اسپورٹس

سعودی عرب کے فرمانروا شاہ سلمان بن عبدالعزیزآل سعود نے قومی فٹ بال ٹیم کی عالمی کپ کے پہلے میچ میں ارجنٹائن کے خلاف شاندار فتح کی خوشی میں بدھ کو تمام ملازمین اورطلبہ کے لیے عام تعطیل کا اعلان کیا ہے۔ سعودی پریس ایجنسی کے مطابق ولی عہد شہزادہ محمد بن سلمان نے ارجنٹائن کے خلاف قومی ٹیم کی فتح کا جشن منانے کی تجویزپیش کی تھی اورشاہ سلمان نے اس کی منظوری دے دی ہےاورتمام ملازمین اور طلبہ کو چھٹی دینے کی ہدایت کی ہے۔

سعودی فٹ بال ٹیم کی جیت کاجشن منانے کی تعطیل کا اطلاق سرکاری اورنجی دونوں شعبوں کے ملازمین پرہوگا۔ نیز تمام تعلیمی مدارج اور سطحوں میں زیرتعلیم طلبہ کوچھٹی ہوگی اور ان کے تعلیمی ادارے بند رہیں گے۔ اس سے قبل منگل کو قطر میں جاری فیفا عالمی کپ میں سعودی عرب نے اپنے پہلے میچ میں ارجنٹائن کودوایک سے شکست دے کر اب تک کا سب سے بڑا اپ سیٹ کردیا ہے۔ سعودی عرب کے کھلاڑیوں نے اس میچ میں شاندار اور جارحانہ کھیل کا مظاہرہ کیا ہے اور فٹ بال کے عرب شائقین کی خوشیوں کو دوبالا کردیا ہے۔

نئی دہلی:حال ہی میں ٹی ٹوئنٹی ورلڈ کپ کے سیمی فائنل میں بھارت کی شرمناک شکست کے اثرات نظر آنے لگے ہیں۔ اور اسی سلسلے میں بورڈ آف کنٹرول فار کرکٹ ان انڈیا (بی سی سی آئی) نے جمعہ کو پہلا بڑا فیصلہ لیتے ہوئے پوری پانچ رکنی قومی سلیکشن کمیٹی کو برخاست کر دیا ہے۔ آپ کو بتاتے چلیں کہ برطرف سلیکشن کمیٹی کے چیئرمین سابق ٹیسٹ کرکٹر چیتن شرما ہیں، جب کہ دیگر اراکین میں سابق کرکٹر سنیل جوشی، دیواشیش موہنتی، ہرویندر سنگھ شامل ہیں۔ ہندوستانی کرکٹ کی تاریخ میں غالباً پہلی بار ایسا دیکھنے میں آیا ہے جب ٹیم کی خراب کارکردگی کا خمیازہ پوری سلیکشن کمیٹی کو بھگتنا پڑا ہے۔ تاہم بورڈ نے سخت فیصلہ لیتے ہوئے نئی سلیکشن کمیٹی کے لیے درخواستیں بھی طلب کرلی ہیں۔ ویسے تو اس کے امکانات پہلے ہی نظر آرہے تھے کیونکہ حال ہی میں منعقدہ بورڈ کی سالانہ جنرل میٹنگ (AGM) میں اعلیٰ عہدیداروں نے سلیکٹرز کے کام کرنے کے انداز پر ناخوشی کا اظہار کیا تھا۔
ساتھ ہی بی سی سی آئی نے نئی سلیکشن کمیٹی کے لیے درخواستیں بھی طلب کی ہیں۔ قومی سلیکشن کمیٹی کا ممبر بننے کے لیے کل پانچ اسامیاں ہیں جو سینٹرل زون، ایسٹ، ویسٹ، نارتھ اور ساؤتھ زون کے لیے ہیں۔ اسامیوں کے لیے اہلیت کی شرائط درج ذیل ہیں:
1. درخواست دینے والے کھلاڑی نے کم از کم 7 ٹیسٹ میچ کھیلے ہوں ۔
2. کھلاڑی نے کم از کم 30 فرسٹ کلاس میچ کھیلے ہوں۔
3. درخواست گزار نے کم از کم 10 ون ڈے اور بیس فرسٹ کلاس میچ کھیلے ہوں ۔
ان شرائط کے علاوہ درخواست دینے والے کھلاڑی نے کم از کم پانچ سال پہلے کرکٹ کو الوداع کہا ہو ۔ نیز کھلاڑی کو کسی مخصوص کرکٹ کمیٹی کا رکن نہیں ہونا چاہیے۔ بتا دیں کہ درخواست گزار کو 28 نومبر کی شام 6 بجے تک اپنی درخواست بھیجنی ہوگی۔ درخواست فارم بی سی سی آئی کی ویب سائٹ سے ڈاؤن لوڈ کیے جا سکتے ہیں۔

ملبورن :انٹرنیشنل کرکٹ کونسل (آئی سی سی) ٹی20 ورلڈ کپ کا پہلا مرحلہ مکمل ہوگیا، زمبابوے اور آئرلینڈ نے ایونٹ کی فائنل 12 ٹیموں میں جگہ بنالی ہے۔ایونٹ کے آخری میچ میں زمبابوے نے اسکاٹ لینڈ کو 5 وکٹوں سے شکست دی اور فائنل 12 کے لیے گروپ 2 میں جگہ بنالی۔پہلے مرحلے کے گروپ بی کے اہم میچ میں اسکاٹ لینڈ نے زمبابوے کو جیت کے لیے 133 رنز کا ہدف دیا جو اْس نے 5 وکٹ کے نقصان پر 9 گیندوں قبل حاصل کرلیا اور میگا ایونٹ کے اگلے مرحلے میں جگہ پکی کرلی۔پہلے مرحلے کے بعد فائنل 12 میں جگہ بنانے والی 4 ٹیموں میں سری لنکا، زمبابوے، نیدرلینڈز اور آئرلینڈ شامل ہیں۔گروپ 1 جس میں آسٹریلیا، نیوزی لینڈ، انگلینڈ اور افغانستان جیسی مضبوط ٹیمیں ہیں، اس کا حصہ سری لنکا اور آئرلینڈ بن گیا ہے۔گروپ 2 جس میں پاکستان، بھارت، جنوبی افریقا اور بنگلہ دیش جیسی بڑی ٹیمیں شامل ہیں، اس کا حصہ زمبابوے اور نیدرلینڈز بنے ہیں۔

حیدرآباد: ہندوستانی کرکٹ ٹیم کے سابق کپتان اور حیدرآباد کرکٹ ایسوسی ایشن (ایچ سی اے) کے صدر محمد اظہر الدین کے والد محمد عزیز الدین کا منگل کی رات انتقال ہوگیا، ان کی عمر 93 برس تھی۔ لواحقین نے یہاں بتایا کہ عزیز الدین کا انتقال عمر سے متعلق بیماریوں کی وجہ سے ہوا ہے۔انڈیا کرکٹ کنٹرول بورڈ (بی سی سی آئی) کے 91ویں سالانہ اجلاس میں شریک ہوئے اظہر الدین خبر سنتے ہی گھر واپس لوٹ گئے۔ آخری رسومات آج ادا کی جائیں گی۔ تلنگانہ پردیش کانگریس کمیٹی (ٹی پی سی سی) کے صدر اے ریونت ریڈی نے سوگوار کنبہ کے تئیں تعزیت کا اظہار کیا ہے۔

ملبورن :ٹی ٹوئنٹی ورلڈ کپ کے کوالیفائنگ راؤنڈ کے پہلے میچ میں ہی اپ سیٹ ہو گیا، نمیبیا نے سری لنکا کو 55 رنز سے شکست دے دی۔سری لنکا کی ٹیم 164 رنز کے ہدف کے تعاقب میں 108رنز بنا سکی۔سری لنکا کی جانب سے کپتان ڈاسن شناکا نے 29 اور بھانوکا راجا پاکسے نے 20 رنز بنائے۔نمیبیا نے پہلے بیٹنگ کرتے ہوئے مقررہ 20 اوورز میں 7 وکٹوں کے نقصان پر 163 رنز بنائے تھے۔نمیبیا کی طرف سے جان فرائیلنک اور جے جے سمٹ نے شاندار بیٹنگ کا مظاہرہ کیا۔جے جے سمٹ نے ناقابل شکست 31 رنز کی اننگز کھیلی جبکہ جان فرائیلنک نے 44 رنز بنائے۔واضح رہے کہ سری لنکا نے نمیبیا کے خلاف ٹاس جیت کر بولنگ کا فیصلہ کیا تھا۔آسٹریلیا میں کھیلے جا رہے ٹی ٹوئنٹی ورلڈ کپ کے میچز 2 مرحلوں میں ہوں گے، پہلے مرحلے میں آج 2 میچز ہو رہے ہیں۔ایونٹ کا پہلا میچ سری لنکا اور نمیبیا کے درمیان اس وقت کھیلا گیا جبکہ دوسرا میچ نیدر لینڈ اور متحدہ عرب امارات (یو اے ای) کے درمیان کھیلا جائے گا۔پہلے مرحلے میں 2 گروپس میں تقسیم 8 ٹیمیں سپر 12 راؤنڈ میں جگہ بنانے کے لیے مقابلہ کریں گی جہاں 8 ٹیمیں اپنی رینکنگ کی بنیاد پر پہلے ہی موجود ہیں۔

نئی دہلی: ہندوستانی کرکٹ ٹیم اگلے سال پاکستان کے دورے پر جا سکتی ہے۔ درحقیقت اگلے سال ایشیا کپ کا انعقاد پاکستان کرکٹ بورڈ کو کرنا ہے اور اس میں بھارتی کرکٹ ٹیم حصہ لے سکتی ہے۔ بورڈ آف کنٹرول فار کرکٹ ان انڈیا (BCCI) نے سالانہ جنرل میٹنگ سے قبل ریاستی ایسوسی ایشن کے ساتھ ایک خط شیئر کیا ہے، جس میں اگلے سال کے بڑے ایونٹس کو درج کیا گیا ہے۔اس خط میں ایشیا کپ کا نام بھی شامل ہے۔ ایسے میں یہ قیاس کیا جا رہا ہے کہ ہندوستانی ٹیم پاکستان جانے کے لیے تیار ہے۔ تاہم اس کے لیے ہندوستانی حکومت کی اجازت لینا سب سے اہم ہوگا۔ہندوستان نے آخری بار دو طرفہ سیریز کے لیے 2006 میں پاکستان کا دورہ کیا تھا۔ اس کے بعد وہ آخری بار 2008 میں ایشیا کپ کے لیے پاکستان میں کھیلتے ہوئے نظر آئے تھے۔ ٹیم انڈیا تقریباً 13 سال سے پاکستان نہیں گئی ،لیکن اب ان کے پاکستان جانے کی امید ہے۔بی سی سی آئی حکام اب بھی اس بات کا اعادہ کر رہے ہیں کہ اگر انہیں حکومت سے اجازت مل گئی تو ٹیم انڈیاایشیا کپ میں شرکت کے لیے پاکستان جائے گی۔ بی سی سی آئی کے سکریٹری جے شاہ اس وقت ایشین کرکٹ کونسل کے صدر کے طور پر بھی خدمات انجام دے رہے ہیں۔ ایسے میں ان کے لیے پاکستان میں ہونے والے ایشیا کپ میں ہندوستانی ٹیم کو بھیجنا ایک بڑا چیلنج ہوگا۔

