30 جون, 2022

مترجم :ڈاکٹر خالد اختر علیگ

ناول نگار اور ڈرامہ نگار ایڈورڈ بلور لیٹن(Edward Bulwer-Lytton) نے ایک معمولی سے قلم کی اہمیت کو اجاگر کرنے کے لیے ایک کہاوت”قلم تلوار سے زیادہ طاقتور ہے“لکھی تھی ،جو بہت مشہور ہے۔حقیقت میں قلم نہایت پسندیدہ اوردل سے لگاؤ کی شئے ہے، یہ ایک مصنف کا سب سے قیمتی سرمایہ ہے۔لیکن دل سے اتنے قریب ہونے کے باوجودقلم کی فطرت ہے کہ وہ زیادہ مدت تک استعمال کرنے سے ٹوٹتے اور برباد ہو جاتے ہیں،حالاں کہ بہت سے لوگ انہیں پھینک دیتے ہیں۔لیکن کولکتہ میں ایک وقت تھا جب لوگ اپنے قلم کی مرمت کروانے کے لیے اسے ‘پین اسپتال'(Pen Hospital) لے جاتے تھے۔حالاں کہ یہ سننے میں کچھ عجیب لگتا ہے، لیکن ایک زمانے میں قلم اسپتال شہر کے منظر نامے کا مرکز تھے۔ اگرچہ اس طرح کے زیادہ تر اسپتال وقت کے ساتھ مٹ چکے ہیں، لیکن کولکتہ کے قلب میں ابھی بھی ایک اسپتال باقی ہے۔جیسے ہی آپ دھرمتلا میٹرو اسٹیشن کے گیٹ نمبر 4 سے باہر نکلیں گے، آپ کو فٹ پاتھ کے بائیں جانب ایک ‘پین اسپتال’ کا بورڈ لٹکا ہوا نظر آئے گا۔ تنگ گلی کے ایک طرف، ڈاکٹر محمد امتیاز ایک چھوٹی سی دکان میں بیٹھ کر پرانے اورشکستہ قلموں کا "علاج” کرتے ہیں۔بے ترتیبی سے بھری ہوئی ا ن کی اس دکان میں کئی قیمتی اور نایاب قلم موجودہیں۔

اس دکان کو امتیاز کے داداشمس الدین نے 1945ءمیں شروع کیا تھا، تو اس زمانے میں واٹر مین، شیفرڈ، پیئر کارڈا اور ولسن جیسے شاہی قلم کو بیرون ملک سے منگایاجاتا تھا،جن کو ٹھیک کرنے والا کوئی نہیں تھا۔ امتیاز بتاتے ہیں کہ قلم اسپتال کا سفر قلم سے محبت کرنے والوں کے غم کو دور کرنے کے خیال سے شروع ہوا،اوریوں’ پین اسپتال‘ قائم ہوگیا۔امتیاز اور ان کے بھائی محمد ریاض اپنے والد محمد سلطان کا ہاتھ بٹانے کے لیے اس ہسپتال میں کام کرنے لگے۔ اپنے چھوٹے بھائی کی موت کے بعد، انہوںنے اسپتال کی ذمہ داری سنبھالی جس سے ہونے والی آمدنی پرہی ان کا خاندان انحصار کرتا ہے۔

اسپتال میں گاہک کا انتظار کرنے والے امتیاز نے کہا،”ہمارا کام سیاہی اور نب والے قلم کو ٹھیک کرنا ہے۔“حالاں کہ آج کل سیاہی والے قلم سے لکھنا تقریباًختم ہو گیا ہے۔ زیادہ تر لوگ قلم کو ایک باراستعمال کرکے اسے پھینک دیتے ہیں، اب کمپیوٹر کا دور ہے۔ ابھی بھی کچھ لوگ ہیں جو سیاہی سے لکھتے ہیں،وہ ٹوٹے ہوئے قلم کو ٹھیک کرنے آتے ہیں۔ کچھ لوگ منفرد اور انوکھے پرانے قلم بھی خریدتے ہیں۔پین اسپتال کے کلیکشن میں 20 روپے سے 20,000 روپے تک کے قلم موجود ہیں۔” ڈاکٹر امتیاز ٹوٹے ہوئے قلموں کومختلف سائز اور اشکال کے آلات کا استعمال کرتے ہوئے،انہیں ‘شفا’ دے کر اسے نئی زندگی عطا کرتے ہیں۔اس کی ایک طویل اور مثالی تاریخ ہے، اس قلم اسپتال میں کئی نامور پروفیسرز، ادیب اور صحافی اپنے پسندیدہ قلم کی بیماری کا علاج کرانے کے لیے آ چکے ہیں۔

ایک قلم کے’ آپریشن’کے دوران قلم اسپتال کے ڈاکٹر نے بتایا، "غیر ملکی قلم بہت مہنگے ہوتے ہیں۔ 10,000سے12,000 روپے قیمت تک کے قلم لوگ مرمت کے لیے یہاں لاتے ہیں۔ ہر قلم میں نب سے سیاہی بھرنے کا نظام ایک دوسرے سے مختلف ہوتاہے۔ قلم کے تمام حصے ہمیشہ آسانی سے دستیاب بھی نہیں ہوتے ہیں۔ ایسی صورت حال میں جیسے ہی پرانے قلم کی ٹیکنالوجی کو تبدیل کیا جاتا ہے، قلم کو نئی زندگی مل جاتی ہے۔ جس کی وجہ سے لکھنے والے کے چہرے پر ایک مسکراہٹ پھیل جاتی ہے جو مجھے بہت پسند ہے۔”

(اصل تحریر روزنامہ انڈین ایکسپریس میں 5 جون 2022 ءکو شائع ہوئی ہے)

نئی دہلی:اردو اکادمی، دہلی کی جانب سے منعقد ہونے والا دہلی کے بزرگ اور جواں عمر قلمکاروں کامقبول ترین پانچ روزہ ادبی اجتماع ’’نئے پرانے چراغ‘‘ 22؍جولائی2022 ء تا26؍جولائی2022ء اکادمی کے ’’قمررئیس سلورجوبلی آڈیٹوریم‘‘ میں منعقد ہوگا۔ افتتاحی اجلاس 22؍جولائی2022ء بروزجمعہ شام پانچ بجے منعقد ہوگا۔ اس پروگرام میں22؍ تا26؍جولائی 2022ء ساڑھے چھ بجے روزانہ ’’محفل شعر وسخن‘‘ منعقد ہوگی جس میں دہلی کے بزرگ و جواں عمر شعرا اپنا کلام پیش کریںگے۔23؍تا26؍جولائی2022 صبح دس بجے تا دو بجے روزانہ ’’تحقیقی وتنقیدی اجلاس‘‘ منعقد ہوگا جس میں دہلی کی تینوں یونیورسٹیوں کے ریسرچ اسکالرز منتخب موضوعات پر تحقیقی و تنقیدی مقالے پیش کریں گے اور23؍ تا26؍جولائی دوپہر ڈھائی بجے سے شام پانچ بجے تک روزانہ ’’تخلیقی اجلاس‘‘ منعقد ہوگا جس میں دہلی کے بزرگ و جواں عمر تخلیق کار افسانہ/انشائیہ/ خاکہ وغیرہ پیش کریں گے۔واضح ہو کہ اس پروگرام میں تقریباً سواچار سو ریسرچ اسکالرز، تخلیق کار اور شعرا اپنے مقالے اور تخلیقات سے سامعین کو محظوظ کریں گے۔
اس موقع پر اکادمی کے وائس چیئرمین حاجی تاج محمد نے کہا کہ اردو کے فروغ کے لیے اردو اکادمی ہمیشہ سے کوشاں رہی ہے اور اب کورونا کے بعد حالات معمول پر آتے ہی اکادمی کی سرگرمیاں اپنے عروج کی جانب بڑھ رہی ہیں۔ اسی سلسلے کا یہ مقبول عام پروگرام ’’نئے پرانے چراغ‘‘ ہے۔ انھوں نے یہ بھی کہا کہ نئے شعرا اور تخلیق کار جنھوں نے اس سے قبل اس پروگرام میں شرکت نہیں کی ہے اپنا نام اردو اکادمی، دہلی کے دفتر میں5؍جولائی تک اندراج کرادیں تاکہ آگے کی کارروائی میں ان کے نام کا اندراج ہوسکے۔

