سائنس وٹیکنالوجی

نیویارک:سوشل میڈیا ایپلی کیشن واٹس ایپ میں کاروباری افرادکیلئے جدید فیچرزمتعارف کرانے کا فیصلہ کرلیا گیا۔میٹا پلیٹ فارمزکے سی ای اومارک زکربرگ نے اعلان کیا ہے کہ جلد واٹس ایپ کا استعمال کرتے ہوئے مزید کاروبار حاصل کرنے کے لیے مفت کلاؤڈ بیسڈ اے پی آئی سروسز متعارف کروا ئی جائیں گی۔جدید سروسزکی بدولت واٹس ایپ پرکاروبارچلانے والے افراد کلاؤڈ اے پی آئی کا استعمال کر کے صارفین کیلئے اپنے جوابی وقت کو تیز کر سکیں گے۔

نئی دہلی : ٹوئٹر نے اپنے ملازمین کو تحفہ دیا ہے۔ ٹویٹر کے سربراہ پراگ اگروال نے جمعہ کو ٹوئٹ کی ایک سیریز میں اعلان کیا کہ سماجی نیٹ ورکنگ کمپنی اس ماہ اپنے عالمی دفاتر دوبارہ کھولنے جا رہی ہے۔ اگر لوگ دفتر سے کام کرنا چاہتے ہیں تو وہ کر سکتے ہیں، لیکن اگر وہ گھر سے کام کرنا چاہتے ہیں یا کہیں اور سے ،یہ مکمل طور پر ملازمین کی خواہشات پر منحصر ہوگا۔تاہم پراگ اگروال نے ملازمین کو دفتر واپس آنے کی تلقین کرتے ہوئے کہا کہ دفتر میں کام کرنے کا ایک متحرک کلچر ہوگا۔ انہوں نے کہا کہ 15 مارچ سے ٹوئٹر کے تمام عالمی دفاتر کھل جائیں گے۔ ٹویٹر کے سی ای او پراگ اگروال نے ایک ٹویٹ میں لکھاکہ کہاں کام کرنا ہے، کاروبار کے لیے آپ محفوظ طریقے سے سفر کرنا چاہتے ہیں یا نہیں، یا کس تقریب میں شرکت کرنا ہے، یہ فیصلہ آپ پر منحصر ہے۔ٹویٹر کے سی ای او ملازمین سے کہتے ہیں کہ وہ جہاں بھی زیادہ نتیجہ خیز اور تخلیقی محسوس کرتے ہوں وہیں سے کام کریں۔ انہوں نے مزید کہا کہ اس میں مکمل طور پر ورک فرام ہوم کےلیے آپشن بھی شامل ہے۔ پیراگ اگروال نے زور دیا کہ جو لوگ دور سے کام جاری رکھنا چاہتے ہیں انہیں سیکھنے اور نیا کچھ اپنانے کی ضرورت ہوگی، کیونکہ الگ الگ مقامات سے کام کرنا زیادہ مشکل ہوگا۔کرونا نامی وبائی مرض سے دُنیا دوچار ہے، دفاتر میں واپسی کے امکانات بہت کم تھے۔ تاہم اب حالات معمول پر آنے کے بعد گوگل اپریل کے شروع میں اپنے سیلی کون ویلی کے دفاتر کو ملازمین کے لیے کھولنے کی تیاری کر رہا ہے۔ گوگل کوتوقع ہے کہ اس کے ملازمین ہفتے میں صرف 2 دن گھر سے اور باقی دن دفتر سے کام کریں گے۔

نیویارک:انسٹاگرام کے بعد اب فیس بک پر بھی مختصر ویڈیو فیچر ریلز کو شامل کیا گیا ہے اور دنیا بھر میں صارفین فیس بک پر ریلز پوسٹ اور دیکھ سکیں گے۔ فیس بک کی پیرنٹ کمپنی میٹانے منگل کو کہا ہے کہ فیس بک پر 150 سے زائد ممالک میں ریلز فیچر متعارف کرایا جا رہا ہے۔اس سے قبل فیس بک پر ریلز کا فیچر سن 2021 میں صرف امریکہ کے صارفین کے لیے پیش کیا گیا تھا۔خبر رساں ادارے رائٹرز کے مطابق میٹا نے معروف لپ سنکنگ ایپ ٹک ٹاک کی مقبولیت کو مدِ نظر دیکھتے ہوئے انسٹاگرام پر 2020 میں ریلز فیچر متعارف کرایا تھا۔میٹا کے بانی مارک زکر برگ نے منگل کو فیس بک پر جاری بیان میں کہا کہ ریلز پہلے ہی تیزی سے مقبول ہونے والا ایک ٹول ہے اور آج ہم اسے دنیا بھر میں فیس بک صارفین کے لیے پیش کر رہے ہیں۔کمپنی کے مطابق فیس بک پر صارفین اپنا آدھے سے زیادہ وقت ویڈیوز دیکھ کر ہی گزارتے ہیں۔ میٹا نے فیس بک پر ریلز متعارف کرانے کے ساتھ ساتھ اس فیچر کے ذریعے کونٹینٹ کریئٹرز (تخلیق کار) کے لیے پیسے کمانے کے مواقع بھی پیش کیے ہیں۔کمپنی کے مطابق ریلز پلے بونس پروگرام کے ذریعے اہلیت رکھنے والے تخلیق کاروں کو ان کی ریلز پر ویوز کی بنیاد پر ماہانہ 35 ہزار ڈالرز تک رقم دی جائے گی۔واضح رہے کہ ریلز پلے بونس پروگرام تخلیق کاروں کے لیے ایک ارب ڈالر مختص کرنے کے پروگرام کا حصہ ہے۔اس پروگرام کے تحت کمپنی نے فیس بک اور انسٹاگرام کے لیے خصوصی مواد تخلیق کرنے والوں کے لیے ایک ارب ڈالر مختص کرنے کا اعلان کیا تھا۔اس کے علاوہ تخلیق کار ریلز پر مونیٹائزیشن یعنی اشتہارات کی مدد سے بھی پیسے کما سکیں گے۔ اس ضمن میں کمپنی امریکہ، کینیڈا اور میکسیکو میں آزمائش کر رہی ہے جب کہ آئندہ آنے والے ہفتوں میں اس کا دائرہ کار دیگر ممالک تک بڑھایا جائے گا۔

نیویارک: پیغام رسانی کی دنیا کی سب سے بڑی ایپلی کیشن واٹس ایپ اپنے صارفین کیلئے آئے روز نئے نئے فیچر متعارف کرواتی رہتی ہے اور اب صارفین کے لیے میسج کے ڈیلیٹ فار ایوری ون فیچر میں زبردست سہولت فراہم کردی گئی ہے۔ڈبلیو اے بیٹا انفو کی رپورٹ کے مطابق واٹس ایپ کے بیٹا ورژن میں نئی اپڈیٹ سامنے آئی ہے جس کے تحت میسج ڈیلیٹ کرنے کی مہلت 2 دن 12 گھنٹے یا 36 گھنٹے ہوجائے گی اور کمپنی میسجز ڈیلیٹ کرنے کے لیے وقت کا دورانیہ بڑھا رہی ہے۔قبل ازیں واٹس ایپ میں غلطی سے کوئی میسج کردیا جائے تو اسے ڈیلیٹ کرنے کے لیے مذکورہ فیچر موجود ہے لیکن صارفین کو اپنا پیغام ایک گھنٹے 8 منٹ اور 16 سیکنڈز کے اندر ڈیلیٹ کرنا ہوتا ہے بصورت دیگر سب کے لیے ڈیلیٹ کا آپشن نہیں آ تا تاہم اب صارفین کو اہم ریلیف ملا ہے۔رپورٹ کے مطابق یہ سہولت فی الحال واٹس ایپ کے بیٹا ورژن صارفین کے لیے ہے اور ایپلی کیشن کے تمام صارفین کے لیے یہ آپشن کب آئے گا یہ کہنا ابھی قبل از وقت ہوگا۔قبل ازیں یہ خبریں بھی زیر گردش تھیں کہ کمپنی پیغام ڈیلیٹ کرنے کے لیے 7 دن تک کی مہلت بھی دے سکتی ہے لیکن حقیقت میں ایسا نہیں ہوا بلکہ اب 2 دن 12 گھنٹے کا دورانیہ ہے۔واضح رہے کہ واٹس ایپ نے 2017 میں میسج ڈیلیٹ کرنے کے فیچر کو متعارف کرایا تھا اور اس وقت میسج کو ڈیلیٹ کرنے کے لیے 7 منٹ کا وقت دیا گیا تھا، بعد ازاں مرحلہ وار وقت کو بڑھایا گیا اور اب یہ دورانیہ مذکورہ حد تک ہے۔