90000 ہزار سے زائد شائقین کرکٹ میچ کا لُطف اٹھائیں گے
ملبورن :ہندوستان اور پاکستان کے درمیان T20 ورلڈ کپ 2022 کے میچ کے تمام ٹکٹ فروخت ہو چکے ہیں۔ اس میچ کے اضافی اسٹینڈنگ روم ٹکٹ بھی آن لائن دستیاب ہوتے ہی فروخت ہو گئے۔ ٹکٹ 10 منٹ میں فروخت ہو گئے۔ اس بات کا انکشاف T20 ورلڈ کپ 2022 کی جانب سے جمعہ کو جاری کردہ بیان میں کیا گیا۔ٹی ٹوئنٹی ورلڈ کپ کے حکام نے بتایا کہ اب تک اس ایونٹ کے 6 لاکھ سے زائد ٹکٹ فروخت ہو چکے ہیں۔ 23 اکتوبر کو ملبورن کرکٹ گراؤنڈ میں ہونے والے پاک بھارت میچ کے لیے 90 ہزار سے زائد تماشائی اسٹیڈیم میں موجود ہوں گے۔ سڈنی کرکٹ گراؤنڈ میں ہونے والا سپر 12 کا افتتاحی میچ (آسٹریلیا بمقابلہ نیوزی لینڈ) بھی ہاؤس فل ہونے جا رہا ہے۔ اس میچ کے تمام ٹکٹ بھی فروخت ہو چکے ہیں۔گزشتہ ایک سال میں یہ چوتھا موقع ہوگا ،جب ہندوستان اور پاکستان کی ٹیمیں آمنے سامنے ہوں گی۔ گزشتہ تین میچوں میں دو میچ پاکستان اور ایک میچ بھارت نے جیتا ہے۔ گزشتہ سال ٹی ٹوئنٹی ورلڈ کپ میں پاکستان نے بھارت کو 10 وکٹوں سے عبرتناک شکست دی تھی۔ ہندوستانی ٹیم اس بار پچھلی شکست کا بدلہ لینے آئے گی،لیکن رضوان -بابر کی دھاکڑ جوڑی کے سامنے ہندوسانی شیر ڈھیر ہوتے ہوئے نظر آئے ہیں۔تاہم ہندوستانی ٹیم کے پاس بہترین بیٹنگ آرڈر ہے۔ ان کے پاس گیند بازوں میں ایک مشہور اسپنر بھی ہے، لیکن یہ ٹیم تیز گیند بازی میں پیچھے رہ سکتی ہے۔ ٹیم انڈیا کو پچھلے کچھ میچوں میں تیز گیند بازوں نے مایوس کیا ہے۔ خاص طور پر ڈیتھ اوور میں خراب گیند بازی کی وجہ سے ٹیم انڈیا کو کئی میچ میں ہارملی ہے۔ دوسری جانب پاکستان کے ساتھ باؤلنگ اٹیک شاندار ہے۔ پاکستان ٹیم کے پاس ٹی ٹوئنٹی کرکٹ کی دھاکڑ اوپننگ جوڑی بھی ہے ،لیکن ٹیم کا مڈل آرڈر بہت کمزور ہے۔ پاکستان ٹیم کے پاس مڈل آرڈر میں کوئی قابل بھروسہ بلے باز نہیں ہے۔

نئی دہلی : سورو گنگولی اس وقت بورڈ آف کنٹرول فار کرکٹ ان انڈیا (BCCI) کے صدر ہیں۔ انہوں نے یہ عہدہ 2019 میں سنبھالا تھا۔ان کی میعاد کی مدت 3 سال مکمل ہو چکی ہے اور ان کی جگہ سابق بھارتی کھلاڑی راجر بنی کا چیئرمین بننا تقریباً طے ہے۔ بی سی سی آئی کے صدر کے اس عہدے کے لیے اب تک صرف راجر بنی نے ہی نامزدگی داخل کی ہے۔ آئیں جانتے ہیں کہ راجر بنی کون ہیں، جو بی سی سی آئی کے نئے صدر بننے جا رہے ہیں۔ہندوستانی ٹیم نے پہلی بار 1983 میں کپل دیو کی کپتانی میں ورلڈ کپ جیتا تھا۔ راجر بنی اس فاتح ٹیم کا حصہ تھے۔ اس سال کے ورلڈ کپ میں انہوں نے اپنی باؤلنگ کے ساتھ شاندار کارکردگی کا مظاہرہ کرتے ہوئے مجموعی طور پر 18 وکٹیں حاصل کی تھیں۔ وہ ٹورنامنٹ کے سب سے زیادہ وکٹیں لینے والے بولر تھے۔ تاہم اس کے بعد بھی بہت سے لوگ انہیں اچھی طرح سے نہیں جانتے۔ ان کا پورا نام راجر مائیکل ہمفری بنی ہے۔1983 کے ورلڈ کپ میں راجر بنی نے آسٹریلیا پر تباہی مچائی تھی۔ انہوں نے آسٹریلیا کیخلاف کھیلے گئے میچ میں 8 اوورز میں صرف 29 رنز دے کر 4 وکٹیں حاصل کی تھیں۔ اس میچ میں ٹیم انڈیا نے آسٹریلوی ٹیم کو 129 رنز پر ڈھیر کر دیا تھا۔راجر بنی نے ہندوستانی ٹیم کے لیے 1979 میں پاکستان کیخلاف ٹیسٹ میچ میں ڈیبیو کیاتھا۔ اس کے ساتھ ہی سال 1987 میں انہوں نے اپنا آخری ٹیسٹ میچ بھی پاکستان کے خلاف کھیلا۔ انہوں نے اپنے کیریئر میں کل 27 ٹیسٹ میچ کھیلے جس میں انہوں نے باؤلنگ کرتے ہوئے 47 وکٹیں حاصل کیں اور بیٹنگ کرتے ہوئے 830 رنز بنائے۔ اس کے ساتھ ساتھ انہوں نے کل 72 ون ڈے کھیلے جس میں انہوں نے باؤلنگ کرتے ہوئے 77 وکٹیں حاصل کیں اور بیٹنگ کرتے ہوئے 629 رنز بنائے۔ راجر بنی ہندوستانی ٹیم کے لیے کھیلنے والے پہلے اینگلو انڈین کھلاڑی ہیں۔راجر بنی سال 2000 میں انڈر 19 ہندوستانی ٹیم کے کوچ تھے، جس سال انڈر 19 ہندوستانی ٹیم نے ورلڈ کپ جیتا تھا۔ اس ٹیم میں یوراج سنگھ اور محمد کیف جیسے مشہور کھلاڑی موجود تھے۔ محمد کیف اور یوراج سنگھ اپنی کامیابی کا کریڈٹ ہمیشہ راجر بنی کو دیتے ہیں۔غور طلب ہے کہ راجر بنی کے بیٹے اسٹیورٹ بنی بھی ہندوستانی ٹیم میں کھیل چکے ہیں۔ جب اسٹیورٹ بنی کو ہندوستانی ٹیم میں منتخب کیا گیا تو راجر بنی بی سی سی آئی کے سلیکٹر تھے۔ کہا جاتا تھا کہ اسٹورٹ بنی کو ان کی وجہ سے منتخب کیا گیا تھا۔ اس پر راجر بنی نے کہا تھا کہ جب اسٹورٹ بنی کا نام آیاتھا، تو وہ میٹنگ چھوڑ کر چلے گئے تھے۔

نئی دہلی :ٹیم انڈیا نے تیسرے ون ڈے میں جنوبی افریقہ کو 7 وکٹوں سے شکست دے دی۔ اس طرح ہندوستانی ٹیم نے 3 ون ڈے سیریز 2-1 سے جیت لی ہے۔ ہندوستانی ٹیم کے کپتان شیکھر دھون نے ٹاس جیت کر پہلے گیند بازی کا فیصلہ کیا۔ ٹاس ہارنے کے بعد پہلے بیٹنگ کرنے آئی جنوبی افریقی ٹیم کا آغاز خراب رہا۔ جنوبی افریقہ کے بلے باز وقفے وقفے سے آؤٹ ہوتے رہے۔ جس کی وجہ سے مہمان ٹیم صرف 99 رنز پر ڈھیر ہو گئی۔جنوبی افریقہ کیخلاف تیسرا ون ڈے جیتنے کے بعد کپتان شیکھر دھون نے کہا کہ جس طرح ہماری ٹیم نے میدان میں کھیلا مجھے اس پر فخر ہے۔ ہمارے کھلاڑیوں نے ذمہ داری اور پختگی دونوں کا مظاہرہ کیا۔ میں ٹیم کے معاون عملے کا شکریہ ادا کرتا ہوں ۔ ہم نے پہلے میچ میں بہت غلطیاں کیں لیکن ہم نے اپنی غلطیوں سے سبق سیکھا ہے۔ اس سیریز میں میں نے کبھی بھی اپنے اوپر دباؤ نہیں بننے دیا۔ اس سیریز سے بہت کچھ سیکھنے کو ملا۔ میں اپنی ٹیم کے لیے میچ جیتنا پسند کرتا ہوں۔ انہوں نے یہ بھی کہا کہ ٹی ٹوئنٹی ورلڈ کپ جلد شروع ہونے والا ہے۔ اس طرح کی جیت سے اعتماد بڑھتا ہے۔اس کے ساتھ ہی پہلے ٹاس ہارنے کے بعد بیٹنگ کے لیے اتری جنوبی افریقی ٹیم 27.1 اوورز میں صرف 99 رنز پر ڈھیر ہوگئی۔ جنوبی افریقہ کے 99 رنز کے جواب میں بھارتی ٹیم نے 19.1 اوورز میں 3 وکٹوں پر 105 رنز بنا کر میچ جیت لیا۔ بھارت کی جانب سے شوبھ من گل نے 57 گیندوں پر 49 رنز کی شاندار اننگز کھیلی۔ اس کے علاوہ شریس ایئر نے 28 ناٹ آؤٹ کی شراکت کی۔ تاہم اس سے قبل کپتان شیکھر دھون کے علاوہ ایشان کشن سستے میں آؤٹ ہو گئے تھے۔ شیکھر دھون نے 8 جبکہ ایشان کشن نے 10 رنز بنائے۔ کلدیپ یادیو جنہوں نے 4.1 اوور میں 18 رن دے کر 4 وکٹیں حاصل کیں، انہیں مین آف دی میچ قرار پائے، جبکہ فاسٹ باؤلر محمد سراج کو مین آف دی سیریز منتخب کیا گیا ۔

