عالمی تنظیم برائے فضلائے ازہر کے زیر اہتمام علماء ہند کے لئے آن لائن دعوتی وعلمی ٹریننگ کا آغاز

نئی دہلی:عالمی تنظیم برائے فضلائے ازہر انڈیا کے زیر اہتمام فارغین جامعہ ازہر کی نمائند ہ تنظیم ، عالمی تنظیم برائے فضلائے ازہر قاہر ہ مصر کے مرکزی دفتر سے پندرہ روزہ آن لائن علمی ودعوتی ٹریننگ کا آٖغازہوا،افتتاحی نشست سے خطاب کرتے ہوئے جامعہ ازہر کے سابق وائس چانسلر ممتاز عالم دین ڈاکٹرابراہیم صلاح ہدہد نے کہا کہ جامعہ ازہر اسلام كا ايك مستحکم اور مضبوط قلعہ ہے، جو سالہا سال سے اپنی ضیاء پاشیوں سے دنیا کو منو ر کئے ہوئے ہے ،جسے ہزار سال کی زياده مدت سے پوری دنيا کے مسلمانوں كے لئے مرجع ہونے کا شرف حاصل ہے ، یہ اپنے نام اور وصف کیساتھ دنیا کا سب سے بڑا مذہبی مرجع و ماخذ ہے ، اسکا منہج افراط و تفریط سے ہٹ کر اعتدال و سطیت پر مبنی ہے ، اس عظیم ادارے کو قبلہ علم بھی کہا جاتا ہے ، اسکے علاوہ یہ اپنے قیام کے دور ہی سے مرجع خلائق خاص وعام رہا ہے ،جہاں دنیا کے ہر کونے سے تشنگان علوم نبوت اپنی پیاس بجھانے کیلئے اسکا رخ کرتے رہے ہیں، یہاں سے فارغ ہونے والے طلبہ میں سے ہر دور میں اپنے وقت کے جید محدثین ، مفسرین ، متکلمین ،فلاسفہ ، اطباء ، علماءء ، فضلاء ، داعیان و مبلغین ، اور مفتیان کرام کی عظیم جماعت رہی ہے ، جنہوں نے دینی ،مذہبی ، ملی ،سماجی ، سیاسی ، علمی ،فکری ، دعوتی ، تبلیغی ،تصنیفی ،تالیفی ،تدریسی اور ثقافتی میدانوں میں نمایاں اور کلیدی کردار اداکیا ہے ، اور بحمدہ تعالی اب بھی وسیع پیمانے پر متعدد شعبوں میں اپنی گراں قدر خدمات انجام دے رہا ہے ، اور بالخصوص معتدل فكر اور وسطيت كى نشر و اشاعت میں اسكا بہت اہم كردار ہے ،امن و سلامتی كے قيام، مذہبی رواداری كے فروغ اور مختلف اديان و مذاہب كے درميان گفتگو کے اہتمام میں اسكى كوششيں اور كاوشیں قابل صد تحسين ہیں،یہ دین ودنیا کی تعلیم کا حسین سنگم ہے ۔
اس موقع پر عالمی تنظیم برائے فضلائے ازہر انڈیا کے نائب جنرل سکریٹری اورٹریننگ کوآرڈینیٹر مولانا فضل الرحمن ندوی ازہری نے بتایا کہ عزت مآب پروفیسر ڈاکٹر احمد طیب شیخ الازہر کی ایماء پر کورونا وائرس میں لاک ڈاؤن کے دوران فاصلاتی تعلیم کے مواقع سے فائدہ اٹھاتے ہوئےاس آن لائن ٹریننگ کاآغاز کیا گیا ہے،اسکا مقصد علماء کرام کو علمی وفکری اور دعوتی نقطہ نظر سے عصری اور تراثی معرفت سے ہم آہنگ کرنا ہے تاکہ وہ موجودہ دور میں علمی وفکری اور دعوتی قیادت کے لئے تیار ہو سکیں اور اپنے فرائض کو موجودہ دور میں بصیرت کیساتھ انجام دے سکیں ،اس ٹریننگ میں بھارت کے مختلف علاقوں سے 63 علماءاور خطباء حضرات شرکت کر رہے ہیں ، انہوں نے مزیدکہا کہ جامعہ ازہر کے چیدہ علماء کرام اور شیوخ اس میں ویڈیو کانفرنسنگ کے ذریعہ اپنے قیمتی محاضرات پیش کریں گے ، اور ہر لکچر کے بعد سوال وجواب کا بھی موقع ہوگا ،اور ٹریننگ کے اختتام پر مشارکین کو عالمی تنظیم برائے فضلائے ازہر قاہر ہ کی جانب سے توصیفی سند سے بھی نوازا جائیگا ۔

    Leave Your Comment

    Your email address will not be published.*