نیویارک:سماجی رابطے کی ویب سائٹ فیس بک کے میسنجر میں میسج کا اسکرین شاٹ لینے کی اطلاع دینے والے فیچر کو متعارف کروانے کا اعلان کردیا گیا ہے۔فیس بک کی مرکزی کمپنی ’’میٹا‘‘کی جانب سے جاری بیان کے مطابق موبائل میسنجر ایپ میں ایک نئی تبدیلی کی جارہی ہے جس کے بعد کوئی بھی میسج کاا سکرین شاٹ لے گا ،تو میسج بھیجنے والے کو خودکارطریقہ سے میسج موصول ہوگا، جس میں اسکرین شاٹ بنانے والے کی تفصیل موجود ہوگی۔میٹا کا کہنا ہے کہ یہ اقدام صارفین کے پیغامات کو پہلے زیادہ محفوظ بنانے کے لیے اٹھایا جارہا ہے۔

اسوسیٹ کلینکل پروفیسر
مشیگن اسٹیٹ یونیورسٹی۔ امریکہ

جب ایک نو مولود دنیا میں آنکھیں کھولتا ہے تو حواسِ خمسہ کا استعمال کرتے ہوئے اپنے ارد گرد کے ماحول کی جانچ پڑتال کرنا شروع کرتا ہے۔ جستجو اور دریافت کرنا اس کی فطرت ہوتی ہے۔ سائنس ایک ایسا مضمون ہے جس کو سائنس کی کتابوں سے پڑھ کر سیکھا نہیں جاتا، بلکہ تحقیق و تفتیش کرکے سیکھنا ہوتا ہے۔ ہرکس و ناکس، چاہے سائنس کا طالب علم ہو یا نہ ہو برابر اپنی زندگی میں تجربات و تحقیقات سے روزانہ کچھ نہ کچھ سیکھتا رہتا ہے۔ جیسے کسان کو پتہ ہوتا ہے سال میں کن کن مہینوں میں بارش ہوتی ہے۔ بیج کو کب بویا جاتا ہے اور کب فصل کاٹنی ہوتی ہے۔ کونسی کھاد پودوں کیلئے مفید ہوتی ہے۔ کونسے حشرات الارض فصلوں کو برباد کرتے ہیں۔ پرندوں کو فصلیں تباہ کرنے سے کس طرح روکا جا سکتا ہے وغیرہ وغیرہ۔ انسان میں فطری طور پر جستجو اور کھوج ہوتی ہے جو اُسے تحقیق و تفتیش پر اُکساتی رہتی ہے اور وہ اپنے پچھلے تجربات سے سبق بھی سیکھتا رہتا ہے۔ سائنس کے دائرۂ جستجو میں کائنات کی ہر شئے کا علم شامل ہے۔ کائنات میں ہر آنے والا پل ایک نئی تبدیلی لاتا ہے، جسکے اسباب (cause)اور نتائج (effects) ہوتے ہیں۔ لیکن ایسے بھی قدرتی قوانین ہوتے ہیں جو اسبابِ تنوع کے باوجود نہیں بدلتے یعنی تواناء کی بقاء کا اصول ہے (Law of Conservation of Energy) جسمیں توانائی ایک شکل سے دوسری شکل میں تبدیل ہوتی رہتی ہے، جیسے روشنی کا اتنی ہی توانائی کی مقدار میں حرارت میں تبدیل ہونا۔ توانائی کی ہیت بدل سکتی ہے، اُس کے اشکال مختلف ہو سکتے ہیں لیکن اس کی جملہ مقدار ہمیشہ یکساں ہی رہتی ہے۔ درخت سے جب پتّے جھڑ کر مٹی میں مل جاتے ہیں تو کھاد بن کر درخت کو غذا بھی فراہم کرتے ہیں۔ اس طرح نئے پتوں کی شکل میں وہ پھر سے نمودار ہوتے رہتے ہیں۔اسی طرح پانی کا مٹی سے مل کر ہمہ اقسام کے رنگین میوے بنانا پھر ان کا فنا ہونا اور ظہور میں آنے کا سلسلہ جاری رہتا ہے۔ یہ سب فنا اور بقا کا چکر ہے جو رواں دواں ہے۔ انسان کیلئے یہ تمام باتیں غور طلب ہیں۔نظامِ قدرت کے اِن اصولوں کو سمجھنا اور خالق کی طرف رجوع ہونا ہی اصل مقصودِ ربیّ تعالی ہے۔ جبلی اور فطری طور پر غور و خوص، تحقیق و تفتیش، جانچ پڑتال کی صلاحیت اللہ تعالی نے حضرتِ انسان میں ودیعت کر دی ہے۔
اَلَمْ تَرَ اَنَّ اللّٰہَ اَنْزَلَ مِنَ السَّمَآءِ مَآءً فَاَخْرَجْنَا بِہٖ ثَمَرٰتٍ مُّخْتَلِفًا اَلوَانُہَا ط
کیا تم نے نہیں دیکھا کہ اللہ نے آسمان سے پانی برسایا پھر ہم نے اس سے مختلف رنگوں کے میوے اُگائے؟ (سورہ فاطر ۲۷)
میں نے قرآن کی اس آیت کی تشریح مندرجہ ذیل شعر میں کی ہے۔
مٹی سے مل کے پانی کیا رنگ لا رہا ہے
پھل پھول سے مہکتے باغات میں ہے سائنس
ایسے ہی کئی قرآنی آیات سے مسلم سائنسدانوں نے اپنے ماحول میں قدرت کی نشانیوں پر غور و فکر کی، مشاہدے کئے، بے شمار دریافتیں کیں اور کئی ایک ایجادات کے مالک ہوئے۔ انہی سائنسدانوں میں ابن الہیثم (۹۶۵ء۔۱۰۳۹ء) بھی ہیں جن کو یوروپ میں Alhazen کے نام سے جاناجاتا ہے جو بابائے علم البصریات (father of optics) ہیں، جنہوں نے سائنسی طریقے کو ایجاد کیا جس کو ہم طریقہ سائنس (Scientific Method) کے نام سے پہچانتے ہیں۔ الہیثم نے تحقیق کرنے کا باضابطہ ایک اصول بنایا جو مشاہدے سے شروع ہوکر تحقیقی سوال، مفروضہ، تجربے کا انعقاد، نتیجہ، اور آخر میں نتائج پر مبنی اعداد و شمار سے نتیجہ اخذ کرنا ہوتا ہے۔ انجام کار یہ پتہ لگایا جا سکے کہ مفروضہ جو تحقیق سے پہلے کیا گیا تھا وہ صحیح ہے یا غلط۔
جس وقت ابن الہیثم نے سائنسی طریقہ کار کے اصول بنائے تھے اُن کو شاید پتہ بھی نہیں تھا کہ ان کا سائنسی طریقہ کار دنیا میں ایک جدید سائنسی انقلاب پیدا کردے گا اور نِت نئی دریافتیں اور ایجادیں ظہور میں آئیں گی اور یوروپی تعلیمی نصاب میں طلبہ کیلئے ہر جماعت کی سائنسی کتاب میں پہلا سبق اُنکا طریقہ سائنس ہی ہوگا۔ اب تو حال یہ ہے کہ ترقی یافتہ ممالک میں سائنس کو طلبہ خود تحقیق کرکے سیکھتے ہیں جن کو تحقیقی منصوبہ بند اکتساب یا Project-based Learning (PBL) یا مختصراً تحقیقی منصوبہ بندی کہا جاتا ہے۔ بچوں کو اُنکی عمر اور جماعت کے لحاظ سے تحقیقی منصوبے اندرونِ اسکول یا پھر بیرونِ اسکول کرنے کیلئے دیئے جاتے ہیں۔ اس طرح کے تحقیقی منصوبوں سے سائنس کو سیکھنا اسکولس اور کالجس میں سائنسی نصاب کا حصہ ہوگئے ہیں۔
سائنس کی تدریس کا بہترین طریقہ بچوں میں موجود فطری جستجو اور کھوج کی صلاحیتوں کا استعمال کرتے ہوئے اُن میں تحقیقی ذہن سازی کرنا ہے۔ کئی ہندوستانی اساتذہ سائنس کو عموماً پڑھنے اور پڑھانے یا زیادہ سے زیادہ تختہ سیاہ یا ڈیجیٹل بورڈ پر چند اشکال یا فارمولے کی حد تک ہی محدود رکھتے ہیں۔ کچھ اساتذہ دورانِ تدریس آموزشی مواد (Teaching Learning Materials) جیسے ماڈلس یا تشریحی چارٹس یا تصاویر جن کو تدریسی امدادی اشیاء (teaching aids) بھی کہتے ہیں، اُن کا استعمال کرتے ہیں۔ کچھ معلمین طلبہ کو سائنسی تجربات کے ذریعے سائنس کے اصولوں کو سمجھانے کی کوشش کرتے ہیں۔ یہ طلبہ کو کتابوں اور تختہ سیاہ کی دنیا سے نکال کر سائنسی تجربات کی دنیا میں لانے کی کوشش ضرور کرتے ہیں لیکن پھر بھی اُن کی اکتسابی صلاحیت اتنی بہتر نہیں ہوتی جتنی کہ وہ خود اپنی ذہنی کھوج سے کوئی نئی چیز دریافت کرکے سیکھتے ہیں۔ اس بات کی افادیت کو تعلیمی میدان میں تحقیقی و تجزیاتی مطالعے سے ثابت کر دیا گیا ہے۔ طالبِ علم کیلئے موثر حصولِ علم کا یہی ایک واحد طریقہ کار ہے۔ جدید طریقہ تعلیم میں یہ بات تحقیق شدہ اور تصدیق شدہ ہے کہ طلباء کو جب تحقیقی منصوبے (PBL projects) دئے جاتے ہیں تو اُنکی اکتسابی صلاحیت میں کئی گُنا اضافہ ہوتا ہے۔ ہندوستان میں اکثر سائنس کے اساتذہ سے جب طریقہ سائنس کا استعمال کرتے ہوئے بچوں سے تحقیقی منصوبہ جات جس میں سائنس فیر پروجیکٹس بھی شامل ہیں کروانے کیلئے کہا جاتا ہے تو اُن کا بس ایک ہی سوال ہوتا ہے۔ آپ ہی بتائیے یہ تحقیقی خیال (research idea) کہاں سے لائیں؟ سر پلیز آپ ہی کچھ آئیڈیا دے دیدیجئے نا وغیرہ۔ یا نہیں تو انٹرنیٹ پر موجود سائنسی منصوبوں کی نقل کرکے سائنس فیر مقابلوں میں ان کو پیش کردیا جاتا ہے۔ اکثر اس طرح کے سرقہ کئے ہوئے منصوبے بچوں کو رٹوادئیے جاتے ہیں۔ جس کا منصفانِ سائنس فیر (science fair judges) کو پتا ہوتا ہے کہ یہ کہاں سے نقل کئے گئے ہیں۔ میں سمجھتا ہوں یہ ایک دوسرا موضوع ہے، اس پر میں کبھی تفصیل سے لکھوں گا۔
بچوں میں ہمیں تحقیقی ذہن سازی کیلئے اُن میں تخلیقی سوچ کو پروان چڑھانا ہوگا۔ طلبہ کو اچھی طرح سے باور کیا جائے کہ تحقیق ہی سائنس کی بنیاد ہے اور اُن میں یہ بات ذہن نشیں کروانی ہوگی کہ اگر سائنس کو سیکھنا ہوتو ہمیں تحقیق کرنی ہوگی۔ اس کے لئے پہلے اساتذہ کو خود سائنسی سوچ پیدا کرنے کی ضرورت ہے۔ اگر طلبہ محقق یا سائنسداں کا کردار ادا کررہے ہیں تو استاد کو بھی سائنسداں بننا ہوگا تاکہ طلبہ کی صحیح رہنماء ہو سکے۔ سائنسی تعلیم صرف دریافت اور ایجادات پر محدود نہیں ہوتی بلکہ وہ معاشی و اقتصادی مسائل کا حل بھی ڈھونڈھ نکالتی ہے۔سائنسی تحقیق انسانی مشکلات و مسائل کو دور کرنے کا ذریعہ ہوتی ہیں۔ جس طرح آئے دن انسان نئے نئے آفات، مشکلات، اور مسائل سے دوچار ہوتا ہے، اس کے ازالے کے لئے ہماری آنے والی نسلوں میں تحقیقاتی سائنس نہایت اہم کردار ادا کرتی ہے۔
تحقیقی سوچ کیلئے ہمیں روزمرہ کے مسائل پر گہری نظر رکھنی ہوگی۔ سائنس میں سب سے مقدم اور ضروری عمل مشاہدے کا ہے۔ سائنس کی بنیاد مشاہدے سے شروع ہوتی ہے اور مشاہدہ انسان کو جستجو اور کھوج کی طرف راغب کرتا ہے نتیجتاً یہی کھوج ایک نئی دریافت اور ایجاد کا باعث ہوتی ہے۔ ویسے ہم روزانہ اپنی زندگی میں مشاہدہ تو کرتے ہیں لیکن اس کی طرف زیادہ متوجہ نہیں دیتے، چاہے وہ اسکول کے کمرہ جماعت میں ہوں یا اُس سے باہر۔ چلتے پھرتے، اُٹھتے بیٹھتے، پڑھتے پڑھاتے، سیکھتے سیکھاتے ہم بہت کچھ جان کر نئے نئے سائنسی تحقیقی منصوبوں (research projects) کی شروعات کرسکتے ہیں۔ بس کچھ غور وفکر کی ضرورت ہوتی ہے۔ ہم طلبہ کو سائنسی نصاب میں درج سائنسی تجربات کرکے بتاتے تو ہیں یا اُن سے کرواتے بھی ہیں۔ لیکن اگر ہم ان تجربات پر غور فکر کریں تو ان سے بھی ہم کئی نئے تحقیقی منصوبوں (PBL projects) کی شروعات کر سکتے ہیں۔ میں یہاں چند مثالیں سائنس کی معروف اور انعام یافتہ معلمہ انجم نوید یا انجم یوسف صاحبہ کے سائنسی تجربات سے اخذ کرنا چاہوں گا۔ اِن کے کئے ہوئے سائنسی تجربات کا سہارا لیتے ہوئے میں بتاؤں گا کہ کس طرح ان سائنسی تجربات کو وسعت دے کر تحقیقی وتخلیقی سائنسی منصوبوں میں تبدیل کیا جاسکتا ہے تاکہ بچوں میں جِدّت پسندی اور ذہنی اختراع سے تحقیقی سوچ پیدا ہو۔ مثلاً

انعطاف و انعکاس والے تجربات کو بنیاد بناتے ہوئے بچے فوٹو سنسر (photo sensor) کا استعمال کرتے ہوئے عدسوں سے نکلنے والی شعاؤں کے انتشار یا ارتکاز کی پیمائش کرتے ہوئے قدرتی اور مصنوعی روشنی کے تعلق سے عملِ انعکاس اور انعطاف پرمختلف نوعیت کے تخلیقی و تحقیقی تجربات سے نِت نئی دریافتیں کر سکتے ہیں۔ محدب اور مقعر کروی اور متوازی عدسوں اور آئینوں کو لے کر شعاعِ واقع اور مختلف زاویوں پر شعاعِ انعکاس کی پیمائش کرتے ہوئے کئی ایک تحقیقی تجربات ممکن ہیں اور روز مرہ کی زندگی میں ان کا استعمال کیسے فائدہ مند ثابت ہوسکتا ہے۔
ایک اور تجربہ ہے جس میں بتایا گیا ہے جب برقی رو دھات کے تاروں سے ہو کر گذرتی ہے تو حرارت پیدا کرتی ہے، اس کو بھی تحقیقی منصوبے (PBL) میں تبدیل کیا جا سکتا ہے۔

تار کو پانی بھرے منقارے (beaker) میں رکھ کر حرارت پیما (thermometer) سے حرارت کی پیمائش مختلف دورانیے یا اوقات میں کی جا سکتی ہے۔ مگر یہ تجربے زیادہ طاقتور برقی رو (high voltage) پر نہ کئے جائیں کیونکہ اگر غلطی سے پانی کو چھُو لیا جائے تو بجلی کا جھٹکا (Electric Shock) لگ سکتا ہے جو خطرناک بھی ہو سکتا ہے۔ اس طرح کے منصوبوں سے بہت سارے معلومات حاصل کئے جا سکتے ہیں۔ پیچ دار تار کے اعداد اور حرارت کی مقدار کا تخمینہ لگایا جا سکتا ہے۔ مختلف دھات کے تاروں میں حرارت کا تعین وغیرہ یا برقی توانائی اور حرارت مختلف اوقات میں کس طرح اثر انداز ہوتی ہے۔
اسی طرح ایک اور تحقیقی تجربہ”پودے میں افزودہ پانی کا اخراج“پر بھی کیا جا سکتا ہے۔