عبدالمطلب کے کئی بیٹے تھے۔ ایک بیٹے کا نام حارث تھا۔ حارث کا ایک بیٹا مغیرہ تھا۔ عبدالمطلب کے ایک اور بیٹے کا نام عبداللہ تھا۔ عبداللہ کے بیٹے محمد رسول اللہ ﷺ تھے۔ مغیرہ اور محمدؐ دونوں ہم عمر تھے۔ دونوں رضاعی بھائی بھی تھے۔ دائی حلیمہ نے دونوں کو دودھ پلایا تھا۔ دونوں چچیرے بھائیوں میں دوستی بھی تھی۔خاص بات یہ کہ دونوں کی شکل ایک دوسرے سے ملتی تھی۔
آگے چل کر مغیرہ کی کنیت ابوسفیان پڑی اور اسی سے وہ مشہور ہوا۔ یہ وہ ابوسفیان بن حرب نہیں جو جنگ احد میں مشرکوں کی فوج کے سالار تھے اور فتح مکہ کے موقع پر ایمان لائے تھے۔ یہ آپؐ کا چچیرا بھائی ابوسفیان بن حارث تھا۔ جب حضرت محمد ﷺ اللہ کے رسول بنائے گئے، تو یہ آپؐ کا سخت دشمن بن گیا۔ یہ آپؐ کی شان میں گستاخی کرتا اور اشعار کے ذریعے آپؐ کی ہجو کرتا۔ آپؐ کے ساتھیوں کو ستاتا اوراشعار کی صورت میں ان پر جھوٹی تہمتیں باندھتا۔ اس نےرسول پاک کے ساتھ دشمنی میں کوئی کسر نہیں اٹھارکھی۔ جب جب قریش کا لشکر مدینہ پر حملہ کرنے جاتا ابوسفیان اس میں ضرور جاتا۔ وہ اللہ کے رسول ﷺ کی شان میں گستاخانہ اشعار کہتا اور عرب کے قبیلوں میں پھیلادیتا۔ اللہ کے رسولﷺ کی طرف سے حضرت حسان بن ثابتؓ ایسے گستاخ شاعروں کی ہجوکا جواب دیتے۔ دشمنی کی آگ میں جلتے ہوئے اور گستاخی کی لعنت میں لوٹتے ہوئے بیس سال گزر گئے۔ یہاں تک کہ مکّہ میں خبر گرم ہوگئی کہ اللہ کے رسول ﷺ ایک بڑے لشکر کے ساتھ مدینہ سے مکہ کی طرف روانہ ہوچکے ہیں۔
مکّہ میں ہنگامہ برپا تھا۔ ایسے بہت سے خطرناک مجرم اور گستاخانِ رسول تھے جنھیں یقین تھا کہ ان کی سزا موت کے سوا کچھ نہیں ہے۔ ان شیطانوں میں سے ہر کوئی کہیں بھاگ نکلنے کا منصوبہ بنا رہا تھا۔
ابوسفیان بن حارث بھاگ کر اپنے گھر آیا، اور اپنے بیوی بچوں کو ساتھ لیا اور مکّہ سے نکل کر اس راستے پر چل پڑا جدھر سے مسلمانوں کا لشکر آرہا تھا۔ جب وہ ابواء کے مقام پر پہنچا تو اللہ کے رسول فوج کے ہراول دستے کے ساتھ ابواء پہنچ چکے تھے۔
ابوسفیان نے اپنا بھیس بدلا، اپنے بیٹے جعفر کو ساتھ لیااور آپؐ کی قیام گاہ پر پہنچ گیا۔ وہاں پہنچ کر اندر آنے کی اجازت مانگی۔ آپ کی بیوی حضرت ام سلمہؓ نے آپؐ سے کہا : اللہ کے رسول! آپؐ کے چچا زاد بھائی آئے ہیں، آپؐ سے ملنا چاہتے ہیں۔ آپؐ نے فرمایا: یہ میرا چچیرا بھائی ہے، جس نے میری عزت پر حملے کیے، مجھے اس سے بات نہیں کرنی ہے۔ جب یہ بات ابوسفیان کو معلوم ہوئی تو اس نے کہا: اللہ کی قسم وہ مجھے ملنے کی اجازت دیں نہیں تو میں اپنے اس بیٹے کا ہاتھ پکڑ کر صحرا میں نکل جاؤں گا اور کہیں بھوک پیاس سے تڑپ کر ہم دونوں مرجائیں گے۔ جب یہ بات اللہ کے رسولﷺ تک پہنچی، تو آپؐ کا دل بھر آیا، آپؐ نے انھیں اجازت دی، وہ آئے اور اسلام قبول کرلیا۔
اللہ کے رسول ﷺ نے حضرت علیؓ سے کہا: اپنے چچیرے بھائی کو وضواور نماز کا طریقہ بتاؤ، پھر میرے پاس لاؤ، وہ وضو کرکے آئے اور آپؐ کے ساتھ نماز ادا کی۔ پھر آپؐ نے حضرت علی سے کہا اور انھوں نے لوگوں میں منادی کرادی : سنو اللہ اور اس کے رسول ابو سفیان سے راضی ہوگئے ہیں، سنو تم لوگ بھی راضی ہوجاؤ۔
ابوسفیانؓ کو جان کی امان ملی اور ایمان کی دولت ملی۔ لیکن ان کا دل کچھ اور مانگتا تھااور وہ اس کے لیے بے چین تھے۔ پھر وہ وقت بھی آگیا۔ اللہ کے رسول ﷺ مکہ فتح کرنے کے بعد طائف کی طرف روانہ ہوئے۔ حنین کی وادی میں دشمن نے حملہ کردیا۔ مسلمانوں کے پاؤں اکھڑ گئے اور مسلم فوج میں افراتفری مچ گئی۔ اس وقت ابوسفیانؓ اپنے گھوڑے سے کود پڑے اور تلوار سونت کر آپؐ کے آگے کھڑے ہوگئے۔ ابوسفیانؓ کی خواہش تھی کہ وہ آپؐ کی حفاظت کرتے ہوئے کام آجائیں۔ آپؐ ان کی جواں مردی دیکھ کر تعجب کررہے تھے لیکن یہ نہیں معلوم تھا کہ وہ کون ہیں۔ جب گرد صاف ہوئی تو آپؐ نے پوچھا یہ کون ہے جو اپنی جان پر کھیل کر میرے آگے ڈٹا رہا۔حضرت عباسؓ نے کہا: اللہ کے رسول! یہ آپؐ کا بھائی ابوسفیان بن حارثؓ ہے۔ آپؐ اس سے راضی ہوجائیے۔ آپؐ نے فرمایا: میں اس سے راضی ہوچکا ہوں اور اللہ نے اس کی وہ ساری دشمنی معاف کردی جو اس نے مجھ سے کر رکھی تھی۔ پھر آپؐ ابوسفیانؓ کی طرف متوجہ ہوئے، اور بڑے پیار سے کہا: میرے بھائی۔ ابوسفیانؓ کی خواہش پوری ہوگئی اور انھوں نے خچر کی رکاب میں رکھے آپؐ کے قدم کو بوسہ دے دیا۔
آپؐ نے ابوسفیانؓ کی جاں نثاری کا اعتراف کرتے ہوئے فرمایا: ابوسفیانؓ میرے بھائی اور میرے کنبے کے بہترین شخص ہیں۔ اللہ نے چچا حمزہؓ کی شہادت کے بعد ان کا بدل ابوسفیان بن حارثؓ کی صورت میں عطا فرمایا ہے۔ اس کے بعد ابوسفیانؓ کو شیر خدا اور شیر رسول کہا جانے لگا۔ ہاں انھی ابوسفیان کو جو بیس سال تک سب سے بڑے گستاخِ رسول بنے رہے۔
ابوسفیان جب تک کفر پر رہے، سب سے بڑے دشمنِ اسلام بنے رہے لیکن جب اسلام قبول کیا تو اسلام کی بلند منزلیں طے کرتے چلے گئے۔ یہاں تک کہ اللہ کے رسول ﷺ نے فرمایا: ابوسفیان بن حارثؓ جنت کے جوانوں کے سردار ہیں۔
جب حضرت ابوسفیانؓ کی وفات کا وقت ہوا تو اپنے گھر والوں سے کہا: مجھ پر رونا مت، میں نے جب سے اسلام قبول کیا ہے، ایک بھی گناہ نہیں کیا ہے۔
عبادت کا شوق ایسا تھا کہ گرمیوں کے سخت موسم میں بھی صبح سے نصف نہار سے پہلے تک نماز پڑھتے، اور پھر ظہر سے عصر تک نماز پڑھتے۔
یہ دین کی دعوت کا کمال ہے،کہ جو شخص بیس سال تک رسول پاکؐ کی شان میں گستاخی کرتا رہا، وہ اسلام قبول کرنے کے بعد شیرِ خدا، شیرِ رسول اور جنت کے جوانوں کا سردار قرار پایا۔
یہ رحمت للعالمینؐ کی شانِ کریمی تھی کہ اپنی شان میں گستاخی کرنے والے کو توبہ کرنے کا موقع دیا اور پھر اتنا قریب کیا کہ اپنا بھائی بنالیا۔
اسلام کے علم برداروں اور رسول پاکؐ کے عاشقوں کے لیے اس میں نصیحت کا بڑا سامان ہے۔
(ملاحظہ ہو: سیرت ابن ہشام، الطبقات الکبری لابن سعد اورسیر اعلام النبلاء للذہبی)

