23 اکتوبر, 2022

شعبۂ اردو، کالج آف کامرس، آرٹس اینڈ سائنس، پٹنہ

آئے دن اخبارات کے صفحات مختصر یا شاہ سرخیوں سے اِس بات کے لیے گراں بار ہوتے ہیں کہ کسی گانو یا شہر یا مخصوص علاقے میں کسی شخص نے مذہبی یا نسلی اعتبار سے کوئی نفرت انگیز بیان دیا اور اُس کے بعد وہاں فساد برپا ہو گیاجس میں دو چار دس سے لے کر سینکڑوں جانوں کا ہدف بننا ایک عام سی بات ہو گئی ہے۔دہلی شہر کے ۲۰۲۰ء کے فسادات کی پشت پر بھی ایسی ہی نفرت انگیزی کی بات کہی جاتی رہی ہے۔ہندستان کے آئین اور انتظامیہ کے لیے بنے ہوئے قوانین ایسی نفرت انگیزی سے مقابلہ کرنے اور اُسے پورے طور پر ختم کرنے کے لیے پابندِ عہد ہیں مگر مختلف سیاسی جماعتوں کی حکومتیں اور اُن کے زیرِ انتظام پولیس اور سوِل انتظامیہ مفاد کے ٹکراؤ یا مفاد میں ملوث ہونے کی وجہ سے کار گر اقدام نہیں کر پاتے۔اِس کے نتیجے میں ہزاروں معصوم لوگوں کی جانیں جاتی رہی ہیں اور ستم یہ ہے کہ تھوڑے وقفے کے ہنگامے کے بعد لوگ قصور واروں کو بھول بھی جاتے ہیں اور دنیا ایسے ہی چلتی رہتی ہے۔
یہ سمجھنا درست نہیں کہ بھارتیہ جنتا پارٹی کے بر سر اقتدار آنے کے بعد ہی نفرت انگیز سیاسی وسماجی تقریروں کا دور شروع ہوا۔تاریخ کے ایک طالب علم کو جنگِ آزادی کے دوران کیسے کیسے فرقہ پرستوں کے بیانات یاد ہیں۔آزادی کے بعد پروشوتم داس ٹنڈن کی نفرت انگیز تقریروں کو صوبائی اور مرکزی ایوانوں سے لے کر سڑکوں تک لوگوں نے ملاحظہ کیا ہے مگر وہ دور سیاسی ڈسپلین کا بھی تھا۔حکومت کے سارے اعضا کام کررہے تھے جس کے سبب ایک کی نفرت انگیزی پر ہزاروں کی محبت داریاں اُبھر کر سامنے آ جاتی تھیں۔اکثر یہ دیکھا گیا کہ سیاسی فائدہ حاصل کرنے کے لیے مقامی سطح پہ ایسی نفرت انگیزی کسی نے پیدا کی اور کبھی کبھار وہ مقامی سے لے کر اسمبلی اور پارلیامنٹ تک میں فتح یابی حاصل کرنے میں کامیاب رہا۔ مگر یہ بات اتنی عام نہ تھی کہ اس سے پورا ہندستان متاثر ہوجائے، یہ نفرت انگیزی بھی مقامی اور وقتی اثر یا فائدہ حاصل کرنے کے لیے کی جاتی تھی۔ اصحابِ دانش میں اس کے خلاف بھی حکومت اور انتظامیہ کو موردالزام ٹھہرانے کا ایک طور رہا مگر سب کچھ سیاست کے حاشیے پر ہی چلتا رہا۔
۱۹۸۴ء کے آس پاس بھارتیہ جنتا پارٹی نے جب جارحانہ انداز میں اپنے الیکشن کا نعرہ پیش کیا: ’’مندر وہیں بنائیں گے‘‘۔ اس وقت ایک طبقے کو اس بات کا احساس ہوگیا تھا کہ سیاسی زبان اور اس کی لفظیات میں واضح تبدیلی سامنے آرہی ہے۔ کمال تو یہ تھا کہ یہ تبدیلیاں جمہوری تقاضوں کے برخلاف سامنے آرہی تھیں مگر کم لوگوں کو اس بات کا دھیان رہا۔ اندرا گاندھی کے قتل کے بعد عام انتخاب میں کانگریس نے بھارتیہ جنتا پارٹی کو سب سے بری شکست تک بھلے پہنچا دیا مگر سیاسی زبان میں جو کڑواہٹ اور نفرت انگیزی شامل ہوگئی تھی، اس کی واضح کاٹ تیار نہیں کی گئی ۔ ۱۹۸۴ء سے ۱۹۹۰ء تک اور پھر ۱۹۹۲ء کے دورانیے کو نظر میں رکھیے تو سب کچھ واضح ہو جاتا ہے کہ بھلے مرکز میں کانگریس کی حکومت تھی مگر سماجی اعتبار سے پورے ملک میں عوامی سطح پر نفرت کا ایک ایسا ماحول تیار کردیا گیا تھا کہ پارلیامنٹ کی دو سیٹوں سے بڑھ کر دیکھتے دیکھتے بھارتیہ جنتا پارٹی مرکز میں اپنی طاقت ور موجودگی ثابت کرنے میں کامیاب ہوئی۔ مہنت اویدیہ ناتھ ، اوٗما بھارتی، سادھوی ریتمبھرا، ونَے کٹیار ، اشوک سنگھل، پروین توگڑیا جیسے سینکڑوں نام اس دوران سامنے آئے جن کی تقریروں پر قانون کے دائرے میں رہتے ہوئے حکومت اور انتظامیہ نے کارروائی کی ہوتی تو ہر روز ایک مقدمہ ہوتا اور انھیں مستقل طور پر جیل کی دیواروں کے سائے میں ہی اپنی زندگی گزارنی پڑتی مگر کانگریسی دورِ حکومت میں ایک چھپی ہوئی فرقہ پرستی ہمیشہ کام کرتی رہی جس کا سب سے خطرناک نمونہ بابری مسجد کا انہدام تھا۔ جب مرکزی حکومت کے پاس واضح طور پر صحیح اقدام اٹھانے کا شعور ثابت نہیں ہوسکا تھا۔

ہندستان کا آئین سیکولر بنیادوں پر قائم و دائم ہے۔ جمہوری اقدار اور مساوات کے ساتھ ایک دوسرے کے لیے تعظیم کے جذبے کو پسند کرتا ہے۔ مذہبی اور سماجی اعتبار سے کسی بھید بھائو کے لیے یہاں گنجایش نہیں ہے۔ دشواری یہ ہے کہ آئین کی قسم کھاکر بھی آئین کی حفاظت کرنے والوں کو بعض باتیں یاد نہیں رہتی ہیں اور چھوٹے بڑے مفاد کے چکر میں یہ لوگ اس کی دھجیاں اڑاتے ہوئے سماجی شیرازہ بندی کو بکھیرنے میں کامیاب ہوجاتے ہیں۔ بار بار مقامی عدالتوں سے لے کر عدالتِ عالیہ اور سپریم کورٹ تک لوگوں نے اپنی گزارشات پہنچائیں۔ کئی بار فوری ضرورت اور جان و مال کے نقصان کو بچانے کے لیے بھی لوگ بڑی عدالتوں کے دروازے پر گئے مگر جس موثر اقدام کی ضرورت تھی، نہ حکومتوں نے کیے اور نہ ہی انتظامیہ میں کوئی سگبگاہٹ آئی۔ دہلی شہر میں آگ بھڑکتی رہی مگر وہاں بھی کوئی فوری طور پر چارہ گر ثابت نہ ہوا۔ آئین کے مطابق انتظامیہ اور قانون سازیہ جب اپنے فرائض سے غفلت برتنے لگیں تو عوام کے پاس عدلیہ ہی ایک راستہ ہے اور لوگ بار بار بے بسی اور بے چارگی کے عالم میں سپریم کورٹ اور ہائی کورٹ پہنچتے رہے مگر واضح ہدایات کے فقدان میں نفرت پھیلانے والے عناصر کی مناسب سرزنش ہنوز نہیں ہوئی۔
گذشتہ روز سپریم کورٹ کے دو ججز کے۔ ایم۔ جوزف اور ریشی کیش رائے کی مشترکہ بینچ نے تین صوبوں کے تعلق سے ایک مقدمے کی سماعت کرتے ہوئے اپنے جو تاثرات پیش کیے، وہ نہ صرف یہ کہ حیرت انگیز تھے بلکہ سپریم کورٹ کے آئین کے محافظ ہونے کے ثبوت کے طور پر اسے لیا جاسکتا ہے۔ دونوں ججوں نے انتظامیہ اور خاص طور سے پولیس انتظامیہ کو سخت ہدایتیں دیں۔ انھوںنے اس بات پر تعجب کا اظہار کیا کہ اتنے حساس معاملوں پر پولیس کی کارروائی میں سستی اور کاہلی کیوں رہتی ہے۔ انھوںنے براہِ راست پولیس کو ذمے داری سونپتے ہوئے اس بات کے لیے متنبہ بھی کیا کہ اگر ایسی نفرت انگیزی کہیں بھی نظر آرہی ہے اور پولیس فوری طور پر سخت سے سخت ترین کارروائی نہیں کرتی ہے تو وہ سپریم کورٹ کی حکم عدولی قرار دی جائے گی۔

