بنیاد تو لرزے گی کہ دیوار سے سر پھوڑ
دیوار تو ٹوٹے گی کہ دیوار سے سر پھوڑ
صحرا کو سمندر کی میسر نہ ہو صورت
اک موج تو اٹھے گی کہ دیوار سے سر پھوڑ
مانا کہ عمارت نہیں بدلے گی کسی طور
دہلیز تو بدلے گی کہ دیوار سے سر پھوڑ
ماحول پہ طاری ہے سیہ پوش خموشی
آواز تو گونجے گی کہ دیوار سے سر پھوڑ
تعمیر کی منزل ابھی ممکن نہ ہو لیکن
تصویر تو ابھرے گی کہ دیوار سے سر پھوڑ
منہ زور سی آندھی ہے فضاؤں پہ مسلط
کچھ گرد تو بیٹھے گی کہ دیوار سے سر پھوڑ
جگنو سے توقع نہ سہی چاند کی لیکن
اک رات تو گزرے گی کہ دیوار سے سر پھوڑ