( ایڈیٹر ممبئی اردو نیوز)
ادئے پور کے دلدوز واقعے کی کوئی بھی شخص حمایت نہیں کرسکتا۔
یہ واقعہ اسی قدر قابلِ مذمت ہے جس قدر قابلِ مذمت محمد اخلاق ،پہلو خان اور ننھے حافظ جنید -اور مزید نہ جانے کتنے ہی بےگناہوں -کی ماب لنچنگ قابلِ مذمت تھی ۔ یہ واقعہ اسی قدر قابلِ ملامت ہے جس قدر کہ جموں کے ایک مندر میں ننھی آصفہ کا ریپ اور قتل قابلِ ملامت تھا ۔ اور یہ بھیانک واردات اتنی ہی بھیانک اور شرمناک ہے جس قدر بھیانک اور شرمناک ، کوئی پانچ سال قبل ،ادئے پور ہی میں شمبھو لال رائیگر نام کے ایک جنونی کے ہاتھوں افرزول نام کے ایک مسلمان مزدور کا قتل تھا ۔ مسلمان ادئے پور کے المناک واقعے کی مذمت کر رہا ہے ،اس نے دونوں قصورواروں، محمد ریاض اور غوث محمد کی حمایت میں نہ ہی کوئی ریلی نکالی ہے اور نہ ہی ان کی گرفتاری کو غیر قانونی کہا ہے ، جیسے کہ ’ ہندوتوادیوں ‘ نے شمبھو لال کے لیے ، جو ان کی نظر میں ’ نائک ‘ یعنی ہیرو ہے ، ریلی نکالی تھی یا جیسے بی جے پی کے لیڈروں نے ننھی آصفہ کے قاتلوں کو بچانے کے لیے ریلی نکالی اور قاتلوں کو بغیر مقدمہ چلائے رہا کرنے کے لیے آواز بلند کی تھی ۔ مسلم لیڈروں ، جماعتوں اور اداروں کی طرف سے اس واقعے کی مذمت کی جارہی ہے ،دونوں قصورواروں کو سخت سے سخت سزا بلکہ پھانسی تک دینے کا مطالبہ کیا جا رہا ہے،یہ اپنے آپ میں اس بات کا ثبوت ہے کہ اس ملک کے مسلمانوں کی اکثریت تشدد اور قتل و غارتگری پر یقین نہیں رکھتی ، وہ چاہتی ہے کہ ملک میں امن و امان بنا رہے ۔ اس ملک کا مسلمان امن و امان ہی کے لیے سب کچھ برداشت کرتا چلا آرہاہے ۔ اگر گزرے ہوئے چند سالوں کے واقعات پر نظر ڈالی جائے تو یہ اندازہ ہو جائے گا کہ اس ملک کے حکمرانوں نے ، ہندوتوادیوں نے اور اس ملک کی انتظامیہ نے ، چاہے وہ کسی بھی ریاست کی انتظامیہ ہو ، مسلمانوں کو ایک الگ ہی ڈنڈے سے ہانکا ہے ۔ مودی سرکار کے قیام کے بعد جس طرح سے مسلم اقلیت کی راہ میں اڑچنیں ڈالی گئی ہیں ، ساری دنیا نے دیکھا ہے ۔ کون نہیں جانتا کہ مودی راج میں سپریم کورٹ کے تعاون سے بابری مسجد کی جگہ مندر کے لیے سونپ دی گئی ، سب کو پتہ ہے کہ اس سرکارنے مسلمانوں کی ہندوستانی شہریت ختم کرنے کے لیے این آر سی کے عفریت کو آزاد کیا ہے ، ہر کوئی یہ جانتا ہے کہ بابری مسجد کے بعد یہ کاشی اور متھرا کی مساجد بھی ہڑپنا چاہتے ہیں ، یہ بھی خوب واضح ہے کہ شریعت میں تبدیلی بھی ان کا ایک منصوبہ ہے ۔ یہ سب تو مسلمانوں نے برداشت ہی کیا ہے ۔ مساجد سے اذانوں پر پابندی بھی برداشت کی ہے ، اور ہنومان چالیسہ کے بہانے ملنے والی گالیوں کو بھی صبر کے ساتھ سنا ہے۔ ماب لنچنگ کی وارداتوں پر بھی اس کا صبر ٹوٹا نہیں ہے ۔ اس کے گھروں پر اب بلڈوزر بھی چل رہے ہیں اور اس کی بقا اور روزی روٹی خطرے میں آ گئی ہے ،مگر یہ سب برداشت کیا گیا ہے اور برداشت کیا جاتا رہے گا ۔ مسلمانوں نے انتہائی بھیانک قسم کے تعصب کو بھی سہا ہے ، اس کی ذرا سی آواز ، ذرا سا احتجاج ،اس کی گرفتاری کا بھی اور اس پر لاٹھیوں کے برسنے کا بھی سبب بنا ہے ، اس کی انصاف کی آواز کو بغاوت قرار دے کر اسے سلاخوں کے پیچھے ڈھکیلا جا رہا ہے ،محمد زبیر کی مثال لے لیں۔ ذکیہ جعفری کو انصاف نہ ملا ہے نہ ملے گا ۔ اس جری ضعیفہ نے اپنا معاملہ تو اللہ کو سونپ دیا ہے مگر جو ساتھ کھڑے ہوئے تھے انہیں اسیرِ زندان کیا جا رہا ہے ، ٹیستا سیتلواڈ کی مثال لے لیں۔ اور جنہوں نے مسلمانوں کی نسل کشی کے لیے لوگوں کو اکسایا وہ آزاد ہیں ،اوروہ گستاخ بھی آزاد ہیں جنہوں نے پیغمبر اسلام حضرت محمد ﷺ کی توہین کی جسارت کی۔کیا یہ انصاف ہے؟ مگر ان سب نانصافیوں کے باوجود مسلمان تشدد نہیں چاہتا ، وہ امن و امان چاہتا ہے ، سکون چاہتا ہے۔ ادئے پور کا جو واقعہ ہوا ہے اس سے یہ تشویش ناک سچ سامنے آیا ہے کہ یہ گزشتہ چھ سات برسوں سے جو ’ نفرت ‘ کا درس دیا جا رہا تھا اس نے صرف ’ ہندوتوادیوں ‘ اور عام ہندوؤں کی ایک اچھی خاصی تعداد ہی کو نہیں مسلمانوں میں بھی بہت لوگوں کو متاثر کیا ہے ۔ محمد ریاض اور غوث محمد کچھ زیادہ ہی متاثر تھے کہ انہوں نے ’ نفرت ‘ کا جواب ’ نفرت ‘ سے دینے کا راستہ چنا ۔ یہ ایک غلط راستہ ہے ۔ مانا کہ اس ملک میں مسلمان نشانے پر ہے ، لیکن اس کے باوجود اس ملک کا ایک قانون ہے ، ایک نظام ہے ، یہ اسلامی شریعت پر نہیں چلتا ، یہاں جمہوری قوانیں چلتے ہیں ، اس لیے قانون کو اپنے ہاتھ میں لینے کے عمل کوکسی بھی طرح سے درست نہیں کہا جا سکتا ۔ بلا شک ہر مسلمان اپنے پیغمبر حضرت محمدﷺ کی شان میں ناپاک جسارت سے دل برداشتہ ہے ، صدمے میں ہے ، اور یقیناً اسے سب کچھ برداشت ہے مگر اپنے رسول حضرت محمدﷺ کی شان میں گستاخی برداشت نہیں ہے ،بے شک ہر مسلمان یہ سوال کررہاہے کہ پولیس ’ مذہبی جذبات ‘ بھڑکانے کے نام پر اگر محمد زبیر کو گرفتار کر سکتی ہے تو نوپور شرما کو کیوں نہیں کر سکتی ؟لیکن اگر سوالوں کے جواب نہیں مل رہے ہیںتواس کا یہ مطلب قطعی نہیں ہے کہ قانون ہاتھ میں لے کر کسی کا سر تن سے جدا کر دیا جائے ۔ اسلام تشدد کا درس نہیں دیتا ۔ ادئے پور قتل معاملہ میں محمد ریاض اور غوث محمد تو قصور وار ہیں ہی لیکن اس قتل کے قصور وار وہ سیاست داں ، وہ بھاجپا کے لیڈر اور اس ملک کے حکمراں بھی ہیں جو اپنے اقتدار کے لیے نفرت پھیلاتے رہے ہیں ۔ ان کے نفرت کے پرچار نے بڑی تعداد میں لوگوں کے ذہنوں کو مسموم کر دیا ہے ۔ ہر دو طرف نفرت کی دیواریں اونچی ہوتی چلی جا رہی ہیں ۔ یہ نفرت ہی ہے جس نے ملک کے امن و امان کو خطرے میں ڈال رکھاہے ۔ یہ نفرت ہی سارے تشدد کی ،ساری ناانصافیوں کی ’ جڑ ‘ ہے ۔ اگر اس کو کاٹا نہیں گیا تو اندیشہ ہے کہ تشدد کا ایک لاوا پھوٹ پڑے گا۔بھلا اس ’ جڑ ‘ کو کاٹنے کی کوئی کیوں نہیں سوچتا؟