اس میں پتّے کو مکمل طور پر ڈھانکنے کے لئے پلاسٹک کی تھیلی استعمال ہوئی ہے اس کا استعمال کرتے ہوئے ہم سائنسی تحقیق کر سکتے ہیں۔ مفروضہ ہوگا”پتے پانی کی رطوبت خارج کرتے ہیں“۔ ہم پلاسٹک کی تھیلی کا وزن کرکے وقفے وقفے سے رطوبت کے اخراج کا صحیح تخمینہ کر سکتے ہیں یا پھر رطوبت سنسر (moisture sensor) کا استعمال کرتے ہوئے بہت سارے تحقیقی منصوبے بنائے جاسکتے ہیں۔ کیا مختلف پودوں کے پتوں میں رطوبت کا اخراج یکساں ہوتا ہے۔ پتوں کے مختلف اقسام جیسے مغز دار موٹے پتے یا پتلے اور باریک پتے، جیسے کیکر کے جھاڑ کے پتے۔ اور یہ بھی پتہ لگایا جا سکتا ہے کہ پتے شدت کی گرمی میں اپنی رطوبت کے اخراج کو کیسے قابو میں رکھتے ہیں۔ جہاں پیڑ پودے ہوں وہاں فضاء رطوبت کے حساس آلے (humidity sensor) سے پتہ چلایا جاسکتا ہے کہ پودے کس طرح رطوبت کے اخراج سے فضاء اور زمینی درجہ حرارت کو کم کرنے میں مدد دیتے ہیں۔ اس تجربے میں درجہ حرارت اور رطوبت کی مقدار دن کے مختلف اوقات میں معلوم کی جا سکتی ہے۔ کونسے پودے یا درخت سایہ دار اور ٹھنڈک زیادہ پہنچانے والے ہوتے ہیں۔ کس طرح پودے کرہ ارض کی حرارت کو کم کرنے مدد دیتے ہیں۔ ایک تحقیقی منصوبے سے کئی اور تحقیقی منصوبے ذہن میں آتے ہیں۔ ان تمام تحقیقی منصوبوں میں مقداری تحقیق یعنی اعداد و شمار کو لے کرنا چاہئے، جس سے باقاعدہ رطوبت کی صحیح پیمائش ہوسکے۔ سائنس میں بنیادی اہم جز درست، صحیح اور عین مطابق پیمائش (precise measurement) کا ہے۔ سائنس اور ریاضی کا چولی دامن کا ساتھ ہوتا ہے۔ سائنس کا طالبِ علم سائنس کے ساتھ ساتھ علمِ ریاضی کے اُصول بھی مُرتب کرتا ہے اور مجھے یقین ہے ایسے تحقیقی تجربات کو طلبہ بہت ہی انہماک، ذوق و شوق سے کریں گے۔ جب وہ خود اپنے ہاتھوں سے تحقیق کریں گے تو اس طرح کے کئی نصابی تجربات کو تحقیقی منصوبوں (PBL) میں تبدیل کرنے سے بہت کچھ نئے سائنسی حقائق اور نئے سائنسی اصولوں کوسیکھنے و سمجھنے میں اُنہیں کامیابی حاصل ہوگی۔ یہی سب کچھ تو سائنسی میلوں (science fairs) کے تحقیقی منصوبوں (research projects) میں بھی ہوتا ہے۔ تحقیقی منصوبوں (PBL) کا اصل فائدہ یہ ہے کہ بچے خود کرکے سیکھتے ہیں جس کی وجہ سے وہ سیکھا ہوا علم بھول نہیں پاتے بلکہ اور بھی اُن میں تحقیقی اور تخلیقی ذہن سازی ہوتی رہتی ہے جو بچوں کو موجد اور محقق بناتی ہے۔بہرِ حال اصل میں سائنس تحقیق، تفتیش، اور تسخیر کا نام ہے۔ لفظ ’تحقیق‘ حق سے بنا ہے یعنی ایسا عمل جو کسی چیز کے حق یا حقیقت کو جاننے کے لئے کیا جائے۔ اللہ تعالی فرماتا ہے۔
سَنُرِیہِمْ آیَاتِنَا فِی الْآفَاقِ وَفِی أَنفُسِہِمْ حَتَّیٰ یَتَبَیَّنَ لَہُمْ أَنَّہُ الْحَقُّ
بہت جلد ہم انھیں اپنی نشانیاں آفاق میں بھی اور خودان کی ذات میں بھی دکھائیں گے حتی کہ ان کے لیے حق واضح ہو جائے گا۔ (سورہ فصلت ۵۳)
سائنس کا تعلق حکمت سے ہے اور حکمت کہتے ہاں حق کو پہچاننا۔ یہ علم صرف اور صرف نظامِ قدرت پر غور وفکر اور تحقیقی تجربات سے ہی حاصل ہو سکتا ہے۔ ہمیں پرانی سائنس کی طرزِ تعلیم کو خیرآباد کہنا ہوگا۔ بچوں میں خود سے کرکے سیکھنے والی عملی و تحقیقی صلاحیتوں کو اُجاگر کرنا ہوگا۔ انکی دلچسپی، ذوق و شوق کا خیال رکھنا ہوگا تاکہ ان میں اندرونی محرکہ (internal motivation) پیدا ہو۔
یہ کہنا بالکل غلط ہے کہ سائنسی ماہرین کو لسانی ادب سے کوئی دلچسپی نہیں ہوتی۔ طلبہ اپنے طالبِ علمی دور میں تحقیقی منصوبے کرتے ہیں اور نتائج کو روزنامچے (logbook) میں لکھنے کی عادت ڈالتے ہیں۔ اس سے اُن کی فن تحریر میں دن بدن اضافہ ہوتا ہے۔ سائنس کے طالبِ علم بہترین قلمکار، ادیب و سخنور بھی ہوتے ہیں، کیونکہ ان میں جدت پسندی، تخلیقی و اختراعی صلاحیتیں اور تحقیقی ذہن بھی ہوتا ہے۔ مشاہدہ، سوچ وچار کرنا، جانچ پڑتال کرنا، سائنسی روایات اور اصولوں کو پرکھنا ان کی فطرت میں ہوتا ہے۔ ان کے لئے لسانی قابلیت صرف مراسلت اور مواصلت کے حد تک نہیں ہوتی بلکہ وہ لسانی ادب کا بھی بغور مطالعہ کرتے ہیں۔ ان کا بھی ایک حساس دل اور جذباتی دماغ ہوتا ہے۔ سائنس اُن کو نہ صرف مشاہدے اور مطالعے کی ترغیب دیتی ہے بلکہ انکی تحریروں اور شعری اصناف میں جہاں مشاہدے اور احساسات کی گہرائیاں بھی ہوتی ہیں تو افکار کی بلندیاں بھی نظر آتی ہیں۔ سائنس ٹیچر صرف سائنس کی تدریس کی حد تک نہیں ہوتا وہ زبان دانی پر بھی عبور رکھتا ہے۔ وہ دبستانِ علم ہے۔ تحریر و تقریر ایک فن ہے اس کو سیکھنے اور سیکھانے کی ضرورت ہوتی ہے۔ سائنس کا معلم صحت زبان پر کڑی نظر رکھتا ہے۔ وہ بچوں کے سائنسی مقالوں میں ہجّے، املے اور تلفظ کے اغلاط کو سُدھارتا ہے۔ جملے کی ساخت، الفاظ کا جملوں میں ربط، ترتیب و تسلسل کو درست کرتا ہے۔ اوقاف (punctuations) کا صحیح استعمال، قواعد کی غلطیوں کی تصحیح کے علاوہ سائنسی اصطلاحات کا صحیح استعمال بھی سکھاتا ہے۔ سائنس کا استاد طلبہ میں فنِ خطابت کا جذبہ بھی اُبھارتا ہے۔ جب گفتگو ہو تو صاف صاف کُھلے الفاظ میں بیاں ہو تاکہ سننے والا بات اچھی طرح سمجھ سکے۔ الفاظ اور جملوں پر مکمل عبور ہو۔ الفاظ کے ہیر پھیر اور جملوں کے ردو بدل سے بات کرنی ہو تو مفہوم پر اسکا کوئی اثر نہ پڑے۔ بہرِ صورت سائنس کا معلم یا معلمہ ایک بحرالعلوم شخصیت ہوتی ہے جو طالبِ علم کو ہمہ جہتی علوم کے گُر سکھاتی ہے۔
طلبہ کو چاہئیے جیسے جیسے یہ تحقیقی منصوبے مکمل ہوتے جائیں اُنکے سائنسی مقالے اور پوسٹرس بنا کر عوام کو اپنی تحقیق سے آگاہ کریں۔ اگر ماحولیاتی سائنس میں تحقیقی منصوبے ہیں تو وہ اُنکے تحقیقی نتائج سے لوگوں میں آگہی مہم کا آغاز کریں۔ اس کے علاوتحقیقی مقابلوں میں حصہ لیں جیسے مقامی اور قومی سائنس فیرس، آئرِس (IRIS) اور بین الاقوامی سائنس فیرس (ISEF) کے مقابلوں میں حصہ لیں اور انعامات و اکرامات سے نوازے جائیں۔ ہمارے طلبہ موجودہ دنیاوی مسائل کو حل کرنے والے بنیں اور عوام میں اس بات کا احساس دلائیں کہ اگر سائنس میں تحقیق نہ ہو تو وہ سائنس نہیں ہوگی بلکہ صرف خیالی فلسفہ یا منطق ہو کر رہ جائیگی۔ آج کے بچے کل کے شہری ہوتے ہیں۔ سائنس کے اساتذہ معاشرے میں مستند سائنس کے علم بردار ہیں اور سماج میں جعلی سائنس (pseudo science) اور مستند سائنس (authentic science)کے فرق کو سمجھانے والے ہوتے ہیں۔ بحیثیت سائنس ٹیچر یہ ہمارا فرضِ عین ہے کہ ہم مستقبل کے سائنسداں پیدا کریں تاکہ پھر سے الہیثم، ابنِ سینا اور سر سی وی رمن پیدا ہوسکیں۔ صرف تجرباتی سائنس ہمارے آنے والے کل کیلئے ناکافی ہے۔ ورنہ ہم اس عالمی مسابقتی دوڑ میں بہت پیچھے رہ جائینگے۔ ان حالات میں سائنسی علوم کو فروغ دینا وقت کی سب سے اہم ضرورت ہے۔ روایتی سائنسی تدریس میں پہلے سائنسی نظریہ یا اصول پڑھایا جاتا ہے اور تجربات بعد میں (Theory first practical later) کروائے جاتے ہیں۔ جدید تحقیق نے اس طرح کی طریقہ تدریس کو غیر موثر ثابت کردیا ہے۔ اکیسویں صدی میں طلبہ تحقیقی منصوبوں سے خود سائنس کرکے سیکھتے ہیں۔ اس میں اُنہیں دلی لگاؤ اور دلچسپی ہوتی ہے۔ جستجو اور کھوج اُن کو اکتسابی صلاحیت کے اُس درجے پر پہنچا دیتی ہے جہاں اُنکی تخلیقی ذہن سازی شروع ہوتی ہے۔ طلبہ منظم سائنسی طریقہ کار اور مطا لعے کے تحت کسی بھی علم کو جا ننے اور پھر نتائج اخذ کرنے کا ہنر سیکھ جاتے ہیں۔ کئی مفروضات اور نظریات کا حل نکالنے والے ہوتے ہیں۔ وہ اپنے مشاہدات اور تحقیق سے صحیح سائنسی پیشنگویاں (scientific predictions)کرنے کے قابل بن جاتے ہیں۔ درس و تدریس اکیسویں صدی میں نئے تحقیقی انقلاب سے دو چار ہے۔ سائنس کی درس و تدریس صرف تحقیقی منصوبہ بندی سے ہی ہو سکتی ہے۔ اب ہمیں تحقیقی منصوبہ بندی سے سائنسی علم کو طلباء میں عام کرنا ہے۔ اس طرح کے طریقہ تعلیم میں بچے اپنی انفرادی صلاحیت اور فطری قابلیت کے مطابق معلم کے تعاون سے علومِ سائنس کو تحقیق کرکے سیکھتے ہیں۔ جہاں تک اساتذہ کا تعلق ہے وہ بحیثیت معاون کار طلبہ کی مدد کرتے ہیں جن کا صرف کام تختہ سیاہ یا ڈیجیٹل بورڈ کے سامنے ٹھہر کر درس دینا نہیں ہے۔ جدید تعلیمی تحقیق نے یہ بات واضح کردی ہے کہ معلم مرکوز (Teacher Centered Education) روایتی تعلیم غیر موثر ہے۔ طلبہ اس طرح کی تدریس میں زیادہ دلچسپی نہیں لیتے۔ اس کے برخلاف تحقیقی منصوبوں سے سیکھنے والے طلباء اپنی جستجو سے تحقیقی سرگرمی جو فعال اور متعلم مرکوز (Student Centered Education) ہوتی ہے خوب دلچسپی لے کر اپنے تحقیقی منصوبوں کو پائے تکمیل تک پہنچاتے ہیں۔ بچے خود کرکے سیکھنے کا عمل پائیدار، موثر اور اُن کے لئے مفید ہوتا ہے۔ وہ سائنسداں اور محقق کی طرح کام کرتے ہیں۔ اس طرح سے تحقیق کرکے سیکھے ہوئے علم سے طلبہ اپنی زندگی میں آنے والے مختلف مراحل اور مسائل کا حل تلاش کرنے میں کامیاب ہوتے ہیں۔ نیا طریقہ تعلیم جو تحقیق اور ثبوت کی بنیاد پر ہوتا ہے، تعلیمی پالیسی کا حصہ ہونا چاہئے، روایتی سائنسی تعلیم کو خیرآباد کہنا ہوگا اور جدید سائنسی طریقہ تعلیم جو تحقیقی منصوبوں پر مشتمل ہے۔ تعلیمی اداروں (اسکولس، کالجس اور یونیورسٹیز) میں لاگو کرنے کی اشد ضرورت ہے۔
وَمَا تَوْفِیقِی إِلَّا بِاللَّہِ ۔

نیویارک:پیغام رسانی کے لیے استعمال ہونے والی سب سے مقبول ایپلی کیشن واٹس ایپ نے اسٹیٹس اپڈیٹ کے طور پر ایک نیا فیچر ’انڈو‘ متعارف کروادیا۔واٹس ایپ کا یہ نیا فیچر انڈو گوگل پلے بیٹا پروگرام کے ذریعے پیش کیا گیا، فیچر انڈو کے ذریعے واٹس ایپ کے کسی بھی صارف کے لیے اسٹیٹس کو ڈیلیٹ کرنا مزید آسان ہوجائے گا۔فی الحال یہ فیچر بیٹا ورڑن کے لیے پیش کیا گیا ہے، جلد یہ فیچر مزید کئی فیچر بھی واٹس ایپ کی جانب سے جلد متعارف کروائے جائیں گے۔اس سے قبل واٹس ایپ صارفین اسٹیٹس ڈیلیٹ کے آپشن کے ذریعے لگایا گیا اسٹیٹس ڈیلیٹ کرسکتے ہیں لیکن اب اس نئے فیچر سے اسٹیٹس کو ڈیلیٹ کرنا مزید آسان ہوجائے گا۔واٹس ایپ اسٹیٹس انڈو اور ڈیلیٹ کرنے پر صارفین کو اب ڈیلیشن پروسیس سے گزرنا ہوگا بعدازاں اپ ڈیٹ مکمل ہونے پر واٹس ایپ کی جانب سے صارف کو اطلاع دی جائے گی۔گزشتہ دنوں واٹس ایپ نے کالنگ تجربے کو بہتر بنانے کے لیے نئے طریقے کا اعلان کیا تھا۔واٹس ایپ کی جانب سے شیئر کی گئی ویڈیو میں دیکھا جاسکتا ہے کہ کوئی بھی گروپ ممبر اس نئے طریقے کے ذریعے کسی بھی گروپ پر ہونے والی کال کو اب خود سے کسی بھی وقت جوائن کرسکتا ہے۔ویڈیو میں دیکھا جاسکتا ہے کہ اگر کوئی صارف گروپ کال میں شامل ہونا چاہتا ہے یا چھوڑنا چاہتا ہے تو اپنی گروپ چیٹس سے با آسانی سے ایسا کر سکتا ہے۔

مجھے اس بارے میں شک ہے کہ مارک زکربرگ وہ تبصرے پڑھتے ہوں گے جو لوگ ان کی پوسٹس پر کرتے ہیں تاہم اگر وہ ایسا کرتے ہیں تو ان کو گذشتہ ہفتے فیس بک اور دیگر سروسز میں تعطل کے بعد اپنے معذرتی پیغام کے نیچے آئے تبصروں کو پڑھنے کے لیے بغیر سوئے تقریباً 145 دن درکار ہوں گے۔ فیس بک کے بانی اور چیف ایگزیکٹو نے فیس بک، واٹس ایپ، انسٹا گرام کی چھ گھنٹے تک کی بندش کے بعد لکھا: ’آج کے خلل کے لیے معذرت۔۔۔‘۔ فیس بک نے معمول کے دیکھ بھال کے کام کو اس خلل کا ذمہ دار ٹھہرایا اور کہا کہ فیس بک کے انجینئیرز نے ایک کمانڈ جاری کی جس کی وجہ غیر ارادی طور پر فیس بک ڈیٹا سینٹرز کا انٹرنیٹ سے رابطہ منقطع ہوگیا۔
زکربرگ کی اس معافی پر تقریباً 82 لاکھ 27 ہزار افراد نے انھیں جواب دیا۔
ان پیغامات میں کچھ ایسے کمینٹس تھے: ’یہ بہت برا تھا، مجھے اپنے گھر والوں سے بات کرنا تھی، میں سمجھا کہ میرا فون خراب ہو گیا ہے اور میں اسے مرمت کے لیے لے گیا۔‘ کچھ لوگوں نے غصے اور ناراضگی کا اظہار بھی کیا: ’آپ ہر چیز کو ایک ہی وقت میں بند نہیں کر سکتے‘، جبکہ کچھ صارفین نے اس بندش کی وجہ سے اپنے کاروبار کو پہنچنے والے نقصان پر زکربرگ سے معاوضے کا مطالبہ بھی کیا۔
اس سے ایک بات جو واضح ہوئی ہے وہ یہ ہے کہ اربوں لوگ ان سروسز پر کتنا انحصار کرتے ہیں اور ایسا صرف تفریح کے لیے نہیں بلکہ ضروری مواصلات اور تجارت کے لیے بھی ہے۔ ایک اور بات جو واضح ہوئی، وہ یہ کہ یہ کوئی ایک بار ہونے والا واقعہ نہیں کیونکہ ماہرین کا خیال ہے کہ وسیع پیمانے پر ایسی بندشیں اب زیادہ کثرت سے ہونے لگی ہیں۔ ویب سائٹ ’ڈاؤن ڈیٹیکٹر‘ کے چیف ٹیکنیکل آفیسر لیوک ڈیریکس کہتے ہیں کہ ’گذشتہ کئی برسوں میں جو چیز ہم نے دیکھی ہے وہ یہ کہ انٹرنیٹ مواد کے بڑے حصے کی فراہمی کے لیے تھوڑی تعداد میں نیٹ ورکس اور کمپنیوں پر بہت زیادہ انحصار کیا جا رہا ہے۔‘
