشل میڈیا پر اپنی پروفائلیں بدل کر اپنے دل کی بے چینی اور حقیقتِ حال کا اظہار کرتے نظر آئے۔ رام مندر کی تعمیر کا سارا کریڈٹ بی جے پی اور سنگھ کے کھاتے میں جاتا دیکھ کر موجودہ کانگریسیوں کے علاوہ اندرا،راجیو اور نرسمہاراؤ جیسے نیتاؤں کی روحیں بھی خاصی تاؤ کھا رہی ہوں گی۔

افسوس اور حیرت کا مقام یہ ہے کہ کئی ایسے سیاست دان اور انٹلیکچوئل قسم کے لوگ بھی اس شیلانیاس کے موقعے پر ’’اَتی اُتساہت‘‘نظر آئے،جو پچھلے سال سپریم کورٹ کے فیصلے پر عدم اطمینان ظاہر کر چکے تھے،اسے انصاف پسندی کے خلاف قرار دے چکے تھے۔

اب جبکہ رام مندر کی باقاعدہ بنیاد پڑ چکی ہے،تو آنے والے سال دوسال یا پانچ دس سال میں اس کی تعمیر بھی مکمل ہوہی جائے گی۔ اس مندر کی وجہ سے ایودھیا کو جس لیول کا شہر بنانے کی ہانک لگائی جارہی ہے،اس کی توقع تو اس ملک کی کسی بھی حکمراں پارٹی سے کرنا فضول ہے،مگر ہاں!اس ملک کے مرکزی سیاسی منظرنامے پر بی جے پی کی موجودگی کے ماہ و سال میں اضافے کی پیش گوئی ضرور کی جاسکتی ہے۔ اب جو ماحول اس ملک میں قائم ہوا ہے اور جس طرح ایودھیا میں پیش آنے والے واقعے کا جشن پورے ہندوستان کے گاؤں اور دیہاتوں میں منایا جارہاہے،اس سے یہ اندازہ لگانے میں کوئی حرج نہیں کہ حکمرانی کے آیندہ کم سے کم دوتین ٹرم اور بھی بی جے پی کے حق میں ریزرو ہو سکتے ہیں۔

جب ایودھیا تنازع برقرار تھا،توآر ایس ایس ،اکثریت پسند ہندووں کا مسلمانوں سے یہ مطالبہ تھا کہ کسی طرح اس معاملے کو نمٹالیں ،پھر اس ملک سے کمیونل ٹینشن کا دور پوری طرح ختم ہوجائے گا،مگر اب تو نئی قسم کی فرقہ پرستی اپنے بال و پر نکال رہی ہے۔ آج ہی کی خبر ہے کہ ہندوستان کے متعدد علاقوں میں مسجدوں کے باہر بھگوا جھنڈے لہرادیے گئے اور بی جے پی کے لیڈر و ایم پی ونے کٹیار تو دو تین دن پہلے ہی کہہ چکے ہیں کہ ایودھیا کے بعد اب کاشی و متھرا کا نمبر ہے۔ یعنی کہ رام مندر کا وجود ہندوستانی مسلمانوں کے سینے پر مونگ دلنے کے مترادف ہے،سپریم کورٹ کی یقین دہانی کے باوجود آیندہ کسی بھی عبادت گاہ کی حفاظت کی ضمانت نہیں دی جاسکتی ،یہ مندر مسلمانوں کو ہمیشہ نفسیاتی و ذہنی شکستگی کا احساس دلاتا رہے گا،انھیں خود ایسا محسوس نہیں ہوگا،یہاں کے ہندوکسی نہ کسی بہانے انھیں محسوس کرواتے رہیں گے۔

من حییث المجموع مسلمان اب کونسی سیاسی حکمت عملی اختیار کریں گے؟سب کچھ پہلے کی طرح چلتا رہے گا،پریس ریلیزوں والی ملی قیادت پھلتی پھولتی رہے گی اور ایک ہی ملی معاملے میں الگ الگ راگ الاپنے کا سلسلہ جاری رہے گا یا کچھ بدلاؤ آئے گا؟ مسلم سیاست دان اپنی پارٹیوں کے پچھ لگّو بنے رہیں گے یا کسی بامعنی نصب العین کے تحت کسی پارٹی میں شمولیت اختیار کریں گے؟ کیا ان پارٹیوں اور افراد سے کنارہ کشی کی جائے گی،جنھوں نے کھل کر بھومی پوجن پر اپنی خوشیوں کا اظہار کیا اور سیکولرزم کے گراں بار چولے کو اتار پھینکا؟کیا مسلمان سیکولرزم سے پیچھا چھڑانا چاہیں گے جیسا کہ کچھ پر جوش نوجوان چاہتے ہیں یاہندوستان کے سماجی و سیاسی پس منظر میں سیکولرزم کی کچھ الگ تحدید و تشریح کی جائے گی اور اس پر عمل کرنے اور کروانے کی کوشش کی جائے گی جیسا کہ بہت سے لوگ کہتے اور سوچتے رہتے ہیں؟بہر کیف جو پردۂ غیب میں ہے،اس کے بارے میں حتمی طورپر کچھ نہیں کہا جاسکتا،جو معرضِ ظہور میں آچکا اور آرہا ہے اسے دیکھ کر اور بھوگ کر اپنا قبلہ ضرور درست کیا جاسکتا ہے۔