نئی دہلی: عالمی چمپئن باکسر نکہت زرین کا کہنا ہے کہ اپنے کیرئیر میں مشکل حالات کا سامنا کرنے نے انہیں ذہنی طور پر مضبوط بنایا، کیونکہ اس نے خود کو بتایا کہ جو بھی ہو، مجھے لڑنا ہے اور اپنا بہترین دینا ہے۔نکہت نے جمعرات کو استنبول میں ورلڈ باکسنگ چمپئن شپ میں تھائی لینڈ کی جیتپونگ جوٹاماس کو 5-0 سے شکست دے کر فلائی ویٹ (52 کلوگرام) زمرے میں طلائی تمغہ جیتنے کے لیے اپنی شاندار دوڑ جاری رکھی۔زرین نے بعد میں نامہ نگاروں کو بتایا کہ ان دو سالوں میں میں نے صرف اپنے کھیل پر توجہ مرکوز کی اور اپنے کھیل میں جو بھی خامیاں تھیں اسے دور کرنے کی کوشش کی، میں نے اپنے کمزور پہلوؤں پر کام کیا۔ میں نے ان تمام پہلوؤں پر کام کیا جن پر مجھے کام کرنے کی ضرورت تھی ۔زرین نے کہا کہ میں نے اپنے کیرئیر میں جن رکاوٹوں کا سامنا کیا ہے، اس نے مجھے مضبوط بنایا ہے۔ میں اس سب کے بعد ذہنی طور پر مضبوط ہو گئی ہوں۔ زرین نے اس سنہری کامیابی سے دو سال قبل اس وقت کے وزیر کھیل کرن رجیجو کو ایک خط لکھا تھا، جس میں اولمپک کوالیفائر کے لیے منصفانہ ٹرائل پر زور دیا گیا تھا۔جس کی وجہ سے زرین کو سوشل میڈیا پر ٹرول بھی کیا گیا، جب کہ ایم سی میری کوم نے سخت الفاظ میں سوال کیا کہ کون نکہت زرین؟”اس کے بعد زرین ٹرائلز میں میری کوم سے ہار گئیں، جس کی وجہ سے وہ ٹوکیو گیمز میں جگہ نہیں بنا سکیں۔اس سے قبل 2011 کی جونیئر ورلڈ چمپئن زرین بھی کندھے کی انجری کا شکار ہوئیں جس کے باعث وہ ایک سال تک کھیل سے باہر رہیں اور 2018 میں ہونے والے کامن ویلتھ گیمز، ایشین گیمز اور ورلڈ چمپئن شپ میں شرکت نہیں کر سکیں۔زرین کا کہنا تھا کہ ’میں 2017 میں کندھے کی انجری کا شکار ہوئی جس کے لیے مجھے آپریشن کرنا پڑا اور میں ایک سال تک مقابلہ کرنے کے قابل نہیں رہی۔زرین نکہت اب کامن ویلتھ گیمز کے ٹرائلز کی تیاری کریں گی جس کے لیے انہیں اپنا وزن 50 کلو تک کم کرنا ہوگا۔انہوں نے کہا کہ کامن ویلتھ گیمز میں 50 کلوگرام کی کیٹیگری ہے، میں ابھی اس کی تیاری کروں گی۔25 سالہ باکسرکا تعلق تلنگانہ سے ہے ۔

ممبئی: پیر کو سن رائزرز حیدرآباد کے خلاف میچ کے دوران گجرات ٹائٹنز کے کپتان ہاردک پانڈیا اپنے ساتھی اور سینئر ہندوستانی بالر محمد سمیع پر سوشل میڈیا پر غصے میں آگئے لیکن شائقین نے انہیں سخت تنقید کا نشانہ بنایا۔پانڈیا کے ذریعے 13ویں اوور میں بولڈ ہونے پر ٹائٹنز کے کپتان نے سمیع پر چیخنے کی کوشش کی کیونکہ اس سے قبل سن رائزرز حیدرآباد کے کپتان کین ولیمسن نے اوور کی دوسری اور تیسری گیند پر پانڈیا کو بیک ٹو بیک چھکا لگایا تھا۔ ٹائٹنز کو اوور کی آخری گیند پر ترپاٹھی کو آؤٹ کرنے کا موقع ملا جب 31 سالہ بلے باز کا اپر کٹ خوفناک حد تک غلط ہو گیا اور ڈیپ تھرڈ مین پر چلا گیا۔ ڈیپ مڈ وکٹ پر تعینات شامی اگر آگے بڑھتے تو وہ کیچ پکڑ سکتے تھے۔ اس کے بجائے، تجربہ کار ہندوستانی تیز گیند باز نے چند قدم پیچھے ہٹ کر پہلے قدم پر گیند کو پکڑ لیا۔ پانڈیا نے پہلے ہی اوور میں ولیمسن کے ہاتھوں دو چھکے لگا کر سمیع پر اپنا غصہ نکالا۔

لاہور:پاکستان میں اس وقت سیاسی بحران چل رہا ہے۔ خبر ہے کہ چیئرمین پی سی بی رمیز راجہ بھی اپنا عہدہ چھوڑ سکتے ہیں۔ جس کے بعد قیاس آرائیاں کی جا رہی ہیں کہ ٹیم کے فاسٹ بولرمحمد عامر دوبارہ انٹرنیشنل کرکٹ کھیلتے نظر آ سکتے ہیں۔پاکستانی فاسٹ بولرمحمد عامر نے اپنے کیریئر میں 36 ٹیسٹ، 61 ون ڈے اور 50 ٹی ٹوئنٹی انٹرنیشنل کھیلے ہیں۔ خیال کیا جا رہا ہے کہ رمیز راجہ کے استعفیٰ کے بعد محمد عامر ریٹائرمنٹ کا فیصلہ واپس لے سکتے ہیں۔ دسمبر 2020 میں عامر نے یہ کہتے ہوئے ریٹائرمنٹ لے لی کہ وہ ذہنی طور پر پریشان ہیں۔اس دوران انہوں نے کہا تھا کہ میں فی الحال کرکٹ سے دور جا رہا ہوں، کیونکہ مجھے ذہنی طور پر بہت ہراساں کیا جا رہا ہے۔انہوں نے اپنے بیان میں کہا تھا کہ مجھے نہیں لگتا کہ میں یہ زیادہ برداشت کر پاؤں گا۔ میں نے 2010 سے 2015 تک کافی مشکلات کا سامنا کیا ہے۔ جس کے لیے میں نے اپنا وقت دیا ہے۔ مجھے یہ کہہ کر ہراساں کیا جا رہا ہے کہ پی سی بی نے مجھ پر بہت زیادہ سرمایہ کاری کی ہے۔اس بیان میں انہوں نے نجم سیٹھی کا شکریہ بھی ادا کیا اور کہا کہ کیریئر کے مشکل وقت میں مدد کرنے پر آپ کا شکریہ۔ خیال کیا جا رہا ہے کہ رمیز راجہ کے استعفیٰ کے بعد نجم سیٹھی ایک بار پھر پی سی بی کے چیئرمین بن سکتے ہیں۔

نئی دہلی :ہندوستانی کرکٹ ٹیم کے سابق ہیڈ کوچ روی شاستری نے سینئر لیگ اسپنر یوزویندر چہل کے اس انکشاف پر ردعمل ظاہر کیا ہے کہ آئی پی ایل 2013 کے دوران ایک غیر ملکی کھلاڑی نے انہیں ہوٹل کی 15ویں منزل کی بالکونی سے لٹکا دیا تھا۔ اس معاملے کی مذمت کرتے ہوئے روی شاستری نے سخت کارروائی کا مطالبہ کیا ہے۔واضح رہے کہ چہل نے بتایا تھا کہ وہ 2013 میں آئی پی ایل میچ کے بعد اس وقت بال بال بچ گئے تھے جب ایک نشے میں دھت کھلاڑی نے انہیں بنگلور ہوٹل کی 15ویں منزل کی بالکونی سے لٹکا دیا تھا۔ اس کا جواب دیتے ہوئے روی شاستری نے کہا کہ یہ مذاق کی بات نہیں ہے۔روی شاستری نے کہا کہ میں نہیں جانتا کہ وہ شخص کون ہے، وہ اس وقت ہوش میں نہیں تھا۔ اگر ایسا ہوا ہے تو یہ بہت تشویشناک بات ہے۔ کسی کی جان کو خطرہ تھا، کچھ لوگوں کو یہ بات مضحکہ خیز لگ سکتی ہے لیکن یہ بالکل بھی مضحکہ خیز نہیں ہے۔ان کا مزید کہنا تھا کہ اس سے ظاہر ہوا ہے کہ جس نے بھی ایسا کرنے کی کوشش کی وہ مناسب پوزیشن میں نہیں تھا۔ جب آپ ایسی حالت میں ہوتے ہیں اور ایسا کچھ کرنے کی کوشش کرتے ہیں تو غلطی کرنے کے امکانات بڑھ جاتے ہیں۔ یہ قابل قبول نہیں ہے۔ ٹیم انڈیا کے ٹاپ لیگ اسپنروں میں سے ایک 31 سالہ چہل نے روی چندرن اشون کے ساتھ بات چیت کے دوران اس کا انکشاف کیا تھا۔ اس گفتگو کی ویڈیو ان کی نئی آئی پی ایل فرنچائز راجستھان رائلز نے جاری کی ہے۔شاستری نے کہا کہ میں اس طرح کی بات پہلی بار سن رہا ہوں، یہ بالکل بھی مضحکہ خیز نہیں ہے، اگر آج یہ واقعہ ہوتا ہے تو قصورواروں پر تاحیات پابندی لگائی جانی چاہیے ۔ان کا مزید کہنا تھا کہ ’تاحیات پابندی، بہتر ہے کہ وہ کرکٹ کے میدان کے قریب نہ آئیں، تب ہی پتہ چلے گا کہ یہ مضحکہ خیز ہے یا نہیں۔ چہل نے کہا تھا کہ بہت سے لوگ اس واقعے سے واقف نہیں تھے کیونکہ انہوں نے اسے اپنے پاس رکھا تھا۔روی شاستری نے کہا کہ یہ ضروری ہے کہ کھلاڑی ایسے واقعات کی جلد از جلد اطلاع دیں اور کسی سانحہ کا انتظار نہ کریں۔ اشون کے ساتھ بات چیت کے دوران چہل نے کہا تھاکہ کچھ لوگ میری کہانی جانتے ہیں۔ میں نے اس کے بارے میں کبھی بات نہیں کی، کبھی اس کا اشتراک نہیں کیا۔ان کا مزید کہنا تھا کہ 2013 میں میں ممبئی انڈینس کے ساتھ تھا۔ بنگلور میں ہمارا ایک میچ تھا۔ اس کے بعد کھلاڑی ایک دوسرے سے ملے۔ ایک کھلاڑی نشے میں تھا، میں اس کا نام نہیں لوں گا۔ چہل نے مزید کہاکہ وہ نشے میں تھا اور میری طرف دیکھ رہا تھا۔ اس نے مجھے بلایا۔ اس نے مجھے باہر نکالا اور بالکونی میں لٹکا دیا۔