جامعۃ القاسم دارالعلوم الاسلامیہ سپول ،بہار
میرےلیے یہ سعادت کی بات ہے کہ جو کتاب (اک شخص دل ربا سا)اس وقت ہاتھوں ہاتھ لی جارہی ہے اور علم و ادب کے شیدائی اسے قدر کی نگاہ سے نہ صرف دیکھ رہے ہیں ؛بلکہ اس کے حسن ترتیب ،زبان وبیان کی چاشنی کے اعتبار سے علمی اور ادبی دنیا میں جس کتاب کی دھوم مچی ہوئی ہے،اس کا تعارف اور خلاصہ صرف پانچ سے سات منٹ میں جچے تلے الفاظ میں خود صاحب کتاب سے٨/شوال المکرم ١٤٤٣مطابق ١٠/مئی ٢٠٢٢کو ہرپور بیشی میں (آبائی وطن: مولانا نور عالم خلیل امینی) کتاب کے اجرا کے موقعے سے سنا اور میری یہ بھی خوش بختی ہے کہ میں نے کتاب کچھ دنوں قبل دہلی میں خود صاحب کتاب کےہاتھوں سے لی ہے۔ "اک شخص دل ربا سا” نہ صرف نام کے اعتبار سے بے مثال ہے،بلکہ‌ منفرد انداز تحریر ،لطافت ،ادبیت اور سوانح نگاری کے اعتبار سے بھی یکتا ہے،جس شخصیت کی سوانح حیات ہے اس موضوع پر یہ ایک جامع کتاب ہے۔ کتاب ٣٦٣/صفحات پر مشتمل ہے ،جس میں انھوں نے اپنے استاد یکتائے زمانہ، ادیب باکمال ،عظیم مربی مولانا نور عالم خلیل امینی (٢٠٢١-١٩٥٢)کی تعلیمی، تدریسی،صحافتی،تالیفی اور تصنیفی زندگی اور ان کی مکمل تحریروں کاتجزیہ ہے۔
ہر مصنف ومولف اپنی کاوش کو کسی عظیم شخصیت ،معتبر ادارے یاپھرکسی محسن کی طرف منسوب کرتا ہے ، برادرمحترم مولانا نایاب حسن نے اسے مولانا( جن کے لیے انھوں نے اپنی تحریر میں جگہ جگہ ’’ہمارے مولانا‘‘ لکھا ہے) کی مشفق ماں (مادر مہربان)کی نذر کیا ہے،وہ ان سے ملاقات کا مختصر احوال بیان کرتے ہوئے لکھتے ہیں: "ہمیں دیکھ کر ان کا چہرہ خوشی سے دمک رہا تھا اور یہ ظاہر کررہا تھا کہ وہ نہ صرف اپنے بیٹے سے بے پناہ لاڈ کرتی ہے ؛بلکہ ان سے منسوب ہر فرد انہیں انتہائی عزیز ہے”۔
اس مادر مہربان کو انھوں نے علامہ اقبال کے ان معنی خیز اشعار کی مصداق قرار دیا ہے:
شرف میں بڑھ کرثریا سے مشت خاک اس کی
کہ ہر شرف ہے اسی درج کا درمکنوں
مکالماتِ فلاطوں نہ لکھ سکی لیکن
اسی کے شعلے سے ٹوٹا شرارِ افلاطوں

فہرست کے بعد” قرب و کرب کا پر اثر بیانیہ "کے عنوان سے اردو کے معروف نقاد حقانی القاسمی نے چار صفحات میں نہ صرف کتاب کا تعارف کروایا ہے ؛بلکہ پوری کتاب کے خلاصے اور نچوڑ کے ساتھ مولانا نور عالم خلیل امینی رحمۃ اللہ علیہ سے اپنے گہرےرشتے کا اظہار بھی کیا ہے،حقانی القاسمی کی یہ تحریر انتہائی پر مغز اور لاجواب ہے ۔
’’جگر لخت لخت‘‘ کے عنوان سے مولانا نور عالم خلیل امینی رحمۃ اللہ علیہ کی رحلت اور الم ناک سانحہ کے تذکرے کے ساتھ مصنف نے یہ بتایا ہے کہ مولانا ایسے بافیض اور باکمال استاد تھے کہ جس نے ان کے پاس اپنی زندگی کے چند لمحات بتائے ،اس نے بھی ان سے طرز زندگی ،تہذیب وشایستگی اورسلیقہ مندی ضرور سیکھی ہوگی ،وفات کے بعد ملک اور بیرون ملک جس انداز میں ان کے شاگرد اور اہل علم نے غیر معمولی خلا محسوس کیا اور مولانا نور عالم خلیل امینی کی مختلف الجہات شخصیت اور حیات وخدمات پر جن حضرات نے بھی تاثراتی تحریریں لکھیں یا جس جس رسالے نے مولانا پر خصوصی شمارے شائع کیے ، ان کے ذکر کے ساتھ "اک شخص دل ربا سا” کی وجہ تالیف بھی بیان کی ہے۔ پڑھیے انھی کی زبانی:
"ان کی وفات سے طبیعت جس احساس کرب سے گزری ،اسی‌کے زیر اثر ایک مضمون لکھنے کا سلسلہ شروع کیا ،جس‌کے ذریعے بنیادی طور پر مولانا کی یادیں تازہ کرنا اور انھیں احباب وقارئین سے شیئر کرنا مقصود تھا ،پھربہ تدریج خیالات قلم کا ساتھ دیتے گئےاور مولانا کی زندگی اور خدمات کے مختلف گوشے پردۂ ذہن پر روشن ہوتے چلے گئے ،نتیجتاً میں سلسلہ وار لکھتا گیا اور باقاعدہ ایک کتاب کے بہ قدر مواد اکٹھا ہوگیا”۔(صفحہ:٢٠۔١٩) مذکورہ عنوان کے ذیل میں وہ ایک اور درد،کرب ،حادثہ فاجعہ اورصدمہ کا ذکر کرتے ہیں کہ ان کے بڑے بھائی پھول حسن (متوفی:٢٠/دسمبر ٢٠٢٠) کے انتقال نے انھیں ایسا غم پہنچایا، جس کی کسک اب تک محسوس کررہے ہیں، برادر مرحوم ان کے نہ صرف برادر اکبر تھے ؛بلکہ انھیں اس مقام تک پہنچانے میں اہم کردار ادا کیا،وہ ان کے لیے شجر سایہ دار تھے، خدا مرحوم کے قبر کو نور سے بھر دے اور پس ماندگان کو صبر جمیل عطا کرے،مولانا کی علمی خدمات کو ان کے لئے صدقہ جاریہ بنائے ۔آمین
صفحہ نمبر :٢٥ سے اصل کتاب کی شروعات ہوتی ہے عنوان ہے:اے کہ تو شمع فروزاں ،صورت پروانہ ام۔ اس کے تحت ادیبِ زماں، رجال ساز شخصیت مولانا نور عالم خلیل امینی کا پہلی مرتبہ نام سننے ،پہلی ملاقات ،پہلاتعارف پہلے دن کی شاگردی کے پرلطف تذکرے کےساتھ مولانا کے رکھ رکھاؤ،اٹھنے بیٹھنے،چلنے پھرنے،لکھنے پڑھنےاور لباس وپوشاک تک کا تذکرہ ہے،ان کی نفاست کا یہ حال تھا کہ تہجد کی نماز بھی اس لنگی میں نہیں پڑھتے تھے ، جسے وہ پہن کر سوتے تھے،خوش‌پوشاکی کے ضمن میں مولانا کے ایک عربی مضمون کے اقتباس کے ساتھ اس کا جو ترجمہ مصنف نے پیش کیا ہے، وہ پڑھنے لائق ہے:
’’خوب صورت اور عمدہ لباس پہننے والا انسان ہر مجلس میں عزت پاتا ہے اور جو لباس کی صفائی اور گندگی کی پروا نہیں کرتا یا جس کے جسم سے بدبو آتی ہے، اسے قابلِ احترام مقامات یا ایسی جگہوں میں گھسنے نہیں دیا جاتا،جہاں صاف ستھرے لباس میں ملبوس لوگ موجود ہوتے ہیں۔جو استاذ خوش منظر ،خوش پوشاک اور وجیہ ہوتا ہے ،طلبہ‌اس‌کا‌احترام کرتے ہیں ۔ ایک مقرر بھلے ہی چرب زبان اور شیوا بیان ہو،سامعین وحاضرین پر سحر پھونکنے کی صلاحیت رکھتا ہو؛لیکن اگر اس کا لباس گندا اور دیکھنے میں بھدا ہے ،تو اسے عوام کی وہ توجہ حاصل نہیں ہوسکتی ،جو‌ایک عام ،مگر‌خوش لباس اور نظر کو بھانے والے مقرر کو حاصل ہوتی ہے۔ لباس کی نوعیت انسان کے مزاج ومذاق کا پتا دیتی ہے”۔(صفحہ:٣٧)
ان کی نفاست صرف لباس و پوشاک تک ہی محدود نہیں تھی ؛بلکہ تحریر اور کتابت وطباعت میں بھی ان کا مزاج اعلی درجے کا تھا؛ یہی وجہ ہے کہ ایک پبلشر کو جو انھوں نے نمبر وار گیارہ ہدایات لکھ کر دی ہیں، اگر کتاب کی طباعت کے وقت ان کا خیال رکھا جائے اور انھیں برتا جائے، تو نہ صرف کتاب دیدہ زیب چھپے گی؛ بلکہ مضبوط اور دیرپا بھی رہے گی۔
’عربی زبان وادب اور مولانا امینی:من تو شدم تو من شدی،کوئی کہاں سے ہمارا جواب لائے گا،عجم کا حسن طبیعت عرب کا سوز دروں،نغمہ ہندی ہے تو کیا،لےتو حجازی ہے مری،خوشا لطافت لفظ وخوشا نزاکت معنی‘؛ یہ سب وہ دل ربا عناوین ہے ،جن کے تحت مولانا امینی کی عربی زبان سے آشنائی، دلچسپی، وارفتگی اور ان کی غیر معمولی صلاحیت کیسے پروان چڑھی ،ان کی عربی نگاری میں کیسے نکھار آیا اور پھر انھوں نے عربی زبان کے ذریعے کس طرح نہ صرف دارالعلوم دیوبند کی ترجمانی کی؛ بلکہ ہمیشہ ہندی مسلمانوں کے حالات اور یہاں برپا ہونے واقعات وحوادثات سے صرف عالم عرب ہی نہیں ؛بلکہ پوری دنیا کو واقف کرایا،ملی اور قومی مسائل کو پرزور طریقے سے اٹھایا ،بیرون ممالک کی صحیح ‌صورت حال سے ہندوستانی مسلمانوں کو آگاہ کیا، اس کی پوری داستان انوکھے اور البیلے انداز میں تحریر کی ہے۔مصنف مولانا کے فکر و ادب کے حوالے سے لکھتے ہیں:
’’ان کا عقیدہ تھا کہ لفظ کو لکھنے سے پہلے تولنا چاہیے،وہ‌فکر ہی نہیں حروف کی تطہیر وتنظیف کے بھی قائل تھے ۔ان کی تحریر کردہ ہر سطر سے علم کی گیرائی ،ادب کی زیبائی وبرنائی ،فکرکی بلندی وگہرائی ،ملی وقومی ہمدردی ،انسانی خیر خواہی ،عالم اسلام کے تئیں غیر معمولی دردمندی وخیر اندیشی ،دنیابھر کے اہل علم و ادب وفکر سے محبت کاوفور اور دل ونگاہ کی سرور بخش روشنی جھلکتی ہے‘‘ ۔(صفحہ:٨٥)۔ مولانا نور عالم خلیل امینی رحمۃ اللہ علیہ ایک ایسے صحافی اور کالم نگار تھے، جنھوں نے اپنے ملک کے سماجی و سیاسی مسائل کے علاوہ خصوصاً فلسطین ،عراق ،افغانستان ،برما وروہنگیا،مصر ،لیبیا‌،شام ،یمن اور دیگر ملکوں کے حالات و مسائل کے تعلق سے نہ صرف دوٹوک انداز میں لکھا ؛ بلکہ ان کے تئیں جن خدشات کا انھوں نے اظہار کیا ، وہ وقت گزرنے کے ساتھ سچ ثابت ہوئے ۔جگہ جگہ ان کی عربی تحریروں کے اقتباسات مع ترجمہ نقل کرکے مولانا نایاب حسن نے ان کی آفاقی فکر و بصیرت کے نمونے پیش کیے ہیں ۔