وہ کہتے ہیں کہ ’جب ان میں سے ایک یا ایک سے زیادہ سروسز کو کوئی مسئلہ درپیش آتا ہے تو یہ نہ صرف ان کو متاثر کرتا ہے بلکہ سینکڑوں دیگر سروسز کو بھی متاثر کرتا ہے۔‘ مثال کے طور پر فیس بک اب کئی مختلف سروسز اور ڈیوائسز جیسے سمارٹ ٹی وی میں سائن ان کرنے کے لیے بھی استعمال ہوتا ہے۔ لیوک ڈیریکس کہتے ہیں کہ ’اور اسی طرح آپ جانتے ہیں کہ ایسے دن ہوتے ہیں کہ ایک چیز بند ہوتی ہے تو ہم سب ایک دوسرے کی طرف دیکھتے ہیں کہ ’تو اچھا اب ہم کیا کریں گے۔‘ لیوک ڈیریکس اور ’ڈاؤن ڈیٹیکٹر‘ میں ان کی ٹیم ویب سروسز اور ویب سائٹس پر مختلف مسائل کی نگرانی کرتی ہے۔ ان کا کہنا ہے کہ اہم سروسز میں بڑے پیمانے پر خلل آنا اب زیادہ متواتر اور سنگین ہوتا جا رہا ہے۔ ’جب فیس بک کو کوئی مسئلہ ہوتا ہے تو اس کا اثر نہ صرف انٹرنیٹ پر بلکہ معیشت بھی متاثر ہوتی ہے اور جیسا کہ آپ جانتے ہیں۔۔۔ معاشرہ پر بھی۔ لاکھوں لوگ کیلیفورنیا میں ایک چھوٹی سی ٹیم کے انتظار میں بیٹھے رہتے ہیں کہ وہ کچھ ٹھیک کر دے۔ یہ ایک دلچسپ پہلو ہے جو گذشتہ دو برسوں میں بڑھا ہے۔‘
کسی بھی مرحلے پر ان سروسز کی بڑی بندش کے دوران لوگ لازمی طور پر پریشان ہوتے ہیں کہ یہ خلل کسی سائبر حملے کا نتیجہ ہے، لیکن ماہرین تجویز کرتے ہیں کہ یہ اکثر انسانی غلطی کا معاملہ ہوتا ہے اور ان کا کہنا ہے کہ انٹرنیٹ کو پرانے اور پیچیدہ نظام پر چلایا جا رہا ہے۔
فیس بک کی بندش کے دوران ٹوئٹر پر کئی ماہرین یہ مذاق کرتے نظر آئے کہ اس طرح کی خرابی کی وجوہات ہمیشہ ایک جیسی اور وہ نظام ہے جو کہ بہت پرانا ہے اور ’ٹشو پیپر پر ڈیزاین کیا گیا تھا۔‘ انٹرنیٹ سائنسدان پروفیسر بل بوکینن اس سے اتفاق کرتے ہیں ’انٹرنیٹ بڑے پیمانے پر تقسیم شدہ نیٹ ورک نہیں ہے جسے DARPA (ڈیفنس ایڈوانسڈ ریسرچ پروجیکٹ ایجنسی) انٹرنیٹ کے اصل معماروں نے بنانے کی کوشش کی تھی اور جو ایٹمی حملے کو بھی برداشت کر سکتا ہے۔‘
’یہ جو پروٹوکول استعمال کرتا ہے وہ بنیادی طور پر صرف وہی ہے جو عام ٹرمینلز کا مین فریم کمپیوٹرز سے رابطہ قائم کرنے کے لیے بنایا گیا تھا۔ اس کے بنیادی انفراسٹرکچر میں ایک خرابی پورے نظام کو روک سکتی ہے۔‘
پروفیسر بوکینن کا کہنا ہے کہ انٹرنیٹ کو مزید لچکدار بنانے کے لیے بہتری لائی جا سکتی ہے، لیکن نیٹ کے بہت سے بنیادی اصول یہاں بہتر یا بدتر ہی رہیں گے۔ ’عمومی طور پر، سسٹم کام کرتے ہیں اور آپ انٹرنیٹ کے کچھ پروٹوکولز کو دوبارہ بنانے کی کوشش میں ایک دن کے لیے ‘آف’ نہیں کر سکتے۔‘ انٹرنیٹ کے نظاموں اور ڈھانچے کو دوبارہ تعمیر کرنے کی کوشش کرنے کے بجائے، پروفیسر بوکانن کا خیال ہے کہ ہمیں ڈیٹا کو ذخیرہ کرنے اور اسے شیئر کرنے کے طریقے کو بہتر بنانے کی ضرورت ہے، بصورت دیگر مستقبل میں بڑے پیمانے پر بندش کے خطرے کے لیے تیار رہیں۔
وہ کہتے ہیں کہ انٹرنیٹ ایک مرکز بن گیا ہے جہاں ایک ہی ذریعے سے بہت زیادہ ڈیٹا آتا ہے۔ انھوں نے وضاحت کی کہ اس رجحان کو ایسے نظاموں کے ساتھ تبدیل کرنے کی ضرورت ہے جس میں متعدد ایسے پوئنٹ ہوں تاکہ کوئی بھی ناکامی اس سروس کو چلنے سے روک نہ سکے۔ یہاں ایک امید بھی ہے۔ اگرچہ انٹرنیٹ کی بڑی بندش صارفین کی زندگیوں اور کاروباری اداروں کو متاثر کرتی ہے لیکن اس سے بالآخر انٹرنیٹ کی ابھرنے کی قوت اور ویب سروسرز کو بہتر بنانے میں مدد ملے گی۔ مثال کے طور پر، فوربز کا اندازہ ہے کہ چھ گھنٹے کی بندش کے دوران فیس بک کو سائٹ پر اشتہاروں کی معطلی کے باعث چھ کروڑ 60 لاکھ ڈالر کا نقصان ہوا۔ اس قسم کے نقصان کے بعد ممکن ہے کہ اب سینئر ایگزیکٹوز ایسا دوبارہ ہونے سے روکنے پر توجہ دیں۔ ڈیریکس کے مطابق ’انھوں نے اس دن بہت زیادہ رقم گنواں دی، نہ صرف ان کے سٹاک کی قیمت میں بلکہ ان کی آپریشنل آمدنی کی مد میں بھی۔ اور اگر آپ فاسٹلی اور کلاؤڈ فلیئر جیسے مواد کی ترسیل کے نیٹ ورکس کو دیکھیں تو انھوں نے بہت بڑی تعداد میں گاہکوں کو بھی کھو دیا۔ لہذا، مجھے لگتا ہے کہ یہ آپریٹرز چیزوں کو آن لائن رکھنے کے لیے ہر ممکن کوشش کر رہے ہیں۔‘
(بشکریہ بی بی سی اردو)

نیویارک :عالمی سطح پر جاری ’چپ‘ کی کمی کا بحران شدت اختیار کرتا دکھائی دے رہا ہے اور اب دنیا کی معروف ٹیکنالوجی کمپنی ایپل کی پیداوار بھی اس سے متاثر ہونے کا خطرہ ہے۔ خبر رساں ادارے رائٹرز نے بلوم برگ نیوز کا حوالہ دیتے ہوئے رپورٹ کیا کہ چپ کی عالمی سطح پر کمی کی وجہ سے ایپل کمپنی کو اپنے آئی فون کی پیداوار ممکنہ طور پر ایک کروڑ یونٹ کم کرنا پڑے گی۔بلوم برگ نے اس معاملے سے جڑے افراد کا حوالہ دیتے ہوئے رپورٹ کیا کہ ایپل کو توقع تھی کہ وہ رواں سال کے آخر تک نئے آئی فون کے 9 کروڑ یونٹس تیار کرے گی۔ لیکن اب بظاہر اس کمی کے بعد ایپل کی پیداوار آٹھ کروڑ ڈالر کے لگ بھگ رہنے کی توقع ہے۔واضح رہے کہ دنیا بھر میں جاری چپ بحران نے آٹو موبائلز سے الیکٹرونکس تک سب صنعتوں پر دباؤ میں اضافہ کیا ہے اور کئی مشہور کارساز کمپنیوں نے اپنی پیداوار کو عارضی طور پر معطل بھی کیا ہے۔ البتہ بڑے پیمانے پر قوتِ خرید اور چپ بیچنے والوں سے فراہمی کے طویل مدتی معاہدوں کی وجہ سے ایپل کئی دیگر کمپنیوں کے مقابلے میں اپنی سپلائی کی کمی سے بہتر انداز میں نمٹ رہا ہے۔تاہم رپورٹ کے مطابق ایپل نے اپنے مینوفکچررز کو کہا ہے کہ اس کے یونٹس کی تعداد کم ہوگی کیوں کہ چپ فراہم کرنے والی کمپنیوں بشمول براڈکام اور ٹیکساس انسٹرومنٹس اپنے سامان کی فراہمی کے لیے جدوجہد کر رہی ہیں۔دوسری جانب رائٹرز کے مطابق ایپل نے اس معاملے پر ردِعمل دینے سے انکار کیا ہے جب کہ براڈکام اور ٹیکساس انسٹرومنٹس نے بھی فوری طور پر کوئی تبصرہ نہیں کیا۔نئے آئی فون کی پروڈکشن میں ممکنہ کمی کی رپورٹ کے بعد ایپل کے حصص میں ایک اعشاریہ دو فی صد گراوٹ دیکھی گئی جب کہ ٹیکساس انسٹرومنٹ اور براڈ کام کے حصص بھی لگ بھگ ایک فی صد کم ہوئے۔واضح رہے کہ جولائی میں ایپل نے سست رفتاری سے آمدنی میں اضافے کی پیش گوئی کی تھی اور کہا تھا کہ چپ کی کمی جس نے میک اور آئی پیڈز کی فروخت کی صلاحیت کو متاثر کرنا شروع کردیا ہے، وہ آئی فون کی پروڈکشن کو بھی متأثر کرے گی۔