امام الحق اوربابراعظم کی پھرشانداراننگ،کپتان مین آف دی میچ اورمین آف دی سیریز
لاہور:پاکستان نے تیسرے ون ڈے میں آسٹریلیا کو 9 وکٹوں سے شکست دے کر سیریز 1-2 سے جیت لی، پاکستانی ٹیم کی کینگروز کے خلاف 20 سال بعد ایک روزہ میچز کی سیریز جیتی ہے۔اس میچ میں بھی امام الحق اوربابراعظم نے شانداراننگ کھیلی ۔امام الحق نے 89رنزناٹ آئوٹ بنائے اوربابراعظم نے ناٹ آؤٹ سنچری اسکورکی۔بابراعظم مین آف دی میچ اورمین آف دی سریزہوئے ہیں۔آسٹریلیا کی جانب سے دیا گیا 211 رنز کا ہدف قومی بیٹرز نے صرف ایک وکٹ پر حاصل کرلیا، کپتان بابر اعظم نے پھر سنچری اسکور کی۔ لاہور کے قذافی اسٹیڈیم میں کھیلے جارہے اس میچ میں پاکستان نے آسٹریلیا کے خلاف ٹاس جیت پھر فیلڈنگ کرنے کا فیصلہ کیا تھا۔ مہمان ٹیم پہلے بیٹنگ کرتے ہوئے 41.5 اوورز میں 210 رنز بنا کر آؤٹ ہوگئی۔
پاکستانی ٹیم کے فاسٹ بولر شاہین شاہ آفریدی نے پہلی ہی گیند پر ٹریوس ہیڈ کو بولڈ کردیا جبکہ اگلے اوور میں حارث رؤف نے ایرون فنچ کو آؤٹ کیا۔حارث رؤف نے مارنس لبوشین کو بھی آؤٹ کردیا، وہ 4 رنز بنا کر پویلین لوٹے۔ چوتھے آؤٹ ہونے والے کھلاڑی مارکس اسٹوئنس تھے، جن کی وکٹ زاہد محمود نے لی، وہ 19 رنز بناسکے۔ان کے بعد گزشتہ میچ کے سنچری میکر بین میک ڈرمٹ بھی زیادہ دیر وکٹ پر نہ رہ سکے اور وہ 36 رنز بنا کر آؤٹ ہوئے۔ جب 67 کے مجموعے پر آسٹریلیا کے آدھی ٹیم پویلین لوٹ چکی تھی اور مہمان ٹیم کے جلد آؤٹ ہونے کے امکانات بھی روشن ہوچکے تھے ایسے میں پھر آسٹریلین ٹیم نے مزاحمت شروع کی اور 200 کا ہندسہ عبور کرنے میں کامیاب رہے۔ مہمان ٹیم کو 211 کے ٹوٹل تک پہنچانے میں ایلکس کیری نے 56، شان ایبٹ نے 49 اور کیمرون گرین نے 34 رنز کے ساتھ اپنا حصہ ڈالا۔ پاکستانی ٹیم کی جانب سے فاسٹ بالرحارث رؤف اور محمد وسیم 3، 3 وکٹیں لے کر نمایاں بالررہے جبکہ شاہین آفریدی نے دو، زاہد محمود اور افتخار احمد نے ایک ایک وکٹ لی۔ہدف کے تعاقب میں ایک مرتبہ پھر بابر اعظم اور امام الحق نے اپنی بھرپور صلاحیتوں کا مظاہرہ کیا، دونوں نے ناقابلِ شکست 190 رنز کی پارٹنرشپ بناتے ہوئے قومی ٹیم کو تاریخی فتح سے ہمکنار کیا۔ پاکستانی ٹیم کے واحد آؤٹ ہونے والے  فخر زمان تھے جو 27 کے مجموعے پر 17 رنز بنا کر آؤٹ ہوئے تھے جنہیں نیتھ ایلس نے آؤٹ کیا تھا۔ پاکستانی کرکٹ ٹیم میں ایک تبدیلی کی گئی ہے، سعود شکیل کی جگہ آصف علی کو ٹیم میں شامل کیا گیا۔خیال رہے کہ سیریز کا پہلا میچ آسٹریلیا کے نام رہا تھا جبکہ دوسرے میچ میں میزبان ٹیم نے مہمان کو شکست دی تھی۔

کرائسٹ چرچ:آسٹریلیا نے اتوارکویہاں فائنل میں انگلینڈ کو 71 رنز سے شکست دے کر ساتویں بار آئی سی سی خواتین کا ایک روزہ ورلڈ کپ جیت لیاہے۔آسٹریلیا نے الیسا ہیلی کے شاندار 170 اور ریچل ہینس (68) اور بیتھ مونی (62) کی کارآمد شراکت کی بدولت پانچ وکٹوں پر 356 رنز بنائے۔جواب میں دفاعی چیمپیئن انگلینڈ 43.4 اوورز میں نیٹ سکیور کے منافع بخش 148 ناٹ آؤٹ کے باوجود صرف 285 رنز بنا سکی۔مشیل اسٹارک کی اہلیہ اسلیاہیلی کی شانداراننگ پرشوہرکی جانب سے خو ب حوصلہ افزائی کی گئی جوتصویرسوشل میڈیاپرچل رہی ہے۔
ہیلی کے شوہر مشیل اسٹارک بھی ویمنز ورلڈ کپ کا فائنل میچ دیکھنے پہنچے۔ میچ کے دوران اسٹارک اسٹینڈ میں اپنی اہلیہ کی بیٹنگ کو پوری توجہ سے دیکھ رہے تھے۔ جب ہیلی نے سنچری بنائی تو اسٹارک اسٹینڈ میں کھڑے اپنی اہلیہ کے لیے تالیاں بجاتے نظر آئے، آئی سی سی نے بھی یہ ویڈیوشیئرکی ہے۔ اس کے علاوہ ایک اور ویڈیو میں مشل اسٹارک نے بتایاہے کہ اس ورلڈ کپ کے سیمی فائنل اور فائنل میں ان کی اہلیہ ہیلی کی جانب سے بنائی گئی سنچری ان کے لیے سب سے یادگار لمحہ ہے۔آسٹریلوی خاتون کرکٹر الیسا ہیلی نے فائنل میں 170 رنز کی اننگ کھیل کر حیرت انگیز ریکارڈ اپنے نام کر لیاہے۔ ہیلی ویمنز ون ڈے ورلڈ کپ کے ایک ایڈیشن میں 500 رنز بنانے والی واحد بلے بازبن گئی ہیں۔ ہیلی نے اس ورلڈ کپ میں 509 رنز بنائے ہیں۔ اس کے ساتھ ہیلی ویمنز ورلڈ کپ فائنل میں سب سے زیادہ رنز بنانے والی بلے باز بھی بن گئی ہیں۔ اس سے قبل یہ ریکارڈ آسٹریلیا کی کیرن رولٹن کے نام تھا۔ رولٹن نے سال 2005 میں بھارت کے خلاف ورلڈ کپ کے فائنل میچ میں 105 رنز بنائے تھے۔ اس کے علاوہ الیسا ہیلی خواتین کرکٹ کی پہلی وکٹ کیپر ہیں جن کے نام اب ورلڈ کپ کے ایک ایڈیشن میں 500 سے زائد رنزہیں۔