’خورشید مثال شخصیات سے ذہنی مناسبتیں ‘ :ہر انسان کی زندگی میں کچھ محسن شخصیتیں ہوا کرتی ہیں ،کچھ ایسے لوگ ہوتے ہیں جنھیں وہ اپنا آئیڈیل اور نمونہ مانتا ہے، اس ناحیے سے مولانا امینی کی تحریروں ،تقریروں اور دروس کے حوالے سے مولانا نایاب حسن نے بتایاہے کہ محسن انسانیت صلی اللہ علیہ وسلم کی شخصیت ،حضرات صحابہ کی زندگی ہر پہلو سے ان کے لیے نمونہ تھی،اسی طرح امام ابو حامد غزالی ،شاہ ولی اللہ محدث دہلوی ،حجۃ الاسلام مولانا قاسم نانوتوی ،حکیم الامت مولانا اشرف علی تھانوی ،علامہ اقبال (من وحی الخاطر کے ایک مضمون کے حوالے سے بڑی تفصیل سے لکھا ہے وہ کیسے علامہ اقبال کے گرویدہ تھے)،مولانا عبد الماجد دریابادی ،حکیم الاسلام قاری محمد طیب ،مولانا سید محمد میاں دیوبندی ،مولانا سید ابو الحسن علی ندوی ،مولانا وحید الزماں کیرانوی ،والدہ‌محترمہ ،مولانا اویس القاسمی رائے پوری ،مکتب کے استاذ مولوی ابراہیم اور وہ بہن (اسماء بنت جمال)جس نے سب سے پہلے مکتب کی راہ دکھائی، اس کا تفصیلی تذکرہ ہے،خود مولانا نے خود نوشت سوانح میں اس تعلق سے بہت زبردست لکھا ہے:
"جس وقت وہ مجھے مکتب لے جارہی تھی اور مکتب میں پہنچایا،دونوں کے درمیان کے سارے وقفے میں میں نے انھیں وہ ساری گالیاں دے ڈالیں ،جو مجھے اس وقت یاد تھیں؛کیوں کہ مکتب میں لے جانے کو ہم بچے "مقتل”میں لے جانا تصور کرتے تھے ۔آج سوچتا ہوں تو سمجھ میں آتا ہے کہ وہ میری سب سے بڑی محسن ہیں کہ انہوں نے شاہ راہ علم کی پہلی نکڑ پر مجھے زبردستی کھڑا کردیا؛کیوں کہ بعد میں جو کچھ لکھا پڑھا، اس کی بنیاد اسی مولوی ابراہیم کے مکتب کی دین ہےاور ان کے مکتب تک لے جانے والا مری زندگی کا گراں قدر محسن ہے”۔(صفحہ:١٨٧)
اس محسن بہن کے تعلق سے مولانا نایاب حسن نے مزید بتایا ہے کہ باضابطہ مولانا امینی نے عربی میں قدرے تفصیل سے ایک بصیرت افروزمضمون "اختی اسماء التی کانت منتھا علی کبیرۃ” (میری بہن اسماء جس کا میرے اوپر بڑا احسان ہے) کے عنوان سے لکھ چکے ہیں ،مزید یہ کہ بہن اسماء وہی دادی ماں ہیں جو 2019کے شاہین باغ کے سی اے اے اور این آرسی کے احتجاجی دھرنے میں شامل تھیں اور بڑھاپے میں جرات مندانہ اقدام کی وجہ سے پورے ملک میں جن کا چرچا تھا ،جسے میڈیا نے بھی خوب دکھایا،مولانا نایاب حسن کی ان معلومات سے اس محسن بہن سے فی زمانہ ہر کوئی واقف ہوگیا ،دلی دعا ہے کہ اللہ انہیں سلامت رکھے ۔
’مولانا کا اردو اسلوب نگارش اور خاکہ نویسی‘ اس عنوان کے ضمن میں نہ صرف مولانا کی سوانحی تحریر اور خاکہ نویسی کا ذکر ہے؛بلکہ برموقع خاکہ نویسی کی قدیم وجدید روایت پر سیر حاصل گفتگو کی گئی ہے،جو معلومات کا خزینہ ہے اور سیکڑوں صفحات کا خلاصہ ہے ،اسی ضمن میں یہ بتایا ہے کہ مولانا کی تحریریں خشک اور سپاٹ نہیں ہوا کرتی تھیں؛ بلکہ برمحل اشعار سے لبریز ہوتی تھیں، اقبال اور غالب کے علاوہ میر تقی میر ،نظرخ اکبر آبادی ،داغ،سودا،شاد عظیم آبادی ،حالی،بہادر شاہ ظفر ،اصغر گونڈوی ،اسماعیل میرٹھی ،فراق گورکھپوری ،جگر مرادآبادی ،حسن محسن دربھنگوی،وحشت کلکتوی ،مجاز لکھنوی ،حفیظ میرٹھی،اکبر الہ آبادی ،حفیظ جالندھری ،احمد فراز،مرتضی برلاس،تلوک چند محروم ،پروین شاکر،کیفی اعظمی ،احمد ندیم قاسمی ،بشیر بدر،کلیم عاجز ،راحت اندوری جیسے بےشمار شعرا کے شعر انھوں نے اپنی تحریروں میں موقع بہ موقع نقل کیے ہیں ۔شعر کے ساتھ مولانا کے شاعر کا نام لکھنے کا انداز بھی خاص تھا،جو ہر پڑھنے والے کے علم میں اضافے کا سبب بنتا، مولانا نایاب حسن لکھتے ہیں:
"پھر وہ شعر ہی نہ لکھتے ؛بلکہ نیچے بریکٹ میں شاعر کا اصل نام اور تخلص یا مشہور نام بھی اہتمام سے لکھتے اور اس کا سال پیدایش ووفات بھی درج کرتے ۔مثال کے طور پر جگر مرادآبادی کا کوئی شعر نقل کرتے ہیں ،توشعر کے نیچے بریکٹ میں ان کا نام اس طرح لکھتے ہیں "علی سکندر معروف بہ جگر مرادآبادی ١٩٦٠-١٨٩٠ "۔ (صفحہ:١٢٣)معلوم ہوکہ مولانا امینی رحمۃ اللہ علیہ اردو میں بھی خوب لکھتے تھےاور جو لکھتے تھے مستند ،معلومات سے بھر پور اور خوش اسلوب ہوتا تھا ۔مصنف نے مولانا امینی کے حوالے سے نقل کیا ہے کہ کم وبیش تین سو شخصیات پر انھوں نے سوانحی مضامین لکھے ہیں، اس طرح انھوں نے اردو زبان کی بے مثال خدمت کی بلکہ اس کے ارتقا میں اہم کردار ادا کیا ہے۔
’مولانا کی مکتوب نگاری‘ :مکاتیب وخطوط بھی اردو ادب کاگراں قدر حصہ ہے ہیں ،خطوط سے نہ صرف شخصی احوال معلوم ہوتے ہیں؛ بلکہ ملک وملت کی تاریخ بھی اس سے بڑی حد تک وابستہ ہوتی ہے ،جب انسان اپنے حالات بتانا چاہتا ہے تو موجودہ صورت حال بھی اس کے سامنے ہوتی ہے ،مولانا نایاب حسن نے اس عنوان کے تحت پہلے ادبا ،علما اور صلحا کے مکاتیب وخطوط کا‌ضمنا‌ ذکر کیا ہے۔خاص بات ‌یہ ہے کہ اس باب میں اہم خواتین قلم کاروں کا بھی ذکر ہے، جن کے مکاتیب کے مجموعے موجود ہیں ،پھر مولانا کے مکتوب نگاری کی جھلکی دکھائی ہے،مولانا‌ امینی اکابرین ومعاصرین کے ساتھ اپنے عزیزوں اور شاگردوں کو باضابطہ خط لکھتے تھے ،بلکہ خط کا جواب دیتے وقت ان کی اصلاح بھی کرتے اور مناسب مشورہ بھی دیتے تھے ۔ مولانا کی خطوط نگاری کے تعلق سے نایاب حسن لکھتے ہیں :
"وہ اظہار خیال میں دوسری تحریروں کے بالمقابل یہاں زیادہ انشراح وانفتاح سے کام لیتے ہیں ۔لفظوں کے استعمال ،تعبیروں اور ترکیبوں کے برتنےاور موقع بہ موقع معنی خیز اشعار ،اردو وعربی امثال اور کہاتوں کو کھپانے کی بہت ہی سحر انگیز مثالیں مولانا کے خطوط میں بھی ملتی ہیں ۔مولانا کی شخصیت کا مومنانہ ،عارفانہ اور والہانہ رنگ بھی ان کے خطوط میں زیادہ شوخ ،زیادہ چوکھا اور بہت گہرا ہے۔”(صفحہ:١٣١)
اہل علم ادب کے لیے ایک بڑا سرمایہ ہوگا اگر مولانا امینی‌رحمۃ اللہ علیہ کے خطوط کا مجموعہ منظر عام پر آجائے ۔سفرنامہ بھی ادب کی ایک قسم ہے ،سفرنامہ سے نہ صرف کسی شہر‌اور ملک کی جغرافیائی اور تاریخی حیثیت معلوم ہوتی ہے ؛بلکہ وہاں کے علمی ادبی اور سیاسی حالات سے بھی واقفیت ہوتی ہے ،مزید برآں سفرنامہ نگار کے احساسات وجذبات کا بھی پتہ چلتا ہے ،مولانا امینی کے تعلق سے مصنف نے بتایا ہے کہ ایسے تو مولانا بھیڑ بھاڑ سے گریز کرتے تھے، کیوں کہ وہ خالص علمی،قلمی اور تدریسی آدمی تھے اور نظام الاوقات اور اپنے شیڈول کے بہت پابند تھے ؛لیکن اس کے باوجود مولانا نے علمی ،ادبی اور اصلاحی عنوان سے نہ صرف متعدد اسفار کیے ہے؛ بلکہ عربی اور اردو میں کئی اسفار کی رودادیں بھی لکھی ہیں ،وہ چوں کہ روزنامچہ اور ڈائری پابندی سے تحریر کرتے تھے؛اس لیے تقریباً ہر سفر کا احوال وہاں بھی ضرور درج کیا ہوگا ۔ان کی سفرنامہ نگاری کے تعلق سے نایاب حسن نے لکھا ہے:
"مولانا کے ان سفرناموں کی خصوصیت زبان واسلوب کے جمال ودل آویزی کے علاوہ یہ ہے کہ وہ سفر کے دوران پیش آنے والے واقعات وجزئیات ،ملنے جلنے والی شخصیات ،اہم مقامات وامصار وآثار اور جہاں جاتے تھے ،وہاں کی تاریخی ،ثقافتی ومذہبی اہمیت کا خصوصی ذکر کرتے ہیں ۔دوران سفر وہ عبرت انگیز اور سبق آموز چیزوں اور واقعات سے بھی بہت متاثر ہوتے اور سفرنامہ لکھتے ہوئے ان کا ضرور ذکر کرتے ہیں۔”(صفحہ:١٣٨)