عدالت نے پولیس کو صاف صاف یہ بات بتائی کہ انھیں کسی درخواست کا انتظار نہیں کرنا چاہیے ۔ نفرت انگیز تقاریر پر فوری طور پر انھیں کارروائی کرنی چاہیے ۔ دونوں ججوں نے اس بات پر افسوس اور حیرت کا اظہار کیا کہ ایک سائنسی مزاج کی جدید سوسائٹی میں رہنے والے ہم لوگوں کی آنکھوںکے سامنے جو بیانات آرہے ہیں، اس کا مطلب ہے کہ ہم نے مذہب کو ایک ایسی جگہ پہنچا دیا ہے جہاں سے چند لوگ صرف نفرت کی کھیتی ہی کر سکتے ہیں۔ سپریم کورٹ کی واضح ہدایات اور فاضل ججوں کے بیانات سے ان لوگوں کو حوصلہ ملا ہے جو گذشتہ دنوں ایسی نفرت انگیزیوں کے سبب خود کو بے بس اور لاچار سمجھنے پر مجبور تھے۔ پولیس طرف داری میں ملوث نظر آرہی تھی اور حکومتیں اپنے سیاسی ایجنڈے پر کام کرتی نظر آتی رہی ہیں۔ صوبائی اور مرکزی حکومتوں کے اعلا عہدے دار بھی کہیں نہ کہیں ان نفرت انگیزیوں میں براہِ راست یا پوشیدہ طور پر شامل مانے جاتے رہے ہیں۔ جس کی وجہ سے پورے ملک میں رہ رہ کر مٹھی بھر لوگ نفرت کا ننگا ناچ کھیلنے کے لیے موجود رہے ہیں۔ سپریم کورٹ کا یہ فیصلہ شاید الگ الگ صوبوں میں پولیس انتظامیہ کو مفاد پرستی سے اوپر اٹھنے کا موقع فراہم کرے اور یہ بھی ممکن ہے کہ سیاسی مفاد کے باوجود مرکز سے لے کر صوبائی حکومتوں کو اس سلسلے میں عدم توجہی کو گھٹانا پڑے۔ آج کے سیاسی ماحول میں ایسے فیصلوں کا استقبال کیا جانا چاہیے ۔ ہر چند گذشتہ برسوں سے اعلاعدالتوں پر بھی سیاہ پرچھائیاں پھیلتی ہوئیں نظر آتی ہیں مگر ہندستان کے آئین اور اس آئین کے تحفظ کی ذمہ داری اٹھانے والے سپریم کورٹ میں بار بار ایسے مواقع آتے رہتے ہیں جب عوام کی حفاظت اور ان کے امن و سکون کے لیے کچھ بنیادی فیصلے کیے جاتے ہیں۔ خدا کرے سپریم کورٹ کے اس فیصلے کو پورے ملک کی حکومتیں صاف صاف سمجھ سکیں اور اس کے مطابق آیندہ اقدام کے لیے پابندِ عہد ہوں۔

(ایڈیٹر ممبئی اردو نیوز)
بات ’ ہیٹ اسپیچ ‘ اور سپریم کورٹ کی کریں گے ، اور بلقیس بانو کی بھی ۔
ادب میں مابعد جدیدیت کی ہوا چلی تھی تو لفظوں کے معنی بدلنے لگے تھے ، لیکن فکری اور نظری اختلاف کے اِس دور میں لفظوں کے معنی بدلے ہی نہیں جا رہے ہیں ، لوگوں پر نئے معنیٰ ، جو پہلے معنی کی تقریباً ضد ہوتے ہیں ، تھوپے جا رہے ہیں ! اب یہی دیکھ لیں کہ وہ جو زانی ہیں ، ریپسٹ ہیں ، قاتل ہیں ، اور مذہب کی بنیاد پر ایک حاملہ خاتون کے ساتھ بدترین فعل ، اور اس کی تین سال کی بیٹی کو ، پتھر پر جیسے کپڑا پٹکا جاتا ہے ، اس طرح پٹک پٹک کر قتل کرنے ، اور پیٹ سے جنین نکال کر ترشولوں پر اچھالنے کے مجرم ہیں ’’ اچھے چال چلن ‘‘ کی سند پا رہے ہیں ۔ اور سند ہی نہیں پا رہے ہیں باقاعدہ جیل کی سلاخوں سے باہر آ رہے ہیں ، بری کیئے جا رہے ہیں ، ہار اور پھول سے لادے جا رہے اور مٹھائیاں کھا کر خوشیاں منا رہے ہیں ! ذکر مظلوم خاتون بلقیس بانو کا ہے کہ ایک لمبی اذیت سے گذرنے ، اور طویل مدت کے بعد انصاف پانے کے بعد اب وہ پھر سے ڈری اور سہمی ہوئی ہے ، اس لیے کہ اس کے مجرم آزاد کر دیے گیے ہیں ۔ یقیناً اس کی آنکھوں کے سامنے گجرات ۲۰۰۲ء کا وہ خونی منظر کسی فلم کی طرح گھوم رہا ہوگا ، جس میں یہ گیارہ مجرمین جو ’’ اچھے چال چلن ‘‘ کی سند پا کر رہا ہوئے ہیں ، خوف ناک کردار ہیں ، ایسے کردار جن کا بلقیس بانو کی دنیا کو اجاڑنے میں گھناؤنا ہاتھ ہے ۔ ہم سب جانتے ہیں کہ ۱۵، اگست کے روز ، آزادی کے امرت مہوتسو پر ، گجرات کی سرکار نے بلقیس بانو کے مجرموں کو ’’ اچھے چال چلن ‘‘ کی سند دے کر رہا کر دیا تھا ، لیکن یہ بات بہت کم لوگ جانتے ہیں کہ یہ فیصلہ گجرات سرکار کا تنہا لیا گیا فیصلہ نہیں تھا ، اُسے مرکزی وزارتِ داخلہ کی اجازت یا منظوری حاصل تھی ۔ آسان لفظوں میں یہ کہہ لیں کہ گجرات کی حکومت نے مرکزی حکومت کی مرضی سے بلقیس بانو کے مجرموں کو رہا کیا تھا ۔ ۱۵، اگست سے لے کر ۱۸، اکتوبر تک مرکزی سرکار اپنے ہونٹ سیئے ہوئے تھی ، بلقیس بانو معاملہ میں اس کا کوئی ردعمل سامنے نہیں آیا تھا ، اور نہ ہی اس معاملہ میں اس کا ہاتھ ظاہر ہوا تھا ، لیکن جب بلقیس بانو کے مجرموں کی رہائی کے خلاف ، سپریم کورٹ میں ترنمول کانگریس کی رکن راجیہ سبھا مہوا موئترا ، سی پی ایم کی شبھاسنی علی ، سماج سیویکا ووکھین ورما اور سرفروشی فاؤنڈیشن سے وابستہ و گجرات فسادات پر آنکھیں کھولنے والی کتاب ’’ اناٹومی آف ہیٹ ‘‘ کی مصنفہ ریوتی لال کی درخواست پر شنوائی ہوئی تو پتہ چلا کہ مرکزی وزارتِ داخلہ ، مطلب مرکز کی نریندر مودی کی سرکار ، ان مجرموں کی رہائی کے پیچھے ہے ! گجرات حکومت نے اور خود مرکزی سرکار کی طرف سے اس کے ایک افسر نے ، سپریم کورٹ میں جو حلف نامے داخل کیے ، ان سے جہاں مرکزی حکومت کا کردار سامنے آیا ، وہیں اِ ن مجرموں کے ’’ اچھے چال چلن ‘‘ کا سچ بھی جگ ظاہر ہوگیا ، اور اس سوال کا جواب بھی سامنے آ گیا کہ کیا یہ واقعی میں جیل کی سلاخوں کے پیچھے تھے ؟ اس سوال کا جواب آپ کے سامنے رکھیں گے ، لیکن اس سے پہلے سپریم کورٹ کے اُن سخت ریمارکس پر ایک نظر ڈال لی جائے ، جو اس نے ’’ ہیٹ اسپیچ ‘‘ یعنی ’’ نفرت کی بولی ‘‘ کے تعلق سے ، جمعہ کے روز دیئے ہیں ۔
یہ بتا دیں کہ جب سے مودی اقتدار میں آئے ہیں ، یعنی ۲۰۱۴ء ، تب سے ملک بھر میں اشتعال انگیزی زوروں پر ہے ، سیاست داں ، دھرم گرو اور پرچارک ’’ نفرت کی بولی ‘‘ بولنے میں ایک دوسرے پر سبقت لے جانے کے لیے کوشاں ہیں ۔ میرا یہ ماننا ہے کہ ’’ نفرت کی بولی ‘‘ سارے تشدد کی ، چاہے وہ گروہی ہو ، فرقہ وارانہ ہو یا ذات پات کی بنیاد پر ہو ، جڑ ہے ۔ تشدد خبیث کاموں میں سے ایک ہے ، اس لیے ’’ نفرت کی بولی ‘‘ کو ’’ اُم الخبائث ‘‘ کہا جا سکتا ہے ۔ گودھرا میں ۲۷ ، فروری ۲۰۰۲ء کے روز سابرمتی ایکسپریسس کی بوگی نمبر ایس – 6 میں آگ لگی یا لگائی گئی تھی ، جس میں ایودھیا سے آنے والے ۵۹ کارسیوک جل کر مر گئے تھے ۔ الزام گودھرا کے مسلمانوں پر لگایا گیا تھا ، اور ’’ نفرت کی بولی ‘‘ بولی جانے لگی تھی ۔ مرنے والوں کی ’’ شو یاترا ‘‘ نکالی گئی تھی ، اور اشتعال انگیز باتیں کہی گئیں اور نعرے لگائے گئے تھے ۔ اگر یہ نعرے نہ لگتے ، اشتعال انگیز باتیں نہ کہی جاتیں ، نفرت کو فروغ نہ دیا جاتا ، تو نہ گجرات کے فسادات ہوتے اور نہ ہی بلقیس بانو کی اجتماعی عصمت دری کی جاتی ، اور نہ ہی اس کے گھر کے چودہ افراد ، جن میں عورتیں اور بچے بھی تھے ، قتل کیے جاتے ۔ لہٰذا بلقیس بانو کا معاملہ ’’ ہیٹ اسپیچ ‘‘ سے ہی پیوست ہے ۔ گیارہ مجرمین جو بری کیے گیئے ہیں ، نفرت کی باتیں سن کر ہی قتل و غارت گری پر اتارو ہوئے تھے ۔ اس لیے کہا جا سکتا ہے کہ ’’ ہیٹ اسپیچ ‘‘ اور ’’ تشدد ‘‘ میں چولی اور دامن کا ساتھ ہے ۔ دہلی فسادات کی مثال لے لیں ، اگر انوراگ ٹھاکر ، پرویش ورما اور خود امیت شاہ اور نریندر مودی نے الیکشن مہم میں اشتعال انگیز بیانات نہ دیئے ہوتے ، اگر ’’ دیش کے غداروں کو ، گولی مارو سالوں کو ‘‘ جیسے نعرے نہ لگتے اور یوگی آدتیہ ناتھ ’ گن اور گولی ‘ کی باتیں نہ کرتے ، تو یقیناً دہلی میں تشدد نہ ہوتا ۔ اب تو ’’ نفرت کی بولی ‘‘ یوں بولی جا رہی ہے جیسے کہ اس کی پوری چھوٹ ہو ۔ دہلی میں ایک ’’ ہندو سبھا ‘‘ میں پرویش ورما نے ، جو مودی حکومت میں وزیر ہیں ، مسلمانوں کے ’’ معاشی بائیکاٹ ‘‘ کا باقاعدہ اعلان کیا اور وہاں موجود لوگوں سےحلف دلوایا ۔ اسی ’’ ہندو سبھا ‘‘ میں دو دھرم گرو بھی شریک تھے ، ان کی زبان نفرت سے بھری ہوئی تھی ۔بی جے پی کے ایک ایم ایل اے نند کشور گرجر نے کھلے عام کہا ’’ ہم جہادیوں کو قتل کر دیں گے ‘‘، جہادی سے ان کی مراد مسلمان تھے ۔ ایک دھرم گرو جگت آچاریہ یوگیشور نے کہا ، ’’ ضرورت پڑنے پر ان کے ہاتھ کاٹ لو ، سر تن سے اتار لو ‘‘، ایک مہنت نول کشور داس نے کہا کہ ہندو اپنے گھروں میں بندوقیں رکھیں چاہے بغیر لائسنسس کی ہوں ۔ یہ نفرت بھرے بیانات ملک بھر میں مسلمانوں کے خلاف ماحول تیار کر رہے ہیں ۔ اور اس کے بد نتائج سامنے آئے ہیں ۔ مساجد کے اندر گھس کر توڑ پھوڑ کی گئی ہے ، پیشاب کیا گیا ہے ۔ مدھیہ پردیش میں گربا کے بہانے مسلم نوجوانوں کو وحشیوں کی طرح پیٹا گیا ہے ، گجرات میں تو مسلم نوجوانوں کو کھمبے سے باندھ کر ، لوگوں کے ساتھ مل کر پولیس نے پیٹا ہے ۔ اور ابھی کل جمعہ ۲۱ ، اکتوبر کے روز ، بنگلورو میں سنگھی ٹولے نے دو مسلم نوجوانوں کو بری طرح پیٹا اور یہ سمجھ کر کہ دونوں مر گئے ہیں ، انہیں راستے پر چھوڑ گئے ۔ دونوں مسلم نوجوان گھر گھر جا کر بیڈ شیٹ فرخت کرتے تھے ، انہیں روکا گیا اور کہا گیا کہ یہ ہندوؤں کا علاقہ ہے یہاں مسلم کاروبار نہیں کر سکتے ۔ کیا یہ پرویش ورما کی اشتعال انگیزی کا نتیجہ نہیں ہے ، جس نے کہا تھا کہ نہ مسلمانوں کو کچھ بیچا جائے اور نہ ان سے کچھ خریدا جائے ؟ بالکل ہے ، لہٰذا اس معاملے کا مقدمہ ورما پر بھی بننا چاہیے ۔ پِٹائی کا جواز دیا جاتا ہے کہ گربا میں آئے یہ مسلمان جھگڑا کریں گے ، عورتوں کو بہکائیں گے ، اور تمہارا جینا اجیرن بنادیں گے ۔ یہ ہندوؤں کو تشدد کے لیے اکسانے کا ایک بھیانک طریقہ ہے ، اور ادھر مسلمان اپنوں کی پِٹائی سے مشتعل ہوں گے ۔ اس کے بعد یہ دونوں آمنے سامنے آ جائیں گے ۔ جھگڑے میں مریں گے عام لوگ ، اور اقتدار کی کرسی پر بیٹھ کر مزے اڑائیں گے یہ ’’نفرت کی بولی ‘‘ بولنے والے سیاست دان ۔
گجرات کی عدالت نے کھمبے سے مسلمانوں کو باندھ کر پیٹے جانے کا سخت نوٹس لیا ہے اور پولیس کے خلاف نوٹس جاری کر دیے ہیں ۔ سپریم کورٹ نے کئی ہدایتیں دی ہیں : ریاستی حکومتیں کسی بھی نفرت آمیز بیان کے خلاف ازخود نوٹس لیں اور کارروائی کریں ، کارروائی کے لیے افسران حکومت یا عدالت کی ہدایت کا انتظار نہ کریں ، شکایت کے اندراج کا انتظار کیے بغیر کارروائی شروع کر دیں ، اشتعال انگیزی کرنے والوں کا مذہب نہ دیکھیں اس پر کارروائی کریں ۔ اور یہ انتباہ بھی دیا ہے کہ اگر افسران اور حکومتیں ہدایات کے مطابق کارروائی نہیں کرتی ہیں تو سپریم کورٹ اسے توہینِ عدالت سمجھ کر کارروائی کرے گی ۔ سپریم کورٹ کے ’’ نفرت بازوں ‘‘ کے خلاف سخت ریمارکس ہیں ، لیکن سوال یہ ہے کہ ، کیا مرکزی حکومت اور ریاستی حکومتیں اس سرزنش پر کان دھریں گی ؟ بلقیس بانو کے معاملے میں مرکز اور گجرات کی سرکاریں ہی ہیں جو آنکھوں پر پٹّی باندھ کر مجرموں کو بچانے کے لیے کوشاں ہیں ۔ حیرت انگیز امر ہے کہ بلقیس کے جو مجرم ہیں وہ آج بھی لوگوں کو دھمکیاں دے رہے ہیں ، اسی لیے بلقیس اور اس کا خاندان خوف کے سائے میں جی رہا ہے ۔ جو حقائق سامنے آئے ہیں ان سے پتہ چلا ہے کہ یہ جو مجرم رہا کیے گئے ہیں ایک ایک ہزار دن سے پیرول اور فرلو پر باہر تھے ، اور یہ لوگوں کو دھمکیاں دیتے پھرتے تھے ، ان میں سے کئی ہیں جن کے خلاف پولیس میں شکائتیں درج ہوئی ہیں ، دست درازی کی بھی شکایت درج ہے ۔ اس کا سیدھا مطلب یہ ہے کہ ان مجرموں کا ’’ چال چلن ‘‘ کسی بھی پہلو سے ’’ اچھا ‘‘ نہیں کہا جا سکتا ۔ یہ تمام باتیں خود گجرات سرکار کے حلف نامہ سے ظاہر ہوئی ہیں ، اس کے باوجود ’’ اچھا چال چلن ‘‘ کہہ کر رہا کیا گیا ! تو سپریم کورٹ کی سرزنش کے بعد کیا ان سے امید باندھی جا سکتی ہے کہ یہ ’’ نفرت بازوں ‘‘ پر ایکشن لیں گے ؟ ایک اچھی بات ، ’’ واقعی اچھی بات ‘‘ یہ ہوئی ہے کہ ملک کی ہندو خواتین بلقیس بانو کے مجرموں کی رہائی کے خلاف سرگرم ہوئی ہیں ، ان کے نام اوپر دیے گئے ہیں ۔ خواتین کی ایک اور تنظیم نے مجرموں کے خلاف عدالتِ عظمیٰ کا دروازہ کھٹکھٹایا ہے ، جگہ جگہ لوگ اس کے خلاف آوازیں بھی اٹھا رہے ہیں ۔ ہاں ! کچھ سیاست داں خاموش ہیں ۔ کانگریس اور راہل گاندھی نے آواز اٹھائی ہے ، شردپوار نے آواز اٹھائی ہے ، ادھو ٹھاکرے رہائی کے خلاف بولے ہیں ، لیکن ’ چھوٹے مودی ‘ اروند کیجریوال نے اب تک کسی بھی طرح کے ردعمل کا اظہار نہیں کیا ہے ۔ وہ گجرات کا الیکشن لڑ رہے ہیں اور متمنی ہیں کہ مسلمانوں کے ووٹ انہیں ملیں ۔ جناب ! مسلمان آپ کو ووٹ دے سکتا ہے ، مگر آپ اس کے لیے اپنی زبان تو کھولیں ۔ بغیر زبان کھولے اس سے ووٹ مانگنا ’ بے شرمی ‘ اور نری ’ بے حسی ‘ ہے ۔

مسلمانوں کی زبوں حالی دور کرنے کے لیے جب بھی سرکاری سطح پر کوئی قدم اٹھایاگیا تو اس میں سب سے بڑی رکاوٹ بی جے پی نے یہ کہہ کرکھڑی کی کہ مسلمانوں کی ’منہ بھرائی‘ کی جارہی ہے،لیکن حیرت انگیز بات یہ ہے کہ اب خود بی جے پی ہی مسلم ووٹ حاصل کرنے کے لیے ان کی ’منہ بھرائی‘کے راستے پرچل پڑی ہے۔اس کا آغاز ملک کی سب سے بڑی ریاست اتر پردیش سے ہوا ہے۔اطلاعات ہیں کہ رواں سال کے آخر میں وہاں ہونے والے بلدیاتی انتخابات میں بی جے پی بڑی تعداد میں پسماندہ مسلمانوں کو امیدوار بنائے گی تاکہ ان کا ووٹ حاصل کیا جاسکے۔بی جے پی اقلیتی مورچہ نے پورے صوبے میں ایسے 44ہزار پولنگ بوتھوں کی نشاندہی کی ہے جہاں پسماندہ مسلمانوں کی قابل لحاظ آبادی ہے۔بی جے پی نے مسلمانوں میں ایسی متعدد برادریوں کو نشان زد کیا ہے جو سماجی، معاشی اورتعلیمی طورپر دیگر برادریوں کے مقابلے میں پسماندہ ہیں۔ ان میں انصاری، منصوری،راعین، گوجر، گھوسی، قریشی، ادریسی، نائک، فقیر، سیفی، علوی اور سلمانی وغیرہ شامل ہیں۔