دبئی :آسٹریلیائی کرکٹر عثمان خواجہ نے پاکستان کے خلاف حال ہی میں ختم ہونے والی سیریز میں شاندار کارکردگی کا مظاہرہ کرتے ہوئے بدھ کو آئی سی سی کی تازہ ترین بیٹنگ ٹیسٹ رینکنگ میں ڈیوڈ وارنر، وراٹ کوہلی، رشبھ پنت، روہت شرما اور ٹریوس ہیڈ کو پیچھے چھوڑ دیا۔ روہت شرما آٹھویں اورکوہلی ایک مقام کے نقصان کے ساتھ 10ویں مقام پر پہنچ گئے ہیں، جبکہ پنت تازہ ترین درجہ بندی کی فہرست میں ٹاپ 10 سے باہر ہو کر 11ویں نمبر پر پہنچ گئے ہیں۔خواجہ پاکستان کے خلاف تین میچوں کی ٹیسٹ سیریز میں بہترین کارکردگی کی تھی ، انہوں نے پانچ اننگز میں 165.33 کی اوسط سے 496 رنز بنائے۔ سیریز میں ان کے اسکور 97، 160، 44 ناٹ آؤٹ، 91 اور 104 ناٹ آؤٹ تھے۔ اس کے بعد انہوں نے سال کا آغازسڈنی میں ڈرا ہوئے ایشز ٹیسٹ میں بیک ٹو بیک سنچریوں کے ساتھ کیا، دو سال سے زائد عرصے کے بعد اس فارمیٹ میں ان کی واپسی ہوئی۔پاکستان کے عبداللہ شفیق جو 79.40 کی اوسط سے 397 رنز کے ساتھ سیریز میں دوسرے سب سے زیادہ رنز بنانے والے کھلاڑی تھے، ٹاپ 40 میں جگہ بنانے میں کامیاب رہے ، جبکہ محمد رضوان 19 ویں نمبر پر پہنچ گئے ہیں۔ انگلینڈ کے کپتان جو روٹ چوتھے نمبر پر آ گئے ہیں جبکہ آسٹریلیا کے اسٹیو اسمتھ اور نیوزی لینڈ کے کین ولیمسن بالترتیب نمبر 2 اور 3 نمبر پر آ گئے ہیں۔آل راؤنڈرز میں ہندوستان کے رویندرا جدیجا بدستور سرفہرست ہیں، جبکہ روی چندرن ایشون نے ویسٹ انڈیز کے جیسن ہولڈر کی جگہ دوسرے نمبر پر پہنچ گئے ہیں۔ گریناڈا میں تیسرے ٹیسٹ میں انگلینڈ کے خلاف شاندار کارکردگی کے بعد ویسٹ انڈیز کے آل راؤنڈر کائل میئرز 29 مقام کی چھلانگ لگا کر 11 ویں نمبر پر پہنچ گئے۔گیند بازوں میں آسٹریلیائی ٹیسٹ کپتان پیٹ کمنس سرفہرست ہیں جبکہ اشون اور جسپریت بمراہ کو بالترتیب دوسرے اور چوتھے نمبر پر رکھا گیا ہے۔ پاکستان کے شاہین آفریدی نے نیوزی لینڈ کے کائل جیمیسن کو پیچھے چھوڑ کر پانچویں نمبر پر آ گئے ہیں جبکہ آسٹریلیائی فاسٹ بولر مچل اسٹارک چار مقام کے فائدے کے ساتھ 11ویں نمبر پر آ گئے ہیں۔دراصل کمنس نے تین ٹیسٹ میں 12 وکٹیں لینے کے بعد پہلی پوزیشن مزید مضبوط کر لی ہے، جس میں تیسرے میچ میں پانچ وکٹیں بھی شامل ہیں۔ ون ڈے میں ایڈم زمپا نے چھ مقام کے فائدے کے ساتھ گیندبازوںکی تازہ ترین آئی سی سی او ڈی آئی رینکنگ میں ٹاپ 10 میں جگہ بنالی ہے۔ بنگلہ دیش کے شکیب الحسن 8ویں نمبر پر آگئے ہیں جبکہ ان کے ہم وطن کھلاڑی تسکین احمد 33ویں نمبر پر پہنچ گئے ہیں۔ ادھر جنوبی افریقہ کے کاگیسو ربادا آٹھویں سے 13ویں نمبر پرپہنچ گئے ہیں۔

کرائسٹ چرچ:آخری اوور میں کی گئی نو بال نے میچ کی تصویر ہی بدل دی اور اتوارکوکرویامرو میچ میں ہندوستانی خواتین کرکٹ ٹیم کو آخری گیند پرجنوبی افریقہ سے تین وکٹوں سے شکست ہوئی۔ فتح کے لیے 275 رنز کے ہدف کے تعاقب میں جنوبی افریقہ کو آخری اوور میں 7 رنز درکار تھے، ترشا شیٹی اس اوور کی دوسری گیند پر دیپتی شرما کے ہاتھوں رن آؤٹ ہوئیں، اگلی دوگیندوں پر دو رنز بنائے لیکن پانچویں گیند پر میگنن آؤٹ ہوگئیں۔ ڈو پریز (63 گیندوں پر 52 ناٹ آؤٹ) کا لانگ آن پر کیچ لیاگیا۔ اس وقت جنوبی افریقہ کو 1 گیندپر3 رنز درکار تھے۔ تاہم یہ گیند نو بال نکلی اور اب جنوبی افریقہ کو دو گیندوں میں دو رنز درکار تھے جو آسانی سے بنا لیے گئے۔ آسٹریلیا، جنوبی افریقہ، انگلینڈ اور ویسٹ انڈیز نے ورلڈ کپ کے آخری چار میں جگہ بنا لی۔ دیپتی شرما کی ایک نو بال نے دو ٹیموں کی تقدیر بدل دی۔نو بال نے بھارت کا سیمی فائنل تک پہنچنے کا خواب چکنا چور کر دیا۔دوسری جانب ویسٹ انڈیز کی ٹیم سیمی فائنل میں پہنچ گئی۔ ایک وقت ایسا لگ رہا تھا کہ بھارت جیت جائے گا لیکن آخری گیند پر قسمت بدل گئی اور ٹیم کو 3 وکٹوں سے شکست کا منہ دیکھنا پڑا۔

نئی دہلی:دو بار ورلڈ کپ جیتنے والے آسٹریلوی کپتان رکی پونٹنگ کو اس میں کوئی شک نہیں کہ اگروکٹ کیپر بلے باز رشبھ پنت کو مستقبل میں ہندوستانی ٹیم کی قیادت کی ذمہ داری سونپی گئی تو وہ ایک کامیاب کپتان ثابت ہوں گے۔ پنت کو انڈین پریمیئر لیگ (آئی پی ایل) فرنچائز دہلی کیپٹل (ڈی سی) کی کپتانی گزشتہ سیزن میں زخمی شریس ایر کی غیر موجودگی میں سونپی گئی تھی اور پونٹنگ کی قیادت والی ٹیم انتظامیہ کو اس کھلاڑی پر پورا بھروسہ ہے۔پونٹنگ نے ممبئی انڈینس کے خلاف آئی پی ایل 15 کے افتتاحی میچ سے پہلے کہاکہ آئی پی ایل جیسے دباؤ والے ٹورنامنٹ میں اس کردار میں تجربہ حاصل کرنے کے بعد مجھے اس میں کوئی شک نہیں ہے کہ رشبھ آنے والے وقت میں بین الاقوامی کپتان بن سکتے ہیں۔ اس میں کوئی شک نہیں۔پونٹنگ کو یہ بھی لگتا ہے کہ پنت اور ریکارڈ پانچ بار کے چمپئن ممبئی انڈینس کے کپتان روہت شرما کے درمیان بہت سی مماثلت ہیں۔ انہوں نے روہت کے کیریئر کو دیکھا ہے جس میں وہ اپنی ٹیم کے لیے سب سے زیادہ ٹرافی کے ساتھ کپتان بنے۔انہوں نے کہاکہ اگرچہ میں نے اس کے بارے میں زیادہ نہیں سوچا۔ لیکن مجھے لگتا ہے کہ وہ واقعی ایک جیسے ہیں۔ جب روہت نے ممبئی کی کپتانی شروع کی تو وہ بہت چھوٹے تھے اور انہوں نے اپنا بین الاقوامی کریئر تقریباً شروع کیا تھا۔ اس کی عمر شاید 23-24 سال ہوگی اور اسی طرح رشبھ کی عمر بھی۔پونٹنگ نے کہاکہ یہ دونوں بہت ملتے جلتے ہیں۔ میں جانتا ہوں کہ یہ دونوں اچھے پارٹنر ہیں اور انہوں نے کپتانی کے بارے میں بھی کچھ چیزیں شیئر کی ہوں گی۔

نئی دہلی:انڈین پریمیئر لیگ (آئی پی ایل) جس نے ہندوستانی کرکٹ کو ایک نئی شناخت دی ہے، 10 ٹیموں کے ساتھ گھر پر اپنا رنگ بکھیرنے کے لیے پوری طرح تیار ہے، جس کا ہفتہ کو پہلا میچ دفاعی چمپئن چنئی سپر کنگز (CSK) اور گزشتہ سال کے رنراپ کولکاتہ نائٹ رائیڈرز کے درمیان کھیلا جائے گا۔ آئی پی ایل 2022 سے متعلق 10 اہم معلومات ۔(۱)2011 کے بعد یہ پہلا موقع ہو گا جب عالمی کرکٹ کی سب سے مشہور ٹی 20 ٹرافی کے لیے 10 ٹیمیں ٹکرائیں گی۔ اس بار لکھنؤ سپر جائنٹس اور گجرات ٹائٹنس کی شکل میں دو نئی ٹیمیں آئی پی ایل میں ڈیبو کریں گی۔(۲)ملک میں کورونا کی صورتحال قابو میں آنے کے بعد کرکٹ شائقین کو 2019 کے بعد پہلی بار اسٹیڈیم میں بیٹھ کر میچوں سے لطف اندوز ہونے کا موقع ملے گا۔ آئی پی ایل کے تمام میچز ہندوستان میں کھیلے جائیں گے اور اسٹیڈیم کی گنجائش کے 25 فیصد شائقین اسے اسٹیڈیم میں دیکھ سکیں گے۔(۳) دو نئی ٹیموں کے شامل ہونے سے میچوں کی کل تعداد 60 سے بڑھ کر 74 ہو گئی ہے جس کی وجہ سے یہ ٹورنامنٹ دو ماہ سے زائد جاری رہے گا۔ تاہم تمام ٹیمیں لیگ مرحلے میں صرف 14 میچز کھیلیں گی۔(۴)آئی پی ایل 2021 ہندوستان میں کھیلا گیا لیکن کچھ کھلاڑیوں کے کورونا سے متاثر ہونے کے بعد ٹورنامنٹ کو درمیان میں روکنا پڑا اور پھر اس کا دوسرا مرحلہ متحدہ عرب امارات میں منعقد کیا گیا۔ اس بات کو مدنظر رکھتے ہوئے فی الحال لیگ مرحلے کے میچز ممبئی اور پونے کے تین مقامات پر کرائے جائیں گے تاکہ ہوائی سفر کرنے کی ضرورت نہ پڑے۔(۵)پچ کیوریٹر کے لیے پچوں کو دو ماہ تک زندہ رکھنا ایک چیلنج ہو گا، لیکن ٹورنامنٹ میں بڑا سکور ہونے کا ہر ممکن امکان ہے۔ ٹی ٹوئنٹی ورلڈ کپ اس سال آسٹریلیا میں کھیلا جانا ہے اور ایسے میں آئی پی ایل بھی کچھ ہندوستانی کھلاڑیوں کی قسمت کا فیصلہ کرے گا۔(۶)ممبئی انڈینس کی ٹیم اپنے ہوم گراؤنڈ پر کھیلے گی لیکن اس کے کپتان روہت شرما نے واضح کر دیا ہے کہ انہیں اس سے کوئی اضافی فائدہ نہیں ملے گا۔ سوریہ کمار یادو، کیرون پولارڈ، جسپریت بمراہ اور ایشان کشن جیسے کھلاڑی سازگار حالات کا بھرپور فائدہ اٹھانا چاہیں گے۔(۷)رائل چیلنجرز بنگلور (RCB) میں سب کی نظریں کپتانی چھوڑنے والے وراٹ کوہلی پر ہوں گی۔ فاف ڈو پلیسس جو طویل عرصے سے سی ایس کے سے منسلک تھے، کو آر سی بی کی کپتانی سونپی گئی ہے۔ دیکھنا یہ ہے کہ ان کی قیادت میں ٹیم کی تقدیر بدلتی ہے یا نہیں۔(۸) آئی پی ایل میں مہندر سنگھ دھونی کا یہ آخری سیزن ہو سکتا ہے۔ انہوں نے پہلے میچ سے قبل ہی کپتانی چھوڑ کر رویندر جڈیجہ کو کمان سونپ دی۔ سب کی نظریں جڈیجہ پر ہوں گی کیونکہ انہیں ایک ایسی ٹیم کی قیادت کرنی ہے جس کی قیادت دھونی 2008 سے کر رہے ہیں، جو چار بار کی چمپئن ہے۔(۹)اس بار شریس ایئر، کے ایل راہل، ہاردک پانڈیا اور مینک اگروال کی قائدانہ صلاحیتوں کا بھی امتحان ہوگا۔ ائیر کے کے آر کی قیادت کریں گے جبکہ راہل لکھنؤ اور ہاردک گجرات کی قیادت کریں گے۔ اگروال کو پنجاب کا کپتان بنایا گیا ہے۔(۱۰) ائیر اس سے قبل دہلی کیپٹل جبکہ راہل پنجاب کنگز کی کپتانی کر چکے ہیں۔ ہاردک کے لیے یہ آئی پی ایل میں کپتانی کا پہلا تجربہ ہوگا۔ ان کی کارکردگی پر ہندوستانی ٹیم انتظامیہ بھی گہری نظر رکھے گی کیونکہ وہ مستقل بولنگ نہ کرنے کی وجہ سے قومی ٹیم میں اپنی جگہ کھو چکے تھے۔