اس کے بعد مولانا نور عالم خلیل امینی کی ١١/اردو کتابوں ، ٩/عربی کتابوں اور ١١/اردو سے عربی تراجم کا اس انداز میں تعارف تذکرہ ہے کہ جس نے ان کتابوں کو اب تک نہیں پڑھاہوگا ، یہ تعارف پڑھ کر نہ صرف اس کی دلچسپی بڑھ جائے گی؛بلکہ علم کا شیدائی اور جویا انھیں پڑھنے کے لیے بیتاب ہوجائے گا۔
اک شخص دل ربا سا کی ایک اہم خصوصیت اور کہیے کہ اس کی جامعیت ونافعیت میں چار چاند لگنے کی ایک وجہ یہ بھی ہے کہ صفحہ:١٨١ سے ٢٤٩ تک” یاد داشتیں ” کے عنوان سے خود مولانا کی تحریر شامل ہے، جو ایام طفولیت ،تعلیمی ابتدا ،بچوں کی فطرت اورمولانا کی احساس ذمہ داری ،درجہ بہ درجہ ان کے علمی کمال اور زندگی کے اتار چڑھاؤ کو بیان کرتی ہے،جس میں مولانا نے بغیر کسی مبالغہ آمیزی کےاپنے خاندان ‌،علاقہ‌ کے رسم و رواج اور اپنی بیتی تحریر کی ہے،یہ وہ سرگذشت ہے کہ پڑھنے والا ان کے الفاظ کی ترکیب ،جملوں کی ساخت کے ساتھ مولانا کی تعبیرات پر نہ صرف عش عش کرتا ہے ؛بلکہ جوں جوں پڑھتے جائیےدلچسپی بڑھتی جاتی ہے اور جی کرتا ہے کہ کاش مولانا اسے اور تفصیل سے لکھتے ۔مولانا نے مزے لے لے کر اپنے بچپن کی یادوں کو سمیٹا ہے ، لاشعوری کے زمانے میں بھی کس طرح وہ اپنی ہنرمندی اور کاری گری کا استعمال کرتے تھے، عید کے کارڈ تیار کرنے سے لے کر کجھور کی چٹائی بننے تک ،ساتھیوں کے ساتھ کھیتوں سے ساگ توڑنے اور بچپن کی بعض شرارتوں کو بھی ایسے بیان کیا ہے کہ لگتا ہے وہ آج ہی کی بات ہو،اس ساری روداد میں خوش طبعی اور ظرافت بھی ہے ،ساتھ ہی سوزو گداز بھی۔
ان کے حالات پڑھنے سے یہ معلوم ہوتا ہے، انھیں بچپن سے ہی خالی بیٹھنا پسند نہیں تھا،ذمے داری کا احساس بہت زیادہ تھا،ان کی طبیعت میں نستعلیقیت ،حسن ذوق اورنفاست پسندی شروع سے ہی کوٹ کوٹ کر بھری ہوئی تھی۔ مولانا نایاب حسن نے ان یادداشتوں میں مزید رنگ بھرنے کا کام یہ کیا ہے کہ درمیان میں تسلسل باقی رکھنے کے لئے” ١٩٦٩ کی دارالعلوم کی اسٹرائک” کو یہاں ان کی کتاب ’’رفتگانِ نارفتہ‘‘ سے بحوالہ نقل کیا ہے۔ اسی طرح آخر میں ضمیمہ کے طور پر ازدواجی زندگی اور پسماندگان کا بھی ذکر کیا ہے ۔
مولانا نایاب حسن نے ایک بڑا کام یہ کیا ہے کہ مولانا امینی کی الداعی میں شائع شدہ عربی تحریروں کا اشاریہ جلد وشمارہ نمبر ،عنوان اور تاریخ کے ساتھ یکجا کردیا ہے، جو صفحہ:٢٥٥ سے ٣٦٠ تک ہے، مولانا کے فکر و فن پر تحقیقی کام کرنے والوں کے لیے انھوں نے بڑی آسان پیدا کردی ہے ۔ اخیر میں مولانا ہی کے انداز میں ان کا مختصر سوانحی نقوش بھی درج کیا ہے اور ایک صفحے میں صاحب کتاب کا بھی تعارف ہے۔یہ حقیقت ہے کہ اس کتاب کے ذریعے ایک شاگرد نے اپنے استاذ کو نہ صرف بہترین خراج عقیدت وتحسین پیش کیا ہے ؛بلکہ علمی ، ادبی اور صحافتی حلقوں کی خدمت میں ایک وقیع تحفہ بھی پیش کیا ہے،کتاب ایسی ہے کہ پڑھتے جائیے اور سر دھنتے جائیے۔مرکزی پبلی کیشنز ،نئی دہلی نے نہایت خوب صورت انداز میں اسے شائع کیا ہے، قیمت 400/روپے ہے۔کتاب حاصل کرنے کے لیے ادارۂ علم و ادب دیوبند (9520255550) سے رابطہ کیا جاسکتا ہے۔

