اے ایم کی دسویں اوربارہویں جماعت کے نتائج کا اعلان

علی گڑھ:علی گڑھ مسلم یونیورسٹی کے سینئر سکنڈری اسکول سرٹیفیکٹ حصہ دوئم (بارہویں جماعت) اور سیکنڈری اسکول سرٹیفکیٹ دسویں کلاس کے سالانہ امتحان کے نتائج کا اعلان کر دیاگیاہے ۔ بارہویں کلاس کے امتحان میں 2448 طلبہ و طالبات شامل ہوئے تھے جن میں سے 2406 طلبہ و طالبات نے کامیابی حاصل کی۔ بارہویں جماعت کا نتیجہ 98.28 فیصد رہا۔ نتائج کا اعلان کرتے ہوئے کنٹرولر مسٹر مجیب اللہ زبیری نے بتایا کہ سید حامد سینئر سکنڈری اسکول (بوائز) کے طالب علم سید قائم مہدی 500 میں 484 نمبر حاصل کرکے لڑکوں میں اور سینئر سکنڈری اسکول (گرلس) کی مریم لطیف 483 نمبر حاصل کرکے لڑکیوں میں پہلے مقام پر رہیں۔ انھوں نے بتایا کہ اس امتحان میں 2212 طلبہ و طالبات نے فرسٹ ڈویژن، 192طلبہ و طالبات نے سکنڈ ڈویژن اور دو طالب علموں نے تھرڈ ڈویژن حاصل کیا۔ دسویں کلاس کے امتحان میں 1425 طلبہ و طالبات شامل ہوئے تھے جن میں سے 1369 طلبہ و طالبات نے کامیابی حاصل کی۔ بارہویں جماعت کا نتیجہ 96.07 فیصد رہا۔ ایس ٹی ایس اسکول کے طالب علم عمران علی نے 500 میں 495 نمبر حاصل کرکے لڑکوں میں اول مقام حاصل کیا جبکہ ایس ٹی ایس اسکول کے ہی شہان عثمانی اور اے ایم یو سٹی اسکول کے ستیہ نارائن پاٹھک نے 494نمبر حاصل کرکے مشترکہ طور سے دوسرا مقام حاصل کیا۔لڑکیوں میں اے ایم یو گرلس اسکول کی اسریٰ سہیل 491 نمبر حاصل کرکے لڑکیوں میں پہلے مقام پر رہیں۔ وائس چانسلر پروفیسر طارق منصور نے کامیاب طلبہ و طالبات کو مبارکباد پیش کرتے ہوئے کہا کہ اس مشکل وقت میں طالب علموں نے اپنی محنت سے جو شاندار مظاہرہ کیا ہے اس کے لئے وہ مبارکباد کے مستحق ہیں۔ وائس چانسلر نے ان کے سنہرے مستقبل کے لیے نیک خواہشات کا اظہار کیا۔