دارالعلوم دیوبند (اردو کو بین الاقوامی زبان کے درجے تک پہنچا دینے والا پہلا اور آخری ادارہ)

عظیم اختر
اردو کے نام پر کھانے کمانے، شہرت و عزت حاصل کرنے سے لے کر حکومتِ وقت کے اعلیٰ سولین ایوارڈز و اعزازات پانے اور اردو کے تحفظ و فروغ کے نام پر قائم کیے جانے والے اداروں کے اعلیٰ و پرکشش عہدوں پر شب خون مارنے والے مشاعروں اور سمیناروں کے لیے لازم و ملزوم سمجھے جانے والے شاعروں اور دانش گاہوں کے ورکنگ اور ریٹائرڈ پروفیسر حضرات تو اپنے حلوے مانڈھے کی خاطر اس حقیقت کو شاید کبھی بھول کر بھی زبان پر نہ لائیں، لیکن ہمیں اس زمینی سچائی کو رقم کرنے میں کوئی جھجک نہیں کہ اردو کو گرچہ ہندوستانی عوام کی مشترکہ زبان کہا جاتا ہے لیکن اس کی ترویج و ترقی میں اس ملک کے ایک مخصوص طبقے نے ہی عملی طورپر بنیاد گزار کا کردار ادا کیا ہے اور مدارسِ دینیہ کی شکل میں اس مخصوص طبقے کا وہ بنیادی رول آج بھی جاری ہے۔ اگر غیر جانبدار ی کا چشمہ لگا کر اردو کی ترویج و ترقی کا جائزہ لیا جائے تو یہ حقیقت روزِ روشن کی طرح واضح ہو جائے گی کہ اردو کے ابتدائی دور سے لے کر آج تک ملک اوربیرون ملک میں اس زبان کی ترویج و ترقی اور اردو لکھنے، پڑھنے اور بولنے والوں کی نسلیں تیار کرنے میں مدارسِ دینیہ نہایت خاموشی کے ساتھ ایک ایسا مثبت رول ادا کر رہے ہیں اور کرتے رہیں گے جو ہمیشہ نظروں سے اوجھل رہا ہے۔ اس سے بڑا المیہ کیا ہوگا کہ کانفرنسوں اور سیمناروں میں اردو کی ترویج و ترقی کے بارے میں گفتگو کرتے ہوئے اس زبان کے دانشور، مفکر، مدبر حضرات بڑی دور کی کوڑیاں لاتے ہیں لیکن اردو کے تئیں مدارسِ دینیہ کی خاموش خدمات کو دیدہ و دانستہ نظر انداز کر دیتے ہیں تاکہ اردو کی اسلامی اساس (Islmic Ethose)کی وہ بنیادی وجہ نظروں سے اوجھل رہے جس کی وجہ سے آزادی کا سورج طلوع ہوتے ہی ملک کی اکثریتی طبقے نے اس زبان پر اپنے گھر کے دروازے ہمیشہ کے لیے اس طرح بند کیے ہیں کہ آج ان علاقوں میں اردو اخبارات و رسائل پڑھنے والے تو کجا اردو اخبارات اور رسائل کی ردّی کی پرچھائیاں تک نظر نہیں آتیں۔
گنگا جمنی تہذیب کی امین اور ہندوستانی عوام کی مشترکہ زبان کہلوائی جانے والی اردو کے ساتھ اکثریتی طبقے کی سرد مہری اور بے وفائی نے اس کو اپنے گھر سے بے در، بے گھر تو یقیناًکر دیا لیکن دینی مدارس کی شکل میں اس کو ایک ایسی محفوظ پناہ گاہ مل گئی ہے جہاں سے اردو لکھنے، پڑھنے اور بولنے والوں کی ہر دور میں نسلیں تیار ہوتی رہیں گی۔ اس کا تمام تر سہرا دارالعلوم دیوبند کے سرجاتا ہے جس کے قائم کرنے والے خدا رسیدہ ، نیک اور صالح بزرگوں نے اردو کو ذریعۂ تعلیم بنا کر اس کی ملک و بیرون ملک میں ترویج و ترقی کا خاموشی کے ساتھ وہ ڈول ڈالا جس کے بارے میں اس وقت سوچا بھی نہیں جا سکتا تھا۔