اللہ کا گھر شہید ضرور ہوگیا ،مگر اس شہادت سے ایک طرف سنگھ اور بی جے پی کو حیاتِ نو ملی،تو دوسری طرف خود ہماری صفوں سے کئی ایک ایسے طالع آزماؤں نے اس کے ملبے پر اپنی مذہبی و سماجی سیاست چمکائی۔ ہم جب بابری مسجد کی تاریخ پڑھیں،لکھیں ،آنے والی نسلوں کو سنائیں تو خدا را انصاف پسندی کا مظاہرہ کریں اور اس کہانی کے تمام کرداروں کو ذہن میں رکھیں۔ ’’وتلک الأیام نداولہا بین الناس‘‘ایک خدائی اصول ہے اور اس کے نفاذ کے اسباب خود انسان کے اعمال ہوتے ہیں۔ ایاصوفیہ کی حیثیت و شناخت کی تبدیلی بھی اسی کا مظہر ہے اور ایودھیا میں رام مندر کی تاسیس میں بھی اسی کا عمل دخل ہے۔ کیا پتا سودوسوسال بعد ایاصوفیہ کس پوزیشن میں ہو اور کیا معلوم صدی دو صدی بعد ایودھیا کے متعلقہ مقام پر ایک مسجد کھڑی نظر آئے۔ اس قسم کے واقعات میں سیاسی،سماجی و نظریاتی اکثریت اور زور کا بھی اپنا کردار ہوتا ہے،سو اس پہلو کوبھی نظر انداز نہیں کیا جاسکتا۔

نایاب حسن
ایک مشہور کہاوت ہے کہ کسی کتاب کے اچھی یا بری ہونے کا فیصلہ اس کے ٹائٹل کی خوب صورتی یا بد صورتی سے نہیں کرنا چاہیے۔یعنی یہ ممکن ہے کہ کسی کتاب کا ٹائٹل بہت خوب صورت ہو،مگر اس میں چھپا ہوا مواد آپ کے ذہن و فکر و ذوق کی پراگندگی کا باعث بن جائے،جبکہ اسی وقت یہ بھی ممکن ہے کہ کسی کتاب کا کور بہت خوب صورت اور جاذبِ نظر نہ ہو،مگر اس کے مشمولات آپ کے ذہن کو نور اور قلب کو سرور بخشنے والے ہوں۔ عربی کے مشہور شاعر نزار قبانی کہتے ہیں کہ’’بہت سے لوگ ایسی کتابوں کے مانند ہوتے ہیں،جن کا ٹائٹل تو بھڑک دار ہوتا ہے،مگر اندر کوڑا کباڑا بھرا ہوتا ہے‘‘۔ یعنی وہ بھی یہی پیغام دے رہے ہیں کہ کسی چیز یا شخص کے ظاہر کو دیکھ کر اس کے باطن پر حکم نہیں لگانا چاہیے۔
لیکن معاملہ اُس وقت کتنا دلچسپ ہوجاتا ہے، جب کوئی عمارت ہی کتابوں کی شکل پر ڈزائن کی جائے!میرے خیال میں تب ہم اس کے ظاہر کی خوب صورتی،دلکشی،جاذبیت اور جمال انگیزی کو دیکھ کر اس کے باطن کے بارے میں اچھی رائے ہی قائم کریں گے اور اس میں ہم یقیناً حق بجانب ہوں گے۔عمارت کی بات آئی تو ماجراپرور سابق برطانوی وزیر اعظم ونسٹن چرچل(جس سے ہم ہندوستانی بھی بخوبی واقف ہیں) کی ایک تاریخی بات یاد آگئی۔ جب جنگ عظیم دوم میں برطانوی ہاؤس آف کامنز کے درودیوار مخدوش ہوئے تو اس کی مرمت کی ضرورت واہمیت بیان کرتے ہوئے اس نے کہا تھا’’بہت سی عمارتیں ایسی ہوتی ہیں،جن کا نقشہ تو ہم بناتے ہیں،مگر بعد میں وہی عمارتیں لوگوں کے ذہنوں میں ہماری تصویر بنادیتی ہیں ،ہمارا شناخت نامہ بن جاتی ہیں‘‘۔