نئی دہلی :ہندوستان کے سابق کوچ روی شاستری کا خیال ہے کہ وراٹ کوہلی نے تمام طرز کی کرکٹ میں کپتانی سے دستبردار ہونے کا دانشمندانہ فیصلہ کیا، جس سے انہیں آنے والی انڈین پریمیئر لیگ میں خود کو بہتر انداز میں پیش کرنے میں مدد ملے گی۔ شاستری جو ہندوستانی کوچ کے طور پر اپنے دور میں کوہلی کی قائدانہ صلاحیتوں کو قریب سے جانتے اور سمجھتے تھے، تاہم محسوس کرتے ہیں کہ 33 سالہ بلے باز ٹیسٹ کرکٹ میں کپتان رہ سکتے تھے۔شاستری نے کہاکہ سچ پوچھیں تو مجھے لگتا ہے کہ کپتانی چھوڑنا بالواسطہ طور پر فائدہ مند ہو سکتا ہے۔ کپتانی کا دباؤ ان کے کندھوں سے اتر گیا ہے۔ کپتان سے جو توقع تھی وہ اب نہیں رہے گی۔ اب وہ اپنے آپ کو بہتر طریقے سے پیش کرسکتا ہے ، آزادانہ طور پر کھیل سکتا ہے اور مجھے لگتا ہے کہ وہ بھی ایسا کرنا چاہیں گے۔انہوں نے کہا کہ میرے خیال میں انہوں نے کپتانی چھوڑنے کا ایک دانشمندانہ فیصلہ کیا۔ مجھے اچھا لگتا اگر وہ ہندوستان کی ٹیسٹ ٹیم کے کپتان رہتے لیکن یہ ان کا ذاتی انتخاب ہے۔کوہلی نے آئی پی ایل 2021 کے بعد رائل چیلنجرز بنگلور کی کپتانی چھوڑ کر سب کو حیران کر دیا۔اس کے بعد انہوں نے جنوبی افریقہ کے دورے میں ہندوستان کی 1-2 سے شکست کے بعد ٹیسٹ ٹیم کی کپتانی سے استعفیٰ دے دیا، جبکہ اس سے قبل انہوں نے گزشتہ سال ورلڈ کپ کے بعد T20I کی کپتانی سے استعفیٰ دے دیا تھا۔ اس کے بعد کرکٹ بورڈ آف انڈیا (بی سی سی آئی) نے انہیں ون ڈے ٹیم کی کپتانی سے ہٹا دیا۔شاستری نے کہاکہ میرے خیال میں سب سے اہم بات یہ ہے کہ ان کی کارکردگی کے بارے میں فکر نہ کریں، کیونکہ انہوں نے عالمی کرکٹ میں خود کو ثابت کرنے کے لیے کافی کام کیا ہے۔انہوں نے کہا کہ کھیل کے تینوں فارمیٹس میں ٹیم کی کپتانی کرنا آسان کام نہیں ہے، خاص طور پر ہندوستان کی کپتانی جہاں آپ سے بہت سی توقعات وابستہ ہو تی ہیں۔

نئی دہلی :آئی پی ایل 2022 کے آغاز سے قبل مہندر سنگھ دھونی نے بڑا فیصلہ کیا ہے۔ انہوں نے چنئی سپر کنگز کی کپتانی رویندر جڈیجہ کو سونپ دی ہے۔ یہ جانکاری جمعرات کو چنئی سپر کنگز نے دی۔ دھونی نے اپنے فیصلے سے پوری دنیائے کرکٹ کو حیران کر دیا ہے۔ چنئی نے ایک بیان جاری کرتے ہوئے کہاکہ ایم ایس دھونی نے چنئی سپر کنگز کی کپتانی سے دستبردار ہونے کا فیصلہ کیا ہے اور رویندر جڈیجہ کو ٹیم کی قیادت کے لیے منتخب کیا ہے۔ جڈیجہ 2012 سے چنئی سپر کنگز کا لازمی حصہ ہیں، جو CSK کی قیادت کر رہے ہیں۔ ایسا کرنے والے تیسرے کھلاڑی۔ دھونی اس سیزن اور اس کے بعد بھی چنئی سپر کنگز کی نمائندگی کرتے رہیں گے۔مہندر سنگھ دھونی چنئی کے لیے سب سے کامیاب کپتان ثابت ہوئے ہیں اور وہ اپنی کپتانی میں چار بار چنئی کے لیے آئی پی ایل ٹائٹل جیت چکے ہیں۔ چنئی نے 2010، 2011، 2018 اور 2021 میں آئی پی ایل ٹرافی جیتی۔ اس کے علاوہ ٹیم کئی بار فائنل میں بھی پہنچی لیکن ٹائٹل سے محروم رہی۔ دھونی کی کپتانی میں چنئی آئی پی ایل کی سب سے بڑی ٹیم بن کر ابھری اور اب تک اپنا دبدبہ برقرار رکھا ہے۔ یہ دیکھنا باقی ہے کہ جڈیجہ ٹیم کی قیادت کیسے کریں گے اور ٹیم کیسی کارکردگی دکھائے گی۔ جدیجہ بھی گزشتہ کئی سالوں سے ٹیم کے لیے بہت اہم کھلاڑی ثابت ہوئے ہیں۔ اس بار وہ ایک نئے کردار میں نظر آئیں گے۔چنئی کے مطابق گرچہ دھونی نے کپتانی جڈیجہ کو سونپ دی ہو لیکن وہ بطور کھلاڑی ٹیم کے ساتھ جڑے رہیں گے۔ اس کا فائدہ ٹیم کو ضرور ملے گا۔ دھونی نہ صرف کپتانی سے ٹیم کو آگے لے جاتے ہیں بلکہ ایک بہترین فنشر کا کردار بھی ادا کرتے ہیں۔ گزشتہ سیزن میں انہوں نے اپنی تیز اننگز سے ٹیم کو فائنل تک پہنچانے میں اہم کردار ادا کیا تھا۔

نئی دہلی :ممبئی میں ہفتہ سے شروع ہونے والی انڈین پریمیئر لیگ (آئی پی ایل) اس سال شائقین کو اسٹیڈیم میں بیٹھ کر میچوں سے لطف اندوز ہوتے ہوئے دیکھیں گے۔منتظمین نے بدھ کو کہا کہ اسٹیڈیم کی کل گنجائش کا 25 فیصد شائقین کے داخلے کی اجازت دی گئی ہے۔آئی پی ایل 2022 کے پہلے میچ میں ہفتہ کو وانکھیڑے اسٹیڈیم میں دفاعی چمپئن چنئی سپر کنگز کا مقابلہ کولکاتہ نائٹ رائیڈرز سے ہوگا۔آئی پی ایل کی ایک ریلیز میں کہا گیا ہے کہ آئی پی ایل کا یہ میچ بہت خاص ہو گا کیونکہ کورونا کی وجہ سے ایک وقفے کے بعد شائقین کو دوبارہ اسٹیڈیم میں داخلے کی اجازت ہوگی۔ ریلیز کے مطابق ممبئی، نوی ممبئی اور پونے کے اسٹیڈیم میں میچ کھیلے جائیں گے، جس میں کورونا پروٹوکول کے مطابق اسٹیڈیم کی گنجائش کا 25 فیصد لوگ اسٹیڈیم میں بیٹھ کر میچ دیکھ سکیں گے۔آئی پی ایل میں دو نئی ٹیم لکھنؤ سپر جائنٹس اور گجرات ٹائٹنس کے شامل ہونے سے اس سیزن میں کل 74 میچ ہوں گے۔لیگ مرحلے کے لیے ٹکٹوں کی آن لائن فروخت بدھ سے شروع ہوگئی۔

