پردے کے پیچھے کیا ہے؟

ممتاز میر
7697376137
سعودی شاہوں نے بالآخر اپنے تابوت میں اپنے ہی ہاتھوں سے آخری کیل ٹھونک لی،ہم برسوں سے سعودی شاہوں سے بیزار ہیں،محمد بن سلمان کے ورود کے بعد تو یہ بیزاری اپنی انتہا کو پہنچ چکی تھی، مگر سوچا بھی نہ تھا کہ ان کا انجام اتنی جلدی ہو جائیگا،ابھی تو تختِ شاہی پر قدم رکھے انھیں جمعہ جمعہ آٹھ دن بھی نہ ہوئے تھے،مگر ان چند دنوں میں ہی انھوں نے جو کیا ، سارا عالمِ اسلام ان کے لیے ’’بد دعاگو‘‘ ہو گیا،داخلی محاذ پر اپنے تمام حریفوں پر غالب آجانے یا تمام حریفوں کا ان کے سامنے سرنڈر کردینے کا نتیجہ یہ ہوا کہ وہ بیرونی محاذ پر بھی اپنے آپ کو سپر مین سمجھنے لگے،اس خوش فہمی نے ان سے وہ کروایا ،جو ہٹلر یا امریکی بھی آج تک نہ کر سکے تھے،جمال خاشقجی کے قتل کے نتائج جوبھی ہوں،وہ اب دنیا کے ساتھ ساتھ MBS کو بھی بھگتنا ہوں گے۔
واشنگٹن پوسٹ سے وابستہ سعودی نژاد صحافی جمال خاشقجی غالباً اسلحہ کے بین الاقوامی ڈیلر؍دلال عدنان خاشقجی کے قریبی رشتے دار تھے،کبھی ان کی شاہی خاندان سے بہت گاڑھی چھنتی تھی،ترکی کے سعودی سفارت خانے میں ان کا قتل فی الحال ایک معمہ بنا ہوا ہے،معلوم نہیں کیاہوا کہ سعودی عرب سے نکل کر وہ شاہی خاندان کے بڑے ناقد بن گئے،سعودی شاہی خاندان کے ملکی ناقد اب تک سیکڑوں کی تعداد میں موت کے گھاٹ اتارے جا چکے ہیںیا قید میں پڑے ہوئے ہیں،مگر کوئی سوچ بھی نہیں سکتا تھا کہ سعودی حکمراں اتنے احمق ثابت ہوں گے کہ غیر ملکی سرزمین پراس طرح اپنے مخالف کو قتل کروائیں گے کہ ساری دنیا دیکھے اور عبرت حاصل کرے کہ مسلمان حکمراں کیسے ہوتے ہیں،اتنے احمق کہ دو ہفتوں تک اس چیز کو چھپایا گیا ،جس کا چھپانا ممکن ہی نہ تھا،یہ تو بچے بھی کہہ رہے تھے کہ انھیں اس قتل کا اعتراف کرنا ہی پڑے گا،جو انھوں نے کیا بھی،مگر دینا بھر سے صلواتیں اور دھمکیاں سننے کے بعد،یورپی یونین اور امریکہ انھیں بار بار دھمکیاں دے رہا تھا،جرمنی نے اسلحے کی ڈیل کینسل کردی تھی،اب جانشین کہہ لیں یا اصلی حکمراں،محمد بن سلمان کہہ لیں یا MBS وہ کہہ رہے ہیں کہ ترکی میں سعودی سفارت خانہ سعودی Territory ہے؛ اس لیے اس پر سعودی قوانین کا اطلاق ہوگااور ترکی کہہ رہا ہے کہ ویانا کنونشن کے ۱۹۶۱ء کے ڈپلومیٹک ریلیشنز کے قوانین کے تحت بلا شبہ کسی بھی ملک کی ایمبسی میں میزبان ملک کے حکام اس وقت تک داخل نہیں ہو سکتے، جب تک متعلقہ قونصل جنرل اجازت نہ دے دے، مگر اس زمین کا تعلق میز بان ملک سے ہی ہوگااور جرم کی صورت میں میزبان ملک کے قوانین کی طرف ہی دیکھا جائے گا،اس بحث سے قطع نظر یہ بھی دیکھا جانا چاہیے کہ سعودی جانشین اس ضد سے کیا ثابت کرنا چاہتے ہیں؟کیا یہ کہ سعودی عرب میں قتل کی کوئی سزا نہیں ہے؟یا یہ کہ اسلام شاہوں کو کوئی سزا نہیں دیتا؟ہمارا دین اور ہماری تاریخ زمانۂ صحابہ سے نہیں ماضی قریب سے بھی ایسی مثالیں پیش کرتاہے کہ جب مطلق العنان حکمرانوں نے بھی اپنے آپ کو سزا کے لیے پیش کیا تھا،مگر اب سعودی حکمرانوں میں اسلامی حکمرانوں کی سی بات کہاں؟