آج ہمارے ملک کے اکابرین نے خلیجی اور یوروپین ملکوں کے بہت سے چھوٹے بڑے شہروں میں ملازمتوں اور کاروبار کے سلسلے میں مقیم اردو لکھنے، پڑھنے اور بولنے والے پاکستانی تارکینِ وطن کی چھوٹی بڑی ادبی و شعری سرگرمیوں سے متاثر ہو کر اردو کی نئی بستیوں کا نام دے دیا ہے اور اردو کی ان نام نہاد نئی بستیوں کے حوالے سے ہم اردو والوں کو یہ مژدہ سنا رہے ہیں کہ اردو اب یوروپین ملکوں کے بہت سے شہروں میں پہنچ کر ایک عالمی زبان بن گئی ہے۔ حقیقت یہ ہے کہ اردو کی ان نام نہاد نئی بستیوں میں اردو کا چلن صرف پاکستانی مہاجرین کے گھروں تک محدود ہے اور پاکستان سے دور ان ملکوں میں پیدا ہونے والے ان کے بچے بھی اردو کے حروفِ تہجی سے آشنا نہیں ہیں۔جبکہ دار العلوم دیوبند نے اپنے قیام سے لے کر اب تک اپنے یہاں دینی تعلیم حاصل کرنے والے ہزارہا غیر ملکی طلبا کو اردو کی تعلیم دے کر اچھا خاصا اردو لکھنے، پڑھنے اور بولنے والا بنا کر اردو کو عالمی سطح تک پہنچانے میں ایک خاموش کردار ادا کیا ہے جس پر اردو کی ترقی و اشاعت کے حلقوں کی ابھی تک نظر نہیں گئی اور نہ شاید کبھی پہنچے، کیونکہ ان کے یہاں یوروپ کے کسی ملک میں مشاعرے یا سیمنار کا انعقاد ہی اردو کے عالمی زبان بن جانے کا نام ہے۔
اس حقیقت سے بہت کم لوگ واقف ہیں کہ دارالعلوم کے قیام کے مختصر سے عرصہ کے بعد ہی اس کی شہرت بامِ عروج پر پہنچ گئی اور یہ مدرسہ دینیہ اپنے ابتدائی سالوں میں ہی نہ صرف ہندوستان بلکہ افغانستان، وسطِ ایشیا، انڈونیشیا، برما، تبت ، سیلون اور مشرقی و مغربی افریقہ کے ممالک کے لیے مسلمانوں کی ایک بین الاقوامی تعلیم گاہ بن گئی اور مختلف ممالک کے طلباء دینی تعلیم حاصل کرنے کی چاہ میں دیوبند کا رخ کرنے لگے جو اردو کے ذریعہ تعلیم ہونے کی وجہ سے اپنے دورانِ قیام اچھی خاصی اردو لکھنی، پڑھنی اور بولنی سیکھ جاتے ہیں اور پھر اپنے اپنے وطن پہنچ کر اس کی اشاعت کا ذریعہ بنتے ہیں۔ سید محبوب رضوی اردو زبان کی ترویج کے تئیں دارالعلوم دیوبند کی خاموش خدمات کے حوالے سے تاریخِ دار العلوم دیوبند کی پہلی جلد میں رقم طراز ہیں کہ ’’ چند سال پہلے ایک غیر مسلم ہندوستانی سیاح جنھوں نے دنیا کے بہت سے ممالک کی سیاحت کی تھی، دارالعلوم کا شہرہ سن کر دیوبند تشریف لائے تھے۔ انھوں نے بتایا کہ روسی علاقوں کی سیاحت کرتا ہواجب میں بخارا پہنچا جو وسطِ ایشیا کا مشہور مقام ہے تو وہاں ایسے لوگوں سے میری ملاقات ہوئی جنھوں نے مجھے ہندوستانی سمجھ کر اردو میں مجھ سے گفتگو کی، مجھے بڑی حیرت ہوئی کہ ہندوستان سے اس قدر دور دراز علاقے میں اتنی صاف اردو ان کو کیوں کر آئی ہوگی، میرے دریافت کرنے پر انھوں نے بتایا کہ یہ دارالعلوم دیوبند کا تعلیمی فیض ہے، اور ہم ہی نہیں بلکہ یہاں کا علمی حلقہ بالعموم اردو بولتا اور سمجھتا ہے۔ انھوں نے نہایت اخلاق و محبت سے میرے ہندو ہونے کے باوجود مجھے اپنے یہاں مہمان ٹھہرایا اور میرے اعزاز میں ایک شان دار پارٹی دی، جس کی یہ خصوصیت میں کبھی نہیں بھولوں گا کہ اس میں جس نے بھی تقریر کی وہ اردو میں کی۔‘‘
تاریخِ دارالعلوم دیوبند کے فاضل مؤلف مزید لکھتے ہیں کہ ’’ اسی طرح کا ایک واقعہ ہمارے آنجہانی وزیر اعظم پنڈت جواہر لال نہرو کے ساتھ ان کے دو رۂ روس کے موقع پر پیش آیا، پنڈت نہرو کو تاشقند کے ہوائی اسٹیشن پر وہاں کے باشندوں کی طرف سے جو سپاس نامہ پیش کیا گیا وہ اردو میں تھا، جسے وہاں کے ایک ازبک نے پڑھ کر سنایا، پنڈت نہرو کو اس پر حیرت ہوئی اور انھوں نے بھی سپاس نامہ کا جواب اردو ہی میں دیا، جسے اخبارات کے بیان کے مطابق حاضرین نے سمجھا اور جوابی تقریر کے دوران سامعین نے متعدد بار تالیاں بجائیں۔ آنجہانی پنڈت نہرو نے جب سپاسنامے کی رواں دواں اردو زبان کے بارے میں پوچھا تو وہاں کے ذمے داروں نے بتایا کہ تاشقند میں دارالعلوم دیوبند کے تعلیم یافتہ اچھی خاصی تعداد میں موجود ہیں جو خاصی روانی سے اردو بولتے اور لکھتے ہیں۔اسی طرح جنوبی افریقہ کے فضلائے دارالعلوم کی مادری زبان گرچہ انگریزی یا گجراتی ہوتی ہے لیکن وہ آپس میں خط و کتابت اردو میں ہی کرتے ہیں۔ کینیا جو مشرقی افریقہ میں واقع ہے اس کے صدر مقام نیروبی کے مسلم حلقوں میں فضلائے دارالعلوم کی وجہ سے اردو کا خاصا چلن ہے۔ رنگون میں بھی فضلائے دارالعلوم کی وجہ سے اردو اجنبی زبان نہیں ہے۔ غرض کہ اس طرح دارالعلوم دیوبند نے اردو کے دائرے کو اپنے فضلاء کے ذریعے سے دنیا کے تقریباً تمام ایشیائی و افریقی ممالک تک وسیع کر کے ہندوستان کی اس زبان کو بین الاقوامی زبان بنانے کا اہم کام پچھلے اسّی نوے برسوں سے خاموشی کے ساتھ مسلسل انجام دے رہا ہے، لیکن المیہ یہ ہے کہ اردو کے دانشور، مدبر، مفکر حضرات اور اردو کی خدمت کے نام پر توصیفی اسناد بانٹنے والے نقادوں نے آج تک اس مذہبی ادارے کی اس گرانقدر خدمت کا کھل کر تو کجا اشارتاً کنایتاً بھی اعتراف نہیں کیا کہ مبادا ان کی سیکولر سوچ پر مذہب پرستی کا ٹھپہ نہ لگ جائے۔
M: 9810439067