دبئی :ہندوستان کے اسٹار کھلاڑی رویندرا جڈیجہ ایک بار پھر آئی سی سی ٹیسٹ رینکنگ میں بہترین آل راؤنڈر بن گئے ہیں۔ آئی سی سی نے بدھ کو یہ معلومات دی۔ اس فہرست میں ویسٹ انڈیز کے جیسن ہولڈر دوسرے اور روی چندرن اشون تیسرے نمبر پر ہیں۔ جڈیجہ نے سری لنکا کے خلاف ٹیسٹ سیریز میں گیند اور بلے سے شاندار کارکردگی کا مظاہرہ کیا۔ انہوں نے پہلے میچ میں ناقابل شکست 175 رنز بنائے جبکہ 9 وکٹیں حاصل کیں۔ آئی سی سی ٹیسٹ بیٹنگ رینکنگ میں ہندوستان کو کوئی خاص فائدہ نہیں ہوا ہے۔ روہت شرما 7ویں، وراٹ کوہلی 9ویں اور رشبھ پنت 10ویں نمبر پر ہیں۔ بلے بازوں کی فہرست میں آسٹریلیا کے مارنس لبوشین پہلے، انگلینڈ کے کپتان جو روٹ تیسرے نمبر پر ہیں۔گیندبازوںکی بات کریں تو آسٹریلوی کھلاڑی پیٹ کمنس آئی سی سی ٹیسٹ رینکنگ میں پہلے نمبر پر ہیں۔ جبکہ ہندوستان کے روی چندرن اشون اور فاسٹ بولر جسپریت بمراہ گیند بازوں کی فہرست میں دوسرے اور چوتھے نمبر پر ہیں۔ جنوبی افریقہ کے فاسٹ باؤلر کاگیسو ربادا پانچ مقام کے فادئے کے ساتھ ٹاپ 10 میں پہنچ گئے ہیں۔ بولنگ کی فہرست میں پاکستان کے شاہین آفریدی ایک مقام کے نقصان کے ساتھ چھٹے نمبر پر پہنچ گئے ہیں۔ اس کے علاوہ آسٹریلوی فاسٹ بولر مچل اسٹارک 15ویں نمبر پر پہنچ گئے ہیں۔بلے بازوں کی ٹیسٹ رینکنگ میں سب سے زیادہ فائدہ پاکستان کے بابر اعظم کو ہوا ہے۔ بابر اعظم آسٹریلیا کے خلاف اپنے کرکٹ کیریئر کی بہترین اننگز کی بدولت بدھ کو جاری کردہ آئی سی سی کی تازہ ترین ٹیسٹ رینکنگ میں پانچویں نمبر پر پہنچ گئے۔ بابر ٹاپ 10 بلے بازوں میں پاکستان کے واحد کھلاڑی ہیں۔ پاکستان کے محمد رضوان اور آسٹریلیا کے عثمان خواجہ نے بھی بڑی چھلانگ لگائی ہے۔ رضوان آسٹریلیا کے ڈیوڈ وارنر کے ساتھ مشترکہ طور پر 11 ویں نمبر پر پہنچ گئے ہیں۔ جبکہ عثمان خواجہ 13ویں نمبر پر پہنچ گئے ہیں۔

نئی دہلی:سال 2022 میں ٹی ٹوئنٹی فارمیٹ میں ہونے والے ایشیا کپ کی تاریخوں کا اعلان کر دیا گیا ہے۔ یہ ٹورنامنٹ 27 اگست سے شروع ہوگا جس کا فائنل 11 ستمبر کو کھیلا جائے گا۔ ایشین کرکٹ کونسل (اے سی سی) نے یہ فیصلہ سالانہ اجلاس (AGM) میں کیا ہے۔ تاہم مکمل شیڈول اور گروپ کے بارے میں ابھی تک معلومات دستیاب نہیں ہیں۔واضح رہے کہ سال 1984 میں شروع ہونے والا ایشیا کپ پہلے ون ڈے ٹورنامنٹ تھا لیکن سال 2016 میں اسے پہلی بار ٹی ٹوئنٹی فارمیٹ میں کھیلا گیا۔ اس سال ایشیا کپ دوسری بار ٹی ٹوئنٹی فارمیٹ میں کھیلا جائے گا۔ اسے پہلے سال 2020 میں کھیلا جانا تھا لیکن کورونا وائرس کی مسلسل لہروں کے درمیان اب تک اس کا انعقاد نہیں ہوسکا۔ اس بار اس کے ایونٹ کے شیڈول کا حتمی فیصلہ ایشین کرکٹ کونسل کی اے جی ایم میں کیا گیا۔اب تک 14 مرتبہ ایشیا کپ کا انعقاد کیا جا چکا ہے۔ یہ ٹورنامنٹ ہر دو سال بعد منعقد کیا جاتا ہے، حالانکہ اس دورانیے میں ہمیشہ کسی نہ کسی وجہ سے اضافہ ہوتا رہا ہے۔ کبھی کبھی چار سال کے عرصے میں بھی ایسا ہوا ہے۔ اب تک منعقدہ کل 14 مقابلوں میں ہندوستان سب سے کامیاب ٹیم رہی ہے۔ ہندوستان نے یہ ٹورنامنٹ 7 بار جیتا ہے۔ سری لنکا 5 بار اور پاکستان 2 بار یہ ٹائٹل جیت چکا ہے۔ بنگلہ دیش ایک بار بھی ایشیا کپ نہیں جیت سکا۔ حالانکہ وہ تین بار رنر اپ رہا ہے۔ایشیا کپ 2022 میں چھ ٹیمیں شرکت کریں گی۔ ہندوستان ، سری لنکا، پاکستان، بنگلہ دیش اور افغانستان کے ساتھ کوالیفائر ٹیم ہوگی۔ کوالیفائر میچز متحدہ عرب امارات، کویت، سنگاپور اور ہانگ کانگ کے درمیان کھیلے جائیں گے۔ یہ میچز 20 اگست 2022 سے ٹورنامنٹ کے آغاز سے عین قبل کھیلے جائیں گے۔

نئی دہلی:ایشین کرکٹ کونسل (اے سی سی) کے صدر کے طور پر بی سی سی آئی کے سکریٹری جے شاہ کی میعاد میں مزید ایک سال کی توسیع کر دی گئی ہے۔ اب وہ 2024 تک اے سی سی کے صدر رہیں گے۔ یہ فیصلہ ACC کی سالانہ جنرل میٹنگ (AGM) میں لیا گیا ہے۔ یہ میٹنگ ہفتے کے روز کولمبو میں ہوئی۔شاہ کو گزشتہ سال جنوری میں اس عہدے پر مقرر کیا گیا تھا۔ ان سے پہلے بنگلہ دیش کرکٹ بورڈ کے صدر نجم الحسن اس عہدے پر فائز تھے۔ اس بار شاہ کی مدت ملازمت میں توسیع کی تجویز سری لنکا کرکٹ کے صدر شمی سلوا نے پیش کی جس کی اے سی سی کے تمام اراکین نے متفقہ طور پر حمایت کی۔ہفتہ کو اے سی سی کے اجلاس سے خطاب کرتے ہوئے شاہ نے کہاکہ اے سی سی کی توجہ اس خطے (ایشیا) میں کھیل کی ترقی کو آگے بڑھانا ہے۔ شاہ نے اپنی مدت ملازمت میں توسیع کے لیے AGM میں سب کا شکریہ بھی ادا کیا۔ انہوں نے کہاکہ میں اے سی سی میں اپنے تمام قابل احترام ساتھیوں کا شکریہ ادا کرنا چاہتا ہوں جنہوں نے مجھ پر اعتماد کیا اور مجھے اے سی سی کی طرف سے شروع کیے گئے تمام کام کو مکمل کرنے کے قابل سمجھا۔

نئی دہلی:ہندوستانی کرکٹ ٹیم کا ڈومیسٹک سیزن ختم ہو گیا ہے۔ روہت شرما کی کپتانی میں ہندوستان کی کارکردگی شاندار رہی۔ اب آئی پی ایل بھی چند دنوں میں شروع ہونے والا ہے۔ آئی پی ایل 2022 کے حوالے سے کرکٹ شائقین میں زبردست جوش وخروش ہے۔ اس سب کے درمیان آئی پی ایل کے کچھ اصولوں میں بھی تبدیلیاں کی گئی ہیں۔ سب سے بڑی تبدیلی یہ ہے کہ اگر کورونا کا قہر ایک بار پھر شروع ہوتا اور کئی ٹیمیں اس سے متاثر ہوتی ہیں اور کھیلنے کے قابل نہ رہتیں تو ایسی صورتحال میں میچ بعد میں ہو سکتا ہے۔ اگر میچ کے ری شیڈولنگ میں کوئی مسئلہ ہے تو بی سی سی آئی اسے اپنی ٹیکنیکل ٹیم کے پاس بھیجے گا اور یہ کمیٹی اس پر فیصلہ کرے گی۔مختلف ویب سائٹس پر شائع ہونے والی خبروں کے مطابق اگر کسی ٹیم میں 12 سے کم کھلاڑی کھیل رہتے ہیں تو میچ کو ری شیڈول کرنے پر غور کیا جائے گا۔ تاہم کمیٹی کا فیصلہ حتمی تصور کیا جائے گا۔ پہلے ایسا کوئی اصول نہیں تھا۔ اس سے پہلے اگر کوئی ٹیم کھیل کے لیے دستیاب نہیں ہوتی تھی، تو اسے ہاری ہوئی ٹیم سمجھا جاتا تھا اور سامنے والی ٹیم کو 2 پوائنٹس دیے جاتے تھے۔ اس کے علاوہ آئی پی ایل میں کئی اور بڑی تبدیلیاں دیکھنے کو ملیں گی۔عام طور پر ٹیم کو ایک اننگز میں T20 میں ایک DRS ملتا تھا، جسے اب بڑھا کر دو کر دیا گیا ہے۔ اس کے علاوہ بی سی سی آئی کی جانب سے ٹیموں کو یہ بھی کہا گیا ہے کہ کیچ آؤٹ ہونے کی صورت میں نیا بلے باز اسٹرائیک لے گا ، گرچہ بلے بازکریز عبور کرلیا ہو۔ سوائے اس کے کہ وہ گیند اوور کی آخری گیند ہو۔اگر کسی میچ میں سپر اوور کے ذریعے ٹائی کو روکنا ممکن نہ ہو تو لیگ میچوں میں ٹاپ نمبر پر آنے والی ٹیم کو فاتح قرار دیا جائے گا۔ اس کے علاوہ یہ بھی کہا جا رہا ہے کہ پونے اور ممبئی کے علاوہ احمد آباد میں بھی آئی پی ایل کا انعقاد کیا جا سکتا ہے۔ معلومات کے مطابق احمد آباد میں پلے آف میچز کا انعقاد کیا جا سکتا ہے۔