ڈاکٹر علی احمد ادریسی
شعبہ اردو، دہلی یونیورسٹی
فرانس کے عالمی شہرت یافتہ ماہرحنینیات (Embrylogist) و امراض قلب پروفیسر مورس بوکائیے (Morris Buccaille) کے مطابق قرآن کا ایک لفظ بھی سائنس اور عقل سے متصادم نہیں ہے اور قرآن میں جو سائنسی باتیں تحریر ہیں سائنس بھی ان کی پوری طرح تائید کرتی ہے نیز سائنس کے جدید ترین تحقیقات پر پورا اترتی ہے۔ موصوف نے یہ بیان اپنی مشہور زمانہ کتاب La Bible le Cornet La Science میں کی ہے جو فرانسیسی زبان میں لکھی گئی ہے بعد میں اس کتاب کا ترجمہ انگریزی ، اردو اور دیگر زبانوں میں ’’بائبل، قرآن اور سائنس ‘‘ کے نام سے کیا گیا ہے۔ قرآن پر تحقیق ،تفسیر، تشریح، تسہیل اور تفہیم کا کام صدیوں سے ہوتا آیا ہے اور بلاشبہ محققین ، مفسرین نے جس عرق ریزی کا مظاہرہ کیا اس کے نتیجہ میں بہترین دینی ادب منصب شہود پر آیا ان کی یہ خدمات صدیوں پر محیط ہے۔ سقوط غرنا طہ(Grenada) کے بعد مسلمانوں کا زوال شروع ہوا اور یہ سلسہ خلافت عثمانیہ کے زوال پر اپنے نقطۂ عروج کو پہنچا۔ جس زمانہ میں ہمارے محققین دانشور، فلاسفر قرطبہ (Cordoba) ، غرناطہ اور تولیڈو (Toledo) کی یونیورسٹیوں میں بیٹھ کر تحقیق کررہے تھے اس زمانہ میں یورپ اپنے عہد تاریک (Dark ages, 500-1000 CE) سے نکل کر دورتو ثیق (Reaffirmation) اور اس کے بعد نشاۃ ثانیہ (Renaissance) کی جانب بڑھ رہا تھا۔ یورپ کا عہد زریں جسے ہم روشن خیالی (Enlightenment) سے تعبیر کرسکتے ہیں‘ اسپین میں مسلمانوں کے زوال کے بعد شروع ہوا۔بعض حکما کے نزدیک یورپ میں روشن خیالی کا آغاز آرنلڈ جے ٹوائن بی Arnold J. Toynbee) )نے کیا جبکہ یہ درست نہیں ہے۔ دراصل یورپ میں روشن خیالی کا تصور ہم نے دیا ہے یہ ہمارافکر تھا جو غرناطہ، قرطبہ اور تولیڈو کی یونیورسٹیوں سے نکل کر پورے یورپ میں پھیلا جس کے سبب وہاں روشن خیالی آئی۔ بہرحال دوران نشاۃ ثانیہ ہی سے یورپ نے اپنی زندگی کے دھارے سائنس کی جانب موڑ دئے تھے جہاں سائنسی علوم کے ساتھ ہر شعبہ زندگی میں بیداری کی لہر جاری تھی اورزمانہ گزر نے کے ساتھ ساتھ اس میں شدت آتی گئی۔ نتیجتاً روشن خیالی کے بعد سائنس یورپ کے ہر عہد میں محاورہ قرار پائی اور زندگی کے ہر شعبہ میں سرایت کر گئی اسی لئے اقبال نے جدید مغربی تہذیب کا انر کور (inner core) قرآنی قرار دیا ہے۔ بات بہت گہری ہے جس کا اعادہ کسی ایک مضمون میں ممکن نہیں۔ مختصراً یہ ہے کہ پروفیسر ایم۔ ایم۔ شریف کی شہرہ آفاق تصنیفA History of Muslim Philosophy کی صداقتوں کا اعتراف کرتے ہوئے ہمیں ماننا پڑے گا کہ انسان کے اعمال و افعال اور فکری پختگی کا دور تقریباً پانچ سو قبل مسیح یا اس کے بعد شروع ہوتا ہے ۔ یہی وہ دور ہے جب انسان ہر اعتبار سے جامعیت اور تکمیلیت کے منہاج کو پہنچا اور فلسفہ اور منطق کے ہر بڑے اصول اسی عہد میں وضع کئے گئے۔ اس دور میں توہم پرستی عام تھی لہذا فلسفہ یا منطق میں صرف استخراجی منطق جسے ہم Detective Knowledge کہتے ہیں، کا راز تھا۔ توہمات پرستی کی تاریکیوں سے نوع انسانی کو نکالنے والا قرآن ہے۔ گویا یہ طے شدہ حقیقت ہے کہ قرآن سے قبل دنیا میں استخراجی منطق کے علاوہ کچھ نہ تھا۔ قرآن نے دنیائے عالم کو استقرائی منطق جسے ہم Inductive Knowledge کہتے ہیں سے روشناس کرایا، دیکھو، مشاہدہ کرو، غور کرو پھر نتائج اخذ کرو۔
کھول آنکھ زمیں دیکھ،فلک دیکھ ،فضا دیکھ ۔مشرق سے ابھرتے ہوئے سورج کو ذرا دیکھ
یہی اسقفرائی منطق سائنس کی بنیاد بنا اور سائنس جدید مغربی تہذیب کا انرکور بن گیا۔ اور ہمارا حال یہ ہوا کہ ۔
جن کے ہنگاموں سے تھے آباد ویرانے کبھی
شہر ان کے مٹ گئے آبادیاں بن ہو گئیں
قرآن سائنس کی کتاب نہیں ہے بلکہ یہ نشانیوں کی کتاب ہے۔ جیسا کہ اللہ خود فرماتا ہے کہ ’’ہم انہیں آفاق اور انفس میں اپنی نشانیاں دکھائیں گے۔ قرآن میں چھ ہزار چھ سو چھتیس آیات ہیں جن میں ایک ہزار سے زائدآیات سائنس کے متعلق ہیں۔ جدید سائنس نے جتنے بھی مشاہدات تجربات کئے ہیں سب کے سب سائنس کے میزان پر کھرے اترے ہیں۔ مثلاً فلکیات (Astronomy) ، نباتیات (Botany) ، حیوانیات (Zoology) ، طب (Medicine)، حنینیات(Embryology)، آبیات (Hydrology) طبیعیات (Physics) ، بحریات (Oceanology) ، ارضیات (Geology) ، فعلیات (Physiology) ، ریاضیات (Mathematics) وغیرہ۔ ان سبھی میدانوں میں جو بھی ا نکشافات ہوئے ہیں ان سبھی کی تصدیق قرآن کرتا ہے۔ گذشتہ صدی میں فلکی طبیحیات کے ماہرین نے بگ بینگ تھیوری (Big Bang Theory) وضع کی اور بتایا کہ ابتداء میں یہ ساری کائنات ایک بڑی کمیت کی شکل میں تھی جسے Primary Nebula بھی کہتے ہیں۔ پھر ایک عظیم دھماکا یعنی بگ بینگ ہوا جس کا نتیجہ کہکشانوں کی شکل میں ظاہر ہوا۔ پھر یہ کہکشاں نیں تقسیم ہوکر ستاروں،سیاروں، سورج، چاند وغیرہ کی صورت میں آئیں۔ اس واقعہ کا قرآنی مفہوم یہ ہے کہ’’ کیا لوگوں نے نہیں دیکھا کہ جملہ آسمانی کائنات اور زمین ایک اکائی کی شکل میں جڑے ہوئے تھے پس ہم نے ان کو پھاڑ کر جدا کردیا‘‘۔ اسی طرح ۱۹۲۵ء میں پھیلتی ہوئی کائنات کا تصور امریکی ماہر طبیحیات ایڈون ہبل (Edwin Hubble) نے دیا اور اس امر کا مشاہداتی ثبوت فراہم کیا کہ تمام کہکشائیں ایک دوسرے سے دورہٹ رہی ہیں جس کا مطلب یہ ہوا کہ کائنات پھیل رہی ہے ۔ یہ بات آج مسلمہ سائنسی حقائق میں شامل ہے جس کی تصدیق قرآن کرتا ہے نیز گذشتہ صدی کا عظیم سائنس داں اسٹیفن ہاکنگ (Stephen Hawking) اپنی غیر معمولی شہرت یافتہ کتاب A Brief History of Time میں لکھتے ہیں کہ ’’یہ دریافت کہ کائنات پھیل رہی ہے۔ بیسویں صدی کی عظیم علمی وفکری انقلاب میں سے ایک ہے۔‘‘ اقبال کا مشہور زمانہ شعر بھی ہماری فہم میں ہونا چاہئے:
