نہیں جذبے کی قلت قومِ مسلم کے جوانوں میں

السلام علیکم ورحمتہ اللہ وبرکاتہ
سب سے پہلے میں”خالقانِ قندیل” کو دل کی گہرائیوں سے مبارکباد پیش کرتا ہوں،اور امید کرتا ہوں کہ صحافت کی اس تاریک فضا میں آپ نے جو قندیل روشن کی ہے،اس سے جلا پاکر جلد ہی بہت سی قندیلیں جلیں گی اور صحافت پر چھائی ہوئی یہ تاریکی ان شاءاللہ کافور ہو جائے گی۔
ثانیاً میں ترکی اور اس کے مرد مجاہد”رجب طیب اردگان” کے سلام عقیدت پر مبنی جنابِ عنبر ناصری کے تازہ کلام پر انھیں ہدیہ تبریک پیش کرتا ہوں،انھوں نے نہ صرف یہ کہ ایک عمدہ اور زبردست کلام کہا ہے بلکہ ہم سب کے جذبات کو الفاظ کے پیکر میں ڈھال کر اسلامیان ہند کی طرف سے فرض کفایہ ادا کیا ہے،جزاک اللہ خیراالجزا
ثالثاً اس نظم کے ایک مصرعے "نظر جس کی گڑی رہتی ہو دشمن کے ٹھکانوں میں” کے بارے میں یہ کہنا چاہتا ہوں کہ اردو زبان وقواعد کے رو سے نظر گڑنے یا گاڑنے کے ساتھ میں کا استعمال غلط ہے، ان مواقع پر اہل زبان پہ اور پر کا استعمال کرتے ہیں، یہی شعرا اور ادبا کے یہاں متعارف ومتوارث بھی ہے، ساتھ ہی میں یہ بھی کہنا چاہوں گا کہ شاید اس غلطی کو شاعر محترم نے اتباع ردیف کی مجبوری کی بنا پر گوارہ کیا ہے،تو یہاں میں رک کر خود شاعر محترم اور دگر زبان وادب کے مشاعروں سے یہ پوچھنا چاہوں گا کہ کیا قافیہ اور ردیف کی اتباع میں زبان وبیان کی ایسی غلطیاں برداشت کی جاسکتی ہیں اور کیا مستند و معتبراردو ادبا کے یہاں اس کا کوئی وجود ہے؟
امید ہے کہ صاحبان ذوق جواب سے سرفراز فرمائیں گے۔