کچھ یہی معاملہ بھارتی ریاست کیرالا کی دو عمارتوں کا ہے۔کیرالا ہمیں وقتاً فوقتاً اپنی مختلف تہذیبی و ثقافتی ،سماجی و سیاسی خصوصیات سے حیرت زدہ کرتا رہتا ہے ،مگر اس کا اصل نشانِ امتیاز اس کی سو فیصد شرحِ خواندگی والی علمی شناخت ہے اور ان دونوں عمارتوں کا تعلق بھی اس کی اسی امتیازی خصوصیت سے ہے۔ بظاہر تو ان کی پہچان یہ ہے کہ ان میں سے ایک پبلک لائبریری ہے اور دوسری کتابوں کی دکان،مگر جو چیز ان عمارتوں میں انفرادیت پیدا کرتی ہے،وہ ہے ان کا طرزِ تعمیر اور اس کے پس پردہ کارفرما بہترین تخلیقی اذہان،وہ بہت اچھے،بہت پیارے لوگ،جنھیں کتابوں سے بے پناہ عشق ہے اور اس کا اظہار انھوں نے کمال فن کاری کے ساتھ کیا ہے۔
ایک عمارت کیرالہ کے ضلع کنور کے کرایل (Karayil) میں واقع ہے۔اس کی بنیاد جنوبی ہند کے مجاہد آزادی کے کیلپن( K Kelappan)نے1967میں رکھی تھی۔اس کانام لال بہادرلائبریری اوردارالمطالعہ یا لال بہادر ویانسالا و گرنتھالیم ہے۔اس لائبریری کی گولڈن جبلی کی مناسبت سے لائبریری انتظامیہ اور اس سے وابستہ افراد نے اس کو ایک نئی عمارت میں منتقل کرنے کا فیصلہ کیا اوراس کی ایک نہایت پرکشش عمارت بنائی،جس کی درودیوار کتابوں کی شکل میں ڈزائن کی گئی ہے،اس کی تصویر دیکھیں تو ایسا لگتا ہے کہ پوری عمارت کتابوں سے تعمیر کی گئی ہے۔کیا ہی خوشنما منظر ہے!اس کا خاکہ جنوب کے نابغہ مجسمہ سازکے کے آر وینگارا(KKR Vengara)نے بنایا اور مقامی آرٹسٹ سی وی سری دھرن نے ان کے خاکے کو محسوس پیکر عطا کرنے میں ان کا تعاون کیاہے۔اس لائبریری میں ملیالم زبان کی کلاسکس موجود ہیں،کتابوں کی مجموعی تعداد پانچ ہزار سے کچھ اوپر ہے،باہر دروازے کے سامنے ہندوستانی وزراے اعظم جواہر لال نہرو اور لال بہادر شاستری کے مجسمے بھی رکھے ہوئے ہیں۔لال بہادر ہی کے نام پر اسے موسوم کیا گیا ہے۔لائبریری کی اس نئی عمارت کا افتتاح پچھلےسال یعنی 2019کی 3؍فروری کو ملیالم زبان کے مشہور افسانہ نگار،ناول نویس،کالم نگار اور شاعر این پربھاکرن(N. Prabhakaran)نے کیا تھا۔آپ کو یہ جان کر حیرت ہوگی کہ اس عمارت کی افتتاحی تقریب میں لوگوں کو بلانےکے لیے باقاعدہ ڈھول نگاڑوں کے ساتھ جلوس نکالا گیا اورتقریب میں بچوں اور بڑوں،مردو خواتین نے رنگا رنگ ثقافتی پروگرام پیش کیے۔
اسی علم پرور ریاست کے ایک دوسرے شہر کوچی کی ’الوا‘(Aluva)نامی میونسپلٹی میں تین ہزار اسکوائر فٹ میں پھیلی ہوئی Once Upon A Time نامی ایک دو منزلہ بک شاپ ہے،جس کی اوپری منزل ایسے بنائی گئی ہے کہ لگتا ہے چھت پر چار کتابیں بالتریب کھڑی کرکے رکھی ہوئی ہیں۔ان میں سے ایک جے کے راؤلنگ کی Harry Potter’ ‘، دوسری ہرمن میلول کی‘Moby Dick’،تیسری بنیامین کی ‘Aadujeevitham’ اور چوتھا معروف برازیلین ناولسٹ پاؤلو کوئلہو کا دنیا کی اسی سے زیادہ زبانوں میں ترجمہ کیا جانے والا شہرۂ آفاق ناول ‘The Alchemist’ہے۔ جون کے پہلے ہفتے میں میں اس وقت اس عمارت کی تصویر سوشل میڈیا پر وائرل ہوئی تھی، جب خود پاؤلو کوئلہو نے اپنے آفشیل ٹوئٹر اور انسٹاگرام اکاؤنٹ پراسے شیئر کیا اور چند گھنٹوں میں ہی اس منفرد تعمیری شاہکار کو لاکھوں لوگوں نے پسند اور شیئر کیا۔اس بک شاپ کی تعمیر میں دو کروڑ روپے کی لاگت آئی ہے۔
