میں عورت ہوں بدلہ لوں گی

ابوبکرعباد
میں سیتا میں مریم ہوں
درگا ہوں میں کالی ماں ہوں
جھانسی کی میں رانی ہوں
دیوکی ہوں یشودھا ہوں میں
حضرت محل اور لیلیٰ خالد
ذینب اورہولیکا ہوں
جتنے پیر پیمبر ہیں
سادھو سنت جیالے ہیں
رام رحیم اور عیسیٰ بھی
نانک چشتی خسرو سب
میرے ہی تو بیٹے ہیں
میں نے ان کو جنم دیا ہے
اپنے خون سے سینچا ہے
تم بھی میرے بیٹے ہو
میری بیٹی کے بھائی ہو
ہم سب کی رکھشا کرنے کی
لاکھوں قسمیں کھاتے ہو
پر شرم کرو ، ارے ڈوب مرو
مجھ کو رسوا کرنے اور
میری انا کچلنے کو
میری اور بیٹی کے میرے
یعنی اپنی ماں بہنوں کے
انگ انگ چباتے ہو
جیسے کتے مَری بھیڑ کو
جیسے گدھ مردار کو نوچیں
جیسے کہ زہریلا سانپ
اپنے ہی بچوں کو کھالے
ایسے ہی تم کرتے ہو
میرے جسم اورروح کے ساتھ
شرمندہ میں تب بھی ہوئی تھی
مجھ سے جنے کچھ بچے میرے
دولت اور جسموں کی ہوس میں
کنس بنا تھا،
راون اور شداد بنے تھے
ہٹلر اور فرعون بنے تھے
اب بھی میں شرمندہ ہوں
یوں کہ تم ان ہی کے پجاری
ان کی ہی اولاد ہوتم
جیسے کہ زہریلا سانب
جیسے کوئی مریل کتا
جیسے کوئی بوڑھا گدھ
بالکل ویسے ہی ہوتم
جب بھی میں کمزور ہوئی ہوں
بیٹی جب معصوم ہومیری
سو سو گھات لگاتے ہو
دین دھرم کے نام پہ اپنے
زندہ جسم چباتے ہو
پر یاد رکھو، یہ لکھ لو اب
نہیں بچوگے !
نہ تم نہ ہی نسل تری
چن چن کر میں بدلہ لوں گی
میں یا پھر میری کوئی بیٹی
تجھ سے یا پھر ونش سے تیرے
اپنا بدلہ ، ماں کا بدلہ
انّاؤ کی بیٹی کا
آصفہ اور نربھیا کابدلہ
مندر میں لٹنے والی کا
محلوں میں مرنے والی کا
کھیتوں میں جلنے والی کا
سب کا بدلہ
نہیں بچوگے
چاہے جتنا زور لگا لو
یوں کہ میں بھی عورت ہوں
میری بیٹی بھی عورت ہے