اسلام نے علم کو جو اہمیت دی ہے وہ کسی دوسرے مذہب میں نہیں ملتی۔سب سے پہلی وحی جو نبیﷺ پر نازل ہوئی علم ہی سے متعلق تھی۔پھر مالک الملک اور قادر مطلق کا ہمیں دنیا میں بھیجنے کا مقصد ابتلاء اور آزمائش ہے جیسا کہ ارشاد ربانی ہے:الذی خلق الموت والحیاۃ لیبلوکم ایکم احسن عملا۔ لہذا اللہ کے اوامر پر عمل اور منھیات سے پرہیز اسی وقت کیا جاسکتا ہے جب ہمیں یہ معلوم ہو کہ اللہ نے کیا حکم دیاہے؟ اور اللہ کے حکم کی معرفت کے لیے قرآن کریم اور احادیث شریفہ سے واقفیت ناگزیر ہے اس لیے علم کو اسلام نے اول درجہ کی چیز قراردیا۔

متعدد آیات اور روایات علم کی فضیلت کے سلسلے میں وارد ہوئی ہیں، بلکہ اللہ رب العزت خود قرآن کریم میں قلم کی قسم کھاتے ہیں اس سے زیادہ فضیلت و برتری کی اور کیا بات ہوسکتی ہے۔قرآن کریم میں اللہ کا ارشاد ہے ھل یستوی الذین یعلمون والذین لایعلمون۔کیا خواندہ اور ناخواندہ برابر ہوسکتے ہیں؟ ۔دوسری جگہ ارشاد ہے: فاسئلوا اھل الذکر ان کنتم لاتعلمون۔اسی طرح حدیث شریف کے اندر اللہ کے نبیﷺ نے فرمایا: طلب العلم فریضۃ علی کل مسلم۔اور بھی بہت سی آیات اور احادیث علم کی فضیلت میں وارد ہوئی ہیں۔

آج کل عصری علوم کے سلسلے میں بہت شور اور ولولہ ہے۔یہ بات بالکل درست ہے کہ اسلام کسی بھی علم کے حصول سے نہیں روکتا بشرطیکہ عقائد شرکیہ سے پاک اور توحید کے منافی نہ ہو، لیکن مسئلہ یہ ہے عصری تعلیم کا نظام تعلیم ، تعلیم کے نام پر تخریب کاری کا کام انجام دے رہا ہے ۔ مخلوط نظام تعلیم نے معاشرہ کو تباہ کرکے رکھ دیا ہے، ان عصری تعلیم گاہوں کا اصل مقصد اسلام کی تعلیمات میں شکوک وشبھات پیدا کرنا اور مسلمان بچوں سے اسلام کی روح کو ختم کرنا ہے، چناچہ کوئی بھی ذی عقل اور انصاف پسند انسان اگر جائزہ لیں تو اس کا اقرار کیے بغیر نہیں رہ سکتا کہ عصری تعلیم یافتہ طبقہ علماء کے تئیں بدظنی رکھتا ہے اور بہت سے احکام اسلام کا مذاق اڑاتا ہے علماء کو دقیانوسی، بیوقوف اور اسلام کے احکام کو نعوذ باللہ فرسودہ سمجھتا ہے، دین اسلام کو اپنی کم فہم عقل پر پرکھنے کی کوشش کرتا ہے۔

اسی لیے ضروری ہے کہ عصری تعلیم سے قبل دینی تعلیم بچوں کو دی جائے تاکہ بچہ اپنے عقائد سے واقف ہو علامہ اقبال مرحوم نے اسی کو یوں کہا ہے

جوہر میں ہو لاالہ تو کیا خوف

تعلیم ہو گو فرنگیانہ

المیہ یہ ہے کہ ہرکس و ناکس آج مدارس کے نصاب میں تبدیلی کی تو بات کرتا ہے لیکن عصری تعلیم گاہوں پر ان کی آنکھ نہیں کھلتی کہ کس قدر خطرناک نتائج سامنے آرہے ہیں بے پردگی، بے حیائی ایک عام بات بن چکی ہے۔کتنی عجیب بات ہے خیرون القرون میں اور وہ بھی صحابیات جن کی پاکیزگی میں اللہ قرآن نازل کرتا ہے ان کو پردہ کا حکم دیا جا رہا ہے اور آج کالجوں اور یونیورسٹیوں کے طلبہ وطالبات کہتے ہیں کہ سب کچھ اپنے سے ہوتا ہے آدمی خود صحیح ہو تو پردہ اور حجاب کی کوئی ضرورت نہیں۔ اسی کا نتیجہ ہے آج ریپ اور جنسی زیادتی کا کوئی شمار نہیں،اور ایک رپورٹ کے مطابق ہندوستان میں ۶؍لاکھ لڑکیاں مرتد ہوچکی ہیں۔ اقبال نے کہا ہے۔

جس علم کی تاثیر سے زن ہوتی ہے نازن

کہتے ہیں اسی علم کو ارباب نظر موت

معاشعرہ کو اگر صحیح راہ پر لانا ہے تو عصری تعلیم گاہوں کے اس نظام کو بدلنا ہوگا، مخلوط نظام تعلیم معاشعرہ کے لیے کسی زہر سے کم نہیں ہے۔المیہ یہ ہے کہ عصری علوم کے تعلیم یافتہ طبقے نے اورملت کا یہی طبقہ اکثر اہل ثروت لوگوں میں بھی شمار کیا جاتا ہے، آج تک کوئی ایسا نظام تعلیم قائم نہیں کیا جس میں کم از کم عقائد اسلام اور اہم ارکان اسلام کا ہی پاس ولحاظ ہوبلکہ اگر کسی نے اسکول اور کالج قائم بھی کیا تو وہ بھی غیروں کے شانہ بشانہ ہے اوراس کا مقصد بھی صرف پیسہ اینٹھنا ہے اور کچھ نہیں ۔دانشوران قوم وملت خصوصا علما کرام کو چاہیے کہ اب وہ صرف۲،۳ فیصد کے بارے میں ہی نہ سوچیں (جومدرسوں میں تعلیم حاصل کرنے ہیں)بلکہ امت کے اکثر حصہ کی فکر کریںاورایسے اسکول،کالج اور یونیورسٹیز کے قیام کی داغ بیل ڈالیں جن میں عصری علوم وفنون اسلامی ماحول میں پڑھائے جائیں۔

نئی دہلی :جمعیۃعلماء ہند کے صدرمولانا ارشدمدنی نے اپنے ایک بیان میں راجستھان کے ادے پورمیں آپ ﷺ کے نام پر ہونے والے قتل کی مذمت کرتے ہوئے کہا ہے کہ جس طرح ہم جگہ جگہ مآب لنچنگ کے مخالف تھے اسی طرح ہم اس غیر انسانی حرکت کو بھی امن وامان کے لئے انتہائی خطرناک محسوس کرتے ہیں، یہ ملک کے قانون اورہمارے مذہب کے خلاف ہے،ہم ہرشخص کے لئے قانون کو اپنے ہاتھ میں لینے کے لئے ہمیشہ سے سخت مخالف ہیں، ادے پور کا واقعہ انتہائی افسوسناک، غیر اسلامی اور غیر انسانی حرکت ہے۔ اس لئے اس واقعہ کی جتنی بھی مذمت کی جائے کم ہے،اس معاملہ میں بھی ملک کا قانون اپنا کام کرے گا، مولانا مدنی نے یہ بھی کہا کہ بدزبانوں کی گستاخی کی وجہ سے جو کچھ ہوا براہوا، لیکن ملک میں امن وامان اور فرقہ وارانہ خیرسگالی کو قائم رکھنے کے لئے ضروری ہے کہ اس پر صبروتحمل کا مظاہرہ کیا جائے، انہوں نے آگے کہاکہ ہم جس طرح اس واقعہ کی مخالفت کرتے ہیں اسی طرح ہم اس بات کے بھی سخت مخالف ہیں کہ کسی بھی مذہبی شخصیت کی شان میں گستاخی کرکے یا کسی مذہب کے خلاف نازیبا لفظوں کا استعمال کرکے اس کے ماننے والوں کے جذبات کو مجروح کیاجائے۔مولانا مدنی نے یہ بھی کہا کہ ملک کے مقتدر اشخاص کی خاموشی اورگستاخی کرنے والوں کی گرفتاری کا نہ ہونا وہ اسباب ہیں جنہوں نے ساری دنیامیں ملک کی شبیہ کوخراب کیاہے اورامن وامان کو آگ لگائی ہے، اس لئے ہم ایک بارپھر حکومت سے کہتے ہیں کہ جن لوگوں نے آپ ْﷺ کی شان میں گستاخی کی ہے ان کو فوراًگرفتارکیا جانا چاہئے اورقانون کے مطابق سخت سے سخت سزادی جائے تاکہ مستقبل میں پھر کوئی ایساکرنے کی جرأت نہ کرسکے، نیز پورے دنیا کے مسلمانوں کوسکون و اطمینان میسر ہوسکے۔ انہوں نے آخرمیں کہاکہ ہم توقع کرتے ہیں کہ حکومت ہماری معروضات پر توجہ دے گی اوراس انتہائی افسوسناک معاملے کے انجام کو سمجھتے ہوئے خاطیوں کو قانون کے مطابق سزادلواکر جیل بھیجوائے گی تاکہ پوری دنیا کے لوگ ہندوستان کی جمہوریت کو قدرکی نگاہ سے دیکھ سکیں۔میں اخیر میں ایک بار پھر مسلمانوں سے اپیل کرتا ہوں کہ ہر جگہ صبرو تحمل پر مضبوطی سے قائم رہیں اور ہندوستان کی اخوت و ہمدردی کی پرانی تاریخ کو زندہ رکھیں۔واضح رہے کہ صدر جمعیۃ علماء ہند رابطہ عالم اسلامی کی میٹنگ میں شرکت کے لئے ان دنوں ملیشیا گئے ہوئے ہیں اوروہیں سے راجستھان کے اس واقعہ پر بیان دیا ہے۔