ذرا اس بک شاپ کے مالکوں کے بارے میں بھی جانتے ہیں۔ یہ بک شاپ ایک مرد اور ایک خاتون کے خواب کی تعبیر ہے۔یہ دونوں میاں بیوی ہیں، شوہر کانام اجی کمار(Aji Kumar) ہے اور بیوی کا نام وی ایم منجو(V M Manju)ہے۔ دونوں پندرہ سالوں سے میاں بیوی ہیں۔ شوہر الیکٹرک انجینئر ہیں اور الیکٹرسٹی بورڈ میں ملازم تھے ،بیوی سافٹ ویئر انجینئر ہیں اور ٹاٹا کنسلٹنسی سروسز میں جاب کرچکی ہیں۔ دونوں نے تیرہ سال قبل ہی ملازمت سے علیحدگی اختیار کرلی اور انجینئرنگ کے طلبہ کے لیے کوچنگ سینٹر چلا رہے تھے۔ منجو کا کہناہے کہ’’میں اور میرے شوہر دونوں کتابوں سے بے پناہ محبت کرتے ہیں اور اسی کے زیر اثر ہماری دیرینہ خواہش تھی کہ ایک منفرد قسم کی بک شاپ کھولیں،جہاں ہر قسم کی کتابوں کا بڑا ذخیرہ ہو،جس سے کتاب دوست طبقے کی ضروریات پوری ہوسکے‘‘۔ چنانچہ انھوں نے الوا میں لب روڈ واقع اپنے ایک قطعۂ اراضی میں کتابوں کی اس انوکھی دکان کی تعمیر کروائی۔
جب ان سے پوچھا گیا کہ عمارت کے اوپری حصے میں جن چار کتابوں کی امیجز آپ نے دی ہے،کیا ان کا انتخاب جان بوجھ کر کیاہے؟تو انھوں نے کہاکہ ہم نے تو دس کتابوں کا انتخاب کیا تھا،مگر آرکیٹکٹ اور بلڈنگ کے معماروں نے رنگوں کے امتزاج اور سائز وغیرہ کے پیش نظر انہی چاروں کا انتخاب کیا۔ اس بلڈنگ کی ڈزائننگ اور تعمیر رائے تھوماس اور کے کے ونود نامی دو مقامی فنکاروں کے زرخیز ذہنوں کا نتیجہ ہے۔
پاؤلو کوئلہو کے پاس اس عمارت کی تصویر کیسے پہنچی؟اس سوال کے جواب میں وہ کہتے ہیں کہ فی الحقیقت ہمیں بھی نہیں معلوم کہ انھیں اس کی تصویر کیسے اور کہاں سے ملی۔ چوں کہ عمارت لبِ روڈ واقع ہے اور اس کا طرز تعمیر ایسا دلچسپ ہے کہ پہلی بار جوبھی دیکھے گا،اپنے پاس اس کی تصویر محفوظ کرنے کی سوچے گا اور آجکل سوشل میڈیا کا استعمال عام ہے،تو عین ممکن ہے کہ کسی نے اس کی تصویر لے کر سوشل میڈیا پر ڈالی ہو اوراس پر پاؤلو کوئلہوکی نظر پڑی ہو اور چوں کہ چار کتابوں میں سے ایک خود ان کی کتاب بھی ہے،تو فطری طورپر انھیں یہ تصویر اور بھی بھائی ہوگی ؛چنانچہ انھوں نے اسے اپنے سوشل میڈیا اکاؤنٹس پر شیئر کیا۔
اس کتب خانے کا آغاز اسی ماہ جولائی کے آغاز میں ہوا ہے۔ اس میں فی الحال انگریزی،ملیالم اور ہندی کی کتابیں جمع کی گئی ہیں۔ اجی کمار اور منجو دنیا بھر کے پبلشرز کی عمدہ کتابیں اپنے یہاں اکٹھاکرنے کے لیے پر عزم ہیں۔ اس بک شاپ سے کتابیں خریدنے کے علاوہ وہاں بیٹھ کر پڑھی بھی جاسکتی ہیں،مگر بیٹھ کر پڑھنے کا انتظام کورونا ختم ہونے کے بعد کیا جائے گا۔ بچوں کی کتابوں کے لیے ایک مستقل گوشہ مختص کیاگیا ہے،جہاں سے بچوں پر لکھی ہوئی کتابیں حاصل بھی کی جاسکتی ہیں اور بچے اگر چاہیں تو وہاں بیٹھ کر پڑھ بھی سکتے ہیں۔ اندر کا منظر عام کتابوں کی دکانوں سے بالکل مختلف اور نہایت خوب صورت ہے،کتابوں کو ترتیب وار رکھنے کے لیے بک شیلف اعلیٰ درجے کا بنواگیاہے،لائٹنگ بھی خوب ہے اور بلب کے اوپر کی چھتری بھی کتابوں کی شیپ میں بنائی گئی ہے۔ الغرض کتابوں کی یہ دکان فی نفسہ فن تعمیر کا ایک شاہکار ہے اور کتابوں سے بدکنے والا انسان بھی اگر وہاں پہنچ جائے،تو اس کے اندر کتاب دوستی کا ذوق پیدا ہوسکتا ہے۔ میں نے آج تک کیرالا کا سفر نہیں کیا، مگر اب ضرور کرنا ہے اور انہی دونوں مقامات کی’زیارت‘کے لیے کرنا ہے۔ان شاء اللہ