اس حقیقت سے انکار نہیں کیا جاسکتا کہ اس وقت مسلمان اس ملک کی سب سے زیادہ پسماندہ قوم ہیں اور یہ پسماندگی سب سے زیادہ ان برادریوں میں ہے،جو ابتداء سے محرومی کی زندگی گزارتی رہی ہیں۔لیکن یہ بھی ایک حقیقت ہے کہ سیاسی پارٹیوں نے ان مسلمانوں کی پسماندگی دور کرنے کے نام پر ہمیشہ اپنا الّو سیدھا کیا ہے۔یہی وجہ ہے کہ جو مسلمان تعلیمی، معاشی، سماجی اور سیاسی طورپر پسماندہ ہیں ان کی حالت روز بروز بگڑتی چلی جارہی ہے۔ اب تک کسی بھی سیاسی جماعت نے مسلمانوں کی پسماندگی دور کرنے کے لیے کوئی ٹھوس قدم نہیں اٹھایا۔ سبھی پارٹیاں انھیں دل فریب نعروں میں الجھاکر ان کا سیاسی استحصال کرتی رہی ہیں۔
اس ملک میں مسلمانوں کی سماجی، معاشی اور تعلیمی پسماندگی ناپنے کا سب سے بڑا پیمانہ سچر کمیٹی کی وہ رپورٹ ہے، جوسابق وزیراعظم ڈاکٹر منموہن سنگھ کے دور اقتدار میں تیار کی گئی تھی۔ یہ رپورٹ مسلمانوں کی دردناک تصویرپیش کرتی ہے۔ دہلی ہائی کورٹ کے سابق چیف جسٹس آنجہانی راجندر سچر کی قیادت میں ملک گیر سطح پر مسلمانوں کی زبوں حالی کا جائزہ لے کر اس رپورٹ جو کچھ کہا گیاہے، وہ ایسی تلخ حقیقت ہے جس کے آئینے میں اس ملک کے حکمرانوں کو اپنا چہرہ ضرور دیکھنا چاہئے۔ المیہ یہ ہے کہ سیاسی پارٹیاں اس معاملے میں خودکو دودھ کا دھلا ثابت کرنے کے لیے قصور ایک دوسرے کے سر ڈالتی رہی ہیں۔ جیسا کہ حال ہی میں اترپردیش کی راجدھانی لکھنؤ میں بی جے پی کے پرچم تلے ہوئے پسماندہ مسلمانوں کے اجلاس میں ہوا۔ اس اجلاس میں یوپی کے نائب وزیراعلیٰ برجیش پاٹھک نے کہا کہ”اب تک سیاسی پارٹیوں نے مسلمانوں کو بریانی میں تیزپات کی طرح استعمال کیا۔ بریانی تو خود کھا گئے اور تیزپات کو نکال کر باہر پھینک دیا۔“ اس اجلاس کے کرتا دھرتا یوپی کے اکلوتے مسلم وزیردانش انصاری تھے۔ دانش انصاری کا جغرافیہ ہمیں معلوم نہیں ہے، اس لیے ہم ان کے بارے میں زیادہ گفتگو نہیں کرپائیں گے۔ ہاں اتنا ضرور ہے کہ وہ ان لوگوں میں شامل ہیں جنھیں بی جے پی مختلف مواقع پر مختلف عنوانات کے تحت تیزپات کی طرح ہی استعمال کرتی رہی ہے۔مسلمانوں کی محفل میں جب تک بریانی کا ذکر نہ ہو اس وقت تک بات مکمل نہیں ہوتی، لیکن یہ پہلا موقع ہے کہ کسی سیاسی جماعت نے بریانی میں استعمال ہونے والے تیزپات کا ذکر کیا ہے۔
سبھی جانتے ہیں کہ اس ملک میں پسماندہ مسلمانوں کی سیاست نئی نہیں ہے۔ کانگریس کے دور اقتدار میں اس کے سب سے زیادہ جلوے تھے۔ ہرپسماندہ برادری کا ایک ’لیڈر‘کانگریس میں ہوا کرتا تھا۔ لیکن اس قسم کے لیڈروں نے اپنی برادری کو فیض پہنچانے کی بجائے ہمیشہ اپنی ذات کو پیش نظر رکھا۔ان کی معراج وزارت کی کرسی،راجیہ سبھایا مختلف سرکاری محکموں کی چیئرمین شپ رہی۔ کانگریس کے دور اقتدار میں ’مومن کانفرنس‘ اس کا ایک ثبوت تھی، جس کے سربراہ کو سرکاری عہدہ ملتا تھا اور وہ اس عہدے پر براجمان ہوکر سب کچھ بھول جاتا تھا۔ وزارت وصدارت کے اس شوق میں اتنی زیادہ مومن کانفرنسیں بن گئی تھیں کہ یہ پہچاننا ہی دشوار تھا کہ اصل کون ہے اور نقل کون؟اس کے بعد جب یوپی کے مسلمان کانگریس سے ٹوٹ کر سماجوادی پارٹی میں چلے گئے تو وہاں بھی یہی سلسلہ شروع ہوگیا۔حیرت انگیز بات یہ ہے کہ اب اس بی جے پی نے بھی یہی روش اختیار کرلی ہے،جس کے ایجنڈے میں مسلمان کہیں نہیں ہیں۔اطمینان بخش بات یہ ہے کہ مسلمانوں کی پسماندہ برادریوں نے کبھی فرقہ پرست طاقتوں سے ہاتھ نہیں ملایا اور وہ ہمیشہ سیکولر پارٹیوں پر ہی تکیہ کرتی رہیں، لیکن جب سے بی جے پی نے پسماندہ ذاتوں کا راگ چھیڑا ہے تو کچھ مفاد پرست عناصر اس کی طرف راغب ہونے لگے ہیں۔ حقیقت میں بی جے پی کا بنیادی مقصد پسماندہ مسلمانوں کی خیرخواہی سے زیادہ مسلمانوں میں ذات برادری کا انتشار پھیلانا ہے۔حال ہی میں پسماندہ ذاتوں کی نمائندگی کے سوال پرمسلمانوں کی نصف صدی سے زیادہ پرانی ایک وفاقی تنظیم کا تیا پانچہ کرنے کی کوشش کی گئی ہے۔یہ پہلا موقع ہے کہ کسی مسلم تنظیم کونامعلوم عناصر کے اشارے پر ذات برادری کے نام پر قربان کیا جارہاہے۔
دراصل وزیراعظم نریندر مودی نے تین ماہ قبل اپنی پارٹی کی مجلس عاملہ کے اجلاس میں کہا تھا کہ پارٹی کارکنوں کو ہندوؤں کے علاوہ ہر فرقہ کے محروم اور پسماندہ لوگوں تک اپنی رسائی بڑھانی چاہئے۔ سیاسی حلقوں میں اس کا مطلب پسماندہ مسلمانوں سے لیا گیا تھا۔گزشتہ اتوار کولکھنؤ میں منعقدہ ’پسماندہ دانشوروں کا اجلاس‘ اسی سلسلے کی ایک کڑی تھا، جس میں نائب وزیراعلیٰ برجیش پاٹھک مہمان خصوصی کے طورپر شریک ہوئے اور انھوں نے بریانی سے تیزپات کے رشتے کی وضاحت کی۔ بی جے پی کی یہ پرانی ادا ہے کہ اس کے کیڈر کے لوگ ایسے کسی پروگرام میں شریک نہیں ہوتے جہاں ان کی کوئی جواب دہی ہو۔ یہی وجہ ہے کہ اس اجلاس میں برجیش پاٹھک کو بھیجا گیا جو بہوجن سماج پارٹی چھوڑ کر بی جے پی میں شامل ہوئے ہیں۔اگر واقعی بی جے پی اس معاملے میں سنجیدہ ہوتی تو اس اجلاس کا افتتاح وزیراعلیٰ یوگی آدتیہ ناتھ کو کرنا چاہئے تھا۔
جہاں تک مسلمانوں کو نمائندگی دینے کا سوال ہے توہم آپ کو بتاتے چلیں کہ اس وقت مرکز کی بی جے پی سرکار میں ایک بھی مسلمان وزیر نہیں ہے۔یہ آزاد ہندوستان کی تاریخ کا پہلا واقعہ ہے کہ مرکزی حکومت نے ملک کی سب سے بڑی اقلیت کے کسی نمائندے کو نمائشی نمائندگی کے قابل بھی نہیں سمجھا ہے۔ اتنا ہی نہیں پارلیمنٹ کے دونوں ایوانوں میں بھی بی جے پی کا کوئی مسلمان نہیں ہے۔ ہاں پچھلے دنوں سخت تنقیدوں کے بعد جموں وکشمیر سے کسی غلام علی کھٹانہ کو راجیہ سبھا میں نامزدکیا گیا ہے، جو لکھنؤ کے پسماندہ اجلاس میں شریک تھے۔ اس اجلاس میں شریک بی جے پی اقلیتی مورچہ کے ایک عہدیدار نے ’انڈین ایکسپریس‘ کو بتایا کہ ہم یہ باور کرانا چاہتے ہیں کہ بی جے پی کی مرکزی اور صوبائی حکومت نے کس طرح چارکروڑ پچاس لاکھ مسلمانوں کو مختلف سرکاری اسکیموں سے فائدہ پہنچایا ہے۔ انھوں نے اس کی تفصیل بتاتے ہوئے کہا کہ ”یوپی میں تین کروڑپسماندہ مسلمانوں نے حکومت کی مفت راشن اسکیم کا فائدہ اٹھایا۔ ان میں سے سوالاکھ پسماندہ مسلمانوں کو آیوش مان اسکیم کے تحت طبی سہولتیں ملیں۔75لاکھ کو وزیراعظم کی کسان سمان ندھی کے تحت فیض پہنچا۔چالیس لاکھ سے زیادہ پسماندہ مسلمانوں کو بجلی کنکشن ملے اور بیس لاکھ مسلمانوں کو مکان ملے۔“اس سے یہ اندازہ ہوتا ہے کہ بی جے پی کے نزدیک مسلمانوں کی پسماندگی دور کرنے کا پیمانہ کیا ہے۔وہ دراصل بحیثیت شہری مسلمانوں کو ملنے والی مراعات کو بھی ان کے اوپر احسان کے طور پر لادنا چاہتی ہے۔جبکہ مسلمانوں کی پسماندگی دور کرنے کے لیے حکومت کو ایسے ہی اقدامات کرنے چاہئیں جیسا کہ دلتوں کے لیے کئے گئے ہیں، کیونکہ مسلمان فی الوقت دلتوں سے زیادہ پسماندہ ہیں۔