حمد

ظہورِ سرِّ نہاں لا الہ الا اللہ
شکستِ وہم و گماں لا الہ الا اللہ
پیامِ موت ہر اک بانگِ آذری کے لیے
یقینِ حرفِ اذاں لا الہ الا اللہ
اسی کی حمد میں رطب اللسان ہر شۓ ہے
کلی کلی کی زباں لا الہ الا اللہ
بجز زبونی نہیں کچھ مآلِ شوقِ بتاں
متاعِ عزِّ جہاں لا الہ الا اللہ
ہر ایک ذرہ ہے شاہد ظہورِ قدسی کا
ہر ایک شۓ میں عیاں لا الہ الا اللہ
الجھ رہی ہے خرد دامِ ایں و آں میں مگر
جنوں ہے سجدہ کناں لا الہ الا اللہ
یہ ڈور سانس کی سیمابؔ جس گھڑی ٹوٹے
ہو میرے وردِ زباں لا الہ الا اللہ
بسمل سیماب