اے ایم یو وائس چانسلر نے ای ٹیچنگ پر زور دیا

علی گڑھ:کووِڈ-19 کے پیش نظر علی گڑھ مسلم یونیورسٹی (اے ایم یو)کے وائس چانسلر پروفیسر طارق منصور نے یونیورسٹی اساتذہ سے اپیل کی ہے کہ وہ ای میل اور دیگر الیکٹرانک وسائل کا استعمال کرکے طلبہ کی مدد کریں تاکہ کلاسیز کے نقصان کی تلافی ہوسکے۔وائس چانسلر نے کہا ’’کووِڈ-19 نے اساتذہ کے سامنے بھی ایک چیلنج پیدا کیا ہے ، لہٰذا اے ایم یو کے اساتذہ، تدریسی مواد طلبہ کو آن لائن مہیا کرائیں۔ ہر استاد کو یونیورسٹی ویب سائٹ کے ان کے متعلقہ ویب پیج پر تدریسی مواد کو پی ـڈی ایف کی شکل میں اپلوڈ کرنے کی سہولت فراہم کی گئی ہے‘‘۔ انھوں نے اساتذہ سے درخواست کی کہ وہ تدریسی مواد کو مسلسل اپلوڈ کریں اور وہاٹس ایپ یا ای میل کے ذریعہ بھی مہیا کرائیں۔اس کے علاوہ لیکچرز کی پی پی ٹی جو اساتذہ کلاس روم میں استعمال کرتے ہیں اسے بھی طلبہ کو آن لائن دستیاب کرایا جائے۔ پروفیسر طارق منصور نے مزید کہاکہ آن لائن موکس (MOOCs) پورٹل جیسے کہ سویم (swayam.gov.in ) ، نیشنل ریپوزیٹری آف اوپن ایجوکیشنل ریسورسیز (nroer.gov.in) وغیرہ کے ذریعہ فراہم کئے جانے والے اوپن ایکسیز مواد سے متعلق اطلاع بھی یونیورسٹی کی ویب سائٹ پر اپلوڈ کی جائے گی۔ وائس چانسلر نے یہ بھی کہاکہ چونکہ کئی کورسوں میں پروجیکٹ؍اسائنمنٹ بھی جمع کرنا ہوتا ہے اس لئے طلبہ کو اجازت دی جانی چاہئے کہ وہ اپنے پروجیکٹ آن لائن جمع کرسکیں۔ انھوں نے زور دیتے ہوئے کہاکہ سبھی اساتذہ اس بات کو یقینی بنائیں کہ ان کے تازہ ای میل ایڈریس اور فون نمبر، یونیورسٹی ویب سائٹ پر ان کے ویب پیج پر دستیاب رہیں۔

    Leave Your Comment

    Your email address will not be published.*