مودی،امیت شاہ اور سیتارمن کےطلبہ پرنشانہ سادھنے کے بعد اب فروغ انسانی وسائل کے وزیرمنیش پوکھریال نے کہاہے کہ طلبہ کی سیاسی سرگرمیوں کوکسی قیمت پربرداشت نہیں کیاجائے گا

نایاب حسن

پورے ملک کی تعلیم گاہوں اور عام لوگوں کے درمیان مرکزی حکومت کے ذریعے پاس کردہ نئے شہریت ترمیمی قانون اور این آرسی کے خلاف پائی جانے والی شدید ناراضگی اور احتجاجات کے بیچ آج مرکزی وزیر برائے فروغ انسانی وسائل رمیش پوکھریال نے کولکاتا میںبی جے پی کی ٹیچرس سیل کانفرنس سے خطاب کرتے ہوئے کہاکہ مرکزی حکومت تعلیمی اداروں میں سیاسی گرمیوں کوکسی قیمت پر برداشت نہیں کرے گی۔انھوں نے کہاکہ ہر شخص سیاسی سرگرمیوں میں حصہ لینے کے لیے آزاد ہے مگر کالج اور یونیورسٹی جہاں دوردراز سے طلبہ پڑھنے کے لیے آتے ہیں انھیں اس قسم کی سرگرمیوں سے پاک رکھنا ہوگا۔انھوںنے سختی سے کہاکہ نریندر مودی حکومت اسے کسی قیمت پر برداشت نہیں کرے گی۔ انھوں نے اپوزیشن پارٹیوں بالخصوص کانگریس پر الزام لگایاکہ وہ سی اے اے کے حوالے سے لوگوں میں غلط معلومات پھیلاکرماحول خراب کررہی ہے۔انہوں نے بنگال کی وزیر اعلیٰ ممتابنرجی پر بھی نشانہ سادھا۔نئی تعلیمی پالیسی کے بارے میں بتاتے ہوئے انہوں نے کہاکہ تینتیس سال کے بعد حکومت کے ذریعے تیار کردہ نئی تعلیمی پالیسی ہندوستان اَساس ہوگی اوراس میں ہماری قومی قدروں کے تحفظ پر زور دیاجائے گا۔قابل ذکرہے کہ گزشتہ دوہفتے سے زائد سے دہلی کی جے این یو،جامعہ ملیہ اسلامیہ،دہلی یونیورسٹی اور ملک کی دیگر دسیوں یونیورسٹیوں کے طلبانئے قانون کے خلاف سڑکوں پر ہیں اوران کے سپورٹ میں بیرون ہندکی یونیورسٹیوں میں پڑھنے والے ہندوستانی طلبہ بھی احتجاجی مارچ نکال رہے ہیں۔اس سے پہلے خود وزیر اعظم مودی،وزیر داخلہ امیت شاہ ،وزیر خزانہ نرملا سیتارمن بھی طلبہ کے احتجاجات کولے کر سخت بیان بازی کرچکے ہیں،اب فروغ انسانی وسائل کے وزیر نے بھی جس لہجے میں یہ کہاکہ تعلیمی اداروں میں سیاسی سرگرمیوں کوبرداشت نہیں کیاجائے گااس سے حکومت کی منشاپر سوال اٹھنے لگے ہیں۔کیاحکومت طلبہ کی سیاست کو ختم کرنا چاہتی ہے؟پھر یونیورسٹیوں میں اسٹوڈینٹ یونینز کاوجود کیوں ہے؟اور مختلف مین اسٹریم کی سیاسی پارٹیاں ان کی سرپرستی کیوں کررہی ہیں؟جہاں کانگریس اور دیگر چھوٹی بڑی سیاسی جماعتوں کا طلبہ ونگ یونیورسٹیز اور کالجز میں سرگرم ہے وہیں خود بی جے پی کا سٹوڈینٹ ونگ بھی آل انڈیاودیارتھی پریشدکے نام سے سرگرم ہے،توکیاحکومت یونیورسٹیوں سے طلبہ یونینز کوختم کرناچاہتی ہے یا حکومت کے وزراصرف ایک قسم کے طلباپر نشانہ سادھ رہے ہیں جو حکومت کی پالیسیوں اور اس کے طریقۂ کارپر سوال اٹھاتے ہیں؟اگر ایسی بات ہے،توہندوستانی جمہوریت کے لیے شرمناک ہے۔خاص طورپر اس وجہ سے بھی کہ بی جے پی کی پیدایش خود طلبائی سیاست اور احتجاجات کی دین ہے۔ ستر کی دہائی میں ایمرجنسی سے پہلے اور بعد کے سیاسی حالات میں ملک کے بیشتر تعلیمی ادارے اور ان کے طلبہ اس وقت کی اندراگاندھی حکومت کے خلاف برسرِ احتجاج تھے،جن میں کئی وہ لوگ بھی شامل تھے جوآج بی جے پی کا نمایاں چہرہ ہیں۔شاید بی جے پی کو بھی طلبہ کے ذریعے چھیڑی گئی اس تحریک سے اقتدارکی کرسی کھسکنے کا خطرہ محسوس ہونے لگاہے،اس لیے مودی سمیت سارے وزرااسے ہر قیمت پر کچلناچاہتے ہیں۔