جمال خاشقجی مرڈر کیس میں کچھ باتیں بڑی عجیب و غریب ہیں،جمال خاشقجی امریکہ کے ایک بڑے اخبار واشنگٹن پوسٹ سے وابستہ تھااور وہیں رہتا تھا،پھر اپنی سعودی بیوی کے طلاق کے کاغذات کیVerification کے لیے ترکی کیوں آیا؟یہ کام امریکہ میں موجود سعودی سفارتخانے میں بھی ہو سکتا تھا اور وہ وہاں زیادہ محفوظ ہوتا،کیا اسے جان بوجھ کر ترکی بھیجا گیا تھا؟اس سے کچھ ہی دن پہلے امریکی صدر نے یہ اعلان کیا تھا کہ اگر ہم سعودی حکومت کی ’’حفاظت‘‘ سے ہاتھ کھینچ لیں، تو یہ حکومت دو ہفتے بھی نہیں ٹک پائے گی،جواب میں امریکیوں کے بنائے ہوئے جانشین نے انھیں آنکھیں دکھاتے ہوئے کہا تھاکہ ہم امریکی اسلحہ پیسہ دے کر خریدتے ہیں،مزید’’ہفتہ‘‘ کیوں دیں؟یہ ہماری بلی ہمیں سے میاؤں والی صورتحال تھی،اسی دوران ایک واقعہ اور ہوا تھا،امریکی پاسٹر اینڈریو برونسن جو برسوں سے ترکی میں قید تھااور امریکہ و ترکی کے درمیان وجہ کشیدگی بنا ہوا تھا ،اسے رہا کردیا گیا،رہائی کی وجوہات تادم تحریر نا معلوم ہیں،کہا جا سکتا ہے کہ ترکی امریکی دھمکیوں سے ڈر گیا تھا،مگر اس رہائی کے بعد امریکی اعلیٰ عہدیدار کا یہ بیان کہ رہائی کسی ڈیل کی بنا پر عمل میں نہیں آئی،سوچنے پر مجبور کرتا ہے،کچھ تو ہے ،جس کی پردہ داری ہے،اگر بغیر کسی ڈیل کے رہائی ہوئی ہے، تو ہمارے نزدیک اردگان سے بڑا احمق کوئی نہیں،مگر ساتھ ساتھ یہ بھی خیال رہے کہ ساری دنیا کہتی ہے کہ امریکہ کی دشمنی سے زیادہ دوستی نقصان دہ ہوا کرتی ہے،آخری بات خاشقجی کا مرنے کے لیے ترکی آنا ہے،ایسا لگتا ہے کہ جس طرح امریکہ نے ہوا بھر بھر کے صدام حسین کو کویت پر حملے کے لیے اکسایا تھا، اسی طرح جمال خاشقجی کو بھی چابی بھر کر ترکی بھیجا گیا تھا،ایک باخبر بین الاقوامی صحافی نے اپنے ایک مضمون میں لکھا ہے کہ امریکی اور ترکی دونوں ممالک کی انٹیلی جنس کوپوری طرح یہ خبر تھی کہ خاشقجی کب سعودی قونصلیٹ جا رہا ہے،انھیں یہ بھی اندازہ تھا کہ وہاں اس کے ساتھ کیا ہو سکتاہے؛ اسی لیے اندر جانے سے پہلے اسے وہ Gadgets دیے گئے ،جو اندر جانے سے پہلے اس نے اپنی ترکی منگیتر کو دیے؛ تاکہ باہر والوں کو اس کی موت کے بعد پتہ چل سکے کہ اس کے ساتھ کیا ہوا؟اللہ اکبر!سوچیے یہ کتنی ننگی حقیقت ہے کہ سب جانتے تھے اس کے ساتھ کچھ غلط ہو سکتا ہے، مگر کسی نے اسے بچانے کی کوشش نہیں کی،آج سب کے سب قربانی کے بکرے کی قربانی سے فائدہ اٹھانے کی کوشش کر رہے ہیں،ٹرمپ کا بار بار یہ کہنا کہ اگر جمال خاشقجی کو قتل کیا گیا ہے، تو سعودیوں کو سنگین نتائج کا سامنا کرنا پڑے گا،پھر قتل کا سعودی اقرار،پامپیو کا ریاض اور وہاں سے ترکی جانا ،پھرٹرمپ کا یہ کہنا کہ ایک قتل کی وجہ سے ہم اپنے پیارے سعودی بھائیوں کا مقاطعہ نہیں کر سکتے ،یہ سب کیا ہے ؟ہم انسانوں کے درمیان رہ رہے ہیں یا وحشی درندوں کے؟
یہی وہ کلچر ہے جس کی امریکی صدور دہائی دیتے ہیں؟تھو ہے ایسے کلچر پر،مگر اس تعلق سے بڑی سنجیدگی سے امریکی عوام اور دانشوروں کو سوچنا چاہیے،قریب ۳۵؍۳۶ سال پہلے پال فنڈلے نے لکھا تھاThey Dare to Speak Out ،مگرکیا اب امریکی مائیں بانجھ ہو گئی ہیں؟اس دنیا پر حکمراں شیطانی قوتیں لگتا ہے کسی گریٹ گیم میں مصروف ہیں اور نظروں کے سامنے کھلاڑی ہیں سعودی عرب ،ترکی اور امریکہ،بظاہر تویہی لگتا ہے کہ عراق کی طرح سعودی عرب کا گھیراؤ کیا جارہا ہے،اس گھیراؤ میں شامل ہاتھ اگر ترکی کے بھی ہیں ،تو ہمیں شدید دکھ ہوگا،اس کے باوجود کہ ہم سعودی حکمرانوں کے خلاف ہیں،ہم بس اللہ سے دعا کر سکتے ہیں کہ عالمِ اسلام کو اپنے حفظ و امان میں رکھے۔