ٓ استنبول: شعبہ اردو، استنبول یونیورسٹی اورشرقیات ریسرچ سینٹرکے اشتراک سے ایک سیمینار کاانعقاد کیاگیا،مہمان خصوصی مہاتماگاندھی انسٹی ٹیوٹ کے سابق صدر شعبہء اردو ڈاکٹرصابر گودڑ نے کہاکہ ماریشس میںابتدائی اسکولوں سے دانش گاہی سطح تک اردو کی تدریس ہوتی ہے اور اب طلباپی ایچ ڈی کا مقالہ بھی لکھنے لگے ہیں،اردو زبان کی صورت حال موریشس میں کافی بہترہے،یہاں ریڈیو اور ٹیلی ویژن پر باقاعدہ اردو کے پروگرام نشر کیے جاتے ہیں۔وزارت فنون وثقافت کی جانب سے ہرسال نیشنل اردو ڈرامہ فیسٹیول منعقد ہوتا ہے،موریشس میں اردو کے فروغ میں اردو اسپیکنگ یونین اورنیشنل اردو انسٹی ٹیوٹ جیسے فعال ادارے کام کررہے ہیں، ہمارے ملک میں مادری زبان نہ ہونے کے باوجود قلم کار مسلسل اردو میں ناول ، افسانے اور ڈرامے لکھ رہے ہیں، یہاں عالمی مشاعرے بھی ہوتے ہیں اورلوگ ارد ومیں شاعری بھی کرتے ہیں،اس موقع پر محترمہ مریم گودڑ نے کہاکہ موریشس کی آزادی میں یہاں کے مسلمانوں نے اہم کرداراداکیاہے۔صدر جلسہ ڈاکٹرخلیل طوقار نے ترکی اور موریشس کے قدیم روابط کاذکر کرتے ہوئے مختلف ممالک میں اردو کی صورت حال پرروشنی ڈالی۔پروگرام میں پروفیسرجلال صویدار،ڈاکٹرآرزوسودزین اور ڈاکٹرراشدحق کے علاوہ متعدد اساتذہ اور طلبانے شرکت کی۔

کل اودے پور (راجستھان) میں قتل کا جو واقعہ پیش آیا ہے اس نے ہندوستانی مسلمانوں کے مسائل میں اضافہ کردیا ہے اور اسلام کی بھی بہت غلط ترجمانی کی ہے _ کتنی عجیب بات ہے کہ مسلمان کوئی کام اللہ کے رسولﷺ کی محبت کے دعوے کے ساتھ انجام دے اور وہ کام ایسا ہو جو اللہ اور اس کے رسولﷺ کو ناراض کرنے والا اور ان کے غضب کو بھڑکانے والا ہو۔

اللہ کے رسولﷺ کی پاکیزہ سیرت پر حملے وقتاً فوقتاً عالمی سطح پر کیے جاتے رہے ہیں اور اپنے ملک میں بھی ایسی وارداتیں انجام دی جاتی رہی ہیں ۔ ایک ماہ قبل ایک بدبخت نے ذاتِ نبوی کے بارے میں بدگوئی کی _ ہونا تو یہ چاہیے تھا کہ حکومت اس کے خلاف سخت کارروائی کرتی اور اسے سزا دیتی _ یہ تو نہ ہوا ، البتہ جس صحافی نے سوشل میڈیا کے ذریعے اس معاملہ کو اٹھایا تھا اسے گرفتار کرلیا گیا ، جن مسلمانوں نے اس پر احتجاجی مظاہرے کیے ان پر پولیس نے گولیاں چلائیں ، جس سے بہت بڑی تعداد میں لوگ زخمی ہوئے ، بہت سوں پر جھوٹے الزامات لگاکر داخلِ زنداں کردیا ، متعدد افراد کے گھر مسمار کردیے گئے _ دوسرے الفاظ میں ذاتِ رسالت پر بد زبانی کرنے والوں کو کھلی چھوٹ دی گئی اور آپ سے محبت کا اظہار اور بدزبانی پر احتجاج کرنے والے مسلمانوں کو مجرم قرار دیا گیا۔

لیکن اگر حکومتِ وقت اہانتِ رسول کے مرتکب کو قرارِ واقعی سزا نہ دے رہی ہو تو کیا مسلمانوں کو اجازت ہے کہ وہ اپنے طور پر اس کے لیے کوئی سزا تجویز کر دیں؟ اور کوئی مسلمان حق رکھتا ہے کہ آگے بڑھ کر اسے قتل کردے؟ اس سوال پر سنجیدگی سے غور کرنا وقت کا تقاضا ہے۔ اس سلسلے میں درج ذیل نکات قابلِ غور ہیں :

(1) کسی بھی مذہب کی محترم شخصیات کی اہانت کرنا درست رویّہ نہیں ہے _ اسلام کا نقطۂ نظر اس سلسلے میں بالکل واضح اور دوٹوک ہے _ قرآن مجید میں ہے :”اور(اے ایمان لانے والو!) یہ لوگ اللہ کے سوا جن کو پکارتے ہیں انہیں گالیاں نہ دو(الانعام : 108) حکومت کی ذمے داری ہے کہ وہ اپنے شہریوں کو تمام مذاہب اور ان کی مقدّس شخصیات کا احترام کرنے کی تلقین کرے اور کوئی اس کی خلاف ورزی کرے تو اسے سخت سزا دے۔

(2) اسلامی ریاست میں کسی شخص کو اجازت نہیں ہے کہ وہ اللہ کے رسولﷺ کی اہانت کرے ، خواہ وہ مسلمان ہو ، یا وہاں رہنے والا کوئی غیر مسلم (ذمّی) _قرآن مجید میں ہے : ” اور جو لوگ اللہ کے رسول کو اذیّت پہنچاتے ہیں ان کے لیے دردناک سزا ہے ۔“(التوبۃ :61) اہانتِ رسول کی سزا قتل ہے ، اس پر تمام مفسّرین ، محدّثین ، فقہاء اور علماء کا اتفاق ہے _ جو شخص بھی جان بوجھ کر اللہ کے رسولﷺ کی اہانت کرے گا اور اس پر اصرار کرے گا اسے گرفتار کیا جائے گا ، عدالت میں پیش کیا جائے گا ، اس کے معاملے کی تحقیق کی جائے گی اور جرم ثابت ہونے پر اسے قتل کردیا جائے گا _ اسلامی ریاست اس معاملے میں پابند ہوگی کہ وہ قانون کے تمام تقاضوں کو پورا کرنے کے بعد سزا نافذ کرے۔

(3) کسی مسلمان کو کسی بھی صورت میں یہ حق حاصل نہیں ہے کہ وہ اپنے طور پر کسی شخص کو اہانتِ رسول کا مجرم قرار دے اور پھر اس کی گردن اڑا دے۔ یہ حق اسے اسلامی ریاست کی حدود میں بھی نہیں دیا گیا ہے اور کسی غیر اسلامی ، سیکولر یا جمہوری ملک میں بھی اسے یہ حق حاصل نہیں ہے _ وہ زیادہ سے زیادہ یہ کرسکتا ہے کہ اگر اس کی نظر میں کوئی شخص اہانتِ رسول کا ارتکاب کررہا ہے تو قانون نافذ کرنے والے اداروں کے پاس اس کی شکایت کرے ، عدلیہ میں اس کا کیس لے جائے ، حکومت کو اس جانب متوجہ کرے اور ایسے شخص کو قرارِ واقعی سزا دلوانے کے لیے تمام ذرائع ، طریقے اور تدابیر اختیار کرے ۔ لیکن اسے اس کا حق ہرگز حاصل نہیں ہے کہ وہ خود ہی جج بن جائے اور خود ہی جلّاد بھی۔

مسلمانوں کو اللہ کے رسول ﷺ سے جذباتی تعلق ہے ۔ آپ پر ایمان کا تقاضا ہے کہ آپ سے اپنے ماں باپ ، اولاد اور تمام انسانوں سے بڑھ کر محبت کی جائے۔ کسی ناعاقبت اندیش اور بد بخت کے ذریعے آپ کی اہانت مسلمانوں کے لیے ناقابلِ برداشت ہوتی ہے ، لیکن اس کے ردِّ عمل میں کوئی مسلمان کوئی ایسی حرکت کر بیٹھے جس کی اس کے دین میں اجازت نہیں دی گئی ہو تو یہ اللہ کے رسول ﷺ سے سچّی محبّت نہیں ہے۔ یہ جھوٹی محبّت ہے ، جس سے ہر مسلمان کو لازماً اجتناب کرنا چاہیے۔