بی جے پی 2 فروری کو دہلی میں تشددکی تیاری میں،الیکشن کمیشن نوٹس لے:سنجے سنگھ

نئی دہلی: عام آدمی پارٹی کے سینئر لیڈر اور راجیہ سبھا ممبر پارلیمنٹ سنجے سنگھ نے بھارتیہ جنتا پارٹی پرسنگین الزام لگاتے ہوئے دعویٰ کیاہے کہ 2 فروری کو بی جے پی دہلی میں بڑا ہنگامہ کرنے کی تیاری میں ہے جس سے حالات خراب ہوں اور انتخابات ٹل جائیں۔عام آدمی پارٹی ہیڈ کوارٹر میں سنجے سنگھ نے پریس کانفرنس کے دوران کہاہے کہ 2فروری کو بی جے پی دہلی میں بڑاہنگامہ کرنے کی تیاری میں ہے۔ اس کے پہلے الیکشن کمیشن (EC) کو محتاط ہو جاناچاہیے کیونکہ وزیر داخلہ تو خود ہی تشددپھیلانے میں شامل ہیں، تو ان سے تو آپ توقع کر نہیں سکتے، تو اگر الیکشن کمیشن جانبداری کے ساتھ دہلی میں انتخابات کرانا چاہتا ہے تو اس کو اس معاملے کا نوٹس لینا چاہیے۔سنجے سنگھ نے دعویٰ کیاہے کہ ان کے پاس اس بات کے ثبوت ہیں اوروہ الیکشن کمیشن میں بھی اس بات کی شکایت کریں گے۔سنجے سنگھ نے کہاہے کہ وہاٹس ایپ پر ایسے بہت ساری ویڈیوز اورمیسجز چلائے جا رہے ہیں اور 2 تاریخ کو شاہین باغ اور جامعہ کے علاقے میں پہنچ کر ایک بڑا ہنگامہ بھارتیہ جنتا پارٹی کراناچاہتی ہے۔بھارتیہ جنتا پارٹی دہلی میں شکست کے خوف سے بوکھلائی ہوئی ہے اور اسی وجہ سے وہ دہلی کا الیکشن ٹالناچاہتی ہے۔