نایاب حسن

سینٹرل ہندوستان میں سی اے اے/این آرسی کے خلاف احتجاجات کی لہر تعلیمی اداروں اور دانش گاہوں سے اٹھی ہے،جہاں ملک کا منتخب ترین طبقہ رہتاہے اور جس کے بارے میں کہاجاتاہے اور صحیح کہاجاتاہے کہ یہی طبقہ ملک کے مستقبل کا معمار،اس کی امنگوں کامرکز اوراس کی آرزووں کاقبلہ ہوتاہے۔یہ بھی ایک حسن اتفاق ہے کہ یہ لہر جامعہ ملیہ اسلامیہ سے اٹھی اور پورے ملک کی تعلیم گاہوں اورعام شہریوں میں پھیل گئی، حتی کہ اس کی صداے بازگشت آکسفورڈ، کیمبریج اوریالے تک سنی جانے لگی ـ 1920میں گاندھی،علی برادران اور شیخ الہند وغیرہ کے ہاتھوں اس یونیورسٹی کی پیدایش تحریکِ عدم تعاون کی کوکھ سے ہوئی تھی اور2019میں موجودہ فاشسٹ حکومت کے خلاف پرزوراور توانامزاحمت کی علامت کے طورپر اس کا”ری برتھ“ہواہے۔جامعہ،ابناے جامعہ،منتسبینِ جامعہ اورملک بھر میں اس تازہ تحریکِ عدم تعاون سے جڑے لوگوں کے لیے یہ اتفاق باعثِ فخر ہوناچاہیے۔
اس تحریک کولگ بھگ آدھے مہینے کا عرصہ ہونے جارہاہے،مگر اس کی انرجی میں کوئی کمی نہیں آئی ہے،آج تیسرے جمعے کوبھی جھارکھنڈ کے جمشید پورسے لے کر بہار کے چمپارن اور کرناٹک کے منگلور سے لے کر ممبئی کے آزاد میدان تک سے ہزارہامظاہرین کی تصویریں آئی ہیں،مردودیوگی نے گرچہ یوپی میں تمام وسائل و ذرائعِ اطلاعات پر پابندی لگارکھی تھی،مگر متعددشہروں سے پرامن احتجاج کی خبریں مل رہی ہیں۔مظاہرین میں اس انرجی کے کئی سورسزہیں،جن میں سے ایک اہم تویہ ہے کہ لوگوں میں اس ملک کے دستور،سیکولرزم اور مساوات کے حق کو بچانے کا ایک نہایت مضبوط جذبہ پیدا ہوگیاہے اور وہ جذبہ اب سردہونے والانہیں ہے،دوسرے ایسی تحریکوں کو انرجی دانشوروں،مصنفوں،ادیبوں، شاعروں اور فنکاروں سے بھی ملتی ہے؛چنانچہ اس تحریک سے رام چندرگوہا،اروندھتی رائے، یوگیندریادوجیسے دانشوران کی وابستگی بھی اہم ہے اور محمد ذیشان ایوب،سوارابھاسکر،انوراگ کشیپ،سنیل گرور، رچاچڈھا اور سشانت سنگھ وغیرہ جیسے اداکاروں کی عملی شرکت سے بھی ان مظاہروں میں انرجی آرہی ہے، متعدددیگر فلم اداکاروں اورہدایت کاروں نے بھی طلبہ کے ذریعے چھیڑی گئی اس تحریک کی تائید کی،طلبہ پرپولیس کی زیادتی کی مذمت کی اور جمہوریت کے تحفظ کے لیے احتجاج کرنے والی اس نئی نسل کی حوصلہ افزائی کی ہے۔ہندی اور انگریزی کے متعدد شاعر و ادیب بھی اپنے خیالات کا اظہار کررہے ہیں اور مارکیٹ میں سب سے زیادہ رائج ناول نگارچیتن بھگت جیسے مودی بھگت بھی اب کھل کر مودی حکومت پرنقد کررہے ہیں ۔البتہ اردوکے شاعروں اور ادیبوں نے مجموعی طورپر مایوس کیاہے،حالاں کہ متعدد نوجوان شعرانے احتجاجی نظمیں اور غزلیں لکھ کر اپنے جذبات کا اظہار کیااور مظاہرین کو حوصلہ دیاہے،معروف طنزومزاح نگار مجتبی حسین اور شیریں دلوی نے احتجاجاً اپنے ایوارڈزواپس کیے ہیں،اسی طرح رحمان عباس اورمشرف عالم ذوقی جیسے دوچارلوگ ہیں، جوشروع سے شہریت ترمیمی قانون اوراین آرسی پرکھل کرلکھ رہے ہیں،مگرمین سٹریم کے بیشتر شاعروں اور ادیبوں کی جانب سے کوئی حوصلہ بخش رسپانس،کوئی مضبوط سٹینڈ سامنے نہیں آیاہے۔