پی آئی اے کی پرواز پر بچی کی پیدائش

پی آئی اے کی پرواز پر بچی کی پیدائش
اسلام آباد12دسمبر (قندیل نیوز )
پی آئی اے کی فضائی میزبان نومولود بچی کے ساتھ جنہیں ایک ویڈیو میں بچی کی دیکھ بھال کرتے دیکھا جا سکتا ہے۔
پیر کی صبح قومی فضائی کمپنی پاکستان انٹرنیشنل ایئر لائن کی پرواز میں ایک خاتون نے بچی کو جنم دیا۔تفصیلات کے مطابق مدینہ سے ملتان آنے والے پی آئی اے کی پرواز پی کے 716 میں ایک بچی کی پیدائش ہوئی جس کا رْخ بوجوہ موسمی خرابی کراچی موڑ دیا گیا تھا۔
پرواز سعودی عرب کے مقامی وقت کے مطابق اتوار کی رات ساڑے گیارہ بجے روانہ ہونا تھی مگر تقریباً پونے تین گھنٹے کی تاخیر سے روانہ ہوئی اور راستے میں اس کا رْخ کراچی کی جانب موڑ دیا گیا۔بچی کے والد کا نام عمران اور والدہ کا نام کوثر ہے جو سعودی عرب میں قیام پذیر تھے اور ان کا تعلق ملتان کے قریب ایک گاؤں سے ہے۔بچی کا کراچی کے بین الاقوامی ہوائی اڈے پر موجود سول ایوی ایشن کے ڈاکٹرز نے پیدائش کے بعد ابتدائی چیک اپ کیا۔پی آئی اے کے ترجمان مشہود تاجور نے بتایا کہ ’پی آئی اے کے عملے نے زچہ اور بچہ کو تمام تر مدد فراہم کی اور دونوں زچہ اور بچہ خیر و عافیت سے ہیں۔‘بچی کی پیدائش قبل از وقت ہے کیونکہ سول ایوی ایشن اور پی آئی اے کے قوانین کے تحت 32 ہفتے کے حمل کے بعد خواتین سفر نہیں کر سکتیں اور اس سے قبل سفر کرنے کے لیے انھیں والدین کی جانب سے حلف نامہ جمع کروانا پڑتا ہے۔جبکہ بین الاقوامی اور علاقائی پروازوں کے لیے پی آئی اے کے ڈاکٹر کا سرٹیفیکیٹ بھی درکار ہوتا ہے۔