غزل


عارف امام
اِک لفظ ہُوں بچا ہوا دستِ اجل سے مَیں
روزِ ازَل نکالا گیا تھا غزل سے مَیں

وہ گُل ہوں جس کو راس نہیں ایک سی فضا
کِھلتا ہوں باغِ ہست میں ردّ و بدَل سے مَیں

فہرستِ کج ادایاں میں دونوں ہی فرد ہیں
کاکُل کے خم سے آپ تو ماتھے کے بل سے مَیں

دیکھا مجھے تو حلقے میں در آئی کائنات
ورنہ تو گھومتا تھا اکیلا ازل سے مَیں

آواز دے رہا تھا مجھے اک درختِ سبز
مسند پہ تیغ گاڑ کے نکلا محل سے مَیں

خود کو پکارتا تھا سرِ وادئ نفَس
خود ہی پلٹ کے آگیا دشت و جبل سے مَیں

بہروں کے درمیان تسلسل سے گفتگو
محفوظ رہ سکا نہ دماغی خلل سے مَیں

  • احمد علی برقی اعظمی
    19 ستمبر, 2019 at 10:12

    عارف امام کا لب و لہجہ ہے منفرد
    عرض ہُنر میں ان کے ہے پُرکیف تازگی
    احمد علی برقی اعظمی

Leave Your Comment

Your email address will not be published.*