حالاں کہ ایسی عوامی تحریکوں میں ایسے لوگوں کی بڑی ضرورت ہوتی ہے، شاعر اور ادیب عوامی احساسات کے ترجمان ہوتے اور ان کی نبض پہچانتے ہیں،وہ ایسے موقعوں پر انقلاب کے نعروں میں تب و تاب پیدا کرسکتے اور نوجوانوں کے حوصلوں کوقوتِ پرواز عطا کرسکتے ہیں،مگر موجودہ ادبی منظرنامے پر زیادہ تر اردوکے ادیبوں کے کارنامے مانگے کے اجالے ہوتے اور بیشتر شاعر کاروباری ہوتے ہیں،سوان سے ایسے کسی رسک کی توقع نہیں کی جاسکتی،مگر چوں کہ یہ تحریک ملک کے منتخب ترین طبقے یعنی طلبہ کے ذریعے شروع کی گئی ہے،سوانھوں نے اپنی پسند اور معیار کے مطابق اردوشعروادب سے ایسی آوازیں تلاش کرلی ہیں،جن سے انھیں اپنے جذبات کے توانااظہار میں مدد مل رہی ہے۔ان میں سے ایک حبیب جالب ہیں ـ گزشتہ دنوں جے این یو میں سٹوڈینٹ یونین کے انتخابات کے دوران ایک طالب علم ششی بھوشن کے ذریعے ان کی مشہورِزمانہ نظم”دستور“سوشل میڈیاپر خوب وائرل ہوئی تھی اور عصری دانش گاہوں کے ماحول میں اس کی گونج ابھی سنی ہی جارہی تھی کہ اب یہ نئی تحریک شروع ہوگئی، سوجامعہ ملیہ کے باہر،جنتر منترپر یا دہلی پولیس کے ہیڈکوارٹر کے باہراحتجاجات کے دوران آپ کو ایسے طلبہ و طالبات آسانی سے مل جائیں گے،جواپنے اپنے مخصوص لب و لہجے میں جالب مرحوم کی احتجاجی آوازسے آواز ملاتے ہوئے”میں نہیں مانتا،میں نہیں جانتا“کے زمزمے بلند کررہے ہوں گے۔دہلی کے باہر کے شہروں میں ہونے والے احتجاجات میں بھی اس نظم کی گونج بہت تیزی سے سنی جارہی ہے۔اس کے علاوہ مختلف پلے کارڈزاور بینرزپر بھی اس کے مصرعے دیکھے جاسکتے ہیں،جالب صاحب کی اس نظم میں،اس کے مصرعے مصرعے میں ایک سحرہے،اسے سنتے ہی دل دماغ میں مزاحمت اور احتجاج کی لہریں اٹھنے لگتی ہیں،چوں کہ جالب مرحوم قول و عمل ہر دواعتبار سے سسٹم کی ناانصافیوں اور حکومتی مظالم کے خلاف ایک چٹان تھے، انھوں نے پوری زندگی لڑتے ہوئے گزاری،سوان کی نظموں میں؛بلکہ ان کے مصرعوں میں آج بھی ایک عجیب تاثیر ہےاوراسی تاثیرمیں ڈوب کر ہندوستان کے نوجوان مودی-شاہ کی جوڑی کوچیلنج کرنے نکلے ہیں ـ دوسرے فیض احمد فیض ہیں اور خصوصاان کی نظم”ہم دیکھیں گے“اپنی تمام تر معنویتوں کے ساتھ اس تحریک پر چھائی ہوئی ہے۔فیض کی خوش قسمتی ہے کہ وہ خود اپنی نظموں اور غزلوں کو جس بھدے لہجے میں پڑھتے تھے،انھیں اپنی زندگی میں اور وفات کےبعد اتنے ہی اچھے گانے والے ملے ہیں۔اقبال بانو،نیرہ نور،فریدہ خانم،ٹیناثانی وغیرہ سے لے کر آج کے ہندوپاک کے گانے والے تو انھیں گاہی رہے ہیں،کئی برٹش سنگرزبھی فیض کو گارہے ہیں اور اچھا گارہے ہیں۔ہمارے اِن احتجاجات کے دوران بھی فیض کو نئے سنگرزملے ہیں،دہلی میں جامعہ،جے این یو،ڈی یو وغیرہ اور دیگر شہروں کے طلبہ و طالبات کی بہت سی ویڈیوز وائرل ہورہی ہیں، جن میں وہ اپنے مخصوص بے ساختہ اور جذبات سے معمور لب و لہجے میں ”ہم دیکھیں گے!