یہ کائنات ابھی نا تمام ہے شاید
کہ آ رہی ہے دمادم صدائے کن فیا کون
قرآن کی حقانیت او ر اس کی صداقت کی گواہی جدید دور کے بڑے بڑے سائنس داں نوں نے دی ہے۔ مضمون کی طوالت کے سبب یہاں سبھی کا ذکر نہیں کیا جاسکتا محض ایک دو ناموں پر اکتفا کیا جائے گا۔ بحریات کے متعلق قرآن میں جن آیات کا ذکر ہے سائنسی نقطۂ نظر سے ان کی تصدیق ڈاکٹر ولیم ہے (Dr. William Hay) نے کی ہے جو کولوراڈو یونیورسٹی امریکہ کے مشہور ماہر بحریات اور علوم ارضی کے پروفیسر ہیں۔ جینی مراحل (Embryological Stages) کا جو تذکرہ قرآن نے پیش کیا ہے اس کا اعتراف پروفیسر کیتھ مو (Keith Moore) اور پروفیسر مارشل جانسن (Marshal Johnson) نے ان الفاظ میں کی ہے ۔’’جینی نشوو نما کے مرحلے کی جو وضاحت قرآن پاک نے ہمیں دی ہے اس سے بہتر کوئی اور ممکن نہیں۔‘‘
اقبال کا قرآن پاک کی جانب بار بار لوٹنے کا اصرار اور اس میں غوطہ زنی کرنا نیز مستغرق رہنا ان تمام قضیہ کا حل تلاش کردیتا ہے جس کا ذکر ہم سطور بالا میں کرچکے ہیں۔ اقبال کی دانش بہت سے جدید علوم کی جامع تھی۔ اقبال کے زمانہ میں سائنس میں جو نئے نئے تجربات ، مشاہدات وانکشافات رونما ہورہے تھے ان تمام تبدیلیوں سے وہ کماحقہ واقف تھے ان کے ذاتی لائبریری کے مشاہدہ سے یہ حقیقت عیاں ہوجاتی ہے اور خوش گوار حیرت بھی ہوتی ہے کہ اقبال کا جدید سائنسی علوم کا مطالعہ کتنا عمیق اور وسیع تھا۔ یہ کتب و رسائل ہمیں مقام حیرت میں ڈالتے ہیں۔چند سائنس دانوں کے نام جو مطالعہ اقبال میں رہے۔
Cantor, R. Bacon,F.Bacon Eddington, Darawin, Freud, Einstein, Newton,Hobbs, Whitehead, Spencer, Max Planck وغیرہ۔ خطبات اقبال میں کثرت سے پھیلے ہوئے سائنسی تصورات میں چند کا ذکر بھی دلچسپی کا باعث ہے۔ آپ موضوعات پر غور کریں کہ ان میں ایسا کوئی بھی موضوع نہیں جو جدید سائنس کی اساس نہ ٹھہرتا ہو۔ ایٹم، وقت، زماں و مکاں،ارتقاء حیات ، شکل نفسیات(Configuration Psychology)حسی ارتقاء (Emergent avolution) دہر، روشنی،میکانکیت، طبیعیات، نفسی مظاہر (Psyche Phenomena) حرکت کی مقدار (quantum of action) حر کی میکانیات (Dynemic Mechanic) اضافیت و عمل (Relativity and Action) جنسی تمثال وغیرہ۔ ان میں بیشتر موضوعات کا تعلق physics یا theoretical Physics سے ہے۔ اس حقیقت سے اندازہ لگایا جاسکتا ہے کہ اقبال کو طبیعیات سے کس قدر شغف تھا۔ بنیادی طور پر اقبال مابعد الطبیعیات (Metophysis) کے طالب علم ر ہے۔مگر پوری زندگی اس قضیہ کا حل تلاشتے رہے کہ کس طرح مابعد الطبیعیات کے روحانی پہلوؤں کو طبیعیات میں جم کیا جائے یا طبیعیات مابید الطبیعیات میں جم ہوکر ایک اکائی کی شکل اختیار کرلے ان کا ایقان تھا کہ یہ ہم آہنگی ہوکر رہے گی چاہے مستقبل قریب میں نہ ہو کر مستقبل بعید میں ہو اور واقعہ بھی یہ ہے کہ جدید سائنس نے جن فتوحات کے پرچم لہرائے ہیں ان تمام تر انکشافات کو قرآن نے درست قرار دیا ہے۔لہذا اقبال کی یہ prophacy شرمند�ۂ تعبیر ہورہی ہے۔ اقبال سائنسی منہاج اور استقرائی فکر کو کس قدر اہمیت دیتے تھے اور ان کی نظر اپنے دور کے نت نئے سائنسی انکشافات کے حوالے سے کس قدر عمیق تھی اس کی مثال ان کے شعر و ادب سے دی جا سکتی ہے۔ جہاں ہر سو جانب حرکت و عمل کا دفتر کھلا ہوا ہے۔ ’’ستاروں پہ جو ڈالتے ہیں کمند‘‘ کو ہم نے شاعران تعلی سمجھ لیا جبکہ اس سے اقبال کی مراد یہ تھی کہ نوجوان زیادہ سے زیادہ سائنس کی جانب راغب ہوں اعلیٰ تعلیم حاصل کریں ۔ جاوید نامہ جو ان کے روحانی سفر کی داستان ہے جسے ہم ایشیا کی ڈیوائن کمیڈی (Devine Comedy) کہہ سکتے ہیں ،میں جب اقبال فلک مریخ پر پہنچتے ہیں تو وہاں کے مثالی شہر مرغدین کو دیکھ کر ان کی آنکھیں خیرہ ہوجاتی ہیں اسی مثالی شہر میں ان کی ملاقات حکیم مریخی سے ہوتی ہے جنہیں عرف عام میں افلاطون کے نام سے جانا جاتا ہے وہ اقبال کو بتاتے ہیں کہ انہوں نے سائنسی تحقیق و جستجو کے لئے امریکہ، جاپان اور چین کے سفر کئے ہیں اور یہ سفر انہوں نے دھاتوں (Metals)کی تحقیق کے لئے کیا تھا۔ میں زمین کے شب و روز کی خبر رکھتا ہوں میں نے زمین کے بحر و بر کا سفر کیا ہے۔ اقبال نے حکیم مریخی کو ایک روحانی شخصیت کے طور پر پیش کیا ہے۔ اس سے پتہ چلتا ہے کہ اقبال سائنس اور روحانیت کی ہم آھنگی کے قائل تھے جو ایک انوکھا اور نادر تصورر ہے نیز قابل قدر ہے۔ اقبال زندگی کے ارتقا کے لئے سائنس کو لازمی قرار دیتے ہیں۔ان کے نزدیک زندگی کا ارتقا اس تعلق پر منحصر ہے جو اس نے خارجی حقائق سے استوار کیا ہے لہذا وہ قرآن کی بنیادی روح کو استقرائی قرار دیتے ہیں۔ ان کے نزدیک مسلمانوں کے زوال کا بنیادی سبب استقرائی استدلال سے دوری ہے جو سائنس کی بنیاد ہے لہذا قرآن کو کتاب زندہ کا لقب دیا اور فرمایا:
خوار از مجہوری قر آں شدی شکوہ سنج گردش دوراں شدی
اے چو شبنم بر زمیں افتندئی، دربغل داری کتاب زندہ ئی
موجودہ دور میں جدید طبیعیات دراصل روحانیت کی ہی جانب محو سفر ہے اور اس سفر میں وہ منزل ضرور آئے گی جب طبیعیاتی اور مابعد الطبیعیاتی حقائق ایک ہوجائیں گے۔ کچھ امور پر یہ کامیابی حاصل ہوچکی ہے کچھ پر باقی ہے جو مستقبل بعید میں انشااﷲ پوری ہوکر رہے گی۔ جہاں اور بھی ہیں ابھی بے نمود
[email protected]
9891129986