ہیملٹن:اوپنر سدرہ امین کی 104 رنز کی اننگز بھی پاکستان کے لیے کام نہ آسکی کیونکہ بنگلہ دیشی ٹیم نے پیر کو پاکستان کونو رنز سے شکست دے کر آئی سی سی ویمنز ون ڈے ورلڈ کپ میں اپنی پہلی جیت درج کی۔جیت کے لیے 235 رنز کے تعاقب میں امین نے پاکستان کو تیز شروعات فراہم کی اور پہلی وکٹ کے لیے ناہیدہ خان (43 رنز) کے ساتھ 91 رنز کی شراکت کے بعد بسمہ معروف (31 رنز) کے ساتھ 64 رنز کی شراکت بھی کی۔امین کی شاندار بلے بازی سے پاکستانی ٹیم ہدف کی جانب بڑھ رہی تھی اور اس نے دو وکٹوں پر 183 رنز بنالیے تھے۔ لیکن فہیمہ خاتون (38 رنز دے کر 3وکٹ) نے تیزی سے تین وکٹیں لے کر میچ کا رخ ہی بدل دیا۔پاکستان نے صرف پانچ رنز کے اندر اپنے پانچ بلے بازگنوادئیے اور اس کا اسکور سات وکٹ پر 188 ہوگیا۔ اس کے بعد پوری ٹیم نو وکٹوں پر 225 رنز ہی بنا سکی۔ پہلی بار ویمن ورلڈ کپ کھیلنے والی بنگلہ دیش کو اپنے پہلے دو میچوں میں جنوبی افریقہ اور نیوزی لینڈ کے ہاتھوں شکست کا سامنا کرنا پڑا تھا جبکہ پاکستان کو اپنے چوتھے میچ میں چوتھی شکست کا سامنا کرنا پڑا تھا۔اس کے علاوہ خواتین ورلڈ کپ میں پاکستان کی یہ مسلسل 18ویں شکست ہے۔ قبل ازیں بیٹنگ کی دعوت ملنے کے بعد بنگلہ دیش نے فرجانہ کے 71 اور شرمین اختر (44) اور کپتان نگار سلطانہ (46) کی مفید شراکت کی بدولت سات وکٹوں پر 234 رنز بنائے۔ فرجانہ نے سلطانہ کے ساتھ تیسری وکٹ کے لیے 96 رنز کی شراکت قائم کر کے بنگلہ دیش کے مضبوط اسکور کی بنیاد رکھی۔

بنگلور:بنگلور کے ایم چناسوامی اسٹیڈیم میں کھیلے گئے دوسرے ٹیسٹ میں ہندوستان نے سری لنکا کو 238 رنز سے شکست دے دی۔ نیز ٹیم انڈیا نے ٹیسٹ سیریز 2-0 سے جیت لی۔ اس جیت کے ساتھ ہی ہندوستان کے ورلڈ ٹیسٹ چمپئن شپ میں 12 پوائنٹس ہو گئے۔ ٹیم انڈیا نے اپنی دوسری اننگز 303 رنز پر ڈکلیئر کر دی تھی اور مہمان ٹیم کو 450 رنز کا ہدف دیا تھا۔ جواب میں سری لنکن ٹیم 208 رنز پر ڈھیر ہوگئی۔ سری لنکا کی جانب سے کپتان دیموتھ کرونارتنے نے سنچری بنائی۔ لیکن دوسری طرف سے کسی نے اس کا ساتھ نہیں دیا۔پہلی اننگز میں 109 رنز پر آل آؤٹ ہونے کے بعد سری لنکا کے بلے بازوں کو دوسری اننگز میں بہتر کارکردگی کی ضرورت تھی۔ لیکن ایک بار پھر وہ ایسا کرنے میں ناکام رہے۔ تاہم کپتان دیموتھ کرونارتنے ایک طرف کھڑے رہے۔ انہوں نے 174 گیندوں پر 15 چوکوں کی مدد سے 107 رنز کی شاندار اننگز کھیلی۔ ٹیسٹ کرکٹ میں یہ ان کی 14ویں سنچری ہے۔ ان کے علاوہ کوسل مینڈس نے 60 گیندوں پر 54 رنز بنائے۔سری لنکا کے آٹھ بلے باز دوہرے ہنسدے میں بھی نہیں پہنچ سکے۔ لاہیرو تھریمانے 00، اینجلو میتھیوز 01، دھننجے ڈی سلوا 04 اور نروشن ڈکویلا 12 رنز بنانے کے بعد آؤٹ ہوئے۔ نیز چارتھ اسالنکا 05، لاستھ امبولڈینیا 02، سورنگا لکمل 01 اور وشوا فرنینڈو 02 رنز بنا کر آؤٹ ہوئے۔

دبئی :ہندوستان کے رویندر جڈیجہ نے موہالی میں سری لنکا کے خلاف پہلے ٹیسٹ میں شاندار کارکردگی کے بعد آئی سی سی ٹیسٹ آل راؤنڈرز کی درجہ بندی میں پہلے نمبر پر پہنچ گئے ہیں۔آئی سی سی نے ایک بیان میں کہاکہ سری لنکا کے خلاف حالیہ ٹیسٹ سیریز میں رویندر جڈیجہ کی کارکردگی شاندار رہی۔ جس کی وجہ سے وہ ایم آر ایف ٹائرز آئی سی سی مینز پلیئرز ٹیسٹ رینکنگ میں پہلے نمبر پر پہنچ گئے ہیں۔جڈیجہ کے 175 ناٹ آؤٹ نے انہیں بلے بازی کی درجہ بندی میں 54 ویں سے 37 ویں نمبر پر 17 مقام کی چھلانگ لگانے میں مدد کی۔ اس کے بعد وہ نو وکٹیں لے کر گیندبازوںکی درجہ بندی میں 17ویں نمبر پر پہنچ گئے۔ جس کی و جہ سے وہ جیسن ہولڈر کی جگہ سرفہرست ٹاپ آل راؤنڈر بن گئے۔ ہولڈر فروری 2021 سے پہلے نمبر پر رہے۔ جڈیجہ اگست 2017 میں بھی ٹاپ پر پہنچے تھے اور ایک ہفتہ تک رہے۔ہندوستان نے پہلا ٹیسٹ اننگز اور 222 رنز سے جیتا تھا۔ جڈیجہ کو ’پلیئر آف دی میچ‘ قرار دیا گیا۔اسی فہرست میں ہندوستان کے روی چندرن اشون تیسرے نمبر پر ہیں جبکہ اکچھرپٹیل 14 ویں نمبر پر ہیں۔ اکچھر نے چوٹ کی وجہ سے موہالی ٹیسٹ نہیں کھیلا تھا۔بلے بازوں میں وراٹ کوہلی دو مقام کے فائدے کے ساتھ پانچویں نمبر پر پہنچ گئے ہیں جبکہ ہندوستانی کپتان روہت شرما چھٹے نمبر پر ہیں۔موہالی میں 96 رنز بنانے والے رشبھ پنت دسویں نمبر پر ہیں۔آسٹریلیا کے مارنس لبوشین ٹاپ پر ہیں۔گیند بازوں کی فہرست میں اشون دوسرے نمبر پر ہیں جبکہ جسپریت بمراہ دسویں نمبر پر ہیں۔ آسٹریلیا کے پیٹ کمنس بدستور سر فہرست ہیں۔

نئی دہلی: دنیا کے عظیم اسپنرز میں سے ایک آسٹریلیا کے شین وارن انتقال کر گئے۔ ان کی عمر 52 سال تھی۔ فوکس اسپورٹس نیوز کے مطابق وارن تھائی لینڈ کے کوہ ساموئی میں تھے۔ خیال کیا جاتا ہے کہ انہیں دل کا دورہ پڑا تھا۔ وارن کی انتظامیہ کی ٹیم کی جانب سے جاری کردہ بیان کے مطابق شین کوہ ساموئی کے ایک ولا میں بے ہوشی کی حالت میں پائے گئے۔ بعد میں انہیں بچایا نہ جا سکا۔
وارن کے پاس سری لنکا کے متھیا مرلی دھرن کے بعد سب سے زیادہ وکٹیں لینے کا ریکارڈ ہے۔ انہوں نے 1992 سے 2007 تک 145 ٹیسٹ میچ کھیلے جس میں انہوں نے 25.41 کی بالنگ اوسط سے 708 وکٹیں حاصل کیں۔ مرلی دھرن نے ٹیسٹ میں 800 وکٹیں حاصل کیں۔ 1993 سے 2005 تک انہوں نے 194 ون ڈے میچوں میں 293 وکٹیں حاصل کیں۔ انہوں نے 1999 کرکٹ ورلڈ کپ کی فاتح آسٹریلوی ٹیم میں اہم کردار ادا کیا۔ وارن مرلی دھرن کے بعد ٹیسٹ اور ون ڈے میچوں میں 1000 بین الاقوامی وکٹیں لینے والے دنیا کے دوسرے بولر بن گئے۔

شین وارن نے 1992 میں بھارت کے خلاف سڈنی ٹیسٹ میں اپنے بین الاقوامی کیریئر کا آغاز کیا۔ انہوں نے اپنا آخری ٹیسٹ میچ جنوری 2007 میں سڈنی میں ہی انگلینڈ کے خلاف کھیلا۔ جب وارن ریٹائر ہوئے تو آسٹریلیا کے تین دیگر کھلاڑی بھی ریٹائر ہو چکے تھے۔ ان میں گلین میک گرا، ڈیمین مارٹن اور جسٹن لینگر شامل تھے۔ کرکٹ سے ریٹائرمنٹ کے بعد وارن نے ہیمپشائر کاؤنٹی کرکٹ کلب کے لیے فرسٹ کلاس کرکٹ کھیلی۔ اس کے بعد سال 2008 میں انہوں نے آئی پی ایل ٹیم راجستھان رائلز کے کوچ اور کپتان کا کردار ادا کیا اور ٹیم کو آئی پی ایل میں چیمپئن بنوایا۔
وارن دنیا کے واحد کھلاڑی ہیں جنہوں نے ٹیسٹ میں 3000+ رنز بنائے لیکن کبھی سنچری نہیں بنائی۔ میدان سے باہر ان کا کیریئر کئی بار تنازعات کا شکار رہا ۔ وارن نے اپنا آخری ٹویٹ 12 گھنٹے پہلے ہی کیا تھا۔ اس ٹویٹ میں انہوں نے روڈ مورش کے انتقال پر تعزیت کا اظہار کیا تھا۔