“کی صدائیں بلند کررہے ہیں،قابل ذکرہے کہ فیض کی اس نظم کا اصل عنوان ہے”ویبقی وجہ ربک“جوایک قرآنی آیت کا اقتباس ہے اور اس میں جہاں انقلابی خیالات کا طاقت ور اظہارہے،وہیں ایک خداکے وجود اوراس کی وحدانیت کابھرپور بیان بھی ہے۔اِنہی احتجاجات کے دوران چنددن قبل آئی آئی ٹی کانپورکے طلبہ کی ایک ویڈیووائرل ہوئی تھی کہ کالج کے اوپن ایئرتھیٹرمیں سیکڑوں طلبہ موجودہیں اور ایک طالب علم یہ نظم پڑھ رہاہے،ترنم سے نہیں، تحت اللفظ، پڑھتے پڑھتے جب وہ اس شعر پر پہنچتاہے”بس نام رہے گااللہ کا…جوحاضربھی ہے غائب بھی“ توایک لال ٹوپی والے مہاشہ یہ چلاتے ہوئے مجمع میں گھسنے کی کوشش کرتےہیں کہ”یہ نہیں چلے گا“۔مطلب یہ لطیفہ ہی ہوگیا،بے چارہ ”اللہ“لفظ سن کرہی بھڑک گیا۔ اسے لگاکہ پڑھنے والاشایداسلام کی تبلیغ کررہاہےـ خیر یہ ایک واقعہ ہے،مگر ان احتجاجات کے دوران آپ کو جگہ جگہ ایسے طلبہ و طالبات کاگروپ مل جائے گا،جو فیض کےہم آواز ہوکر”ہم دیکھیں گے“کے نعرے لگارہے،مودی و شاہ کے فاشزم کے سامنے سینہ سپر ہوکربازارمیں پابجولاں چلنے کی قسمیں اٹھارہے،لبوں کی آزادی اور زبان کی قوت کا اظہار کرتے ہوئے ظلم وجورسے خلقِ خداکے الجھنے کی روایت کو زندہ کررہے اورجو آگ میں پھول کھلانے کے سفر پررواں دواں ہیں ۔راحت اندوری کا ایک شعر بھی ان مظاہروں میں بڑا چل رہاہے،شعر کوئی تیس پینتیس سال پراناہے،مگر جب سے بی جے پی حکومت میں آئی ہے،اسے نئی زندگی مل گئی ہے،گزشتہ سال انھوں نے کپل شرماکے شومیں اسے سناکر پورے ہندوستان کے کانوں اور ذہنوں میں پہنچادیاتھا،گزشتہ جون میں پارلیمنٹ میں مہواموئترانے اسے پڑھاتھا،اداکارامالاپال اور فلم سازعاشق ابونے اس کا ملیالم ترجمہ انسٹاگرام پر پوسٹ کیا اور شیوسینا لیڈر سنجے راوت نے اسے ٹوئٹ کیاتھا،حالیہ احتجاجات کے دوران جگہ جگہ ایسے پلے کارڈزنظر آجائیں گے،جن پر یہ شعر لکھاہوانظرآئے گا:
سبھی کا خون ہے شامل یہاں کی مٹی میں
کسی کے باپ کا ہندوستان تھوڑی ہے!
25دسمبر کوتو معروف انگریزی روزنامہ ”انڈین ایکسپریس“نے اس شعر پر خصوصی رپورٹ بھی شائع کی تھی،راحت اندوری سے رپورٹرکی گفتگو کےچند اقتباسات بھی نقل کیے گئے تھے، گفتگوکاآخری جملہ یہ تھا ”میرے آس پاس جو کچھ ہورہاہے، اس پر اگر میں نہ لکھوں،تو میرے اور نیروکے درمیان کیا فرق رہ جائے گا؟اگر میرے شہر اور ملک میں آگ لگی ہوئی ہے اور میں اپنی محبوبہ کی زلفوں کی شان میں قصیدے لکھ رہاہوں،تویا تومیں اندھاہوں یا بہراہو“۔
بہرکیف حکومت کے خلاف اٹھنے والی اس ملک گیرتحریک پرگرچہ زیادہ تراردوکے شاعروں اور ادیبوں نے افسوسنا ک سردمہری کامظاہرہ کیاہے،مگر جالب و فیض کی روحیں ان مظاہرین پر سایہ فگن ہیں اور راحت اندوری تازہ نہ سہی،پرانے اشعار کے ساتھ ان کے درمیان موجودہیں۔ اگریہ انقلاب کامیابی سے ہم کنارہوتایااس کے ذریعے ہندوستانی جمہوریت کی بقا واستقلال کی راہیں ہموارہوتی ہیں، تواس میں جہاں ہمارے نوجوانوں کی عملی جدوجہد اورقربانیوں کادخل ہوگا، وہیں اس میں حبیب جالب، فیض احمدفیض اوردیگر شعراوادباکی بھی حصے داری بھی، جن کے نتائجِ فکران کے جذبۂ عمل وانقلاب کو مہمیز کر رہےاوران کے حوصلوں کوتوانائی بخش رہے ہیں ـ

https://youtu.be/y8UAD_awltw