حمادؔ خان
ہے کوئی نظر میں جو کہ منظور نظر ہے
اور اس میں یہ خوبی ہے کہ اس کو بھی خبر ہے
اک باد مخالف ہے جو رستے میں حذر ہے
اک حق کا مسافر جو اب عزم سفر ہے
ہر حال میں احساسِ وفا رہتا ہے ہم کو
ہم اہل محبت کا یہی وصف و ہنر ہے
آتی ہے خبر غیب سے ہر صبح کہ لوگو!
دنیا تو مسافر کے لئے راہ گزر ہے
اللہ رکھے باپ کا سایہ مرے سر پر
دنیا کی کڑی دھوپ میں جو مثلِ شجر ہے
قندیل جلانے کا عمل جاری رکھو تم
ہر چند کہ آندھی بھی ابھی سینہ سپر ہے
ہلکی سی ہی کچھ روشنی باقی ہے دئے ميں
خوش ہوں کہ اندھیرے کو ابھی اس سے ضرر ہے
ہر سمت ہے تاثیر ترے نازو ادا کی
کیا کم ہے کہ زاغوں میں بھی اب اسکا اثر ہے
ہر چند کہ اک غارت زدہ شخص ہے حمادؔ
لیکن تیری یادوں سے کہاں اس کو مفر ہے
